رواية الشادر الفصل الثامن عشر والتاسع عشر بقلم ملك إبراهيم
رواية الشادر الفصل الثامن عشر والتاسع عشر بقلم ملك إبراهيم
#الفصل_18
#رواية_الشادر
#ملك_إبراهيم
سبحان الله وبحمده سبحان الله العظيم.
بسم الله توكلنا على الله ❤️
🌿🌺🌿🌺🌿🌺🌿🌺🌿🌺🌿
لو سمحتم متنسوش لايك وكومنت قبل القراءة عشان تثبتوا متابعتكم
لحظات قليلة ونزلت جميلة مع تسنيم. حمزة قلبه خفق بعنف اول ما عينيه شافت حبيبته، الوحيدة اللي قادرة تتحكم في مشاعره بمجرد ما تظهر قدام عينيه. غمز حمزة لـ ثريا عشان تاخد تسنيم ويقعدوا في الخلف، حاولت ثريا ترسم ابتسامة مزيفه على شفايفها تخفي خلفها حزنها وغضبها وغيرتها على بدر. اتكلمت ثريا مع تسنيم وطلبت منها تقعد معاها في الخلف عشان تتكلم معاها. جميلة كانت واقفة وعينيها منخفضه في الارض. مرفعتش عينيها لحظة واحده عشان تشوف حمزة. ركبت جنب حمزة في الامام وثريا وتسنيم في الخلف. اتحرك حمزة بالسيارة وهو بيفكر ازاي هيقدر يصالحها لانه عارف انها عنيدة جدا.
اتكلم حمزة وهما في السيارة وسألهم يحبوا يروحوا فين؟ اتكلمت تسنيم بحماس وقالت:
- نروح الملاهي
اتصدم حمزة وبص لجميلة. كتمت جميلة ضحكتها وهي بتخفض وجهها. ثريا كانت قاعده حزينه ومش مركزة معاهم. همس حمزة لنفسه بصدمة وهو مش مصدق انه يروح ملاهي!! سمعته جميلة وحاولت تكتم ضحكتها قدر الامكان لكنها فشلت وظهرت ضحكتها على ملامحها الرقيقه ونظرت لحمزة بقلة حيلة. نظر حمزة لـ تسنيم في المرايا اللي بتعكس صورتها امامه وقالها:
- طب ايه رأيك نروح مطعم ولا آي مكان هادي احسن؟
اتكلمت تسنيم بحماس:
- في هناك مطعم اقعدوا انتوا فيه وخلوني انا في الملاهي
نظر حمزة لـ جميلة وشاف ابتسامتها وهي بتخفض وجهها، استسلم لرغبة تسنيم وخدهم الملاهي. طلب من جميلة انها تقعد معاه في المطعم يتكلموا شويه وثريا وتسنيم يروحوا يشوفوا الألعاب.
اتحركت ثريا مع تسنيم وهي شاردة في بدر وبتسأل نفسها ياترى بيعمل ايه دلوقتي مع البنت اللي بيحرسها دي! ياترى شكلها حلو وهتعجبه ولا لأ؟ افكار كتير كانت بتوجع قلبها وتزود غيرتها عليها.
عند حمزة وجميلة.
قعد حمزة قدام جميلة وهو بينظر لها ومش مصدق انها قاعده قدام عينيه. اتكلم معاها بهدوء وقال:
- عاملة ايه يا جميلة؟
هزت راسها بالايجاب وهي بتخفض وجهها و ردت عليه بخفوت وقالت:
- الحمدلله
اتكلم حمزة بهدوء:
- انا عارف انك زعلتي امبارح لما انا مشيت بسرعه من غير ما افهمك انا رايح فين وايه السبب اني اسيب اجمل يوم في حياتي وامشي
غضبت جميلة وهي بتفتكر اللحظة اللي سابها فيها ومشي. اتكلمت معاه بتهور ونرفزة:
- والله انا مش مستغربة خالص لان واضح جدا ان السبب اللي انت مشيت عشانه عندك اهم مني
استغرب حمزة وقالها بثقة:
- بس انا معنديش اهم منك يا جميلة. انتي عارفة كويس انا بحبك قد ايه وانتي أغلى حاجة في حياتي انتي وامي واختي
خجلت جميلة من اعترافه بحبه لها بالثقة دي. اتكلم مرة تانيه وقال:
- انتي عارفه يا جميلة اني سبت شغلي القديم ودلوقتي بشتغل مع رجل اعمال كبير وانا المسؤل عن حماية شغله وحماية اهل بيته وامبارح لقيته بيكلمني وبيقولي ان بنته اتخطفت وطلب مساعدتي.
اتصدمت جميلة واستمعت لباقي حديثة بفضول واهتمام. تابع حمزة كلامه وقال:
- طبعا مكنش ينفع اتأخر عليه لان ده شغلي وانا المسؤل عن حمايتهم.
اتكلمت جميلة باهتمام:
- وعملتوا ايه؟ لقيتوا البنت؟!
رد حمزة بثقة:
- الحمد لله قدرت ارجعها امبارح من المكان اللي كانت مخطوفه فيه
ابتسمت جميلة براحة وهي بتنظر له بحب. متعرفش نظرتها دي عملت فيه ايه، قلبه كان بيخفق من شدة السعادة، خجلت جميلة من نظراته ليها. اتكلم من قلبه وقالها بصدق:
- نفسي تعرفي انا بحبك قد ايه يا جميلة ومستعد اعمل أي حاجة في الدنيا عشانك وعشان اشوف نظرة الحب والرضا دي في عينيكي
خجلت جميلة من كلامه اللي خطف قلبها. كان نفسها تصارحه هي كمان بحبها ليه بس كان صعب عليها تعترف بلي في قلبها. اتكلمت معاه بهدوء وقالت:
- انا محتاجة منك وعد واحد بس يا حمزة وانا متأكدة انك هتوفي بوعدك ليا العمر كله
استغرب حمزة وسألها بفضول:
- وعد ايه؟!
اتوترت جميلة وحاولت تكون قوية قدامه وقالت:
- توعدني انك مترجعش لشغلك القديم مهما حصل. مش عايزة في يوم اندم اني وفقت اكون مراتك واشيل اسمك
ابتسم لها حمزة واتكلم بثقة وتأكيد:
- اوعدك يا جميلة
ابتسمت بسعادة وقلبها كان بيخفق بين ضلوعها من شدة السعادة. قربت منهم تسنيم واتكلمت بحماس:
- انتوا هتفضلوا قاعدين كده! تعالوا معايا انا زهقت
كتم حمزة غيظه من مقاطعتها ليهم واتكلم معاها بهدوء:
- مش ثريا معاكي؟
ردت تسنيم بملل:
- ثريا واقفه وملهاش مزاج تلعب وانا زهقت وعايزة اروح
كتمت جميلة ضحكتها وهي بتنظر لحمزة وقالت له:
- خلاص خلينا نروح
نظر لها حمزة باستسلام وهز راسه بالموافقة. وقفت جميلة واتحركت مع تسنيم عشان يروحوا لـ ثريا، ووقف حمزة وهو بيتمنى يجي اليوم اللي يتجوز فيه جميلة ويبقوا لوحدهم ومفيش حد يقاطعهم ابداا.
*****
امام فيلا فؤاد المنصوري لزوجته الاولى.
وقف بدر قدام السيارة ينتظر خروج بنت فؤاد المنصوري.
خرجت صافي من الفيلا بحماس وهي فاكره ان حمزة هو اللي في انتظرها. اتفاجأت بواحد تاني، قربت منه واتكلمت معاه بستغراب:
- انت مين؟
رد بدر بهدوء:
- انا بدر اللي هكون معاكي لحد ما ارجعك للبيت تاني
نظرت حولها وقالت بفضول:
- اومال حمزة فين؟
اتكلم بدر بهدوء:
- حمزة مشغول شوية ومقدرش يجي وطلب مني اجي انا
بهتت ملامحها بالحزن. لاحظ بدر تبدل ملامحها واستغرب لهفتها في السؤال عن حمزة. وقفت تنظر حولها باحباط وقالت بحزن:
- خلاص انا مش هخرج النهاردة، انا هرجع البيت تاني شكرا
اتحركت من قدام بدر ورجعت على الفيلا تاني. وقف بدر مصدوم من ردت فعلها واستغرب. قرر يرجع على بيته يرتاح وهو مطمن ان كرم هيكون في الشادر ومسؤل عن حمايته الليلة وبنت فؤاد المنصوري خلاص مش هتخرج وكل حاجة ماشية تمام.
*****
بداخل شادر الخشب.
قعد كرم مع تلاته من الرجالة اللي بيساعدوه في تأمين الشادر وحمايته. كرم الوحيد اللي كان عارف انهم مش مجرد بيحرسوا خشب بس! كان عارف ان الشادر مليان مخدرات وقام وقف يلف في الشادر وكأنه بيأمن على شحنة الخشب الموجودة في الشادر. افتكر كلام زوزو معاه لما قالتله ان جوزها بيخزن المخدرات في صناديق من الخشب وبيخفيها وسط الخشب. شاف واحد من الصناديق وعرف مكانه وكان بيفكر في الغدر بحمزة وفي نفس الوقت يطلع كسبان. الوقت في الليلة دي كان مناسب له. حمزة مشغول في خطوبته من جميلة وبدر بينفذ مهمة كلفه بيها حمزة بعيد عن الشادر. مفيش غير الـ 3 رجاله دول اللي عايز يتصرف معاهم عشان يقدر يعمل اللي هو عايزه من غير ما حد يحس بيه. ولازم قبل آي حاجة يعطل كاميرات المراقبة اللي ماليه الشادر عشان محدش يعرف ان له يد في آي حاجة هتحصل. الموضوع كان صعب ومحتاج تخطيط كتير وفي نفس الوقت هو ميضمنش ان الفرصة دي هتيجي له مرة تانيه وبدر وحمزة يبقوا مشغولين زي الليلة دي.
خد قراره بسرعه انه هينفذ النهاردة ويسرق صندوق من اللي فيهم مخدرات وبكده هيحصل مشكلة بين فؤاد وحمزة لان حمزة المسؤل عن كل حاجة في الشادر. قرب من الرجالة وادعى انه تعبان ومحتاج يروح الصيدلية يجيب علاج بسرعه ويجي. الرجالة صدقوه وراح الصيدليه وهو بيفكر ازاي هينفذ خطته بدقه ويطلع كسبان وفي نفس الوقت ينتقم من حمزة من غير ما حد يعرف ان هو اللي خطط لكل ده. وقف قدام الدكتور الصيدلي وطلب منه منوم يكون مفعوله قوي جدا ويقدر يحطه في شاي او عصير. استغرب الدكتور من طلبه وكرم فهمه انه مش قادر ينام بقاله كام يوم ومحتاج الدوا ده ضروري. الدكتور صدقه واداه الدوا المطلوب. كرم خد الدوا ورجع على الشادر. استقبله الرجالة بقلق عشان يطمنوا عليه، قالهم ان الدكتور اداه حقنه وقاله اشرب كوباية شاي وارتاح شويه، وصمم ان هو اللي يعمل الشاي لنفسه وعرض عليهم يعملهم معاه. بعد وقت قليل كرم عمل شاي ليهم هما الاربعه وحط فيه منوم في تلات اكواب من الشاي وعزم على الرجالة وشربوا الشاي وهما قاعدين يتكلموا مع كرم وبدأ مفعول المنوم يظهر عليهم واستسلموا للنوم بعد لحظات.
وقف كرم وهو بيفكر ازاي ينفذ مهمته بدقة واحترافيه. قرب من سكينة الكهرباء اللي مسؤلة عن تغذية الشادر بالكهرباء وفصلها. قطع الكهرباء عن الشادر وأصبح الظلام محاط بالشادر وانعدمت الرؤية. كده اطمن كرم ان حتى لو الكاميرات بتسجل بدون كهرباء يبقى الأكيد انها مش هتقدر ترصده في الظلام ده.
اصبحت المهم اصعب؛ ازاي هيقدر يوصل للصندوق الخشب اللي فيه مخدرات؟ بدأ يتحرك في الشادر وسط الظلام لحد ما وصل للمكان اللي فيه صندوق المخدرات. اعتمد على حاسة اللمس وقدر يحدد مكان صناديق المخدرات وخد واحد وخرج بيه من الشادر وسط الظلام. خطته كانت غبيه لكنه كان شايف نفسه الافضل! خد الصندوق الخشبي ورجع بيه على بيته. الوقت كان اتأخر وبقى في منتصف الليل. قلقت أمنية لما شعرت ب كرم وهو داخل البيت في الوقت المتأخر ومعاه صندوق خشب ودخل بيه على غرفته بسرعه ورجع خرج تاني من الغرفة بدون الصندوق وخرج من البيت ورجع على شغله..
امنيه ادعت النوم في الصاله على الارض قدامه لحد ما خرج واطمنت انه خلاص مش راجع تاني دلوقتي.. قامت من مكانها ودخلت غرفة كرم تبحث عن الصندوق بفضول عشان تعرف كرم جايب ايه نص الليل وخرج بعدها.. بحثت امنيه عن الصندوق وشافته اسفل سرير كرم. فتحت الصندوق بفضول وشافت فيه كمية كبيرة من المخدرات. اتصدمت وشهقت بخوف.. فكرت ان كرم بيتاجر في المخدرات! وده شغله الجديد مع البرنس.. خافت وقفلت الصندوق ورجعته مكانه تاني بسرعه وخرجت من غرفة كرم قبل ما والدته تصحا وتشوفها في الغرفة.. نامت مكانها على الارض تاني وهي بتضم جسدها بخوف من كرم ومن شغله الغير القانوني.
عند كرم في الشادر.
رجع كرم الشادر تاني وقعد جنب الرجالة وادعي النوم.
*****
في الصباح الباكر بعد اذان الفجر.
بداخل بيت عم مهران.
استيقظ بدر على صوت باب شقتهم وهو بيتقفل ووالده راجع من صلاة الفجر.
قام بدر عشان يروح يستلم حراسة الشادر من كرم لانه كان المسؤل عن حراسة الشادر طول الليل.
خرج بدر من غرفته وشاف والده قاعد بيقرأ القرأن. قرب بدر من والده وهو بيبتسم له وقرب منه واتكلم معاه بلطف لاول مرة:
- صباح الخير يا ابويا
ابتسم له والده وصدق واتكلم معاه بابتسامة:
- صباحك رضا من الرحمن يا بدر
ابتسم بدر وقال بهدوء:
- انا عايز اقولك حاجة قبل ما اروح شغلي يا ابويا
استغرب والده وسأله بفضول:
- خير يا بدر؟
اتكلم بدر بهدوء وهو بيشعر بشئ غريب لاول مرة يشعر بيه:
- انا بحبك اوي يا ابويا ومش عايزك تزعل مني ابدا. انا عارف اني كتير زعلتك وكسرت بخاطرك، بس انا مش عارف انا ليه كنت بعمل كده! عشان خاطري يا ابويا متزعلش مني ابدا مهما حصل
استغرب والده من كلامه وفتح له دراعه وخده في حضنه. قرب بدر من حضن والده واكتشف انه بقاله سنين مقربش من والده بالشكل ده، كان دايما حاسس ان في حاجز بيمنعه انه يقرب من والده، لكنه النهاردة حاسس بشئ غريب وكأن دي اخر مرة يشوف فيها والده. ربت والده على ظهره بحنان وهو بيدعي من قلبه ان ربنا يهدي ابنه ويجبر بخاطره.
قام بدر عشان يجهز ويروح الشادر وهو مستغرب نفسه النهاردة، في حاجة غريبة بتحركه وهو ميعرفش ايه هي.
*****
في بيت البرنس.
قعدت ثريا على فراشها طول الليل تفكر في بدر والف سيناريو في افكارها عن ليلة أمس وازاي بدر قضى الليلة دي وعمل ايه مع البنت الدلوعه اللي كان معاها.
حمزة كان نايم في غرفته وهو مطمن على شغله اللي متأمن وحبيبته اللي قدر يصالحها ليلة إمبارح.
في بيت جميلة.
جميلة استيقظت من بدري وهي فرحانه جدا بكلام حمزة معاها واعترافه لها بحبه الكبير ووعده لها انه مستحيل هيرجع لشغله القديم وكانت بتفكر في مستقبلهم مع بعض.
*****
عند الشادر.
وصل بدر الشادر واتفاجئ ان كرم وكل الرجالة نايمين في نفس الوقت والكهرباء مش شغاله. قرب منهم بدر وصحاهم من النوم وسألهم ايه اللي حصل.. قعدوا يبصوا لبعض بستغراب ومحدش فيهم فاهم حاجة ولا عارف هو نام ازاي. كرم اتقن التمثيل وادعاء الصدمة قدام بدر. قرب بدر من سكينة الكهرباء وشغلها واستغرب انها اتفصلت بالأيد! مكنش في تفسير للي حصلهم غير ان ممكن يكون الشادر اتعرض للسرقة. دخل بدر بسرعه يطمن على الاخشاب واطمن ان كل حاجة طبيعيه والمكان مترتب وهادي ومفيش أي حاجة ناقصه من الاخشاب قدامه.
الرجالة كان ظاهر عليهم التعب والإرهاق وعدم التركيز. قرب منهم بدر وطلب منهم انهم يرجعوا بيوتهم يرتاحوا دلوقتي وكرم كمان يرجع بيته يرتاح هو كمان وبدر هينتظر لوحده لحد ما الرجالة اللي بيكونوا موجدين في فترة الصبح للحراسة يوصلوا. وطمنهم بدر انه هيكلم حمزة ويفرغوا الكاميرات ويعرفوا ايه اللي حصل بالظبط ويطمنهم.
اتكلم كرم بثقة:
- بس الكاميرات هتصور ازاي والكهربا كانت قاطعه ومفيش حاجة باينه؟!
ابتسم بدر بثقة وقال:
- الكاميرات دي بتصور من غير كهربا وبتسجل كمان في الاضائة الليلية يعني بتصور في الضلمة عادي وبتجيب الصور واضحه كمان
جف حلق كرم من الصدمة! يعني كده هيقدروا يكتشفوا بسهوله ان هو اللي عمل كل ده. واكيد فؤاد والبرنس مش هيرحموه. كان لازم يتصرف بسرعة ويتخلص منهم قبل ما يفرغوا الكاميرات ويعرفوا ان هو اللي عمل كل ده.
#يتبع✍️
#رواية_الشادر
#ملك_إبراهيم
اللهّم إني وكلتك أمري فأنت لي خير وكيل ودبرلي أمري فأني لا أحسن التدبير.
بسم الله توكلنا على الله ❤️
💐🌼💐🌼💐🌼💐🌼💐🌼
جف حلق كرم من الصدمة! يعني كده هيقدروا يكتشفوا بسهوله ان هو اللي عمل كل ده. واكيد فؤاد والبرنس مش هيرحموه. كان لازم يتصرف بسرعة ويتخلص منهم قبل ما يفرغوا الكاميرات ويعرفوا ان هو اللي عمل كل ده.
كرم مشي من الشادر وهو بيفكر بمكر ان دي فرصته الاخيرة ولازم يبلغ عن الشادر والمخدرات اللي فيه ويسجن فؤاد والبرنس عشان محدش فيهم يلحق يكتشف ان هو اللي سرق الشادر. قرب من اول كشك قابله وطلب يعمل مكالمة واتصل على الشرطة وبلغهم ان في مخدرات في شادر اخشاب كبير وان اصحاب المخدرات دي صاحب الشادر فؤاد المنصوري واللي مسؤل عن حماية المخدرات وتوزيعها حمزة البرنس وقالهم على العنوان وقفل المكالمة بسرعه.
*****
بداخل مبنى مكافحة المخدرات.
اتكلم احد الضباط مع زميل له وقال بثقة:
- في اخبارية جاتلنا عن وجود كمية كبيرة من المخدرات في شادر خشب كبير ولازم نتحرك في اسرع وقت
رد الضابط الاخر:
- والاخبارية دي من مصدر موثوق به؟
اتكلم الضابط الاول:
- الإخبارية بلاغ من مجهول وانا طلبت تحريات عن الشادر ده ومين صحبه ومين اللي بيأمنوا الشادر بس لازم نتحرك بسرعه
هز الضابط الثاني راسه بثقة وقال:
- تمام وانا هجهز القوة اللي هتطلع معانا للضبط
*****
عند بدر بداخل الشادر.
بدر وقف بداخل الشادر لوحده بعد ما كرم والرجالة مشيو. وقف بدر وهو مستغرب ايه اللي حصل ورفض انه يكلم حمزة يبلغه على الصبح كده ويقلقه وقرر يبحث بنفسه في الشادر عن أي شئ يكون مش طبيعي يمكن يفهم ايه اللي حصل. خد وقت في البحث الاول في كل مخارج ومداخل الشادر والنوافذ للتهوية وكل شئ كان متأمن كويس. بدأ يبحث وسط الاخشاب نفسها ولفت انتباهه صناديق خشبيه موضوعه وسط الاخشاب بطريقة عشوئية. قرب من احد الصناديق وخرجه من وسط الاخشاب وفتحه واتصدم لما شاف اللي جواه.
في نفس الوقت كان رجال الشرطة وصلوا الشادر يتأكدوا من البلاغ اللي جالهم. اقتحموا الشادر بسرعه وبدر واقف مصدوم قدام صندوق المخدرات. مقدرش يتحرك من مكانه او يقول أي حاجة. لحظات قليلة جدا وانتشر عدد كبير من رجال الشرطة في الشادر وبدأو يبحثوا عن المخدرات لتأكد من صحة البلاغ.
وقف بدر قدام الصندوق الخشبي اللي فيه مخدرات وهو مصدوم ومش قادر يتحرك ومش مصدق اللي بيحصل حواليه ووجود مخدرات في الشادر اللي هما بيأمنوه. اسئلة كتير كانت في افكاره وملهاش اجابات؛ مين صاحب المخدرات دي؟ وازاي اتحطت في الشادر هما ميعرفوش! كان واقف مزهول ومش قادر يستوعب كل اللي بيحصل حواليه. رجال الشرطة اكتشفوا ان الشادر فيه كمية كبيرة جدا من المخدرات وتأكدوا من صحة البلاغ. تم القبض على بدر متلبس وسألوه مين صاحب الشادر؟ رد بدر بتوتر وقالهم ان الشادر ملك فؤاد المنصوري. رجال الشرطة خدوا بدر وتحفظوا على الشادر بكل محتوياته.
*****
عند فؤاد المنصوري.
اتصل عليه مدير اعماله وبلغه بخبر اقتحام رجال الشرطة للشادر والتحفظ علي كل المخدرات اللي فيه والقبض على بدر صاحب البرنس.
اتفزع فؤاد من الخبر والصدمة. وقف من مكانه وصرخ في مدير اعماله بجنون:
- والحكومة عرفوا منين ان في مخدرات في الشادر؟
رد مدير اعماله بتوتر:
- معرفش يا باشا، يمكن حد من التجار المنافسين!
اتكلم فؤاد بثقة:
- مستحيل حد منهم يعمل كده، طول عمرنا بنتنافس والحكومة ملهمش مكان في وسطينا
اتكلم مدير اعماله بتوتر:
- والحل ايه يا باشا دلوقتي؟ زمان الحكومه علي باب بيتك دلوقتي جاين يخدوك انت كمان عشان انت صاحب الشادر
رد فؤاد بثقة:
- وانا معرفش حاجة عن الشادر، مش البرنس ماضي على عقد ان هو المسؤول عن أي حاجة في الشادر
ابتسم مدير اعماله بثقة وقال:
- صح يا باشا
اتكلم فؤاد بتأكيد:
- كلم المحامين بتوعنا وخليهم يكونوا جاهزين ومعاهم العقد اللي بيني وبين البرنس
رد مدير اعماله بالايجاب. اضاف فؤاد بتأكيد شديد:
- وكلم المهندس بتاع الكاميرات وخليه يمسح حالا كل تسجيلات الكاميرات بتاع الشادر، عايز لما الحكومة يجوا يفرغوا الكاميرات ميلقوش أي حاجة، عشان لو فرغوا الكاميرات وشافوا ان المخدرات دخلت الشادر مع شحنة الخشب يبقى انا اللي هشيل القضيه مش البرنس
رد مدير اعماله بتأكيد:
- اطمن يا باشا اعتبره حصل
قفل فؤاد المكالمة وهو بيلعن في سره الحظ وحجم الخسارة اللي اتعرض لها في شحنة المخدرات دي بس المهم عنده دلوقتي انه يخرج من القضية والبرنس او أي حد من رجالته هو اللي يشيل القضية.
*****
قدام الشادر وصلوا رجالة البرنس اللي مسؤلين عن حراسة الشادر في فترة الصباح. اتصدموا لما عرفوا اللي حصل وشكرو ربنا انهم مكانوش موجدين والا كان زمان الشرطة خدوهم مع بدر.
اتصل واحد منهم على البرنس عشان يبلغه اللي حصل.
*****
في بيت البرنس.
استيقظ حمزة على صوت نغمة موبيله. لقى واحد من رجالته اتصل عليه اكتر من مرة. رد عليه حمزة بقلق:
- خير يا مصطفى اتصلت عليا اكتر من مرة ع الصبح؟
اتكلم مصطفى بصدمة:
- انت فين يا برنس؟
اتكلم حمزة بستغراب:
- انا في البيت! ايه الحكاية؟
رد مصطفى بصدمة وهو حزين على بدر:
- الشادر طلع مليان مخدرات والحكومة جات وقبضوا على بدر
انتفض حمزة من مكانه بصدمة وصرخ بصوت عالي في التليفون وقاله:
- مخدرات ايه وحكومة ايه اللي خدوا بدر انت اتجننت!
اتكلم مصطفى بحزن شديد:
- والله يا برنس هو ده اللي حصل واحنا حظنا اننا جينا متأخر شوية بعد ما الحكومة جم وخدوا بدر لوحده والشادر طلع مليان مخدرات واحنا منعرفش
وقف حمزة يستمع لحديث مصطفى وهو في حالة زهول. تابع مصطفى حديثه بفضول وقاله:
- انت كنت عارف يا برنس اننا بنحرس مخدرات في الشادر مش خشب بس؟
فكر حمزة في فؤاد. لعنه في سره وهو حاسس ببركان من الغضب هيتفجر بداخله. معقول فؤاد قدر يخدعه ويستغله انه يحمي له شغله في تجارة المخدرات! ازاي مخدش باله! ازاي قدر فؤاد يخدعه بالسهولة دي!. المهم دلوقتي هو بدر، بدر ملوش ذنب في اللي حصل ده ولازم يطلع من التهمة دي بسرعه.
قفل حمزة المكالمة وقام يغير ثيابه بسرعه عشان يروح يلحق بدر ويفهم ايه اللي حصل.
رجال الشرطة كانوا اسرع ووصلوا المنطقه عند حمزة وسألوا على عنوان بيته. المنطقه كلها وقفوا مفزوعين من عدد عربيات الشرطة اللي اقتحمت المنطقه ووقوفهم قدام بيت حمزة. ارتفعت الاصوات اسفل بيت جميلة وحمزة. خرجت جميلة والدتها واختها وقفوا في الشرفة يتابعوا اللي بيحصل بصدمة ومفيش حد فاهم ايه اللي بيحصل.
بداخل بيت حمزة، انتهى حمزة من ارتداء ثيابه وسمع صوت خبط على الباب، قرب من الباب وفتح وتفاجأ برجال الشرطة وسأله الضابط بصرامة:
- انت حمزة البرنس؟
رد حمزة بفضول:
- ايوه انا
اتكلم الضابط بصرامة:
- تعالى معانا
وأشار لرجال الشرطة وقالهم:
- هاتوه
قربت والدة حمزة منهم بصدمة وسألتهم:
- هاتوه فين! ايه اللي حصل؟
اتكلم حمزة مع والدته بهدوء:
- متقلقيش يا امي مفيش حاجة
وقفت ثريا جنب والدتها وبكت بخوف على اخوها. اتحرك حمزة مع رجال الشرطة وخدوه معاهم.
بكت والدة حمزة وثريا جنبها بتبكي وبتسألها ايه اللي حصل وليه خدوا اخوها.
بالاسفل.
وقفت جميلة تنظر بصدمة لما شافت رجال الشرطة واخدين حمزة وخارجين من بيته. حمزة كان حاسس انها واقفه وشيفاه في الموقف ده بس مقدرش يرفع عينيه ويشوف نظرت الصدمة جوه عينيها. رجال الشرطة خدوه جوه العربية بتاع الشرطة واتحركوا بسرعه.
جميلة اتحركت من مكانها ونزلت على تحت عشان تفهم ايه اللي حصل.
واحدة من الجيران طلعت بيت حمزة عشان تطمن على والدته واخته بعد ما سمعت بعض الكلمات من اهل المنطقه انهم قبضوا على البرنس لانه بيتاجر في المخدرات.
طلعت جميلة بسرعه على بيت حمزة عشان تفهم منهم ايه اللي بيحصل! وقفت قدام باب الشقه وهي بتسمع جارتهم بتتكلم مع والدة حمزة بتلقائية وبتقولها:
- ايه الحكايه يا ام البرنس؟ صحيح الكلام اللي الناس بيقولوه على البرنس ده؟!
ردت والدة حمزة وهي بتبكي وثريا بتضم والدتها وبتبكي جنبها:
- كلام ايه اللي بيقولوه؟
اتكلمت جارتهم بعفوية:
- بيقولوا ان البرنس طلع بيتاجر في المخدرات هو و بدر ابن عم مهران. قبضوا على بدر وجم قبضوا على البرنس هو كمان وبيقولوا انها قضية كبيرة اوي
شهقت جميلة بصدمة مع شهقة ثريا بعد معرفتها ان بدر اتقبض عليه هو كمان. دخلت جميلة بيت والدة حمزة بخطواته متمهلة وهي بتحاول تستوعب اللي سمعته. قربت من الجارة وسألتها بصدمة:
- مين اللي قال الكلام ده؟
اتكلمت جارتهم بثقة:
- انا سمعته من الناس تحت وفي رجالة من اللي بيشتغلوا مع البرنس كانوا تحت وبيقولوا انهم مكانوش يعرفوا انه بيتاجر في المخدرات بس بدر اتقبض عليه النهاردة الصبح وهو معاه مخدرات كتير وشكله اعترف على البرنس
نظرت جميلة لـ ثريا بصدمة. حركت ثريا راسها بالرفض وهي بتبكي بانهيار. اخوها وحبيبها اتقبض عليهم، رافضه تصدق انهم عملوا كده. لكن جميلة صدقت بسهولة، لكنها كانت محتاجة تتأكد ان اللي سمعته ده، هو ده الحقيقة عشان تاخد قرارها المناسب.
جميلة تركت بيت والدة حمزة ورجعت على بيتها تاني ودموعها محبوسه جوه عينيها رافضه تسمح لها بالنزول قبل ما تتأكد من صحة الكلام اللي سمعته ده.
*****
عند فؤاد المنصوري بداخل فيلا زوجته التانيه.
وصل مجموعة من رجال الشرطه ومعاهم أمر بالقبض عليه، استسلم لهم فؤاد بسهوله وبدون مقاومة وهو بيدعي البرائه وعدم فهم ايه اللي بيحصل.
وقفت صافي تتابع خروج والدها من الفيلا مع رجال الشرطة بصدمة، اتحركت بسرعه على غرفة والدتها المدمنه للمواد المخدرة ومحتجزة بداخل غرفتها من سنين، قعدت صافي جنب والدتها وهي بتبكي وقالت لها:
- مامي الشرطه جم خدو بابي.. هو ايه اللي بيحصل؟
ظهرت والدتها بوجهها الشاحب وعينيها المحاطه باللون الأسود وشعرها المتناثر بطريقه عشوائية، نظرت امامها بحزن وكسرة وقالت:
- متخافيش يا حبيبتي، اكيد في مشكلة في الشغل وبابي هيحلها ويرجع
بكت صافي بخوف بداخل حضن والدتها، نظرت والدتها امامها بحزن وقلة حيلة، هي عارفة بتجارة زوجها في المخدرات من سنين، بعد ما ضحك عليها واخد فلوسها وتاجر بيها في المخدرات، ولما حاولت تعترض على شغله وطالبته بفلوسها؛ قدر يسيطر عليها بعد ما اجبرها على إدمان المخدرات وبقت تحت رحمته وقدر يعزلها بعيد عن كل الناس وبقت مجرد جسد بلا روح، واجبر ابنه على السفر عشان ميفهمش ايه اللي بيحصل.
صافي فاهمة ان والدتها مريضة كانسر زي ما والدها فهمها ومحتجزة في البيت عشان بتتعالج، ووالدتها معندهاش الجرائة تقولها الحقيقه خوف عليها من فؤاد لانه معندوش رحمة ويقدر يأذي بنته هي كمان لو عرفت حقيقته. فضلت الصمت وبنتها بتبكي جوه حضنها وهي بتدعي على فؤاد من كل قلبها وتتمنى ان ربنا ياخد لها حقها منه.
*****
بداخل مبنى النيابة.
قعد فؤاد المنصوري براحة قدام وكيل النيابه وهو بيحقق معاه وقال ان هو ملوش علاقه بمحتويات الشادر والمحامي بتاعه قدم ورق ان حمزة البرنس هو المسؤول الأول والأخير على الشادر وكل محتوياته.
حمزة كان واقف ومش فاهم أي حاجة ولا فاهم إيه اللي بيحصل وكان عايز يطمن على بدر ويفهم منه إيه اللي حصل.
وصل والد جميلة مبنى النيابة ومعاه محامي ومعاه عم مهران والد بدر.
قربوا من حمزة وسألوه ايه اللي حصل وعم مهران سأله على بدر وحمزة آكد انه مش عارف ايه اللي حصل ولا فاهم ايه اللي بيحصل.
وقفوا ينتظروا ويشوفوا ايه اللي هيحصل.
بعد دقايق دخل حمزة غرفة وكيل النيابة عشان يتحقق معاه ووكيل النيابة وجه له تهمة الاتجار في المخدرات بعد ما فؤاد اثبت انه ملوش علاقة بالشادر وحمزة هو المسؤول الأول والأخير وفؤاد اتهم حمزة وبدر بأستخدام الشادر بتاعه مخزن للمخدرات بدون علمه.
وقف حمزة مصدوم من اللي هو بيسمعه.
بالخارج امام غرفة التحقيقات.
ظهر بدر عشان يتحقق معاه هو كمان.
قرب منه والده بلهفة يطمن عليه، بدر كان مصدوم من كل حاجة بتحصل حواليه ومش فاهم ازاي كل ده حصل وهما ميعروفش المخدرات دي دخلت الشادر ازاي!
خرج المحامي الخاص بهم من غرفة التحقيقات وقال قدام بدر ان كل الأدلة والاوراق ضد حمزة وبدر وان فؤاد قدر يخرج نفسه من القضيه بسهولة.
وقف بدر حزين ومصدوم من اللي بيحصل. خرج حمزة من غرفة التحقيقات وقابل بدر قبل ما يدخل. قرب منه حمزة وعانقه بقوة وهو بيأكد له انه مكنش يعرف حاجة فعلا عن المخدرات اللي في الشادر، بدر كان مصدق حمزة وعارف انه فعلا مكنش يعرف حاجة عن المخدرات وعارف ان حمزة كان عايز يتغير بجد ويبدأ حياته من جديد وبدر كمان كان سعيد بحياته الجديدة وكان بيتمنى ان ثريا ترضى عنه وتوافق بيه بعد ما اتغير عشانها، لكن القدر خدعهم هما الاتنين وفجأة بقوا متهمين في قضية ظلم وكل الأدلة ضددهم.
دخل بدر غرفة التحقيقات وهو شارد في ثريا ووالده ووالدة حمزة؛ بيفكر ايه اللي هيحصلهم لو هو وحمزة اتسجنوا في القضيه دي وقضوا اللي باقي من حياتهم في السجن. اكيد والده هيكون وحيد ولو تعب في يوم مش هيلاقي اللي يهتم بيه ويرعاه، ووالدة حمزة ازاي هتعيش في الدنيا لوحدها هي وثريا، مين هيهتم بيهم ويصرف عليهم ويكون السند والحماية لهم. ثريا هتبقى ضعيفة من غير اخوها وهتتبهدل وسط الناس. مستحيل يسمح ان ده يحصل وحبيبته تتأذي وتعيش الحياة التعيسه دي.
قرر بدر ان هو اللي يشيل القضية لوحده ويخرج حمزة منها. سجنهم هما الاتنين هيكون ضرر لاهلهم. وقف بدر قدام وكيل النيابة واعترف بكل جرائة وقال:
- انا بعترف ان انا صاحب المخدرات اللي كانت في الشادر، حمزة ميعرفش عنها أي حاجة، انا كنت بتاجر فيها من وراه، وعشان كده لما اتقبض عليا كنت انا اللي في الشادر لوحدي وحمزة مش بيجي الشادر خالص ولا يعرف عنه أي حاجة، يعني انا بعترف ان انا المسؤول الوحيد والأول والأخير عن المخدرات اللي في الشادر وحمزة ملوش علاقة بأي حاجة
يتبع✍️
تكملة الرواية من هنااااااا
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هنااااااا
تعليقات
إرسال تعليق