قلب ميت بقلم حمادة هيكل
قلب ميت بقلم حمادة هيكل
القصة كاملة
انا حربي عندي 34 سنة ..عازب مليش حد
ابويا وامي ماتوا من زمان وعمي اللي رباني
بس مراته كانت قاسية عليا من صغري انا وأختي
كان لينا ورث عند خالي فؤاد ..بس للأسف كل حقي وحق أختي وقال أن امي كتبت له حقها في ورث ابوها
بيع وشرا وصرفته على علاج ابويا العيان
انا طبعا مصدقتش الكلام دا ..لاني فاكر كويس اوي
قبل ما تموت امي بشهرين خدتني معاها عند أخوها فؤاد
وطلبت يديها ورثتها ..وقالت له انها هتموت
والعيال ملهمش حد في الدنيا غيرك انت وعمهم
وعمهم ظروفه على أده ..وليهم حق عندك
ورثي من ابويا
زعق فيها وقالها انتي ملكيش حاجه عندي
وبعدها طردنا زي الكلاب
واللي وجعني اكتر ان كل دا حصل
قدام ياسمين بنته ..واللي كنت بحبها اوي
وهي كمان كانت بتتبادلني نفس الشعور
عكس أخوها كريم اللي كان مش بيطيق يشوفني
حسيت اني أنكسرت قدامها وكنت هموت وأنا بشوف نظرة الذل في عيون أمي وهي مريضة وجوزها ميت ومش عارفه تجيب حقها وحق ولادها من اخوها الظالم
ماتت امي بحصرتها وطلعت أنا من الاعدادي عشان اشتغل واساعد مع عمي في المصاريف
فضلت اشتغل وقدرت أجهز اختي ..وجوزتها
في البلد عندنا ..ونزلت على مصر من عشر سنين
العيشة هنا صعبة أوي ..عكس عيشة الأرياف
اشتغلت في كذا شغلانه ..وفضلت اتنقل من هنا لهنا
والدنيا ملطشه معايا ع الاخر
من كام سنه كنت اشتغلت في مصنع نسيج
واتعرفت
على حسان ..واد مجدع وصاحب صاحبه
ظروفه نفس ظروفي عايش لوحده في أوضة ع السطوح
ليا فترة الامور معايا ملخبطه ..سبت التاكسي اللي كنت راكب عليه وعاطل والحالة معايا من تحت الصفر
عندي صديق ليا في قريتنا اسمها هاني المنشاوي
كلمني من شوية وقالي خالك فؤاد تعبان جدا
على فراش الموت
فكرت أني لو روحتله واتكلمت معاه من تاني
وطلبت منه ورثتي ..يمكن قلبه يحن
ويرجع لي حقي ..عشان يقابل رب كريم
وهو مرتاح ومش واكل حق ولاد أخته
كلمت حسان وقولتله بكره الصبح رايح
البلد ازور خالي وهو بيموت
واطلب منه حقي لاخر مرة ..يمكن يوافق
ويرجعهولي ..وطلبت منه 500 جنيه سلف
لحد ما الدنيا تمشي
قالي انا كمان عايز ازور بلدكم..اهو اكون معاك
وكمات أغير جو وأرتاح من ضغط الشغل
نمت ليلتها عنده
وتاني يوم كان حسان راح شغله
وقدم على أجازة 3 أيام
وبعد الضهر رجع واخدنا ميكروباص
وسافرنا على الغربية
وصلنا القرية بعد العصر ..
روحت على بيت هاني صاحبي أسلم عليه
رحب بينا جدا
وقالي يااه أكتر من عشر سنين ياراجل
مشوفناش بعض فيهم
أعمل ايه بقى ..اهو أكل العيش
كان نفسي أجي البلد ..بس بعد ما أختي اتجوزت
وسافرت ع الخليج مع جوزها وأنا حسيت اني رجلي اتقطعت ومبقليش حد
عيب تقول كدا ..اومال انا روحت فين
بيتك ومطرحك وانا مشلتكش
الارض نشيلك على راسنا
كلك واجب والله يا هاني
طيب انا هسيب حسان هنا عندك واروح على بيت خالي
معلش بقى يا حسان
ولا يهمك يا صاحبي ...ربنا معاك
روحت على بيت خالي وانا بقدم رجل وبأخر التانية
وخايف من مواجهته ..رغم اني صاحب الحق
بس ممكن يعترضوني خصوصا واني جاي اقاسمهم في ورثهم
بس لما وصلت الفيلا وقبل ما ادخل
سمعت صوت صراخ وبكاء من جوا
للأسف خالي مات !!
حسيت اني خسرت كل حاجة ..أملي الوحيد
في اني اتكلم معاه واحنن قلبه ويرجع لي حقي خلاص راح
وكريم ابنه بيكرهني ولا يمكن يرجع لي حقي
رجعت على بيت هاني وانا حزين
حسان شافني زعلان وقالي
ايه مرضيش يديلك حقك برضو
للأسف مات قبل ما اشوفه
لا اله الا الله ..الله يرحمه
دا متجوزش عليه الرحمه ..دا واكل حقي وحق أختي
وموت أمي بقهرتها ..ربنا ينتقم منه
وحد الله يا حربي ..واهدا كدا
اهدى ..انا مش ههدى الا لو حقي رجع
هيرجع أزاي ..هتروح لكريم ابن خالك
لا ..أستحالة هيدفع لي جنيه واحد
طيب هتعمل ايه
كنت بفكر طول طريق رجوعي ليكم
في طريقة ارجع حقي بيها
وجات لي فكرة غريبة ومخيفه في نفس الوقت
بس انا مضطر.. ومحتاج مساعدتكم معايا
اكيد هنساعدك..بس هي ايه الفكرة !!
هدخل قبر خالي بالليل بعد ما يدفنوه
وهبصمه على ورقة بحقي في ورث أمي
وساعتها بقى هيبقى معايا مستند رسمي
احطه في
عين كريم ..وقتها مش هيقدر
يتكلم .
انت أكيد اتجننت ..عاوز تنتهك حرمة اموات
وتدخل عليه قبرة!!
اعمل ايه يا حسان ..هو رفض يديني حقي
وهو عايش. مقداميش الا اني أخده منه وهو ميت
انا مش موافقك ع الكلام دا
كدا برضو يا صاحبي..طب براحتك
وانت يا هاني ..قولت ايه هتساعدني
ولا هتعمل زيه
هاني فكر شوية وبعدها قال
لا طبعا ..انا معاك ولازم حقك يرجعلك وبأي طريقة
دا حقك يا حربي وانت اتظلمت كتير
تمام ..الله ينور عليك ..بس هيبقى فاضل حاجه
كمان والموضوع هيمشي زي مانا عاوز
حاجة ايه
الختم بتاع عمي لازم أجيبه
عشان اختم بيه ورقة المبايعه ..
وبكدا يبقى الختم ومعاه البصمه ...ساعتها
يبقى ضمنت حقي وانا مطمن
هاني قالي
يابن الأيه ..لا بجد برافو عليك
خطة حلوة جدا ..بس تنفيذها محتاج تكتيك
انت في حد شافك من اهل البلد من وقت ماجيت
اممم تقريبا لا
حلو اوي ..استكن في البيت عندي انت وحسان
ووقت ما هيروحوا يدفنوا عمك
انا هروح الفيلا وهدخل بطريقتي واجيب لك الختم
هتعرف يعني
طبعا هعرف ..متقلقش المهم تستنى لحد ما ارجع لك
ونشوف هنكمل باقي الخطة ازاي
خرج هاني وفضلت مستني انا وحسان
اللي كان مستاء من اللي بيحصل
وقالي انه مش موافق على اللي ناوي اعمله
وانه هيسافر بكره الصبح ..لانه مفيش مواصلات
هنا بالليل
بعد العشاء رجع هاني وهو معاه الختم
يخرب عقلك يا جدع ..عملتها أزاي دي
علاقتي حلوه بالبت
الخدامه اللي عندهم
وبصراحه هي مقدرتش تقصر
معايا اني ادخل
مكتب خالك فؤاد ..خصوصا وانهم كلهم
كانوا مشغولين في الدفن والعزا
هنفضل هنا ..لغاية نص الليل ونطلع ع المقابر
وهوريك مدفن خالك بالظبط
هتدخل وتبصمه وبعدها نختم الختم التمام
ونرجعه قبل ما يحسوا بحاجه ...
تمام اوي
اه ..بس الشغالة طبعا عاوزه الحلاوة
ياسيدي هحلي بوقها وانت كمان ليك هدية حلوه عندي
لا ياحربي ..انا مش عاوز منك حاجه ..انت صاحبي
ومن واجبك عليا أساعدك في انك ترجع حقك
بصيت ل حسان وانا بقول
تسلم يا هاني يا ابو الصحاب يا مجدع!
فضلنا مستنين وبعد نص الليل
هاني قال يلا بينا
ها مش جاي برضو يا حسان
لأ معلش يا حربي
برحتك يا ....صاحبي !
القرية هنا هادية جدا ومفيش ناس سهرانه
خصوصا واننا داخلين ع الشتا ..مفيش غيري انا وهاني
وكام كلب في الطريق
وصلنا المقابر و مشينا وسط عدد من الحارات الضيقه
كانت في اضاءة الى حد ما ..بس انا كان معايا موبايلي
شغلت الكشاف ..وبعدها لقيت هاني بيقولي
دي التربة بتاعت خالك
هي دي ..دي جديده غير القديمه بتاعت جدي !!
اه فعلا دي اشتراها من سنه وجهزها ..شكله كان
حاسس انه أجله قرب
طيب انا هفور القفل اللي ع الباب الحديد
وانت أدخل وبسرعه ..مفيش غير جثته هو
اول حد يدفن فيها ..جهزت الورقة
اه اهي معايا ..والبصامه كمان جاهزة
هدخل أبصمه وأخرج على طول
بس بسرعه انا جتتي مش خالصة
حربي
انت مش خايف
لا..انا خلاص قلبي بقى ميت من قسوة الدنيا عليا
متزعلش نفسك ..خلاص هانت وهتروق وتحلى
طيب يلا ...
فضل هاني يحاول مع القفل وفي اقل من دقيقتين
كان القفل اتفور ..وشد الترباس وقالي
اتفضل يا غالي ..خش برجلك اليمين
انت ايه يابني كنت هجام قبل كدا ..فورت القفل بسرعه
وبدون صوت ..انا مش عارف اشكرك ازاي
يلا بسرعه ياعمنا مفيش وقت
دخلت وانا حاسس برهبة..حطيت رجلي اليمين
ووطيت لان الباب كان منخفض وحجمه 50سمسم
وجهت كشاف موبايلي قدامي ..الارضية كانت فاضية
والسقف من جوه كان عالي ..حوالي 3 متر
القبر كان واسع ومتبيض ..خالي مجهزه كأنه
شقه مش قبر ..طبعا عايز يتهنى دنيا واخرة
كان في جثه ملفوفه في كفن في ركن القبر..وموجهه للقبلة
روحت ناحيتها بهدوء وانا ماشي بخطوات مهزوزة
وحاسس اني نفسي ابتدا يضيق. .القبر ليه رهبه
مش عادية ..قربت من الجثه ومديت ايدي وأنا بترعش
وشديت الكفن من الجنب عشان اطلع ايد خالي
وابصمه بسرعه وأخرج ..لكن ساعتها حصلت مفاجأة مكنتش متوقعها !!
بصيت لهاني وانا بقوله
انت متأكد أن دي مقبرة خا...!!
وقبل ما أكمل الجملة لقيت هاني ابستم وقال
سهرة سعيدة بقى يا حربي ..وقفل الباب عليا بسرعه من برة
بالترباس ..وسمعت صوت خطواته بتبعد
هاني ..انت بتعمل ايه !!
هاني دا مش وقت هزار ابدا
يا هااااني
فاتت دقايق عدوا عليا كأنهم شهور
وانا
خايف ومرعوب ونفسي بيضيق
ونبضات قلبي بتزيد وجسمي عرق جدا
بعدها سمعت صوت غطا بيتفتح من فوقي ..وجهت نور الكشاف ولقيت ..كريم ابن خالي باصص منه وهو بيقول بسخرية
انت يابني لسه محرمتش !
فاكر أن ليك حق وعاوز تاخده ..ومن مين
من واحد ميت لا حول له ولا قوة
كريم !!!
ايوه كريم اللي كشف لعبتك الوسخه
وهخلي نهايتك عبرة لأي حد يفكر يقرب مننا
او ييجي على أملاكنا
كريم أفهمني انا معملتش كدا ..غير عشان
اخد حقي وبس
حقك ..اااتاه طيب انا هديلك حقك
هغرقك في العز والنعيم اللي اتحرمت منه
بتتكلم جد
اه فعلا هغرقك بس مش في النعيم
هغرقك هنا مكانك
يعني ايه !!
وبعدها قفل الغطا الحديدي ..وفتح منه فتحه صغيرة
ودخل منها خرطوم مايه كبير..زي خرطوم المطافي
وقال ..افتح يا هاني
كريم أنت بتعمل ايه
هتوحشني يا ابن عمتي
وبعدها انهمرت المايه من الخرطوم ..بكل قوتها
..
فضلت ازعق واصرخ
واقول الحقوووني ..انا هغرق
يا اللي هنا ..يا ناااااس
يا هاني .. هاااني انا صاحبك ..بلاش كدا
ومكنتش بسمع الا صدى صوتي ومعاه المياه
اللي نازله من فوق زي الشلال
بعد دقايق المايه غطت ارضية القبر كله وابتدا منسوبها يزيد
وصلت لحد ركبي ..وانا لسه بصرخ
زاد المنسوب أكتر واكتر في خلال ساعه او اقل
وغطى نص جسمي ..سبت نفسي وجسمى طفى على المايه
وبعدها افتكرت حسان. .ايوه لازم اكلمه ييجي ينقذني
بس للأسف
الموبايل كان باظ من المايه ومبقاش نافع
سبته من إيدي ..واتفاجات بحاجة خبطتنى
الدنيا كانت ضلمه كحل بعد ما الموبايل فصل ومبقاش في نور. جسمي اتنفض في المايه ..وبعدها لمست الشئ دا
وحسست عليه واكتشفت انها جمجمة الجثة
وعضمها اللي ارتفع في المايه
فضلت اطلع لفوق كل ما تزيد المايه
كلها نص ساعه والمايه هتملى القبر كله!!
لصقت وشي في سقف القبر..عشان اخد نفسي
ولما بحس بتعب بسيب جسمي ينزل
واطلع تاني اخد نفس. .بقاوم عشان اعيش
رغم انه مفيش نسبة 1 لنجاتي من الموت المحتوم
منسوب المياه زاد ومبقاش الا كام سم اللي بتنفس منهم
بالعافيه ..الاكسجين هنا قرب يخلص
والمايه هتغرقني بعد دقايق ..سبت نفسي لمصيري
وقررت أستسلم..غوصت في المايه
وشريط حياتي مر قدام عيني في ثواني
دي النهاية خلاص
لكن بعد لحظات كل دا أتغير لما فجأة
اتفتح باب القبر ..والمايه اندفعت منه بكل قوة للخارج
وجسمي انجرف معاها لبره القبر ..وأثناء خروجي
مع المايه دماغي اتخبطت في الحيط
واترميت بره القبر وفقدت الوعي
بعد كام يوم وانا في المستشفى...فوقت من الغيبوبه
ولقيت ياسمين جنبي وهي مش مصدقه أني فتحت عيوني
فاق..فاق يا حسان !!
حمدلله على سلامتك يا حربي ..وقعت قلبنا عليك
قولت بصعوبه
انا فين ..هو ..هو ايه اللي حصل !!
ياسمين قربت مني ومسكت ايدي وقالت
ربنا كتب لك عمر جديد ..بعد ما هاني غدر بيك
وبلغ كريم بالخطة بتاعتك
ايه
كريم
نقل والدي في قبر تاني وحطلك جثة لشخص مات من مدة وجاب حداد وعمل فتح
في
سقف المقبرة
وقفلها بغطا حديد ...وجهز نفسه عشان ينتقم منك
ويغرقك
مش معقول هاني يعمل كدا !!
دا اللي حصل
بس انتوا عرفتوا ازاي انه خدعني واتفق مع كريم عليا
حسان قال
انا سمعته قبل ما تروحوا المقابر بساعه
وهو بيكلم كريم في الموبايل وبيقوله
خلاص يا غالي حربي كلها ساعه وهيكون جوه القبر
هيروح لقضاه برجليه ...جهز كل حاجه
وانا
جايبه وجاي
طبعا هو مخدش باله اني سمعته
قررت اروح لياسمين عشان أقولها تمنع اخوها
من أذيتك
وليه هاني يخوني ..احنا صحاب !!
ياسمين قالت
هاني كان بيحبني وعاوز يتجوزني وانا رفضته
بس انا سمعت انك اتجوزتي من فترة
اه غصب ..بابا غصب عليا في الجوازة دي
واطلقت من كام شهر
هاني كان فاكر انه بكدا هيكسب بونط عند كريم
وهيخليه يوافق على جوازنا ..خصوصا
وأنه انقذ
ثروته من انها تتقسم وتضيع
لكنه دخل في خلاف مع كريم واشتبكوا مع بعض
امبارح وضرب كريم بالنار وهرب
لما رفض برضو جوازي منه
ايه كريم انضرب بالنار
ربنا ستر و الرصاصه جت في كتفه
وهو ندم علي اللي عمله معاك
وبيقول انه مستعد انه يرجعلك حقك
وننسى اللي فات وعفى الله عما سلف
دموعي نزلت وانا بقولها
انا كمان غلطت ..لما فكرت
ارجع حقي بالطريقة دي
الحمدلله ..انها جت على أد كدا
بس تعرفي احسن حاجه في الموضوع دا كله
ايه
انك اطلقتي
نعم !!
اه حاسس انا ربنا جمعني بيك من تاني
دا احسن عندي من الف ورث
أبتسمت ابتسامه خجل
وحسان قال
احممم طيب انا بره بقى لو احتجت مني حاجه
فعلا أنا مش مستوعب كل اللي حصل
حسان صاحبي أنقذني ..من موت مؤكد
وحقي رجعلي والأهم ...أن ياسمين بقت معايا
تمت
حماده_هيكل
قلب_ميت
تعليقات
إرسال تعليق