مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

رواية أنا لك ولكن الفصل الثالث وعشرون بقلم سارة بركات حصريه في مدونة موسوعة القصص والروايات

رواية أنا لك ولكن الفصل الثالث وعشرون بقلم سارة بركات حصريه في مدونة موسوعة القصص والروايات

رواية/أنا لك ولكن  .. بقلم/ سارة بركات

الفصل الثالث والعشرون 

آية كانت شايفة الصدمة على وش أدهم وهو بيكلم سلمى فى الموبايل...

أدهم بصدمة:"إنتي بتقولي إيه! إنتي بتتكلمي بجد!"

سلمى بدموع:"تعالى يا أدهم البيت بسرعة أرجوك."

أدهم قفل المكالمة وجري بسرعة بره البيت، وآية بتجري وراه..........

آية بصوت مسموع:"أدهم رد عليا فى إيه؟!"

كل إللي كان همه إنه يركب عربيته ويتحرك بسرعة ويروح لمامته،،،ركب عربيته وآية ركبت جمبه بسرعة قبل مايتحرك...

وكان بيسوق بسرعة رهيبة.....آية بصت على الطريق...

آية بصدمة:"حاسب يا أدهم هنعمل حادثة."

أدهم فجأة حود بالعربية فى جانب الطريق ووقفها..

وفضل يضرب فى جادول العربية بعصبية.....

أدهم:"غبي غبي غبي غبي."

آية بقلق:"إيه إللى حصل؟!"

أدهم بحزن وهو بيبص لآية:"أمي هتموت يا آية، أنا مش هقدر أسامح نفسي."

آية وهى بتحط إيديها على كتفه وبتهديه:" مافيش حاجة وحشة هتحصل ، صدقني كل حاجة هتبقى تمام."

أدهم بتنهيدة:"ياريت كل حاجة تبقي تمام زي مابتقولي."

آية بإبتسامة:"ماتقلقش، يلا بينا."

أدهم إبتسملها وإتحرك بالعربية، وصلوا بيت والدته بعد فترة بسيطة..نزلوا من العربية وأدهم جري على البيت وآية كانت وراه ..فتح الباب بالمفتاح إتفاجئ بمامته وسلمى قدامه وهما بيتفرجوا على التليفزيون وبيضحكوا...سلمى أول واحدة أخدت بالها من أدهم...

سلمى بتوتر:"أدهم!."

والدته بدهشة:"أخيرا جيت يا إبني!."

أدهم كان واقف مش مستوعب إللى بيحصل قدامه..آية كانت واقفة بتبص لوالدة أدهم إللى قاعدة على كرسى متحرك ومستغربة إن إزاي أدهم يسيب والدته وهى محتاجاه أكتر واحد...

أدهم بعدم استيعاب وهو بيبص لسلمى:"هى دى إللى ماما بتموت يا ادهم؟!"

سلمى بتوتر وهى بتقوم من مكانها:"ماهو الصراحة قلت أكذب عليك عشان ماما كان نفسها تشوفك وقلت أعملهالها مفاجأة.."

أدهم:"طب تعالى بقا...."

أدهم راح نحيتها لكن آية مسكته من دراعه......

آية:"خلاص يا أدهم إهدى حصل خير، المفروض تفرح."

أدهم بصلها بضيق:"أفرح!،إنتى بتقوليلي كده ، هو مش إنتي كنتي شايفاني من شوية كنت عامل إزاي؟!"

آية وهي بتبص لوالدته:"إهدى بس يا حبيبي الموضوع مش مستاهل..."

أدهم شال دراعه من إيدها......

أدهم بغضب وهو بيبصلها:"أنا مستنيكي بره عشان نمشي."

أدهم خرج وركب عربية ومسح على شعره بضيق كان نفسه يحضنها ويبوس إيدها بس هيحط عينه ف عينها إزاي بعد إللي حصل بسببه ...

آية وقفت قدام والدة أدهم ونزلت على الأرض عشان تبقى في نفس مستواها..

آية بإبتسامة جميلة:"إزيك يا طنط؟"

والدة أدهم وهى بتبصلها بدموع محبوسة جوا عينيها:" إنتى خطيبة إبني حبيبي وضنايا صح؟ تعرفي إنك فيكي شبه منه وريحتك من ريحته."

آية وهى بتحضنها:" ممكن تعتبريني هو بالظبط."

والدة أدهم بدموع:" أكيد، أنا مش عارفة هو بيعمل معايا كده ليه، أنا إعتذرتله كذا مره وبرده بيعاقبني، أنا عملت إيه بس عشان يوصل لكده."

آية:"ماتقلقيش وإحنا في طريقنا لهنا ، أدهم كان هيتجنن لما سلمى قالتله إنك تعبانة."

والدة أدهم بفرحة:"بجد!"

آية:"اه بجد،كان هيموت من القلق عليكي."

آية وهى بتبص لسلمى:"ليه ياسلمى تعملي كده، ماكان ممكن تقولي أي حاجة تانية غير حوار الموت ده."

سلمى كانت قاعده زعلانة من طريقة أدهم وبصت لآية:"مكنش هييجي غير بكده، إنتي ماتعرفيش أنا حاولت أد إيه عشان ييجي حتى بس يشوفها."

آية بإبتسامة خفيفة:"خلاص تمام حصل خير هتصرف أنا، عن إذنكم."

آية خرجت لأدهم وركبت العربية ببطئ وكانت ماسكة بطنها من التعب..

أدهم بإستفسار وهو ملاحظ تعبها:"مالك فيكي إيه؟!"

آية بتعب مبالغ فيه:"مافيش."

أدهم:"هو إيه إللي مافيش هو إنتي مش شايفة نفسك؟!"

آية بصراخ وهى بتضغط على بطنها:"ااااااااااااااااااه."

أدهم بدأ يتحرك بالعربية........

آية بصراخ من التعب:"إنت بتعمل إيه؟"

أدهم بقلق وعصبية في نفس الوقت:"أكيد هاخدك على أقرب مستشفى."

آية بصراخ:"مش هنلحق ، إلحقني مش قادرة."

أدهم وهو بيفكر بسرعة وبص على بيته...

أدهم بإستسلام:"خلاص هتصرف."

أدهم نزل من العربية و راح فتحلها الباب وشالها....

فضل يرن على الجرس كتير لحد ما سلمى فتحت الباب.....

أدهم بعصبية:"إوعى من وشي."

سلمى بعدت ووسعت لأدهم الطريق وهى مستغربة شايل آية ليه...أدهم جري على أوضته وحطها على السرير براحة....

أدهم بصوت عالى وهو بيمسح على شعره من الضيق:"تعالى يا سلمى بسرعة."

آية كانت نايمة قدامه وبتتلوى من التعب، سلمى دخلت وسابت الباب مفتوح ومامته إتحركت بالكرسي المتحرك ووقفت بيه قصاد الباب وبتشوف إللى بيحصل....

أدهم لسلمى بعصبية:"هاتى مسكنات بسرعة وإعملي أي سوايل دافيه ، إتصرفي، وهاتي أى قماشة."

سلمى خرجت من الأوضة عشان تجيب إللي طلبه ومامته كانت بتتفرج على طريقة معاملته مع آيه، وبعدها بصت لآية إللى بتبصلها وبتغمزلها من غير ما أدهم ياخد باله...

آية لأدهم:"آه يا أدهم مش قادرة أنا بموت."

أدهم بقلق:"بعد الشر عليكي ماتقوليش كده وبعدين أنا مش عارف إنتى مأفورة كده ليه هى كلها فتره بسيطة وهتبقى تمام."

آية بإحراج:"آآه."

والدة أدهم كانت بتضحك على معاملتهم لبعض وإنبسطت من آية إنها عرفت تخلي أدهم يقعد فى البيت غصب عنه...

سلمى دخلت بالمسكنات.. وآية بصتلها وبرقت....

آية:"آآآآآآآآآآآآآآه"

قاطعهم دخول والدة أدهم....

والدة أدهم:"سيبوهالى ، أنا هعرف أتصرف فى الموضوع ده."

أدهم مكنش قادر يبص لوالدته كان بيبص قدامه وبعدها بص لآية...

أدهم بإبتسامه خفيفه:"أنا هقوم أعملك ينسون.."

خرج من غير مايستنى ردها...

والدة أدهم زعلت من طريقته معاها وإتنهدت وراحت ناحية آية...

آيه بتنهيده:" أخيرا خرج أنا آسفه ، مالقتش حل غير كده."

سلمى بإستغراب:"يعنى كنتي بتمثلي!"

آية:"أكيد يعني."

والدة أدهم:"أنا مش عارفة أشكرك إزاى يابنتي،إنك خلتيه يفضل هنا ، بس هو أكيد هيستنى كام ساعة لما تخفى وبعد كده يمشي."

آية بإبتسامة :"ماتقلقيش يا طنط ، أنا واثقة إن أدهم هيبات فى حضنك النهاردة."

والدة أدهم بإبتسامة:"على فكرة ممكن تناديني ماما منى عادى."

آية بضحكه خفيفه:"ماشى يا ماما منى."

سلمى بتوتر:" انا آسفة إني قاطعتكم بس أدهم خارج من المطبخ وجاي على هنا."

آية رجعت لوضعية التمثيل....أدهم دخل الأوضه وراح ناحية آية...

أدهم:"إشربي يا حبيبتي، أنا حاولت أدفيهولك شوية."

آية بتعب:"شكرا."

مسكت الكوباية وفضلت تشرب براحة وهى بتبص لوالدة أدهم...

منى وهى بتبص لأدهم وبحزن:"أدهم، ممكن أتكلم معاك شوية."

أدهم بضيق وهو بيبص بعيد:"مالوش لازمة الكلام إحنا شويه وهنمشي ،آسفين إننا أزعجناكم."

منى:"يابني ماتقولش كده لا إزعاج ولا حاجة ، أنا محتاجة أتكلم معاك."

أدهم بتنهيدة:"تمام."

أدهم مسك إيد الكرسى المتحرك بتاع مامته وخرج بيها بره الأوضه وقفل الباب وراه...آية قامت من على السرير هى وسلمى وراحوا وقفوا ورا الباب عشان يتصنتوا...أدهم قعد فى الصالة ومامته إتحركت بالكرسي قدامه.. 

أدهم بتوتر وهو بيبص لخيالهم من تحت عقب الباب قدامه:" حضرتك كنتي عاوزاني فى إيه."

منى:"ممكن تبصلي."

أدهم بجمود وهو بيبصلها:"بصتلك أهوه ،ها عاوزانى فى إيه؟"

منى بدموع:"بتعاقبنى ليه يابنى؟"

أدهم:"أنا مش حابب أتكلم فى الموضوع ده بعد إذنك."

منى:"بس أنا مامتك ومن حقي أتكلم فى إللي أنا عاوزاه رأيك ده مش هيمشى عليا."

قربت منه وحطت إيديها الإتنين على وشه وبصتله بحنية..

منى بدموع:"كنت واحشني أوى يابنى ، خمس سنين يا أدهم ماتسألش فيا، جبت القسوة دى منين ياحبيبي،بس برده مازعلتش منك وفضلت أدعي إنك ترجعلي وأديك رجعت."

أدهم ماقدرش يستحمل دموعها أكتر من كده....

أدهم بندم وهو بيمسحلها دموعها:"أنا آسف ، أنا........."

قطع كلامه حضنها ليه، وهو شدد من حضنه ليها... آية وسلمى كانوا بتنططوا فى الأوضة وبيحضنوا بعض من فرحتهم وأدهم كان مازال متابع خيالهم...

بعد فترة بسيطة...

كان واقف سرحان فى البلكونة إللي فى الدور التانى من بيت والدته...قطع لحظته صوت آية...

آية:"حبيبي سرحان فى إيه؟"

أدهم بإبتسامة خفيفة وهو بيبصلها:"سرحان فى إللى عملتيه فيا النهاردة."

آية بتوتر:"أنا عملت إيه مش فاهمة؟"

أدهم أخد إيدها وباسها:"عرفتي نقطة ضعفي كويس من ناحيتك إنتي الذات وإستغلتيها ضدي عشان تخليني أدخل البيت."

آية بتوتر:"لا ماحصلش ، أنا كنت تعبانة فعلا."

أدهم بإبتسامة وهو رافع حاجبه:"وهو فى واحدة تعبانة تتنطط زي ما إنتى عملتى؟، ده غير إني أخدت بالي وإنتي بتغمزي لماما وعديتها."

آية:"أنا آسفة،أنا بس ماكنتش......"

أدهم بهدوء وهو بيبصلها:"ششششششش، أنا عارف، شكرا ليكي على وقفتك جمبي بالرغم من إللى عملته معاكي بس إنتى ماسبتنيش، أنا آسف."

ابتسمتله بهيام وبعدها قربت منه وحطت إيدها على مكان قلبه لسه جايه تتكلم لقت علامات الوجع ظاهره على وش أدهم وفى نفس الوقت حست بحاجة سايله فى إيدها إللى على مكان قلبه.......

آيه بصدمة وهى بتبص لإيديها:"دم!."

........

بكرة بأمر الله باقي فصول الجزء الأول معلش لسه راجعة من بره ونزلت ده بالعافية🥹

 جاري كتابة الفصل الجديد  للروايه حصريا لقصر الروايات اترك تعليق ليصلك كل جديد أو عاود زيارتنا الليله

لمتابعة باقى الرواية زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كاملةمن هناااااااااا

مجمع الروايات الكامله 1اضغط هناااااااا

 مجمع الروايات الكاملة 2 اضغط هناااااا