رواية صك الغفران الفصل التاسع عشر والعشرين بقلم الكاتبه فريده الحلواني حصريه
رواية صك الغفران الفصل التاسع عشر والعشرين بقلم الكاتبه فريده الحلواني حصريه
صباحك بيضحك يا قلب فريده
أقسى ما قد تختبره النفس...أن تجد داخلها صوتًا لا يصمت
ليس مجرد خاطرٍ عابر...
بل كيانٌ كامل يسكنك يراك ويفهمك أكثر مما تفهم نفسك
تحدثه...فيُصغي...تبوح... فيُجيب
تتألم... فيواسيك أحيانًا... ويُحطمك أحيانًا أخرى
والأشد رعبًا...أنه لا يُخطئ
تعرف أنه منك...ومع ذلك تشعر أنه شيءٌ آخر
شيءٌ وُلد من أعمق جروحك ثم قرر أن يعيش معك... لا داخلك فقط
تجادله فينتصر...تهرب منه فيطاردك
تتجاهله فيصرخ داخل رأسك حتى تفقد القدرة على التمييز
فتقف أمام نفسك مرتبكًا خائفًا
وتسأل ذلك السؤال الذي لا إجابة له
هل هذا أنا...
أم أنني بدأت أفقد نفسي تدريجيًا
أم أن الحقيقة الأكثر ظُلمة
أنني لم أكن وحدي يومًا...
وأن هذا الصوت...هو الوجه الآخر لي... الذي حان وقت ظهوره
أغمضت عينيها...فجاءه صوتها كما لو لم يفصل بينهما شيء
لسه بتهرب
ابتسم بسخرية مريرة رغم أنه يعلم... أنها لا تراه
أنا مبهربش... أنا بس مبقتيش فارقه معايا
ضحكت ببرود ضحكة خالية من أي دفء
كذاب... إنت عمرك ما عرفت تبطل إحساس بيا حتى وجعك بتتمسك بيه كأنه الشيء الوحيد الحقيقي فيك
اشتدت ملامحه وصوته خرج أكثر حدة
وأنتِ... إيه ملاك
ولا نسيتي إنك السبب في كل ده
سكتت لحظة... لكنه شعر بها
شعر بالوجع الذي حاولت ان تدفنه
أنا عمري ما كنت السبب...إنت اللي اخترت تمشي... وتسيبني لوحدي أواجه كل حاجة
اقترب صوته منها... كأنه يهمس داخل عقلها
سيبتك...ولا إنتِ اللي اجبرتيني أمشي
تسارعت أنفاسها وكأنها تُحاصر داخل نفسها
انت هتكدب و تصدق كدبتك ....مفيش حد اتمسك بيك قدي و لا حد حاول يفضل ماسك ايدك زي ....انت اختارت كرامتك يا ادم و انا كنت مستنية تختارني... مرة واحدة بس تختارني أنا
صمت...
الصمت بينهم كان أقسى من أي حديث
ثم قال بنبرة خافتة... لكنها كسرت كل شيء
وأنا كنت مستنيكِ تقوليلي خليك....حتي لو قولتيها كتير و انا مسمعتش
كنتي فضلتي عايشه علي حبك ليا اللي كدبتي عليا و وهمتيني بيه
ارتجف داخلها شيء قديم... شيء كانت تظنه مات
لكنها تماسكت وعاد صوتها باردًا قاسيًا
وهمتك بيه...اتاخرت اوي يا ادم علي العتاب ده
ردّ بهدوء مخيف
لأ... إحنا بس اللي اتأخرنا نعترف أن الي جوانا اكبر من أنه يموت حتي لو مكناش لبعض
ثم سكون...
سكون ثقيل كأن أفكارهم نفسها تعبت
لكن رغم الصمت...لم ينتهِ الحديث
لأن بعض الحوارات...لا تُقال بصوت ولا تنتهي أبدًا
ظنّا أن الصمت أنهى كل شيء...
لكن الحقيقة... أن ما لم يُقال كان أثقل من أن يُدفن
جاءه صوتها مرة أخرى... أضعف لكنه أكثر خطورة
إنت عمرك ما حبيتني يا آدم... إنت بس كنت محتاجني
اتسعت عيناه... كأن الكلمات صفعة لم يتوقعها
محتاجك...إنتِ بتهزري
ردّت ببطء... وكأنها تنتزع كل حرف من جرح قديم
آه... محتاج حد يشيل عنك وجعك يسمعك يبررلك يسامحك...
بس عمرك ما حبيتني أنا
سكت لحظة... ثم خرج صوته منخفضًا لكنه مليء بالغل
وإنتِ...إنتِ كنتي بتحبيني
ولا كنتِ بتحبي فكرة إن في حد متعلق بيكي
تجمدت...
وكأن سهمه أصاب هدفه
أنا... كنت بحبك أكتر من نفسي
ابتسم بسخرية قاتلة
لا... إنتِ كنتي بتعشقي حبي ليكي مش اكتر
كنتِ بتغذي روحك من احتياجي ليكي... مش من عشقي
اهتزت أنفاسها لكن صوتها خرج حادًا
وأنت كنت بتكسرني كل مرة علشان تتأكد إني لسه معاك و ليك
صمت...صمت مرعب... قبل أن يهمس
لأ... كنت بكسرِك علشان تبطلي تكسّريني
شهقت وكأن الحقيقة صُفعت بها
أنا.... أنا اللي كسّرتك
آه...
كل مرة كنتِ بتخليني أحس إني مش كفاية...
كل مرة كنتِ بتبصيلي وكأنك مستنية نسخة أحسن مني...
كنتِ بتموتيني واحدة واحدة
ارتجف صوتها لأول مرة
ده بجد ...انت مصدق نفسك ده انا مكنتش بشوف راجل غيرك ...علي العموم اطمن أنت قتلت فيا الإحساس كله مرة واحدة
اقترب صوته أكثر... أعمق... أخطر
لأنك ما سيبتيليش حاجة أعيش بيها
دمعت عيناها... رغم أنه لا يراها لكنه شعر بها
أنا كنت عايزاك تبقى ليّا... بس
ردّ بمرارة
وأنا كنت عايزك تحبيني... مش تخونيني
تكسّر شيء في الداخل... شيء لم يعد يُصلح
ثم قالت بنبرة شبه ميتة
ادام لسه الفكرة الزبالة دي مسيطره عليك يبقى إحنا عمرنا ما كنا لبعض
ردّ بعد صمت طويل... طويل جدًا
لا...
إحنا كنا لبعض زيادة عن اللزوم... لدرجة إننا ضيعنا بعض
سكون...
لكن هذه المرة لم يكن هدوءًا...كان نهاية
أو ربما...بداية انهيار لا رجعة فيه
تلاشى صوته تدريجيًا...
كأن أحدهم انتزعه من داخلها بالقوة
آدم...
لم يأتِ الرد
صمت...هذه المرة صمت حقيقي
فتحت عينيها فجأة...
واندفعت أنفاسها مضطربة كأنها كانت تغرق... ونجت في اللحظة الأخيرة
نظرت حولها بارتباك...
الغرفة كما هي ساكنة باردة خالية...لا أثر له
وضعت يدها على صدرها تحاول تهدئة ذلك الخفقان العنيف...
لكنها كانت تشعر به...تشعر ببقاياه بصوته بكلماته... كأنها لم تغادرها بعد
همست لنفسها بصوت متقطع
أنا لازم أبطل كده...لازم ابطل اسمعه جوايا و ارد عليه... لازم أفوق
أغمضت عينيها لثوانٍ...
وكأنها تحاول إغلاق بابٍ فُتح داخلها رغماً عنها
لكن...جاءها صدى صوته... خافت بعيد... أو ربما مجرد وهم
إنتِ عمرك ما عرفتي تنسي فعلًا...و لا هتعرفي
فتحت عينيها بسرعة ونفت برأسها بعنف
لأ... خلاص انتهى
قامت من مكانها بخطوات غير ثابتة...
كأن الأرض نفسها لم تعد مأمونة تحت قدميها
تقدمت نحو المرآة...
توقفت
تأملت وجهها طويلًا...
عينان مرهقتان تحملان بقايا معركة لم يرها أحد
رفعت يدها ولمست خدها ببطء...
ثم همست بنبرة أهدأ... لكنها أكثر قسوة
اللي بينا مات... حتى لو لسه جوايا بيتكلم
ابتعدت خطوة...
ثم أغلقت عينيها مرة أخرى هذه المرة بإرادة
سكون..لا صوت...لا صدى لكن الإحساس ظل...
ثابتًا في أعماقها كندبة لا تُرى...ولا تُشفى
في مكانٍ آخر...فتح عينيه فجأة
شهق... كأن شيئًا انتُزع من داخله بعنف
آسيا...
نطق اسمها بلا وعي...
ثم اعتدل جالسًا وعيناه تتحركان في الفراغ بحدة
الصمت حوله طبيعي...
لكن داخله....فراغ
فراغ لم يشعر به من قبل
وضع يده على رأسه كأنه يحاول التقاط أي أثر لها... أي صدى... أي همسة
ردّي...
لا شيء....ضم قبضته بقوة وملامحه تشدّدت تدريجيًا
آسيا... بلاش الحركة دي
لكنه كان يعلم...هذه ليست مجرد حركه تستفذه بها
هي لم تصمت...هي اختفت
لأول مرة...لا يشعر بها
لا يسمعها
لا يراها حتى داخل رأسه
وكأنها... أغلقت الباب في وجهه
ابتلع ريقه بصعوبة... وخرج صوته منخفضًا يحمل شيئًا لم يعترف به من قبل
إنتِ مشيتي بجد...
سكون...ثم ضحك ضحكة قصيرة جافة بلا روح
كويس... يمكن ده الأحسن
لكن يده كانت ترتجف
وعيناه... لم توافقا كلماته
في الجانب الآخر...
وقفت أمام المرآة تحاول أن تبدو طبيعية...
تحاول أن تُقنع نفسها أن كل شيءٍ قد انتهى
أخذت نفسًا عميقًا... ثم آخر...
ورغم ذلك لم يصل الهواء إلى صدرها كما ينبغي
رفعت كفّها ورشّت بعض الماء على وجهها
كأنها لا تغسله... بل تحاول أن تمحو بقاياه
خلاص... أنا كويسة
همست بها...
لا كحقيقة... بل كأمرٍ تُجبر نفسها على تصديقه
خرجت من غرفتها بخطواتٍ أهدأ هذه المرة...
تحاول الاندماج في الواقع...
في أي شيءٍ ملموس... حقيقي
ماما... إنتِ كويسة
التفتت على الصوت...
حدّقت للحظة...
وكأنها لا تتعرف على المتحدث
مرّت ثانية...ثانيتان...
أكثر مما ينبغي
ثم ابتسمت ابتسامة باهتة لا تصل إلى عينيها
آه... أنا تمام
قالتها أخيرًا...
لكن صوتها كان خاليًا... بلا روح
تابعت كأنها تحفظ الكلمات
آيات... بلاش جامعة النهارده
خالاتك جايين بعيالهم وأنا لازم أروح الشغل ضروري...
هخلص ورق مهم وهرجع على طول
لم تنتظر ردًا...
فجأة شعرت بأن الأرض تميل تحت قدميها
دوار خفيف...ثم أثقل
ثم كأن العالم يُسحب منها ببطء
مدّت يدها تمسكت بأقرب شيءٍ إليها
استني... وشك أصفر ليه كده
الأصوات بدأت تتداخل...
تبتعد... تقترب...
كأنها تُسمع من داخل بئرٍ عميق
أغمضت عينيها لحظة...
وكادت تسقط
لكنها تماسكت بكل ما تبقى فيها من قوة
همست... بالكاد تُسمع
أنا... مش سامعاه...
كأن فقدانه...لم يكن راحة كما ظنت بل كان
سقوطًا حرًا
ابتلعت ريقها بصعوبة
ثم اعتدلت رغم ارتجاف جسدها
تقدمت نحو الداخل بصوتٍ جامد منفصل
أنا كويسة...متقلقيش
اعمليلي فنجان قهوة... على ما ألبس
داخل غرفتها...
أغلقت الباب خلفها ببطء
اسندت ظهرها عليه...
ثم أغمضت عينيها
ثوانٍ... فقط ثوانٍ...
قبل أن ينهار القناع
أنفاسها تسارعت...
وقبضت على صدرها بقوة
ليه حاسة إني فاضية...
همست بها بخوفٍ حقيقي
تقدمت خطوتين...
ثم جلست على طرف الفراش وكأن قدميها لم تعودا تحملانها
ده المفروض يريحني... صح
اختفى... خلاص...
صمت.
ثم هزّت رأسها ببطء... وابتسامة مريرة شقّت شفتيها
طب ليه حاسة إني أنا اللي اختفيت
سكون...لكن هذه المرة لم يأتِ صوته ولا حتى صداه
فقط فراغ...يبتلعها ببطء
بعد وقتٍ قصير...
كانت تقف أمام المرآة مجددًا...لكن هذه المرة ملامحها أكثر قسوة... أكثر برودًا
ارتدت ملابسها بعناية...
حركات دقيقة كأنها تؤدي دورًا محفوظًا
وضعت القليل من مستحضرات التجميل
لا لتبدو أجمل...بل لتُخفي أي أثرٍ للانهيار
نظرت لنفسها طويلًا ثم قالت بنبرة حاسمة
مفيش حاجة حصلت
حملت حقيبتها... وخرجت
في الطريق...كل شيء طبيعي
إلا هي...كانت تجلس في السيارة تنظر من النافذة
لكنها لا ترى شيئًا
فقط فكرة واحدة تدور... وتدور
ليه مش سامعاه
شدّت على حقيبتها بقوة...
وكأنها تتمسك بآخر خيطٍ يربطها بنفسها
كده احسن ...اكيد هرتاح
همست بها فسألها بصوت خافت
إنتِ كويسة...
لكن صوتها الداخلي هذه المرة لم يُجب
أمام الشركة...
توقفت السيارة
نزلت بخطواتٍ ثابتة ظاهريًا...لكن بداخلها كل شيء كان يتهاوى
وقفت لحظة أمام الباب...
رفعت رأسها وأعادت ارتداء القناع
ثم دخلت كأنها لم تكن قبل دقائق...على حافة السقوط
بمجرد أن عبرت البوابة
استقبلها الهواء البارد
وذلك الهدوء المصطنع الذي يملأ المكان
كل شيء منظم... هادئ... طبيعي...إلا هي
صباح الخير يا فندم
هزّت رأسها فقط، دون أن تنظر حتى
واستمرت في السير
الكعب يطرق الأرض بإيقاعٍ ثابت...قوي... واثق...
لكن داخلها فوضى
وصلت إلى مكتبها...دفعت الباب... ودخلت
أغلقته خلفها
سكون...تقدمت ببطء... وضعت حقيبتها ثم جلست
لحظة...ثانية
ثم...انهار الثبات
انحنت قليلًا للأمام...
وضغطت كفّيها على رأسها بقوة
اسكت بقي...
همست بها وكأنها تستجدي عقلها أن يثبت
مدّت يدها نحو الأوراق أمامها حاولت القراءة لكن الكلمات كانت تتداخل
تتحرك...تختفي
لا... لا... مش دلوقت انا مطلوب مني شغل مهم لازم اركز
أغمضت عينيها للحظة...
وهنا...تجمّد جسدها بالكامل
شعرت به...ليس صوتًا...
ليس فكرة...إحساس قريب
قريب جدًا
أنفاسها تسارعت...
وقلبها بدأ يخبط بعنف
...آدم
فتحت عينيها بسرعة
لا أحد المكتب كما هو
لكن الإحساس لم يختفِ
بالعكس...اقترب
كأن أحدهم يقف خلفها مباشرة
تجمّدت....لم تجرؤ على الالتفات
ثم...صوت ليس في أذنها بل داخلها
خافت... متقطع... وكأنه يُسحب بالقوة
...آسيا...
شهقت... وقامت واقفة فجأة والمقعد اندفع للخلف بقوة
آدم
صوتها خرج مسموعًا هذه المرة
لهذا...دُقّ الباب فجأة ثم فُتح دون انتظار
مدام آسيا...في حاجة
التفتت بسرعة...وجدت إحدى الموظفات تنظر لها بقلق
تأخرت في الرد...عيناها ما زالت تبحث... في الفراغ
أنا... أنا تمام
قالتها بصعوبة
حضرتك صوتك كان عالي... قلقتيني
ابتسمت ابتسامة مشدودة
قلتلك أنا كويسة... دخلتي ليه من غير إذن
نبرة حادة... خرجت أقسى مما أرادت
ارتبكت الموظفة
أنا آسفة
اتفضلي
أشارت لها بالخروج أُغلق الباب مرة أخرى...وعاد الصمت
لكن هذه المرة لم يكن فارغًا
وضعت يدها على قلبها...
تحاول استيعاب ما حدث
أنا سمعته
همست بها
أنا سمعته بجد
لكن صوتها بدأ يرتجف
بس... ليه مع اني قفلت الباب
صمتت لحظة...ثم الفكرة ضربتها بعنف
ادم مش هيسمحلي اقطع التواصل الي بينا
تراجعت خطوة...تسلّل إلى ملامحها لأول مرة
يعني... هو...
لم تُكمل لم تستطع
لكن عقلها أكمل عنها
يعني هو بيضغط عليكي
لأ
قالتها فجأة... بحزم
رفعت رأسها ببطء...
وعيناها امتلأتا بشيء جديد...ليس خوفًا فقط بل
إصرار
مش هسيب ده يحصل
في مكانٍ آخر...
لم يعد يعرف أين هو
الأرض تحت قدميه... لم تعد ثابتة
الجدران...ان وُجدت تتشقق... كأنها تنسحب من حوله ببطء
كان على ركبتيه...
أنفاسه متقطعة... صدره يعلو ويهبط بعنف
آسيا...
خرج اسمه منها... لا صوت... بل بقايا صوت
مدّ يده أمامه كأنه يحاول الإمساك بشيءٍ غير مرئي
لكن..يده مرت في الهواء ثم بدأت تتلاشى
تجمّد...حدّق في كفّه
الحواف لم تعد واضحة...
كأنها دخان... يتفكك
لأ...
همس بها برعبٍ صادق لأول مرة
حاول الوقوف سقط
إيه اللي بيحصل...
جاءه الصوت... نفس الصوت... لكن أضعف
خلاص قفلت الباب
صرخ بغضبٍ ممزوج بخوف
مش هتقدر تعمل كده
بس الرابط بدأ ينهار أسرع من المتوقع
ضغط على أسنانه
رجّعها... رجّعي اللي بينا يا اسيا
ضحكة خافتة... باهتة هذه المرة
إنت فاكر الموضوع بإيدك
هكذا سأله عقله
انقبض قلبه
امال بإيد مين
سكون...ثم الرد كطعنة بطيئة
بإيدها
اتسعت عيناه
آسيا...
هي اللي انسحبت...
هي اللي قررت تقفل الباب
هزّ رأسه بعنف
لأ... إنت كداب هي مش هتعمل كده
عملت
لأنها تعبت...لأنك وجعتها... لدرجة إنها فضّلت الفراغ عنك
توقّف كل شيء داخله للحظة
ثم... همس بصوتٍ مكسور
أنا... مكنتش عايز...
لكن الجملة لم تكتمل
لأن الألم ضربه فجأة
أقوى...أعمق
صرخ
آسيااا
هذه المرة...لم يكن نداءً
كان استغاثة
اسمعيني... مرة واحدة بس
لكن...لا شيء
سقط للأمام...لكن لم يصل إلى الأرض
توقّف... في المنتصف
كأنه عالق بين الوجود... والعدم
أنا...قلبي بيتخنق
قالها... بصدمة عيناه اتسعتا وكأن عقله أخيرًا استوعب الحقيقة
أنا قلبي بيتخنق بجد
صمت ثم... ضحك ضحكة مكسورة... مجنونة
كويس... يمكن ده اللي أستاهله
فجأة تجمّد لأن إحساسًا خافتًا ضعيفًا جدًا...ظهر
...آدم...
شهق
آسيا
الصوت كان متقطعًا...
بعيدًا... كأنه يأتي من آخر العالم
كفايه كده ...ارحمني
اتسعت عيناه...وقلبه دقّ بقوة لأول مرة منذ بدأ يختنق
و انتي مرحمتنيش ليه
حاول التحرك نحو الصوت...لكن جسده لم يعد يطيعه
آسيا... اسمعيني
سكون لحظة...ثم
أنا... مش قادرة
انقبض قلبه بعنف
لا... متسيبيش إنتِ الوحيدة اللي تقدر تخلي قلبي يتنفس حتي لو بعيده
صمت...ضعف....ثم
أنا... خايفة...و تعبت
أغمض عينيه وكأن هذه الكلمة... كانت أقسى من الاختفاء نفسه
وأنا كمان...
قالها بهدوء و صدق
لأول مرة... بلا دفاع... بلا قسوة
بس لو سيبتيني... أنا هموت
سكون...ثواني... تمر ببطء قاتل ثم
الفراغ بدأ يزداد الصوت يختفي الإحساس يتلاشى
آسيا...
لا رد
آسيا
لكن...هذه المرة لم يعد هناك شيء ليُجيب
وفي نفس اللحظة...داخل مكتبها
كانت واقفة...تتنفس بصعوبة... يدها على المكتب
دموعها سقطت دون أن تشعر
أنا... سمعته...رغم اني قفلت الباب
همست بها ثم رفعت رأسها ببطء وعيناها امتلأتا برعبٍ خالص رغم القوه الواهيه التي تحاول أن تتشبث بها
مهما يحاول ....خلاص انا اخدت قراري و مش هرجع فيه
خرجت من مكتبها خطواتها ثابتة ظاهريًا لكن قلبها يطن... خطواتها ثقيلة
وفي الممر الطويل...توقفت فجأة أمامه... آدم
نظرة واحدة وكل شيء توقف حولهم
لم ينطق أحدهما...لكن كل شيء كان واضحًا العناد الكبرياء واشتياق لم يُعترف به
رفع حاجبه تحدي ظاهر على وجهه
...آسيا
ردّت بنفس القوة بلا خوف
افندم
وقفوا هناك مترنحين بين الحديث والصمت كل واحد يختار عدم الانحناء... عدم
الاعتراف بالضعف
أصابعها قبضت على حقيبتها قليلاً...لكن عينها لم تزيغ عن عينيه
هو شعر بذلك...ابتلعت نفسه الغضب والحنين وأخفاه في نظرة صلبة مليئة بالكبر
إيه الأخبار
ردّت بحدة مصطنعة
تمام الحمد لله
كلمات قصيرة... لكنها مشحونة بكل ما لم يُقال
سكتوا للحظة كل واحد يتأمل الآخر...كل شيء بينهما يهتز لكن لا أحد يتراجع
اقترب خطوة... لكنها لم تتحرك
نظرة حادة... كلام مقطوع... قلب ينبض بألف كلمة لم تخرج
رجعتي من اجازتك امتي
قالها بصوت منخفض كأنه يختبرها
من الصبح
ردّت ببرود وكأنها ترفض أن يظهر أي شعور
وقفوا لحظة... حركاتهم طبيعية... لكنها مليئة بالتوتر
قلبت النظر بعيدًا محاولة التحكم في الدقات داخل صدرها
و هو شعر بنفس التوتر حاول أن يبدو طبيعيًا لكنه لم يقدر
تمام... هاتيلي ورق شركه المحمدي بسرعة
قالها أخيرًا وكأن هذا الفصل الوحيد المقبول بينهما
حاضر... ردّت بصوت جامد... بلا ابتسامة
ابتعدوا قليلًا كل واحد يراقب الآخر من بعيد...
قلبهم مشترك... روحهم مرتبطة لكن عنادهم أكبر من أي كلمة حب أكبر من أي اعتراف
كل لحظة تمثل جرحًا جديدًا...كل نظرة تؤكد أنهم لن يستسلموا حتى لو أرادت أرواحهم العكس
تركها وغادر سريعًا دون أن يضيف حرفًا آخر
اما هي...انتفضت بفزع حينما أمسكت نهال بذراعها برفق وهي تقول بقلق واضح
آسيا... مالك فيكي إيه...عملك حاجة الحيوان ده
لم تتمالك دموعها التي لمعت في عينيها وقالت بصوت منخفض مثقل
تعالي نتكلم في مكتبي... محتاجة أتكلم معاكي
جلست نهال قبالتها تتفحص وجهها بتركيز وقالت بقلق حقيقي
فيكي إيه يا حبيبتي مالك... أقسم بالله لو عملك حاجة أو حتى ضايقك بكلمة أنا هبهدله ومش هيهمني حد
رفعت عينيها بسرعة وكأنها تخشى سوء الفهم وقالت متعجلة
لا لا... معملش حاجة... بالعكس كان بيتكلم بهدوء جدًا
ثم ابتسمت بسخرية مريرة وأضافت
لأنه عارف كويس هو عمل معايا إيه من شوية قبل ما اوصل الشركه
اعتدلت نهال في جلستها وقد بدأ القلق يتحول إلى توتر
عمل معاكي إيه يا آسيا اتكلمي
سحبت نفسًا عميقًا وكأنها تستجمع شتات نفسها قبل أن تقول
اللي هقوله... مش عارفة هتفهميه ولا لا... بس هحاول أشرحه
صمتت لحظة ثم قالت ببطء شديد
أنا وآدم... بنتكلم جوه بعض
عقدت نهال حاجبيها بعدم فهم وقالت
يعني إيه.. بتتخيلوا يعني كل واحد بيتخيل التاني بيكلمه ده طبيعي يا آسيا
هزّت رأسها بالنفي وعيناها ممتلئتان بيقين غريب
لا... مش تخيل... إحنا بنتكلم بجد
ساد الصمت لثوانٍ ثم بدأت آسيا تسترجع ببطء
الحكاية بدأت من زمان... وإحنا لسه مع بعض
كان يتصل على الخط الأرضي... وأول ما أرد أقول...أيوه يا حبيبي
نظرت لصديقتها وكأنها تنتظر حكمها ثم أكملت
كان يستغرب ويسألني....عرفتي منين إنه أنا
كنت أقوله...قلبي قالّي
ابتسمت ابتسامة باهتة ثم همست
بعدها الموضوع اتطور... بقيت أسمعه جوايا... صوته واضح... وكأنه واقف قدامي... وأرد عليه
تصلبت ملامح نهال تدريجيًا بينما تتابعها في صمت
ولما اتكرر أكتر من مرة بدأنا نسأل بعض
يقولّي...أنا كنت لسه بقولك كذا جوايا... إنتي رديتي عليا وقلتي كذا
ونكتشف... إن نفس الكلام اتقال... بالحرف
ارتعش صوتها قليلًا
كنا بنخاف في الأول... بنتصدم... مش فاهمين إيه اللي بيحصل
بس مع الوقت اتعودنا
رفعت عينيها ببطء وقالت
لدرجة إنه كان ساعات يقولّي جوايا..اتصلي بيا
ألاقي نفسي بمسك التليفون فعلًا أتصل
يرد ويضحك ويقول: حبيبي اللي بيسمع الكلام
ابتلعت نهال ريقها بصعوبة وقالت بحذر
وآدم... لسه بيحصل معاه كده دلوقت
هنا تغيّر وجه آسيا واختلط الألم بالارتباك
أيوه... وده اللي حصل من شوية
اقتربت نهال أكثر وقد بدأ التوتر يظهر عليها
حصل إيه بالظبط
أغمضت آسيا عينيها للحظة ثم قالت
كنت قاعده في اوضتي ...لقيته بيكلمني و بيلومني
رديت عليه شويه بعدها قررت اني اقفل الباب و مسمعهوش
نجحت للحظات بس فضل يضغط عليا و انا صممت و بطلت اسمعه بس تعبت جدا علي ما قدرت اعملها
بس من شويه كنت واقفة قدامه... وهو ساكت... مفيش أي كلام
بس... جوايا سمعته بيقول أنا عارف إنك لسه حاسة بيا
فتحت عينيها وقد لمعت فيهما دموع حزينه
وأنا... رديت عليه من غير ما أتكلم قولتله ...وأنت كمان
شهقت نهال بخفوت
وهو
همست آسيا
بصلي بنفس اللحظة... بنفس المعنى... وكأنه سمعني فعلًا
سكتت لحظة ثم قالت بصوت مهتز
وبعدين قال بصوت عالي....أنا هي
وسابني ومشي
همست نهال وكأنها تخشى الإجابة
أنا هي...يعني إيه
نظرت لها آسيا نظرة عميقة مليئة بخوف لم تعهده
يعني... مفيش فرق... بين اللي جواه... واللي جوايا
كأننا... بقينا حاجة واحدة
سادت لحظة صمت ثقيل...
ثم قالت نهال ببطء وهي تحاول أن تكون عقلانية
طيب... اسمعي مني بهدوء
اللي بينكم ده... يا إما ارتباط نفسي عميق جدًا...يا إما...
توقفت قليلًا ثم أكملت
يا إما في حاجة أكبر من كده... وإنتي مش واخدة بالك منها
رفعت آسيا عينيها بخوف
زي إيه
نظرت لها مباشرة وقالت
زي إنكوا... لسه مربوطين ببعض أكتر مما تتخيلي...
وإن اللي بتحاولي تنكريه... هو أصل كل اللي بيحصل
هنا انكسرت ملامح آسيا وهمست بصوت خافت يكاد يُسمع
أنا حاولت أنساه
اقتربت منها نهال قليلًا وخفّضت نبرة صوتها كأنها تخشى أن تجرحها أكثر
بس واضح إنه... ما نسيش جواكي
رفعت يدها إلى صدرها وضغطت عليه كأنها تحاول اقتلاع شيء عالق وقالت بألم شديد
المشكلة إنه هنا...
ومش راضي يمشي... حتى لما هو نفسه مشي
اشتدت ملامح نهال ومرّ الغضب في عينيها كوميض سريع لكنها تماسكت بصعوبة وقالت بنبرة حاولت أن تبدو عقلانية
حبيبتي... اسمعيني كويس
أنا مصدقاكي... ومصدقة إن كل اللي قولتيه ده حقيقي... وبيحصل فعلًا
نظرت لها آسيا بصمت فتابعت وهذه المرة بنبرة أكثر حدة مخفية
وده سبب كفاية جدًا يخليكي تكرهيه... مش تحبيه
ارتبكت آسيا وظهر عدم الفهم جليًا على وجهها
أكرهه
أومأت لها ببطء ثم اقتربت أكثر وقالت بوضوح قاسٍ
أيوه... لأنه إنسان أناني بشكل غبي
عارف إنه متحكم فيكي... ماسكك من أضعف نقطة فيكي... وسايبك تتعذبي
انكمشت قليلًا وكأن الكلمات أصابت مكانًا حساسًا بداخلها
هو....عايش حياته عادي...
وإنتي اللي واقفة مكانك... لا عارفة تعيشي من غيره... ولا عارفة ترجعي لنفسك من غيره
اهتزت أنفاس آسيا وهمست وكأنها تدافع عنه دون وعي
هو... مش كده...
قاطعتها نهال فورًا بنبرة حاسمة
لأ... هو كده
لأنه لو حاسس بيكي زي ما إنتي حاسة بيه... كان وقف ده كان حماكي منه... مش يسيبك تغرقي فيه بالشكل ده
سقطت دمعة من عين آسيا دون أن تمسحها
أكملت نهال وهي تنظر في عينيها مباشرة
هو استغلك أسوأ استغلال... ويمكن من غير ما يقصد... بس النتيجة واحدة
ولسه مكمل
سكتت لحظة... ثم قالت ببطء وكأنها تزرع فكرة
لازم تقفلي الباب ده يا آسيا
رفعت عينيها ببطء وكأنها تسمع حكمًا مستحيل التنفيذ
أقفله إزاي
اقتربت نهال أكثر وخفضت صوتها
إنك تبطّلي تردّي
إيه
أول ما تحسيه جواكي... اسكتي
أول ما يكلمك... تجاهليه
ما تردّيش... حتى لو سمعتيه بوضوح
اهتزت عينا آسيا وكأن الفكرة نفسها موجعة
ده مستحيل
قالت نهال بحزم
لأ... مش مستحيل
ده خوف... مش أكتر
أمسكت وجهها برفق وأجبرتها أن تنظر لها
لازم يعرف إنك قوية
وإنه مش هيقدر يتحكم فيكي تاني
صمتت لحظة ثم أضافت بنبرة أعمق
لازم ترجعي تبقي آسيا
آسيا الحقيقية... مش اللي اتكوّنت على إيده... ولا اللي اتشكلت على مزاجه
ساد صمت ثقيل...
ثم همست آسيا بصوت ضعيف لكنه صادق
وأنا لو سكت... وهو ما سكتش
نظرت لها نهال بثبات
هيسكت... لما يلاقي مفيش صدى
أغمضت آسيا عينيها ببطء...وفي اللحظة التي قررت فيها أن تحاول
تجمّدت...انحبس نفسها فجأة
لا...
فتحت عينيها على اتساعهما
آسيا
همست وصوتها يرتعش
هو هنا
أمسكت نهال يدها بقوة
تجاهليه... زي ما قولتلك
شدّت آسيا يدها بعنف وكأنها تقاوم شيئًا غير مرئي
بيقولي... ردي
انقبض قلبها ودموعها تنزل بصمت
بيقولي... إوعي تسكتي
نهال بصرامة
ما تردّيش
عضّت آسيا شفتيها بقوة...
أنفاسها تتسارع...
بيقرب... صوته... أعلى
ثم فجأة... صرخت
كفاية
سكتت...سكون تام...ثوانٍ مرت ثم انهارت على المقعد تلهث
و الاخري تراقبها بقلق
سكت
هزّت رأسها ببطء...
لكن ملامحها لم ترتح
لا...
أمال
رفعت عينيها ببطء شديد...
وكان فيهما شيء جديد شيء مرعب
سكت...بس بقي جوايا أعمق
تجمّدت نهال
يعني إيه
همست آسيا
يعني... لما تجاهلته اختفى من صوتي
توقفت وابتلعت ريقها
وظهر... في إحساسي
سقطت الكلمات ثقيلة...
ثم أكملت بصوت مكسور
بقيت... حاسة بيه من غير ما يتكلم
و داخل مكتب ادم ....فتح عينيه فجأة...
وكانت نظراته هذه المرة مختلفة
أهدأ... وأخطر
ابتسم ابتسامة خفيفة... وقال بهدوء
حلو
ثم همس
كده... بقينا أقرب سكتي صوتي يا اسيا و متسمعهوش عشان اضغط علي قلبك و يتخنق
داخل المكتب...
همست آسيا وكأنها اكتشفت شيئًا متأخرًا
أنا... لما حاولت أهرب منه
نظرت لنهال بعينين مليئتين بالخوف
قرّبته أكتر
ظلت كلماتها الأخيرة معلّقة في الهواء
أنا... لما حاولت أهرب منه... قرّبته أكتر
سادت لحظة صمت ثقيل...
لم ترد نهال هذه المرة... فقط كانت تنظر لها وكأنها تنتظر
هتكمّل ولا هتستسلم
أغمضت عينيها...وأنفاسها بدأت تهدأ تدريجيًا لكن بداخلها...لم يكن هناك هدوء
شايفه
جاء صوته... واضح... هادئ... وقريب جدًا
ارتجف قلبها
"مهربتيش... إنتي رجعتيلي بإيدك
ضغطت على يدها بقوة... أظافرها تغرس في جلدها
امشي...
همست بها بالكاد
ليه.... وأنا جواكي
تسارعت أنفاسها...
قلتلك امشي
مش هقدر... لأنك مش عايزة
فتحت عينيها فجأة...
وكان فيها شيء مختلف
غضب
نهال انتبهت فورًا
آسيا
لكنها لم تنظر لها...
كانت تنظر لفراغ أمامها...
أو ربما... لما هو أبعد
همست ببطء... لكن كل كلمة كانت خارجة من جرح
إنت كداب...
صمت...
ثم جاء صوته أهدأ
إثبتي
ارتجفت شفتاها... لكن هذه المرة... لم تتراجع
أنا كنت عايزاك... زمان
كنت بختارك... كل مرة
دمعة سقطت... لكنها لم تمسحها
بس دلوقت... لأ
صمت داخلي...ثوانٍ طويلة
ثم جاء صوته أخف... لكن فيه توتر لأول مرة
آسيا
رفعت رأسها أكثر... وكأنها تواجهه وجهًا لوجه
إنت مش حب...
إنت لعنه
تجمّدت أنفاسها للحظة...
ثم أكملت بصوت أقوى
وأنا... اللي سمحت بده
بدأت نهال تشعر أن شيئًا حقيقيًا يحدث...
ليست مجرد كلمات...
كانت آسيا تتغير... حرفيًا
إنتي بتكذبي على نفسك
ابتسمت آسيا... ابتسامة موجوعة... لكنها ثابتة
يمكن...
بس أنا هصدق الكذبة دي... لحد ما تبقى حقيقة
ضغطت يدها على صدرها بقوة... كأنها تواجهه من الداخل
مش هرد عليك تاني
مش هتقدري
أغمضت عينيها... وأخذت نفسًا عميقًا ثم همست
شوف
ثوانٍ...
مرّت...
ثوانٍ تانية...
الصوت... بدأ يضعف
آسيا...
أضعف...
ردي...
أضعف...
إنتي...
... واختفى
فجأة...
شهقت آسيا بعنف... وكأنها خرجت من تحت الماء
جسدها كله ارتعش...
لكن...
الصوت... سكت
فتحت عينيها ببطء...
ونظرت لنهال
داخل عينيها... تعب... وجع... لكن به شيء جديدة
سكت...
همست بها... وكأنها لا تصدق
اقتربت نهال بسرعة
بجد
هزّت رأسها ببطء
أول مرة... من سنين
ابتسمت ابتسامة صغيرة... مرتجفة
أول مرة... صوته ما يغلبنيش
لكن...وقبل أن تكتمل اللحظة تجمّدت
ابتسامتها اختفت تدريجيًا وعينيها اتسعت
آسيا
همست... بصوت شبه مكسور
أنا... مش سامعاه...
صمتت لحظة...ثم وضعت يدها على قلبها
بس... حاساه
رفعت عينيها ببطء...
والخوف عاد... لكن هذه المرة أعمق
وكأنه... زعلان
في نفس اللحظة...داخل مكتبه
كان آدم يقف امام النافذه... ساكن تمامًا
عينيه ثابتة... ونَفَسه بطيء
ثم... ابتسم
لكن الابتسامة لم تصل لعينيه
أخيرًا...
همس بها... بهدوء غريب
بدأتي تقاومي
رفع رأسه قليلًا... وكأنه يراها
بس إنتي لسه فاكرة... إنك بتبعدي
توقف لحظة...
ثم قال، بنبرة أخطر
وإنتي... لسه جوايا لسه محتلك و استحاله تتحرري
داخل مكتبها
جلست آسيا ببطء مرهقة... لكنها لأول مرة لكنها ليست مكسورة بالكامل
همست وكأنه وعد لنفسها
مش هرجع تاني...
نظرت لها نهال بثبات... لكن في عينيها قلق
خليه يحاول
رفعت آسيا عينيها...
والهدوء بداخلها... كان بداية حرب
وأنا همنعه
ماذا سيحدث يا تري

صباحك بيضحك يا قلب فريده
جلس الأخوان أمام والدهما يرويان له ما حدث بتفاصيله
كان الصمت يسبق كل جملة وكأن الكلمات نفسها خائفة من الخروج
ظهر الحزن جليًا على وجه وليد ملامحه انطفأت كمن عاد به الزمن لجرح قديم لم يلتئم بعد
لكن صمته لم يدم طويلًا
قطع معاذ السكون بصوت مشحون بالغضب والخذلان
— ليه رفضني يا بابا
ثم أردف بانفعالٍ أكبر
— عمي عمل فيهم إيه عشان يقولّي اسأل عمك
أنا عايز أفهم… عايز أفهم كل حاجة
تنهد ابيه بعمق وكأن صدره يضيق بالحكاية قبل أن ينطق بها ثم قال بصوت منخفض يحمل ثِقل السنين
— عمك… كان خاطب آسيا
اتسعت عينا معاذ بصدمةٍ وكأن الأرض انسحبت من تحته بينما أكمل وليد
— كانوا بيحبوا بعض حب الناس كلها كانت بتحكي عنه
بس ولاد الحرام… دخلوا بينهم.ولعبوا في دماغه… وفهموه إنها خانته
توقّف لحظة وكأنه يرى المشهد أمامه من جديد ثم أكمل بنبرةٍ أكثر قسوة
— سابها… وساب نفسه كمان
الاتنين اتعذبوا سنين… وهي حاولت تثبت له الحقيقة وهو رفض يسمع
كابر… وعاند قلبه… لحد ما كسرها
أطرق برأسه قليلًا ثم قال بأسى
— عمل مواقف وحشة مع أهلها… وأحرج أبوها قدام الناس
عشان كده امير خايف
خايف القصة تعيد نفسها… وبنته تتوجع زي ما آسيا اتوجعت
ساد صمت ثقيل… لكن هذه المرة لم يكن هدوءًا بل كان إعصارًا مكتومًا داخل معاذ
رفع رأسه فجأة وعيناه تلمعان بالغضب
— وأنا مالي ومال عمي
هو غلط… وأنا أدفع التمن
ثم قال بحدةٍ صريحة — واسمحلي يا بابا أقولها… أخوك غبي
تجهم وجه وليد لكن معاذ لم يتوقف… كأن ما بداخله انفجر دفعة واحدة
— من معاملتي لآسيا… الست دي جدعة و بميت راجل
محترمة… فوق ما تتخيل
يعني إيه يشك فيها إزاي أصلاً يوصل لكده
اقترب خطوة وصوته انخفض لكنه صار أكثر صدقًا
— أنا فهمتها… في وقت قليل قدرت أشوف هي مين بجد
أخوك هو اللي اختار يشوف الوهم… مش الحقيقة
ثم أكمل وعيناه تشتعلان بإصرار
— وأنا مش هشيل ذنبه… ولا هدفع تمن خوفه
أنا بحب شيرين… بقالي سنتين
كنت ساكت مستنيها تخلص جامعة… مستني الوقت الصح
قبض يده بقوة
— بس لما لقيت ابن الكلب ده دخل حياتها… واشتغل معانا عرفت إن السكوت بقى خطر
ولازم آخد خطوة
هنا... تدخل قاسم الذي كان يراقب بصمتٍ وقال بنبرة هادئة لكن بداخلها دهاء
— متبقاش غشيم يا معاذ… العبها صح
نظر له معاذ بعدم فهم فمال قاسم قليلًا للأمام وقال..
— اقفل الموضوع ده خالص قدامهم وكأنك استسلمت
متتكلمش… متضغطش… متطلبش حاجة
توقف لحظة ثم أكمل بنظرة ثاقبة
— قرب منها واحدة واحدة
خليها هي تحبك
تغيرت ملامح معاذ قليلًا بينما تابع قاسم — لما قلبها يبقى معاك… هي اللي هتضغط على أبوها
ساعتها… المعركة مش هتكون فيها لوحدك
ثم أضاف بخبثٍ
— إنما دلوقت إنت داخل حرب من غير حليف
وده… انتحار
سكت معاذ لكن هذه المرة لم يكن صامتًا…
كان يفكر
صراع واضح دار في عينيه… بين اندفاعه… و حديث قاسم المنطقي
رفع نظره أخيرًا وقال ببطء..
— يعني أرجع ورا خطوة… عشان أكسب الحرب كلها
ابتسم قاسم ابتسامة خفيفة
— مش تراجع ده تكتيك
هنا تدخل وليد أخيرًا بصوت هادئ لكنه يحمل تحذيرًا
— أنا مش ضدك يا معاذ أنا بس خايف إنك تدخل نفس الدوامة
نظر له معاذ بثبات وقال..
— الفرق إني… مش ههرب من الحقيقة
ولو حبيتها… هحارب عشانها مش ضدها
ثم أردف ونبرة صوته تحمل وعدًا صريحًا
— وأنا عمري ما هكسرها… زي ما اسيا اتكسرت
ساد الصمت مرة أخرى لكن هذه المرة لم يكن صمت ضعف بل بداية معركة
وصلت هاجر برفقة هدى وأبنائهما إلى منزل آسيا التي لم تعد من عملها بعد
كان البيت دافئًا رغم غياب صاحبته… كأن روحها ما زالت تملأ المكان
جلسن النساء معًا في حديث هادئ تتخلله نبرات حنين وفضول خفي
بينما تجمع الشباب في جانب آخر بين مزاحٍ وكلماتٍ جادة تتسلل أحيانًا دون قصد
لكن وسط هذا الجو… لم تكن كل القلوب مرتاحة
لاحظت آيات التغير الواضح على ملامح ريان كان يضحك نعم… لكن ضحكته لم تصل إلى عينيه
هناك شيء مكسور… أو ربما مُثقَل
ترددت لثوانٍ… ثم وقفت فجأة وقالت بصوتٍ حاولت أن تجعله طبيعيًا
— ريان… عايزاك لحظة لو سمحت
التفت إليها وعيناه تحملان حزنًا خفيًا…
كان يعلم…هي شعرت
ورغم رغبته في الهروب من المواجهة لم يستطع رفضها
نهض بهدوء واتجه معها إلى الداخل
في نفس اللحظة…مدّ محمود يده إلى جويرية وقال بخفوت
— تعالي نقف في البلكونة شوية
نظرت له لحظة ثم تحركت معه دون اعتراض…كأنها هي الأخرى تحتاج إلى مساحةٍ بعيدة عن العيون
لم يفوّت محمد الفرصة فنظر إلى داليا التي كانت تجلس بخجلٍ واضح وقال بمزاحٍ مشاكس
— هو كل واحد خد الحتة بتاعته ودخل جوه… وإحنا إيه مفيش كلمتين عايزين نقولهم
احمرّ وجهها بشدة فانفجرت رضوى ضاحكة وقالت
— اتلم يا ولا ...سيب البنت في حالها… دي ثانوية عامة يا بابا
لما تخلص… ابقى قول كل الكلام اللي انت عايزه
فتح محمد فمه ليرد… لكنه توقف فجأة
عيناه وقعتا على شيرين التي كانت شاردة تمامًا… بعيدة عن الضحك وعنهم جميعًا.
قطب حاجبيه ثم سألها باهتمامٍ
— مالك يا شيري
هو إنتِ متضايقة عشان باباكِ رفض معاذ قوليلي بصراحة
رفعت عينيها ببطء… وفيهما حزن هادئ ليس صاخبًا… لكنه عميق
— مش فكرة متضايقة
توقفت لحظة وكأنها تبحث عن الكلمات
— اللي مزعلني الطريقة
سكتت قليلًا ثم أكملت بصوتٍ يحمل حيرة حقيقية
— إنت شفت هو وماما كانوا بيتكلموا إزاي
كأن في حاجة مستخبية… حاجة أكبر من مجرد رفض
نظرت له مباشرة
— في لغز في الموضوع…ونفسي أفهم… إيه دخل خالتو آسيا بكل ده
تجمد محمد للحظة…
ابتلع لعابه بصعوبة
الحقيقة كانت ثقيلة… وأثقل منها أنه لا يستطيع قولها
تنهد بهدوء ثم قال بنبرة متزنة
— أنا اللي يهمني إنك مش بتحبيه
راقب عينيها بدقة ثم أكمل
— لو مش جواكِ حاجة ليه… يبقى الرفض ده في صالحك
ومش لازم نكبر الموضوع
صوته خفّ قليلًا
— إنما… لو في حاجة جواكِ
اقترب منها قليلًا وأضاف بصدق
— قوليلي…وأنا هحاول أقنع بابا
نظرت له شيرين طويلًا.ثم قالت بصوتٍ منخفض
— أنا مش عارفة
اتسعت عينا محمد قليلًا
فأكملت وهي تنظر بعيدًا
— مش عارفة بحبه ولا لأ…بس عارفة إن وجوده كان مريح وكلامه كان صادق
ابتسمت بسخرية
— يمكن أنا اللي كنت محتاجة ده… مش هو
ثم همست
— بس اللي حصل… خلاني أحس إني مرفوضة
حتى لو أنا مكنتش موافقة أصلًا
سكت محمد…وهذه المرة لم يجد ما يقوله
أغلقت آيات الباب خلفها بهدوء…
ثم استدارت إليه
وقف ريان بعيدًا قليلًا وكأنه يتجنب الاقتراب…أو يخشى أن ينكشف ما بداخله
تقدمت نحوه خطوة وقالت بهدوء
— مالك يا ريان
لم يرد
اكتفى بابتسامة باهتة وقال
— مفيش… عادي
ضيّقت عينيها قليلًا — لا… مش عادي أنا عارفاك كويس
صمت…وهذه المرة كان صمته اعترافًا
اقتربت أكثر حتى أصبحت أمامه مباشرة — من ساعة اللي حصل… وإنت مش إنت
بتضحك… بس من غير روح
رفعت يدها ببطء وضعتها على صدره — إيه اللي واجعك
أغمض عينيه للحظة…وكأن هذا السؤال هو ما كان يهرب منه
ثم قال بصوتٍ منخفض — اللي واجعني… إني مش عارف أعمل حاجة
فتحت عينيها بقلق
— تقصد إيه
ضحك بسخرية
— شايف كل حاجة بتبوظ حوالينا…ومش قادر أغير حاجة
نظر لها بعمق
— معاذ…وشيرين… واللي بين الكبار…صهيب اخوكي ..و الورق اللي معايا علي اسلام كله غلط في غلط
مرر يده في شعره بعصبية
— وأنا واقف بتفرج
هزت رأسها برفض — إنت مش بتتفرج… إنت بتفهم
ودي لوحدها قوة
ابتسم بمرارة
— الفهم من غير فعل… وجع
نظرت له بثبات
— طيب ليه حاسس إنك لازم تصلّح كل حاجة
سكت
فأكملت بنعومة
— مش كل المعارك بتاعتك يا ريان ومش كل الجروح ينفع تعالجها بإيدك
اقتربت أكثر وخفضت صوتها
— بس في حاجة واحدة تقدر تعملها
نظر لها باهتمام
فهمست
— متخسرنيش انا كمان… وإنت مشغول بالباقي
اتسعت عيناه قليلًا…
وكأن كلماتها أصابته في نقطة لم يكن يراها
فأكملت بنبرة صادقة — أنا مش محتاجة بطل…أنا محتاجة ريان…حبيبي اللي أعرفه
ساد الصمت…لكن هذه المرة لم يكن ثقيلاً
مد يده ببطء وأمسك يدها…وكأنه يتمسك بشيءٍ حقيقي وسط كل هذا الارتباك
وقال بصوتٍ أكثر هدوءًا
— وأنا… مش عايز أخسرك
ابتسمت بخفة…لأول مرة يعود جزء صغير من روحه إلى عينيه
كانت تقف مع شريف يناقشان تفاصيل العمل المطلوب منها
نبرتها كانت عملية… دقيقة خالية تمامًا من أي ارتباك
وكأنها أتقنت فن دفن الألم تحت طبقاتٍ من القهر
قال شريف وهو يراجع بعض الأوراق
— على فكرة…احمد الشيمي هييجي بكرة عايز يراجع الشغل بنفسه
أومأت برأسها بهدوء — تمام… كل حاجة هتكون جاهزة
لم يظهر على وجهها شيء…لكن داخلها كان هناك شيء يتحرك
في نفس اللحظة…كان آدم يقترب
سمع الجملة الأخيرة
..أحمد الشيمي هييجي بكرة...تصلبت ملامحه فورًا
هذا الاسم… لم يكن عاديًا بالنسبة له بل كان… تهديدًا
رنّ هاتف شريف فابتعد قليلًا ليرد في خصوصية
وبقيت هي…وهو
اقترب منها بخطواتٍ بطيئة… لكنها مشتعلة
حتى وقف أمامها مباشرة
قال بصوتٍ منخفض… لكنه مليء بالغيرة والاتهام
— شايفك فرحانة… عشان البيه جاي بكرة
ثم أضاف بسخرية جارحة
— هو ده العريس الجديد يا آسيا
رفعت عينيها إليه…
الغضب كان واضحًا لكنه لم يخرج بل… ابتسمت
ابتسامة باردة مستفزة
وقالت بهدوء قاتل
— وإنت مالك
هو أو غيره… هيفرق معاك في إيه
اشتعلت عيناه فورًا واقترب أكثر
— فكري تعمليها… وأنا أقتلك
مفيش راجل هيدخل حياتك تاني… فاهمة
لم تتراجع بل رفعت حاجبها بسخرية
— غريبة…طب ما أنا كنت متجوزة عشرين سنة يا آدم… ومخلّفة تلات عيال
مالت برأسها قليلًا ونظرت له بحدة
— إيه اللي اتغير فجأة
اكتشفت إنك بتغير… ولا إيه
نظر لها بتحدٍ صريح وقال بثقةٍ ممزوجة بالجنون
— لأ…وقتها كنت واثق
اقترب أكثر وصوته انخفض
— واثق إن قلبك ملكي وإن كل كلمة بينا… كانت بتقول إنك مش عايشة معاه بجد
نظراته تعمقت أكثر
— يعني رغم جوازك…فضلتي ليا… قلب وروح
توقف لحظة…ثم أكمل بجرأة صادمة
— وجسم كمان..لكن المره دي ....
صمت فجاه حينما وجد نفسه سيعترف بخوفه من وجود رجل غيره
تجمدت للحظة…لكنها لم تنكسر
بل… ابتسمت ابتسامة مؤلمة هذه المرة…ليست له… بل لنفسها
وقالت ببطء
— كمل… سكت ليه
اختنقت الكلمات في حلقه لأنه… للمرة الأولى… لا يملك يقينًا
فأكملت هي بعينين تفضحان وعيها الكامل
— إنما دلوقت إنت مبقتش واثق
اقتربت خطوة… لأول مرة هي التي تهاجمه — بقيت عارف… إن اللي كان جوايا ليك… بينتهي
نظرت له بثبات
— عارف إني بدأت أتحرر منك…عشان كده خايف
تصلب جسده…لكنه لم ينكر
فهمست بنبرة تضرب عمق غروره
— خايف قلبي يدق لغيرك… صح
اشتدت أنفاسه لكنه قال بعناد
— مستحيل
ضحكت بخفة… لكن ضحكتها كانت كالسهم — لا… ممكن
ثم مالت نحوه قليلًا وهمست
— وساعتها… إنت اللي هتموت
اتسعت عيناه فأكملت… ببطء كأنها تتعمد قتله بكلماتها
— صدقني… قريب جدًا هتشوفني بحب غيرك
توقفت لحظة…ثم أضافت بجرأة قاسية — وفي حضنه كمان
رفعت عينيها إليه
— وده… وعد مني
تركت كلمتها معلقة في الهواء ثم استدارت وغادرت
بعد خروجها…ظل واقفًا مكانه لكن بداخله كان كل شيء ينهار
مرر يده في شعره بعنف…يتنفس بصعوبة
همس لنفسه بصوتٍ متحشرج
— مستحيل
لكن صوته… لم يكن واثقًا كان خائفًا
في الممر…كانت آسيا تسير بسرعة أنفاسها غير منتظمة
بمجرد أن ابتعدت…
توقفت فجأة
وضعت يدها على صدرها تحاول السيطرة على دقات قلبها
لم تكن قوية كما بدت
همست لنفسها
— خلاص… كفاية
أغمضت عينيها…
دمعة هربت رغمًا عنها
مش هرجع تاني
لكن داخلها…صوت آخر قال
-لسه… مخلصتيش منه
فتحت عينيها…
وفيهما صراع واضح
في نفس اللحظة…
عاد شريف لكنه توقف عند المشهد…
آدم يقف مشتعل… ومكسور في نفس الوقت
ضيّق عينيه… وفهم أن شيئًا خطيرًا يحدث
اقترب منه بهدوء وقال بنبرة تحمل تحذيرًا
— ابعد عنها يا آدم
نظر له ببطء
— دي حاجة متخصكش
رد شريف بثبات
— بقت تخصني… من ساعة ما شوفت نظرتها
سكت لحظة ثم أضاف — دي واحدة…عايزة تهرب من حاجة
وإنت… بتشدها ليها تاني
اقترب آدم وعيناه تشتعلان
— أنا الوحيد اللي يعرفها بجد
رد شريف بهدوء أقسى
— لا…إنت الوحيد اللي عايز يخليها تفضل زي ما كانت
سقطت الجملة كضربة مباشرة
ثم قال
— بس هي…اتغيرت
صمت
ثم أضاف
— والسؤال بقى…إنت هتسيبها في حالها … ولا هتكسرها تاني
في اليوم التالي… داخل الشركة
كان الهدوء غريبًا… غير طبيعيٍّ على الإطلاق
كأن المكان ينتظر شيئًا… أو أحدًا
وقفت آسيا أمام مكتبها تراجع الملفات بدقةٍ شديدة
لكن تركيزها لم يكن كاملً
لم تكن تنتظر أحمد…
بل كانت تنتظر ردّ فعل آدم
في الوقت ذاته…
كان آدم يقف عند نافذة مكتبه
سيجارة بين أصابعه… احترقت حتى نهايتها دون أن يشعر
كانت عيناه مثبتتين على مدخل الشركة
بمجرد أن يدخل…ستبدأ الحرب
همس لنفسه
— وريني بقى يا أحمد… هتعمل إيه
عند المدخل…دخل أحمد الشيمي
بخطواتٍ واثقة… هادئه
رجلٌ اعتاد أن يدخل أي مكان وكأنه يملكه
بدلة أنيقة… نظرة ثابتة…وكاريزما تفرض نفسها منذ اللحظة الأولى
التفتت إليه الأنظار
لكنه لم يكن يرى أحدًا…كان تركيزه منصبًّا على هدفٍ واحد
....آسيا
رفعت رأسها فور أن شعرت بوجوده…
التقت عيناهما ثانية واحدة…لكنها كانت كافية
ابتسم ابتسامة هادئة — صباح الخير يا آسيا
ردّت بهدوءٍ مهني
— صباح النور… اتفضل
كان صوتها ثابتًا…
لكن قلبها لم يكن كذلك
جلس أمامها وبدأ الحديث مباشرة عن العمل
— راجعت اللي اتبعت…انتي عامله شغل كويس جدًا
هزّت رأسها
— شكرًا
لكن عينيه… لم تكونا على الأوراق بل عليها
ثم قال فجأة
— واضح إنك مش مركزة
رفعت عينيها بسرعة — لا... أنا كويسة
ابتسم بخفة
— مش باين
وقبل أن ترد…انفتح الباب بعنف
دخل آدم....توقّف
نظره إليها أولًا…ثم إلى أحمد
قال بصوتٍ هادئ… لكنه أخطر من أي صراخ
— واضح إني جيت في وقت مش مناسب
وقف أحمد بهدوء و قال
اهلا
نظر آدم إلىه لحظة…
ثم تجاهله سخريته تمامًا
— اهلا
رد أحمد بثبات
— انا قاعد يومين و محتاج الشغل اللي طلبته يخلص قبل ما اسافر
اقترب آدم خطوة وعيناه لا تفارقان آسيا — الشغل ده مسؤوله عنه المدام
قال آدم بصوتٍ منخفض
— أتمنى تلتزم بحدود شغلك بس معاها
لم تتغير ملامح أحمد — وأنا جاي عشان كده فعلًا
ثم أضاف وعينه عليها
— إلا لو في حد شايف غير كده
اشتد التوتر لكن آسيا تدخلت فورًا
— خلاص… كفاية
نظر الاثنان إليها
تابعت بنبرةٍ حازمة
— ده مكان شغل… وأي كلام برّه الإطار ده مرفوض
ثم التفتت إلى أحمد
— اتفضل… نكمل
كانت رسالتها واضحة…لكن تأثيرها لم يكن واحدًا
جلس أحمد بهدوء…
أما آدم فظل واقفًا ينظر إليها
قال ببطء
— شكلك مستعجلة
ردّت ببرود
— عندي شغل… مش فاضية لغيره
اقترب خطوه وخفض صوته
— ولا ليا
تصلبت للحظة… ثم قالت
— إنت اللي اخترت تبقى ...غيره من زمان
كانت ضربة مباشرة
ساد صمت ثقيل…
ثم التفت آدم إلى أحمد — خليك فاكر… في خطوط مينفعش تتعداها
أجابه أحمد بهدوء
— والخطوط دي… مين اللي بيحطها
تبادلا نظرة حادة… صراع صامت لكنه واضح
ثم قال آدم
— اللي فاهم… مش محتاج شرح
واستدار وغادر
بعد خروجه…
لم تتنفس آسيا إلا بعد أن أُغلق الباب…
لكنها لم تُظهر ذلك
قال أحمد
— واضح إنك مضايقه
ردّت دون أن تنظر إليه
— متشغلش بالك ...اتفضل نكمل شغل يا استاذ احمد
ابتسم
— لازم اشغل بالي… بطريقة أو بأخرى
رفعت نظرها إليه بحدة
— أستاذ أحمد… أنا بتعامل معاك في حدود الشغل بس وأي حاجة غير كده… مرفوضة
صمت لحظة ثم قال
— تمام… مفهوم
ثم أضاف
— بس اسمحيلي أسأل
لم ترد
فأكمل
— رفضك… عشان إنتِ مش عايزة
ولا عشان في حد لسه مأثر فيكي
تجمّدت يدها فوق الأوراق
السؤال كان بسيطًا…
لكنه أصاب عمقًا لم تكن مستعدة لمواجهته
رفعت عينيها وقالت بثبات
— أنا مبسمحش لحد يأثر عليا
نظر إليها طويلًا
— أتمنى ده يكون حقيقي
ساد صمت…غير مريح
في الخارج…كان آدم يقف في الممر
كأنه لم يغادر
يده مشدودة…وعيناه مظلمتان
همس
— مش هسيبك…
ثم رفع رأسه
— ولو هدمر كل حاجة حوالينا
داخل مكتب شرين
دخل بهدوء وقال باحترام
— مساء الخير
نظرت شرين بخجل و خوف...حينما تلاقت عيناها حدث صمت غريب
ليست المره الاولى التي يرو فيها بعضهم البعض
لكن لاول مره ...يحدث بينهم هذا الشعور الغريب
تقدمت بخطوات حذرة — إنت… جاي هنا ليه...حضرتك لو محتاج حاجه في الشغل اتصل
عالمكتب
رد بهدوء لكن بصراحة مباشرة
— عشانك
توترت ملامحها فورًا — مينفعش… بعد اللي حصل
هز رأسه
— عارف... وعشان كده… جيت
سكتت تنتظر تفسير
فأكمل
— أنا مش جاي أضغط عليكي… ولا على باباكي ولا حتى أتكلم في جواز دلوقت
استغربت… هذا غير المتوقع
فقال وعينه في عينها — أنا جاي أبدأ صح
صمتت
فأكمل خطوة للأمام
— إحنا منعرفش بعض… بجد
اللي حصل… كان تسرع مني
ثم قال بنبرة أهدأ
— فخلينا نعرف بعض… من غير ضغط… من غير وعود...ولو في الآخر محصلش نصيب… أنا هقبل
اتسعت عينيها قليلًا…
حديثه كان منطقي… زيادة عن اللزوم
سألته بهدوء
— وإيه يضمنلي إنك مش بتمثل أو بتضحك عليا
ابتسم بخفة
— مفيش
صمت لحظة ثم أكمل — بس إنتِ أذكى من إنك متفرقيش بين الحقيقي والتمثيل
نظرت له طويلًا…
كأنها تحاول ان تقرأه
ثم قالت
— وإيه المطلوب مني
رد ببساطة
— فرصة
سكتت…
قلبها بدأ يتحرك في اتجاه… وعقلها في اتجاه اخر
أنهى أحمد الحديث ونهض
— أظن كده كفاية النهارده
أومأت
— تمام
توقف عند الباب وقال — على فكرة…
صمت لحظة ثم أكمل — أنا مش من النوع اللي بيستسلم بسهولة
ثم خرج
بمجرد أن أُغلق الباب…سقطت كل أقنعتها
جلست ببطء…وأغمضت عينيها
صوت آدم…نظراته
وخوفها من نفسها
كل شيء عاد دفعةً واحدة
همست
— أنا فعلًا… اتحررت
لكن الإجابة…لم تأتِ
لم يغادر آدم الشركة فعلًا…
بل عاد إلى مكتبه وكأن شيئًا لم يحدث
لكن خلف هذا الهدوء…كان يُعيد ترتيب الحرب
جلس أمام مكتبه فتح حاسوبه ببطء
وعيناه مظلمتان… حاسمتان
همس لنفسه
— مش هاجي لك من برّه…أنا هدخل لك من جوّه
ابتسم ابتسامة خفيفة
كل واحد ليه نقطة ضعف… وأنا هلاقيها
في نفس الوقت…
كان أحمد يغادر الشركة بهدوء
لكن إحساسًا خفيًا أخبره أن الأمور لن تسير بسهولة
نظر خلفه مرة واحدة…ثم قال لنفسه
— واضح إنك مش سهل يا ادم
و ادم ....فتح درج مكتبه…
وأخرج ملفًا قديمًا
ملف…لم يُفتح منذ سنوات
عليه اسم واحد..آسيا
مرر أصابعه عليه ببطء…وكأنه يلمس جرحًا قديمًا
فتح الملف…صور مكاتبات…
تفاصيل من الماضي…
وأشياء…لم ترها آسيا نفسها
همس بصوت منخفض
— كنتِ فاكرة إن كل حاجة انتهت
ثم أغلق الملف فجأة
وكأن قرارًا خطيرًا قد اتخذ
في المساء…كانت آسيا تجلس في منزلها تحاول التركيز في بعض الأوراق…
لكن عقلها كان مشتتًا
رنّ هاتفها...نظرت إليه…رسالة من رقم مجهول فتحتها
-فاكره اليوم ده
تجمّدت
وتحت الرسالة…صورة قديمة
هي…وآدم
لحظة… كانت صادقة جدًا
سقط الهاتف من يدها
أنفاسها تسارعت…
لا…
أمسكت الهاتف بسرعة
وكتبت
إنت عايز إيه
جاء الرد فورًا
عايزك تفكري كويس…قبل ما تاخدي أي خطوة
اشتعل الغضب داخلها
بتهددني
تأخر الرد هذه المرة…
ثم جاء
لأ… بفكّرك
بمين كنتِ…
ومين لسه جواكي
أغلقت الهاتف بعنف
لكن المشكلة…
أن الرسالة لم تكن تهديدًا فقط…كانت حقيقة تخاف منها
في مكان آخر…
كان آدم يقف في شرفته ينظر إلى السماء…هاتفه في يده
ابتسم ببطء…
احنا لسه في الاول يا آسيا…
ثم أضاف بصوتٍ أخفض
— وأنا مش بعمل كده عشان أكسب بس…
سكت لحظة…
أنا بعمل كده عشان أرجّعك
آدم لم يهاجم…بل حرّك الماضي
وأخطر الحروب…
هي التي تُخاض داخل القلب
ظلت واقفة مكانها لثوانٍ…
الهاتف في يدها… والصورة أمام عينيها
صورة قديمة…لكنها لم تكن مجرد ذكرى…
كانت نقطة ضعف
أغمضت عينيها بقوة…وكأنها تحاول إيقاف سيل المشاعر الذي اندفع فجأة
لكنها لم تبكِ هذه المرة… لا
فتحت عينيها ببطء…
وفيهما شيء مختلف
هدوء بارد…خطير
همست لنفسها
— لا… المرة دي مش هخسر نفسي
أمسكت الهاتف مجددًا…ثم كتبت:
— الصورة دي كانت حقيقية
توقفت لحظة…ثم أكملت
— بس اللي بينا… مات
أرسلت الرسالة
في الجهة الأخرى…
كان ينظر إلى هاتفه…منتظرًا
وصلته الرسالة
قرأها… مرة… ومرتين
ثم ابتسم لكن ابتسامته لم تكن انتصارًا…
بل تحديًا
كتب
— لو مات… ليه لسه بتردي
قرأت الرسالة…هذه المرة لم تتردد
— برد عشان أقفل الباب بإيدي… مش عشان أفتحه
جاء الرد سريعًا
— الباب اللي بيني وبينك… عمره ما اتقفل
توقفت ثم… كتبت شيئًا مختلفًا
— يبقى أنا هقفله قدامك
بعد لحظات…ارتدت معطفها بسرعة أخذت مفاتيحها…وخرجت
كانت خطواتها سريعة…حاسمة
كأنها ذاهبة لمعركة لا لمواجهة
أمام احدي الحدائق العامه وقفت
نظرت للأعلى…ثم اتصلت به
رد فورًا
— كنت عارف انك مش هتتأخري
قالت ببرود
— انزل....مستنياك في مكانا
سكت لحظة…ثم أغلق الخط
بعد دقائق…وصل آدم و قد قاد سيارته بسرعه جنونيه حتي وصل إلي المكان الذي اعتادوا أن يتقابلو فيه منذ زمن بعيد
وقف أمامها نفس النظرة…نفس التوتر…لكن هذه المرة…هي من بدأت
تقدمت خطوة
وقالت بهدوء
— إنت فاكر إنك لما تبعتلي صورة… هترجعني
لم يرد… فقط نظر لها
فأكملت
— ولا فاكر إني لسه ضعيفة قدامك زي زمان
ابتسم بخفة
— إنتِ عمرك ما كنتي ضعيفة…
اقترب خطوة
— إنتِ بس… كنتي ليا
رفعت رأسها بثبات
— كنت
سكت…فأخرجت هاتفها… وفتحت الصورة أمامه
— عارف الصورة دي
نظر إليها…ثم قال بهدوء
— عمر ما حد في حياتي بصلي زي ما كنتِ بتبصيلي
اهتز شيء داخلها…
لكنها أخفته
وقالت بقوة
— وعمر ما حد كسرني زيك
سقطت الكلمة بينهما
لكنها لم تتراجع
أكملت
— اللي بينا… كان حقيقي
— بس انتهى… يوم ما شكّيت… يوم ما خذلت
اشتدت ملامحه… لكنه لم يقاطعها
— وأنا… حاولت أرجعك
— حاولت أفهمك
نظرت له مباشرة
— وإنت اخترت… تقفل الباب
صمت
ثم قالت بهدوء أخطر من أي صراخ
— دلوقت… دوري
اقتربت خطوة… حتى أصبحت أمامه تمامًا
— أنا اللي بقفل الباب
مدّت يدها…ثم حذفت الصورة أمام عينيه
تجمّد
لكنها لم تتوقف
رفعت عينيها إليه
— الماضي… انتهى
ثم أضافت بوضوح — وأي محاولة منك ترجّعني له… هتبقى إهانة ليا… قبل ما تبقى ليك
اشتدت أنفاسه…
لكنه لم يجد ردًا
لأول مرة…هي تسيطر
لحظة صمت…ثم قال بصوت منخفض
— تقدري تمسحي صورة
— بس تقدري تمسحي اللي جواكيِ
نظرت له…ولم تهرب
— أيوه
قالها… بثبات
حتى لو لم تكن الحقيقة كاملة
استدارت…وغادرت
لكن هذه المرة…
لم تكن تهرب ...كانت
تُنهي
ظل واقفًا مكانه…
ينظر للفراغ
ثم ابتسم…ببطء… وبخطورة
— أخيرًا…
رفع عينيه ثم هتف باسمها بطريقه جعلتها تتجمد مكانها لكن لم تلتفت
تحرك نحوها و قال بامر...
تعالي هوصلك ...مش هتمشي لوحدك دلوقت
التفت سريعا و نظرت له بدهشه لكنها قالت بسخرية
ده بجد ....امشي من قدامي عشان مفقدش اعصابي و انت عارفني لما بتجنن....ابعد عني
قالتها و انطلقت بعيدا فقام باللحاق بها ... ظل خلفها بسيارته إلى أن دخلت بنايتها
لم يرحل بل ظل جالسا يفكر او ....يخطط
عاد الهدوء إلى المنزل…
هدوءٌ خادع يخفي خلفه يومًا مثقلًا بالمواجهات
كانت آسيا تجلس بمفردها في غرفة المعيشة
الأضواء خافتة… وعيناها شاردة في اللاشيء
لم تكن تفكر في أحمد…بل فيه هو
آدم
كل كلمة قالها…كل نظرة
وكأنها تعيد نفسها داخل رأسها دون توقف
أغمضت عينيها وهمست
— ليه دلوقت
رنّ هاتفها
فتحت عينيها ببطء…
نظرت إلى الشاشة
رقم غير مسجل
ترددت لثوانٍ…
ثم أجابت
ألو
جاءها صوته… هادئًا — مساء الخير.
تصلبت ملامحها فورًا — أحمد بيه
طب كويس عرفتي صوتي بسرعه
قالت ببرود
— اتفضل
صمت لحظة… ثم قال — مكملناش كلامنا
أجابت بحدة خفيفة
— كلامنا خلص في المكتب
المكتب ...تمام
بس انا مش بتكلم في الشغل دلوقت يا اسيا
اشتدت نبرتها
— أستاذ أحمد… أنا مبحبش الأسلوب ده
ولا أنا أحب الغموض
سكتت…فأكمل
هكون صريح…
أنتِ مش ست عادية
أغمضت عينيها بضيق
— ميهمنيش
بس يهمني أنا
صمت لحظة ثم أضاف — بكره هثبتلك قد ايه انتي ست قويه
فتحت عينيها فجأة
— و ده يخصك في ايه
جاء رده هادئًا… لكن حاسمًا
— فكري الاول في معني الكلمه و بعدها ارفضي كلامي أو اقبليه
ثم أغلق الخط
في نفس اللحظة…
كانت هناك عينان تراقبان....آدم
يقف أسفل البناية
ينظر إلى شرفتها… وكأنه يشعر بها
ضغط على هاتفه…
واتصل
رن الهاتف مرة أخرى
نظرت إليه…
هذه المرة الاسم واضح
آدم
ترددت…لكنها أجابت
عايز ايه
جاء صوته منخفضًا… لكنه مشدود
— مين اللي كان بيكلمك
تجمدت
و انت مالك
اشتد صوته
— مالي يا اسيا
ضحكت بسخرية
— بجد... من امتى
من زمان… وإنتي عارفة
سكتت لحظة…
ثم قالت ببرود
— كان أحمد
صمت
لكن صمته كان أخطر من أي رد
ثم قال ببطء
— وقالك إيه
ملكش فيه
آسيا…
هذه المرة صوته تغيّر…
أصبح أخطر… أعمق
بلاش تختبريني
اشتعل الغضب داخلها — اختبرك...أنت بتتكلم وكأنك ليك حق عليا
ليا كل الحق
انتهى
عمره ما انتهى
سكتت…للحظة… فقط لحظة
فاستغلها وقال بهدوء — هتقابليه
لم ترد لكنه فهم
أغمض عينيه…
ثم قال جملته ببطءٍ قاتل
لو قابلتيه…
أنا مش هسكت المرة دي
فتحت عينيها بغضب — بتهددني
بحذرك
وأنا مبخافش منك
صمت…ثم قال بصوتٍ منخفض
أنا اللي خايف…من اللي ممكن أعمله
سرت قشعريرة خفيفة في جسدها…
لكنها تماسكت
المشكلة مش فيك يا آدم…المشكلة إني كنت بخاف عليك… مش منك
تجمد فأكملت
— بس واضح إني غلطت
ثم أغلقت الخط
في الخارج…نظر آدم إلى الهاتف…ثم إلى شرفتها
همس
— يبقى اختارتي…
لكن عينيه لم تكن غاضبة فقط…
بل… مظلمة
قام بارسال رساله كتبها بحروف من نار
انزلي قابليني انا واقف تحت بيتك
عايز اتكلم معاكي ضروري
لو منزلتيش هطلعلك و نتكلم قدام ولادك و الجيران و انتي عارفه اني مجنون واعملها
ماذا سيحدث ياتري....
سنري ......
انتظروووني
بقلمي/فريده الحلواني
تكملة الرواية بعد قليل
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق