سكريبت ترميم الفصل الأول بقلم حبيبه منصور حصريه
سكريبت ترميم الفصل الأول بقلم حبيبه منصور حصريه
صباح الخير يا فندم مع حضرتك ليلى مراد من شركة we.. إيه مشكلة حضرتك يا فندم عشان نقدر نحلهالك؟
• ليلى مراد الله يرحمها؟!
= اه يا فندم الله يرحمها.. عايشة في قلوبنا، قولي بقى إيه شكوتك؟
• ازيك يا فنانه.. عاش من سمع صوتك، مكنتش أعرف إن الشركه فيهاشبكة في الآخرة!
= (أخدت نفس عميق وكتمت عصبيتي) : إحنا هنهزر يا فندم في الدين ولا ايه !! الـ تارجت هيضيع، قولي حضرتك إيه مشكلتك في خط الإنترنت؟
• يا فندم الراوتر لمبة الحرارة منورة أحمر ومش شغال خالص!
= جرب تفصل الراوتر من الزرار وبوسه وشغله تاني يا فندم.
• عملت كده.. ووشه اتقشر من كتر البوس وما نطقش.
= طب اتأكد من إن الفيشة واصلة للكهربا كويس، ومش محطوطة في مشترَك صيني.
• مانا عملت كده يا أستاذة وبردك قاطع.
= خلاص يا فندم، حضرتك سيبلي رقم الخدمة والعنوان، وخلال 48 ساعة الفني هيتواصل مع حضرتك.
• (رد عليها بعصبية ): 48 ساعة!!! أقعد يومين من غير نت إزاي؟ إنتوا شركة فاشلة أصلاً، مش هينفع!
= (العرق الصعيدي ضرب في دماغي ومبقتش شايفة قدامي): يعني أعمل إيه يا فندم؟ أفك السلك وأجيلك أهزلك الشبكة بنفسي؟ ولا أجيلك بالراوتر بتاع بيتنا عشان حضرتك مش عارف تقعد من غير نت؟! تستنى يا فندم، مفيش حل غير كده!
• طب أنا عايز أكلم المشرف بتاعك يا مرحومة!
= المشرف مش فاضي.. بيسمع البومي الجديد،مع السلامة يا فندم ونورت we!
رزعت السماعة وأنا بنهج.. قفلت الـخط ولفيت ورايا لقيت "يوسف" قاعد وباصص لي بضحكة كاريزما خطفت قلبي وقال وهو بيناولني علبة عصير:
• "يخرب بيت سنينك يا ليلى.. العميل هيموت منك، إهدي على نفسك الـمدير هيدينا جِزا بسبب لسانك ده!"
بصيت له بقلة حيلة وقولت : دي شغلانه قصفت عمري و شيبت شعري
بس قولي قفلت التارجت ولا لسه
بص لها بحزن: مش عارف ، انا عايز اسيب الشغلانه دي
ليلى بقلق: ليه ؟ ، ما احنا شغالين مع بعض
يوسف: انا مش عارف اخد اي خطوه نحيتك، و زي مانتي شايفه المرتب ضايع على المواصلات والخصومات والقرف
ليلى : و انت هتروح تشتغل فين
يوسف : مش عارف، هدور
ليلى : يبقى متسيبش الشغل غير لما تلاقي
يوسف : نفسي اجي اتقدم بقى ونتجوز ونخلص
ليلى : دوس على نفسك بس شويه ، وبعدين انت لو جيت ل اهلي هما مش هيعجزوك، وهيدوك مهله لحد ما تجيب الشقه
يوسف: اجيب منين دلوقت فلوس الشقه والشبكه والعفش غير الفرح والحاجات
ليلى : مانا زيي زيك يا يوسف ، بصرف على نفسي عشان اجيب جهازي ، احنا بادئين شغل هنا مع بعض ، عمري ما شوفتك بتعافر عشان حاجه ، ولا حتى عشاني
يوسف : انا مش بعافر عشانك؟! ، انا بدور على شغلانه تانيه
عشان اقدر اوفرلك حياه كويسه ، انا لازم اخدك من بيت أهلك اخليكي ملكه ، متعبكيش،ومتشتغليش
بس انا غصب عني يا ليلى ، انتي شايفه انا متمرمط ازاي
ليلى : طب خلاص متضغطش على نفسك ، انت هتيجي ل اهلي تطلبني منهم ، هما عارفينك و عارفين اخلاقك ومش هيضغطوك ، بس اعمل حاجه
يوسف : طيب واما يسألوني على الدهب ، يعني الشقه أمرها سهل هقول هجيبها بعدين ، إنما الدهب
ليلى : انا معايا مبلغ كنت هجيب بيه الجهاز، هديك منو ٢٠ الف نجيب بيهم الدهب، وانا مش هختار حاجه غاليه
يوسف: انتي يتجابلك اغلى واجمل حاجه
ليلى بصتله وضحكت: طيب تم تثبيتي بنجاح
المشرف بزعيق: انتوا يا عصااافير الحب، يا كناريا منك لييي
ما تشتغلوا بدل ما اخصملكم انتوا مش ناقصين ، ولا ايه يا استاذه نجاة الصغيره
ليلى: اسمي ليلى مراد يا فندم
المشرف : الله يرحمكم انتوا الاتنين مش هتفرق كتير
اتحركوا بقى روحوا يلا خلصوا شغل وقفلوا الزفت التارجت عشان تقبضوا
ليلى بتريقه: نقبض ؟؟ ، ايه الكلام العيب اللي بيتقال في الشركه ده
===============================
« في بيت ليلى »
هند : يا مراد ، ما تقوم يلا العصر هيأذن
مراد بنعس: هو انا لحقت نمت يا وليه ، ده مبقاليش نص ساعه
هند: قوم عشان تصلي وارجع نام زي مانت عايز
مراد: قايم، عيالك فين
هند: ليلى في الشغل،وتمارا في الدرس ، وعلي بيودي شغل من المخزن وراجع
مراد: طيب هنزل اصلي العصر يكونوا جوم نتغدى سوا
=================================
ليلى: هاخدلك معاد معاه تيجي وتتفقوا
يوسف بصلها بقلة حيلة: خايف يضغط عليا في المصاريف والشقه ويطلب مهر كبير ، انتي تستاهلي كل الغالي والله بس هيعجزني
ليلى بثقه: يبقى انت متعرفش بابا، يا ابني احنا عيله قنوعه ، واهم حاجه بالنسبالنا انك تحافظ عليا
يوسف: يعني مش هيطلب شقه في الزمالك ولا يطلب دهب من كنز علي بابا
ليلى : محسسني اننا قاعدين ف جاردن سيتي، ماحنا قاعدين ف حاره يوم ما يطلب منك حاجه جامده هيخليك تطلعنا برا الشارع مش اكتر ، هتحافظ عليا ولا نجيب ماده حافظه
يوسف بصلها بقرف على الافيه بتاعها ده
: دمك سم والله العظيم
ليلى بضحك: طب يلا يا خفيف خلينا نروح
=============================
« في بيت يوسف »
ساره : امي ، اقولك على حاجه بتحصل من وراكي و تديني كام
صابرين: على حسب الحوار
ساره : يعني لو يخص يوسف يبقى ب كام
صابرين : ما تخلصي يا مرشده
ساره : لا لازم نتفق قبل ما اقول
صابرين بصتلها بقلة حيلة: مش هخليكي تغسلي الغسيل
ساره : لا حاجه غيرها
صابرين: مش هخليكي تغسلي المواعين
ساره: لو كده ماشي ، بصي يا ست الكل ابنك ،راجل البيت
بيحب بنت عمو مراد
صابرين: مين ،تمارا؟؟؟
ساره: تمارا ايه بس يا امي ، يونس ابنك هو اللي بيحب تمارا
انما يوسف بيحب ليلى
صابرين : وانتي اكيد بتحبي علي وانا قاعده هنا كيس جوافه
ساره بتوتر: لا والله ، ده انا اللي بجيبلك اخبارهم، لو كده هخاف حد يجيبلك اخباري
صابرين : وانتي مين اللي قالك يا مقصوفة الرقبه انتي أن المقاطيع دول بيحبوا ، ومن نفس البيت كمان!! ، لا و ميين بنات هند!!!!!
ساره: انا سمعتهم وهما بيقولوا
صابرين: طب متتكلميش قدامه ،سيبيه اما يقول من نفسه
ساره: حاضر، انا اصلا مبحبش الخبص
صابرين: اه يا حبيبتي مانا عارفه
==================================
«رجعت ليلى من الشغل ، رمت الشنطه على الكنبه ، واترمت جمبها، واسطوانة كل يوم بتشتغل »
ليلى : انا كرهت الشغلانه اللي نصها خصم دي والنص التاني مش بنقبض ، والشهر ٧٩ يوم
هند امها: نسيتي و يارب اتجوز و اخلص بقى
ليلى اتعدلت : لأ ما انا هتجوز قريب إن شاء الله
احم احم , اصل انا جالي عريس
هند : ده مين إن شاء الله
ليلى بتوتر وهي بتخبي وشها بالمخده: يوسف ابن عمو شريف الله يرحمه
هند بصدمه: ابن صابرين!!!! ، ده على جثتي يحصل
ليلى : ليه يعني يا ماما ده كويس ومحترم ومستعد يعمل اي حاجه عشاني
هند: ملاقيتيش غير ابن صابرين ، الواد ده انا مبطيقش امه
ليلى : اديهم فرصه بس ، ده انا قولت انتي اللي هتفتحي الموضوع مع بابا
هند : قولت لا ، كله الا ده
ليلى ب دراما مصطنعه: طيب خليني قاعده جمبك كده ، وانتي اهو اللي مش راضيه تخلي الموضوع يكمل عشان مش بتحبي امه ، وهكبر واعنس جمبك يا اما لو جالي حد هيقتلني ، وانا اصلا....
هند : بس بس ،اسكتي!!!
ليلى عملت نفسها بتمسح دموعها اللي مش موجوده اصلا
ليلى بتمثيل: يعني موافقه
هند بتهديد: موافقه ، بس والله الوليه امه الحربوقه دي لو ضايقتني هفركش الحوار كله
ليلى: ابلعي كلامها بس والحوار هيعدي
هند : لأ ، لو اتعدت حدودها مش هقبل
ليلى باستها وحضنتها: متخافيش، هدخل انام انا بقى واصحى الاقيكي خدتي معاد منو يا ست الكل
هند: مش هتتغدي
ليلى: لا ده انا جعانه نوم
==================================
دخل يوسف من باب الشقه، امه واقفه في المطبخ
ساره جريت عليه اول ما دخل
ساره : اقولك خبر ب ١٠٠ جنيه يا أبيه
يوسف : ١٠٠ جنيه مره واحده ، يا بنتي انا بيتخصملي اكتر مما بقبض
ساره: الخبر يستاهل والله ، الحق نفسك
يوسف: طيب اكتبي عندك في الكراسه، واما اقبض خديهم كلهم على بعض
ساره : اتفقنا
يوسف: ايه الخبر بقى
ساره: ماما عرفت انك بتحب ليلى مراد
يوسف،: ومين مبيحبش ليلى مراد ، دي حبيبة الجماهير
ساره : لأ مش دي ، ليلى مراد بنت هند
يوسف: نعم؟؟؟؟ ، عرفت منين
ساره: اديني ١٠٠ جنيه كمان وانا اقولك
يوسف: انطقي يا بت بدل ما اعلقك
ساره بصوت واطي : انا شاكه أن الواد السخطه اخوك ده هو اللي قالها ، وهي مستنيه تشوف انت هتقولها ولا لا
يوسف: امممم ، طب انا داخلها ، واما يجيلي البيه هيشوف انا هعمل ايه فيه
==============================
-تماراااااااا
تمارا بصتله: عايز ايه يا يونس
يونس : رايحه فين كده
تمارا ببرود : وانت مالك
يونس: انتي زعلانه مني ليه
تمارا : عشان مش هينفع نتكلم مع بعض تاني ، يا تيجي ل اهلي يا تفكك مني لحد ما اخلص السنه دي
يونس: اخطبك ايه دلوقت يا بت يا عبيطه انتي
اروح ل أبوكي اقوله ايه ،معايا ايه ! درس انجليزي؟؟ولا فلوس الحصه
يا بت انتي شايفه احنا قد ايه ،على الأقل قدامي ٥ سنين يدوب اخلص كليه
تمارا : طيب ، حلو ، اما تخلص كليه يبقى تعالى بيتنا معروف ، ده لو فضلت قعدالك ٥ سنين
يونس : خدي بس اقولك
تمارا مشيت وسابته: يلا ياض يا نوغه ، اما تكبر يبقى كلمني
يونس : انتي عبيطه يا بت ، اتكلمي معايا عدل
تمارا : يلا ياض من هنا وتعملي بلوك انت فاهم؟!!
يونس: طب خدي بس هقولك على حاجه
================================
صابرين : بقى ساااايب بنات الدنيا كلها وملقتش غير بنت هند ، ده على جثتي تتم الجوازه دي
يوسف : ليه بس يا امي ،انا مش عارف هي عملتلك ايه
هند : هو كده, انا مبطيقاش الوليه دي ، وهي كلمه واحده الجوازه دي مش هتتم يعني مش هتتم
يوسف : يا امي دي كويسه البت والله و هتساعدني، يعني مش هتضغط عليا زي اي بنت تانيه
صابرين : انا قولت لا يعني لا ، انا قلبي واجعني لوحده
مش موافقه انا قولتلك اهووو.
يوسف: طب فكري بس يا ست الكل ، احنا عايزين البت بس مش اكتر
================================
يونس : يا بت يا تمارا اصبري
تليفونه رن
يونس : ايه يا ساره
ساره : اقولك حاجه حصلت في البيت و تديني ١٠٠ جنيه
يونس: لميتي كام ١٠٠ جنيه النهارده
ساره : ده انا مش معايا ولا جنيه ، لولا كده كنت قولتلك الخبر ببلاش ، بس عشان انت حبيبي و الخبر يستاهل هاخد منك ١٥٠
يونس بنفاذ صبر: انطقي
ساره: ماما عرفت انك بتحب تمارا بنت عمو مراد وقالبه مناحه ف البيت
يونس بخضه: وهي عرفت منين
ساره : مش عارفه بصراحه، بس حاسه ان الاهبل الكبير ده هو اللي قالها
يونس: يا لهوييي عليا ، ده انا ليلتي هتبقى طيين
ساره: كده ليا عندك ٤٥٠ ، سلام يا روحي .....
================================
في بيت ليلى»»»
هند بصويت: الحقييييي يا ليلى!!!!!!
يتبع........
تكملة الرواية من هناااااااا
الرواية الكاملة من هناااااااا
تعليقات
إرسال تعليق