روايه حارة البطل الفصل الثالث وعشرون 23 للكاتبة جنات حصريه
روايه حارة البطل الفصل الثالث وعشرون 23 للكاتبة جنات حصريه
#روايه_حارة_البطل
#الكاتبة_جنات
»» الفصل ٢٣ ««
فى بلكونه بيت الشهاوى .
حمزة واقف وعينه على الشارع وكلام اولفت بيرن جوا راسه وكان مضايق جداا من اسلوبها وطريقتها.
رهف كانت واقفه جمبه شايف انه مضايق وباين عليه انه متعصب جداا وحولت تتكلم يمكن تخفف عنه .
رهف بصوت رقيق:انت كويس ؟
حمزة اتنهد وبصلها:كويس يارهف ... انا عارف ان المفروض النهارده يبقي احسن يوم لينا احنا الاتنين بس للاسف فى ناس كدا مش بيحبو يشوفو حد فرحان .
رهف من غير ماتبصله:انا حاسه بيك وعارفه اد ايه وجود الاهل معانا مهم وخصوصا فى يوم زى ده .... انا كمان كان نفسي بابا وماما يبقو معايا ... بس بحمد ربنا ان رغد موجوده جمبي .... انت كمان لازم تحمد ربنا انك عايش وسط عيله بتحبك بجد .... فى الاول وفى الاخر الموت علينا حق وده قضاء ربنا ياحمزة .
حمزة ابتسم لانها اول مرة تنطق اسمه:انا بحمد ربنا انى فى وسطهم وانهم عوضونى عن موت اهلى وانا صغير ..... تعرفى بحمد ربنا على ايه كمان؟
رهف بصتله ومستنياه يكمل كلامه .
حمزة:بحمد ربنا انى قابلتك وانك بقيتى اهم شخص جوا قلبي .
رهف ابتسمت وهى بتلعب فى الخاتم اللى لابساه .
حمزة:ياريت الطقم يكون عجبك .... انا جبته على ذوقي وكنت خايفه مايعجبكيش
رهف:بالعكس حلو جداا ورقيق ... انا بحب الحاجات البسيطه .
حمزة:انا ماقابلتش فى حياتى حد ارق منك يا رهف ويمكن رقتك و هدوئك هما اللى شدونى ليكى .
رهف ابتسمت وحمزة بدأ يتكلم معاها ونسي زعله وضيقه من اولفت .
بقلم الكاتبه جنات
ــــــــــــــــ★ــــــــــــــ
فى الصاله .
كانو الكل بيتكلمو ويضحكو على عكس اولفت وبنتها اللى قاعدين مضايقين .
حنين بهمس لرغد:ما تقولى يااوختى خدى زوجك قرة عينك وروحو دردشو شويا فى البلكونه زى الواد حمزة .
رغد بنفس الهمس:ده اخوكى من وقت كتب الكتاب كأنه اكل سد الحنك ده مش بيقولى ازيك حتى .
حنين ضحكت بصوت عالى والكل بصو عليها .
هدى:ما تضحكونا معاكو يابنات .
حنين:ده رغد قالت نكته بس ياهدهد .
لارا:رغد كانت بتقول اكل سد الحنك .
حنين ضحكت .
رغد برقت وبصت لحسن اللى بصلها برفعه حاجب:عيب يالولى كدا .
لارا:سورى يا رغد .
حنين بتحاول تكتم ضحكتها ومش قادرة .
رغد:بطلى ضحك وتعالى معايا نحضر العشاا .
حنين ورغد قامو حضرو العشا وجهزو السفره .
ورغد نادت على الكل عشان يتعشو سوا.
ودخلت الاكل لحمزة ورهف فى البلكونه واكلو سوا .
بعد وقت طويل كانو خلصو اكلو وبدات رغد وحنين يدخلو الاطباق المطبخ ورغد كانت بتجهز الضيافه .
حنين خرجت من المطبخ وقعدت جمب هدى وهمست:هدهد .
هدى:نعم .
حنين:خلى ابنك التلاجه ده ينطق البت هتهرب منه .
هدى:استنى عليا .
هدى:حسن ياحبيبي .
حسن:نعم ياست الكل .
هدى:قوم ياحبيبي ساعد رغد وشيل معاها الضيافه .
حسن:انا ياست الكل .
هدى:ايوا انت يا نن عين ست الكل يلا اتحرك .
حسن قام ودخل المطبخ ورغد اتفاجات بيه .
رغد:فى حاجه ياحسن ؟!
حسن:لا جيت اساعدك ونحضر الصوانى سوا .
رغد:لا متتعبش تفسك اخرج انت وانا هجيب كل حاجه .... هى رهف اه اللى بتعمل كل حاجه فى المطبخ بس انا مش فاشله لدرجه انك تساعدنى يعنى .
حسن:ومين قال ان. بساعدك عشانك فاشله ... كفايه انك احسن واشطر دكتورة .... واكيد مع الايام هتتعلمى كل حاجه .
رغد ضحكت:شكرااا .
رغد كانت بتحط قطع الجاتوه فى الاطباق .
حسن:طب اساعدك فى ايه طيب بدل مانا واقف كدا .
رغد:ممكن تحط البيبسي فى الكاسات ايه رايك ؟
حسن:تمام .
حسن بدا يعمل زى ماقالت .
رغد خلصت وحسن كمان:كدا خلصنا كل حاجه .... اخرج انت بقي وانا هجيب الصوانى واخرج .
حسن شال الصنيه اللى عليها البيبسي وخرج من غير مايرد عليها ورغد ابتسمت وشالت صنيه الجاتوه وخرجت وراه وبدات تقدم ليهم .
حسن جاله مكالمه وخرج يرد فى البلكونه اللى فى اوضه المرسم عشان البلكونه اللى فى الصاله حمزة ورهف فيها .
هدى:رغد يابنتى اعطى لحسن الجاتوه وحاجه السقعه بتاعته .
رغد:حاضر ياهدهد .
هدى قربت منها وهمست:خدى طبقك معاكى واقفو شويا واتكلمو سوا .
رغد بصتلها اوى .
هدى:انا عارفه ابنى تقيل ومش هيتكلم بسهوله بس خديها منى الواد بيحبك .... لا بيحبك ايه ده بيعشقك يارغد وتلفونه كله صور ليكى .
رغد:بتهرزى ياهدهد .
هدى:لا مش بهزر ياعيون هدهد يلا روحى وانتى بشقاوتك هتخليه ينطق .
رغد ابتسمت:حاضر .
رغد اخد صنيه عليها طبقين جاتوة وكاسين ودخلت البلكونه كان حسن خلص المكالمه وواقف .
رغد حطت الصنيه على السور وبصت لحسن:بتعد النجوم ولا ايه يابطل !!
حسن لف وسند ضهره على السور:لا بشم شويا هوا عادى .
رغد سندت على السور ووقفت جمبه:مش حابب القاعده جوا ولا ايه ؟!
حسن:اكيد لا .
رغد عينها جت على حمزة ورهف اللى واقفين فى البلكونه اللى جمبهم بس فى مسافه .
رغد ابتسمت:مبسوطين اوى ونسو كل الناس اللى قاعدين جواا .
حسن بص عليهم وشايف حمزة بيتكلم وهو فرحان وارتاح لانه كان مضايق بسبب كلام اولفت .
رغد:روحت فين يابطل مركز معاهم اوى كدا ليه ؟!
حسن:هو ايه بطل بطل ليا اسم على فكرة .
رغد:مش بتحب حد يقولك يابطل ! .... وبعدين ماكل شباب الحارة بيقولولك يابطل .
حسن:بس انتى مش زيهم ولا ايه ؟!
رغد مردتيش عليه .
والصمت طال بيهم وقطعه حسن:روحتى فين يادكتورة ؟
رغد بنفس طريقته:هو ايه اللى يادكتورة يادكتورة انا ليا اسم على فكرة .
حسن ضحك اوى ودى كانت اوى مرة رغد تشوفه بيضحك .
رغد:اول مرة اشوفك بتضحك ياحسن ... انت بصراحه بتتعامل كأن الضحك والكلام بفلوس عندك .
حسن:لا مش بفلوس بس ده طبعى ... وبكرة هتتعودى عليا .
رغد بمكر:وهتعود عليك ليه بقا !!
حسن لف وسند على السور بدراعه:الناس بتقول انى جوزك وانتى مراتى .
رغد:احلف ..... اقسم بالله كنت ناسيه الحوار ده ... كويس انك فكرتنى يا ابو على .
حسن ضحك:بطل و ابو على .. هو اسمى مضايقك فى حاجه يارغد !!
رغد:لا بس تحس كدا ان بطل وابو على لايقين عليك اكتر .
حسن:عارفه لو ست الكل سمعتك احتمال تشن حرب عليكى ... دى مسميانى على اسمه جدى .
رغد:ومين قال ان حسن وحش ده حلو جدا ولاقيك عليك اوى.
حسن:اول مرة اعرف ان الدكتورة رغد الصاوى بتخاف !
رغد:بخاف انى ازعل الناس اللى بحبهم .
حسن:امممم .... صح هو مين اللى اكل سد حنك يارغد .
رغد:احم مين مش فاهمه!!
حسن:كنتى انتى وحنين بتتكلمو عليا مش كدا ؟!
رغد:لا خالص وهنتكلم عليك ليه كنا بنرغى عادى .
حسن:هحاول اصدقك يادكتورة رغد .
رغد حيت تغير الموضوع:حلو جداا الخاتم بجد شكراا .
حسن:حسيته شبهك جداا .
رغد:على فكرة الجاتوه قرب يسيح .
حسن:انتى ضيفتينى وانا قلت لأ .
رغد مسكت الطبق:تصدق صح ... اتفضل .
حسن اخده منها:تسلمى .
الوقت عدى بسرعه والشباب والبنات دخلو قعدو معاهم فى الصاله .
محمود:ناوين تعملو الخطوبه امته ياولاد ؟!
حمزة:لسه اسبوع على رمضان ياحاج نعملها قبله .
محمود:هتعملوها فى الارض الفاضيه .
رهف:لو سمحت ياعمو خليها عائليه يعنى على قدنا بس .
حنين:لسه يارورو احنا عايزين نهيص .
حمزة:اللى رهف عايزاه يانونا وبعدين ابقو هيصو براحتكو فى الفرح .... بعد اذنك ياحاج نعمل الفرح فى العيد .
هدى:وانت هتلحق تجهز شقتك فى شهى يابنى .
حسن:ان شاء الله ياست الكل سبيها علينا .
محمود:ربنا يفرحكو ياولاد ... بكرة باذن الله تاخد عروستك ياحمزة وتروحو تجيبو الشبكه .... ونعملها كمان ٣ ايام باذن الله .
هدى:على خيرة الله .
محمود:نستاذن احنا بقي .
مؤمن:خليكو شويا ياحاج .
محمود:الايام جايه كتير يابنى .
الكل روحو ومؤمن سافر القاهرة والبنات كانو فرحانين .
رهف كانت جواها مشاعر كتير حلوة اتجاه حمزة اللى غمرها بحنيته وحبه .
ورغد اللى كانت مبسوطه من كلام هدى بان حسن بيعشقها وفونه كله صور ليها ... يمكن هو مااعترفش ليها لحد الوقت بس هى فرحانه انهم اتكلمو سوا .
البنات نامو وفى قلوبهم فرحه .
بقلم الكاتبه جنات
ــــــــــــــــ★ـــــــــــــــ
تانى يوم رغد جهزت عشان تنزل العياده .
رهف دخلتلها الاوضه:رغد مش عارفه البس ايه وانا خارجه محتارة جداا.
رغد:انتى بتبقي قمرايه فى ايه حاجه ياقمرى ليه متوترة كدا ؟!
رهف:طب تعالى اختارى معايا قبل ماتنزلى ممكن .
رغد:ممكن ونص وتلاتربع كمان.
رغد ورهف فتحو الدولاب وبداو يختار سوا واخيرا اختارو دريس بلون الابيض وفيه ورد ناعم بلون البينك وطرحه بينك وشوز بلون الابيض .
رغد:كدا هتبقي قمرايه يارهف .
رهف:ربنا يخليكى ليا .
رغد:ويخليكى ليا يامصى التانى .... يلا هنزل انا بقي .
رهف:اوكى .
رغد نزلت وبصت على الورشه واضايقت انها ماشافتش حسن .... وطلعت العياده وبدات يومها بالحالات اللى كانو موجودين .
بقلم الكاتبه جنات
ــــــــــــــــ★ـــــــــــــــ
بعد وقت طويل .
حمزة رن على رهف عشان تنزل وهى كانت متوترة جداا .
رهف نزلت وحمزة لما شافها ابتسم وبيحمد ربنا فى سره ان ربنا جعلها من نصيبه .
ام فرح نادت على رهف:رهف يابنتى .
رهف:ازيك ياام فرح ؟
ام فرح سلمت عليها وحضنتها:مبروك يابنتى فرحتلك من قلبي والله.
رهف:الله يبارك فيكى .
حمزة قرب منهم:عامله ايه ياام فرح ؟
ام فرح:بخير يا بنى الف مبروك .
حمزة:الله يبارك فيكى ياام فرح .
حمزة مسك ايد رهف وهى اتكسفت:عن اذنك احنا ياام فرح .
ام فرح:اذنك معاك يابنى ربنا يفرحكو يارب .
حمزة فتح باب العربيه لرهف اللى ركبت ولف ركب جمبها وبصلها شايفها وهى متوترة وبتفرك فى صوابعها .
حمزة:لا ابوس ايدك بلاش توترك من اولها ماشي .
رهف ابتسم وحمزة ضحك:ايوا كدا خلى دونيتى تنور بابتسامتك يارهف .
رهف بصتله وابتسمت وحمزة اتحرك بالعربيه .
بقلم الكاتبه جنات
ــــــــــــــــ★ـــــــــــــــ
فى بيت البطل وتحديدا على السطح .
حنين بعد ماخلصت دروس للولاد قاعده وماسكه فونها ودخلت على اكونت مؤمن وبدات تتفرج على صوره اللى منزلها واللى كانت اكترهم صوره هو ولارا .
كان نفسها تشوف صورة لمراته ... هى كانت سالت رغد وهى قالتلها انها اتوفت وهى بتولد ... ورهف كانت بتقولها ان لارا نسخه من مامتها تقى الله يرحمها.
حنين كانت بتكلم نفسها بصوت عالى:معقول كان بيحبها لدرجه دى .... عشان كدا متجوز لحد الوقت .... بلاش تفكرى كتير ياحنين هتتعبي قلبك على الفاضي ... هو عايش لبنته ولو عايز يتجوز كان اتجوز من زمان دى مراته متوفيه من ٦ سنين .
عزة كانت قبلها طالعه السطح وسمعت كل كلمه قالتها حنين وابتسمت بخبث ونزلت بسرعه تقول لامها على اللى سمعته .
حنين قفلت فونها وقامت عشان تنزل تساعد هدى فى المطبخ .
بقلم الكاتبه جنات
ــــــــــــــــ★ـــــــــــــــ
فى محل الدهب كان حمزة ورهف قاعدين وبيختارو شبكتها .
رهف اختارت دبله ساده وتوينز رقيق واسورة وخاتم بنفس الرقه .
حمزة طلب من صاحب المحل يجبلهم طقم كامل .
رهف بهمس:حمزة كفايه عشان خاطرى احنا اشترينا حاجات كتير وشكلهم غالين جدا .
حمزة:مافيش حاجه تغلى عليكى يارهف .
رهف:طب كفايه كدا عشان خاطرى لو سمحت .
حمزة:لو سمحتى انتى بلاش تزعلينى واختارى طقم كمان بس مش هنجيب حاجه تانيه .
رهف:مانت جبتلى طقم فى الفاتحه ياحمزة .
حمزة:اديكى قولتيلها ده فى الفاتحه ... اما دى الشبكه ... الراجل جاى اهو .
صاحب المحل جابو اكتر من طقم ورهف اختارت طقم بسيط ورقيق جدا وحمزة حاول معاها كتير انها تاخد طقم تقيل بس هى رفضت .
حمزة جاب دبله سودا ليه ودفع الحساب وخرجو من المحل وهو ماسك ايد رهف .
رهف:هنروح بقي ؟
حمزة:زهقتى منى بسرعه كدا !
رهف ضحكت:لا ابدا والله ... بس احنا اشترينا الشبكه وخلصنا .
حمزة:لا لسه مش خلصنا .
رهف:لسه ايه ؟!
حمزة:العروسه اكيد هتلبس فستان فى الخطوبه ولا ايه !!
رهف:انا هابقي انزل مع رغد ونشترى سوا .
حمزة:ولو قولتلك انى عايز اختار معاكى هترفضي وتكسفينى .
رهف:اكيد لا .
حمزة:تحبي تشترى من مكان معين ؟!
رهف:انا اصلا معرفش حاجه هنا فى اسكندريه انت ناسي انى كنت عايشه فى القاهرة !
حمزة:صح ... طب تعالى هاخدك المكان اللى حنين بتجيب منه دايما .
حمزة ورهف ركبو العربيه وبعد شويا وصلو المحل .
البنت لما سالتها تحبي لون معين كان رد حمزة:ابيض وبسيط .
رهف ابتسمت لانه عارف هى عايزة ايه وكان مبسوطه باهتمامه وحبه اللى مش بيخجل انه يظهره ليها فى مكان وده فكرها بباباها جمال الصاوى اللى كان بيعشق والدتها مريم .
بعد وقت طويل خلصو ورجعو على الحارة . حمزة نزل من العربيه ولف فتح الباب لرهف اللى نزلت .
حمزة وصلها لحد باب البيت:هتصدقينى لو قولتلك ان النهارده كان تحلى يوم فى حياتى .
رهف ابتسمت بكسوف:وانا كمان اتبسطت جداا .
حمزة:طب الحمدلله كنت مفكر انك زهقتى منى .
رهف بصتله:ليه بتقول كدا ؟!
حمزة:اصلك كل شويا تسالينى هنروح امته هنروح امته .
رهف:كل الحكايه انى ماكنتش حابه اتاخر بس .
حمزة:عارف يلا اطلعى .
رهف:حمزة انت المفروض تاخد الدهب عشان تفرجه لهدهد وحنين والكل .
حمزة:لا انا عايزه يبقي معاكى يلا اطلعى بقي .... هابقي اكلمك بليل .
رهف:حاضر .
رهف طلعت وحمزة راح على الورشه ودخل المكتب لحسن .
حسن:ايوا الناس اللى بتتفسح طول اليوم وسايبه شغلها .
حمزة ضحك وقعد على الكرسي:متحاولش انا مبسوط ومش ناوى اعكر مزاجى النهارده ابدااا .
حسن ابتسم:ربنا يفرح قلبك ياصاحبي .
حمزة:عقبالك يا بطل .
حسن:على اساس انى لسه هتقدملها ... انا اخدتها من اصرها واتجوزنا علطول .
حمزة:اتجوزتو سوكيتى ياحسن ... ده انت حتى ماعترفتش بمشاعرك ليها لحد الوقت .
حسن:مش لما اتاكد من مشاعرها هى الاول .
حمزة:انا اعتقد لو هى وافقت على زواجها منك عشان خاطر تنقذ اختها ... كنتو عملتو تمثليه وخلاص ده .
حسن:تمثليه ازاى يعنى؟!
حمزة:انت قولت ان عمها وابنه عمها صدقو انها اتجوزت ومسالوش حتى على قسيمه الجواز ده شكلهم ناس غبيه اوى ياعم د
حسن رجع بضهره وسند على الكرسي:لا عمها مش سهل خالص انا شوفت نظراته ... على دماغ بتفكر فى كل كلمه وانا متاكد انه مش هيعدى اللى حصل بساهل .
حمزة:معنى كلامه انه ممكن يفكر يأذيهم .
حسن:اكيد هيفكر ينتقم على اللى رغد عملته .
حمزة:بس فى فرق حاليا ... احنا معاهم واكيد مش هنسمح لراجل ده وابنه انهم يقربو منهم .
حسن:اكيد طبعااا .
حمزة:طب يلا عشان نمشي .
حسن قام وقف:يلا .......
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق