رواية ليتك كنت سندي( الجزء الثاني)الفصل الخاتمه الثالثة بقلم اسماء عبدالهادي
رواية ليتك كنت سندي( الجزء الثاني)الفصل الخاتمه الثالثة بقلم اسماء عبدالهادي
ليتك كنت سندي
بارت الخاتمة
الجزء ٣
اسماء عبد الهادي
انسحب الجميع بغية تركهم بمفردهم لبضع دقائق قليلة
حاول فيهم إسلام إختلاس النظرات إلى ملك التي فضلت الجلوس في الشرفة مع سها
لاحظ أن تعبيرات وجهها هادئة وتتحدث بحرية وانسجام تام مع سها فتنهد براحة فلقد كان يشعر بتأنيب الضمير من أجلها ... كان يخشى أن يكون سبب حزنها او زيادة الهموم عليها... هو لا يمانع أبدا في مساعدتها ..لكنه يعرف ان ساعدها فستكون سعادة شكلية خالية من أيه مشاعر وهو لا يرضى لها ذلك لذا فضل الابتعاد علها تجد نصيبها الذي يكون عوضا عن كل دمعة قهر أدمعتها أعينها
عند ماجد وليلى
انتفض ماجد مكانه ونظر لليلى بحدة
_يعني ايه مش موافقة ... ملك قايلالي إنك موفقة من بدري...ليه غيرتي رأيك ممكن أفهم؟؟؟
أجابت ببرود رخيم
_ممكن احتفظ بالسبب لنفسي
أغتاظ من برودها ذاك وحاول أن يحافظ على هدوء أعصابه لذا تحدث بهدوء شديد
_ليلى من فضلك اتكلمي معايا بصراحة ...هل أنا عملت حاجة زعلتك مثلا!!!... انتي متضايقة علشان أخدت وقت لحد ما أخدت خطوة رسمية ؟؟؟
أجابته بحنق تعاتبه وكأنها تعرفه منذ سنوات وليس هذه أول مقابلة واول حديث منفرد بينهما
_ما انت عارف أهو إنها حاجة تضايق و إهانة في حقي كمان ...يعني تكلم أخويا وتعشمه وأظنك كنت عارف اني موافقة من ملك ورغم كل ده تفضل طول الفترة دي مش بتتحرك ... لا وجاي دلوقتي بقلب جامد مفكرني إني هموت عليك وهعلن رايات الاستسلام وهوافق فورا... لا يا استاذ ماجد أنا أسفة جدا أنا مش من النوع ده أنا كرامتي عندي أغلى من أي شىء تاني
قالتها ثم هبت واقفة تود المغادرة قبل أن تخور قواها وتضعف قوة تحكمها في دموعها التي تحبسها بصعوبة بالغة
أخذ نفسا عميقا ثم أجاب بحزم
_ليلى ممكن تقعدي لحد ما أخلص كلامي!!
أشاحت بوجهها عنه لتتحدث بكلام على عكس ما تشعر به
_مفيش كلام يتقال خلاص ... شرفتنا يا أستاذ ماجد .
لينطق هو بعصبية وانفعال
_ليلى قلتلك أنا لسه عايز اتكلم معاكي... ثم اني مقصدتش ابدا إني أهين كرامتك زي ما بتقولي ..كل الحكاية ... كل الحكاية انه ...
التفتت اليه لتعرف تكملة حديثه
_انه ايه ...ياريت حضرتك تكون واضح من أولها .
_طيب اتفضلي اقعدي وخلينا نكون صرحا مع بعض .
اضطرت ليلى للجلوس لتسمع ما عنده
_اتفضل سامعاك .
تحدث هو بحرص شديد لألا يُفهم حديثه بشكل خاطىء
_بصراحة يا أنسة ليلى أنا مكنتش جاي من أصله... أنا ..
لتهتف هي بحنق بعد أن تغير لون وجهها لتكسوه ألوان الغضب والإحراج والإحباط معا
_اها بتردها بقى لإسلام علشان رفض ملك مش كدا!!!... كنت حاسة فعلا إن ده اللي هيحصل ... مفيش داعي تبرر او تقول حاجة يا استاذ ماجد.. أنا بعفيك من أي حاجة ...عن اذن حضرتك
هب من مكانه بسرعة بغية اعتراض طريقها
وتحدث بصوت منفعل حتى أن من بالخارج استغرب ذلك لكنهم لم يعلقوا على الأمر
_ممكن تبطلي تسرعك ده ... قلتلك اتنيلي اقعدي واسمعيني للآخر
التفتت اليه بغيظ
_انت ازاي تكلمني بالطريقة دي انت نسيت نفسك ولا ايه!!
أجابها بحنق
_ما انتي صراحة اللي مستفزة ومتسرعة وناوية تهدي كل حاجة من قبل ما تبتدي .
كشرت بوجهها وهتفت بصوت منفعل مماثل وكأنهما ندين
_وعلشان أنا كدا ..يبقى سيبني أمشي واتفضل روح لحالك
_وربنا يا ليلى لو ما قعدتي لأكون...
رمقته بسخرية وهتفت بتهكم
_لتكون ايه!! ... ايوة يا أستاذ ماجد اتفضل اظهر شخصيتك الحقيقية
_انتي يابنتي مستفزة ليه... اقعدي بقا بالله عليكي متبوظيش الليلة!
_مش هقعد الا لما تقولي الحقيقة ... ليه رجعت في كلامك وغيرت رأيك ومكنتش جاي أصلا وبعدين فجاءة كدا جيت ..
جلس وتحدث بصوت خفيض
_ليلى صحيح إني مكنتش جاية اتقدملك ..لكني أبدا ما غيرتش رأيي .. انتي هتفضلي البنت اللي قلبي أختارها من بين بقية البنات كلها
بدأ ناقوس الخطر يعلن رايات الإنذرات وباتت دقات قلبها مسموعة وبقوة من شدتها..فتورد خداها من حديثه الصريح بأنه يحبها لذا جلست تود لو تختبأ في الكرسي التي تجلس عليه ...وبدأت تنصت اليه باهتمام
ليردف هو
_ليلى أنا كنت خلاص جاي اتقدملك ..بس لما اسلام رفض ملك.. أنا زعلت علشانها وحسيت بالقهرة اللي هيه بتمر بيه
ضغطت ليلى على صوابع أيديها المشبكة ببعضها
_أنا أسفة أوي...أاا
_انتي ملكيش ذنب يا ليلى ومش بحملك نتيجة قرارات أخوكي... لكني مكانش ينفع أسيب ملك كدا .. كان لازم أقف جنبها علشان كدا قررت إني أتجوز ملك واركن قلبي بحبه على جنب واقفل عليه لوحده علشان مظلمش ملك معايا.. ملك اللي حصلها مش سهل أي بنت تتخطاه بسهولة وان مكنتش أنا اقف جنبها مين اللي هيقف .
ألجمتها كلماته هو معه كل الحق وهي ليس لها حق في أن تعترض أبدا هي صديقتها وتحبها وعاشت معاناتها لحظة بلحظة لذا هتفت بقلب صادق
_انت صح يا ماجد ... روحلها وفرحها وعوضها عن معاناتها ..جيت ليه... ياريتك كنت فهمتني ده من الأول
أعجب ماجد برد فعل ليلى وتأكد أنها حقا صديقة مخلصة ..تضحي بحبها من أجل صديقتها
_كلمتها بس هيه رفضت علشان عارفة اني بحبك انتي ... رفضت ، علشان متبنيش سعادتها على تعاسة صاحبتها ....البنت اللي وقفت جنبها وساعدتها وآوتها في بيتها... ملك اول واحدة تعرف إني كنت ناوي اتقدم ليكي واول واحدة لاحظت ده ...علشان كدا رفضت
ادمعت أعين ليلى بتأثر
_ياحبيبتي ياملك ...ماجد طيب ليه مكتبتش كتابك عليها حتى
_رفضت بردو ...قالت اللي عايزها لازم يتقبل وضعها زي ما هوا لإما هتفضل كدا من غير جواز وده أفضل لها.... ملك معاها حق اللي شافته مكانش سهل ومش مستعدة تقدم تنازلات على حساب حاجة بقت آخر اهتماماتها خلاص
تنهد بحزن ثم هتف مردفا
_ربنا يصلح حالها ويفرحها حقيقي صعبانة عليا أوي وكان نفسي تبطل عِند وتوافق على مساعدتي ليها
_اللهم آمين ...أنا متأكدة إن ربنا هيجبر بخاطرها في يوم من الآيام وان مكانش بالجواز هيكون بنجاحها في حياتها
ابتسم لها ماجد بعدما عادت اليه روح المرح مرة أخرى
_المهم قوليلي عندك اي سؤال حابة تسأليه...اصلنا طولنا اوي الجماعة اللي برا يقولوا علينا ايه
ارادت ان تستفزه بمشاكسة لذا هتفت بصوت رخيم
_ ومين قالك اني وافقت !!
رفع أحد حاجبيه بتوعد ثم هتف مدعيا الغضب وهو يتوجه للخارج
_بقى كدا ماشي...أنا بقا رايح لوالدتك واخوكي وهقولهم إن ليلى موافقة على اننا نكتب الكتاب النهاردة قبل بكرا
لحقت به تحاول منعه وهي ليست مستوعبة ما يتفوه به
_استنى يا مجنون انت بتقول ايه ..يا نهار مش فايت
ضحك هو على وجهها الذي أصبح ككتلة ألوان متضاربة في بعضها من فرط خجلها
_خلاص خلاص صعبتي عليا.. مش هقول حاجة الا لما تسمعيني انك موافقة
_موافقة على ايه
قالتها وهي تخفض رأسها أرضا
ليقول هو بضجر
_موافقة على جوازك مني متعمليش فيها عبيطة دلوقتي ها!!!
عبست بوجهها وقالت بطفولية شديدة
_يعني أنا عبيطة !!!
_لا ..بقولك ايه اوعي تقلبي مش وقته ...هتقولي ولا أنفذ تهديدي انتي حرة!
_وانت جاي تهددني من أولها كمان!!!
حان دوره هو ليعبس بوجهه
_ لا أنا بقول هنفذ تهديدي انتي مفيش فيكي فايدة
قالها وخطى بقدمه لخارج غرفة الضيوف
لتهتف هي بلهفة
_استنى بس يا ماجد ... هتقولهم ايه يخرب بيتك هوري وشي منهم فين بعد كدا
_بسيطة .. البسي كرتونة واعملي زي البطة السودا ..هاهاها
رمقته بضيق وهتفت بغيظ
_ هاها ...خفيف اوي على فكرة
_انتي اللي مش عايزة تيجي بالزوق
شبكت يدها أمام صدرها
_بقولك ايه اعمل اللي انت عايز تعمله... انا ولا يهمني
🌼🌼🌼🌼🌼🌼🌼🌼🌼🌼🌼🌼
وجدته يجلس بمفرده شاردا في شرفة الجناح الخاص بهما يلتفت برأسه تجاه البحر لكنه لا ينظر اليه
فاستغربت صنيعه وجلست على الكرسي المقابل له وهي تناديه
_آدم... في حاجة مضايقاك؟؟؟
التفت اليها ببسمة لطيفة
_ها ..رهف.. لا أبدا يا حبيبتي كنت بفكر في حاجة شغالة دماغي شوية
_ربنا يكون في عونك ...لو تحب ممكن نرجع من بكرة علشان شغلك ميتعطلش أكتر من كدا
_من الناحية دي اطمني أنا بتابع اخبار المستشفى اول بأول من مكاني هنا وكمان سايب بدالي ناس ثقة .. لكن فعلا انا بفكر اننا ننهي الأجازة وننزل .
تعجبت لما يريد ان ينهي أجازته ..أتراه قد مل من مرافقتها هنا كانت في رأسها العديد من الأسئلة لكنها فضلت الصمت ...ظلت تنظر له لبرهة ثم التفتت تنظر للبحر بهدوء
_مش عايزة تعرفي أنا عايز أقطع الأجازة وننزل ليه؟؟
_ممم براحتك يا آدم اكيد ليك أسبابك.
_وانتي مش عايزة تعرفي أسبابي دي!!... انتي مش زوجتي دلوقتي والمفروض أشاركك كل حاجة!!
_انت مقولتش ايه هيا ..يبقى مش عايز تقول فأنا مليش الحق أسأل او اجبرك على حاجة انت مش عايزها
_لا تسألي يارهف طالما قراري ده بخصوص موضوع خاص بيكي يبقى تسألي
_وأنا مش زعلانة ابدا من انك هتقطع شهر العسل وتنزل قضينا اسبوعين كاملين هنا أظن مش فترة قليلة تخليني أتضايق اننا هننزل
_بس أنا متفق معاكي على شهر كامل يارهف
_وحصلت ظروف وانت عايز تنزل ايه المشكلة هعترض ليه ؟
أخذ نفسا عميقا باستياء لكنه لم يعبر لها عنه
_طيب تفتكري أنا عايز نرجع ليه؟؟؟
_ممم معرفش بس أكيد سبب قوي علشان تعمل كدا
_والسبب ده معندكيش فضول تعرفيه
_أكيد عندي ...بس زي ما قلتلك طالما مقلتش عليه فأنا مش هسأل
_طب خمني حتى ممكن يكون ايه
_ممم لازم يعني!!... قلتلك أنا مش زعلانة
_اه لازم ..قولي
_ممم ممكن اتخنقت من هنا... مليت مش عارفة مش لاقية سبب يعني
وجدته صامتا لم يعلق على كلامها فرفعت بصرها تنظر اليه لتجده يرمقها بضجر
فهتفت متعجبة
__ايه !! بتبصلي ليه كدا
_ متغاظ منك
رفعت أحد حاجبيها وهتفت بزهول
_مني أنا ليه
_فين ثقتك بنفسك يارهف ... تفتكري يعني ايه اللي هيخنقني وأنا هنا مع زوجتي حبيبتي بنقضي شهر العسل مع بعض ها ..الا اذا انتي مش واثقة في نفسك أو شاكة في حبي ليكي!!!
صمتت رهف فهو على حق فعلا هي لوهلة عولت السبب عليها هي ..أنه أراد العودة لأنها لم يشعر بالمتعة معها
مد يده ليرفع رأسه لتنظر اليه فظلا يتطلعان لبعضهما مدة إلى أن اصيبت رهف بالحرج فأخفضتهما قليلا وادعت أنها منشغلة بالبحر
_رهف
_نعم يا آدم
_تفتكري إيه اللي أقدر أعمله علشان نزود ثقتك بنفسك دي
ازدردت ريقها ونظرت اليه بصمت تام
ليردف هو
_رهف انتي هتكملي جامعتك ... فاضلك آخر سنة مش كدا؟؟؟
حملقت به بزهول 😳
_أنا اكمل دراسة !!
_ايه مفكرتيش ولا مرة في الموضوع ده
حركت رأسها بالنفي
_لا أبدا ... بعد اللي حصل وبعد ما الناس كلها اتكلمت عنى وخصوصا زمايلي في الكلية..نسيت الفكرة تماما
_وده بقى اللي بيقلل ثقتك بنفسك ...أنا فكرت كتير ولقيت ان انسب حل إنك تكملي دراستك!!... الدراسة بدأت من حوالي اسبوع بس ..يعني هنلحق نجهز كل حاجة
أشارت لع بيدها تعبيرا عن الرفض
_لا لا يا آدم أنا طبعا مش موافقة ...مش عايزة فعلا يا آدم أرجوك
زفر بحنق واعتدل في جلسته
_هنرجع تاني للضعف والسلبية ... رهف انتي فاضلك سنة يبقى تكمليها علشان تتخرجي ويمكن بعدها لو تحبي تشتغلي مفيش أي مشكلة
_كمان أنا اشتغل أنت بتهرج يا آدم ... ده انا ممكن أبوظ الدنيا
_رهف ...شوفي روحي ايسل بتعمل ايه ..بدل ما أزعلك
تنهدت بقلة حيلة
_في ايه بس يا آدم... أنا عارفة نفسي مش هنفع في حاجة ...أنا جبانة لأقصى حد وممكن اي حد يضحك عليا ويخدعني بسهولة
انحني بجسده نحوها ومد يده تجاه جانب رأسها ليطرق عليها
_وده فين !! أظنك كبيرة كفاية علشان تقدري تحكمي على الناس صح وأظننا تخطينا المرة دي من بدري.. وكمان اتفقنا إننا معاكي في أي مشكلة تقف معاكي هنحلها سوى
تنهدت ثم وضعت خديها بين كفتي يدها
_ممم.. ماشي يا آدم هعمل اللي بتقول عليه ..بس بشرط
أعاد جسده للخلف ليستند على ظهر الكرسي
_ممم في تقدم ملحوظ ظهر أهو ...قولي شرطك
_اني اغير الجامعة يا آدم ..حقيقي مش هقدر ارجع جامعة القاهرة تاني
_وده اللي كنت ناوي أعمله أنا هحولك لجامعة عين شمس صحيح مشوار بس مش مشكلة أنتي أساسا مش هتحضري الا أيام الامتحانات وبس... وهتذاكري في البيت
ضيقت أعينها باستغراب
_ممم
_متستغربيش أوي كدا ...أنا محتاجك في حاجة تانية هقولك عليها لما نرجع بعد بكرة بإذن الله
_الله ...انت مخطط لكل حاجة من بدري
_بصراحة اه ... الموضوع ده كان شاغل دماغي بقاله فترة
..... يتبع
يا ترى آدم محتاج رهف في ايه
ابه اللي هيحصل مع ليلى وماجد
وهل فعلا ملك هتكون من نصيب احمد ولا هتكون من نصيب اسلام
مش عايزة تخلص
فتحت منااااااي مش عارفة اوجفها هههه
❤️❤️❤️❤️
صلوا على رسول الله
تكملة الرواية من هناااااااا
لمتابعة الرواية الجديدة زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
الفصل الخاتمه الثالثة بقلم اسماء عبدالهادي رواية ليتك كنت سندي( الجزء الثاني)الفصل الخاتمه الثالثة بقلم…){kind=link}
تعليقات
إرسال تعليق