 |
🌱آمنه🌱 11_12
"عطاء وقسوه"
🌴الفصل الحادي عشر🌴
في بيت موسي الشهيدي
كان هشام بيذاكر في اوضته ورن تليفونه وكانت هبه أخت آمنه
هشام : رد عليها وقال : السلام عليكم
هبه : بإستغراب مين معايا
هشام : أنا هشام يا هبه
هبه : هشام !! فين آمنه يا هشام ... أنا بعت لنادر عشان يندهالي واكلمها مردش عليا .... هو فيه حاجه
هشام : اتنهد وقال أمونه مشيت يا هبه
هبه : إيه !! مشيت ازاي يعني . عملتو فيها ايه يا هشام ، انطق وقول ... آمنه مش هتمشي الا لما يكون حصل حاجه وحاجه كبيره اوي كمان اتكلم وقول عملتوا فيها ايه
هشام : اهدي شويه يا هبه هيه لسه مكلماني النهارده وطمنتني عليها وقالت هتكلمني كل يوم لحد ما اخلص امتحانات وهروح اقعد معاها
هبه : طب مشيت ليه .. طمن قلبي
هشام : مش هينفع انا احكيلك حاجه ، هيه هتكلمني بكره تاني واخليها تكلمك تمام
هبه : ماشي يا هشام .. بس متنساش
هشام : عيوني حاضر يا هبه مع السلامه
قفل معاها وهو بيفكر في آمنه واتنهد وبدا يذاكر تاني
____________________________________
في بيت مراد عزام
كان مراد في البلكونه بيعمل مكالمه وكانت آمنه ووفاء لسه في الاوضه وفي الصاله كان قاعد أمل ونهي وسيف وعبدالرحمن
عبدالرحمن : أبله أمل انا جعان اوي ممكن ساندوتش
نهي : تعالي معايا يا بودي انا هعملك
اخدت نهي عبدالرحمن للمطبخ تعمله ساندوتش
سيف : راح جنب امل وقال : هو احنا هنمشي من هنا يا ابله امل
امل : اخدته في حضنها وقالت معرفش والله يا سيفو .. بس ياريت متمشوش انا اتعلقت بيكم اوي وحبيتكم
سيف : وانا كمان حبيتك اوي يا ابله امل انتي ونهي
خرج مراد من البلكونه وابتسم لما شاف سيف في حضن امل وقال : إيه دا بقا ، مفيش حضن زي دا حلو كدا لعمو مراد
سيف : راح لمراد وحضنه وقال انا مش عايز امشي من هنا يا عمو مراد
مراد : اتنهد وقال ومين سمعك يا سيف ... انا كمان نفسي متمشوش وتفضلوا العمر كله في حضني
أمل : ابتسمت وقالت ربنا يهديها وتوافق المرادي
مراد : بقولك يا سيفو ادخل لنهي خليها تعملنا ساندوتشات لينا كلنا عشان جعان
سيف : حاضر وسابه ودخل لنهي المطبخ
مراد : بص لأمل وقال عارف مين كان بيكلمني
أمل : مين
مراد : نادر
أمل : ليه ... غريبه يعني
مراد : ابتسم ورجع بضهره لورا وقال ولا غريبه ولا حاجه ... هو كلمني عشان طالب أيدك... ها قولتي إيه
امل : ابتسمت بكسوف وقالت احمم أ.أ.أيه الكلام دا يا مراد بس أ.أ.أنا داخله علي امتحانات
مراد : والراجل معارضش ولا حاجه هو بس عايز يشوف الموافقه المبدئيه عشان لو احنا موافقين يكلم اهله ، ومش هيجي يتقدم الا بعد ما تخلصي امتحاناتك خالص.... ها قولتي إيه
أمل : رجعت شعرها لورا ودانها بكسوف وسكتت
مراد : بابتسامه يبقي علي بركة الله
أمل اتكسفت ودخلت اوضتها وهيه بتضحك
جت نهي وفي ايدها طبق كبير من السندوتشات وقعدت هيه ومراد والاولاد ياكلوا فيه وهما بيتكلموا ويضحكوا مع بعض
بعد شويه خرجت آمنه ووفاء من الاوضه
مراد : اتفضلوا يا جماعه عشان يبقي عيش وملح
آمنه : ممكن كلمتين علي جنب يا استاذ مراد
مراد : احمم اوكي اتفضلي نطلع البلكونه شويه
خرجت آمنه ومراد للبلكونه وقعدوا علي الكراسي
مراد : خير يا أم سيف
آمنه : انت ليه قولت لحماتي انك بت..... وسكتت
مراد : كملي .. ليه سكتي
آمنه : انت عارف انت قولت إيه .. ليه قولتلها كدا
مراد : عشان بحب اكون واضح وصريح ومحبش اللي قدامي أكون بستغفله او احس اننا بعمل اي حاجه من وراه ولو حتي كانت مجرد مشاعر
آمنه : اتنهدت وقالت بص يا استاذ مراد... أنا معنديش إعتراض عليك
مراد : بفرحه بجد
آمنه : استني شويه متفرحش اوي كدا ... بص انا عارفه انك بالنسبالي فرصه واي واحده مكاني تتمناها ... بس انا حاليا مقدرش اوعدك بحاجه ، انا واحده حاسه ان جزء من حياتها مفقود ، اتنقلت من عالم لعالم تاني خالص مابين يوم وليله ، انا روحي كانت متعلقه بالارض ... انت يمكن تستغرب كلامي بس دي الحقيقه ، انا بحب اشم ريحة الارض وريحة الزرعه اول ما تطلع وتبقي خضرا ، وريحة الطينه ، والشاليه اللي هيه عندكم هنا اسمها دفايه ... واتنهدت وقالت بإختصار انا ريفيه جدا بكل ما فيا ... ازاي عايزني من لحظه للتانيه اغير حياتي كدا وابقي زيكم بندر
مراد : انا مطلبتش منك تغيري حاجه يا آمنه ... انا كل اللي طالبه منك فرصه ... فرصه تديهالي اقرب منك
آمنه : انا مبحبش اضحك علي اللي قدامي يا استاذ مراد واقولك هديلك فرصه ووريني هتنسيني ازاي
انا من وقت ما سمعت كلامهم عن اللي كانوا ناويين عليه معايا وانا كرهتهم ويمكن لحد ما فوقت كنت بكرههم وكنت عايزه انتقم منهم
بس من بعد ما كلمت هشام وقالي انهم تايهين. من غيري ، معرفش ليه حسيت ان كل الكره اللي جوايا ليهم اتحول لشفقه
مراد : بصلها وسكت
آمنه : انت يمكن تستغرب كلامي بس دا فعلا اللي حصل ، ايوا انا اشفقت عليهم لاني اتخيلت منظرهم دلوقتي عامل ازاي
اتخيلت منظر حازم ومعتز وهما بيحلبوا الجاموسه واتخيلت منظر دعاء وهيه طالعه للطير ومحتاسه ببنتها مع شغل البيت
واتخيلت منظر هشام وهو زعلان ، علي الرغم ان الضحكه مبتفارقش شفايفه ولا البيت ليه روح من غير شقاوته ونزلت دمعه من عيونها وسكتت
مراد : حب يخرجها من حزنها وقال بمزاح : بما انك فتحتي سيرة هشام .. انتي امبارح كلمتيه وقولتيله يا قلب امونه ، افهم منها ايه دي
آمنه : مسحت دموعها وضحكت وقالت لا واضح ان صحتك بتيجي علي التهزيق
مراد : شوفي انتي كل ما افتحلك موضوع تلفي وتدوري وتخرجينا منه
طب نركن هشام علي جنب دلوقتي ونشوف رايك إيه فيا من جديد
آمنه : اللي عيزاك تعرفه ان حماتي مش معارضه عليك بالعكس دي متحمسه جدا ليك معرفش علي إيه
مراد : علي إيه !! ماعلينا من آخر زلطه زقلتيها فيها ... عايز اعرف الرد ايه
آمنه : ضحكت وقالت سيبني افكر
مراد : اتنهد وقال ماشي
آمنه : بس من هنا لحد ما الرد يوصلك انا لازم امشي مينفعش اقعد معاك
مراد : انا قولت مش هتمشي من هنا ، بس عشان انتي عندك حق انا اللي همشي
آمنه : لا طبعا تمشي وتسيب اخواتك ازاي يعني
مراد : ياستي انا مش هبعد انا هسكن في الشقه اللي قصادنا دي
آمنه : بتاعتك الشقه دي
مراد : لأ دي بتاعة عم ناجي الله يرحمه كان جارنا وكانت ساكنه فيها بنته بس بعد ما مات بعتلها اخوها واخدها عنده في السعوديه عشان متفضلش لوحدها وسابتلنا مفتاح الشقه عشان نبقي نشقر عليها دايما ونشوفها ... فانا هسكن فيها بس هبقي آجي اتغدي معاكم بس واقعد معاكم شويه وانام في شقتي ولو مش عايزه اقعد معاكم كمان خلاص
آمنه : لا طبعا انا هحرمك من بيتك
مراد : بلؤم . عادي يعني مهو هيبقي بيتك انتي كمان بعد الموافقه ان شاء الله
آمزه : بسخريه . عشمان بالموافقه اوي يا خويا ... متحلمش كتير لتقع من علي السرير تتكسر رقابتك وسابته ومشيت
مراد : اتنهد وقال وبعدهالك في الدبش اللي بتحدفيه دا بس يا امونه
____________________________________
اشرق صباح يوم جديد
صحيت دعاء من نومها بدري وكان حازم كمان بيجهز نفسه عشان يسافر شغله
دعاء : اتنهدت وقالت مكنش ينفع تسافر وتسيبني الفتره دي يا حازم
حازم : يا حببتي انا اطمنت عليكي خلاص .. كاميليا شكلها اتغيرت فعلا ، انتي سيبي معاها تالا ومتخافيش
دعاء : حاضر
حازم باس راسها وقال يلا اشوفك علي خير ادعيلي
دعاء : ربنا معاك يا حبيبي توصل بالسلامه
مشي حازم وبدات دعاء تلبس عشان تروح امتحانها
اخدت تالا ونزلت لقت معتز بيلبس عشان يروح شغله
دعاء : صباح الخير يا معتز
معتز : صباح النور يا دعاء
دعاء : فين كاميليا عشان تاخد تالا
معتز : لسه نايمه طبعا ... كاميليا مبتصحاش دلوقتي اصلا
دعاء : طب انا هسيب تالا مع مين .. والطير عايز يفطر والبيت عايز يتنضف ومين هيجهز فطار لهشام
معتز : دعاء متوجعيش دماغي والنبي وسابها ومشي
دعاء : دموعها نزلت علي فراق آمنه وخرجت ببنتها وراحت لصابر وقالت : صباح الخير يا عم صابر
صابر : صباح النور يا بنتي اتفضلي
دعاء : ممكن اسيب تالا مع البنات بس .. عندي امتحان ومعنديش حد اسيبها معاه ولا آآمن حد عليها
صابر : لنفسه ولونك متستاهليش المعروف بس انا هاخدها عشان البنت الصغيره ملهاش ذنب وكمان دي من ريحة امونه بس ... وبص لدعاء وقال في عيونا يا بنتي روحي أنتي ومتقلقيش عليها
دعاء : شكرا يا عم صابر وباست بنتها ومشيت
عند هشام
فطر من الاكل الجاهز اللي جايبه ولبس هدومه ونزل لتحت
دخل البيت ومكنش يعرف ان كاميليا موجوده طبعا اتفاجى بيها وهيه خارجه من اوضة معتز وكانت لابسه قميص نوم
اول ما شافها جري علي بره
كاميليا : ابتسمت بخبث ولمعت في دماغها فكره تااانيه خالص .. اتنهدت بسعاده وقالت : واضح ان الطريق هيبقي سالك معاكي اوي يابت يا كوكي عشان اهدم العيله دي
____________________________________
في مديرية امن القاهره
كان مراد في مكتبه هو وسامح بيتكلموا مع بعض وحكاله عن اللي حصل
سامح : ههههههههههه دي مش بتحدف زلط دي بتحدف دبش
مراد : اتلم يا سامح ومتتكلمش عنها كدا
سامح : خلاص يا حنين ... بس انا لازم اقابلها ضروري ، عايز اقولها عن حالة عم صابر وبناته
مراد : أنا هقولها لما أروح وهخليها تكلمه تطمنه عليها
سامح : آه ياريت والنبي اصل تونه كل ما اكلمها تعيط
مراد : بسخريه . يا حنين .... المهم اخبار المهمه أيه
سامح : اتنهد وقال للاسف هنسافر عشان نقضي عليهم
مراد : نفخ بزهق وقال لازم يعني
سامح : للاسف اللواء سالم هيعملنا اجتماع ويشرحلنا الخطه البديله عشان نقبض عليهم
مراد : مسح وشه وقال خايف يا سامح مرجعش ... هسيب اخواتي لمين ولا هسيب أمونه واولادها لمين
سامح : انا كمان اول مره اخاف كدا ... كل مره كنت بطلع أي عمليه مكنتش ببقي خايف عشان معنديش اللي اخسره ، لكن المرادي خايف بجد علي نفسي . مش خايف من الموت قد منا خايف علي فتون من بعدي
مراد : ربنا يسترها ويعدي المهمه دي علي خير
سامح : ان شاء الله
____________________________________
في الجامعه عند دعاء وأمل
وصلت دعاء وكانت مشافتش امل من فتره جريت عليها وحضنتها وعيطت في حضنها
أمل : بلهفه مالك يا دعاء فيه إيه
دعاء : انا ضايعه من بعدها حاسه اننا مش لاقيه نفسي من بعدها هموت والله
أمل : أهدي يا حببتي . اهدي ان شاء الله ترجعلكم
دعاء : هزت راسها بمعني لا وقالت : مش هترجع يا أمل انا متأكده انها مستحيل تسامحنا بعد اللي عملناه فيها دا
أمل : لا يا حببتي آمنه طيبه وانتو لازم تعذروها . انتو اللي عملتوه فيها مش سهل عليه تنساه
دعاء : أنا نفسي اشوفها بس والله . نفسي اطمن عليها واعتذرلها .. يارتني ما اتكلمت معاهم ولا قولت الكلمتين دول علي الاقل كانت اخدتني معاها
أمل : ه.ه.هو انتي عارفه هيه فين
دعاء : هعرف منين بس
امل : اتنهدت براحه وقالت طب اهدي عشان تعرفي تركزي في الامتحان ... شوفتي انتي هتنكدي عليا ازاي ، انا عندي ليكي خير حلو
دعاء : مسحت دموعها وقالت خبر ايه
أمل : نادر اتقدملي ومنتظر رد مني
دعاء : ابتسمت وقالت بجد ... الف مبروك يا اموله ، نادر طيب اوي ربنا يتمملكم بخير
أمل : يارب يا دودو ... يلا عشان منتاخرش علي الامتحان ، بس قوليلي توته سبتيها مع مين
دعاء : للأسف سبتها مع ناس جيرانا هسيبها مع مين
أمل : مش قولتيلي امبارح ان كاميليا رجعت تقعد معاكم ... مسيبتيهاش معاها ليه
دعاء : كانت نايمه ومعتز مرضاش يصحيها
أمل : طب انتي واثقه في جيرانكم دول
دعاء : آه طبعا ... دا عم صابر وبناته فتون وبدور
أمل : آه صح فتون دي تبقي خطيبة سامح صاحب مراد ... لا كويسين اوي مراد بيشكر فيهم ، يلا ربنا يهدي الفتره دي علي خير يارب
دعاء : يارب .. يلا عشان الامتحان
____________________________________
في بيت راضي الشهيدي
كان نادر بيحكيلهم عن أمل وانه عايز يتجوزها
راضي : وانت واثق من اخلاقها يا نادر ياابني
نادر : طبعا ياأبا ، أمل محترمه جدا وكمان زميلة دعاء في الجامعه
شيماء : لا مدام زميلة دعاء تبقي كويسه طبعا... ربنا يتمملك علي خير يا نادر
فايزه : بشده محدش طلب رايك .... وبصت لنادر وقالت وهنروحلها أمته نتقدملها
نادر : اول ما تخلص امتحانات ان شاء الله
السيد : وهتسكنوا هنا معانا
نادر : لا هنسكن في القاهره عشان شغلي
فايزه : يعني إيه واحد ياخد مراته ويسافر والتاني ياخد مراته ويقعد بعيد عني ويفضلي العله دي وبصت لشيماء
شيماء : صعبت عليها نفسها قامت وهيه بتعيط وطلعت لبيتها
السيد : ليه كدا يا اما بس ... ليه دايما غاويه تنكدي عليها ، بس قسما بالله ياأما لو هتفضلي تنكدي عليها كدا كل شويه لهاخدها وهاخد بناتي وامشي اني كمان من هنا
فايزه : دا شكله عمل محجب اوي يابن فايزه اللي يخليك تقف قصاد امك عشان مراتك كدا
ابراهيم : ياأما انتي ليه متخيله أن شيماء كدا ... دي طيبه وغلبانه والله ، ثم ان حكاية خلفتها بنات دي حاجه مش بأيدها يعني عشان تعكنني عليها كل شويه
فايزه : جرالكم ايه يا ولاد راضي من امته وانتو بتقفوا قصادي
راضي : عشان انتي زودتيها المرادي معاها والبت فعلا غلبانه ، دي قيدالك صوابعها العشره شمع وانتي دايما معكننه عليها بسبب خلفة البنات
وبص لسيد وقال : اطلع راضي مراتك يا ابني
طلع السيد لشيماء يراضيها
السيد : راح عليها واخدها في حضنه وقال حقك عليا يا شيماء خلاص
شيماء : كانت بتعيط في حضنه وساكته مبتردش لحد ما قطعت النفس واغمي عليها
جري بسرعه ونده لنادر وابراهيم والكل طلع يطمن عليها
بعد وقت فاقت وهيه بتعيط
راضي : حقك علينا يا بنتي متزعليش نفسك
شيماء : حقك علي راسي ياأبا متقولش كدا
فايزه : علي الرغم انه مخايلش عليا انك اغمي عليكي وعملتي كدا عشان نخاف عليكي ... بس سلامتك
شيماء : بعصبيه لا يا أما انا مش بمثل عليكو ولا حاجه انا فعلا ضغطي وطي من الزعل .. بس انتي عارفه ليه لاني حامل ياأما ، افرحي بقا وادعي ربك ليل ونهار يكون ولد عشان تبطلي ذل فيا
افرحي ان بنتي لسه يادوب 5 شهور ومش هقدر اكملها رضاعه من صدري وهتتفطم
نادر : بس دا غلط علي البنت يا شيماء تفطميها بدري كدا
ابراهيم : انا كنت سامع من الدكتور انك ينفع تكملي رضاعه وانتي حامل عادي اهم حاجه تتغذي كويس
فايزه : بشده لاا ، افرض كان ولد تاخد غذاه ويطلع واد خرع ... لا البنات عضمهم جامد انما الولد لازم يتأسس صح عشان يبقي راجل
الكل بص لبعضه بيأس من تصرفات وكلام فايزه وسكتو
____________________________________
في بيت مراد عزام
كانت نهي واقف بتطبخ وآمنه كانت بتحاول تساعدها
نهي : يا ابله أمونه أقعدي والنبي انتي تعبانه
آمنه : يا حببتي هساعدك بس وبعدين خليني جنبك انا قاعده مبعملش حاحه
نهي : انا اقصد تطلعي بره او تدخلي الاوضه تريحي وانا لو احتاجت اعرف حاجه هاجي اسالك طبعا .. اومال هكلم الشربيني
آمنه : ضحكت وقالت يخرب عقلك يا نهي ... واتنهد وقالت بتفكريني بخفة دم هشام
نهي : هشام اللي مش متربي دا ... بقا انا تقارنيني بواحد زي دا برضو يا ابله أمونه اخص عليكي
آمنه : ابتسمت وقالت وكمان نفس اللسان الطويل
نهي : لا انا هسكت احسن عشان مكنش شبهه في حاجه تانيه
في الوقت دا دخلت عليهم امل وقالت : مساء الفل وباست آمنه في خدها وقالت عامله إيه
آمنه : الحمد لله.. طمنيني عملتي إيه في امتحانك
أمل : الحمد لله تمام
آمنه : طب يلا ادخلي غيري هدومك وصلي وذاكري وانا ونهي هنجهز الاكل ونندهلك
أمل : لا طبعا تجهزي إيه بس انتي لازم ترتاحي شويه
آمنه : أنا مرتاحه ملكيش فيه يلا انتي بس ادخلي ذاكري متضيعيش وقتك عشان أمتحانك بعد بكره
أمل : بإستغراب . وعرفتي ازاي ان امتحاناتي كل يوم ويوم
آمنه : اتنهدت وقالت من دعاء... كانت بتقولي ان كلية التربيه الوحيده اللي امتحاناتها كل يوم ويوم
أمل : علي فكره يا امونه دعاء ضايعه بمعني الكلمه من بعدك ... تتخيلي انها بتسيب تالا مع عم صابر وبناته
آمنه : غمضت عيونها بوجع علي تالا .لانها بتعتبرها بنتها هيه ومسحت دموعها وقالت : ربنا يعين كل واحد علي حاله ... يلا انتي غيري وذاكري
نهي : والشغاله لما تخلص يا الله امل هتيجي تندهلك وتبلغك ان الاكل جهز
____________________________________
بعد وقت طويل
وصلت دعاء للبيت وراحت عند صابر واخدت منه تالا الاول ورجعت علي البيت
لقيت كاميليا بتحط مانكير ومعملتش اي حاجه خالص
دعاء : إيه دا يا كاميليا انتي قاعده كدا ومعملتيش اي حاجه في البيت
كاميليا : عايزاني اعملك إيه يعني ... أنا لسه صاحيه من النوم من شويه واخدت شاور بس وقولت أقعد بقا اهتم بنفسي ، آه مهو مش معني اني قبلت اني أعيش معاكم ابقي اهمل نفسي
دعاء : طب ما حضرتيش اكل
كاميليا : أمم حضرت طبعا ... عملتلك بيتزا تجنن هتاكلي صوابعك وراها
دعاء : بيتزا !! طب هشام فين
كاميليا : معرفش مشفتوش من وقت ما رجعت
دعاء : يعني كمان مفطرتهوش
كاميليا : يووووووه ما قولنا لسه صاحيين نغنيها
دعاء : مسحت وشها بغيظ وقالت اوكي يا كاميليا فين البيتزا طيب عشان آكل
كاميليا : أنا مجهزاها بس لسه مسوتهاش .. هستني لما زوز ييجي عشان ياكولها سخنه
دعاء : أنا اللي بقيت سخنه من كتر ما مرارتي هتتفرقع منك وسابتها وطلعت لشقتها
كاميليا : اترقصت وقالت أبوا بقا يا حلاوتك يابت يا كوكي يا مجنناهم
طلعت دعاء لشقتها وغيرت هدومها وبدات تجهز اكل ليها ولبنتها بسرعه عشان تاكل
بعد ما اكلت نيمت بنتها ولسه هتقعد تذاكر افتكرت الطير ..
طلعت للطير تشوفه ملقتهوش علي السطح ولا ليه اي صوت ابدا
فتحت الابواب عليه عشان تشوفه لقيته كله نايم في الارض وبيطلع في الروح (بسبب انه ماكلش من بالليل ولا شرب مايه)
نزلت لكاميليا بسرعه ودخلت عليها وهيه غضبانه جدا وقالت : انتي إيه يا شيخه ، جبروت بقا تسيبي الطير ما تفتحيش عليه يا بنتي ولا تحطيله اكل .. وصرخت في وشها وقالت انتي غبيه
كاميليا : ببرود . اووووف هيه اسطوانه هنعيد ونزيد فيها بقا ما قولنا لسه صاحيه . لسه صاحيه نغنيها
دعاء : اقسم بالله مشوفتش برود في حياتي قد ما شوفته منك دلوقتي ... يا متخلفه الطير كله مات
كاميليا : بسخريه .البقاء لله يا حببتي هتعملو عزا بقي ابلغ مامي وبابي ييجو يحضروه
دعاء : نفخت بزهق وقالت بااااارده
في الوقت دا دخل هشام وقال : من امته وأحنا صوتنا بيوصل للشارع يا دعاء
دعاء : تعالي شوف الهانم سابت الطير كله من غير أكل ولا شرب لما مات
هشام : سكت شويه وقال ولسه .. لسه ياما هنشوف من بعدك يا امونه وسابهم وطلع لاوضته
اما دعاء وكاميليا بصوا لبعض نظرات حقد وغيظ وسابوا بعض
____________________________________
مر اكثر من اسبوعين
كانت دايما دعاء وكاميليا في مشاكل مع بعض
وكانت دعاء بتحاول تتجنبها تماما بتروح الامتحان وبتسيب بنتها مع صابر وبناته وترجع تفضل في شقتها هيه وبنتها وحتي الاكل بتجهزه وتاكل لوحدها
اما كاميليا فكانت بتستغل انها مع معتز لوحدها وبتحاول تقنعه ببيع الارض بس بالمحايله
هشام كان كل يوم آمنه تكلمه ويطمنها عليه
وكان لوحده مبيتكلمش مع حد فيهم لا دعاء ولا كاميليا ولا معتز ... حتي معتز محسش بغياب اخوه عنه وكان مشغول مع الست كاميليا ودا كان مأثر علي نفسية هشام جدا بس اللي كان بيصبره انه عارفه اول ما يخلص امتحانات هيروح يعيش مع امونه
اما مراد واخواته البنات فكانوا سعداء جدا بآمنه واولادها وحماتها وكانوا حاسين انهم امتلكوا كنز ثمين زي آمنه من محبه وعطاء .. بالرغم من المده القصيره اللي عاشتها معاهم الا انها قدرت تحاوطهم بكم كبير من الحب والحنان . عوضتهم عن سنين وحده وحرمان عايشين فيها لوحدهم مع بعض
لكن مازالت آمنه مبلغتش مراد برأيها ودا كان قالق مراد جدا وبيحاول يخطف منها بعض النظرات ... لكن علي مين دي امونه برضو وكانت بتفهمه وبتمنع اي لحظه زي دي وهنعرف بعدين ازاي
____________________________________
في بيت مراد عزام
كان يوم قراية فاتحة امل ونادر
وكانت آمنه ونهي بيجهزوا الحاجه مع أمل عشان تتقدم للعريس واهله
آمنه : أنا لازم الحق اخلص معاكم وامشي قبل ما يوصلوا
أمل : يا امونه خليكي في الاوضه عشان خاطري بس متسبنيش لوحدي
آمنه : أنا خايفه حد من الاولاد يطلع عليهم تبقي مصيبه
نهي : متخافيش يا ابله .. بس والنبي متسبيناش
في الوقت دا دخل مراد وقال كله تمام يا أمل ، جهزتو كل حاجه
نهي : طبعا يا ابيه جهزنا كل حاجه .. كل حاجه تمت كانت تحت اشرافي
مراد : ليه كدا بس يا نهي .... سيبي اختك تفرح جايه تتشمللي النهارده
نهي : يا سلااااام ... ماشي يا ابيه ، عموما ابله امونه كانت معايا وهيه اللي حضرت كل حاجه
مراد : ابتسم بحب وقال يبقي اكيد كل حاجه هتكون طعمها يجنن
آمنه : إيه شغل المسهوكين دا ... ما تسترجل كدا
أمل ونهي : كتموا ضحكتهم علي كلام آمنه وشكل مراد
مراد : اتنهد تنهيده طويله وقال ... يمهل ولا يهمل
في الوقت دا رن جرس الباب وخرج يفتح يشوف مين علي الباب
وطبعا كان نادر واهله اللي وصلوا .... لكن اللي شل تفكير مراد انه لقي حد تاني معاهم
مراد : معتز !!!!!
🌱آمنه🌱 12
"عطاء وقسوه"
🌴الفصل الثاني عشر🌴
في بيت مراد عزام
اتفاجئ مراد بوجود معتز مع أهل نادر وكان حاسس ان تفكيره اتشل لما شافه
مراد : معتز !!!
معتز : إيه يا بوص الف وارجع تاني ولا ايه
مراد : بابتسامه وتوتر . لا لا ازاي تقول كدا دا بيتك اتفضل . اتفضلوا كلكو يا جماعه
دخلو كلهم وقعدوا مع مراد واللي كان موجود من عيلة نادر ( راضي والده ، السيد اخوه الكبير ، ابراهيم ، ومعتز ) ونادر
مراد : منورين يا جماعه
راضي : بنورك يابني ... ندخل في الموضوع علطول عشان الوقت
معتز : استني بس يا عمي هعرفه بيكم ... وقدم كل واحد لمراد وقال وأنا اظن مش محتاج اعرفك علي نفسي
مراد : كان متوتر جدا من وجود معتز ومش عارف يركز في اي حاجه ... بس حاول يسيطر علي قلقه وقال : أ.أ.أهلا وسهلا
معتز : أنا جيت معاهم لانهم ميعرفوش بيتك وعشان كدا طلبوا مني اجي معاهم عشان الطريق وفي نفس الوقت اقصر عليهم الطريق بدال ما تفضل تلف وتسال عنهم
مراد : أخد نفس عميق وحاول يتكلم بهدوء وقال . متزعلش مني يا معتز مهما كان صلة القرابه ما بينكم اكيد انا كمان هحتاج وقت افكر فيه ، اصل انا مش هديله اي حد .دي اختي ، عارف يعني ايه اختي ... يعني حته مني ، وحته من كل ذكري محفوره جوايا ...
وانت عايزني اسلمها لنادر كدا لمجرد انه ابن عمك ... متزعلش مني دا شئ ميكفيش طبعا
وبص لاهل نادر وخصوصا راضي وقال : ولا انا كلامي فيه غلط يا حاج راضي
راضي : لا يابني ولا غلط ولا حاجه ربنا ما يجيب غلط ... بالعكس انا حبيت كلامك وعجبني ، لان دا معناه انك تعبت في تربية اخواتك كتير لدرجة انك عايز تسلمهم لايد امينه تحافظ عليهم وتحميهم بجد ... وطبطب علي كتف نادر وقال احسنت الاختيار يا ابني
السيد : احنا مقدرين خوفك عليهم اكيد يا استاذ مراد واحنا ان شاء الله بنطمنك عليها ... ومش عشان هو اخويا بشكرلك فيه والله ، بس فعلا نادر شخص كويس ومحترم وهيسعد اخت حضرتك ..... وبعدين دول هيسكنوا جنبكم هنا ، يعني هتكون مطمن عليها وهيه جنبك اكيد
مراد : احمم .. لا طبعا حضرتك غلطان ، مش قرب اختي مني هو اللي هيكون مطمن قلبي عليها .... فيه ناس بتتجوز جنب أهاليها وجوازتهم مبتنجحش ، وناس بتبعد عن اهلها وبيبقي مابينهم بلاد وحدود ومسافات بس بتكون مرتاحه وقلوب اهلها مرتاحين
نادر : وانا اوعدك يا استاذ مراد ان أمل هتكون في عنيا وعمري مهزعلها ابدا
نادر : بنبرة تحذير . اتمني تكون صادق في وعدك دا يا نادر ... وكمل كلامه ورفع صباعه بتحذير وقال : لأني والله لو في يوم اختي نزلت دمعه من عيونها بسببك مهرحمك ومش هبقي علي اي صلة قرابه او صداقه وبص لمعتز ،
وكمل كلامه وقال : وانت شوفت بنفسك اللي حصل مع شريف كان صاحب عمري زي سامح ، بس اول ما داس علي اختي دوست عليه وشطبته من حياتي كلها
راضي : عداك العيب ياابني
ابراهيم : كلنا بنوعدك يا استاذ مراد
معتز : قرب من مراد وهمس في ودنه وقال : جرالك ايه يا جدع انت مالك نازل تهديد في الناس كدا قدامي ما تراعي انهم من طرفي وبرضو مهما كان عمي
مراد : بهمس. انت صحيح جوز بنت عمتي علي عيني وراسي وبعدها اتصاحبنا ميضرش .... وقرب منه اكتر وكأنه بيوجه كل كلمه عن آمنه وقال : لكن انت لسه متعرفش مراد عزام لما حاجه تكون غاليه عليه وحد يخدشها يا معتز ..... بيتحولك في لحظه من مراد الطيب لمراد اللي عمرك ما شوفته ، وادعي ربك متشوفش مني الوش دا .... ولو حابب تعرفه ممكن تسأل كاميليا عنه
معتز : عقد حواجبه وقال : مالك يا مراد ... مالك النهارده بتتكلم بلغة التهديد دي كتير
مراد : اتنهد وقال مفيش
راضي : طب نتفق علي المطلوب يا استاذ مراد
____________________________________
في اوضة البنات
كانت آمنه سمعت صوت معتز وعرفت انه معاهم بره وكانت حاسه بخوف بس بتحاول تسيطر علي نفسها
أمل : وحياتي اهدي شويه يا أمونه ... والله محد هيعرف انك هنا
آمنه : اتنهدت وبصت لحماتها وقالت شوفتي ياأما .... شوفتي لما سمعت كلامك حصلي إيه ، بقا انا اتحط في موقف زي دا ليه يعني وبسبب ايه وعشان مين
والنبي لو حد منهم شافني ولا لمح حد من العيال هيقولوا عليا إيه دلوقتي بس ، الله يسامحك ياأما . الله يسامحك
وفاء : بلؤم . بتعتبي عليا ليه يا امونه بس منا قولتلك الجدع رايدك في الحلال .... ركبتيلي دماغك وعيشالي في دور اللي واقفه علي الاطلال
أمل : هههههههههههه والله انتي عسل يا طنط وفاء
آمنه : وكمان ليكو نفس تحفلو عليا ... ماشي ، ماااااااشي .... بس يمشوا من هنا وتعدي الليلادي علي خير وانا هعمل اللي في دماغي بقا
أمل : متبقيش قموصه بقا يا امونه وبعدين متخافيش نهي والاولاد في آخر اوضه بيلعبوا مع بعض وانتي منبهه عليهم محدش يخرج وهما بيسمعوا كلامك
آمنه : كانت ماسكه دماغها بتعب وقالت أنا غلط ... ايوا انا غلط اني سمعت كلامكم وفضلت هنا .. كل دا ليه يعني وعشان ايه عشان ق........ وسكتت
في الوقت دا سمعوا صوت مراد وهو بينده علي امل عشان تخرجلهم
قامت أمل وجهزت صنيه واخدت الحاجه اللي هتتقدم وخرجت
اما آمنه كانت قاعده بتتنفس بسرعه وبتهز في رجلها من التوتر
وفاء : تعالي يا امونه يا بنتي هنا جنبي عيزاكي
راحت آمنه جنبها وقالت: نعم ياأما
وفاء : ........................
____________________________________
عند امل ومراد
خرجت امل وهيه مكسوفه جدا وحاطه وشها في الارض وبدأ مراد يقدملها الموجودين وسلمت عليهم وقعدت جنب مراد بكسوف
راضي : ما شاء الله ربنا يسعدكم يا بنتي
أمل اكتفت بإبتسامه وسكتت
نادر : قولت إيه بقا يا سيادة المقدم ... نقرا الفاتحه
مراد : نقرا الفاتحه علي بركة الله
وبدأو كلهم يرددو سورة الفاتحه بفرحه
قرب مراد من امل وباس جبينها وقال : الف مبروك يا حببتي
أمل : بابتسامه عقبالك يا حبيبي
والكل هنئ نادر وباركوله
راضي : طب نستاذن احنا عشان الطريق وان شاء الله العرسان يتفقوا مع بعض علي معاد الخطوبه
مراد : ان شاء الله يا حاج نورتونا
نزلوا كلهم وكان لسه فاضل نادر وأمل واقفين مع بعض
نادر : الف مبروك يا أمل
أمل : ابتسمت وقالت الله يبارك فيك يا دكتور نادر
نادر : لا دكتور ايه بقا خلاص ... احنا ننسي الالقاب ومنذكرش الا لقبين اتنين ما بينا هسمح بيهم
أمل : باستغراب ايه هما!!!
نادر : انا هقولك حببتي وانتي تقوليلي حبيبي
جه عليهم مراد وقال : واللقب التالت هقولك امشي عشان منيمكش في الحجز النهارده يلا
نادر : ههههههه بنقطع علي بعض من دلوقتي ... ماشي طب ممكن بعد اذنك ابقي اكلمها في التليفون
مراد : هفكر وارد عليك بكره
نادر : وليه مش النهارده بس
مراد : ما تسترجل ياله وبطل السهوكه والمحن دا
أمل كتمت ضحكتها وسكتت
نادر : هقولك ايه بس منتا بكره تجرب الحب وحلاوة الحب
مراد : اتنهد وقال قول يارب
____________________________________
في بيت موسي الشهيدي
كان وصل معتز ودخل البيت لقي كاميليا قافله الباب بالمفتاح وسايبه المفتاح في الباب استغرب وخبط عليها عشان تفتحله
وفعلا فتحتله وهيه متوتره جدا او بتتظاهر بالتوتر
معتز : مالك يا كوكي
كاميليا : ل.ل.لا مفيش ب.ب.بس خوفت وانا لوحدي فقولت اقفل الباب اضمن ... ها عملتو ايه
معتز : الحمد لله قرينا الفاتحه وهيحددوا الخطوبه مع بعض ... بس قوليلي مالك مقفلاها كدا علي نفسك ولابسه بيجامه يعني . دي مش عادتك
كاميليا : احمم ل.ل.لا ابدا ع.ع.عادي يعني
معتز : اوكي ... مش يلا عشان ننام
كاميليا : يلا بينا
____________________________________
مر اكتر من اسبوع
وكانت آمنه تقريبا مبتخطلتش بحد خالص علطول قاعده في الاوضه ومشافتش مراد طول الاسبوع دا .... ودا طبعا كان مجنن مراد جدا
وحاول كتير يتكلم مع وفاء ويعرف السبب لكن وفاء مكنتش تعرف هيه كمان
____________________________________
في بيت موسي الشهيدي
كانت خناقه جامده جدا مع كاميليا ودعاء وكان حازم واقف مع دعاء طبعا
دعاء : يعني انتي مكفكيش تموتي الطير لأ دا انتي كمان فصلتي الفريزر وبوظتي كل الطير والخضار اللي مخزنينه لرمضان ... انتي ايه يا شيخه
كاميليا : بقولك ايه صوتك ميعلاش يا بيئه انتي ولما تتكلمي معايا تتكلمي بأسلوب افضل من كدا ... فااااهمه
حازم : يا بجاحتك ياشيخه ... اقسم بالله مشوفتش حد زيك كدا ، قال وانا اللي كنت مفكرك ندمانه ورجعتي تصلحي غلطك ... اتاريكي راجعه تخربي البيت وتدمريه
كاميليا : بصوت عالي. انت انسان قليل الادب ومتربتش
حازم : غضب منها جدا وبرزت عروقه وقرب منها وقال بصوت مخيف. آمنه عاشت معايا 6 سنين متجرأتش ونطقت كلمه زي دي ... حتي لما غلطت في حقها عاتبتني بكل ادب ، وادبها دا قتلني من جوايا ... تيجي انتي يا حتة بتاعه متسويش نكله تعلي صوتك علي حازم الشهيدي وكمان تتجرأي تشتميه
كاميليا : تستاهل لانك غلطان
حازم : بغضب اكبر . مدام في تلك الحالتين غلطان يا مرات اخويا ... يبقي آخد حقي بأيدي ورفع ايده ونزل بالقلم علي وشها
كاميليا : مسكت خدها وقالت بصوت غاضب .. ان ما دفعتك تمن القلم دا غالي يا حازم مبقاش انا
دعاء : بجاحه مشوفتهاش والله
في الوقت دا دخل معتز واول ما كاميليا شافته جريت عليه وفضلت تعيط
معتز : بقلق فيه ايه يا كاميليا .. فيه ايه يا حازم رد عليا انت
كاميليا : اخوك ضربني بالقلم يا معتز ... ضربني وشتمني وبهدلني
معتز : بص لحازم بغضب وقال بتضرب مراتي يا حازم
حازم : واضربك انت كمان ... وعلي صوته اكتر وقال إييبيه كبرت عليا ولا ايه يا معتز
معتز : الحكايه مش كبير ولا صغير .. الحكايه انك محترمتش غياب اخوك تمد ايدك علي مراته ... هيه دي التربيه
حازم : تربيه !! انت ومراتك اللي جايه تخرب بيتنا دي آخر ناس تتكلموا عن التربيه
معتز : عقد حواجبه وقال يعني انا مش متربي يا حازم
حازم : بعصببه وصوت عالي ايوا مش متربي ... انت اناني عايز كل حاجه ليك وتحت امرك .. ماشيلي ورا مراتك وكلامها من غير تفكير ، بدال ما تسال عملت ايه وقالت ايه عشان ضربتها جاي تحاسبني
معتز : بعصبيه اكتر اي كان اللي عملته دا ميدلكش الحق انك تضربها انت ترضي اني امد ايدي علي مراتك
دعاء : لما اكون قليلة الادب زيها كدا يا معتز مد ايدك
معتز : بص لحازم وقال ما ترد
حازم : ايوا .. لما تبقي قلة ادبها عليك ابقي مد ايدك
معتز : تمام كدا ... وراح لدعاء ورفع ايده ونزل بالقلم علي وشها هيه كمان
كاميليا فرحت جدا انها اخيرا قدرت توصل للي بتتمناه
حازم : راح لمعتز ومسكه من هدومه وقال بعصبيه وصوت عالي. انت اتجننت بتمد ايدك علي مراتي ليه
معتز : غلطت في مراتي واللي يغلط في مراتي انسفه
وقامت خناقه كبيره جدا مابين حازم ومعتز وفضلوا يضربوا في بعض
دخل هشام بسرعه وفض ما بينهم وزعق بصوت عالي وقال : إيييه خلاااص .. خلاااااص بقي صوتنا مسمع وفرجه للناس ... فيكم ايه انتو الاتنين. من امته واحنا بنقف قصاد بعض بالشكل دا ... هااه ما تردوا ، فوقوا لنفسكو بقا انتو اخوات
معتز : من النهارده اخويا اللي اسمه حازم مات بالنسبالي خلاص
وقعت الكلمه علي هشام ودعاء وحازم كالصاعقه وبالاخص حازم
اخد معتز كاميليا للاوضه وقفلوا الباب
حازم بص لدعاء بدموع وقال : اطلعي جهزي شنطتك انتي وتالا احنا ملناش مكان هنا خلاص
هشام : هتروح فين يا حازم
حازم : خلاص ... هاخد مراتي وبنتي وهعيش مكان شغلي وسابه ومشي
وقف هشام حزين وهو بيبص عليه ... وبقي يقول لنفسه : للدرجادي مفتكرتش اخوك يا حازم تقولي تعالي معايا مش هينفع اسيبك لوحدك هنا ... يا خساره بجد يا الف خساره وطلع لاوضته هو كمان ودموعه علي خده
____________________________________
في بيت صابر
كانت فتون بتكلم سامح في التليفون وطلع صابر
فتون : بابا !! خير حضرتك طلعت بدري ليه كدا
صابر : اتنهد بتعب وقال مبقاش ليا مزاج أقف في البقاله والله يا بنتي ... الايام كلها بقت تمر شبه بعضها
فتون : بابا انت من يوم ما امونه غابت وانت صحتك في النازل
صابر : نفسي اطمن عليها يا بنتي ... دي بنتي زيها زيكم ، يا عالم عامله ايه
فتون : ان شاء الله هترجع انا حاسه
صابر : أنا مش عاوزها ترجع ... انا عايز اطمن عليها بس ، هعوزها ترجع ليه ولا لمين ... لشوية كلاب مطمرش فيهم محبتها ، واتنهد وقال ربنا يطمني عليها يارب وسابها ودخل لاوضته
فتون : ايوا يا سامح
سامح : للدرجادي عم صابر متعلق بيها اوي كدا
فتون : أكتر مما تتخيل .. كلنا متعلقين بيها وحاسين ان جزء مننا ضايع من وقت ما سابتنا
سامح : ان شاء الله هترجعلكم قريب
فتون : يسمع منك ربنا يا سامح
____________________________________
مرت عدة ايام كمان
وكان مراد مشافش امونه فقرر يطلب من امل تناديه وتقولها انه عايز يتكلم معاها شويه
خرجت آمنه من اوضتها وطلعت للبلكونه وقالت : نعم
مراد : مالك بقالك فتره حابسه نفسك في الاوضه ليه .. حصل حاجه
آمنه : ابدا .. بس كنت بفكر في موضوع مهم بالنسبالي
مراد : طب ممكن افكر معاكي لو حابه وتاخدي رأيي
آمنه : اتنهدت وقالت. انا موافقه اتجوزك
مراد : بفرحه . ا.ا انتي بتتكلمي بجد ... قوليلي انا موافقه عليك يا مراد قولي عشان خاطري
آمنه : ايوا موافقه عليك يا مراد عشان مش عايزه احط نفسي في نفس الموقف اللي اتكرر دا يوم قراية فاتحة أمل
مراد : بزعل . إيه !!! يعني انتي هتوافقي عليا عشان كدا بس ... مش عشان حسيتي باي مشاعر اتجاهي
آمنه سكتت وحطت وشها في الارض
مراد : اتنهد وقال انا آسف يا آمنه بس انا اللي بسحب طلبي دلوقتي بالجواز منك
آمنه : عقدت حواجبها وقالت مش فاهمه
مراد : مش فاهمه ايه ... بقولك بسحب طلبي بالجواز منك ، بس لفتره مؤقته لحد ما انتي تقدري تحددي مشاعرك مني ايه .... مش لمجرد انك حاسه انك غلطتي وعايزه تصلحي غلطتك في حق نفسك
واتنهد وقال : انا صحيح بحبك وبحبك اوي كمان ... لكن انا رجولتي متسمحليش اني ارتبط بيكي لمجرد تصليح غلطه
آمنه : تمام كلامك مفهوم وواضح جدا وعشان كدا انا همشي من هنا .. وارجوك متقوليش مينفعش
مراد : اتنهد وقال معنديش مانع... بس ممكن مش دلوقتي علي الاقل
آمنه : ليه
مراد : انا عندي مأموريه هسافر فيها واحتمال اغيب شويه يعني ممكن شهر ... وكنت محتاجك تفضلي مع اخواتي البنات تونسيهم بس ... ارجوكي ، واوعدك بعدها هشوفلك شقه بعيده عني تقعدي فيها عشان تفكري براحتك من غير اي ضغط مني .... وكمل كلامه بابتسامه وقال : يمكن لما تبعدي تحسي بوجودي وتفتقديني بقا وتقوليلي تعالالي يا مراد وهاتلي رنجه
آمنه : هههههههههه رنجه .... واتنهدت وقالت انت ايه اللي مصبرك عليا يا مراد ... رغم اني مش مديالك اي فرصه تقرب مني فيها ، يعني كان واحد مكانك ممكن يفقد الاكل ويتراجع بسرعه
مراد : لف ضهره وسند علي سور البلكونه وقال اللي بيتراحع دا يبقي مبيحبكيش اصلا .... انا مؤمن بانك لو عايزه حاجه فعلا هتفضلي تحاربي عشانها ونفسك يتقطع عشان توصليلها ودا بالظبط اللي بحاول اعمله معاكي
آمنه : مش خايف تزهق وتمل
مراد : اممم ازهق ممكن وامل جايز برضو ... وكمل كلامه بنعومه اكتر وهو بيبص لعيونها وقال : لكن كل ما هحس اننا همل او هتعب هفتكر عيونك اللي نفسي في مره اتكلم معاكي وأنا باصصلك فيهم اوي ومركز مع كل تعبير منهم بيصدر عن كل كلمه مني ليكي .... سواء كانت حب ، او غزل ، اووو ... عشق
آمنه كانت ساكته ومبتردش
مراد : بنفس نعومته في الكلام . ايه ساكته ليه
آمنه : مستنيه تخلص شوية شغل المسهوكاتيه اللي بتعمله دا .... كلامك حسيت انه قلب معدتي وجابلي حموضه ايه النحنحه الزياده اللي انت فيها دي
مراد : حط ايده علي وشه بتعب وقال ...........
____________________________________
في بيت موسي الشهيدي
كان وصل معتز لبيته ولقي كاميليا قاعده بتعيط
راح عليها بلهفه وقال : مالك يا كوكي مالك يا حببتي
كاميليا : كانت بتهز في راسها وقالت مش قادره اتكلم يا معتز مش قادره
معتز : ضمها لحضنه اوي وقال اتكلمي يا حببتي فيه ايه
كاميليا : بصتله بدموع وقالت هتصدقني
معنز : طبعا يا قلبي ... أحكيلي بس
كاميليا : ب.ب.بصراحه من وقت ما جيت البيت هنا تاني يوم هشام اخوك دخل البيت وكنت انا خارجه بقميص النوم رايحه الحمام ... لقيته بيبصلي من فوق لتحت كانه بيفصص جسمي ، قولت عادي دا عيل صغير واكيد مش في دماغه .... لقيته بعدها بيحاول ينزل البيت قبل ما انت توصل بشويه عشان عرفني اننا بغير هدومي واستناك ، وبيتحجج ويطلب مني اي طلب من تحت وبرضوا بيبقي بيبصلي بنظرات غريبه .... حتي لو انت تلاحظ اننا بقيت بلبس لبس طويل مش زي الاول عشان كدا ..... وكملت كلامها بتمثيل ودموع درامي وقالت و.و.والنهارده لقيته نزل من شويه وحاول ..حاول ........ واترمت في حضنه وعيطت
معتز : ضم قبضة ايده علي بعضها وقال بصوت جاهوري .. هشااااااااااااااااام ، وساب كاميليا وطلع لهشام
كاميليا : اترقصت في مكانها وفضلت تهز في كتفها وتغني وتقول ( طب وانا مالي . طب وانا مالي طيب يا غزاااالي )
عند هشام
كان بيذاكر في اوضته ومنسجم جدا عشان عنده امتحان بعد يومين ودي آخر ماده واخيرا هيعيش مع آمنه
اتفاجئ بمعتز وهو بيدفع الباب برجله ودخل عليه زي التور الهايج
هشام : مالك يابني انت فيه ايه
معتز : مسكه من هدومه وفضل يضرب فيه بالاقلام علي وشه وبالبوكس وهو بيقول : يا خ*** يا وس** آه يا حيوان مطمرش فيك التربيه .. بتبص لمرات اخوك يا ك**
هشام : زقه لبعيد وقال . انت بتقول ايه يا متخلف انت انا هبص لمرات اخويا .. هيه خلاص وساخ*** وصلت لدرجة انها تقول اننا ببص عليها
معتز : هجم عليه تاني ومسكه من هدومه وقال : وهيه هتكدب ليه هاااه ... انت مراهق وتعمل كدا واكتر من كدا كمان ، وهيه اللي كانت بتتعامل معاك كأخ عادي ومفكرتش في وساخ**
هشام : بعصبيه وصوت عالي لااااا دي واضح انها ركبت ودللت يا معتز بيه ... وسحبتك وراها زي الجاموسه بالظبط وبكره تسيبك لما تلف عليك وتوصل لهدفها منك انت كمان
زي ما فرقت بينك وبين آمنه فرقت بينك وبين حازم ودلوقتي جه الدور عليا عشان تغورني من وشها واسيبك ليها تستفرد بيك .. لكن دا بعدها مش هسمح لوساخ** دي توصل لحد عندي ومش همشي يا كاميليا لو حصل إيه
معتز : بصوت عالي . آااااااه يبقي كلامها صح بقي وانت عايز تقعد هنا عشان تبص عليها في الرايحه والجايه ويا عالم تفكيرك الوسخ دا هيوصلك معاها لفين
هشام : بصوت ضعيف ..واضح ان انتو الاتنين لايقين علي بعض ... وتستاهل كل اللي يحصلك منها يا معتز
معتز : مش عايز اشوف وشك هنا يا كل** يلا بره
هشام : دموعه غلبته وقالت بتطردني من بيتي يا معتز
معتز : آه بطردك ... بطردك عشان مش هآمن علي مراتي تعيش مع حيوان زيك وهو يا عالم بيدبرلها في ايه ... ويالعالم ناوي تغت.....
هشام : قطع كلامه ورفع ايده في وشه واتكلم بتغب وقال : بسسس .. بس ما تكملش يا خويا ... انا ماشي ، ماشي وسايبلك الحمل كله ... بس بكره لما تكتشف انك خسرت الكل عشانها وتيجي هيه تكسرك هتندم اوي
مشي معتز وقعد هشام علي السرير وهو بيعيط
____________________________________
في بيت مراد عزام
كان مراد وآمنه واقفين مع بعض بيتكلموا في البلكونه
مراد : انتي دايما قاصفه جبهتي كدا .... مفيش اي رومانسيه
آمنه : رومانسية ايه يابني انت .. احنا مش مراهقين
مراد : إنتي ليه مصممه ان الأحاسيس والمشاعر للمراهقين بس ،نفسي اعرف انتي ليه مش عايزه تسيبي نفسك وتدي لقلبك الفرصه ان هو اللي يتحكم فيكي مش عقلك .... ليه دايما سابقه عقلك
آمنه : اتنهدت بوجع وقالت لو كنت قدمت قلبي في كل حاجه مكنش زماني كدا ... انا دايما قلبي دا مكنتش بستخدمه الا معاهم وبس ، انما مع كل الناس كنت بفكر بعقلي
مراد : وعشان كدا خايفه تفكري بقلبك معايا لاخذلك زيهم
آمنه : هزت كتفها وقالت مش عارفه
مراد : تعرفي انك لما بتكوني هاديه بتبقي مختلفه خالص عن لما تتعصبي
آمنه : بسخريه . انا انبهرت باكتشافك دا .... ما اكيد اي حد وقت عصبيته بيتغير يعني
مراد : ما علينا من قصف الجبهه دي .....ابتسم وقال. طب هقولك عن حاجه ... لو هلخص حكايتي معاكي باغنيه عارفه هختار إيه
آمنه : أبتسمت وقالت إيه
مراد : طلع تليفون وشغل أغنيه لسعد مجرد (الجمال عدي الكلام)
وقال اسمعي يا ستي
شكله مش موضوع بسيط فيه غدر وفيه حوارات
دة انا بسهر بالساعات كل دة بيحصل اوام
حاسس اني كده إبتديت ابقي رومانسي وضعیف
ليه نومي بقي خفيف كنت لما بنام بنام
الجمال عدي الكلام اضحكيلي وتاخدي كام
ادفع العمر اللي جاي بس وتردي السلام
مش بأفور صدقيني حسي بيا كلميني
حتي لو موضوع غريب اللي طالبه تفهميني
انا والله ابن ناس مش بعاكس م الاساس
مراد : سمعتي أنا والله ابن ناس ومش بعاكس هاا
آمنه : ابتسمت وسندت علي سور البلكونه تستمع للباقي
هتقوليلي ده اندفاع يمكن تستغربيني
اوعي تمشي وتسيبيني قبل ما اخلص كلام
انا شوفتك قلبي ضاع ودة اصلا مش طبيعي
في الزحمة لو تضيعي قولي علي قلبي السلام
الجمال عدي الكلام إضحكيلي و تاخدي كام
أدفع العمر الي جاي بس و تردي السلام
مش بافور صدقيني حسي بيا كلميني
حتي لو موضوع غريب الي طالبه تفهميني
أنا والله إبن ناس مش بعاكس م الأساس
آمنه : ابتسمت وقالت. والله انت مجنون
مراد : من زمان ... من اول لحظه شوفتك فيها وانا اتجننت بيكي
حسيت ان جمالك ملهوش وصف... جدعنتك ملهاش وصف ... لون عيونك ملهوش وصف
باختصار انتي خطفتي قلبي من اول نظره وكنت أتمني لو قابلتك من زمان اوي كانت حاجات كتير هتتغير
آمنه : بهدوء. مش يمكن لو كنا اتقابلنا في فرصه غير دي مكنش المجال يبقي مفتوح لينا اننا نعرف بعض زي دلوقتي ...
واتنهدت وقالت : مراد انت ممكن تزهق مني وتمل من محاولاتك انك تقرب مني
مراد : الحاجه الوحيده اللي ممكن تخليني ابعد عنك هيه الموت وبس
آمنه : بعد الشر عليك
مراد : بهدوء . خايفه عليا
آمنه : طبعا خايفه ... انت طوق نجاه بالنسبالي ، لو ضعت يبقي كل حاجه ليها امل جوايا هتضيع
مراد : قرب منها اكتر وقال بهمس . آمنه انا بحبك وصدقيني عمرك ما هتندمي علي اختيارك ليا ... وافقي وخليكي جنبي ، بس تكوني موافقه من قلبك قبل عقلك ... قولتي ايه
آمنه : بهمس . مراد أنا .......
قطع كلامها صوت رنت تليفون مراد بص عليه واستغرب وقال : دا هشام
آمنه : بقلق ه.ه.هشام .. هات أرد عليه بسرعه
اخدت آمنه التليفون وفتحت الخط وقالت : هشام حبيبي عامل ايه
هشام : بدموع وصوت مخنوق . أنا محتاجلك اوي يا آمنه .. قوليلي انتي فين وهجيلك لاني سبت البيت خلاص
آمنه : ليه يا هشام حصل حاجه
هشام : لما اجيلك هحكيلك كل حاجه
آمنه : طب اركب للموقف وانا هجيلك دلوقتي
هشام : تيجي فين وتسيبي امي والاولاد
آمنه : متقلقش يا هشام انا لما اجيلك هفهمك .. يلا مع السلامه
قفلت معاه وبصت لمراد وقالت : لو سمحت يا مراد تعالي نجيب هشام بالعربيه من الموقف دلوقتي
مراد : طب خليكي وانا هنزل اجيبه
آمنه : مينفعش لازم اروح معاك يلا بينا
____________________________________
في بيت فتحي الباز (والد نورا)
كانت نورا قي اوضتها ودخل ليها كمال اخوها
كمال : ممكن ادخل يا نورا
نورا : اتفضل يا كمال
كمال : دخل وقعد جنبها وقال فيه واحد لسه مكلمني اسمه رائد وبيقولي انه شافك في فرح معتز ومعجب بيكي وعايز يجي يتقدملك
نورا : ر.ر.رائد ... م.م.معرفهوش
كمال : أيوا انا سألته وقولتله تعرفها قالي لأ بس هو شافك وسأل عنك حازم وهو اللي اداله رقمي عشان يكلمني ويتفق معايا . ان لو فيه قبول يجي ولو مفيش بلاش وهو منتظر مني مكالمه بكره ابلغه بقرارنا
نورا : ه.ه.هو منين رائد دا
كمال : من القاهره وكان ظابط حربيه سابق بس استقال من شغله عشان والدته كانت خايفه عليه ودلوقتي صاحب هايبر ماركت كبير ... ها قولتي ايه
نورا : هقول ايه في ايه بس يا كمال .. منا معرفوش
كمال : مفيش مشكله عادي ممكن يجي تقعدي معاه مره وصلي استخاره بعدها لو حسيتي انك مرتحاله نعمل خطوبه الاول
نورا : م.م.ماشي اللي تشوفه
كمال : باس جبينها وقال ربنا يسعدك يا حببتي انا هقوم ابلغ امك وافرحها
____________________________________
في بيت موسي الشهيدي
كانت كاميليا مازالت بتمثل انها بتعيط في حضن معتز
معتز : خلاص بقا يا كوكي ... خلاص يا حببتي متزعليش نفسك
كاميليا : خايفه تفكر أننا السبب في تفرقتك انت واخواتك يا زوز وتعتب عليا بعدين
معتز : لا يا قلب زوز عمري ما هعتب عليكي ابدا ... واللي حصل ما بينا انا واخواتي دا رد فعل للي عملوه فيكي
كاميليا : لفت ايدها حوالين وسطه وقالت بحبك اوي يا زوز ربنا يخليك ليا يارب
معتز : ويخليكي ليا يا قلبي ... يلا عشان ننام
____________________________________
في الموقف
كان هشام منتظر وصول آمنه وهو بيعيط
وصلت آمنه ومراد بالعربيه ونزلت منها بسرعه وحضنته وهو عيط في حضنها زي العيل الصغير اللي كان مشتاق لحضن امه
آمنه : مالك بس يا هشام قولي يا حبيبي حصل ايه
هشام : لعبتها صح وفرقت ما بينا يا امونه .. بدأت الاول بيكي وبعدين حازم وانا كان الدور عليا النهارده
آمنه : خرجته من حضنها وقالت تقصد مين يا هشام
هشام : كاميليا يا امونه ... كاميليا لعبت لعبتها علينا كلنا وفرقتنا
مراد : طب تعالي يا هشام بس علي البيت الاول وابقي احكيلنا ايه اللي حصل بالظبط
ركب هشام معاهم ورجعوا للبيت من تاني لكن دخلو شقة ناجي مش شقة مراد
آمنه : احكيلي يا حبيبي حصل ايه بالظبط
بدأ هشام يحكيلها عن كل حاجه حصلت معاهم من وقت ما سابتهم ومشيت وحكالها عن اللي قالته في حقه لمعتز ..... وكان بيعيط وهو بيحكيلها عن ضرب معتز ليه وموقف حازم لما اخد دعاء ومشي من غير ما يقوله تعالي معايا
آمنه : طبطبت عليه وقالت انت خلاص معايا يا حبيبي .... ومحدش هيقدر يجي عليك
هشام : بس انا عندي امتحان بعد بكره هروح ازاي
مراد : انا هوصلك متقلقش
هشام : مسح دموعه وبصلهم باستغراب وقال بس انتو اتجمعتوا مع بعض ازاي
مراد :احمم ط.ط.طب انا هروح الشقه اعمله شوية ساندوتشات واجبله عصير
آمنه هزت راسها بمعني ماشي
هشام : ما تفهميني يا امونه فيه ايه
آمنه : اتنهدت وقالت مراد عايز يتجوزني يا هشام
هشام : ابتسم وقال بجد
آمنه : عقدت حواجبها وقالت انت مش زعلان
هشام : زعلان !! لا طبعا ازعل ازاي بس ... انا كمان هاجي عليكي يا امونه زيهم واحرمك من حقك
آمنه : مكنتش متوقعه انك توافق وتكون مبسوط بالشكل دا ... علي الرغم انه لما كان بيجي عريس وانا عندكو كنت بتشلوحه واخرهم المعلم عطوه
هشام : انتي قولتيها اهو المعلم عطوه ... اساسا عطوه دا اسم بلطجي مش معلم
آمنه : هههههههههه كانت وحشاني خفة دمك يا اتش
هشام : انتي اللي كنتي وحشاني موت ... المهم قوليلي انتي رديتي عليه بالموافقه ولا لأ
آمنه : لأ
هشام : ليه
آمنه : خايفه
هشام : انتي قولتيها يا أمونه ، انا كنت برفضلك اي عريس من البلد لاني كنت بشوف منه انه محتاجك لغرض ليه قبل منك ... يعني باختصار شايفك منفعه ليه
انما مراد بالعكس انا شايفه مناسب ليكي جدا وكمان مش محتاج منك اي حاجه ، يعني لا عنده ارض ولا بهايم ولا حاجه تخليه يطمع فيكي ... دا معناه انه طمعان في قلبك وبس ومحتاج آمنه ، آمنه اللي محدش يعرفها ولا يعرف طيبة قلبها ازاي، آمنه اللي متعوده علي العطاء
انتي محتاجه حد زي مراد يقويكي وتستقوي بيه ... انتي محتاجه لحب مراد في حياتك يا امونه
آمنه : ابتسمت وقالت . كبرت يا هشام .... انا فخوره بيك اوي
هشام : باس جبينها وقال انتي تستاهلي كل خير يا أمونه .. وتستاهلي الراحه بعد كل التعب اللي شوفتيه معانا دا وافقي عليه وعيشي حياتك بقا
آمنه : اتنهدت وقالت مش قبل ما آخد حقي من معتز
في الوقت دا دخل مراد بطبق سندوتشات وعصير وقعدوا كلوا مع بعض
آمنه : أحنا مش هنعرف امك انك جيت ولا هنعرفها اللي حصل دلوقتي
مراد : ليه
آمنه : عشان متزعلش منهم ... احنا نستني لما تخلص امتحانات عادي وهتيجي بالليل عادي وكأنك لسه واصل
هشام : اللي تشوفيه يا امونه ..مدام جنبك خلاص
____________________________________
اشرق صباح يوم جديد
كانت آمنه حكت لنهي وامل وعرفتهم بوجود ضيف لكن محددتش مين
وكانت آمنه جهزت فطار وقالت لنهي : يلا يا نهي أدي الفطار لابيه مراد والضيف اللي معاه عشان يفطروا
نهي : حاضر يا ابله امونه
وشالت نهي الصنيه وراحت علي الشقه وفضلت تخبط وفتحلها هشام
هشام : انتي !!!
نهي : انت !!!
انتظروا المغامرات القادمه ما بين هشام ونهي😉
![بنترست](http://pinterest.com/pin/create/button/?url=https://mahomed1.blogspot.com/2021/09/1112_90.html&media=https://blogger.googleusercontent.com/img/b/R29vZ2xl/AVvXsEg43G_QYbk3v-PnsOHK02UVR02mJfgUvQa8fhpk5Odi3Te-EZR2XRHJs5-er3a2oLSI90ZGp3VTjbuUkKgon6gngfAAnFrSRBV87lnOT2nTccTlw62OjLs_gLurthSQgZ47yxZ5nkglUAvb/w1600/FB_IMG_1631201697040.jpg&description=🌱آمنه🌱 11_12 "عطاء وقسوه" 🌴الفصل الحادي عشر🌴 في بيت موسي الشهيدي كان هشام بيذاكر في اوضته ورن تليفونه وكانت هبه أخت آمنه هشا…){kind=link}
تعليقات
إرسال تعليق