مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

 

رواية عــروس الجبـــايــش الفصل الحادى والثلاثون 31 بــقلم يـــاســـة الموسوي 

رواية عــروس الجبـــايــش الفصل الحادى والثلاثون 31 بــقلم يـــاســـة الموسوي 

#عــروس_الچبـــايــش🌼

بــقلم يـــاســـة الحلقة (31)

جنت ما أدري بس اتأكدت بعدين 

الغدر بـ أيامنه من كل بشر وارد 

قراري الصادر الرايدني خل يبرد

ما عندي مشاعر بـاقيه لأحد 

من تتكرر الصدمات على الإنسان 

من أي تجرب حب يبقى يتردد 

طلعوا مني جانب ما تمنيته 

وهذا أسلوبي مو إني الأختاريته 

الحقيقة التوجع الموجودة بالإنسان 

نتيجة فعل ناس تصير شخصيتة 

.................... 

يُـمن :- غمضت عيوني قوي و لميت رجليه البطني هوَ جر الغطه غطاني و تمدد بصفي وسحبني الحظه ونومني على ايده لا حچيت شي ولا انطيت اي ردت فعل احس الدنيا وگفت وبعد ما اگدر اقاوم انتهيت و هذا حدي ويا الدنيا والناس 

وخر شعري من وجهي وباسني بخدي

و برگبتي و يحچي وياي بهدوء

-- حبيبتي و عمري والله احبچ و اموت عليج

لا فتحت عيوني ولا رديت عليه واتمنى اختفي من الوجود وما اسمع اي بشر بعد رجع گال

-- العصر راح ادز امي وابوي و نكمل اجراءات الزواج كلها حتى عگب باچر نسوي الزفه ماشي

نفس الشي ما ارد عليه ولا افتح عيوني رجع فرني عليه ويبوس بيه ويگول

-- بس شوفي إني هذا الـتلعب نفسه من كلشي و اموت و اشمئز من النسوان اليوم سويت شغلات ما متخيل بعمري كله اسوي ربع منها هذا اكبر دليل على حبي الج ودليل على نفسي شلون متقبلتج وتريدج يُـمن و الله العظيم احبچ وداعت عافيتي اموت عليج صح مرات اغلط بحقج 

و اتصرف تصرفات تضوجج وما مقبوله بس اموت عليج  والله هاج شوفي شـسويتي بيه شوفي شلون انذليت ذله في سبيل بس اخليج تحسين بيه شگد أحبچ و اريدج بس شوفي وجهي و رگبتي شسويتي بيهن

 بـ اضافرج وإني عندي دوام ومركز كامل برگبتي 

ولا فتحت عيوني ولا جاوبت واحس بروحي انتهيت وما عندي قابليه حتى افتح عيوني وكارهته ومشمئرة منه ومن روحي 

رجع يگول

-- بس فتحي عيونج بس ردي لا تبقين ساكته 

نفس الشي ما اجاوب 

منـاف :- باعي فدوة رحت الشكلج باعيلي 

ليش ما تردين ليش ما تباوعين 

وگعت دمعه من عندي دمعه وحيده تايهه بين كل هذا الظلم والضياع والأذية الانا بيها مسحها بـ اصبعه و باس عيوني اثنينهن وضمني الصدرة قوي ويگول 

-- غسلني دموعج ان شاءالله 

هوَ گال هيج وانا بعد ما تحملت نطيت من البچي گمت ابچي بصوت عالي ومثل الانفجار انفجرت فقدت كل اعصابي هوَ گـام من مكانه لبس هدومه وراح يفتح بالخانات يدورلي على شي اللبسه طلع دشداشة واجى گعدني ولبسني ولم شعري 

و گعد گبالي ويگول 

-- كافي لا تبچين كافي 

حطيت راسي بين رجليه و متت انتهيت 

منـاف :- هسه ليش البچي إني زوجج بشرع الله وانتِ ما سويتي غلط إني الغلطت بحقج لا تحطين اللوم عليج إني غلطت واعترف بغلطي بس والله سويت هيج بس حتى اخليج ترجعين و تلغين فكره الطلاگ 

رفعت راسي و باوعت عليه ورديت 

-- إذا جان اكو امل ارجعلك بيوم من الايام من بعد هاي عملتك تحلم اصيرلك مره واعيش وياك بيت واحد شگد ما جنت كارهه رجعتي الك شگد ما هسه كرهتك 

بلع ريگه و يگول 

-- انتِ المراه الوحيدة الاحسها نظيفـه المراه الوحيده الما تلعب نفسي منها يُـمن إني شفت الدنية بيج

-- وانا بيك گطعت الأمل من الدنيه كافي اطلع و عوفنيييي كافيييي حرام عليك عوفنيييي عوفنييييي 

بقيت ابچي بصوت عالي و اصيح عوفني اطلع عوفنيي تقرب عليه يريد يلزمني دفعته قوي وإحس هسه يلا صارت عندي ردت فعل وصحيت على نفسي

گام من مكانه واگف ويباوع عليه وانا ابچي بكل حرگه وصوتي يوصل الآخر الدنيا من گد ما مكسورة ومقهورة 

فتح الباب وطلع دفنت وجهي بالمخده وبقيت اصيح كل صوت ولا الثاني رجع طب  و وگف بالباب ما يحچي شي بس ساكت وراها اجى گعد گبالي و يگول

-- هسه ليش البچي هذا راح تموتين 

جنت حاطه المخده على وجهي وابچي اول ما گال هيج شلت المخده وضربته بيها قوي تفاجئ من تصرفي بس ما حچى شي رجعت شلتها مره ثانية وضربته بيها من جديد لزمها واخذها من ايدي گمت

 و گفت وگفه وبقيت اضرب بيه وهوَ گاعد گام و گف ولزم اديه وانا ابچي واضرب بيه 

منـاف :- بس كافي

-- الله ياخذك لك امشييي اطلععع امشييي اكرهكككك امشيييي 

حچيت هيج و گمت اضرب بوجهي اريده بس يعوفني ويطلع لزم اديه ما يخليني اضرب روحي هنا انهاريت و فقدت تماماً

لحد ما و گعت فاقده اعصابي ما اگدر بعد اوگف على رجليه هوَ من شاف حالتي عافني وطلع بقيت بالگاع وميته بچي

ساعة ساعتين وانا على نفس الحال ونفس الونه وراها حطيت إديه جوى راسي و لميت روحي وغمضت عيوني مستسلمه 

غفيت و انا كل تعب الدنيا وظيمـها بيه 

شوية و فزيت على صوت أمـي گاعد يم راسي و تگعد بيه طفرت من مكاني وصرت بالزاوية واصيح وخررر وخررر جنت بعدني ما صاحية والهسه اللحظات العشتها باقية براسي

وگفت امي وگفه متفاجأة و تگول بسم الله الرحمن الرحيـم أسم الله ماما أسم الله

من شفت امي وانتبهت على روحي طحت بالگاع على اركبي اجت امي وگعدت گبالي نفس گعدتي على اركبها و تگول

-- شبيج أسم الله 

حطيت راسي على جتفها وگمت ابچي بصوت عالي وهيَ حطت اديها على راسي وتسمي بسم الله الرحمن الرحيم  وراها وخرتني شويـة منها و تلم بشعري وبس وخرت شعري من وجهي جمدت وبعد ما تحركت ضلت تباوع عليه ما مستوعبه

 و راها گالت

-- شنوو هذااا 

ما ارد بس ابچي بكل صوتي رجعت تگول 

-- شنووو هذااا منو سوى هيج بيج 

ما اجاوب بس دموعي تصب گامت تلطم على وجهها و تگول

-- عزا العزاني اصخام الصخمنييي ولججج شنووو هذا احچي ردي منوو سوى بيج هيج 

-- منـاف 

انصدمت و رجعت ليورة ما مستوعبه وراها گالت

-- تمم العلاقة لو بس هيج 

ما جاوبت بس گمت ابچي بصوت كلش عالي بسرعة فهمت الموضوع وردت عليه 

-- شلون اجى شلون طب احجي بنت القنادر بنت العايل احچي طايحة الحظ

حچت هيج وجرتني من شعري قوي 

يُـمن :- ما ادري 

-- ما تدرين شلوووون ولج ما تدررين شلووون ردي الله ياخذج ان شاءالله

-- ما ادري والله ما ادري جنت اقرأ بالصاله سمعت بابا الشارع انفتح عبالي عمي انوب طب منـاف گبالي تفاجأت والله ما ادري 

-- شلون طب فتحتي الباب  لو طفر من السياج ولج شلون طب والباب مسدود

-- ما ادري والله ما ادري بس سمعت باب الشارع انفتح وراها هوَ اجى 

ضلت گاعده و مصدومه وصارت صفرة 

شويـة و گالت 

-- المفتاح لگيتيه لو لا

-- لا 

-- بنت الكلب اليوم اربيها الساقطة بنت الساقطة 

حچت هيج و گامت طلعت من يمي وسدت الباب و راها ثواني و سمعتها راحت طلعت برى البيت بس وين ما ادري 

بقيت على گعدتي ومنهاره فد مره نص ساعة تقريباً و احس اختنگت والنفس انگطع عليه من گد ما بچيت اريد اتنفس ماكو 

گمت للكنتور طلعت هدوم جديدة والخاولي ورحت للحمام فتحت المي وطبيت جو الدوش واجيب بالصابون واغسل بروحي و دموعي تصب

ساعة يلا طلعت لامه شعري بالخاولي اجيت للجرباية شلت النزله وشمرها بسطل الزباله و جريت الغطا وغطيت روحي من فوك ليجوه بلا تمشيطت اصلاً نمت بالخاولي 

عيوني يوجعني و راسي عبالك صار طبل من گد ما بچيت و بطني تلوميني وتضرب على كلياتي 

اريد بس الوجع يخف شوية ماكو وره ساعتين اجت امي سمعت صوتها هيَ وتميم طبوا هيَ تسب وتغلط وهـوَ يرد الها

-- من يجي ابوي لا تحچين شي اسكتي ترى راح يلعب بيج فلم على روحتج الهم

-- والله شيريد يسوي خل يسوي هاي النماذج مو مال زلم تردهم لا مال نسوان نهينهم بالنعال

-- بس خل يوصل ابوي يابة والكاظم اليوم احرك بيتهم عليهم بسسس خل يجيي

-- معليكم انتوا لا تتدخلون اني ويا والحكومة إذا ما خليتهم يشلون الرتب من جتافه رتبة رتبه ما اطلع بنت ابوي 

-- معلينا شلووون دايس بيتنا ومعتدي على عرضنا وتگولين معليكم 

امي سكتت وانا شلت المخده وحطيتها على راسي ما اريد اسمع بعد كافي انفضحت وانشهرت كافي ياربي دخيلك اشتهرت واختزيت 

بعدهم يحچون و سمعت عمي اجى اول

 ما طب اسمعه گال الأمي بصوت عالي 

-- طايحه الحظ هيج باقيه تاهيها تمشين بشور راسج 

شهيناز :- شتريد اسكت وهوَ مدمر بنتي

-- وإني هنا شنوو دوري 

ما ردت امي رجع صاح

-- الفضيحه المسويتها اليوم بنات الشوارع ما يسونها يا طايحة الحظ يا ادب سزز

تميـم :- صل على محمد يابة وخلينا نگعد ونسوي حل الهذاك الساقط مو نگعد نلوم خالتي 

-- شنو الحل الاسويه وخالتك حطتني وره ظهرها وراحت عليهم و ضيعت كل الحق بروحتها البيتهم 

-- ما ضيعت تبقى مره وردت فعلها طبيعية من قهرها على بنتها

ما سمعت عمي رد بس تميم رجع يگله

-- فات النص بيتنا وداس البيت واعتدا على حرمته واحنه ما موجودين  والهسه إني ساكت منتظرك تجي حتى اتصرف تالي جاي هسه تذب اللوم بخالتي مو حاله هااااي 

-- تميـم اسكت عني

-- اسكتتت عنك شلووون يابة لا تخبلنييي

-- اسكت گلت 

-- يابة غير اليوم احرگه هوَ وبيته من كل عقلك تريدني اسكت صار ساعة گاعد هنا ومنتظرك على اعصابي اريدك بس تجي هسه جايني تريدني اسكت اله تخبلت

-- دزيت الهم خبر إني مگاومهم وخابروني جايين علينا بالطريق عوفني إني اتصرف ممنوع تتدخل

-- يعني دزيت الهم خبر واجوا عليك وبوس عمك بوس خالك وفضت وراحت

-- لااااا ما فضتت ولاااا راحت اصلاً رفضت جيته وجيت ابو وناس غريبة جايه بمكانهم مو همَ 

اندگ الباب راح تميم يشوفه سمعت صوت مـراد ما طب للصاله راح للديوانية وعمي 

وتميـم راحوا وراه هناك بالديوانية

بس راحوا فتحت امي الباب وطبت لگتني منتهيه فد مره سدت الباب وراها وطبت گعدت گبالي وتباوع عليه وراها گالت 

-- زهراء هيَ الماخذه المفتاح متأكدة منها بس نكرت 

صفنت ما مستوعبه مستحيل الهاي الدرجة حقيرة 

شهيناز :- لزمتها ملختها تملخ نعلت والديها بس ما اخذت منها لا حق ولا باطل تگول مو إني وما ادري 

-- كتلتيها

-- نعلت ابو الجابها مو بس كتلتها

-- ومراد

-- شبيه مراد عوزها يحچي ويفتح حلگه ومرته لاعبه هاي اللعبة القذرة 

-- يعني جان موجود من كتلتيها

-- لا ما موجود بس خالتج و ولاء و گوه خلصنها من ايدي 

-- سمعت عمي يگول متصرفه من وره ظهره قصده على زهراء

-- لا رحت البيت مناف 

ما رديت سكتت لان ادري بيها ما تسكت رجعت گالت

-- وزفيتهم هذيج الزفه خليت الما يشتري يتفرج المنطقه بكبرها لميتها عليهم بس مع الأسف ما لگيته بس امه وابو جانوا بالبيت يابة لو لاگيته چان حطيت النعال بحلگه وعلمته بالمراجل شلون تصير 

-- راح يجون ناس على عمي يما انفضحت گدام العالم شلون بيه 

-- لا انفضحتي ولا شي عاقد عليج وتعتبرين مرته بشرع الله و گدام الناس ومحد يگدر يحچي عليج العيب واللوم عليه وعلى شواربه طايح الحظ 

سمعنا صوت تميم يصيح خالــه وينج يريدها تطلع تسوي جاي الناس جاية گامت امي و انا ضليت بمكاني الناس طولوا عدنا ما جنت اسمعهم لان گاعدة بغرفتي وهمَ بالديوانية وما دام الناس عدنا انا دمعتي ما فارگت خدي 

شوية و سمعت صوت خالتي ام تميم وراها انفتح الباب وطبت هيَ ولاء انا شفتها وانا نطيت من البچي اجت گعدت يمي وحظنتني بچبت بچي بحظنها متت وهيَ تطبطب عليه وتگول 

-- كافي يمه حبيبتي كافي لا تبچين يروحلج فدوة 

ولاء :- هسه ليش تبچين قابل مسويه الحرام زوجج يعتبر

شهيناز :- اخذ روحه عزائيل ولا تزوج ولا شاف الزواج ان شاءالله 

ام تميـم :- انتِ بس صلِ على النبي مو هيج تزيدين النار حطب اجيتي كتلتي الابنية و سويتها هوسه وانوب رحتيلهم للبيت وفضحتينا وفضحتي بنتج هيج هيَ وين عقلج 

شهيناز :- شلون ترديني اسكت وهمَ متفقين عليها 

-- حقج تنقهرين بس تصرفي بعقل

ولاء :- زهراء خابرت مـراد تبچي وتگول ما ماخذته 

-- والله محد ماخذه غيرها بيوم الاجتنا اختفى قابل ابوي اجى اخذه وضمه 

-- والله خاله هيَ اخذته اصلاً كلشي تسوي سألينا عليها نعرفها كلش زين 

ام تميم :- مو وكت هذا الحچي سكتي

-- شنو سكتي ما سكتي ترى مليت منها الحيه الحقيرة 

شهيناز :- امج ما خلتني اطيح حظها ضمتها مني

ام تميم :- ما يصير تمدين ايدج عليها عيب بنت الناس هاي صار شي بيها انوب نبتلي 

-- عيب امد ايدي عليها بس مو عيب تطب البيتي وتبوگني 

-- منو گال هيَ اخذته 

-- والله محد ماخذه غيرها

سمعنا صوت مـراد يصيح ولاء ولاء گامت ولاء طلعت تشوفه و خالتي باوعت الامي مقهورة و تگول

-- المسكين وگع بوحده ملعبه واكبر حيه 

-- من ايده منطيها مجال 

-- لج داده تتلون ميت لون ويمه شي ويم عمها شي ويمي شي ويم تميم شي ويم ولاء شي ساعة السودة الحطيتها جنه بيتي 

-- انعل ابو الجابهم علينا

-- مـراد ملخها وراج تملخ و گالها إذا طلعتي انتِ منطيته المفتاح ورقه طلاگج احطها بـحظن اخوج 

-- وداعتج هيَ ماكو غيرها بيوم الاجتنا اختفى وبعد ما لگينا 

ضلن گاعدات يمي بالغرفه و ولاء كل شوية تروح لو تحظر ماي لو جاي لحد ما سمعنا صوت تميم عالي وراها الناس طلعت 

امي وخالتي اثنينهن گامن و عمي والولد اجوا للصاله اول ما فاتوا للصاله عمي گال التميـم

-- الف مره گتلك لا تصير ارعن

-- والله يابة عاد لهنا وتعذرني وصل حدي 

-- لك مو هيججج ما يصير تطرد الناس

-- ما سمعتهم شيگولون

-- سمعتت بس ما تنحل بهاي الطريقة

-- بيا طريقة تريد تحلها وهمَ جايين يگولون المفتاح هيَ منطيته اله و هوَ زوجها وهذا الشي مو اول مره يصير بينهم 

انا سمعته گال هيج وانا بعد ما گدرت حتى ارمش من الصدمة انوب خاصرتي موتتني نفسي انگطع معقوله الهاي الدرجة تطلع نذل وحقير وما عندك غيره وشرف  وتطعن بيه بهاي الطريقة 

عمي سكت و امي تخبلت بقت تغلط وتسب وتنعل انوب اجت عليه طبت تمشي سريع و جرتني من شعري وگعت من الجرباية بقت تجر بيه و تگول 

-- احچي لججج صدگ هذا الحچي لو يچذب 

طبت وراها خالتي و ولاء يردن يسكتنها وهيَ ماكو تخبلت اول مره اشوفها بهذا الحال تجر بيه من شعري وتصيح احچي ردييي 

انوب طب تميم علينا جرها مني و گومني من الگاع صرت وراه وميته من البچي مدري ابچي من القهر مدري من الصدمة مدري من الفشلة وهوَ باوع على امي وگالها

-- الله لا ينطيكم شمسوين بحالها تدرين بنتج تسوي الغلط وجاية تضربينهااا

امي گامت تلطم على وجهها و تصيح 

-- شتردوني اسويي وهوَ يطعن بيها گدام الناس شتردوني اگول وهوَ فضحها گدام العالم 

طب عمي علينا و صاح عليها تطلع من عندي طلعت وهيَ منتهيه وخالتي و ولاء طلعن وراها بقى بس تميـم يمي وانا لا حجاب لا صخام بگصتي باوع عليه ميت 

من القهر و گال

-- كافي سكتي وعيونج والدية راح اسمطه لا تبچين احنه نعرفج ونعرف اخلاقج واخلاقة كافي 

-- والله انا ما منطيته المفتاح والله

-- انعل ابو الكلب ابن الكلب ادري ما منطيته المفتاح وكل هاي خطه منه ومن اخته طايحة الحظ 

رفعت اديه امسح بوجهي رجع گال 

-- بس لا تبچين ولا تشيلين هم إني اخوج و بظهرج وراح اكسر ظهره وظهر الجابة سكتي يلا 

حچى هيج وطلع ويا ما طلع سمعته يتعارك ويا مراد يگله زهراء منطيته المفتاح كلنا نعرف بُـيمن ما تسوي هيج شغلات ومراد ساكت ما يرد بعدين رجع على امي يلوم بيها لان ضربتني وامي ما ترد بس تبچي 

بقوا يمنا لحد الليل كلش وراها راحوا وقبل لا يرحون خالتي اجت يمي وشگد حچت وياي وتنصح بيه و تسكت بيه وانوب ودعتني وراحت 

بقينا بس انا وامي وعمي اجى عمي يمي بالغرفه گعد گبالي وانا متمنيه الگاع تنشگ وتبلعني ميته بدمي گـال

هاشـم :- صح إني ما ربيتج وما صار هواي من شفتج و عاشرتج وتحملت مسؤوليتج بس أنتِ بنتي و تربيتج عندي احسن من تربية الف ابنية عدها اب وام و اجداد وعمام اعرف اخلاقج كلش زين واعرف طينتج واعرفج واعرف كل طبع بيج وادري بيج بريئه من هاي التهمه واعرف مرت مـراد هيَ لخذت المفتاح وانطته الاخوها ومن صار اللي صار شمروها براسج حتى ما نلومهم ونتگاوم وياهم ، حبيبتي بابا صح المريتي بيه صعب من زمن عمامج الرائـف الهسه منـاف بس تبقين مرتبه وحبابة مؤدبة ومحد يگدر يوصلج ولا يمسج بكلمة 

گمت ابچي رجع گـال 

-- اعرف بيه سوى هاي العمله القذرة بس حتى يخليج تقبلين ترجعين اله لان يدري بيج فقيرة ومؤدبه وتستحين تحچين بعملته وتفضحين نفسج بس ما يدري عندج ام بس الله يگدر الها 

حچي هيج وضحك 

يُـمن :- بس امي مصدگتهم 

هاشـم :- لا ما مصدگهم وتعرفج كلش زين بس انقهرت من حچيهم الطايح حظه  وصارت عدها ردت فعل بساعة عصبيه اصلاً هسه گاعدة هناك شابعة بچي 

مسحت عيوني واردد بگلبي حسبي الله ونعم الوكيل رجع عمي يگول

-- لا تبچين من هاي اللحظة وانهي الموضوع و انسي ما اريدج تذكرينه حتى بينج وبين نفسج صح صعب عليج بس راح تنسين وتقوين وإني راح ارجعلج حقج وكرامتج لا تتوقعين ساكت عنهم لا بالله بس منـاف ما تمشي ويا سوالف الهوسه اعرف شلون اخذ حقج من عنده واخذ حق دوسه بيتي منه بس هسه اريدج تبطلين بچي وتسكين و تشدين حيلج و تقرين وكل هذا حسبي ما صار والباقي عليه

-- الله يحفظك ويطول بعمرك ويحفظ بناتك ويستر عليهن 

-- ويحفظج بابا حبيبتي ، يلا گومي غسلي وجهج  

گومني للحمام اغسل و من طلعنا لگينا امي گاعدة بالصاله وتبچي بس شافتنا بسرعة دارت وجهه وتمسح بـ دموعها 

رحت للحمام غسلت و رجعت الغرفتي ربع ساعة وسمعت صوت تميم اجى وراها انفتح الباب وطبت امي باوعت عليه عدلت گعدتي اجت بصفي و باستني وگامت تبچي هيَ تبچي وانا ابچي وياها انوب مسحت وجهي وگالت

-- فوك ضيم الدنيا إني اصير عليج 

-- والله انا ما منطيته المفتاح ولا ادري بيه من اجى والله چذاب هاي اول مره هيج يسوي بيه 

-- ادري بيه أبن الكلب الناقص 

-- يما انا ما اريده خليه يطلگني

-- يطلگج و رجليه فوگ راسه بس اول شي خلينا نشوف عمج شـراح يسوي ويا

-- خاف ما يرضا يطلگني

-- مو بكيفه غير اسوي الما مسويته مره گبلي والله 

ما جاوبتها بس اباوع عليها رجعت گالت

-- تمـيم جاب عشة گومي تعشي ويانا

-- ما اريد

-- گومي يمه لا تشلعين گلبي والله ما بيه حيل بعد 

-- استحي شلون اگعد وياهم

-- ليش تستحين ما مسويه شي غلط اللي يستحي المفروض هذاك الناقص مو انتِ گومي حبيبتي يلا 

گومتني وياها لگيت عمي و تميم گاعدين بالصاله يحچون على كيف بس شافونا طلعنا سكتوا امي راحت للمطبخ تحظر الاكل و انا اجيت گعدت يمها بس احس بروحي مذلوله ومكسورة تميم اول ما شافني اجيت گعدت ضحك وگال

-- اكبر ططوه شفتها بحياتي انوب مو ططوه عادية لا من هذني البيهن ختم يعني ما يعدي يوم إذا ما تطيح بمصيبة 

ما رديت شي بس اباوعله جاوبه عمي

-- تروح الها فدوة 

-- يابة والله عندي فكرة تخبل 

اجت امي من المطبخ بـ ايدها الصينية حطتها بالگاع و ابتسمت وتباوع عليه ردله  عمي

-- وشنو هاي الفكرة بله

-- نرحل زهراء الاخوها ونزوج يُـمن المراد

ونأدب الاثنين هم زهراء وهم اخوها طايح الحظ

-- بله ما تبطل هاي السوالف 

-- والله فكرة تموت 

-- كافيي اكل وامشي للبيت يلا

-- تطردني من بيتك 

-- لا اله إلا الله 

شهيناز :- شلون يطردك هو إني استغني عنك 

-- اي اكيد ما تستغني عني باقي اجيبلج كباب شوي وصمون حار وببسي وطبقات بيض وكيمر عرب شلون بعد تستغنين عني وگعت عليج من السما

-- هههههه اليسمعك يگول من جيبك شحال لو ما تاخذهن من أبوك

-- لا يابة بس لا ابوي ناصب عليج و يگلج انطيه فلوس عمي والعباس ما منطيني ربع جاي اصرف على عائلتين من جيبي ابتليت صرت الچبير خو ما ابتليت عمي اريد الم روحي ما الحگ من وره هاشم ونسوانه 

عمي عايفه يحچي وحده و امي تضحك عليه وانا اصلاً گوه عليه گاعدة انوب سوالي لفه وانطانياها و يگول

-- تهاج هاج وجهج يلطم بس ضحكي مره من المرات خرب شكلج شگد طاقة سلبيه

شهيناز :- باچر تعال علينا الظهر نروح للأمام الكاظم نزور ونشمر الطاقة السلبيه هناك 

تميم :- باچر عندي شغل على عگب باچر اخذكم واخذ امي و عبير و ولاء

-- يااا وين تكفي السيارة 

-- تكفي نخلي يُـمن بالصندوك

ضحكت رجع گال

-- صلاوات ضحكت ولج لحگي اكلج ابوي وگع للكباب دوسه ونص يحظي 

بعده يحچي و دگ نقال عمي خالتي تخابر جاوبها ويگول

-- هلا ام تميم هلا بيج  

-- شبيه 

-- اي 

-- اي

-- وهسه وينه

-- يلا يلا هسه اجي 

قفله منه و تميم سأله

-- شكو 

-- مراد كاتل مرته 

-- اليوم للصبح كل ساعة كتله بعد ايدي اخوي السبع  

-- مو بس هيج و ماخذها شامرها بيت اهلها

-- بعد اديه و رجليه 

-- كمل بسرعة خلينا نروح 

-- وين نروح

-- للبيت نشوف شنو الموضوع

-- ياا موضوع يابة وحده سزز تحتاج تربية كتلها وداها الاهلها يربونها من جديد عليمن رايحين 

-- تگوم يا ابني

حچي عمي هيج و گام للغرفه يبدل وتميم گام و گف ويگول

-- ما خلانا نتسمم بعد 

مشي للحمام غسل و طلع وعمي طلع وراه 

اول ما راحوا گالت امي

-- عساها لا ارتاحت ولا تهنت البـ... هاي

-- هسه الولد انهجم بيته من ورا

-- لاا انتِ شكو هيَ وحده سزز خلي يربيها انعل الجابهم علينا 

گمت الغرفتي طبيت وسديت الباب و ميته من القهر شگد حاولت انام بس ابد لا غمضت ولا غفيت لحد الفجر انا گاعدة 

وثاني يوم عمي ما اجى ولا حتى تميم بس امي خابرتهم تسأل على الأخبار گالوا 

ابو منـاف واخواله مخابرين على عمي يردون يجون وعمي رافضهم ما مستقبلهم 

و زهراء بيت اهلها لحد هسه 

يومين مرن الوضع هدوء ماكو شي بس خوال منـاف السادة كل شوية يحاولون يدخلون واسطه خير و عمي يرفض اي احد يجي من طرف منـاف 

لحد ما خابره رجال سيد چبير يصير من معارف عمي وعمي كلش يحبه ويحترمه من خابر وعمي شاف الرقم تفاجئ لان صار هواي ما مخابرة ولا شايفة جاوبه وتسالم وياه ورجع السيد گاله اليوم جاي عليك رجع عمي يرحب بيه واتفق ويا وره أذان المغرب يمر علينا 

عمي وتميم گعدوا بالديوانية متانينه من العصر لحد وره إذان المغرب اجى السيد 

بقى يمنا ساعتين وراها راح و اول ما راح اجى تميم ضايج فد مره و عمي نفس الشي ضايج 

شهيناز :- شنو الموضوع شراد السيد

تميم :- شراد يعني منـاف الگـ... يعرف نقاط ضعف ابوي وگام يشتغل عليهن

-- شنو يعني 

هاشـم :- جنت موديلهم گوامه ومنو يجي من طرفهم ارفضه ردتها تصير گعده جبيرة اطيح حظه بيها گدام العشاير على دوسه البيت بس بعد ما اجى السيد سكتت وبعد ما اگدر احچي

-- شلون سكتت يعني تريد ترجعله بنتي

-- لا مو هيج بس بعد موضوع دوسه البيت سديتها الخاطر السيد

-- ومنو هذا السيد 

-- رجال أبن محمد من معارفي وصاحب موقف قديم وياي واليوم من اجى طالبني بي ولصمني على حلگي وبعد ما گدرت احچي شي

-- وبنتي شلون تاليها ويا

-- نفسه السيد باچر يجيبه يطلگها وتنتهي كل السالفه الرجال تكفل بالموضوع 

-- خاف يلعب علينا انوب

-- لا باچر ينتهي كلشي 

تميـم راح وهوَ ضايج و عمي طب للغرفه روحه بخشمه وانا شلون مشت عليه اليلة ما ادري للصبح وانا گاعدة ودموعي تصب ولا خليت دعاء لا ايه قرانيه لا تسبيح بس كون تفض على خير وتعدي واخلص وانسى لو شي قليل من العشته

ثاني يوم تانينه السيد هسه يخابر هسه يجي ماكو لا خابر ولا اجى واليوم الثالث والرابع نفس الشي السيد ماكو ما مرجع خبر النه ولا جاينه عاد طاح عمي و دگ عليه والرجال بسرعة تعذر من عمي و گاله صارت عندي شوية ضروف عائلية تعذرني ما اجيتك نهاية الاسبوع وإني يمك و احسبها الشغله محلوله ولا تفكر بيها 

عمي من سده گال هذا منـاف ما يقبل يطلگ والسيد جاي يحاول ويا واسحته مني وگال عندي ضروف

مشت الايام عليه مثل السم صرت هيكل عظمي لا اكل ولا نوم ولا راحه وبس ابچي لحد ما خابر السيد على عمي يريده يجي البيته وره الصلاة 

خابر عمي تميم واخذه واحوا البيت السيد 

ساعتين وشوية وخابر عمي على امي گالها طلگها وبعد ماله شي يمها حظريلي كل الغراض الجايبهن الها باچر انرجعهن الهم وإني هسه رايح للبيت هذاك على موضوع زهراء 

من اجت امي  و گالتلي ما حچيت شي گدامها سكتت و بس طلعت من عندي وبقيت وحدي انتهيت من البچي القهر بگلبي وياكل بيه اكل والحسرة موتتني 

هذا حسبته عوض تالي صارلي كسرة گلب وخاطر وبخت 

بيومها عمي بات بهذاك بيته و ثاني يوم راح الدوامه مناك ما اجانه بقينا ما نعرف اخبار زهراء ومراد شصار وياهم ما صار للعصر واجت خالتي ام تميم علينا 

گعدت يمي وتاخذ من خاطري وتسولف وياي و انوب سولفت على زهراء طلع السيد جايبها اليوم الصبح ومصالحها

 ويا مـراد وحال موضوعها

وباقيه لحد الان ما معترفه بسالفه المفتاح وتگلهم مو إني واخوها ما جايب طاريها ولا گايل هيَ انطتني المفتاح ساكت 

شهيناز :- شلون يجيب طاريها طايح الحظ غير شمرها براس يُـمن ويگول هيَ انطتنياه 

ام تميم :- لا مو هوَ الگايل البارحه معترف للسيد ابو المسوي هاي السالفه و يُـمن ما منطيته المفتاح وعلى اساس المفتاح عنده من زمان شلون ماخذه ما قابل يحچي  وانوب گايل للسيد ما يدري بـ ابو راح يسوي هيج حچي على يُـمن ومن داري متعارك ويا اهله 

شهيناز :- الله لا ينطيهم كون ما بيهم واحد شريف

-- معترف للسيد هوَ الغلط بحقها وهيَ فقيرة وما بيها أذيه ولا بيها صوت  وكل الغلط منه و هيَ ما بيها اي غلط 

-- يريد يجمل صورته علي اساس القذر 

-- بعد الفات مات و قسمة وما صارت

 و من اليوم وبعد لا تفتحون موضوعة ولا تذكونا خليها تعتبرها تجربة فاشلة تعلمت منها الزين والمو زين والله يعوضها الخير

 و يسهل عليها دراستها وتصير دكتورة 

-- ان شاءالله يارب 

بقن يمنا لليل وعمي من رجع من الدوام رجع علينا نام ساعة ومن گعد صاح على امي يريد الغراض الجايبهن منـاف يرجعهن بـ ايد السيد 

گمت لميتهن كلهن ودموعي عشرة عشرة 

حطيتهن بعلاگه وانطيتهن العمي اخذهن للسيد 

ساعة و رجع السيد علينه جايب الغراض گال ما قبل ياخذهن يگول هذني غراضها 

وحقها وهذا الغايب مالتها عمي اجى الامي گالها هيج وهيج يگول امي رفضت تاخذ من عنده اي شي وگالتله متنازلين عن الحاظر والغايب وكلشي ما نريد من عنده رجع الرجال اخذهن رجعهن اله ومنا وانسد موضوع منـاف بيتنا 

وهيج و مشت الايام وانا بالبيت ما اطلع ابد بالسنه مره لو اروح ويا امي للسوك لو عمي يطلعنا الفد مكان التهيت ادرس

 و ذبيت كل قوتي وحملي على القراية

لحد ما عدت الايام و تحسنت حالتي وبديت اتقبل الموضوع و حالتي صارت احسن من قبل نادر ما اتذكره واتذكر اللي سوى وياي وابچي 

اما بيت عمي بعد لا انا رحت الهم ولا امي ما انريد نشوف زهراء بس خالتي والبنات باقيات يجن علينا ومـراد من اول ما صارت المشكلة اجى اعتذر مني ومن امي والولد سوى موقف و ما قبل على مرته وحتى طردها و وصلت بينهم للطلاگ لو ما السيد يتدخل ويرجعها 

و بهاي الفترة سمعنا بيها حامل و عبير مرت تميم هم حامل وتميم يگوم ويگعد يگول غيرة مال صخول لو ما الغيرة ما حبلت الخنزيرة ما ادري منو الخنزيرة مرته مدري مرت مـراد ما حدد منو وعادي عنده اثنينهن لان ما يهمه احد يحچي على الكل بدون استثناء 

مشت الايام والوضع كلش هدو وكل واحد بينا ملتهي بحياته لحد ما وصلت الامتحانات و هنا امي گعدت من الصالون الخاطر تبقى وياي ومن الصبح لليل انا وياها نقرأ 

الايام مرت كلش صعبه وتعبت بيها بشكل مو طبيعي اخر شي گامت توصل بيه الحال اتقيأ كل شوية من گد ما عليه ضغط

 و تفكير وتعب

و بـ ايام الامتحان امي تروح وياي وتگعد بالباب لحد ما اخلص واطلع نرجع سوى الاسئله جانت كلش صعبه واكثر الطالبات تبقى تبچي من گد الصعوبة مالتها اما انا جنت مضبطه المواد وتعبانه عليهن بس مع ذلك عرفت بروحي ما طلعت درجات كامله 

لحذ ما خلصت فتره الامتحانات وگعدنا متانين النتائج وجانت من اصعب الايام ايام انتظار النتائج لحد ما وصل الموعد

 و استلمت نتيجتي بمعدل 87 ونص 

يتبع...... 

تكملة الرواية من هناااااااا 

لمتابعة  الرواية الجديدة زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كاملةمن هناااااااااا

مجمع الروايات الكامله 1اضغط هناااااااا

 مجمع الروايات الكاملة 2 اضغط هناااااا