رواية منقذي (دنيا وسليم)الفصل الثالث عشرون والرابع وعشرون بقلم ساره الحلفاوي حصريه في مدونة موسوعة القصص والروايات
رواية منقذي (دنيا وسليم)الفصل الثالث عشرون والرابع وعشرون بقلم ساره الحلفاوي حصريه في مدونة موسوعة القصص والروايات
الفصل الثالث و العشرون
و نكست راسها بتقول بألم:
- حتى مرات إبني مش عارفة أشوفها .. نفسي أشوف البنت اللي إنت حبيتها أوي كدا .. نفسي أعرف إزاي قدرت تخليك تلين كدا و أنا .. أمك معرفتش أعمل ده!!
ضحك ضحكة ساخرة .. و قرب منها و قال بمرارة:
- هتعملي كدا إزاي و إنتِ مكنتيش فاضيالي أصلًا .. هتعملي كدا إزاي و أنا ضهري لسه معلِّم فيه ضربك ليا .. هي عملت كل اللي إنتِ محاولتيش تعمليه، عرفت إزاي تخليني ألين ليها و عرفت تحتويني و حتى لما شافت الجروح اللي في ضهري .. باستهم .. معايرتنيش .. البنت دي مش مراتي بس .. دي خدت دورك اللي إنتِ معرفتيش تعمليه!! و في الآخر كانت مكافئتي ليها إني ضربتها، أقولك حاجة .. أنا مش عارفة أنا بعمل إيه هنا، أنا المفروض أبقى عندها دلوقتي و أخدها في حضني و أتأسفلها على اللي عملته معاها .. خساره فيكي أضيع خمس دقايق من وقتي معاكي!!!
كان هيمشي لكنها مسكت دراعه بتقول و هي بتعيط بحرقة:
- يا سليم كفاية تعذب فيا .. سامحني بقى أرجوك مش كفاية إني في نظر الناس ميتة، متعملش فيا كدا يا سليم كلامك أقسم بالله بيدبحني .. أنا ياما إعتذرت و عندي إستعداد أبوس إيدك بس تسامحنب و تخرجني من هنا و أرجع أعيش معاك إنت و مراتك .. الوحدة قاتلاني يا سليم!!
نفض إيديها بعيد عنه بيقول بحدة:
- شايفة! إنتِ مش فارق معاكي أسامحك كل اللي فارق معاكي إنك عايزة تطلعي من هنا!!ده كل اللي يهمك مش أنا!!
نفت براسها بسرعة بتقول و هي بتعيط:
- والله العظيم أبدًا بدليل إني بقالي هنا أربع سنين و إنت مش قافل عليا بس مبرضاش أمشي عشان يمكن قُعادي هنا يبقى تكفير عن ذنبي معاك! والله يا سليم ندمت أوي على كل حاجة عملتها معاك .. والله من قلبي ندمانة!!
سابها و دخل المطبخ يشوف التلاحة فيها أكل و لا لاء لكن ملقاش فيها أكل، فـ بصلها و قال ببرود:
- الأكل خلصان من إمتى؟
- من إمبارح الصبح!
قالتها بخجل و حسرة على حالها، إنتفض قلبه لكن مبينش، و طلع تليفونه طلب مجموعة من أوردرات الأكل الجاهزة و طلبات بين و خضروات عشان لو الأكل الجاهز خلص، فضل قاعد مستني المندوب ييجي بيشرب سيجارة و هي قاعدة بعيد عنه بتبصله و بتحاول تشبع من ملامحه قبل ما يمشي تاني و يقعد إسبوع ميجيش، نفسها تحضنه .. تحاوط وشه و تبوس كل إنش في وشه زي الطفل الصغير .. إزاي تفهمه إنها حقيقي ندمانة، إتنهدت و بصت في الأرض و رجعت بصتله بتقول بإبتسامة حزينة:
- مراتك إسمها إيه!!
بصلها و قال بجمود:
- دُنيا!!
إبتسمت و مسحت دموعها و هي ششايفاه بيتجاوب معاها، فـ قالت بلهفة:
- قابلتها فين!
- في الشارع!
قال و هو بيبصلها بيتابع ردة فعلها، قطبت حاجبيها و قال بعدم فهم:
- في الشارع إزاي .. يعني قصدك وقفتها و قولتلها إنك عايز تتجوزها كدا و خلاص!!
قال بنفس الجمود:
- لاء دخلت مطعم و كانت عايزة تاكل و معهاش فلوس .. خدتها و أكلتها و إتجوزتها!!
شهقت بصدمة و غمغمت بعدم تصديق:
- يعني إتجوزت شحاتة!!!
قطبت حاجبيه بضيق و قال بحدة بعد ما وقف:
- متقوليش عليها شحاتة! دي بنت محترمة مرضيتش تستغل إنها بنت و حلوة و تروح تبيع نفسها .. هي دي اللي آمنتلها على بيتي و إسمي، م إنتِ كنتي من عيلة كبيرة لكن عمرك ما قدرتي تحبي أبويا و لا تحبيني .. هي حبتني و لما نجيب عيال أنا متأكد إنها هتبقى أم عظيمة .. مش زيك!!
سكتت بتبلع الحروف جواها، بتغطي وشها بإيديها و بتنهار في البكاء، قلب عينيه بملل و سند راسه على الكرسي، سمع صوت خبط على الباب فـ قام فتح و إدى فلوس لـ المندوب و أخد الأكياس، حطهم على الترابيزة و قال بضيق:
- قومي كلي .. و أنا رايح لمراتي أصلّح اللي بوظتيه!
و سابها بتعيط و مشي، ركب العربية بيحاول يتنفس و بهدي نفسُه بيقول:
- إوعى يفرق معاك عياطها ده .. م إنت ياما كنت بتعيط عشان ترحمك من تحت إيديها و مكانتش بتسيبك إلا وجسمك كلُه دم!
مسح دمعة غدارة نزلت من عينيه و هو بيفتكر أسوأ ذكرى عدت عليه!
من ٢٣ سنة بالظبط .. لما كان سبع سنين كان واقف بيبص لأبوه و هو بيزعق لأمه بكل عصبية:
- إنتِ خلاص إتجننتي على الآخر .. مبقاش في دماغك غير السهر بالليل برا مع شوية الزبالة اللي إتلميتي عليهم، سايبة إبنك هنا لوحده من الصبح مع الدادة و الله أعلم كل و لا مكلش و لا بيعمل إيه لوحده من غير أمه، خلاص مبقاش فيكي عقل!!
بصتله أمه المدعوة سمر بكل ضيق و قالت و هي بتشوح بإيديها:
- هيكون بيعمل إيه يعني، إبنك كبر و بقى سبع سنين إيه المشكلة لما أخرح و أسيبه و الدادة بتاخد بالها منه .. أجرمت يعني!!
مسك أكتافها بيقول بحدة:
- ياريتك بتخرجي بالليل بس و خلاص خلصنا، لكن لاء صبح و ليا و كل يوم زفت على دماغك خروج هنا و هناك، الصبح في النادي و بالليل سهرانة على الكافيهات! و إبنك هنا يتفلق لوحده!! هتربيه إمتى ده يا هانم! هتلحقي تقعدي معاه إمتى! ده أنا عمري ما شوفتك قاعدة بتحلي معاه واجب و لا حتى واخداه في حضنه .. بذمتك آخر مرة خدتيه في حضنك إمتى؟؟ لما كان لسه بيرضع صح!!!
بصله سليم الصغير و مقدرش يمسك دموعه، هو فعلًا عمره م جرب حضنها، ميعرفش حتى ممكن يبقى إزاي، دايمًا بيشوف الأطفال التانية في سنه و بتتحضن على طول لكن هو .. هو ميعرفش معنى حضن الأم إيه! رفع عينيه لأمه و هي بتقول بكل جبروت:
- في إيه يا زاهـر إنت مكبر الموضوع كدا ليه .. إنت يعنب عابز تروح شغلك و أنا أقعد مربوطة جنب إبنك و وأنضف و أمسح و أشتغل في البيت زي الخدامة!!
صرّخ فيها بكل قوة:
- إيــه المـشـكـلـة!!! م الستات كل بتقعد في بيتيها معززة مكرمة جنب عيال و بتنضف و تمسح وتكنس!! هما دول خـدامـيـن!! دول أحسن منك و من عشرة مِن عَيّنتك!!
صرخت هي الأخرى فيه:
- و أنا مش هبقى خدامة يا زاهر آآآه!!!
تآوهت بألم لما خدت قلم وقعها على الأرض و حست بكفها إتحرك من مكانه من قوة الصفعة، إنتفض قلب سليم عليها، جِري حضنها بيقول لباباه برجاء:
- كفاية يا بابا خلاص .. أنا مش زعلان والله!!
هتف زاهر بقسوة:
- إنتِ مـش خـدامــة!! إنــتِ زبـــالــة!!! و أنا غلطان إني إتجوزتك!! ده أنا لو كنت إتجوزت حتة خدامة زي م قولتي كان زماني عايش أحلى عيشة!! غوري جتك القرف!!!
وسابهم ومشي، فضل سليم حاضنها بيربت على ضهرها ببراءة طفل، لكن هي بكل قسوة وسط دموعها بعدته عنها و قالت بحدة و عنف:
- إنت السبب يا حيوان .. ماسي يا سليم بتشتكلي لأبوك .. إما ربيتك مبقاش أنا!!
سابته و طلعت لأوضتها و هو كان واقف بيترعش، لدرحة إنه جري على الدادة بتاعته و اللي ساعتها كانت أم أدهم لكن كانت لسه صغيرة و كان إسمها فيروز، إتعلق في حضنها و قال برجاء:
طنط فيروز خبيني .. ماما هتضربني!!
نزلت فيروز لمستواه و خدته في حضنها بتقول بحنان:
- متخافش يا حبيبي مش هتعملك حاجة إن شاء الله إهدى!!
فضل في حضنها بيعيط من خوفه، الأسوا من الضرب هو إنتظاره، لقاها فعلًا جاية معاها حزام سلسلة فـ إستخبى ورا فيروز، فـ زعقتله سمر بتقول بحنون:
- تعالـى أقف هـنـا حـالاً!!!
نفى براسه ف قالت فيروز برجاء:
- يا ست هانم بالراحة عليه أرجوكي .. ده لسه طفل و الحزام ده شديد أوي على جسمه!!
بصتلها فيروز بحدة بتقول بعنجهية:
- إنتِ مالك أصلًا! مبقاش غير حتة خدامة كمان اللي هتقولي أعمل إيه و معملش إيه!! هاتيه بدل م أرفدك قسمًا بربي!!
تنهدت فيروز بحزن على حال الصغير و بعدت عنه فـ شدته سمر، فضل يشد في إيديها عشان تسيبه، لكنها شدته بقوة أكبر و رمته على الأرض و نزلت على حشمه الصغير بالحزام وسط صريخُه و تآوهاته، بيترجاها بصوته البريء اللي كله عياط:
- ماما كفاية جسمي وجعني .. ماما خلاص الحزام بيوجع أرجوكي!
لكنها مكانتش بتسيبه فيروز وقفت تعيط عليها و جسمها بيرتجف بتهمس بصوت خافت:
- كفاية .. حسبي الله و نعم الوكيل فيكي يا بعيدة!!
مسابتهوش إلا لما بقع دم ظهرت على التيشرت اللي كان لابسه، رمت الحزام جنبه و طلعت على أوضتها، جريت فيروز عليه بتترمي جنبه على الأرض و بتاخده في حضنها بتقول و هي بتمسح على شعره و وشه اللي كله عياط:
- يا حبيبي .. حقك عليا يا قلبي .. بس إهدى خلاص إهدى يا سليم!!
شالته لرُفع جسمُه و دخلته أوضته، شالتله كنزته و هي بتكتم شهقاتها و بتشوف الندبات اللي ملت جسمه، حاولت تعالجه بكل طاقتها و بأكبر قدر ممكن، مش هينسى لما فضلت سهرانه جنبه اليوم ده كله بتحاول بس تصحكه لكن هو كان شارد .. مكنش فاهم هو إتضرب ليه .. ولا ليه ممكن طفل صغير زيه يتضرب العنف ده!
رجع سليم لواقعه، لقى وشه مليان دموع، أخد مناديل من عربيته و مسح دموعه بيرميها بعنف من الشباك و بيمشي بالعربية بسرعة قصوى ليها، و لولا إنه قافل عليها كان زمانه خايف إنها تسيبه و تمشي تاني، ركن العربية و نزل بلهفة بيلعن نفسه إنه ضربها، فتح باب الكوخ بالمفتاح و قفلُه وراه بيدور بعينيه عليها، لقاها على نفس الحالة، لازقة ضهرها في ف الحيطة وراها و ضامة قدميها لـ صدرها بتبص قدامها بشرود، وضعها و نظراتها خلته يفتكر نفسه و هو صغير، لكن غمض عينبه بسرعة بيرفض اللي عمله، مش هيقدر يستحمل إنها تحِس بشعورُه و يكون هو السبب، قرّب منها و قعد على ركبه قدامها، حاوط وشها فـ بصتله، عينيه حمرا و شعره الناعم مشعث، أنامله مشيت على خدها و إحمرار خدها بدأ يخف، ميل يُقبل مكان صفعه لها بيقول و هو ساند أنفه على خدها بيتنفسها:
- أنا آسف .. حقك عليا! مافيش مبرر .. إنتِ شتمتيني و عصبتيني بس بردو مكانش ينفع أضربك .. أنا بس صِعبت عليا نفسي .. بعد كل ده و تقولي عليا كدا! بس بردو حقك عليا متزعليش مني!
الفصل الرابع و العشرون
أنا آسف .. حقك عليا! مافيش مبرر .. إنتِ شتمتيني و عصبتيني بس بردو مكانش ينفع أضربك .. أنا بس صِعبت عليا نفسي .. بعد كل ده و تقولي عليا كدا! بس بردو حقك عليا متزعليش مني!
كانت ساكتة، سكوتها قتلُه .. شافها سليم الصغير، مسك إيديها ورفع واحدة منهم لخدُه بيقول بحنان:
- طب يلا رُديهالي! إضربيني و أنا موافق!!! مش هزعل!!
بصتله بضيق و بعدت عينيها عنه، فـ أتنهد و قبّل كفيها بيقول:
- أنا مش شهواني يا دُنيا .. ولا قذر .. ولا بخونك، اللي سمعتي صوتها دي تبقى للأسف .. أمي!
عقدت ما بين حاجبيها بتبصله بصدمة، عينيها بتتحرك على ملامح وشه بتقول بصوت خافت مهزوز:
- مش هي .. ماتت؟!
زفر براحة لما إتكلمت، و قعد جنبها بيسند ضهره على الحيطة و راسه على كتفها، بيقول و هو لسه محتفظ بإيديها:
- مماتتش .. كل الناس فاهمين إنها ميتة من أربع سنين بس هي مماتتش، أنا اللي كدبت عليهم كلهم و قولتلهم إنها ماتت!!
- ليه!!
قالت و هي بترفع حاجبيها بصدمة، فـ قال بهدوء:
- قبل م أبويا يموت بـ سنة بالظبط، كانت إبتدت تتغير شوية .. بقت أحسن و بتحاول تصلّح علاقتها معايا، بس أبويا كان خلاص كِرهها، ضرب وشتيمة و بهدلة، لدرجة إن فيوم ضغطها عِلي و تِعبت جدًا، و هو بردو تعب و مبقاش حمل اللي بيعمله فيها .. جاله الضغط و السكر ف قررت أبعدهم هما الإتنين عن بعض، رغم إن أنا كمان بكرهها لكن قررت أبعدها عنه، و هو كان رافض يطلقها .. كان عندُه حب إمتلاك و كان بيبهدلها لكن مش عايزها تسيبه، مكان هيبعدها عنه غير الموت، بعلاقاتي دبرتلها حادثة بعربيتها بس هي طبعًا مكانتش في العربية كانت فاضية، و بعدها العربية ولّعت فـ عرفوا كلهم إنها ماتت و طبعًا مافيش جثة .. جبتلها شقة و قعدتها فيها .. و بقيت بروحلها كل كام يقوم أجيب طلبات البيت و أمشي! و اليومين اللي فاتوا إتأخرت عليها شوية فـ رنت!
هتفت بهدوء بتحاول تخبي صدمتها من اللي سمعته:
- عايزة أشوفها!
قال و هو بيبصلها بضيق:
- ليه؟ لسه مش مصدقاني؟
- لاء مش كدا .. بس عايزة أقعد معاها!
- ماشي
-دلوقتي .. هقوم ألبس!
- ليه دلوقتي يعني!
- معلش .. عايزة أروحلها دلوقتي .. لو فعلًا عايزني أسامحك على .. القلم!
قالت بهدوء إختلط بحزن طفيف و هي بتبصله، فِ إتنهد و قال:
- طيب قومي!
*********
راكبة العربية جنبه، بتبص على الشبك اللي إزازه مقفول و بتقول بهدوء:
- أقولك حاجة .. أنا عمري م بابا ضربني، ولا ماما طبعًا، بس عكس الناس بابا كان حنين عليا بزيادة .. مكانش بيرفضلي طلب مدام في مقدرتُه، كان دايمًا ياخدني في حضنه و يطبطب عليا و يخرجني و يجبلي اللي أنا عاوزاه، و لما إتجوزتك حسيت إني إتجوزت نسخة أبويا .. نفس كل حاجة لدرجة إني لمت كنت بحضنك كنت بحسك بابا مش جوزي .. بس القلم اللي إديتهولي من شوية فوّقني .. كإنه كان بيفكرني إن مافيش حد زي بابا!!
كوّر كفه الأيسر و سندُه على الشباك، بيقول بندم:
- أنا آسف .. إتعصبت أوي .. و إنتِ قولتيلي كلمتين وجعوني و قولتيلي إنك بتكرهيني، و أنا كنت قايلك إني بكره الكلمة دي .. قولتيهالي كإنك قاصدة تدوسي على وجعي، مقدرتش أمسك نفسي لما حسيت إني سلمتلك نقطة ضعفي بإيدي!
سكتت .. هي عارفة إنها غلطت .. و إتسرعت و مسألتهوش، يمكن لو كانت سألته بهدوء كان الوضع هيبقى أحسن كتير، إتنهدت و قالت بهدوء:
- مش قادرة أبررلك .. كنت سيبني و إمشي، لكن ليه تضرب!
قالتها و هي بتبصله و عينيها مليانة دموع، سكت .. مش عارف يقول إيه، لحد م غمغمت و هي بتبص قدامها:
- سليم .. مش قادرة أفضل معاك .. ممكن لما نرجع هناك ننفصل شوية لحد م أحس إني تمام؟
- يعني إيه ننفصل!
قال و هو بيبصلها بهدوء زائف بيحاول يهاودها، فـ تابعت و هي بتراقب ردة فعلُه:
- ننفصل يا سليم .. حتى لو في الإوض، أنا في أوضة و إنتفي أوضة، صدقني الموضوع هيفرق معايا!
- ماشي!
قال بمنتهى الهدوء و وصل بالعربية تحت البيت، إستغربت ردُه و موافقته السريعة اللي متوقعتهاش، و نزلت من العربية بتبص للمكان الراقي اللي أمه قاعدة فيه، هي متأمدة إنه لسه بيحبها .. مكانش عمل كل ده عشانها! دخلوا العمارة فـ إتخضت لما شافت الأسانير و قالت بسرعة:
- سليم بلاش أسانسير .. نطلع على رجلينا!
إبتسم و مسك إيديها و قال:
- هنطلع الدور العاشر على رجلينا!!
بصتله بتردد و مسك في دراعه:
- يعني هنفضل فيه لحد الدور العاشر .. بخاف منه أوي!
شدها بهدوء و دخلها الأسانسير سجِّل بالشريحة و أول م طلع إتخضت و جسمها إتهز كإنها كانت هتقع فـ بسرعة رمت نفسها في حُضنه بتحاوط صدره مغمضة عينيها، مسح على شعرها و ضهرها بينزل راسه عشان يهمسلها في أذنها:
- متخافيش يا حبيبتي .. ثواني و هنوصل!
أومأت له بسرعة، وصلوا فعلًا فـ بعدت و فتحت الباب بسرعة بتخرج منه، ضحك و طلع وراها، إتجه للشقة و فتح الباب و هي وراه، دخل لاقاها قاعدة بتاكل في البلكونة، قفل الباب و قعد على الكرسي في الصالة و قال لـ دُنيا بضيق:
- إدخليلها إنتِ، مش عايز أشوفها!
بصتله بتأنيب على جملته لكنها أومأت مش عابزة تضغط عليه، و سابته و دخلت بتتنحنح بحرج، لفت سمر بصدمة من وجود حد في البيت، إتخضت و منخضتها الأكل وقع على الأرض بعد م قامت مندفعة، شهقت دُنيا بخضة و قربت منها بتنزل على الأرض بتلملم بواقي الأكل و بتقول بسرعة:
- أنا أسفة يا طنط .. خضيتك!
هتفت سمر و هي واقفة بتبصلها بصدمة و خوف:
- إنتِ مين .. و إزاي دخلتي هنا؟!
هتفت دنيا بسرعة و هي بتحط الأكل على الصينية:
- أنا دُنيا .. مرات سليم ابن حضرتك!! و هو اللي جابني و قاعد برا!
لمعت عيون سمر بحب و فرحة، و صدمت دُنيا لما مسكت أكتافها و قالت و الدموع بتتكون في عينيها بسرعة:
- إنتِ مراتُه؟ إنتِ اللي حبِك أوي كدا؟
إبتسمتلها دُنيا و ربتت على كتفها بتقول بطيبة:
- و بيحبك إنتِ كمان!!
أنكست رأسها و عينيها بحزن وغمغمت:
- لاء مبيحبنيش يا دُنيا .. بالعكس ده مش بيطيق حتى يبصلي!
إتنهدت و جذبت كرسي و خلتها تقعد و قعدت جنبها بتقول و هي بتبص قدامها:
- عايزاكِ تُعذريه يا طنط، اللي حصلُه مكانش سهل بردو!
هتفت سمر و هي بتعيط:
- والله العظيم عاذراه بس تعبت يا دُنيا، بقالي سنين مستحملة بروده و جفاه و طريقته!!
سكتت دُنيا مش عارفة تقولها إيه، لحد م بصتلها سمر و سألتها بحرج:
- بيحضنك أكيد صح؟
رمقتها دُنيا بشفقة، و مقدرتش ترد، فـ عيطت سمر بتقول بألم:
- طب مش بيحضني ليه .. كل مرة باجي أحضنه بيبعدني و يشيل إيدي!
ربتت على كتفها بتقول بحزن على حالها و على سليم:
- والله يا طنط بيحبك .. بس مش قادر ينسى، سليم تعبان أوي يا طنط و الشرخ اللي في علاقتكوا عاملُه شرخ كبير أوي في روحه، هو يبانلك بارد بس هو جواه طفل صغير نفسه يترمي في حصنك و يعيط! سليم ملجِّم الطفل ده عشان ميبانش قدامك ضعيف .. أنا أوعدك هتكلم معاه يمكن يحن!
أومأت لها سمر بلهفة، و إتنهدت و قالت:
- ماشي يا دنيا ياريت يا حبيبتي!
- تحبي نقوم أنا و إنتِ نطبخ حاجة؟
قالتها دنبا بإبتسامة مرحة، فأيرعت سمر بتقول بلهفة:
- يلا يا حبيبتي ياريت!!
قاموا فعلًا فـ بص سليم ليهم و علاقتهم بضيق، و قال لـ دُنيا و هما بيمشوا للمطبخ:
- يلا يا دُنيا عشان نمشي!!
لفتله دنيا و قالت برفق:
- هقعد أعمل مع طنط شوية أكل يبقوا عندها يا سليم .. لو إنت حابب تمشي إمشي و أنت هبقى أرن عليك تيجي تاخدني!!
قطب حاجبيه و زعق فيها بحدة:
- مش هيحصل!! مش هسيبك معاها لوحدكوا!
أسبل سمر بعينيها و مقدرتش تكتم دموعها فـ إنهمرت بغزارة، هتفت دنيت تؤنبه:
- هتاكلني يعني يا سليم!!
تأفف بحدة و مردش و هو بيطلع سيجارة و بيشعلها بيبص بعيد عنهم، فـ لفت دُنيا بتربت على سمر و بتقول بحنان:
- يلا يا طنط تعالي!
دخلوا المطبخ مع بعض و بدأوا في تحضير الأكل وسط ضحكات و تسامرات بينهم، أول مرة يشوف أمه بتضحك بعد سنين .. إبتسم غصب عنه و بص لـ دُنيا بيقول بصوت خافت:
- بتدخل حياة أي حد تحليها!
خلصوا الأكل و جهزوه و طلعت دنيا فرشت مفرش على السفرة و مسكت دراع سليم بتقول و هي بتشده بمرح:
- يلا قوم يا سليم نتغدى سوا!
نفى براسه بيقول و هو بيشد إيديها من إيده و بيقول:
- مش عايز أكُل مش جعان!
هتفت برجاء:
- معلش يا سليم وحياتي عندك!!
حلّفتُه بحياتها اللي معندوش أغلى منها، قام فعلًا معاها فـ قعدته على راس السفرة و ميّلت قبَّلته في خدُه و مشيت، إبتسم و سكت، جات سمر حطت طبق قدامها بتردد فـ إتمحت إبتسامته و بص النِحية التانية، مشيت بحزن و بدأوا يرصوا الأطباق، قعدوا جنب سليم أمه على يمينه و مراته على يسارُه، كلوا و للغرابة إنه كان فعلًا جعان، أكلوا وسط صمت ساد الموقف، فـ بصت دُنيا لـ سمر تحثها على الكلام بعينيها، إبتلعت دنيا رمقها و هتفت بتردد شديد:
- سليم!!
ساب المعلقة و مقدرش حتى يبتلع الأكل اللي كان في فمه، شرب مايه فـ تابعت سمر بحرجٍ:
- ينفع يعني .. آجي أعيش معاكوا بدل م أفضل عايشة لوحـ..!!
- متفتحيش معايا السيرة دي تاني!!
هتف بكل ضيق و هو رافض حتى يبصلها، سكتت سمر فـ حطت دُنيا كفها على كفُه بتهديه و بتقول بحذر:
- سليم .. ممكن تسمعها للآخر!!
ضرب الطاولة بعنف لدرجة إنهم إتخضوا و دُنيا جسمها إتنفض، قام من على الكرسي بيقول بقسوة:
,- مش هسمعها .. مش طايق صوتها في ودني أصلًا!!
حست سمر بنغزات في قلبها، و عيطت بإنهيار مش قادرة تمسك نفسها، بصتله دُنيا بغضب شديد و راحت لـ سمر بتضم راسها لصدرها و بتقول بحنان:
- حقك على راسي أنا متزعليش!!
مكانتش بتبطل عياط، و إستسلمت لحضن دُنيا الدافي و هي تكاد تقسم إن هي أول حد يحضنها من عشرين سنة، رفعت دنيا عينيها لـ سليم الغاضب من المنظر اللي شايفه قدامه، لد،جة إنه مقدرش يكتم غضبه و زعّقلها:
- دُنيا .. تعالي هنا!!
بصتله بضيق و مردتش عليه، لدرجة إن الدم في عروقه كان بيغلي، مسح على شعره بكل عنف، قبّلت دنيا راس سمر اللي ربتت على درعها بتمسح دموعها بتقول بألم:
- روحي يا حبيبتي إسمعي كلام جوزك!
تنهدت دُنيا و ربتت على ضهرها و راحت لـ سليم اللي كان بيبص في الفراغ بغصب و عيون حمرا، بصتله بكل ضيق و لفت لـ سمر بتقولها بحب:
- هجيلك بقى أزهقك على طول!!
هتفت سمر بحنان:
- ياريت يا حبيبتي تيجي!
سابهم سليم و طلع فـ طلعت دنيا وراه و فضلت ساكتة، إستنوا الأسانسير، دخلتُه دنيا الأول و سليم وراها، وقف بيبصلها مستنيها تخاف وتحضنه لكنها فضلت واقفة ثابتة مغمضة عينيها، فـ قال بهدوء:
- مش هتحضنيني؟
بصتله دنيا و سكتت و رجعت بصت قدامها، إدايق منها أكتر و فتح الباب بعنف لما الأسانسير وصل فـ ثبت الباب و طلعت و هي بتقول بصوت خافت جدًا:
- ماشي يا سليم .. أصبر عليا!
ركب العربية و قفل بابها بكل ضيق، فـ ركبت جنبه و هي لسه ساكتة باصة قدامها، مشي بالعربية و هو بيقول بحدة و صوت عالي:
- مافيش واحدة بتحترم جوزها و يكون بيكلمها و متردش عليه!!
بصتله بضيق و قالت:
- و مافيش حد يعمل في أمه اللي عملته فوق ده .. دي لو كانت كافرة يا سليم متعملش فيـ..
بتر عبارتها لما ضرب على المقود بحدة و زعق فيها بيقول:
- إخرسي يا دُنيا .. مش هتيجي تقوليلي أعاملها إزاي!! إنتِ أصلًا لا فاهمة حاجة و لا هتفهمي فـ تسكتي خالص!!
قطبت حاجبيها و سكتت بتبص قدامها بتمتم بضيق:
- إنت عايزني أشوفك بتغلط و أسيبك صح؟ عمومًا براحتك!
سكت و وصلوا بالعربية للفيلا، فـ نزلت من العرببة و دخلت الفيلا و منها للجناح، إتفاجأت بـ صوت مُحركات العربية بتاعته فـ عرفت إنه مشي، غيرت هدومها و هي بتقول بقلق:
- هو راح فين! هو أنا شديت معاه في الكلام؟
إتنهدت و قعدت على السرير تستذك، دروسها و عينبها بتروح و تبجي على الساعة لحد م بقت بعد منتصف الليل، مقدرتش تنام و إترددت في إنها تتصل بيه، لكن حسمت أمرها في الآخر و مسكت تليفونه لكنها زفرت براحة لما سمعت صوت عربيته، سابت التليفون و كملت مذاكرة، و لما دخل فضلت مركزة في مذاكرتها كإنه مدخلش، حست بيه بيقعد على الكنبة و راجع براسه لـ ورا، رمقته بتوجس لكن إتخضت لما لقت عينيه حمرا جدًا، شعره مبهدل و زراير قميصه مفتوحة، صِعب عليها جدًا، فـ قامت بتروحلُه، قعدت على رجلُه فـ إتخض و بصلها، مسدت على وجنته و رقبته بتقول بإبتسامة:
- اسم الله عليك .. خضيتك؟
- لاء
قال و بصلها بهدوء بيمسح على شعرها، فـ حاوطت عنقه و حضنته بتقول بهدوء:
- تعبان؟
- أوي!
قال و هو بيدفن وشُه في شعرها، فـ ربتت على ضهره و قبّلت عنقه بتقول بهدوء:
- عارفة!
- عايز أنام في حضنك!
- تعالى!
قالت و هي بتستلقى على الكنبة فـ سند راسُه في حضنها، فضلت تربت على ضهره و شعره بتقول بحنان:
- حبيبي أنا حاسة بيك والله .. أنا بس خايفة عليك يا سليم، خايفة تندم لما طنط تروح و متعرفش ترجّعها تاني .. و تفضل عايش بذنب إنها حاولت تصلّح علاقتها بيك و إنت صديتها بالشكل ده!
غمض عينيه و قال بهدوء:
- مش قادر يا دُنيا .. كل ما ببُص في وشها بفتكر كل اللي عملته!!
ربتت على ضهره بتضم وشها ليه أكتر و بتقول:
- يا حبيبي أنا مقولتلكش تروح تاخدها بالحضن كإن مافيش حاجة حصلت .. كُل اللي أنا عايزاه بس لما تحاول تقرّب منك بلاش تصُدها كدا!!
- هحاول!
قال بخفوت، فـ إبتسمت بترفع وشها لربها بتدعي يريح قلبه و قلبها، لحد م سمعت صوت إنتظام أنفاسه، إبتسمت و برفق شديد شالتله القميص عشان عارفة إنه مبيحبش ينام بيه، بتبص لـ الندبات اللي في ضهره، بتمشي بأناملها عليها و بتقول بخفوت:
- يا حياتي!!
إتنهدت و قفلت النور بالريموت و حاولت تنام لكن مقدرتش، إتخضت لما لقت سليم ماسك فبها جامد و بيقول بصوت ضعيف:
- ماما .. ماما كفاية!!
- سليم!
قالت بخضة عليه و عرفت إنه كابوس، فـ شددت على وشه و ضهره بتهمس بحنان في أذنُه:
- حبيبي .. بس يا حبيبي أنا جنبك .. إهدى و إتنفس، مافيش حاجة!!
تجمعت حبات العرق على جبينه بيهمهم بعدم وعي:
- بلاش حزام .. ضهري واجعني!!!
إتأثرت لدرجة إنها عيطت، حضنته أكتر بتقول و هي بتمسح على شعره و ضهره بتهمسله:
- سليم دي أنا .. دنيا، مافيش حاجة إنت في حضني!!
سكت .. و سند جبينه على صدرها بيتنفس بقوة، مسح على مؤخرة عنقه و ضهره بتقول بهدوء:
- إنت كويس؟
نفى براسه و فضل على وضعه، فـ تنهدت و قالت:
- أنا بحبك أوي يا سليم .. و هفضل معاك مهما حصل!!
سند خده على جسمها و ربت على خصرها بيقول بهدوء و صوت نعسان:
- و أنا بحبك أوي!!
فضلت معاه لحد م نام تاني ونامت هي الأخرى!
صحي قبلها .. لقاها نايمة بعمق فـ قام و شالها حطها على السرير برفق، خرج البلكونة و شرب سيجارة ورا التانية و هو بيبص قدامه، لحد م حس بيها وراه بتحاوط خصره، لفته ليها و مسكت السيجارة من فمه بحذر من إنه يزعقلها، لكنها سبِّت بـ أنامل قدميها و قبّلت جوار شفتيه بتقول برقة و صوت كله نوم:
- سيجارة على الريق كدا؟
مسح على شعرها المشعث من النوم بيقول بهدوء:
- إيه المشكلة!
رمتها، و وقفت على أقدامه بتحاوط عنقه و بتقول و هي بتبصله بجرأة و عينيها مثبتة على شفتيه:
- المشكلة إني مش عايزة حاجة تلمس شفايفك على الصبح كدا غيري!
ضحك و قال و هو بيقرب منها:
- تصدقي أقنعتيني
و لثّم شفتيها في قبلة رقيقة تجاوبت معه فيها و حاوطت عنقه، لحد م بعدت عنه بتقول و هي بتحاول تلتقط أنفاسها بصعوبة:
- مش إحنا .. كنا .. متفقين ننفصل عن بعض شوية؟
- كُنا بقى يا قلبي!
قال و هو بيشيلها للأوضة، شهقت و حاوطت عنقه بتقول بخضة:
- طب رايح فين دلوقتي؟
- هعرّفك إزاي متنطقيش ننفصل و نتطلق و الحاجات الهبلة اللي بتقوليها كل شوية دي!!
حطها على السرير فـ حطت إيديها على أكتافه بتقول بتوجس:
- طيب إستهدى بس بالله كدا .. مش إنت اللي بتدايقني طيب؟
قال بجدية و هو ساند كفيه جوار راسها:
- لاء م هو مش أي حاجة تحصل بينا تقوليلي عايزة أتطلق و عايزين ننفصل، دُنيا أنا مبتهددش .. و لو عندي صباع بيوجعني أقطعُه، بلاش توجعيني!!
حاوطت وجنتيه بسرعة بتقول بحنان:
- والله لا بوجعك ولا حاجة .. ده أنا بكون موجوعة أضعافك، بس إنت عايزني أقولك إيه بعد م ضربتني!
قالت جملتها الأخير بصوت خافت و حزين لما إفتكرت، و هو غمض عينيه بيقول بهدوء:
- ممكن ننسى الموضوع ده؟ عشان أنا حقيقي مش عارف عملت كدا إزاي و بأنب نفسي من وقتها!
إتنهدت و أومأت بهدوء، فـ قال بخبث بيحاول يغير الموضوع:
- كُنا بنقول إيه في البلكونة بقى؟
- إيه بقى!
قالت و هي بتضحك، فـ إنهال على كامل وشها بالقبلات و هي بتضحك!!
نايمة في حضنه محاوطة خصره العاري من تحت الغطا، بتمسد عليه و هي بتتنهد و بتقول بتردد:
- سليم!!
- مممم!
قال و هو شارد في السقف، فـ رفعت وشها ليه و سندت دقنها على صدره بتقول:
- ممكن نجيبها هنا يومين!
تكملة الرواية من هناااااااا
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هنااااااا
الفصل الثالث عشرون والرابع وعشرون بقلم ساره الحلفاوي حصريه في مدونة موسوعة القصص والروايات رواية منقذي (دنيا وسليم…){kind=link}
تعليقات
إرسال تعليق