رواية رحيل العاصي الفصل السابع وعشرون والثامن وعشرون للكاتبة ميار خالد حصريه
رواية رحيل العاصي الفصل السابع وعشرون والثامن وعشرون للكاتبة ميار خالد حصريه
وفجأة وعاصي ينحني بسيارته اتجاه اليمين وعندما دخل إلى الشارع الذي يقع بيته في نهايته، ظهرت ليلى أمامه ورحيل تركض خلفها وفي تلك اللحظة توقفت رحيل مكانها ووضعت يدها على قلبها بتعب وظلت تتنفس بصعوبة وتتعرق بشدة، نظر لها بصدمة ووقع الهاتف من يده وقد فقد عاصي قدرته على التحكم في السيارة فنظرت ليلى للسيارة القادمة نحوها والتي قد أصبحت أمامها مباشرة بخوف ثم أغمضت عينيها..
وفي أخر لحظة توقفت السيارة ولكنه لم يتمكن من تفادي ليلى فاصطدمت بالسيارة ليس بقوة ولكن تلك الصدمة كانت كفيلة لتُظهر جرح طويل في جبينها!!
فتحت الطفلة عيونها برعب وألم ووقتها ركضت سلمى بسرعه واخذتها في أحضانها، ظل عاصي ينظر أمامه بصدمة لا يعرف ما الذي حدث قبل لحظات ومن هول صدمته لم يستوعب أن من تقف أمامه الآن هي نفسها سلمى التي كسرت كلمته وعادت إلى مصر بدون أذنه، ترجل عاصي من السيارة واتجه إلى ليلى بسرعه وقال بقلق:
- أنتِ كويسة فيكي حاجه
وظل يتفحصها بهلع، حتى وقع بصره على الجرح الطويل الموجود في جبينها، كانت ليلى تغمض عيونها بتعب وتفتحها وكأنها تُبدي مقدمات أنها سوف تفقد وعيها، نظر لها عاصي برعب وحملتها سلمى بين يديها ثم قالت:
- لازم ناخدها المستشفى!!
وفي تلك اللحظة انتبه عاصي لسلمى الواقفة أمامه فقال بغضب:
- أنتِ!!
وقبل أن يتكلم صاحت رحيل:
- عاصي..
نظر لها الآخر بعيون غاضبه ولكن هذا الغضب اختفى وحل محله القلق عندما وجدها بتلك الحالة، تضع يدها على قلبها بتعب وألم، ووجهها المتعرق بشدة وعيونها الجاحظة والتي مالت للاحمرار، وانفاسها الغير منتظمة بالمرة وكأنها تنازع حتى يصل الأكسجين إلى صدرها..
نظرت له رحيل وقالت بتعب شديد:
- قلبي ..
ثم نظرت له بعدم تركيز واغمضت عينيها وسقطت مغشياً عليها فامسكها الآخر بقلق، ضربها على وجنتها بخفه وردد بقلق:
- رحيل ردي عليا أنتِ سمعاني
ولكن بدون فائدة..
نظر عاصي لرحيل الواقعة بين يديه ولليلى التي قد فقدت وعيها هي أيضًا بين يدين سلمى ثم نظر إلى السماء وكأنه يناجي ربه أن يلهمه الصبر والقوة لكل هذا، حملها بين يديه بسرعه واتجه إلى السيارة فتحركت سلمى وفتحت له الباب الخلفي وجلست هي وليلى على يدها وأخذت رحيل في احضانها هي أيضًا، واستقل عاصي السيارة بسرعه واتجه بهم إلى أقرب مستشفى..
وبعد ساعات..
وصل بدر إلى المستشفى لأن عاصي قد أخبره وبمجرد استقرار حالة رحيل حتى لا يقلق، تحرك بدر في المستشفى بقلق حتى وجد عاصي أمام إحدى الغرف ويجلس على أحد المقاعد ويضع رأسه بين يديه بتعب، قال بدر بقلق:
- حصل إيه بنتي مالها!!
قال عاصي بحزن:
- حالتها بتسوء لازم تعمل العملية في أسرع وقت، النهاردة كان بينها وبين الموت خطوة بس
ترقرقت الدموع في عيون بدر رغماً عنه وقال:
- لما تعمل العملية هتكون كويسة صح وهتعيش عمر طويل
- هتكون كويسة بأذن الله وتعيش عمر طويل أكتر مني ومنك بس لازم تقنعها أنها توافق على العملية ..
مسح بدر دموعه وقال:
- ينفع أدخل اطمن عليها صح ؟
- أيوة بس بلاش تتعبها
ربّت بدر على كتفه ثم دلف إلى الغرفة حتى يطمئن على رحيل، كان بدر جيش أبنة أخيه الوحيد، أو بمعني أصح ابنته لأنه يعتبر تلك الفتاة هي قطعه من روحه، قطعه إذا شعرت بألم بسيط يشعر هو بأضعافه، وهذا يجعلنا ننتبه أنه في بعض الأحيان يكون رابط الدم قوي جدًّا لهذه الدرجة، دلف بدر إلى رحيل وتحرك عاصي باتجاه سلمى التي كانت تقف أمام الغرفة الموجودة بها ليلى والتي قد إستعادة وعيها ولكنها ترتاح قليلاً من أثر الصدمة، ثم نظر لها بقسوة ففهمت الأخرى واتجهت إليه، قال عاصي بغضب مكتوم:
- ممكن أفهم أنتِ بتعملي إيه هنا ليه رجعتي مصر من غير ما تقوليلي
قالت سلمى بعِناد:
- عشان مكنتش هتوافق أني ارجع
- وهو أنا حابسك يا سلمى!! أنا مش فاهمك بجد عايشه هناك أحسن عيشة ومش محتاجه تشتغلي ببعتلك فلوس ومكفياكِ وزيادة مش فاهمك بجد ليه كل ده لو حد متضرر في كل ده فهو أختي مريم!!
- وهو ده السبب اللي رجعني، أنا مش فارق معايا كل ده مش هاين عليا إني أكون عايشه أحسن عيشة وهي مدمرة كده مش عارفه أشوف العيشة الوردية اللي أنت عاملهالي هناك دي طول ما هي تعبانة كده
- ومستنيه إيه من رجوعك دلوقتي؟
- أنها تخرج وترجع أحسن من الأول
- تخرج عشان ترجع تأذي نفسها تاني مش كده ؟! ومش بعيد تأذي ليلى معاها وأكون ضيعت كل اللي أنا بعمله كل السنين دي
- مريم اتغيرت أنا شوفتها
نظر لها عاصي فجأة ثم قال بحده:
- يعني إيه شوفتيها مش فاهم؟؟
أخذت سلمى نفساً عميقاً وقالت:
- أنا روحت لها المصحه، مريم اتغيرت وبقت أقوى مني ومنك نظرة عينيها مبقاش فيها اليأس والجنون اللي كانت فيه، عارف قالتلي إيه يومها
نظر لها عاصي بترقب فقالت:
- قالت أنا هقف على رجلي لوحدي وهرجع تاني بس مش بفضلكم !
قال عاصي بعدم تصديق:
- مش مصدقها
- اديها فرصة وخرجها، أرجوك فكر في الموضوع ده أنت طول عمرك بتثق فيا كفاية عقاب لحد كده كفاية خمس سنين
صمت عاصي ثم زفر بضيق وهُنا خرجت ليلى من الغرفة بتعب وذهبت باتجاههم وعندما رآها عاصي اتجه إليها بسرعه وقبل أن يتكلم قالت له بدموع:
- رحيل كويسة مش كده هي تعبت بسببي عشان جرت ورايا كتير أنا وحشه
نزل عاصي إلى قامتها وقال:
- لا أنتِ مش وحشه بس الحركة اللي عملتيها دي كانت سبب في أن رحيل تتعب، مينفعش تتصرفي بالطريقة دي افرضي كان جرالك حاجه افرضي أنا مقدرتش أوقف العربية، مينفعش تتصرفي كده يا ليلى عشان كده هتأذي نفسك وتأذي كل اللي حواليكي وشوفتي نتيجة اللي حصل كانت إيه رحيل تعبت
- هي عندها إيه هتخف صح؟
- رحيل قلبها ضعيف أوي لدرجة أنها متقدرش تجري زي ما أنتِ جريتي بسرعه كده وشوفتي لما جربت تجري وراكي حصل إيه
نظرت سلمى إلى عاصي بصدمة وقالت:
- هي مريضة ؟!!
نظر لها عاصي بطرف عينيه وقال:
- عندها مشكلة في صمامات القلب محتاجه عملية
نظرت له ليلى بدموع ثم حملها عاصي بين يديه وادخلها إلى غرفتها حتى ترتاح وعاد إلى سلمى ثم قال بتساؤل وغضب:
- أنتِ قولتي لرحيل إيه بالظبط؟
- مين رحيل الأول؟ أنت اتجوزت؟
- ردي عليا الأول عرفتيها إيه؟!
- كل حاجه بس مش دي المشكلة، المشكلة ان ليلى سمعتنا وعرفت أن مريم حاولت تقتلها وهي صغيرة وأنها مكنتش عايزاها
ضرب عاصي الأرض بغضب عارم وقال:
- حرام عليكِ، ضيعتي كل حاجه في لحظة
- ليلى بنت طيبة وكويسة وأكيد هترجع تحب مريم تاني بس أنت وافق أنها ترجع وكل ده هيتحل هي أمها في الأخر
وفي تلك الأثناء رن هاتف عاصي فأمسكه ليجد والدته تتصل به، رد عليها فقالت بقلق:
- إيه يا عاصي فينك
- في مشوار في حاجه؟
- معرفش رحيل خرجت مع ليلى ومن ساعتها مرجعوش قلقت عليهم أوي هي كلمتك؟
- أنا معاهم دلوقتي متقلقيش
- بجد طب الحمدلله هترجعوا أمتى؟
نظر عاصي إلى سلمى للحظات ثم قال:
- شوية وليلى هتروّح معاها ضيفة
قالت حنان بتساؤل:
- مين ؟!
ظل عاصي ينظر إلى سلمى وقال:
- حد مش غريب عليكِ حضّري اوضة تانية في البيت عشان الزيارة المرة دي هتطول شوية
- خلاص تمام
ثم أغلقت المكالمة بتساؤل وظلت تفكر من تلك الضيفة التي يتحدث عنها، وبعدها ودع عاصي ليلى وسلمى بعد أن تأكد أن ليلى بخير تماماً فقط تحتاج إلى الراحة، وطلب لهم سيارة أجرة وخرج الاثنان حتى يعودوا إلى البيت وكانت سلمى تفكر في رد فعل حنان عندما تراها..
الكاتبة ميار خالد
في غرفة رحيل بالمستشفى..
كانت نائمة على سريرها بإرهاق وأمامها بدر وحولها العديد من الأجهزة التي تُظهر حالتها الصحية، دلف عاصي إلى الغرفة فوجد بدر يجلس على الكرسي أمامها ويمسك رأسه بين يديه، وعندما أحس به بدر فتح عيونه ونظر إليه للحظات ثم قال:
- معلش ممكن تخليك جنبها شوية لازم اعمل مكالمة
قال عاصي بسرعه:
- أكيد اتفضل
فخرج بدر من الغرفة واتصل بأمينة وقرر أن يُخبرها بمرض رحيل وعندما فتحت الخط صاحت به:
- أنت روحت فين وسيبتني في المصيبة دي الموبايل مبطلش إتصال الناس كلها اللي يبارك واللي يزعل هو في أي رحيل وعاصي مين اللي اتخطبوا ؟!
صاح بها بدر:
- أنتِ ممكن تهدي!!
صمتت أمينه فقال:
- أنا هفهمك كل حاجه بس الأول لازم تعرفي إن رحيل مريضة
قالت هي بعدم فهم:
- مريضة إزاي يعني عندها إيه؟!
تنهد بدر ثم قص عليها كل ما حدث معهم..
في الغرفة..
فتحت رحيل عيونها ببطيء لتجد عاصي بجانبها، وعندما انتبه أنها استفاقت قال بقلق:
- حاسة بأيه ؟!
أومأت رحيل برأسها ثم قالت:
- أنا كويسة، عايزه أخرج من هنا
نظر لها عاصي بقلق واردف:
- مش هتخرجي من هنا غير لما تعملي العملية وتبقي كويسة
- وأنت عارف إن طول ما أنا مش موافقة محدش هيقدر يخليني هنا مش كده، في حاجات لازم اخلصها قبل العملية
- أهم حاجه دلوقتي صحتك وبس
- أفرض مخرجتش من العملية وقلبي مستحملش !!
أمسك عاصي يدها وقال بانفعال:
- بلاش الكلام ده هتخرجي وتبقي كويسة أنا مش هسمح إن يجرالك حاجه
- أنت مش كنت كاره وجودي وبتقول إني بعملك مصايب في كل خطوة ليا! الفرصة جاتلك اهي أبعد عني وأرجع لحياتك الطبيعية
نظر لها عاصي بتمعن ثم قال:
- وأنتِ فاكره إني هسيبك بعد ما بوظتي حياتي كده، مستحيل لازم تصلحي كل اللي أنتِ عملتيه
صمتت رحيل للحظات ثم قالت:
- سلمى قالتلي كل حاجه بس أنا عايزه أسمع منك، ليه عملت كل ده؟! ليه أقنعت الكل أن مريم مسافرة وهي في المصحه وكمان سفّرت سلمى مكانها، ليه حتى اسمها وحياتها اخدتهم منها ليه عملت اللغبطه دي حتى لو غلطت مكنتش تستاهل كل ده
- ساعات غلطة واحدة بتكون قادرة أنها تدمر كل حاجه، أنسب حل وقتها كان المصحه لو أنتِ مكاني كنتِ هتعملي كده
- لو أنا مكانك مكنتش هعمل كده!! كنت هحتويها واعوضها عن كل اللي شافته مريم مغلطتش هي حبت بس مكنتش تعرف أنه حيوان وهيغدر بيها، أنت متخيل دلوقتي أنها مش هتقدر تثق في حد تاني ولا حتى في نفسها حتى لو حصل هتبقى قاسية أوي وأنت هتكون السبب في كل ده!
- الحب اللي كان سبب في تدميرها مستحيل يكون سبب في علاجها
نظرت له رحيل بضيق وقالت بغضب:
- أنت اختارت الطريق السهل واتخليت عنها أنت كمان، العصيان اللي جواك ده دمر كل حاجه وأولهم حياة أقرب الناس ليك، أنت بتعاقب أبوك في حياتكم أنت مستوعب !!
- خلاص اقفلي الموضوع ده
- ولو مقفلتهوش؟ كل مره بتعمل كده وفي الأخر تقولي اقفلي الموضوع ..
قالت تلك الجملة ثم بدأت بالتنفس بصوتٍ عالي وارتفعت دقات قلبها فقال الآخر بسرعه:
- خلاص أهدي أرجوكِ عشانك انسيني أنا دلوقتي أهدي عشان صحتك
حاولت رحيل أن تنظم أنفاسها مرة أخرى وهدأت نوعاً ما، قال عاصي بهدوء:
- إيه يرضيكي دلوقتي ؟
نظرت له رحيل بدهشه ثم ابتسمت وقالت:
- ده بجد؟
- أيوة إيه يرضيكي وأنا هعمله
أخذت نفساً عميقاً ثم قالت:
- أنك تخّرج مريم من المصحة
***
الكاتبة ميار خالد
استدعى شريف أحد رجاله وقال له أن يعطي خبر لأحمد حتى يأتي له وبعد لحظات كان الآخر أمامه، قال أحمد:
- في إيه؟
قال شريف:
- مش أنت كنت عايز تعرف سلمى فين، وصلت لمكانها
قال أحمد بسرعه:
- بجد؟! فين؟؟
- في مصحه نفسية
نظر له أحمد بدهشه وقال:
- مصحه؟! إزاي يعني مصدقش أكيد في حاجه غلط
صمت شريف للحظات ثم قال:
- في حاجه غلط فعلاً
نظر له أحمد بتساؤل فأكمل الآخر:
- وصلي خبر أن أخت عاصي رجعت مصر، حد من رجالته عرفت اجيبه لصفي وهو نقلي أخبار كتير عنه منهم خبر المصحه ومنهم خبر أخته
- جميل وبعدين؟
قال شريف بعدم فهم:
-الغريب إني لما وصلت لاسامي الناس اللي جت الشهر اللي فات في رحلات من كندا ملقتش أسم مريم أخته! لقيت أسم سلمى طب إزاي وهي المفروض في المصحه وكذا حد أكد لي أنها كانت في المطار فعلاً
نظر له أحمد بدهشه ثم تحولت نظراته إلى الصدمة حين قال:
- معقول يكون اللي بفكر فيه صح!!
نظر له شريف بنفس النظرة والعيون المتسعة وقال:
- أن اللي في المصحة دي مريم وعاصي مخبي عن الكل..
نظر له أحمد بعيون متسعه ثم نهض من مكانه وقال:
- معقول الجحود وصل بيه لكده!!
ضحك شريف وقال:
- اتحلت! كل حاجه اتحلت خلاص
نظر له أحمد بنفس الصدمة وقال:
- هي إيه اللي اتحلت؟
ضحك شريف بصوتٍ عالٍ ثم قال:
- هو حرق لنا الصور بس مش هيقدر يحرق لنا الخبر ده! تخيل لما الخبر ده يظهر إيه اللي هيحصل تخيل لو الخبر ده وصل لحقوق الإنسان، عاصي هيروح في داهيه
كان شريف يتحدث وعقل أحمد في عالم آخر، ضحك شريف بانتصار ثم التفت لأحمد وقال:
- أنا مش هستنى لحد ما كل حاجه تضيع زي المرة اللي فاتت الخبر ده لازم يتنشر دلوقتي، أنا أعرف بنت من حقوق الإنسان هي هتظبط الدنيا كلها دلوقتي أنت تطلع على أي صحفي وتقوله الخبر ده
كان أحمد في حالة صدمة فاقترب منه شريف وصاح به:
- أنت معايا سمعت قولتلك إيه؟!!
قال له أحمد بخوف:
- بلاش أنت كده مش هتأذي عاصي هتأذي مريم أخته
- يا حنين، ده على أساس أنها فارقة معاك أنت هتجنني! ما يولعوا كلهم
- معنى إن مريم في المصحة أن حالتها وحشه جدًّا كفاية الأذى اللي أنا عملته فيها أنت حسابك مع عاصي مش معاها هي
دفعه شريف بغضب وقال:
- بقولك إيه أنا ما صدقت مسكت حاجه على عاصي !! اوعي تفكر بس إنك تمنعني عشان ساعتها هدوسك واعدي أعمل اللي أنا عايزُه خليك في صفي أحسن!
طالعه أحمد بتردد وصمت، نظر شريف أمامه ثم قال:
- نهايتك قربت
يا ترا ايه اللي هيحصل؟؟
عاصي هيسمع كلام رحيل ولا لا ؟؟
ايه رأيكم في أحداث الرواية لحد دلوقتي ؟
#رحيل_العاصي
#الكاتبة_ميار_خالد
#الفصل_الثامن_والعشرون
فصل النهاردة طويل، قراءة ممتعه ♥️
كانت تفكر تُرا من هذا الضيف الذي حدثها عنه عاصي، وفي الدقيقة التالية رن جرس المنزل وسمعت هي صوت ليلى عند الباب فنهضت من مكانها وذهبت حتى تفتح الباب، وقبل أن تتكلم وعندما وقع بصرها على الواقفة أمامها نظرت لها بعيون متسعه وقالت:
- سلمى؟!!
ابتسمت لها الأخرى ثم تركت ليلى يدها ودلفت إلى الداخل ثم ذهبت إلى غرفتها ولم تتحدث مع جدتها، وعندما أفاقت حنان من صدمتها تلك ولم تلاحظ الجرح البسيط الموجود في رأس ليلى، قالت:
- أنتِ كنتِ فين كل السنين دي؟!
ابتسمت لها سلمى ثم دلف الاثنان وجلسوا سوياً فقالت حنان:
- أنتِ كنتِ مسافره عند اهلك ولا إيه ؟
- أنا كنت مسافره فعلاً بس مش عند أهلي، أهلي من ساعة اللي حصل وهما مش بيكلموني ولا حد فيهم فكر يتصل بيا مره
- اومال أنتِ كنتِ فين؟
وقبل أن تتكلم سلمى فكرت قليلاً واردفت:
- أنا شايفه أننا نستني لما عاصي يجي الأول وهو هيقولك على كل حاجه
نظرت لها حنان بعدم فهم وصمتت ولكن انبعث بداخلها شعور غريب تشعر وكأن عاصفة قوية سوف تضرب هذا البيت..
***
أخذت نفساً عميقاً ثم قالت:
- أنك تخّرج مريم من المصحة
ناظرها عاصي بصمت وقبل أن ينهض من مكانه أمسكت يده حتى تمنعه، طالعته بعيون دامعة وقالت:
- لو عايزني أعمل العملية وافق إن مريم تخرج من المصحة
قال عاصي بانفعال:
- دي حياتي وأنا الوحيد اللي أقرر إيه المناسب عشان أعمله، أنتِ ليكِ طريق وأنا ليا طريق معتقدش الاتنين ممكن يتقابلوا عشان كده متحطيش حاجه في حياتك قُصاد حاجه في حياتي !
- بس أنا عايزه أساعدك! أنا وعدت نفسي إني اخرجك من دوامة العصيان دي
- برضو دي مشكلتي أنا، ركزي في حياتك أنتِ مش حياتي
- أنت بتأذي نفسك ليه أرجوك يا عاصي أعتبر ده طلبي الأخير
طالعها بصمت وعيونه كانت ترتسم بها الكثير من المشاعر، جانب منه يود أن يخضع لها ويترك لها زمام الأمور بسبب إرهاقه من تلك الحياة، وجانبه العاصي يرفض الخضوع لها ويحارب حتى يظل هو المسيطر على كل الأمور، ولكنه حسم أمره حين تذكر كلماتها عندما قالت له " كفاية عقلك كل السنين دي أدي فرصة لقلبك أنه يقرر"
نظر لها فكررت كلماتها:
- أرجوك وافق ده طلبي الاخير صلّح كل حاجه
زفر عاصي باستسلام وقال:
- هوافق لو قولتيلي ليه بتعملي كل ده؟
ابتسمت رحيل وقالت:
- عشان مش هاين عليا تفضل عايش في شخصية واحد تاني مش أنت
- يعني إيه؟
- يعني أنت مش وحش ولا قاسي أنت بس مصمم تعاقب نفسك على غلط أنت ملكش ذنب فيه، وبتعاقب كل اللي حواليك عليه
صمت عاصي للحظات وكان يفكر بكلماتها تلك، طالعها بشرود وللحظة لم يقدر على تحديد شعوره اتجاهها، كل ما يعلمه فقط أنه يرغب بوجودها بجواره، كان يشعر دوماً بالعصيان اتجاه كل شيء حتى ظهرت هي وبطريقة غير مقصودة استطاعت من اقتلاع شعورة بالعصيان، ولكنه لم يكتشف هذا بعد أو ربما قد توصل لتلك الحقيقة ولكن جانبه العاصي يرفض تصديقها..
حركت يدها أمامها حتى ينتبه لها فقال:
- حاضر
نظرت له بدهشه وقالت:
- حاضر إيه؟!!
أخذ نفساً عميقاً ثم قال:
- بكره الصبح هروح أخّرج مريم من المصحة وهرجعها البيت
نظرت له رحيل بعيون متسعة وقالت بفرحه:
- بجد!! خدني معاك طيب
- أنتِ تعبانة مش هينفع
قالت بإصرار طفولي:
- عشان خاطري بالله عليك
ابتسم رغماً عنه وقال:
- خلاص مش عايز صداع، لو نفع تخرجي هاخدك معايا
ابتسمت وقالت:
- طبعاً هينفع أخرج ده أنا قلبي زي الحديد يا أبني عيب عليك
- آه ما هو واضح
ابتسمت رحيل وصمتت للحظات ثم قالت فجأة:
- صحيح هي ليلى فين وعاملة إيه؟!
- روحت مع سلمى من شوية زمانهم وصلوا البيت دلوقتي، كويسة متقلقيش
صمتت رحيل قليلاً ثم حمحمت وقالت:
- هي سلمى هتقعد عندكم ولا إيه؟
أردف عاصي:
- أكيد مش هخليها تفضل لوحدها قعدتها معانا أحسن
ابتسمت رحيل ابتسامه صفراء وصمتت، ثم خرج عاصي من الغرفة واتجه إلى بدر وقال:
- حابب أنها تفضل في المستشفى ولا تخرج؟
تنهد بدر بحزن كبير وقال:
- أنا عارفها لو فضلت هنا هتعمل مصيبة عشان تخرج، الأحسن أنها تخرج وأنا بلغت اللي في البيت بتعبها هما هياخدوا بالهم منها جداً وهنفضل برضو متابعين مع الدكتور
- خلاص تمام أنا هروح أخلص إجراءات خروجها وأنت خليك جنبها
وقبل أن يتحرك عاصي أوقفه بدر، طالعه بابتسامة ممتنه وقال:
- شكرًا أوي على كل حاجه، أنت مش مجبر إنك تعمل كل ده ولا مجبر أنت تشوفني كل شوية لأني عارف الذكريات اللي أنا بفكرك بيها
الكاتبة ميار خالد
ناظره عاصي للحظات ثم ابتسم وتحرك من مكانه وذهب لينهي اوراق خروجها وبعد ساعة وافق الطبيب المختص بحالتها أن تخرج من المستشفى وبصعوبة بسبب حالتها الصحية، ثم عاد عاصي ومعه بدر وانتظروا أمام غرفتها وبعد لحظات خرجت لهم ووضعت يدها في ذراع بدر وسار عاصي بجانبهم، وبمجرد وصولهم إلى الباب الخارجي وجدوا العديد من الصحفيين في انتظارهم وعندما انتبهوا إليهم اتجهوا إليهم بسرعه، وقف عاصي أمام بدر ورحيل حتى يمنعهم من الحديث معهم ولكن بدون فائدة، قال أحد الصحفيين إلى رحيل:
- ياريت حضرتك تطمنينا عليكِ واشمعنا بعد إعلان خبر الخطوبة بساعات حالتك الصحية ساءت كده
نظرت رحيل إلى عاصي بدهشه وعلى وجهها ابتسامة بلهاء وقالت:
- معقول كل دول خايفين عليا أنا طلعت مهمه كده!
ثم قالت بصوتٍ عالٍ:
- يا جماعة مفيش حاجه تستدعي القلق أنا كويسة الحمدلله
وابتسمت بسرور، قال الصحفي مرة أخرى:
- ممكن حضرتك تقوليلنا اتعرفتي على عاصي القاضي إزاي وأمتى قررتم تعلنوا عن خطوبتكم
قالت رحيل بعدم فهم ومازالت الابتسامة على وجهها:
- خطوبة مين ؟
قال الصحفي:
- خطوبتك على أستاذ عاصي
- عاصي مين؟
قالتها بدهشه ولم يستوعب عقلها ما يحدث وبعد ثواني وعندما استوعبت تلك الأسئلة وما يحدث حولها قالت بصدمه:
- نعم!! أنا وعاصي مين اللي ...
وقبل أن تُكمل حديثها ضغط عاصي على يدها وقال بصوتٍ خفيض:
- أسكتِ بالله عليكِ هتنيلي الدنيا
قالت رحيل بدهشه:
- أنت مش سامع كلامه شكله فاهم غلط لازم نوضح الدنيا
ثم نظرت إلى الصحفي وقالت:
- أنت فاهم غلط أنا وعاصي مش مخطوبين!
ضرب عاصي كف يديه في رأسه وقال بصوتٍ خفيض:
- مفيش فايدة فيكِ
وبعدها زادت أصوات الهمهمات والهمسات التي نشأت بين الصحفيين فقال بدر بضحكة:
- معلش يا جماعة رحيل بتحب تهزر، أنا والدها وشكرًا جدًا على المباركات بتاعتكم وبأذن الله قبل الفرح هنعلن عشان كلكم تشرفونا وتغطوا الحفلة
ابتسم الصحفيين وابتعدوا قليلاً حتى يمشوا الآخرين، ناظرت هي بدر باعتراض وقبل أن تتحدث سحبها الاثنان نحو السيارة وعندما تحرك بهم عاصي قالت رحيل باعتراض:
- أنت إزاي تنشر حاجه زي دي من غير ما...
وقبل أن تُكمل الجملة صاح بها بدر وعاصي في نفس الوقت:
- أسكتِ!!
فصمتت رحيل باعتراض وبعدها أخبرها عاصي ما حدث وكيف تصرف هو حتى يتخلص من مشكلة تلك الصور، قالت رحيل بضحكة بلهاء:
- أتصدق صح، بس إزاي مخطرش ده في بالنا من البداية
قال عاصي:
- أخر حاجه كنت أتمناها إني أربط اسمي واسمك سوا عشان كده مفكرتش في الحل ده
نظرت له رحيل بتهكم وصمتت..
***
الكاتبة ميار خالد
كانت امينه تجلس على أعصابها بسبب الكلام الذي سمعته من بدر، تندم كل يوم بسبب الكلمات التي قالتها ذلك اليوم ولكنها قالت هذا تحت تأثير الغضب والتوتر، ولقد وعدت نفسها أن تحمي رحيل حتى من نوبات غضبها تلك، قالت لداليا الجالسة أمامها:
- هما اتأخروا كده ليه مش أبوكِ قالك أنهم جايين
- أيوة يا ماما أهدي زمانهم على وصول
وفي تلك الأثناء وصلت لداليا بعض الرسائل من فارس وكان مضمونها أنه يريد الإطمئنان على رحيل بعدما سمع من إحدى صديقات داليا أنها مريضة، وقد ردت عليه داليا بفتور أنها بخير..
وعندما ردت عليه أتصل بها فوراً وكأنه ينتظر تلك الفرصة حتى يتحدث معها، نهضت من مكانها وذهبت إلى غرفتها بسرعه وفكرت للحظات ثم فتحت الخط وقالت:
- الو
صمت فارس قليلاً وأردف هو الآخر:
- أولاً أنا مش متصل عشانك أنا عايز اطمن على رحيل بس
تنفست داليا بغضب ثم قالت:
- والله! خلاص اتجوز رحيل أحسن بقى
- أنتِ مجنونه يا بنتي اتجوز إيه؟!
- اومال إيه القلق ده كله عليها
- هي مش أختك، للأسف أي حاجه تخصك مهمه عندي
ابتسمت ببلاهة وقالت:
- بجد
ثم انتبهت لِما تقوله فحمحمت بضيق وقالت:
- رحيل كويسة لو متصل عشان تطمن عليها فبطمنك متتصلش بيا تاني بقى
- خديلي ميعاد مع أبوكِ
قالها فارس بدون مقدمات فصمتت داليا بصدمة ونظرت أمامها بعيون متسعه ثم قالت:
- مش فاهمه!
قال الآخر بانفعال:
- هو إيه اللي مش فاهمه بقولك خديلي ميعاد مع أبوكِ عشان اتنيل اجي أطلب إيدك
- تتنيل؟ أنت مغصوب عليا ولا إيه لا كرامتي مسمحلكش!
تنهد فارس وصمت قليلاً ثم قال بضيق:
- أنا كنت محتاج وقت أفكر واخد قرار هعمل إيه وصليت استخاره كذا مره ودعيت ربنا كتير وفي كل مره كانت الإجابة واحده، هي أنتِ
ثم صمت للحظات وأكمل:
- عشان كده قررت إني أنسى أي حاجه قديمة وهديكي فرصة تانية تثبتي فيها العكس، هتغاضي عن أي حاجه كانت في الماضي وهنبدأ صفحة جديدة
قالت داليا بحزن:
- أنا مستاهلكش..
- أتمنى نكون لبعض عوض عن اللي شوفناه، أنا دلوقتي بقولك كده وخايف تخذليني
- أنت مش بتثق فيا صح؟
- دي في إيدك تبنيها من تاني، في إيدك تخليني بثق فيكِ أكتر من نفسي
مسحت داليا دموعها التي تساقطت على وجنتها وقالت:
- وأنا أوعدك إني هبني الثقة دي ومش هسمح لحاجه تهدها، وهنسى أي حاجه في الماضي وهبدأ معاك صفحة جديدة في عمري
- غلطه واحده ممكن تنهي كل حاجه، متخذلنيش قدام نفسي
ابتسمت داليا وقالت:
- أوعدك
ثم ضحك الاثنان وأنهت داليا المكالمة وهي تضحك بفرحه كبيرة، ولكنها في لحظة عبست وتذكرت حازم، كيف تمكنت من نسيانه بتلك السرعة، كيف تمكن قلبها من انتزاعه منها وكذلك عقلها لينساه وكأنه لم يكن!! وهُنا نقول " سبحان مُغير مقامات الناس بقلوبنا " ..
***
الكاتبة ميار خالد
نظرت رحيل إلى عاصي بعد أن وصل بهم تحت منزلهم وقالت:
- هتعمل اللي قولتلك عليه بكره صح؟ هستناك تيجي تاخدني
قال بدر بتساؤل:
- ياخدك فين؟
قالت رحيل:
- مشوار مهم عاصي اتأخر عليه جدًا وأنا عايزه أكون معاه
طالعها بدر باعتراض وأردف:
- أنتِ مش شايفه حالتك مستحيل أوافق إنك تخرجي
قالت رحيل بعِناد:
- هروح يعني هروح مليش دعوة
نظر بدر إلى عاصي حتى يتدخل ويقنع تلك المجنونة أن تهتم بصحتها قليلًا، أردف عاصي:
- معلش بكره بس رحيل هتيجي معايا مشوار كده وبعدين مش هتتعب تاني في حاجه
نظر له بدر للحظات ثم وافق رغماً عنه بسبب إصرار رحيل، ولكنه قال:
- تمام بس مش عايزها تتأخر ولو تعبت أو حصل حاجه ...
وقاطع كلام بدر رنين هاتف عاصي برقم شادي، نظر إلى الهاتف بدهشه ثم نظر إلى رحيل وقال:
- المكالمة دي من المصحه!
قالت رحيل بدهشه:
- رد طيب يمكن في حاجه
فتح عاصي الخط وقبل أن يتكلم صاح به شادي:
- مصيبة!
- في إيه قلقتني ؟!
- في ناس من حقوق الإنسان هنا وعايزين أختك!
نظر عاصي أمامه بصدمه وقال:
- مريم؟! وهما عرفوا منين أنها في المصحة أصلاً أنا معرف الكل أن سلمى هي اللي هناك!!
- معرفش أتصرف أنا دلوقتي بحاول امنعهم بأي طريقة لو حد وصل منهم لمريم الدنيا هتخرج عن السيطرة
- تمام أنا جاي حالاً
نظرت له رحيل بقلق ففهم هو نظراتها تلك وطلب منهم أن يترجلوا من السيارة حتى يذهب ولكنها لم ترضى وقالت:
- حصل إيه فهمني؟
- ناس من حقوق الإنسان في المصحة دلوقتي طالبين يشوفوا مريم!
قال بدر بصدمه:
- مريم مين اللي في مصحه يا عاصي؟! مريم أختك!! أنت اتجننت حاطط أختك في مصحه!!
نظرت رحيل إلى والدها وطلبت منه أن يهدأ قليلاً حتى يفكروا بهدوء ليجدوا حل في تلك الازمة، أمسك عاصي رأسه بألم ثم قال باستسلام:
- كل حاجه ضاعت، وأنا تعبت من المحاولة خلاص
صمتت رحيل ولم تظهر أي فكرة في بالها ولكنها لم ترغب أن يشعر بكل هذا الانهزام فقالت:
- بس أنا معرفش عنك إنك بتستسلم بسهولة، حاول تاني والمرة دي أنت مش لوحدك أنا معاك ومش هسيبك في الأزمة دي زي ما أنت مسبتنيش في مرضي
نظر لها عاصي بعيون مرهقه من كل تلك الأحداث التي يتعرض لها، ثم نظر إلى بدر وقال:
- مشوار بكره مضطرين نعمله دلوقتي، عارف إن عندك أسئلة كتير وأنا هجاوبك عليها بس مش دلوقتي
نظر لهم بدر بغضب ثم ترجل من السيارة وتركهم في رحلتهم الصعبة تلك، وصعد إلى بيته وتحرك عاصي ومعه رحيل إلى المصحه..
وهناك كان يوجد إمرأة ورجل ومعهم العديد من الأشخاص وكذلك صحفيه حتى تغطي هذا الحدث، قالت الصحفية بشماته:
- الخبر ده هيبقى ضربه مميته لعاصي القاضي
وهُنا صاحت المرأة التي جاءت من مؤسسة حقوق الإنسان والتي تُدعى منى:
- أنتم رافضين أننا نشوفها ليه أنا مش فاهمه أنا متأكدة أن مريم القاضي هنا
قال شادي:
- يا فندم ياريت تراجعي معلوماتك إحنا معندناش حد بالاسم ده
صاحت منى بغضب:
- ممكن تبعد عني وتسيبني أنا أدور عليها ونشوف مين فينا اللي صادق
ثم تحركت من أمامه وخرجت من مكتبه وظلت تسأل جميع الممرضات عن مريضة بأسم مريم القاضي ولكن لم يتعرف عليها أي شخص، شعرت ببعض الإحراج وقبل أن تقول اي شيء تذكرت شيئاً ما فعادت إلى إحدى الممرضات وسألتها عن مريضة بأسم سلمى!! وقد قال لها شريف تلك التفاصيل، وحينها قالت لها الممرضة عن مكان غرفة المريضة التي تدعو سلمى كما عرفها جميع من في المصحة..
التفتت منى إلى شادي وطالعته بسخرية وشماته ثم قالت:
- واضح فعلاً أنها مش هنا
ثم اتجهت إلى غرفة مريم وقد تحركوا جميعاً خلفها وجاء معهم شادي ورغماً عنه فتح الغرفة لهم بعدما دق على بابها حتى تضع الأخرى حجابها على رأسها، فُتِح الباب ودلفوا جميعاً ليجدوا مريم تجلس على سريرها بهدوء كعادتها وتنظر الفراغ، قالت مريم وكانت تظن أن شادي فقط من في الغرفة:
- جيت ليه؟ مش قولت مش هتيجي هنا غير لما أتغير وأبطل أفكر بسلبية
وعندما أحست بأنفاس كثيرة في الغرفة التفتت إليهم وعندما رأتهم أمامها انتفضت بخوف وركضت بسرعه لتقف خلف شادي وتقول:
- مين دول؟!
قالت منى بقوة :
- أنتِ مش لوحدك أنا جيت هنا عشان اخرجك من السجن ده وأنتِ ترجعي لحياتك وتوديهم في ستين داهيه كمان
نظرت لها مريم بعدم فهم وفي تلك اللحظة وصل عاصي ومعه رحيل إلى المصحه، دلف الاثنان واتجه هو إلى غرفة مريم ورحيل خلفه وبالفعل وصلوا عندما قالت تلك المرأة هذه الكلمات، دلف عاصي إلى الغرفة وعندما وقع بصره على مريم نظر لها بقلق وطالعته هي بفتور، قالت منى:
- أنت كمان جيت!
ثم نظرت إلى مريم وقالت:
- كلمة واحده منك هتغير حياتك وقدرك، كفاية خوف اتكلمي ورجّعي حقك واخرجي من هنا وعاقبي كل اللي كان سبب في وجودك هنا، اتكلمي وأنا مش هسيبك لوحدك أبداً
ثم تحركت منى ودفعت شادي عنها وقالت:
- محدش هيضغط عليكِ اتكلمي وأنا معاكي، مين اللي حابسك هنا
نظرت لها مريم للحظات ثم حركت عينيها ونظرت إلى عاصي نظرة مطولة، كانت تبعث له آلاف الكلمات والمشاعر، وفجأة تحولت تلك النظرات إلى الاصرار والتحدي فقالت بقسوة:
- هتكلم ومش هخاف من حد كفاية كده
نظرت لها رحيل بخوف ولكن الأخرى قالت:
- عاصي هو اللي حابسني هنا من خمس سنين ورفض إني أخرج وأنا كويسة تماماً..
ووقتها أغمض عاصي عينيه باستسلام وانتظر كلماتها التي قد تكون مثل السكاكين التي سوف تمزق قلبه وحياته وشركته ..
يا ترا ايه اللي هيحصل ؟؟
توقعاتكم ؟؟ آراءكم ؟؟
رأيكم في الرواية لحد دلوقتي ؟؟
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله اضغط هناااااااا
مجمع الروايات الكاملة 2 اضغط هنااااااا
تعليقات
إرسال تعليق