 |
🌹🌹🌹🌹
🌱آمنه🌱 17_18
"عطاء وقسوه"
🌴الفصل السابع عشر والثامن عشر 🌴
في المطعم
كانوا كلهم لسه قاعدين مع بعض منتظرين رجوع آمنه ومراد
صابر : انا بقول نمشي بقا وكفايه كدا
ابراهيم : ما تخلينا شويه يا عم صابر كمان
صابر : يابني انت عارفني انا بحب أنام بدري
هشام : طب إيه رأيكم تيجو تريحو معايا في الشقه عند مراد
سامح : علي صوته وقال بفزع. لاااااااا
الكل بصله باستغراب وسكتوا
سامح : أحمم . أقصد يعني لا طبعا مينفعش هما يريحوا في شقتي القديمه براحتهم
صابر : لا ريحوا نفسكم أنا مش هرتاح الا في بيتي ... يلا يا أولاد قوموا انتو عشان عندكم سفر بكره... مين هيجي معايا
أبراهيم : انا جاي معاك
رائد : وانا كمان هاجي اوصل نورا
نادر : ملوش لزوم يا رائد ... هتروح مع عمي صابر وبدور
نورا : بلاش تيجي مخصوص توصلني وترجع ، انا مش لوحدي يعني
صابر : وأنت هتيجي معانا يا نادر
نادر : ابتسم وقال. لأ انا هبات اليلادي في القاهره عند ناس صحابي
صابر : ع البركه... وقام وقف
فتون : مش عارفه بس يا بابا انت عايز تمشي ليه كدا بس ... وعيونها دمعت وقالت : للدرجادي مش زعلان انك مش هتشوفني تاني
صابر : راح عندها وباس جبينها وقال . متقوليش كدا يا هبله .. انتي واختك مليش غيركم في الدنيا ، وبعدين أنا هشوفك علطول انتو تيجو مره انا آجي مره وهنشوف بعض دايما
فتون : حضنته وعيطت في حضنه وقالت. خلي بالك من نفسك عشان خاطري
صابر : حاول يمسك دموعه وقال. انتي عايزه الناس تتريق عليكي وتقول العروسه مغصوب عليها الجوازه دي ولا ايه. وبص لسامح وقال ما تتكلم يا سامح يابني
سامح : ربنا يخليك ليهم يا عم صابر
هشام : خلاص يا جماعه بقا أنا بقول بلاش سلامات احسن ونمشي من سكات عشان الزعل
أمل : ربنا يسعدكم يا سامح يارب
والكل سلم عليهم وباركلهم .. ومشي سامح وفتون لبيتهم السعيد ، ومشي صابر ونورا وابراهيم وبدور ورجعوا للبلد ، ورجع رائد لبيته
ومشي نادر وهشام ونهي وأمل وسيف وعبدالرحمن وراحوا يتفسحو
____________________________________
في بيت مراد عزام
كانت آمنه ومراد مازالوا قاعدين بيتكلموا مع بعض
آمنه : مزهقتش كلام بقا بقالنا اكتر من ساعتين نتكلم .. انت بتعاقبني ولا إيه
مراد : مش مصدق نفسي أنك قاعده معايا كدا عادي ، لا وايه وبشعرك كمان
وقرب من شعرها ومسكه بأيده وقال : شعرك حلو اوي
آمنه : بدلع. أممم شعري بس
مراد : قرب منها أكتر وقال كل حاجه فيكي تجنن
آمنه : حطت ايدها علي صدره تمنعه وقالت. م.م.مراد عايزه اطلب منك طلب مهم
مراد : اؤمري النهارده
آمنه : ابتسمت وقالت ممكن تأجل اللي انت عايزه دا لحد ما اطمن علي اولادي انهم بقو في حضني
مراد : مسك ايدها وباسها وقال . انتي فاكره دا اللي يهمني منك يا امونه ... مش عارفه ليه أنتي دايما فاهمه دماغي غلط كدا ، والله مقصدش حاجه من قربي ليكي .. أنا أساسا مكنتش احلم أنك تقعدي معايا كدا في يوم
آمنه : قربت منه وسندت راسها علي صدره وقالت : مراد أنا اللي مكنتش احلم في يوم اننا اقعد معاك كدا ، انت كنت عندي حلم جميل اوي ومش مصدقه أنه خلاص اتحقق كدا بسهوله
مراد : بس... إيه يا عنيا ، بسهوله ازاي يعني .. دا انتي طلعتي روحي
آمنه : لفت ايدها حوالين وسطه وقالت بعد الشر عليك يا روحي
مراد : خرجها من حضنه وقال . حببتي انتي واعيه للي بتقوليه دا
آمنه : ابتسمت وقالت إيه يا مراد بقا متحسسنيش أننا كنت وحشه معاك اوي كدا
مراد : بسخريه. حاشا لله دا انتي كنتي بلسم
آمنه : ههههههههههه خلاص والله اوعدك من الليلادي مش هيحصل تاني .. وملست علي خده بحنيه وقالت ومن الليلادي مش هتشوف الا امونه الانثي وبس
مراد : ابتسم وقال طب تسمحيلي بالرقصه دي بقا واحنا لوحدنا كدا
آمنه : معنديش مانع .. وانا اللي هختارلك الاغنيه كمان
واختارت أمنه اغنية عمرة دياب ( صدقني خلاص)
وقفت آمنه ولفت ايدها حوالين رقبته ولف مراد أيده الاتنين حوالين وسطها وبدأو يرقصو
صدقني خلاص من بين الناس
حبيتك وإخترتك ليّ
طول ما أنا وياك قدامي ملاك
خلتني ما غمضشي عينيّ
الله يا سلام في عينيك أحلى كلام
مراد : اتنهد بحب وقال بقا معقول اللي بيحصل دا .. انتي في حضني وبترقصي معايا ، وقرب ايده من خدها وقال : ونظرة الحب اللي في عيونك دي بجد
آمنه : ملست علي شعره بحنيه وقالت . اوعدك قصاد كل لحظه زعلتك فيها ، هعوضك عنها بالحب اللي في قلبي ليك
قرب مني شوية، شوية
قلبي وقلبك سوى يتلاقوا
الدنيا إنت ملتها عليّ
ده الحب اللي ما حدش ذاقه
قرب مني شوية، شوية
قد ما تقدر قرب ثاني
الدنيا إنت ملتها عليّ
وكإنك مخلوق علشاني
مراد : ما تقربي شويه كدا .. أنتي بعيده ليه
آمنه : ضحكت برقه وقالت . أقرب إيه أكتر من كدا يا مراد ما تبطل بقا
مراد : اعذريني الليلادي مش عارف اسيطر علي مشاعري أكتر من كدا بصراحه
آمنه : حضنته وقالت لأ سيطر عشان شخصيتك متتهزش قصادهم
مراد : بسخريه. لا منا هسيطر اوي بعد الحضن دا ... أحيه
يا أرق الناس في عينيك إحساس
بيخذني معاه بنسى الدنيا
ضمني بإيديك لو غالي عليك
ما ضيعشي يا ريت ولا ثانية
الله .. يا سلااااام في عنييييك أحلي كلااااااام
مراد : طب ما انتي بتعرفي تدلعي وترقصي اهو
آمنه : خلاص بقا يا حبيبي بطل تقطيم فيا
مراد : خرجها من حضنه وقال قولتي إيه
آمنه : بدلع. حبيبي
مراد : حضن لحبيبك بقا
آمنه ضحكت واترمت في حضنه تكمل رقص
قرب مني شوية، شوية
قلبي وقلبك سوى يتلاقوا
الدنيا إنت ملتها عليّ
ده الحب اللي ما حدش ذاقه
قرب مني شوية، شوية
قد ما تقدر قرب ثاني
الدنيا…
____________________________________
في الملاهي
طلب الاولاد من نادر وهشام انهم يروحوا الملاهي ويتفسحوا
هشام : خلاص كدا اتفسحتوا وانبسطوا .. وفلستوا امنا انا وعمو نادر ، نروح بقا
نهي : لا انا عايزه أدخل بيت الرعب
أمل : انتي اتجننتي ولا إيه يا نهي
نهي : وفيها ايه بس يا أبله أمل
هشام : بعصبيه. فيه ان بنت زيك مينفعش تدخل لمكان زي دا
نهي : ليه ان شاء الله هتخطف
نادر : لا يا حببتي بس بيحصل حاجات مش لطيفه للبنات
نهي : أحمم. أ.أ.أنا محدش يقدر يعملي حاجه ، وبعدين انا بحب جو المغامره دا
أمل : نهي انا مبتحايلش عليكي .. هيه كلمه واحده لأ يعني لأ
ربعت نهي ايدها علي صدرها ودبدبت في الارض بتذمر طفولي وقالت : طب حد يدخل معايا طيب أنا نفسي ادخل اوي
نادر : ل.ل.لا بصراحه أنا عندي فوبيا من الضلمه والاماكن المغلقه
هشام : اتنهد وقال أمري لله يلا هدخل معاكي .. بس ان صرختي وقولتي انا خايفه هشلفط وشك
نهي : ابتسمت وقالت ماشي
نادر : طب هنقعد في الكافتيريا شويه نستناكم
هشام : ماشي
مشي نادر وأمل والاولاد
هشام : يلا اتفضلي
قطعوا تذكره ودخلو هما الاتنين لبيت الرعب وكل واحد كان قلبه بيدق بخوف ، بس كل واحد فيهم عامل سبع رجاله في بعض ومحسس التاني انه مش خايف
بداو يتمشو ويدخلو لجوه والجو مظلم جدا ويدوب نور خافت
حست نهي بحد بيضربها علي قفاها .. شهقت من الخضه وقالت : يابن الجزمه
هشام : وانتي لسه شوفتي حاجه ياختي .. يلا دا احنا هنشوف يوم اسود النهارده .. اتفضلي امشي
واتمشوا تاني لجوه بس شافو لعبه علي شكل مخيف جدا بتتحرك
نهي : بخوف. ه.ه.هشام يلا نخرج خلاص
هشام : لا دخول الحمام مش زي خروجه كملي يا بطه يلا
نهي : أنت فرحان فيا ولا إيه
هشام : لا خالص بس... وقطع هشام كلامه وبرق لما شافو لعبه شكلها مخيف جدا علي شكل إنسان ميت بتتحرك وجايه عليه
نهي : انت سكت ليه فيه إيه
هشام : أ.أ.أتشاهدي أحنا شكلنا نزلنا الترب وأحنا منعرفش
نهي : ليه يعني فيه... وقطعت كلامها لما شافت اللعبه وصرخت باعلي صوتها
نهي : يالهووووووووووي واستخبت في هشام
هشام : لطم علي وشه وقال بتستخبي فيا لا مسنوده علي حيطه مايله ياختي .. يالهوووووووووي حد يلحقنا يا ناس
نهي : أجري يا هشام والنبي أنا حاسه اني هعملها علي نفسي
هشام : طب كويس أنك لسه ماسكه نفسك لحد دلوقتي ، انا عملتها فعلا
يالهوووووي دي جايه عليناااااااااااااا
نهي : إلحقني يا أبيه مرررراااااااااد
هشام : بصرخه. مراد هاااااايص .. مراد هايص وانا لايص مع اخته يالهووووووي
بصي أنتي امسكي في هدومي وخلينا نجري من ام القبر دا يلا
ومسكت نهي في هدومه وفضلو يجروا لحد ما خرجو بالسلامه
واول ما خرجو لبره وقف هشام يتنفس بصعوبه وبيبص علي نهي لقاها بتعيط
راح عليها وقال : بتعيطي ليه دلوقتي
نهي : الحمد لله أنك كنت معايا يا هشام .. كنت هموت لو انا كنت لوحدي
هشام : وذنب اهلي إيه انا قلبي يوقف من الخوف وانا في عز شبابي كدا هااا....
نهي : بعصبيه وصوت عالي. ما خلاص بقا انت هتذلني
هشام : وكمان ليكي عين تبجحي .. صحيح ما بيطمرش فيكي حاجه
نهي : أنا غلطانه أصلا أننا واقفه بتكلم معاك جتك القرف وسابته ومشيت
____________________________________
في بيت سامح وفتون
وصلو مع بعض في قمة السعاده انهم بقوا مع بعض خلاص
سامح : الف مبروك يا تونه
فتون : الله يبارك فيك يا حبيبي
سامح : شالها ودخل لاوضتهم
فتون : عيب يا سامح كدا لو سمحت
سامح : بتريقه. نزل ايدك تحت
فتون : بالله عليك نزلني بقا
سامح : عيوني ونزلها وباس جبينها
فتون : ممكن تخرج لبره شويه عايزه أغير هدومي
سامح : ضحك بسخريه وقال. اخرج آااااه وماله يا قلبي.... بس بصي ....
قطع كلامه رنت تليفونه استغرب وقال : مين اللي بيتصل دلوقتي
وطلع تليفون وفتح الخط وقال: إيه ... مين اللي عمل كده ......
____________________________________
في الملاهي
وصلت نهي وهشام ليهم والاتنين كانوا وشهم اصفر جدا من الخوف
أمل : مالكم وشكم اصفر ليه كدا
نهي : مفيش يا ابله عادي
نادر : إيه يا هشام فيه حاجه حصلت
هشام : لا مفيش يا نادر ... وكمل كلامه بسخريه وقال : بالعكس أحنا اتبسطنا اوي وكنا شُجاع جدااا
سيف : أنا عايز أنام يا اتش
عبدالرحمن : وانا عايز ماما
أمل : طب هروح التواليت بس قبل ما نمشي
نادر : طب متتاخريش يا حببتي
هشام : بص لنهي وقال . تحبي اجبلك ليمون يفور دمك .. أ.أ.أقصد يروق دمك
نهي : وهو طول ما انت قدامي دمي هيروق
نادر : كتم ضحكته وقال مهزقين آخر حاجه
عند أمل
دخلت أمل الحمام وغسلت وشها ولسه هتخرج حست بحد بيحط حاجه علي بوقها وخدرها ... وخدرها واخدها وخرج من باب تاني
عند نادر
كان قاعد قلقان عليها ان أمل اتاخرت
نادر : وقف وقال أنا هروح اشوفها كدا أتاخرت ليه
نهي : خليك انت وانا هروحلها وسابتهم وراحت عند الحمام ... دورت عليها ملقتهاش لكن لقت شنطتها واقعه علي الارض ، مسكتها وجريت علي نادر وهشام تاني
____________________________________
في بيت مراد عزام
كانوا مازال غرقانين في الحب ومش مصدقين نفسهم انهم اخيرا بقم مع بعض
آمنه : ابتسمت وقالت. أنا بقول كفايه كدا ونرجعلهم بقا
مراد : يا بنتي هما هيجو بنفسهم ، خلاص بقا
آمنه : يا بنتي !! ليه لسه شايفني نونو
مراد : مسك خدها بمشاكسه وقال. وأحلي نونو في الدنيا... أحلي وأجمل امونه
آمنه : أمممم منا خلاص بقا مش هعرف اسكتك من النهارده
مراد : لا لا اسكت إيه يا قلبي.. انا ما صدقت عقدة لسانك اتفكت واتكلمنا تقوليلي اسكت ، بقا ينفع دا
بس تعرفي أنا ....... وسكت لما سمع صوت الباب بيخبط
آمنه : يكونوا خلصو سهرتهم ورجعوا
مراد : طب ادخلي للاوضه عشان نادر وهشام
دخلت آمنه الاوضه وراح مراد يفتح الباب واتفاجئ بسامح وفتون
مراد : عقد حواجبه وقال سامح!! فيه إيه
سامح : اتنهد وقال أنا عرفت مين اللي ضرب عليك نار لما جينا من المهمه
مراد : طب بذمتك دا وقته يعني بالنسبالك
سامح : منتا متتخيلش طلع مين
مراد : مين يعني
سامح : شريف
مراد : بصدمه. إيه !! شريف عزمي صاحبنا
في الوقت دا خرجت آمنه من اوضتها بعد ما غيرت هدومها وقالت : مين شريف دا يا مراد
سامح : مش مهم مين شريف ... المهم دلوقتي أمل ، أمل فيه خطر عليها منه ولازم نحميها
آمنه : شهقت وقالت اتصل بيهم بسرعه يا مراد
فتون : ليه هيه فين
مراد : هما ..... وقطع كلامه لما تليفونه رن وكان نادر ... رد عليه بسرعه وقال : أيواا يا نادر انتو فين
نادر : إلحقني يا مراد أمل اتخطفت من الحمام
مراد : بصوت جاهوري . بتقووول إيه
____________________________________
في مكان ما....
فتحت أمل عيونها وكانت حاسه بصداع جامد ... مسكت دماغها بتعب
شريف : باستفزاز. حمدالله على السلامه ، واخيرا رجعتي لحضني من تاني
أمل : برقت عيونها وقالت ش.ش.شريف
شريف : أيوا شريف ... شريف اللي أنتي بعتيه عشان خاطر عيل ميسواش نكله .... وعلي صوته أكتر وقال: مش كدااا هاااا ، بتبيعيني أنا عشانه ، وأنا كنت قصرت معاكي في إيه ... ولا أنتو كلكو نسوان خاينه وزباله
أمل : كانت بتعيط وقالت. أنا عمري ما خنتك يا شريف أنت اللي كنت شكاك زياده عن اللزوم وغيور لدرجه تخنق ... كان لازم تعرف أن كل شئ ليه حدود وانت تجاوزت كل الحدود
شريف : نزل بمستواه ليها وأتكلم بنبرة تحذير وقال . مش أنا اللي كنتي بتقوليلي مقدرش أستغني عنك يا شريف ... مش أنا اللي كنتي بتقوليبه كل يوم يا سندى ... مش أنا اللي كنتي كل يوم تقوليله وحشني وتعلالي نفسي اشوفك ... مش انا اللي كنتي بتقوليله وحشني حضنك ، طب سيبتي حضني ليه وروحتي لحضن غيري هااا
ومسكها من شعرها جامد وقال : ولا حضنه غناكي عن حضني هااا
أمل : بدموع. اوعي يا شريف بقا انت مريض والله .. انا عمري ما قولت ليك الكلام دا اوعي يا أخي
شريف : وكمان بتكذبي .. ليه نسيتي شقتي وسريرنا اللي كان بيشهد علي حضننا و....
أمل : قطعت كلامه بصرخه وقالت . اخررررس ، انت مجنون والله ما طبيعي .. شقة إيه وسرير إيه يا حيوان انت ... أنت عمرك ما مسكت ايدي اصلا
شريف : ههههههههه عمري ما مسكت إيدك يا أمل .. طيب تعالي بقا في حضني وأنا هوريكي أنها مش اول مره .. وحاول يتهجم عليها
أمل : لااااااااااا... لا يا شريف ابوس ايدك لااااااااا
آاااااااااااااااه يااااااااااارب انجدني منه يارب
في الوقت دا مسك شريف دماغه بتعب شديد وفضل يصرخ من الألم
أمل ضمت رجليها لصدرها وفضلت تعيط بخوف
وشريف كان مازال بيتحرك في الاوضه بسرعه من شدة التعب لدرجة انه كان بيخبط راسه في الحيط
أمل خافت عليه قامت بسرعه وقالت : م.م.مالك يا شريف
شريف : دماااااااااااغي ... دماااغي يا أمل هتنفجر من الصدااااع ، بسرعه ارجوكي اديني الدواااا
أمل : طب هو فين الدوا طيب
شاورلها علي مكانها وجابتهوله بسرعه واخده ، وبعد شويه بدأ يتحسن وفتح عيونه واتفاجئ من أمل ومنظر هدومها المتقطعه
شريف : مين عمل فيكي كدا
أمل : بصتله بصدمه وقالت : نعمم!!
____________________________________
في بيت موسي الشهيدي
عرفت فايزه أن شيماء كذبت عليها وانها حامل في بنت للمره الرابعه ، ودا طبعا بعد ما سمعتها بتتكلم مع السيد وهما بيقولو.....
فلااااااش بااااااااااك
كان السيد واقف مع شيماء في المطبخ وبيتكلموا
السيد : أمي راحت بنفسها السوق النهارده ... دي هتتحسد
شيماء : اتنهدت وقالت . خايفه علي الحمل فقالتلي خليكي انتي وانا هروح أجيب طلبات للبيت... عارف يا سيد اول مره اتمني فعلا اننا اكون حامل في ولد عشان حياتي تفضل حلوه كدا
السيد : خلاص بقا يا شوشو كبري دماغك ، وان كان علي امي فأنا هتصرف معاها بعد ما تولدي وقولتلك لو حصلت نمشي من هنا هنمشي ... اهم حاجه انتي متحمليش هم طول ما انا معاكي
شيماء : ربنا يعديها على خير يارب
باااااااااااااااااك
فايزه : آه يا ناري علي آخر الزمن بقيت بتقرطس ، ومن مين من ابني.... بس لا وحيات غلاوته عندي الحمل دا مهيكمل ابدا وينزل دلوقتي وهو حتة لحمه حمرا احسن ما هموتها انا لما تنزل
وجابت ازازة زيت وكبتها علي السلم وندهت لشيماء بحجة انها محتاجه طلب
نزلت شيماء عشان تشوف حماتها محتاجه إيه ، بس اتزحلقت من الزيت ووقعت علي السلم
شيماء : بتعب. أ.أ.أمااا ألحقيني ياأماااااا
فايزه طبعا كانت سامعه صوت استغاثتها لكن مهتمتش لصوتها وخرجت لبره
____________________________________
في بيت مراد عزام
كلم مراد زمايله في الشرطه واتجهو ناحية الملاهي وجهز نفسه هو وسامح
آمنه : انا جايه معاك
مراد : بعصبيه. جابه معايا فين أنتي كمان هو أنا رايح اتفسح.... أنتي تقعدي هنا لحد ما ارجع
آمنه : لأ مش هقدر أقعد هنا .... انا لازم اجي معاك عايزه اطمن علي أمل
مراد : بصوت عالي. آااااامنه بقولك إيه، انا مش بحايل فيكي هيه كلمه واحده وبس تقعدي هنا ... انتي لو جيتي معايا هبقي مشغول عليكي ، ومش هعرف اركز معاكي ولا مع اولادك ولا مع أمل ونهي ... ابوس إيدك متزوديش الحمل عليا
آمنه : لنفسها. حمل !!! ....... هيه دي الكلمه اللي كنت خايفه منها تقولها في يوم يا مراد وللأسف اتقالت ... بس اتقالت بدري أوي
سامح : متقلقيش يا أم سيف هنطمنكو ان شاء الله أول ما نوصل ليها وهبعت الاولاد مع زمايلي علي هنا ... خلو بالكم من نفسكم ، وقرب من فتون وباس جبينها وقال خلي بالك من نفسك يا حببتي
فتون : حضنته وعيطت وقالت. خلي بالك من نفسك عشاني أنا يا سامح
مراد : هو كمان قرب من آمنه وباس راسها وقال هنرجع بالسلامه ان شاء الله
آمنه : بدموع. يارب
____________________________________
في المكان اللي أمل مخطوفه فيه
فاق شريف من تعبه واتصدم من شكل أمل وهدومها المتقطعه
شريف : مين عمل فيكي كده
أمل : نعم !!
شريف : وقف بلهفه وقال قوليلي مين عمل فيكي كده... ارجوكي طمنيني يا أمل ، ط.ط.طب انتي كويسه
أمل : دموعها نزلت وقالت . ك.ك.كويسه ... أنت صحيح مش عارف مين عمل فيا كده
شريف : بعصبيه. أنتي هتهزري يعني هعرف مين حاول يتهجم عليكي واستعبط .... قوليلي مين دا وانا هقتله
أمل : لنفسها. لأ كدا اتاكدت انك مش طبيعي يا شريف ... انت اكيد مجنون ، سعني ايه مش فاكر اللي حصل، ويعني ايه الكلام اللي قاله دا ، ويعني ايه.... وسكتت لما افتكرته وهو ماسك دماغه وكان تعبان ... ضيقت عيونها بتركيز وبصتله وقالت لنفسها : معقول يكون عندك فصام يا شريف
شريف : مالك يا أمل ساكته ليه... قوليلي بتفكري في ايه
أمل : ش.ش.شريف أ.أ.أنت ... أ.أ.أنت...
شريف : اتكلمي يا أمل أنا إيه
أمل : أنت عندك فصام........
____________________________________
في الملاهي
وصل مراد وسامح وقوه معاهم من الشرطه للملاهي وبدأو في البحث وتفريغ الكاميرات
مراد : يابن الك*** والله لاقتلك يا شريف
سامح : أهدي شويه يا مراد أحناولسه مش متاكدين اذا كان هو اللي عمل كدا ولا لأ
مراد : أهدي ازاي بس يا شريف ... انا هموت وانا في دماغي الف مشهد ومشهد أن الحيوان دا ممكن يتجرأ عليها ويلمسها
نادر : لأ ان شاء الله مفيش حاجه هتحصل وأمل هترجع بالسلامه
مراد : بعصبيه. أنت تخرس خالص .. انا غلطان أننا آمنت أخواتي علي واحد زيك الاقي اختي بس واطمن عليها ومش عايز اشوف وشك تاني فاااااااهم
نادر : لأ مش فاهم ، ومش من حقك تبعدني عنها إلا لما هيه تطلب مني دا ... غير كدا مش هبعد ، انا وأمل مش لعبه في ايدك تنهي حكايتنا باشاره منك
مراد حاول بتهجم عليه لكن سامح منعه
هشام : ما كفايه بقا يا مراد وركز هنبدأ ندور عليها ازاي بدال ما انت طايح فينا كدا
سامح : هشام عنده حق يا مراد... يلا نلحق امل الاول
وشاور سامح للعساكر وامرهم يوصلو هشام ونهي والاولاد للبيت ... واتجه نادر ومراد مع الشرطه للبحث عن امل
____________________________________
في المستشفي
وصلت عائلة راضي الشهيدي مع شيماء وكلهم كانو قلقانين عليها بعد ما نزفت وفايزه اللي كانت بتتصنع الزعل والخوف
راضي : يا ساتر يارب .. حصل ايه يا سيد يا بني
السيد : والله يا أبا معرفش .. امي ندهتلها في طلب واتاخرت تحت ولما نزلت اندهلها لقيتها واقعه علي السلم
فايزه : بحزن مصطنع. يا حببتي يا بنتي ان شاء الله تقوم بالف سلامه
السيد : يارب
وبعد وقت خرج الدكتور من العمليات
السيد : طمني عليها يا دكتور
الدكتور : الحمد لله قدرنا نسيطر علي النزيف .. بس للاسف الجنين نزل
السيد : اتنهد بحزن وقال. الحمد لله علي كل حال ... المهم هيه
الدكتور : لا تمام هيه بخير ... المهم الممرضه هتجبلك الطفل عشان تدفنه لانه اتخلق وكان فيه نفس ، وربنا يعوض عليك
فايزه : بتشفي. طفل ايه بقا يا دكتور ما تقول طفله ، هيه مش بنت برضو
السيد وابراهيم بصوا لبعض وسكتو
الدكتور : لا يا فندم هو طفل .. الجنين اللي نزل كان ولد مش بنت
الكل حلت عليه الصدمه ، والصدمه الاكبر لفايزه
ابراهيم : و.و.ولد ازاي يا دكتور ... هيه كانت عامله سونار وكان واضح انه بنت
الدكتور : وانا هكدب عليكم ليه بس .. ربنا يعوض عليكم بغيره ان شاء الله وسابهم ومشي
راضي : لا حول ولا قوة الا بالله... ربنا يعوض عليك يا ابني
السيد : اتنهد وقال المهم شيماء يا أبا
ابراهيم : ان شاء الله هتقوم بالسلامه .. وبص لفايزه اللي كانت الصدمه مسيطره عليها بشكل مريب وشاكك في امرها!!!!
____________________________________
وصلو الشرطه للمكان اللي امل فيه وبداو يتحركوا بحذر ويحاوطو المكان
كان شريف مستغرب كلام أمل لما قالتله انت عندك فصام
شريف : ي.ي.يعني ايه فصام دا
أمل : يعني عندك شخصيتين يا شريف ... انت قولت كلام علي لساني انا مقولتوش ومحصلش ... وكمان قولت اننا ... احمم ، ودا محصلش
شريف : شاور علي نفسه بصدمه وقال أنا!!! ... ازاي بس أنا ......وقطع كلامه لما سمع صوت ضرب نار بره
أمل : صرخت بعلو صوتها وقالت. إلحقوووووني إلحقني يا مراااااااااااااد إلحقني يا ناااااااااادر
شريف : برزت شخصيته التانيه وبرق عيونه وبقا عنيف في رد فعله وقال. ناااادر ...
ومسك شعرها جامد وطلع سلاحه ووجه علي دماغها وخرج بيها بره وقال : منورين يا بشوات بلاش اي حركه كدا ولا كدا عشان ما تخسرش فيها اختك العزيزه يا مراد
مراد : لاحظ هدوم امل المتقطعه وقال. انت عملت فيها إيه يا ك** يا جبان يا....
شريف : قطع كلامه بحده وقال. لااا كلمه زياده وهتخسر فيها اختك .. مش كفايه أنها خسرت شرفها
نادر : سمع الكلمه دي محسش بنفسه الا وهو بيجري عليه بسرعه وقال يابن الكل***
أمل : بخوف وصوت عالي. لا لا ارجع يا نادر والنبي لا وصرخت بصوت عالي لما شريف ضرب عليه نار وقالت نااااااااااادرررررر.....
🌱آمنه🌱 18
عطاء وقسوه
🌴الفصل الثامن عشر 🌴
في المكان المستهدف
بعد ما سمع نادر جملة شريف انها خسرت شرفها .. مقدرش يقف مكان وجري بسرعه عليه عشان يضربه
لكن شريف وجه سلاحه عليه وحاول يضرب نار عليه.. لكن مراد كان أسرع منه وضرب شريف رصاصه في دراعه وقع علي الارض
الكل اتحرك ناحيتهم وامر مراد الشرطه تقبض علي شريف
أمل : استني يا مراد ... شريف معملش حاجه
الكل وقف باستغراب يبص لامل
مراد : يعني إيه معملش حاجه... اومال هدومك دي إيه وخطفك
أمل : يا مراد افهمني ... شريف عنده فصام ، يعني مريض وليس علي المريض حرج
نادر : انتي تقصدي ان شريف ليه شخصيتين يا امل
أمل : أيوا
سامح : وإيه أكدلك ما ممكن عمل عليكي الفيلم دا عشان ميتعاقبش
أمل : انا هقولكم علي اللي حصل......
____________________________________
بعد وقت طويل
وصل مراد وسامح ونادر وأمل للبيت وكانت آمنه وهشام ونهي في انتظارهم
دخلت أمل لآمنه علطول وحضنتها
آمنه : الحمد لله أنك بخبر يا حببتي وربنا نجاكي
فتون : جريت علي سامح وحضنته وقالت. كنت خايفه عليك اوي... الحمد لله انك رجعتلي بالسلامه
سامح : غمزلها وقال ... رجعت عشان نرجع أمجادنا مع بعضينا بقا
وبص لمراد وقال : أحنا هنستاذن بقا يا مراد
مراد : ماشي يا حبيبي متشكر اوي علي وقفتك جنبي
سامح : عيب يا مراد أحنا اخوات .. يلا اشوفكم بعد اسبوعين بقا وغمزله
مراد : ربنا يهنيكم يا صاحبي
نادر : وانا كمان هستاذن يا مراد
مراد : ممكن تبات في الشقه التانيه مع هشام .. ولا لسه زعلان مني
نادر : لا طبعا يا مراد انت اخويا.. وانا عارف اللي قولته من خوفك عليها بس
هشام : خليك يا نادر الوقت اتاخر
مراد : يلا كلكو ادخلو ريحو كلنا تعبنا النهارده
____________________________________
في بيت موسي الشهيدي
كانت كاميليا ومعتز بيتكلموا مع بعض
كاميليا : هااانت خلاص يا حبيبي .. هانت وكل حاجه هتبقي ليك لوحدك
معتز : تفتكري صح اللي بنفكر فيه دا يا كاميليا
كاميليا : وصح الصح كمان يا زوز... ميبقاش قلبك خفيف اوي كدا
معتز : أنا خايف أكون بخسر كل حاجه ، مش بكسب
كاميليا : بدلع. وحتي لو خسرتهم كلهم يا روحي ... مش كفايه عليك وجودي جنبك
معتز : اتنهد وقال : مش عارف ... آمنه معاها الكل حواليها ومقويها .. وكمان وجود مراد جنبها مقويها أكتر
كاميليا : صحيح بمناسبة سيرة مراد .. انت متأكد انها متجوزاه
معتز : برق عيونه وقال. لا يا كاميليا مش للدرجادي تظلميها
كاميليا : بخبث. لأ طبعا مش قصدي اللي فهمته يا زوز ... انا اقصد يعني ازاي جوزها ، ويوم عزا طنط كانو خارجين كل واحد في ناحيه .. مش واخدها في حضنه وبيواسيها كدا زي اي راجل
معتز : أيوا بس يوم المحكمه كان ايده في أيدها
كاميليا : برضو يوم المحكمه كانت علاقتهم تحسها فيها غموض ، كانهم بيمثلو انهم متجوزين كدا
معتز : اتنهد وقال. خلاص يا كاميليا ملناش دعوه بحد
كاميليا : اوكي يا حبيبي براحتك ، انا بس كنت عايزه انبهك لكارت مهم اوي كان ممكن تلعب بيه
معتز : لا لا ابعدي عن السكك دي
كاميليا : طيب.. انا هقوم آخد شاور
معتز : ماشي
قامت كاميليا للحمام وقام معتز من علي السرير يجبله تيشرت يلبسه .. بس لفت نظره شريط برشام واقع علي الارض
نزل جابه وبص فيه واتفاجئ لما لقاه حبوب منع الحمل !!!!
____________________________________
في بيت مراد عزام
كان مراد واقف في البلكونه وبيفتكر كلام شريف معاه
فلااااااش باااااااك
بعد ما قبضو علي شريف والكل اتجه للقسم .. استدعاه اللواء سالم لمكتبه
مراد : تحت امرك يا فندم
اللواء سالم : اتنهد وقال شريف عايزك في المستشفي
مراد : عايزني في ايه .. اظن مفيش بيني وبينه كلام بعد اللي عمله في اختي دا
اللواء سالم : أنا بكلم دلوقتي مراد الانسان يا مراد ... مش مراد الظابط ، وهو ليه حق عليك تسمعه
مراد : يا فندم دا...
اللواء سالم : اسمعه الاول يامراد واحكم عليه
وبالفعل اتجه مراد للمستشفي وقابل شريف
مراد : خير يا شريف . اللواء سالم بلغني انك عايز تشوفني وتتكلم معايا ... مش شايف انك بجح شويه
شريف : دموعه نزلت وقال. بجح ليه يا مراد ... انا مريض
مراد : ولما انت عارف نفسك مريض بتتقدم لاختي ليه هااا .. وباعت ناس تقتلني كمان
شريف : أنا عمري ما أفكر في قتلك يا مراد
مراد : لا فكرت والناس اللي بعتها اعترفت عليك وعرفوني
شريف : انا اتفقت علي قتل سامح مش انت
مراد : وانا وسامح ايه .. وانت كنت تالتنا ، فرقت نفسك عننا بتصرفاتك الغير محسوبة... طب ليه يا شريف ، وكرهت امل فيك، قولي استفدت ايه بقا
شريف : دموعه نزلت وقال ولا استفدت ولا حاجه بالعكس انا خسرت وخسرت كتير اوي .. اولهم انت وسامح وامل .. وناس كتير من بعدكم
بس اللي شوفته في حياتي صعب يتحكي او يتقال يا مراد ... أنا كنت طفل صغير وشوفت خيانة مرات ابويا ليه ، وكنت بشوفها كل يوم والتاني مع راجل شكل وابويا ميعرفش حاجه ... كانت قدامه ملاك برئ وانا الولد العاصي لاني لما كنت بشوفها كنت بحس اني قرفان منها وكنت دايما متجنبها
لحد ما كبرت وكبرت جوابا نقطة الخيانه ... كنت دايما شايف اني لازم اكون شديد مع مراتي عشان تخاف مني ومتفكرش تعمل كدا
مراد : اتنهد وقال طب ليه مروحتش لدكتور نفسي يا شريف
شريف : كنت هروح لو أمل كانت لسه معايا .. كنت هحس اني بتعالج عشان حد
وبصله بلوم وقال : حتي انت يا صاحب عمري بعتني وسبتني لوحدي وصاحبت سامح
مراد : عايزني اعملك ايه يا شريف بعد ما كنت عايز تلبس اختي قضية آداب ، وانت عارف الدنيا كلها في كفه وأمل ونهي في كفه تانيه لوحدهم
شريف : ابتسم وغمزله وقال طب وأمونه في أنهي كفه يا بوص
مراد : ضحك وقال فيك حيل تهزر ... بس مش معني اني ضحكتلك ابقي مش زعلان منك
شريف : دموعه نزلت وقال. ابقي تعالي زورني انت وسامح ... هما هيحولوني للمستشفي
مراد حضنه وقال : ان شاء الله هتبقي كويس
شريف : مسح دموعه وقال يارب ... بس برضو مقولتليش ، امونه في انهي كفه
مراد رفع ايده يهوشه انه هيضربه وقال : ما تسكت بقا انت كمان يا أخي
وشريف قرب منه وحضنه وقال : سامحني يا بوص
مراد : مسامحك يا شريف .. ربنا يشفيك يارب
بااااااااااااااااااااك
فاق مراد من تفكيره علي صوت آمنه وهيه بتنادي عليه
مراد : مسح دموعه وقال أيوا يا حببتي
آمنه : اتنهدت وقالت انا...أنا....
مراد : أتكلمي يا حببتي أنتي إيه
آمنه : أنا همشي بكره الصبح انا والاولاد وهشام
مراد : سمعيني تاني كدا!!!
____________________________________
في بيت موسي الشهيدي
اتفاجئ معتز بالشريط وكان ماسكه وقاعد علي الكنبه مستني خروج كاميليا من الحمام
خرجت كاميليا وهيه بتغني ولقت معتز قاعد وساند راسه علي أيده
كاميليا : مالك يا زوز قاعد ليه كدا
معتز بصلها بغضب وسكت
كاميليا : قعدت جنبه وقالت . مالك يا معتز فيه إيه
معتز رفع الشرط وخلاها تشوفه
كاميليا : شافت الشريط بلعت ريقها بصعوبه وقالت إ.إ.إيه ده
معتز : يعني مش عارفه ايه دا
كاميليا : وأنا هعرف .....
فاجأها معتز بمسكة شعرها جامد وشدها منه وقال : بقا مش عايزه تخلفي مني يا زباله با واطيه
كاميليا : آااااااه شعري يا معتز سيبني بقاااااا
معتز : بغضب.اسيبك !! دا انتي بتحلمي اننا اسيبك .... بقا انتي حتة بت زيك تلعب بيا انا ... أنااا معتز الشهيدي يا كل*** تلعبي بيا وتخليني دلول وراكي وبسببك أخسر أهلي وكل الناس ليه ... وعلي صوته اكتر وقال : ليييييييه ليه عملتي فيا كدا يا كاميليا ليه
وشدها من شعرها جامد ووقعها في الارض وقال : انطقي ليه مش عايزه تخلفي مني يا بنت سمير .. ايه مشرفكيش انتي ولامك الحربايه
كاميليا : سيب شعري يا حيوان ، وديني لاندمك ندم عمرك علي اللي بتعمله دا آااااااااه
معتز : بصوت عالي وغضب. الندم دا انتي اللي هتعرفيه يا وس*** وهتعرفيه علي ايدي ... عشان بعد كدا لما تفكري تلعبي بديلك مع اي حد ، تفتكري علقتي دي كويس
ردي عليا وقوليلي بتاخدي الحبوب لييييييه
كاميليا : بصتله بسخريه وقالت. عشان معنديش استعداد اخلف من واحد فلاح زيك .. مهما كانت وظيفته ومكانته فأصله الفلاح برضو هيغلب عليه . أصله واطي
معتز : برق عيونه وغضب من كلامها ليه وسخريتها منه قرب منها ببطئ وقال. أنااااا فلااااااح واصلي واطي يابنت صاااااافي
ومحسش بنفسه الا وهو نازل فيها ضرب في كل حته في جسمها
علي وشها بالاقلام ، ويشد في شعرها كانه بيقلعه في أيده ، وبالبوكس في بطنها ، ويضربها برجله
كل حته فيه كانت بتضربها ، كانه بياخد حق كل واحد ظلمه بسببها... وكاميليا كانت بتتكلم وبتترجاه يسامحها وبسيبها ويبطل ضرب فيها
لكن هو زي الاسد المجروح مش حاسس بحد وفضل يضرب فيها لحد ما وقعت علي الارض مغمي عليها
____________________________________
في بيت مراد عزام
اتفاجئ مراد من كلام آمنه ليه انها عايزه تمشي
مراد : سمعيني تاني كدا !!
آمنه : بقولك هنمشي
مراد : تروحو فين
آمنه : لفت وادته ضهرها وقالت ملكش دعوه
مراد لفها ليه بعصبيه وقال : لما ابقي بتكلم معاكي متدينيش ضهرك فااااهمه
آمنه : زقت أيده وقالت لأ مش فاهمه ومش عايزه افهم ولا عايزه أعرف منك حاجه ... انت عايز مني ايه يا اخي ما تسيبني في حالي بقا
مراد : بهدوء.اسيبك في حالك !!! وهو حالي وحالك ايه يا أمونه
آمنه : اتنهدت وقالت. لأ حالنا مش واحد يا مراد ... لاني باختصار مش لوحدي ، انا متعلق في رقابتي 3 سيف وعبدالرحمن وهشام
مراد : كلهم علي راسي قبل منك ... ليه زعلانه كدا ، انا قولت ايه يخليكي تزعلي
آمنه : دموعها نزلت وقالت قولت اللي قولته يا مراد ... ارجوك سيبني في حالي بقا ، انا والله ما ناقصه كلمه زياده من حد مهما كان
مراد : طب اهدي بس شويه ... وفهميني انا قولت ايه مزعلك مني كدا
آمنه رفعت عيونها وقالت : مقولتش يا مراد تصبح على خير ، ولسه هتمشي......
مراد شدها عليه بسرعه وكانت في حضنه وقريبه منه اوي ... قرب ايده ومسح دموعها بحنيه وباس جبينها وقال : مش هضغط عليكي دلوقتي عشان اعرف مالك ... بس مش من حقك تسيبي البيت دا ... دا بيتك يا آمنه قبل ما يكون بيتي ، ومينفعش تمشي وتسيبيه
وثانيا .. حرام انك تمشي من غير اذن جوزك ، وسابها وربع ايده علي صدره باستفزاز وقال: اللي هو انا وضحك
آمنه : مشوفتش في برودك يا اخي وسابته ومشيت
مراد : نده عليه وقال امونه
آمنه مردتش عليه ودخلت لاوضتها بس قبل ما تقفل الباب كانت رجل مراد وقفتها ودخل وراها
مراد : باستفزاز. لما جوزك يندهلك تردي عليه ماشي
آمنه : بتحذير. اوعي تفتكر ان عشان حبيتك يا مراد تقدر تتحكم فيا وتخلي امونه حتة عجين في ايدك سهل تشكيلها ... انا زي ما خليت قلبي ينبضلك ، ممكن اشيله من بين ضلوعي وادوس عليه عشان يبطل ينبضلك
مراد ربع ايده علي صدره باستفزاز وقال : والله ... طب طلعيه كدا وقوليلي ادوس عليه ازاي عشان اتعلم منك
آمنه : باااااااااارد
مراد زقها للحيط وحاوطها بدراعه واتكلم ببرود وقال : تؤ تؤ تؤ مش عيب برضو ست تقول لجوزها بااارد ....
وكمل كلامه بلؤم وقال : أنا ممكن اعاقبك حالا علي الكلمه دي وبص في عيونها بحب واتكلم بهدوء وقال : تحبي اعاقبك
آمنه : زقته من صدره وادته ضهرها وفضلت تعيط
مراد : اتنهد ورا عندها وحضنها من ضهرها وباس خدها وقال : أنا آسف يا حببتي أني غلست عليكي
آمنه : أطلع بره يا مراد لو سمحت
مراد : مش هطلع الا لما تجيبي بوسه وتقوليلي صالحتك يا حبيبي
آمنه : زقته بعنف واتكلمت بدموع وصرخه وقالت. قولتلك اطلع بره يا اخي ، امشي اطلع بره وسيبني في حالي يارتني ما شوفتك ولا حبيتك ... ياريتني ما قابلتك يا مراد ، ياريت حاجات كتير اوي مكانتش حصلت
انا ندمانه اني حبيتك ... وعلت صوتها اكتر وقالت : بررررررره
____________________________________
بعد مرور أسبوع
كانت كاميليا في المستشفي ومعاها صافي وسمير ودخلهم معتز
صافي اول ما شافته قامت بسرعه وقال : جاي ليه هنا يا همجي يا حيوان يا ....
معتز : قطع كلامها بحده وقال. شششش صووووتك ... انتي بتتكلمي مع عيل سيس زي جوزك ولا ايه ، لا اصحي انا معتز الشهيدي وكيل نيابه ... يعني لو متلمتيش ولميتي لسانك الحلو دا هلبسك قضيه وانا ليا حبايبي كتير والف مين يتمني يخدمني فيكو
سمير : خاف من كلام معتز واسلوبه الجديد وقال . احمم.. ب.ب.بص يا معتز يابني زي ما دخلنا بالمعروف نخرج بالمعروف
معتز : انتو مش عايزين تخرجو بالمعروف .. انتو عايزين تخرجو بكل حاجه ، بس دا بعدكو
كاميليا : بدموع . طلقني يا معتز
معتز : باستفزاز . تؤ مش هطلقك
صافي : يعني ايه هتسيبها علي ذمتك بالعافيه
معتز : رفع صباعه بتحذير وقال تتكلمي معايا بصوت واطي احسنلك ...وكمل كلامه وقال : وانتي مفكراني هموت عليها ، بلا نيله تغور من وشكم ام حربايه واب دلدول
سمير : ل.ل.لاحظ أنك بتغلط
معتز : الغلط لسه هيجي بعدين لو متلمتوش ولميتو بنتكم ...وقرب من كاميليا وقال : أنا ممكن ألبسك القضيه اللي تعجبني، بس تؤ انتي مهما كان غلطت عمري وكنتي علي ذمتي وهيقولوا حرم معتز الشهيدي سابقا سوابق ... ومرضهاش علي نفسي
عشان كدا بخيرك ... تمن حريتك وطلاقك مني قصاد انك تتنازلي عن كل حقوقك ... ها قولتي ايه
كاميليا : ولو رفضت
معتز : ههههههههه عارفك كلبة فلوس زي اهلك ، بس دا اللي عندي يا اما هتلجأي للخلع وبرضو هتخسري كل حاجه ومش بس كدا دا انتي هتدفعيلي المهر كمان ههههههههه
سمير : و.و.وانت هترضاها علي نفسك تبقي وكيل نيابه كبير وتبقي مخلوع
معتز : بصله ووقفت وحط ايده في جيوبه وقال ببرود : آه هرضاها عادي
صافي : بس البنت كدا هتطلع من غير حاجه خالص من جوازتها منك
معتز : كفايه حريتها ولا حرية بنتكو عندكم مش كفايه
صافي : لأ مش.....
سمير : قطع كلامهاا وقال ل.ل.لا كفايه ... كفايه اوي يا معتز بيه
معتز : برافو عليك حسبتها صح انت يا سمير
كاميليا : سمير !! لو سمحت مش معني اللي حصل دا انك متحترمش اهلي
معتز : بصلها وقال احترم اهلك !! مش لما اهلك يبقو محترمين .... وكمل كلامه بلؤم وقال : ولا آااااااه تقصدي عشان قولت لابوكي يا سمير ، دا انا كدا بحترمه واسأليه كمان ، وبص لسمير وقال ولا ايه
سمير : خ.خ.خلاص يا معتز اتفضل انت مع السلامه ولما تخرج كاميليا هنتقابل عشان نحدد يوم الطلاق
معتز : بس انجزوا ... ومن غير سلام وسابهم ومشي
صافي : فلاح بصحيح
كاميليا : انت صحيح هتتنازله عن كل حقوقي يا بابي
سمير : احمدي ربنا انها هتيجي علي قد انك هتتنازلي هن حقوقك ... حد غيره يلبسك قضيه
صافي : ليه مفيش قانون
سمير : هو القانون يا صافي ... معتز القانون
____________________________________
في بيت راضي الشهيدي
كانت شيماء اتحسنت خلاص ومصممه تاخد بناتها وتمشي
السيد : طب انتي عايزه تمشي ليه بس يا شيماء
شيماء : معلش يا سيد انا عايزه ارتاح شويه ... هروح اقعد عند امي ولما احس اني ارتحت هرجع
ابراهيم : سيبها براحتها يا سيد ... غالبا الحاله دي بتيجي للستات بعد الولاده او اثناء الحمل او بعد التسقيط
السيد : حالة ايه دي .. بيهجو من مكانهم يعني
ابراهيم : يهجو ايه بس ... لأ دي بتبقي حالة اكتئاب ، اعذرها اللي حصلها مش سهل برضو
السيد : عارف والله ومش بأيدي حاجه اعملها
ابراهيم : سيبها ترتاح يومين عند امها وخد بناتك ومراتك واطلعوا يومين في اي مكان تتفسحو فيه
السيد : فكره حلوه والله .. هقولها كدا يمكن متمشيش
ابراهيم : لأ سيبها تمشي ترتاح وانت خدها من عند امها اعملهالها مفاجأه
السيد : ابتسم وقال والله عفارم عليك ياولا
شيماء : جت عليهم وقالت يلا يا سيد هتوصلني
السيد : اه هوصلك يلا
واخد شيما ومشيوا ونزل ابراهيم لامه
فايزه : مشيت
ابراهيم : آه مشيت .. مشيت خوف انك تقتلي واحده البنات المره الجابه
فايزه : بتقول ايه يا ابراهيم
ابراهيم : بقولك اللي عارفه وساكت عليه يا أما...بقولك اللي لو اتعرف هتبقي مصيبه
فايزه : أ.أ.أنا معملتش فيها حاجه
ابراهيم : ضحك بسخريه وقال لأ عملتي ، وربنا حب يخلف ظنك ويعيشك تعيسه عمرك كله علي الغلطه دي .. فبدلهولك بولد سبحان الله ونزله ، نزله عشان تتحسري عمرك كله ياأما....اوعي تفتكري ان شيماء مش عارفه ولا مش فاهمه ، لأ شيماء عارفه كويس اوي انك انتي اللي كبيتي الزيت علي السلم عشان تنزل وتقع وتسقط ... بس سكتت عشان المشاكل ياأما
في الوقت دا دخل السيد وهو مش مصدق اللي سمعه ومصدوم من امه وقال : ب.ب.بتقول ايه يا ابراهيم ... أمي آني اللي عملت كدا ، وقعت مراتي عشان تسقطها
وبص لفايزه وقال: طب ليه يا أما... كل دا عشان عرفتي انها بنت .. سبحان الله اتبدل لولد مش عارف ازاي ، بس دا يمكن عشان يعيشك بحصرتك عمرك كله ... ومش هتتحصري علي ابني اللي راح وبس يا اما لأ... انتي هتتحصري عليا أنا كمان لاني همشي من هنا ومش هتشوفي وشي تاني
فايزه : لا يا سيد يابني .. استني والنبي أ.أ.أنا عارفه اني غلطانه ، ومش عارفه والله عملت كدا ازاي ... بس شيطاني عماني يابني
السيد : دموعه نزلت وقال انتي اللي خسرتيني بعمايلك مع مراتي دي ياأما ... وهيه بنت اصول والله انها عارفه وساكته ، وعشان كدا هحمل جميلها فوق راسي وهعيشها ملكه ... بس وانا بعيد
فايزه : أنت كمان هتمشي يا سيد
السيد : انتي اللي حكمتي عليا بكده ياأما وسابها ومشي
ابراهيم بصلها بحزن وسابها وطلع لاوضته
____________________________________
في بيت مراد عزام
كانت آمنه في اوضتها حابسه نفسها ومبتخرجش منها ابدا
أمل : ايه اللي حصل بينكم يا مراد مخليها زعلانه كدا منك
مراد : اتنهد وقال والله معرف مالها ... ممكن اقول قولت كلمه مزعلاها وانا مش عارف
أمل : طب ادخلها يا حبيبي هديها وطمنها بكلمتين ... وحسسها انك جنبها ، وصالحها
مراد : كل ما ادخلها بتزيد في العياط اكتر .. انا مش عارف بس حظي نحس ليه كدا ، يكونشي دوست علي ديل قطه وانا صغير
أمل : ليه يا مراد بتقول كدا
مراد : تعرفي يوم ما اتخطفتي ، عشت لحظه معاها كانت من اسعد لحظات حياتي كلها .. عمري ما هعيش ولا عشت زيها
واتنهد بحب وقال : أخيرا اعترفتلي بحبها ليا يا أمل
أمل : بفرحه. بجد يا مراد يعني امونه بتحبك
مراد : بتحبني من اول لحظه زي ما أنا حبيتها من اول لحظه ... قلبي وقلبها نبضو لبعض في نفس اللحظه يا امل
أمل : ابتسمت بسعاده. وقالت انا فرحنالك اوي يا مراد ... لاني بصراحه كنت خايفه في الاول تكون اتجوزتك عشان تتحامي لكن بعد كدا كنت بحس منها الحب ، بس برضو مكنش بيبان عليها ابدا
مراد : ابتسم وقال. كان عندها قوة ثبات نفسي رهيبه ، تتحسد عليها بصراحه .... انا ياللي ظابط اهو ومكنش عندي ربعها
أمل : ههههههه طب يلا ادخل اتكلم مع مراتك وصالحها
مراد : هز كتافه وقال هحاول
ودخل لآمنه الاوضه وكانت قاعده علي السرير بتعيط وضامه رجليها لصدرها
مراد : اتنهد وقعد جنبها وقال.وبعدين في حالك دا يا حببتي ... مش هتقوليلي مالك بقا
آمنه : اطلع بره يا مراد وسيبني في حالي
مراد اتنهد بحزن وطلع تليفون وشغل اغنية بهاء سلطان (أنا زعلتك في حاجه)
أنا زعلتك في حاجه .. طب ايه يا حبيبي هيه
بداري عينك ليه .. لما بتيجي في عنيا
وحكايتك بس ايه .. فيك حاجه مش عاديه
قولي يا حبيبي حاجه .. متصعبهاش عليا
آمنه : بزهق. يوووووه بطل شغل المراهقين دا واطلع بقا
مراد : غني مع الاغنيه وقال
أنا مصمم مش ماشي قبل ما تتكلم
مقدرش اسيبك تتالم... ساكت يا حبيبي لييه
انا ضايقتك ... طب قولت حاجه متتقالشِ مش ماشي ولا سايبك تمشي ... قبل ما افهم فيه إيه
آمنه دورت وشها الناحيه التانيه وهيه بتعيط
قولي حبيبي الصراحه .. ومشاعرك ليا سيبها
الدمعه اللي في عيونك.. عرفني ايه سببها
عينك في عنيا لكن... حاسس بمسافه بينا
دي حاجات غاليه علينا.. بتضيع يا حبيبي منا
وقام مراد للناحيه التانيه ناحيتها وقال
عايز تعاتبني عاتب .. طب ليه عمال تفكر
مهو دا الوقت المناسب .. قبل الاحزان ما تكبر
يا حبيبي سايبني ليه.. عايش في الحيره ديه
وان كانت غلطه مني .. يبقي حقك عليا
مراد : اتنهد وقال. انا مش عارف والله انا غلطت في إيه بس عموما حقك عليا يا امونه
آمنه : هزت راسها بمعني لأ وقالت أنت جرحتني بكلمتك دي
مراد : حاول يستدرجها في الكلام وقال. كنت غبي والله لما قولتها ، ومكنتش اقصد المعني اللي فهمتيه
آمنه : تقوم تقولي حمل .. انا حمل عليك يا مراد
مراد فكر في الكلمه دي قالها امته وافتكر الموقف اخيرا ... اتنفس براحه واتنهد وقال بابتسامه : وأجمل حمل عليا يا أمونه
آمنه : حاولت تداري ابتسامتها وقالت مش هتعرف تثبتني .. انا لسه زعلانه منك
مراد : راح وقعد جنبها وحاوطها بدراعه وقال. انا مثبتك من زمان هتنكري
آمنه : هتخليني اندم اني قولتلك
مراد : خلاص بقا يا روح قلبي وباس ايدها وقال حقك عليا
آمنه : ان اتقالت منك تاني هسيبلك البيت بجد
مراد : هههههههههه انتي مكنتيش هتمشي المرادي اصلا صح
آمنه : ابتسمت وقالت . عرفت ازاي
مراد : لفها ليه ومسح دموعها وقال. عشان شخصية أمونه اللي ظهرتلي لما اعترفت بحبها كانت هيه اللي بتتكلم معايا ، وكانها كانت بتحاول ترجع شخصيتك القديمه .. شخصيتك اللي حاولتي تفرضيها علي نفسك
آمنه : مسكت وشه بأيدها الاتنين وقالت . أنا مش عارفه اصلا لو انت كنت وافقت وقولت ماشي كنت هعمل ايه
مراد : رجع شعرها لورا وقال . اممم ... طب تتخيلي مكنتش مسكت فيكي كنتي هتعملي ايه بقا
آمنه : اترمت في حضنه وقالت مش عايزه افكر عشان مش متخيله اني ابعد عنك واسيبك ... مراد انت بقيت بالنسبالي كل حاجه و.....
وبصتله بخوف وقالت : انت قلبك بيدق بسرعه ليه كدا .. انت كويس ؟
مراد : اخد نفس عميق وقام وقف وقال. أ.أ.أنا هخرج بره استناكي
آمنه : هههههههههههههههه .... بتتكسف
مراد : بتضحكي ... بس عموما هانت خلاص والجلسه معادها الاسبوع الجاي وهيتحكم لينا .. وابقي وريني شطارتك بقا
آمنه : ههههههههههههه
مراد : ضحك علي ضحكتها وقال انا خارج عشان متهورش بعد الضحكه دي
____________________________________
مر اسبوع كمان
وكانت معاد الجلسه لنطق حكم المحكمه .. وقرارها الاولاد يكونوا مع مين
وكالعاده الكل حوالين آمنه ومعاها وبيواسوها ...لكن اللي استغربوه هو عدم وجود معتز او كاميليا
آمنه : مراد
مراد : ايوا يا حببتي
آمنه : غريبه ان معتز مجاش... تفتكر يكون فيه حاجه ، او بيخططوا لحاجه
مراد : اتنهد وقال اطمني يا حببتي ان شاء الله خير وكل حاجه هتعدي زي ما بنتمني
حازم : كلنا معاكي يا امونه متقلقيش
هشام : انا متفاءل خير باذن الله
في الوقت دا دخلت المحكمه وبدا القاضي يتكلم عشان ينطق ..
بس كلهم التفتو لصوت معتز وهو بيقول : لحظه واحده يا سيادة القاضي بعد اذنك
الكل انتبه لمعتز ولكلامه ومنتظرين كلامه
القاضي : اتفضل عايز إيه
معتز : أنا جاي اسحب الدعوه .......
![بنترست](http://pinterest.com/pin/create/button/?url=https://mahomed1.blogspot.com/2021/09/1718_18.html&media=https://blogger.googleusercontent.com/img/b/R29vZ2xl/AVvXsEh4gJ3IP0xVuDPxioYWGNebvqcYpumIIqYZYCiPHWEWiskISNZBB4Q27wMRPwR2PebK-8QdYtKFCeoMb2KRPI1SsxigHyMa8ENkxVuBxv9H4UfYzglenmay35YYVpKZl8jnqTjcFTgLq4ww/w1600/FB_IMG_1631201697040.jpg&description=🌹🌹🌹🌹 🌱آمنه🌱 17_18 "عطاء وقسوه" 🌴الفصل السابع عشر والثامن عشر 🌴 في المطعم كانوا كلهم لسه قاعدين مع بعض منتظرين رجوع آمنه و…){kind=link}
تعليقات
إرسال تعليق