سكريبت ترميم الفصل السادس 6بقلم حبيبه منصور حصريه
سكريبت ترميم الفصل السادس 6بقلم حبيبه منصور حصريه
Part 6
يوسف : عارف انك مش جايه من الشارع ، وعارف انك مراتي ، بس اهدي شويه عليا ، ليلى ابتدت تشك وانتي عارفه انها اصلا مش بتطيقك
دينا : مش عارفه هتفضل صابرين عليها قد ايه
يوسف : لسه يا دينا ، انا مهدتلها حوار السفر ده وانا هجيلك الاسبوعين دول هقضيهم معاكي واشتغل اي حاجه هناك
وهرجع أقولها اني معرفتش اجمع فلوس الشقه
زي ما باعت حاجه من الجهاز بتاعها عشان الدهب ، هتبيع حاجات تانيه او ممكن تستلف من حد ونجيب الشقه و نتجوز بقى
دينا : ماشي ، بس الكلام ده لو مش حقيقي ، أو بتلعب بيا زي. البت بتاعتك دي مش هتعرف انا هعمل فيك ايه ، انا مش هبله زي ليلى يا حبيبي
يوسف : ما ده اللي محببني فيكي
دينا بثقه : طيب ، تحب نتقابل بكره
يوسف : احم ، مانتي عارفه بقى اننا هننزل بكره نجيب الدهب
دينا : نعم يا اخويا ؟!!!
يوسف : في ايه يا دينا ، اومال همهدلها حوار الشقه ازاي من غير ما نجيب دهب ،هتجوز قبل ما أخطب؟
دينا : وانت هتجيب الفلوس منين
يوسف : يا بنتي هو انتي هبله ولا بتنسي ، ما قولتلك هي باعت الفينو فبراير اللي بتقول عليه ده
دينا بضحك: اسمه ايرفراير يا فلاح
يوسف : ماشي يا ست الله يسامحك ، هقفل انا بقى عشان نعسان ومش قادر وعندي مشوار الصبح طويل
دينا : ده هو عند بتاع الدهب ، فين المشوار , ولا انت بتتلكك عشان تقفل
يوسف : لا أصل احنا هنروح كافيه كده على الكورنيش نحتفل بالخطوبه ، هلبسها الدبلتين هناك عشان نخلص
دينا ب غيره : ماشي ياخويا ، سلام
===================================
««في بيت ليلى »»»
ليلى : انطقي ، فهميني ده معناه ايه
تمارا بتوتر : بصي انا هحكيلك بصراحه
ليلى : ياريت
تمارا بلعت ريقها بصعوبه وكملت: انا كنت بحضر مع يونس معظم الدروس ، و قربت منو اكتر عشان اعرف اخبار يوسف
هو فكر اني بحبه ، بس انا .....
ليلى : كملي
تمارا : انا كنت بكلمه بس عشان اعرف اخبار يوسف، انا مش بحبه زي مانتي فاهمه ، أو بصراحه كنت بحبه
بس اما حسيت اني خسرت يونس اتضايقت من نفسي اوي
ليلى : اتضايقتي عشان حسيتي انك خسرتي يوسف ، لكن متضايقتيش خالص و انتي بتفكري ف واحد مش من حقك
تمارا سكتت ......
ليلى : متسكتيش، اتكلمي
تمارا : اتكلم اقولك ايه
ليلى.: بتحبي يوسف ازاي ، هو قالك أنه بيحبك ؟؟
تمارا : لأ هو مقاليش بس ....، بس انا كنت حابه شخصيته
رجعت كملت : انا عرفت اللي انا فيه ده مش حب ، هو كان اعجاب بس ، بس يا ليلى والله مش قصدي اني اخده منك
وحتى لو هو مبقاش ليكي انا مش هفكر فيه نهائي
انا ...
ليلى : انتي ايه قولي
تمارا : انا كل اللي شاغلني يونس دلوقت، عايزه أفهمه أن كل ده سوء تفاهم
ليلى : بدل ما اللي يشغلك مستقبلك ؟؟!
تمارا دموعها نزلت و سكتت
ليلى : انتي بتحبي يونس ؟
تمارا بتردد : هو صعبان عليا اللي هو فيه
ليلى : ايه الي هو فيه ، انا شيفاه بصراحه مهتم بدراسته مش بحاجات تانيه
تمارا سكتت .....
ليلى : وانتي كمان المفروض تكوني كده ، انتي ١٨ سنه ولسه كمان متمتيش١٨ يعني المفروض متفكريش ف اي حاجه من دي
تمارا: حاضر
ليلى: ل اخر مره هسألك يا تمارا ، انتي بتحبي يوسف؟ ، او اتكلمتوا مع بعض قبل كده
لسه تمارا هنتكلم ليلى قاطعتها
ليلى : وتقولي الصراحه فاهمه؟!
تمارا : والله احنا متكلمناش مع بعض غير أن عشان انا اختك بس مش اكتر
ليلى : لو عرفت عكس كده صدقيني هنخسر بعض
تمارا : والله ابدا هو زي ما قولتلك كده بالظبط
ليلى : طيب يا تمارا , عشان تبقي عارفه ، اللي انتي فيه ده حب مراهقه
تمارا : لا انا...
ليلى قاطعتها: وحتى لو بجد, مينفعش
تمارا سكتت...
ليلى : سمعتيني ؟
تمارا : حاضر
ليلى : و تخلي بالك من نظراتك ليه عشان ملفته
تمارا : مش هركز ف اي حاجه غير مذاكرتي و بس
ليلى : اتمنى ، والحوار ده مش هحكي ل ماما عليه
هخليه بيني وبينك
تمارا سكتت
ليلى حضنتها : انا عامله عشان مصلحتك ، لأن كل اللي انتي فيه ده اوهام مش اكتر ، فهماني؟؟
ومصلحتك اهو و دراستك
تمارا : حاضر
=================================
هند : اشمعنا دي
علي بتفكير : حلوه كده و عجباني
هند : ده فجأه كده يعني
علي بحب : غريب الحب يا حجه ، بييجي فجاه كده
هند باستغراب : بيجي فجاه
حرك راسه ب ااه
هند : طب وانا اعمل ايه يا استاذ هاني شاكر
علي : هنتقدم لها طبعا
هند : يا سلام ، شوفتها امبارح نتقدملها بكره
علي : لا يا حجه انا شوفتها امبارح والنهارده و كنت بشوفها وهي صغيره يعني قصة حب نشأت من الطفوله
هند باستنكار: من الطفوله
على بثقه : اه طبعا
هند : طب بص يا ابني عشان انا مرارتي مش مستحمله يا قلب امك
علي : قولي يا رز بلبن
هند باستغراب: رز بلبن ازاي ؟!
علي : مانتي اسمك ام علي مش هتفرق أن علي من رز بلبن هقهقهقهق
هند : هقهقهق؟؟ ، غور اطلع برا ياض
علي : اسف يا حجه والله
هند : اطلع برا
علي : خلاص بقى وحياة علي عندك ل تقولي
هند : ياض امشي غور من وشي ب دمك التقيل ده
علي : خلاص وحياة مراد ، حلفتك بالغالي اهو ، اله يارب يتجوز عليكي لو مقولتيش
هند : حلفتني بالغالي ، بص يا حبيبي احنا مينفعش نتقدم دلوقت لييه؟
علي : ليه ؟
هند : عشان الواد لسه جاي ل اختك امبارح ، مش هينفع احنا نروح ، هي مش عزومه بنردها
علي : بس انا بحبها
هند : تمام انا معاك انك بتحبها البت حلوه و مؤدبه بس لازم تتأكد الاول من حبها ليك ع الأقل تعرف هي موافقه ولا لا
علي بتفكير : عندك حق
هند: وبعدين انت اصلا مش معاك فلوس عشان تخطب
علي : هتصرف
هند : لا مفيش حاجه اسمها هتصرف ، فيه حاجه اسمها هشتغل لكن تستلف عشان تخطب ليه؟
اتأكد بس الاول من حبها و بعد كده انا هكلم صابرين و نجوزكم بعد ليلى و يوسف
علي : انتي بتصبريني يعني
هند : يا عبيط انا بفهمك ، مينفعش واحده تعجبك كده تروح تخطبها تاني يوم ، لازم الاول تعرفوا بعض كويس و تشوفها ف المواقف بتتصرف ازاي
علي باقتناع: عندك حق
هند : يلا غور بقى خليني اسمع المسلسل
علي بص للشاشه لقى الناس بتعبد الصنم
بص ل امه ب استنكار : استغفر الله العظيم، انتي بتعبدي ايه يا امي
هند : انت عبيط ياض ، لا إله إلا الله انا مسلمه
علي : يا حجه اللي يشوف الهندي اللي بتتفرجي عليه ده ليل و نهار هيفكرك استغفر الله العظيم بيتعبدي البقر
هند : لا يا حبيبي انا بخلفهم بس
علي بص لها و سكت
هند : يلا امشي انت هتنح
علي بتقليد صوت البقره: موووععاااااااا
هند ضحكت : يلا جاموسه يا ابن الجاموسه من هنا
علي : انتي بتشتمي نفسك فكره
هند : لا انا قصدي على ابوك
علي : ابويا ده غلط اما اتجوز واحده اسمها هند ، بقى مكسرات هقهقههق
هند خلعت الشبشب من رجلها و بصنعة لطافه الشبشب كان وش علي
===================================
صابرين : انتي يا حلوه ياللي سايبه الصاله تضرب تقلب
ساره : يا امي انا بغسل المواعين ، مش اخطبوط انا عشان اعمل كل حاجه ب نفس الايد
صابرين : برطمي كمان, برطمي ، مانتي مش فالحه ف حاجه غير البرطمه
ساره : يارب اتجوز بقى واسيب البيت ده
صابرين : ده على أساس انتي هتاخدي ابن وزير ويجيبلك خدامه
ساره : اه ما هي دي الخطه الجايه
صابرين : يبقى تعالي تفي على تربتي لو ده حصل
كملت : هو يونس فين
ساره : بيذاكر جوا
صابرين باستغراب: بيذاكر؟ ، هو تعبان ولا ايه
ساره : فكرت زيك كده بالظبط وسألته قالي انا كويس
صابرين : ل يكون اتحسد ولا حاجه
ساره : حاسه كده بردو
======================================
«تاني يوم الساعه 5»
هند : يلهويي الساعه 5 وانتي يا زفته ولا قومتي ولا لبستي
ليلى بنعس وهي بتبص ف الساعه : يلهويي ، ده انا لسه ملبستش
هند : قومي يا اختي وصحي اخواتك ، احنا كنا واخدين منوم ولا ايه
ليلى قامت خدت دش و خرجت لبست دريس ابيض واسع
و طرحه بينك ، ميكب بينك هادي , ماسكرا بارزه ملامح ولون عيونها ، بلاشر بارز خدودها
بينما في معركه برا ف الصاله بين علي و تمارا
علي : يا بت خدي اكوي القميص
تمارا بلماضه : وانا مالي انا
علي : يا بت خلصي عايزه البس
تمارا : مانا كمان عايزه البس
علي : عاجبك يعني وانا واقف كده
تمارا : روح كده عادي
علي بعصبية: غوريييي من وشيييي، مبعرفش اقضيكي اي مصلحه
=================================
في بيت يوسف »
ساره خرجت وهي لابسه دريس زيتي وطرحه كافيه فاتح
يونس لابس قميص ازرق و بنطلون اسود
يونس : حلو كده يا ساره ؟
ساره بمعاكسه : عريس اوي
يونس : مش انا يا اختي العريس جوا
ساره : عايزه أتصور شوية صور حلوين كده و كتير
يونس : هتتصوري اما تزهقي متخافيش
ساره بفرحه : انا مبسوطه اوي ، عقبالي يااارب
يونس بصلها من فوق ل تحت : مدلوقه كده ليه ع الجواز يا اختي ، ده انتي حتى لسه متشربش عليكي قهوه
ساره : بعد الشر عليا من شُرب القهوه ، هيشربوا شربات ان شاء الله
صابرين خرجت من الاوضه، لابسه عبايه واسعه و طرحه بتلمع
ساره بنكش : اش اش اش اش يا لبنى والله عيشتك ارتاحت يا اختي
ده انتي هتغطي على ليلى بقى
صابرين : مفيش ف حلاوة ليلى ، محدش هيغطي عليها
ساره بصت ل يونس : بص يا عم الحب ، اللي حماتو راضيه عن بقى
صابرين : ربنا يستر ع البت من عينك
خرج يوسف وهو لابس قميص ابيض و بنطلون ابيض
يونس بتصفير: واو ، ايه الواد الجامد ده
ساره بدلع : الواد الصاروخ اللي يشوفوا يدوخ ، اللي عليه جسم يودي القسم، الجااامد
يوسف : انتي كان نفسك تبقي نبطشي ف افراح صح؟
ساره بطموح : يااااه ، كان منى عيني
يوسف : طب انجري غوري هاتي الكوتش
ساره : ماشي عشان انت عريس بس
كملت بغناء وهي بتهز رأسها زي العبيطه: يا عريس ، ياااا عرييس
================================
نزلوا كلهم و اتقابلوا قدام بيت ليلى ، اللي محل الدهب جمبه
يوسف شاف ليلى بصلها ب اعجاب : ايه القمر والحلاوه والطعامه والشياكه
مراد بصله..
يوسف : احم اللي انتي فيها دي يا امي
كلهم ضحكوا عليه....
يوسف : طب يلا يا جماعه عشان نلحق نروح الكافيه قبل ما الحجز يتلغي
مراد : طيب نجيب الدهب ونروح
«في محل الدهب »
يوسف بص ل ليلى : ها يا ليلى تحبي تختاري ايه
ليلى بصت للراجل عشان يفتكر انهم اتفقوا على حاجه معينه
ليلى : ممكن اخد ده
هند اتدخلت: ايه القرف ده ده معفن خالص
خدي حاجه حلوه من دي زي بتاعت زمان
ليلى : لا يا امي انا عاجبني الرقيق ده
يوسف : اللي انتي عايزاه شاوري عليه
« على الجانب الآخر »
علي : انتي لابسه زيي ليه
ساره بصت له: انت اللي لابس زيي مش انا
علي : يا سلام وانا هعرف منين انك لابسه نفس اللون
ساره ببرود : طب مانا كمان هعرف منين انك لابس نفس اللون
علي بصلها وغمزلها: لا بس الاوت فيت بتاعك مووت
ساره ابتسمت
راحت بص ل تمارا : يا تمارا
ساره خبطته ف كتفه: عيل رخم
علي : تؤ تؤ تؤ ، ايدك دي متلمسنيش غير لما اكتب الكتاب
اني لا اصافح النساء
تمارا: اللهم قوي ايمانك يا عم الشيخ
يونس : هما كل ده بينقوا
علي : تلاقيهم بيتخانقوا على الاتقل
===============================
خرجوا كلهم وراحوا كافيه
يوسف : انا حجزت المكان ده عشان نحتفل براحتنا ونلبس الدهب وتبقى فسحه بسيطه كده لحد ما ربنا يكرم ونتجوز بقى
ساره : تعالي يا ماما انتي وطنط اصوركم مع بعض
علي : طب تعالى يا بابا انت ويونس نتصور مع بعض
انتوا مش احسن مننا
ليلى : طب وانا مين هيصورني
يوسف بتثبيت: وانا مش مالي عينك يا جميل ولا ايه
كل جماعه راحوا ف مكان يتصوروا
وليلى ويوسف واقفين مع بعض
ليلى بحب : انا مبسوطه اوي يا يوسف
بجد مش قادره اوصف فرحتي النهارده
يوسف : وانا مش عايز اي حاجه غير انك تكوني مبسوطه وبس والضحكه متفارقش وشك
ليلى : انا بحبك اوي يا يوسف
يوسف : مش اكتر مني يا قلب يوسف
يلا بقى عشان نلبس الدبل خلي ايدي تنور
يوسف ندهه عليهم
دخلت ناس ب طبله و مزمار وبيغنوا
كله بيرقص وفرحان ، و يوسف بيلبس ليلى الدبله
فجاه سمعوا صوت زغروطه
دينا : لولولولولولولولولولولولولي......انا جايه ابارك يا حبايبي
يوسف اتصدم: دينا !!!!
يتبع....
تكملة الرواية من هناااااااا
الرواية الكاملة من هناااااااا
تعليقات
إرسال تعليق