مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

 

رواية عــروس الجبـــايــش الفصل الثاني والثلاثون 32 بــقلم يـــاســـة الموسوي 

رواية عــروس الجبـــايــش الفصل الثاني والثلاثون 32 بــقلم يـــاســـة الموسوي 

#البارت__32                                                    

#عــروس_الچبـــايــش 🌼

#بــقلم يـــاســـة 

#الحلقة (32)

بس عائلتي يمها ارتاح

ماكو بـ هل الزمن محبوب 

والياخذ غيبتي من سنين 

اگول محلل وموهوب 

............... 

يُـمن :- من بعد سنين طويلة والأول مره يمرني إحساس الفرح أول مره اعيش شعور السعادة صح ما جنت رايده هذا المعدل و حلمي جان البعيد وطموحي اكبر بس قدر الله ما شاء فعل و كلش اقتنعت بيه و ما ضجت ابد بس امي كلش ضاجت وصعد عدها الضغط لان جانت رايدتلي طبيه و معدلي ما وصل الحلمها

وانوب من شافتني فرحانه و مقتنعه بالمعدل سكتت وقنعت عمي گال فوتي اهليه إذا تقبلج أسنان او تخدير لو صيدله بس انا رفضت و گلت الهم لا اروح وين 

ما ياخذني هذا المعدل ما اريد اهلي 

خالتي والبنات كلهن اجن علينا و تباركن وسوينا عشة ثواب وجه الله تعالى وعبير والولد كلنا ملتمين بس زهراء ما اجت لان الهسه احنه ما نريدها ولا ملتقين وياها ومـراد يعرف بهذا الشي فـ من سمع بيه نجحت اجى وحده وجايب ويا هديـة

وخالتي والبنات كل وحده هدية جايبات شگد فرحت من شفت فرحتهن وحسيت اكو احد يحبني ويفرح الفرحي خالتي گالت محظرين الهدايا من قبل اسبوع لان ندري بيج بطلة وراح ترفعين راسنا

اما تميم اجى كلشي ما جايب ومن شاف الهدايا گال يصير انطيج فلوس شو فشلت من شفت الهدايا 

شهيناز :- انتَ اكبر هدية الي واليُـمن منريد غير سلامتك 

تميـم :- لا والله فشلت شنو هاي يعني اول مره ادري الينجح يجيبوله هدية شنو صايره هاي تطورات بـ اخر الزمان 

مـراد :- خل يولن هاي سوالفك قديمة گول عبير ما تقبل تجيب هدية

عبير :- لا والله العظيم شعليه إني

تميـم :- اي مو إني مـراد وهيج ارجف من مرتي هيج 

مراد ضحك و دار وجهه وخالتي باقية تغمز التميم تريده يسكت انوب يرد الها

-- لا تغمزين حجيه كلنا ندري يخاف من زهراء حتى هوَ يدري بروحه ومتقبل الموضوع برحابه صدر 

مـراد :- اي كلش اخاف حتى البارحه شلت الصينية مال العشه وعزلتها وإني واگف على الكاونتر

عمي ضحك و تميم رد

-- شكو بيها اساعدها وهيَ حامل لا عيب ولا حرام وهذا واجبي عود لازم عليه لزمه شحال لو ما أنتَ شريت الملابس هذاك الاسبوع الظهر بمكان زهراء

هوَ گال هيج واحنه متنا من الضحك طلع واحد لازم على الثاني لزمه

مـراد :- غير الجيران مطيرجية

تميـم :- اي وتخاف على نوال الزغبي لا يشوفونها شحال لو ما هيَ زهراء وجهه كله خشم انوب من حبلت صارت حامل

بـ اثنين واحد بوجهها واحد بخشمها 

                                            

              

                    

ام تميم :- كافي كل مره واحد يتشاقة ويا الثاني هيج شقه وتالي واحد يزعل من الثاني وتسونها هوسة علينا 

مـراد :- والله إني ما ازعل بس ابنج الچبير بسرعة ينغث ما يتحمل شقه

هاشـم :- هوَ اكو مثل گلبه هذا المعدل ابو علي

تميم :- يابة يرحم اهلك لا تقشمرني بهذا المدح اطلع من الأخير شگد تريد

-- هههههه طيح الله حظك عايزلك شنو

-- مو انتَ ما تگول ابو علي بس بوكت من تريد فلوس

شهيناز :- لا والله دوم يسميك ابو علي

-- خاله انتِ نفسه صايره هم تصبغين هواي هدية ما جايب وفلوس ما انطي

-- هههههه يااا شوف شلون صدگ ما تستحي

خلصنا الگعده بسوالفه الحلوة لحد ما تعشينا و شربنا جاي وراحوا البيتهم وقبل لا يروح طلع ورقه وانطاني ما قبلت اخذها گال

-- وداعت امي إذا ما اخذتيها اسويها اربع اقسام وتنسين عند اخ إسمه تميم هاي هدية تجهزين بيها ملابس للجامعة هيج اريدج تطلعين احلى وحده بالجامعة

يُـمن :- اريد الله يحفظك ويحفظلك عبير ويگومها بالسلامة ولا يحرمني منك

مـراد :- وإني مالي نصيب من هاي الدعاوي الحلوة الطالعة من هذا الگلب الطيب

-- انتَ حالك من حاله والله دائماً ادعيلك ربي يوفقك و يستر عليك ويحفظك ، انتوا اخوتي واكثر الله شاهد

تميم :- والله عاد على هذا الحچي الحلو لو ما اخاف من عبير جان بستج 

عبير :- تمشي گدامي امشيي

ضحكنا عليهم و دعناهم ورجعنا انا وامي كل وحده الغرفتها مر أسبوع عليه و انا اعيش احلى ايام حياتي واحس بنفسي كلش عظيمة و بطلة إحساس يجنن جاي إحس بيه إحساس فخر وشجاعة وقوة وكل شوية اشكر ربي على هذا العوض

صح هيَ شهادة بسيطة بس كلش فخورة بيها وشايفه نفسي بيها وحسيتها عوض عن المريت بيه

رجعت الايام تمشي هدو وطبيعية ماكو شي يذكر ما عدى انا وامي كل يوم والثاني نروح للسوك نشتري غراض وتجهيزات للجامعة وللعلم لحد الان ما طالع قبولي وما اعرف اي كليه واي قسـم راح انقبل بس انا مليت الاستمارة على الهندسة والعلوم والرياضيات 

ومن وصلت نتائج القبول طلعلي هندسة جامعة بغداد امي كيفت بس عمي گال إني اشوف لو تروحين علوم افضل بيه مستقبل وتعييناته مضمونه امي ما قبلت وبقت مصره على الهندسة وانا حرت وكل ما اصفن ويا روحي اشوف الهندسة بيها صعوبه عليه والعلوم والرياضيات افضل وحبيت فكرة اصير مدرسة شو حسيتها حلوة 

وبنفس الوكت تعييناتها اول واخر مضمون حتى الدوام  التربية اسهل من غيره ي التربية هواي بيها عطل وبيها امومه واغلبها مدرسات وطالبات احسن من ما اروح للدوائر الحكومية كلها زلم

  وعقدهم النفسية

            

              

                    

من بعد تفكير طويل اخذت قرار اروح رياضيات امي تخبلت شلون اروح رياضيات وشلون اكسر معدلي هاي الكسره ما قبلت وگالت لو ترگعين راسج بالحايط ما ترحين رياضيات هذا التعب كله التعبتيه تالي ترحين رياضيات

هاشم :- وشبيه الرياضيات غير يخبل القسم وبس الشطار يرحون هيج قسم

-- الهندسة احسن واوجهه

-- ما ندور وجهه احنه عوفيها تختار اللي يعجبها معليج بيها

-- والتعب هذا كله يروح

-- شلون يروح قابل راح تبطل وتگعد غير راح تدرس و تتخرج شتحچين انتِ

-- ناويين تموتوني

-- اسم الله عليج هههههه

سكتت بس ما مقتنعه وخالتي والولد والبنات نفس الشي بقوا يحچون وياها لحد ما اقتنعت و عافتني اروح رياضيات

مشينا للجامعة و قدمنا الاستمار وكملنا كل الاجراءات و حالياً انا طالبة مرحلة اول قسم رياضيات 

جهزت روحي و رتبت كل احتياجاتي

و حضرت هدومي من الليل إحس روحي طايرة من الفرح طبت امي لگتني احضر بهدومي ضحكت و گعدت يمي وگالت

-- تعاي احچي وياج شوية

اجيت گعدت يمها واباوع عليها ابتسمت

و گالت

-- باچر ترحين العالم جديد عالم بيه اصناف غريبة عجيبة عالم مليان ناس وكل واحد من هذول الناس يختلف على الثاني راح تمر عليج اشكال واللوان بيهم الزين وبيهم الشين وبيهم الفقير وبيهم الغني بيهم السيد والشيخ والكاولي كلهم راح تشوفيتهم وتختلطين وياهم لمده اربع سنوات

راح ترحين الهذا العالم وانتِ شايلة حلمج ومستقبلج بجفه وسمعتج وسمعتي بجفه

يُـمن إني اعرفج واعرف اخلاقج كلش زين بس مجبورة احچي هذا الحچي وياج لان إني غلطت قبلج ولليوم ادفع ثمن غلطي

ديري بالج تغلطين مثل غلط امج وتمشين وره عواطفج وتنسين اهلج وناسج

و تربيتج واخلاقج خليني مثال گامج كل

ما تجرج الهاوية 

حچت هيج وگامت تبچي وراها كملت كلامها 

-- راح يمرون عليج هواي ولد بيهم اليحبج صدگ وبيهم المراهن عليج وبيهم المطربگ اللي يريد بس يلعب ويتمعشگ

كلهم هذول لا تأمنين الهم ولا تمشين عليهم  خطوة وحده اليحبج راح يدور بابج ويجييج من الباب واليراهن عليج راح يفشل و يگعد ويسكت واللي يريد يلعب راح يشوف غيرج ويروح يلعب وياها إذا بقيتي محافظة على نفسج

و كل خطوة تخطينها فكري بيها البعيد كلش فكري بيها لحد الولد ولدج مو بس  إذا فكرتي بهذا التفكير تفوزين وتوصلين للقمة وإذا اتقشمرتي و انجريتي ويا الروجة راح تعيشين اسوء من ما عاشت امج

يُـمن :- لا تشيلين همي انا اصلاً كل جنس آدم ما اثق بيه ولا أأمن بيه طمني بالج 

-- مو بس جنس آدم يا حبيبتي وجنس حواء اخطر من جنس آدم حتى البنات ديري بالج منهن وخليج حذره وفطنه لا تنطين سرج الاي وحده ولا تصادقين اي وحده اختار التشوفينها تشبهج بالاخلاق 

و التربية اختاري المعززة نفسها ومكرمتها مو المطربگه الترگض ركضت الخيول وابد لا تگولين إني مطلقه صح الطلاق مو عيب ولا حرام بس مجتمعنا قذر ويشوف المطلقة سلعه رخيصة ويحاول يهينها

و يبيعها ويشتريها بـ ارخص ثمن ما اريد افتح وياج هيج مواضيع وارجعج للماضي واضوجج بس لازم انبهج و افهمج واخليج تعرفين المجتمع شنو ونظرته شنو من اليوم وانتِ يُـمن جديدة قوية لا تخاف ولا ينخاف عليها تروح وترجع وحدها تگعد وتمشي وتحاور وحدها بدون مساعدتي لان واثقه من نفسها ومحد يگدر يلزم عليها شي 

            

              

                    

-- ان شاءالله

-- طلعت من الدنيا بيج خسرت كل الناس وشفت الما شافه بشر ما عندي غيرج اريدج تعوضين دراستي الخسرتها وترفعين راسي وتخليني اشوف نفسي بيج

حچت هيج وگامت تبچي بصوت عالي حظنتها وابوس بيها واگول

-- لا تبچين والله راح ارفع راسج و اعوضج وافرحج ثقي بيه و ادعيلي 

-- جاي ادعيلج بكل وقت وصدگيني إني كلي ثقه بيج منا لبعد الف سنه 

باستني وطلعت وإني رجعت احضر باقي غراضي و راها نمت و الصبح گعدت بدلت وتريكت و اخذني عمـي نزلني ونزل وياي 

مشينا انا ويا بالجامعة ويدليني و يعلمني ويسولف وياي وراها وصاني على نفسي وراح اول ما راح رفعت راسي للسما ودعيتله من گل گلبي على كل طيب عاملني بيه وكل معروف قدمه الي 

بقيت وحدي امشي واباوع على الطلاب صدگ مثل ما گالت امي اشكال اللوان 

وراها مشيت على قسمي وطبيت القاعتي

گعدت بالسطر الاول يم الحايط 

كلشي غريب وجديد عليه بهذا اليوم وجاي إحس اول مره يمر بيه وحتى ما اعرف اوصفه فرح على توتر على انتصار كلهن عشتهن اول ما فتت للقاعة 

شوية و گاموا الاساتذة والدكاترة يجون علينا واحد وره واخد يگعدون يمنا ويعرفنا على نفسه ويروحون بيومها ما اخذنا اي محاضرة 

لحد ما خلص الدوام وخابرني عمي گال واگف بالباب متانيني طلعت صعدت وياه ورجعنا للبيت ومن اول ما وصلت تلگتني امي فرحانة بيه باستني وضحكت وراها گعدنا انا وياها اسولف  الها التفاصيل من اول ما طبيت لحد ما طلعت 

ومنا وبلشت اداوم وعمي حطلي خط ولد بالمنطقة من معارفه الولد بگد مراد وكلش حباب ومرتب إسمه عباس وعباس وإسمه عليه كله نخوة وشهامة بحيث من اول لحظة صعدت بيها ويا وانا ارتاحيتله

وگلبي برد من ناحيته 

جان ياخذني و ياخذ بعد وياي اثنين بنات 

ومن گد ما حباب حتى لو يگول گعدي يمي بالصدر اجي اگعد هاي انا التستحي من خيالها ما استحي منه وعادي اگعد يمه واسولف ويا لان فد مره حباب وخلوق 

اول اسبوع من الدوام ماكو لا دراسة ولا محاضرات هيج مخلصينها على گولت امي طربگه بهذا الآسبوع ما اختلطت ويا احد ولا گعدت ويا احد باقية وحدي وسلام فقط ويا بنات قاعتي وهذا هو 

لحد ما بلش الاسبوع الثاني وبلش الجد 

وبدينا بالمحاضرات والواجبات خلصنا المحاضرة الاولى وبعدنا ما ماخذين استراحة طب علينا الاستاذ الثاني إني جنت مدنگه اكتب بالدفتر ملاحظات گالهن الدكتور ومن فات الأستاذ وسلم رفعت راسي تفاجأت وإني اشوف بُـرهان 

اول مره اشوفه صار اسبوع من داومت

ما شفته ومو بس هيج الاساتذة والدكاترة هذاك الاسبوع من اجوا علينا وعرفوا نفسهم هوَ ما اجى وياهم هاي اول مره يفوت علينا 

            

              

                    

وره ما سلم علينا رجع عرف نفسه و ذكر المادة الياخذنا بيها وراها وگف بنص القاعة و بقى يسأل على إسامينه واحد واحد كل هاي الفتره هوَ ما منتبه عليه ولا شايفني مشغول ويا الطلاب لحد ما وصل السراي التفت السراي بلمحه سريعة وافتر على السره الثاني وراها مثل اللي اجته لحظة ادراك وگف وافتر سريع وباوع عليه مستغرب 

بقى واگف ثواني ويباوع عليه انوب أبتسم واجى يمي وگف مقابيلي و گال

-- هاي شنو يُـمن طالبة يمنا 

أبتسمت ورديت 

-- شوف الدنيه 

-- هههه سبحان الله شگد صغيرة ، شلونج يابة اخبارج 

-- الحمدلله على الله

-- طبعاً تفاجأت بالموضوع ابد ما خطر على بالي اشوفج طالبة هنا اهلاً وسهلاً بيج والف مبروك على نجاحج من السادس

و وصولج الهذا القسم بطلة 

-- اهلاً بيك أستاذ الله يبارك بيك 

أبتسم ودار للطلاب وگالهم

-- من محاسن الصدف اليوم اشوف هذهِ الإنسانه طالبة يمي يُـمن صديقتكم واختكم تعرفون هذهِ الإنسانه اعرفها من كم سنه و اول ما عرفتها جانت مخلصه سادس أبتدائي و تاركة الدراسة و طبعاً جانت من سابع المستحيلات ترجع كمل دراستها بس بالعزيمة والاصرار تحدت نفسها و كملت و صلت الهنا فـ احب اهنيئها وابارك الها گدامكم كلكم لان فعلاً بطلة ومثابرة وتستاهل النجاح 

يُـمن :- اشكرك أستاذ رحم الله والديك 

أبتسم بدون ما يرد ورجع يتعرف على الباقين وراها بلش محاضرة بسيطة اعتبرها بداية للموضوع وكمل وطلع من القاعة والباقين طلعوا وراه گمت انا حالي من حالهم شلت جنطتي وطلعت لگيته واگف بالممر و ولد وابنية واگفين يحچون ويا بس مو من قاعتنا يمكن من غير قاعدة 

تعديتهم ومشيت وقبل لا اطلع من الممر صاح عليه يُـمن وگفت ودرت اباوع عليه تقدم عليه مبتسم و گال

-- شلونج اخبارج الولدة شلونها

-- الحمدلله على الله انتم شلونكم خالتي ريام 

-- بخير والحمدلله ، احچيلي شوكت امتحنتي سادس شگد طلعتي معدل اخر مره شفتج جنتي جاية تقدمين ثالث متوسط مو صح 

-- اي صح والحمدلله بنفس السنه امتحنت متوسطـة ونجحت وهاي السنه امتحنت سادس و اليوم انا طالبة يمكم 

-- بطلة والله شگد معدلج

-- ٨٧ ونص

-- ما شاء الله بس شعجب هنا مو بالهندسة المفروض هسه أنتِ هندسة 

حچى هيج وضحك

-- بصراحة ما حبيت الهندسة وشفت الرياضيات مناسبني اكثر

-- موفقه ان شاءالله واي شي تحتاجين إني هنا موجود لا تتردين لحظة وحده ماشي

-- الله يسلمك ويخليك ما تقصر 

            

              

                    

-- اخذي راحتج

حچى هيج ومشى وانا طلعت برى گعدت بنفس المكان الاگعد بيه من بديت ادوم لليوم لحد ما صار وگت المحاضره الثالثة گمت طبيت وهيج لحد ما خلصت كل المحاضرات و رجعت للبيت 

اول ما رجعت سولف الامي عليه اول مره ضاجت بعدين گالت شعلينا بيه عسى ما تلگين العشيرة كلها المهم تلتهين بدراستج ومعليج بيهم هذول ماضي وانتهى موضوعهم 

وفعلاً مثل ما گالت امي التهيت بدراستي وابد ما اختلط بيه ولا احچي ويا الا ما ندر باقية على گد السؤال والجواب 

لحد ما عدا الكورس الاول والوضع جداً طبيعي و حياتي عادية مابيها اي تفاصيل حالي حال هواي ناس 

وطول هاي الفترة الراحت ما عندي اصدقاء ولا صديقات ما عدا صديقة وحده إسمها ورورد گعدتنا سوى مشيتنا سوى وكل شي نخلصه انا وياها و لا نختلط بـ احد ولا احد يختلط بينا 

استلمنا نتائج الكورس الاول والحمدلله انا الاول على قاعتي درجاتي كلها ممتاز وجيد جداً  وراها عطلنا كم يوم وانوب رجعنا بأشرنا بالكورس الثاني 

ومن اول يوم بالكورس الثاني جنه الوضع ما يطمن  و صايرة مشاحنات بين الطلاب و الطالبات وكل مجموعة صايره حزب وحدها وقاعتنا صايره ساحه حرب شنو السبب ما ادري 

ورود :- شفتيهم اشو صايرين مجاميع مجاميع 

يُـمن :- همَ من بداية السنه كروبات 

-- لا هسه صايرين واحد ما يطيق الثاني قبل شوية تعاركوا بـ باب القسم يوسف وياسر 

-- اي شفتهم و سمعت على أساس ياسر ما يقبل يوسف يصير ممثل و حاچي عليه و رايحيين موصلين الحچي وتعاركوا 

-- هسه الولد وعادي واحد يتعارك ويا الثاني البنات شكو مدخلات بيناتهم 

-- معلينا بيهن يمعودة ما تشوفينهن تعبانات فد مره 

-- احتمال بهذا الكورس راح ياخذنا دكتور بهاء 

-- ومنو هذا دكتور بهاء ليش هيج شكلج خايفه منه

-- غير بنت عمي عادت السنه وحملت من وراه فد واحد قنقينه وما يتحاجة وشايف روحه شوفه على الطلاب ولا واحد يحبه بدفعة بنت عمي 

-- الشاطر ما يعيد ولا احد ياخذ تعبه كل طالب ياخذ استحقاقه ومستحيل أستاذ او دكتور يعادي طالب بدون سبب 

-- اي صح بس مع ذلك خلينا نحتذر من عنده وننتبه بمحاضراته 

-- الله كريـم 

وفعلاً مثل ما گالت ورود ثالث محاضره واجانا دكتور بهاء بس شلون دكتور تگول عريس مو دكتور للبس والشياكة والتريب والريحة التخبل بحيث توصل قبله للقاعة مثل ابطال الأفلام و المسلسلات بس هوَ شايف روحه شوية وماله خلك يعني يحچي بتعالي ويا الطلاب 

            

              

                    

فات علينا وسلم و عرفنا بنفسه وبشنو ياخذنا وحتى ما سأل علينه ولا تعرف علينا گبل طب بالمادة و گام يشرح 

ومن يشرح يشرح بـ اصعب صيغة بحيث ستالاف لوفه يلوف بالسؤال يلا ينطيك الحل خلص شرح وطلع منطينه واجب 

من اول يوم 

اول ما طلع صار الحچي عليه بفلس حتى

انا ضجت من طريقة شرحه شلون هيج يصعبها علينا وهيَ من الأساس صعبه 

بس ما حچيت شي وراه مباشرتاً اجانا بُـرهـان سلم و گعد على الكرسي وبقى يچي بمواضيع تخص الكروس الجديد گامت وحده من البنات إسمها نفس إسمي بس شنو من هذني اليتموعن

و يسون حركات مالها معنى وكلش احسها رخيصة وتافها 

من بدأت السنه وأنا متضايقه من تشابة الإسماء بيناتنا لان الأساتذة يخربطون بيني وبينها وما احب انحط وياها بنفس الكفه اضوج

الأبنية مالت الله حلوة ومرتبة ولبسها ارقى لبس و الشعر مي وكل يوم مسوية ضفر شكل بس انا اضوج لان شوية تتموع وتتلوك للأساتذة ومستعده كلشي تسوي الخاطر تحصل درجة ودرجتين الهذا السبب تشابة الإسماء بيناتنا زاعجني 

هيَ گاعدة بالسره اللي بالوسط ثاني مقعد 

گامت و گفت و تحچي ويا بُـرهان وعبالك مو أستاذ گدامها لا حبيبها وجاي تغري بيه 

گالتله 

-- استاذ عفيه اليوم اجانه دكتور بهاء وانطانا محاضره بس كُلش صعبه ودا احس بنفسي ما مفتهمتها ودا يگولون الدكتور هذا صعب عفيه أستاذ ما تحچي ويا شوية يخفف من صعوبة الشرح ويبسط المادة مثل مجاي تبسطها انتَ 

بس فتحت الموضوع القاعة گلها گامت تحچي على الدكتور و ما قابلين عليه وما عاجبهم وصارت هوسة رجع بُـرهان گالهم

بُـرهان :- بس هدوء رجاءً 

سكتوا ويسمعون اله رجع گال

-- اولاً كل أستاذ وطريقة شرحة للمادة وكل مادة من المواد الموجودة عدكم تختلف عن المادة الثانية يعني احتمال مادة الدكتور هيَ صعبه من الأساس والمشكلة مو بشرحة انما بيها ثانياً إذا ما فهمتوا الشرح و ما عجبتكم طريقة التدريس تگدرون تحچون ويا الدكتور وتتفقون على نمط معين من الشرح يرضي كل الاطراف واكيد ما راح يقصر وياكم بالعكس دكتور بهاء من اكثر الدكاترة الحريصين على مستوى الطلاب و من ينطي مادة ينطيها بضمير حتى الكل يستفاد منها وإذا شفتوا شرحة بيه صعوبة تأكدوا هذا من صالحكم لان جاي يوصل الكم المعلومة بطريقة تخليتكم تحلون السؤال بكل الطرق اللي تجي 

رجعت گالته

-- بس مو هيج أستاذ يعني اول محاضره هذهِ ودا ارجف من گد صعوبتها إحس اعصابي انشدت من التوتر 

-- ليش ما حچيتي ويا هذا الكلام

-- ما گدرت گالوا على أساس ميقبل احد يحچي ويا ويعترض على شرحه 

            

              

                    

-- الگالوا هاي متفيدكم عدكم شي ما مفهوم و وما واضح احچوا بيه ويا استاذكم على العموم سهلة راح اشوفه ومن يجي مره ثانية تناقشوا ويا بهذا الموضوع

و هسه يلا هنا وياي نرجع المادتنا  

رجعت تعدل بشعرها وتگول

-- شكراً عيوني استاذي حنتعبك 

-- العفو ما مسوي شي واجبي هذا تفضلي استريحي 

حچى هيج وأشر الها تگعد گعدت وعبالك 

جاي تطيح مدري سكرنا مدري هيَ تسوي هيج مدري بلادي من الأساس هيج تتموع 

مو بس القاعة لا كل القسم وموگفته على رجل وحده 

رجع هوَ انطانه شرح وكمل محاضرته وطلع وراها اخذنا استراحه ومحاضره اخيرة وطلعنا للبيت 

ثاني يوم من داومنا اول محاضره جان عدنا الدكتور بهاء من فات علينا سلم و گـال

-- البارحه مكلفين عليه أستاذ بُـرهان وگايلين الشرح بيه صعوبة واحنه بسم الله بعدنا ما شرحنه شي البارحه اول محاضره النا شوكت لحگتوا تشتكون 

الكل رد بنفس الوقت الشرح صعب ونريدك تبسطه وصارت القاعة هوسة 

گال الهم بصوت حاد 

-- واحد واحد يحچي شنو هاي گاعدين بسوك خو ما سوك شنو هاي الفوضه وين الممثل 

گام يوسف گاله إني دكتور

بهاء :- إسمك اولاً

-- يوسف

-- اي يوسف احچيلي المشكلة

-- ماكو مشكلة دكتور بس شوية الشرح البارحه جان بيه صعوبه وما فهمنا عليك 

-- ومن ما فهمتوا ليش ما گلتوا دكتور عيده ما فهمنا ليش الحچي بظهري 

-- العفو منك دكتور ما حچينا شي عنك بس گلنا ما فهمنا المادة 

-- تمام استريح 

يوسف گعد والدكتور وگف وعاد شرح البارحه من جديد صخ نفس طريقة الشرح ما مغيرها بس اليوم حسيت بيها شوية بساطه مو مثل البارحه جانت كلش شديدة علينا ، ما شرح موضوع كامل على النص

و سكت وگـال

-- اليوم نكتفي بهذا الحد وباچر ان شاءالله نكمل باقي الموضوع اللي عنده سؤال يتفضل يسأل قبل لا اطلع 

رفعت يُـمن الصايعة ايدي دار باوع عليها

و گال تفضلي سألته على وحده من النقاط بس شنو سكرانه وكوه تحچي رجع گالها شنو  إسمج ردتله يُـمن دكتور دار وجهه للسبورة و رجع شرح النقطه من جديد ومن كمل وجهه سؤاله للكل هسه بعد اكو شي ما فاهمينه اكو سؤال استفسار ثاني قبل لا اطلع محد رد شال غراضه وطلع من القاعة اول ما طلع 

نفس الحچي صار عليه بس اليوم بين مؤيد ومعارض واحد من الطلاب گال 

-- والله اصلاً كلشي ما فهمت صلخهن علينا صلخ

            

              

                    

ردله الثاني

-- اي والله كلشي ما افتهمت إذا بقى هيج نصعد للعميد نحچي ويا

باوعت انا للساعة راح تبدي المحاضره الثاني ومالي خلك كلش بطني وخاصرتي يوجعني وعندي لعبان نفس قوي اليوم ما ادري شبيه وحتى اكل ما اكلت

حطيت راسي  فوگ المقعد وغمضت عيوني اقل الخمس دقايق و فات أستاذ بُـرهان انا بسرعة عدلت روحي سلم و بدأ يشرح و راها گوم اكثر من طالب يسألهم ويجابونه بعدين وصل يمي وسألني

جاوبته بس مو جواب كامل نسيت من الوجع البيه رجع گالي تفضلي وأشرلي اگعد گعدت ومنتهيه ومن كملت المحاضره اجاني و يسأل 

-- سلامات بيج شي

-- عندي لعبان نفس شوية

-- خاف مماكله شي

-- هوَ لان عندي لعبان نفس ما گدرت اكل

-- إذا تعبانه فد مره اتصلي على زوجج يجي ياخذج لا تبقين هنا وتضغطين على نفسج 

سكتت ما رديت بس إحس انحرجت هذا عباله تزوجت لان اخر مره من صارت المشكلة مال كربلاء كلهم دروا بيه نخطبت رجع گال

-- گومي طلعي برى القاعة شمي هوا بين ما يجي زوجج

-- أستاذ أنا ما متزوجة بس هسه راح اخابر على ابو الخط يجي ياخذني

استغرب وشكلة مثل الواحد متفاجئ وراها گـال

-- العفو عبالي تزوجتي

سكتت ما رديت عليه رجع گال

-- على العموم ما بيج غير العافية طلعي هسه ارتاح برى بين ما يجي ابو الخط واي شي تحتاجين انا موجود 

-- رحم الله والديك تسلم 

افتر وطلع وانا ورود طلعنا من القاعة گعدنا بمكانه مثل كل مره طلعت نقالي 

و دگيت على عباس انا ما عندي رصيد رمشتله رجع هوَ رمشلي

يُـمن :- يمكن هم ما عنده رصيد

ورود :- شلون اثنين واحد اعوى من الثاني

-- انطيني نقالج ادگ عليه

-- هههههه إني حتى ترميشه ما عندي

-- هههههه چا عليمن تحچين علينا بعد

-- سوله

-- هههههه

-- گومي نشوف منين نخابر عليه

-- منين نخابر قابل نعرف احد عيب 

-- تعاي نروح الأستاذ بُـرهان

-- لا عيب

-- ليش عيب خوش أستاذ ويعرفج بعد ليش عيب اگلج صدك هوَ وين يعرفج كل ما اريد اسألج و انسى

-- هيج معرفه قديمة يعني يعرف عمي رجل امي

-- ها خوش لعد گومي نروح عليه

            

              

                    

-- لا عوفيها هسه اصير زينه

-- بكيفج بعد

بقينا گاعدين لحد ما بدأت المحاضره الثالثة گمنا طبينا وانا بعدني نفس وضعي وقبل لا تخلص المحاضره بشوية انتهيت فد مره وگمت اشوف الدكتور اثنين من گد ما دخت ستأذنت من الدكتور و طلعت 

مشيت بالممر گوه اخطي لحد ما طلعت وصلت للكافتريا اريد اشتري رصيد گال ما عندي اسيا مخلص اخذت منه بس مي ومشيت الباب الجامعة وراها وگفت بالباب وخفت اخذ سيارة وحدي وارجع للبيت ما مسويتها گبل ومستحيل اسويها هسه كلش جبانه 

افتريت ورجعت ابو الامنية من اجيت ادخل سألني سلامات خو ماكو شي رديت 

تعبانه شويه واجيت اطلع وخفت اصعد سيارة وحدي وابو الخط ما جاي گال

تعاي گعدي هنا ارتاحي إني اخذج واني اوديج تشكرته وطلبت منه بس يصحيلي أستاذ بُـرهان 

خطيه الولد ما گال شي راح بسرعة يشوف بُـرهان دقايق بسيطه وشفتهم جايين اثنينهم بـ اتجاهنا وصل يمي وگال

-- دازه عليه سلامات 

-- تعبت فد مره وما اگدر ابقى الاخر الدوام ورحت للكافتريا اشتري رصيد حتى اخابر ابو الخط يجيني ما لگيت رصيد عدهم وخفت ارجع وحدي بس اريد اخابر من يمك إذا ما بيها زحمه

-- تعاي إني اوصلج 

-- لا تسلم انا اروح بس اريد اخابر الولد

-- گومي يابة قابل إني غريب عنج وضعج فد مره تعبان وصايرة صفره منا لمن يجي توگعين بالزايد

-- لا والله ما اريد اتعبك بس خابره

شگد حاول وياي بس ما قبلت عاد من أيس مني وشافني ما اقبل انطاني خابرت على عباس وعباس سواها عليه ظلمه هوَ بعيد ويتأخر يلا يوصل و ليش ما انطيته خبر من وكت وسبحان الله عبالك كل هاي الاحداث ترتبت بس حتى بُـرهان يوصلني وانحط بهذا الموقف

سديته من عباس ورجعت النقال البُـرهان وتشكرت منه گال

-- ها راح يجي

-- اي بس يتأخر لان بعيد على الجامعة

-- تتعالي يا بابا اوصلج ليش العناد وانتِ وضعج فد مره تعبان 

سكتت وحرت اروح ويا لو ما يصير خاف اروح وامي تلعب بيه جوله والناس منا هسه شتگول عليه من تشوفني صاعدة ويا 

بس وضعي تخربط وما اگدر حتى احچي بعد وانجبرت اوافق يوصلني 

گال طلعي منا اقرب من روحتج وياي للگراج وانتظريني ثواني اجيب السيارة واجي

طلعت من الباب و وگفت بين ما اجى طبگ واجيت انا صعدت بالمقعد الخلفي 

ما حچى شي بس شغل ومشى 

طول الطريق هوَ ساكت وانا ساكته وقبل لا نوصل بشوية كسر حاجز الصمت و گـال

-- بعدج تعبانه لو شوية احسن

            

              

                    

-- نفس الشي

-- إذا بقيتي هيج روحي للدكتور لا تگعدين عن نفسج 

-- ان شاءالله 

-- باچر لا تجين إذا شفتي نفسج تعبانه 

-- الله كريم منا الباچر 

--  نسيت اسألج بعدكم بنفس بيتكم مو

-- اي نفسه

-- خير ان شاءالله 

دگ نقاله رد اخته ريام سلم عليها و گالها

-- اي كملتها بس باچر لازم تجين

وراها گالها قبل لا ترحين حالياً يمي أبنية قبل يومين ذكرتيها وگلتي مشتاقتلها 

-- هههههه اي صح يُـمن

-- زينه الحمدلله 

-- دقيقة 

حچى هيج وانطاني نقاله گال ريام تريد تسلم عليج اخذته منه ورديت 

يُـمن :- الو

ريـام :- يمه هلا بهالصوت الحلو عاش من سمع صوتج 

-- انتِ العايشة حبيبتي 

-- شلونج اخبارج

-- على الله الحمدلله انتِ شلونج خالتي شلونها

-- بخير والحمدلله، بُـرهان گال صرتي طالبة يمهم ما تتوقعين شلون فرحتلج من سمعت بيج مكمله دراسة 

-- الله يسلمج رحم الله والديج

-- عفيه عليج عاشت ايدج بطلة دوم النجاح والتوفيق ان شاءالله

-- للجميع يارب رحم الله والديج

-- يلا حبيبتي اخذ راحتج بلكي إذا اجيت باچر اشوفج

-- ان شاءالله 

-- باي 

-- الله وياج

سديته منها و بقيت لازمه النقال بـ ايدي رجع گـال

-- الإنسان الطيب دائماً ينذكر بالخير وانتِ طيبة لذلك امي و ريـام على طول يذكرنج 

-- الله يحفظكم ويسلمكم انتم الطيبين والله

وصلنا للفرع مالنا وطبگ بالباب  مديت ايدي من وره و حطيت النقال قريب يم الكير بدون ما احچي شي ويا ما مديت ايدي اريد احطه وگع ما نازل عدل بالمكان 

يُـمن :- العفو 

-- عادي ما صار شي 

حچى هيج و دنگ شاله رجعت انا تشكرت منه ونزلت وهوَ حرك ومشى دگيت الباب فتحته امي تفاجأت لان راجعه من وكت سألتني شبيج ما رديت گبل بوجهي للحمام تقيأت 

احس انتهيت بعد وهذا حدي ما اگدر قاوم من گعدت من النوم لحد هسه أنا متخربطه اجت امي وراي وتسأل شبيج حچيت الها وضعي ومشيت الغرفتي بدلت هدومي

            

              

                    

شوية وصاحت عليه مسويه اكل وتريدني اكل حتى تنطيني علاج گعدت گوه عليه اكل وهيَ گاعدة گبالي اريد اكلها بس اخاف تحچي عليه اخر شي گلت لازم احچيلها شلون ابقى ضامه السالفه عليها طحت وگلت الها هيَ سمعت وهيَ تخبلت 

لعبت بيه جوله بهذاك الحچي وهذيج الملامه انوب گالت چا دگيتي عليه واني اجي اخذج وهاي المره سويتيها مره ثانية ديري بالج تعيدينها وتصعدين ويا انوب گوه سكتت مني لان مريضه ومالي خلك

بيومها لليل وانا مالي خلك وكل جسمي يوجعني وثاني يوم صبحت مصخنه وما رحت للدوم اخذتلي اسبوع كامل فلاونزة وصخونه ولعبان نفس وكل جسمي يوجعني وگاعدة بالبيت ما اداوم 

لحد ما صرت زينه يلا داومت واول ما دومت اجت ورود من الباب تسأل عليه وتتحمدلي بالسلامه لحد ما بدأت المحاضرة الاولى للمحاضره جان دكتور بهاء عدنا اول ما طب گال 

-- كل الشعبه ناقص منها اربع درجات واريد اعرف شلون تنجحون بهذا الكروس

صارتلك هوسه بالقاعة كلها تحجي ويا وتتوسل بيه وهوَ خصم الحچي وگال 

-- انتهى الموضوع وطلعوا اوراق عدكم امتحان 

ليش هيج اليوم گالب ما ادري لان جنت غايبة وما مفتهمه السالفه سألت ورود شكو ردت 

-- بعدين تحچيلج هسه خليني احير بالامتحان الطلع فجأة

طلعت انا ورقه  حالي من حال الطلاب

و بدينا نمتحن جاب النا بس سؤال واحد واتحدى عميد الجامعة بكبره يجاوب عليه خلانا نفر بـ إذاناتنا وانطانه مده نحل بيها السؤال عشر دقايق بس وراها سحب الاوراق وحل السؤال على الصبورة وگال

-- هذا جواب السؤال يا شطار 

انا شفت الجواب وانا احس صعد ضغطي 

ابد مو يم اجابتي بس ما حچيت شي ضليت ساكته واحس رجعت صخنت من القهر 

الدكتور طلع والطلاب صارت رطينه هذا اليغلط عليه وهذا اليسبه وهذا اللي يلوم بالباقين رجعت انا سألت ورود

-- شكو ليش هيج ضايج الدكتور ونقصنا درجات وسوالنا أمتحان مفاجئ

-- البارحه وره ما خلص محاضره وطلع واحد من الطلاب طگه بزيج خلاه يرجع رجوع علينا سألنا منو سوى هيج محد رد

رزلنا رزاله من هاي الغسل واللبس وعافنا وطلع واليوم اجى يكمل علينا باقي الرزايل

-- صدگ چذب شلون اخلاق هاي اكو واحد مربه يسوي هيج سواية 

-- يمعودة ولد شوارع هذاك من هذاك ابن الاوادم

-- اي والله بس احنه شنو ذنبه يعاقبنا بذنب غيرنا

-- شمدريني ، انوب مو بس هيج رايحه وراه يُـمن الصايعة عود واسطه خير تالي زافها هذيج الزفه وطاردها 

-- تستاهل شكو تروح وراه 

-- يمعودة هيَ هاي ما مخليه دكتور ما حايبته للطريق و ما مخليه طالب عنده حمر وخضر ما ساحلته عبالها دكتور بهاء نفس الباقين گالت اروح استغل الوضع 

-- عفيه شلون هيج جريئات منين تجيهن هاي القوة وهيج باقيات حلل 

-- متعلمات من الصغر هاي شغلتهن مو جديدة عليهن 

-- الله يستر علينا 

دخلت علينا دكتورة بسرعة سكتنا بس الظاهر وحده من الگاعدات ورانا إسمها وداد سامعتنا وهاي فد وحده قذرة اقذر من يُـمن الصايعة وتراهن مراهن على الولد وتجيبه يعني هيَ ويُـمن الصايعة صديقات وفد مره زايعتهن الگاع رايحه وناقله الحچي مالنا اليُـمن 

وبس طلعنا انا ورود بعدنا بـباب القسم واجت علينا لمت علينا القسم بكبره 

كلمة خزتنا وشهرتنا قليلة مو هاي المايعك الگوه تطلع منها الكلمة لا طلعت اللسانها شطوله واليوگع بـ ايدها امه داعية عليه 

ورود تحاجيها تريدها بس تسكت وهيَ عايفه ورود وراجعه عليه عبالك متحمله ولگت فرصه حتى تفرغ بيه 

و انا الچان الحايط حچى ورد رديت عليها بقيت بس ساكته اخر شي ادخلوا ولد قاعتنا وحچوا وياها حتى تسكت ردت عليهم 

-- دا شوفونها هاي المسويه نفسها مؤدبة باقية تحچي عليه وتطعن بي

يُـمن :- ما حچيه عليج ولا عندي شي وياج استحي منا الناس فضحتينا واحنه بحرم جامعي 

-- اوووي عيني حرم جامعي لعد ما تستحين انتِ وتحطين أحترام للحرم الجامعي شوفي عيوني إني واضحه وضوح الشمس ومو مثلج اتختل ويا الاساتذة بالبوگات واطلع يسيارتهم و الله اعلم وين ياخذوني وشيسون وياي ومن اجي هنا امثل دور العفه والشرف براس الطلاب 

يتبع..... 

تكملة الرواية من هناااااااا 

لمتابعة  الرواية الجديدة زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كاملةمن هناااااااااا

مجمع الروايات الكامله 1اضغط هناااااااا

 مجمع الروايات الكاملة 2 اضغط هناااااا