مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

 رواية عــروس الجبـــايــش الفصل الحادى عشر والثاني عشر والثالث عشر والرابع عشر والخامس عشر  بــقلم يـــاســـة الموسوي 

رواية عــروس الجبـــايــش الفصل الحادى عشر والثاني عشر والثالث عشر والرابع عشر والخامس عشر  بــقلم يـــاســـة الموسوي 

#عــروس_الچبـــايــش 🌼

بــقلم يـــاســـة الحلقة (11)

الوجع أن تبني أحلاماً 

ويسكنها غيرك  

............................... 

يُمـن :- من بقى مصر عليه اعوف العشة وارتاح رجعت للكنتور اخذت هدوم ورحت للحمام سبحت و رجعت للغرفـه مشطت واجيت تمددت بفراشي ظهري احسه صاير 

نصين من التعب جاي اشتغل شغل الحواوين ما تشتغله وما اصدك يجي الليل حتى بس امدد جسمي وانام 

جرني عليه وحظني و باس گصتي و گـال 

-- الصبح نروح نجهز بيتنا 

-- انا اروح وياك

-- اي و أختاري كل شي بنفسج اريدج تشترين كل شي على ذوقج  

-- شكراً

-- بلخدمه 

ضحكت وانا اباوعله أبستم وضمني بحظنه حيل وگـال 

-- ادري بيج تعبانه وامي مأذيتج بس هانت هذا اخر أسبوع وترتاحين 

-- بجالك وبخيرك ان شاءالله اعيش الراحه والسعادة 

ضحك و رد

-- اللسانج حلو واسوالفج أحبها بس انتِ بخيله ما تحچين ولا تسولفين وياي 

-- لا والله مو بخيله بس انا ما احب احچي هواي ولا احب السوالف هذا طبعي من وانا صغيره

-- هههه اعرف واني اصلاً احب هذا الطبع 

يعني احبه وما احبه 

-- شلون يعني حزوره 

-- هههه احبه بوقت معين واضوج منه بوقت ثاني 

-- وشوكت تحبه وشوكت تضوج منه

-- احبه من اصير عصبي و احچي واعيط وانتِ تبقين ساكته ما تردين و اضوج من تضوجين من شي وتبقين ساكته ما تگولين شبيج ولا شتردين احسج تعاقبيني 

-- لا مو اعاقبك بس انا من جنت صغيرة ماكو شي اضوج منه ابوي عايش وانا مدلله ومن مات واجينا البيت جدي گمت إذا انقهر ما احچي اخاف على امي لا تنقهر واخاف لا ننطك انا وياها 

-- هذا الوضع قبل هسه انتِ يمي يعني إذا ردتي شي لو ضجتي من شي گولي لا تخلين بگلبج 

سكتت ما رديت رجع گال 

-- هاا شو رجعنا سكتنا 

-- شـگول يعني ما اعرف 

-- هههه كل شي لا تگولين تعالي 

حظني و باسني بخدي وراها ضحك وگال

-- شلون خدوم ناعمة يربي 

ضحكت رجع تقرب عليه وانا ويا رحنا بعالمنا ماكو غير دقايق واجانا صوت عمتي تصيح بكل صوتها يُمـن ما يُـمـن فزيت مرعوبه من الصوت ومن گد ما انرعبت من صوتها دفعته من عندي قـوي رفع روحه منـي و حچى بعصبيه 

-- شبييييج 

-- عمتـي تصيح عليه 

وخر منـي بعصاب و دفعني قوي و گال بصوت عالي 

-- خره بيج وبعمتج امشي وليي العمتج انعل حتى الساعه السودة العرفتج بيها 

شلت ثوبي من الگاع لبسته و رديت عليه وانا واگفه مو تسمعها تصيح جاي عليه

-- امشيي من وجهي روحي خدمي هذا قدرج وقيمتج يلاااا ولي من خلقتي 

حصرتني البچيه واختنكت طلعت من الغرفه و هيَ بعدهي تصيح بكل صوتها 

ضليت واگفه يم الباب و احچي وياه روحي 

هسه هوَ ضاج مني انا شعليه غير امه تصيح ما يروح يحاجيها انوب ارد على روحي واگول حقه يعني رجال بعزه نومته ادفعه والله شني امك تصيح عليعه وتصيح شأسويلها 

استغفرالله يا ربي هسه انا الغلطانه لو امه لو هوَ مشيت وباوعت الها من المحجر ورديت عليها

-- ها عمه

-- وعمه العماج مو كتلج سوي عشه

-- مو جنت اسبح 

-- نزلي يلاا 

بسرعه نزلت للمطبخ حضرت العشه

و كملته ورتبته على الميـز ورحت صحتهم اجوا رجعت صعدت اصيحه يجي يتعشه 

سمعته من وره الباب يحچي بالتليفون جان يگول

-- كتلج ما اجي الصبح عندي شغل 

-- اي ادري جمعه شغلي بالبيت مو بالدوام 

-- وانتِ شعليج تسألين 

-- اهوووو شكد تلحين ترى روحي طافرة وگوه صابر مالي خلكج العصر امر عليكم وكافي ملحه 

فتحت الباب وطبيت اول ما شافني بسرعه عدل گعدت و گـال 

-- يلا ماشي 

-- اوك 

-- تمام 

-- باي 

يُـمـن :- العشة كمل انزل تعشة

گام نزل وانا ضليت ما نزلت احس گلبي غده جمر وراسي گام يطلع نار متت 

ياهي هاي و وين يريد يروح و النقال اخذه وياه وحتى لو عايفه هنا ما اعرفله بيه رمز 

ضليت اخذ الغرفه و اجيبها اريد بس تبرد اعصابي ماكو كلي ارجف وگلبي جمر طلعت من الغرفه مديت راسي من المحجر اسمع صوته يتعارك وياه امه شلون تصيح بصوت عالي وليش ما يسون هنَ العشه وترجع عمتي تردله 

-- والله زين حتى بشغل البيت گمت تتدخل وتحط نفسك

رائـف :- هذا مو شغل بيت هذا شغل حيوانات حرام عليج جاي تصعد تنام مثل الميته من التعب وحاطه بيها فزه من صوتج 

-- والله هذا الموجود منو گالها تصير جنتي

-- سهله يصير خير 

-- تهددني شنو

-- لااا العفووو استغفرالله حقج عليه 

حچه هيج وراها سمعت صوت الباب انطبك حيل عرفته طلع رجعت للغرفه 

ميته من القهر هسه انا شمالني ما اكسبه شو جاي يدافعلي و يتعارك وياه امه الخاطري وسوالي بيت و يريد انا الاختار الغراض شبيه ما اعرف ارضيه ليش اخليه يكرهني ويروح يحچي ويا غيري 

وگفت على المرايه واباوع الروحي وصافنه 

هسه هاي منين اليخابر بيها أديان لو غير وحده ما ادري ليش گلبي يگلي هاي اديان 

وما مخرب خطبته منها ويريد يكمل البيت و يحطني بيه ويجيبها هنا بهاي الغرفه وحتى عمتي گالت ما مخرب خطبته يچذب عليج يربي تعبت وحرت ساعدني هسه انا شأسوين 

ضليت واگفه وصافنه بالمرايه اخـر شي فتحت شعري مشطته ولبست طوك حلو جابته امي ويا الغراض فتحت الجراره وحطيت كحل ومسكارة وحمره الخدودي والحلگي من الجابتهن امي حسيت روحي صرت غريبة بس طلعت حلوة 

رحت للكنتور و اخذت سيت من الجابتهن امي لبسته و انا ميته من المستحه استحي من روحي اجر بيه منا ومنا وكوه امشي احسها عيب ما ادري هاي النسوان شلون تلبس هيج لبس وتضل تفتر بيه 

گدام ارجالها ذابات فلك 

رحت وگفت على المراية و احچي وياه روحي شو انا مستخقه ومستهتره شني شجاني هسه شيگول عليه والله زحمه منه 

حطيت ريحه واجيت جريت الغطه

و تغطيت بيه وضليت نايمه على ظهري ومغطيه روحي و صافنه على السكف 

ساعتين وانا صافنه ومغطيه روحي فتح الباب و طب اول ما شفته طب جريت الغطه زايد وغطيت حتى وجهي ضلت بس عيوني طالعه باوع عليه و اگف بمكانه وراها شمر تراكسودة على الميز و اجه يريد ينام جر الغطا ما انطيته بقيت مجلبه بيه 

باوع عليه و رجع جره مره ثانيـة جلبت بيه اكثر گـال بصوت عالي 

-- شبيييج مجلبه بيه شكوو

-- لا ماكو 

سحبه من جديد جريته منه قوي وغطيت وجهي كله حتى عيوني عاد هو هنا جره مني بكل قوته انا بسرعه غطيت وجهي

بـ اثنين اديـه ما اريد اشوف وجهه استحي 

ضحك بصوت عالي وراها گـال 

-- الحمدلله والشكر ربي 

جر ايديه من وجهي و هو يضحك و يگول

-- غير تنطيني خبر بالموضوع ارجع من وكت 

ما احچي بس مغمضه عيوني حيل

-- ههههه ترى مو اني المبدل حتى تغمضين مني شو فتحي 

حچى بهدوء فتحت عيونه وانا كون الگاع تنشك وتبلعني ابتسم و سحبني گعدني گعده ، گعدت گباله 

رائـف :- صدقه الربج شكد حلوة

يُـمن :- انا والله مو قصدي اضوجك بس فزيت من صوت عمتي 

-- ضوجيني يوميه اقبل بس صالحيني بهيج منظر 

..... دعيني ارتوي بكِ عانقيني قبليني خذيني 

الى حديث لا اعلم الى عالمك الجميل عالم الحكايات اللطيفـة دعينا نخوض المغامرات الشيقــة يا سيدتـي لا ترحميني

فـ انا مغرم بتفاصيلك المثيـرة

ولكننـي بذات الوقت مغـرور و بـلمساتك سيـزداد الغـرور احـذري وايـاك

أن تمنعينـي ولا ستكـون النهايــة مخيبـة معيبـة مريبـة   ....  ( بقـلمي يـاسـة) 

الصبح گعدت من وكت سبحت ونزلت حظرت الريوك والميت البيت كله گبل لا يگعدون وطلعت غسلت الحوش ورشيت الزرع و عيوني ليفوك على المشتمل فرحانه 

رجعت صعدت گعدته بس يرد اي وما يگوم ساعه كامله اگعد بيه لحد ما تعبت يلا گام 

بوجهه للحمـام سبح وطلع لگاني اعزل بالغرفه أبتسـم ابتسامـه اول مره اشوفها 

و اجـه عليـه رفع وجهي بـ ايده وباسنـي 

ويگـول

-- تدريـن بوجهج يفتح النفس من الصباحيات

-- ههههه 

-- والله صدك مو شقه وجهج كلش حلو ويفتح النفس 

بقيت ساكته ما اعرف ارد ضحك وگال

-- معجب بيج لدرجة احـب حتـى هذا السكوت ليضوجني 

-- كملت الريوك 

-- ههههه يربي وين اني وين انتِ خرب بالحظ هههه نزلي هسه اجي وراج

نزلت فرحانه بيه صدك كل ما حچه وگـال خرب حظي بس وضعه هسه احسن من وضعه گبل گام يسولف ويضحك ويغازلني شرايد اكثـر 

بس نزلت لگيتهم گاعدين وعمتي جايبه الريوك المحضرته انا و صابته الهم

و گاعدين يتريگون بيه ما حچيت شي بس صبحت عليهم و رحت للمطبخ بلايه ما صوت شي خليهم ياكلونه بالعافية 

وگفت سويت غيره بين ما نزل مبـدل گعدنا نتريت هسه بدينا ناكل و دگ نقال عمتـي ردت وراها صرخت و ضربت على خدها وتگول

-- عزااا العزاني وشلونها هسه 

-- يا مستشفى صخام بعين العدو 

-- يلا جايين جايين

حاكـم :- شكو 

بديعـة :- أديان منتحره وماخذينها للمستشفى 

حچت هيج و هي تمشي سريع الغرفتها 

والباقين نخبصوا حتى رائـف عاف اكله وشال نقاله وطلع برى يخابر 

دقايق وكلهم راحوا بقت بس هاله يمي 

صادف يوم جمعه وماكو دوام ومن وصل هذا الخبر راحوا كلهم 

انقهرت عليها وحطيت اللوم كله عليه وحملت روحي خطيتها وهاله گاعدة ونقالها بيدها كل شوية تخابر تسأل 

لحد العصر وما راجعين بعدهم وياها 

صح كالو زينه وحالتها استقرت بس بعدهي بالمستشفى طلعت المسودنه

شاربه سم بس ملحگين عليها و ماخذينها مسويلها غسل معده 

انا راسي گام يوجعنـي بالليل نمت متأخره و گعدت من الصبح گلت خل اصعد ارتاح شوية وانوب انزل بقيت ساعه فوك و هاي الساعه كتلت روحـي كتل وكل الذنب حطيته بيه انا الاجيت وخربت حياتها كله مني لو ما متزوجته چا هسه مرتاحين 

و الله هاديهـم وحياتهم بخيـر 

بعدني گاعدة وحدي و سمعت صوت عمي و واثٓق بسرعـة لبست حجابي ونزلت لگيتهم جايين بس لا رائـف ولا عمتـي بس واثـق وغـادة و عمـي 

هاله :- بشروني والله متت قلق

واثـق :- خبله واابتليتا بيها 

غـادة :- مسكينـه خربت حياتها و ضاع حبيبها وخطيبها من بين اديها بساع بساع

ما اگول غير الله يجازي السبب 

حچت هيج و صعدت الغرفتها و انا الچان الحايط يتحرك ويحچي فتحت حلگي وحچيت متت بدمي ضليت واگفـه والدمعه خنكتني خنگ 

عمي ما حچه شي عافنا و راح الغرفته

و واثق شمر روحـه على القنفـه 

هاله :- طلعوها من المستشفى لو لا

واثـق :- اي هسه طلعت

-- لعد ماما وينها

-- راحت وياهم 

-- ورائـف همات وياهم

-- اي 

انا افتريت وصعدت فوگ طبيت للغرفه وبچيت هسـه انا تحملت ذنبهـا وكسرت خاطرها واخذت حبيبها بيا وجه اباوع على الناس بعد شتگول عليه العالـم 

ضليت فوك ما نزلت لحد الليل كلـش يلا اجه رائـف فتح الباب وطب بس شفته عدلت گعدت و گتله 

-- الله يساعدك

رائـف :- هلا بيج 

حچى هاي الكلمه و راح للكنتور طلع هدوم وراح للحمام بقى هواي بالحمام ومن طلع عيونه صايره حمر شمر الخاولي على الميز و جر الغطا ونام بلا ما يحچي شي 

وانا نفس الحال نمت بلايه صوت وثاني يوم 

من گعدت البيت هدوء والوضع طبيعي 

عمتي ابد ما حچت ولا فتحت الموضوع وياي توقعتها راح تتعارك وياي و تسويلها هوسة بس جانت ساكته و طبيعية كلش  وهوَ گعد بلاية صوت وبلاية اكل بدل وطلع

يوم يومين ثلاثه اربعه لحد ما صار أسبوع كامل الصبح يروح الدوامه و يرجع الظهر يتغده و يصعد ينام ساعه ويگعد يبدل ويطلع ما يرجع غير بالوحده لو بالثنتين 

لا يحچي وياي ولا يطلب مني شي 

انا من شفته بعد روحه مني ضليت بعيده ولا حچيت وياه ولا ادنيت يمه اسبوع گامل على گد صباح الخير والله يساعدك وهذا هو 

عمتي يوميه وره العشه تروح البيت اختها سميعة ام غـادة وما ترجع غيـر ويا رائـف بالوكت المتأخر 

واليوم مثل كل يوم كلهم بالدوام وبس انا وعمتـي بالبيت هيَ بالصاله والنقال بيدها 

تكتب بيه و انا انظف بالديوانيـة الباب انفتح و طب رائـف وراه طبوا زلم كل واحد لازم خشبه بـ ايده صعدوا بيها للمشتمل 

ضليت واگفـه يم الشباك واباوع عليهم 

يطببون بالخشب وراها مرايه جبيرة وانوب جربايـة عرفتة جاب غرفه نـوم 

صعدوها فوك وما نزلوا بعد وانا رحت للمطبخ اكمل باقي شغلي شويه وشفته نزل وراح على باب الشارع فتحته وطبب زلم جدد وهاي المره غراض مطبخ كاونتر

وطباخ وثلاجة 

گلبي طار من الفرح جاب غراض للبيت وراح اگعد وارتاح واصير مثل العالم عندي بيت وعائلة

اجت عمتـي باوعت من الشباك و افترت على الكاونتر طلعت كهوة حطتها واگفت يمها تحضر بكوبها عين على الطباخ وعين عليهم شلون يطببون بالغراض لحد ما فارت كهوتها اخذتها وراحت بلاية صوت 

جريت الكرسي و گعدت بالمطبخ واسمع صوتهم وهوستهم لحد ما خلص إذان الظهر يلا كملوا وصلهم للباب و اجه بس طب بس شفت ضحكت و گمت من مكاني

يُـمـن :-الله يساعدك

رائـف :- ويساعدج 

-- جبت غراض للبيت 

-- اي 

حچه هيج و طب ضليت واگفه واباوع عليه راح للصاله گعد حرت اروح اشوفهن لو لا شو ما گالي تعاي شوفيهن و ضايج وگـوه يحجي روحه بخشمـه 

طبيت وراه لگيته نايم على القنفه وحاط فوگ وجه الكوشه حچيت وياه

-- يصير اصعد اشوفهن 

جر الكوشه من وجهه شمرها و گـام ويگول 

-- اي يصير ليش ما يصير تعاي 

حچى هيج ولزمني من ايدي اخذني للمشتمل المطبخ يخبل يخبل لونه رصاصي و الغرفه بيضه و تخبل من هاي الراقيه عبالك مال ملوك صليت على محمد وانا اشوف الغراض وباوعت عليه فرحانه 

رائـف :- شنو رائيج

-- يخبلن الله يرزقك وان شاءالله تشوف على عينهن كل الخير 

اجه عليه وجر الحجاب من راسي و باسني وگال

-- يصير نستفتحهن بهذا الوجة الحلو

ما رديت بقيت ساكته ومستحيه منه رجع باسني بخدي و يگول

-- تدرين تستاهلينهن 

-- الله يحفظك 

دنگ عليه يريد يبوسني گتله 

-- بس اجيب هدومنا اول مره

-- لاااا بعدين 

حچى هيج وشالني وانا خربانه من الضحك وفرحانه من كل گلبي طببني للغرفة وسد الباب برجله  

شوية و نقاله دگ وخرني من ايده ورد 

-- ها يـوم

-- اي بالمشتمل 

-- اي وياي

-- شعليج انتِ 

-- ههه والله اعتذر بعد ما تنعاد 

حچه هيج و سده وشمره على ميز الجربايـة و رجع يباوع عليه ابتسمت فرحانه على خجلانه گـال

-- راح اروح دقايق وارجع لا تنزلين ابقي هنا ماشي

هزيت راسي بلا ما ارد گام طلع وانا لبست وگمت افتر بالبيت فرحانه طايرة ما ناقصه شي ابد حتى تفزيون حاط بالصاله شو ما شفتهم صعدو جوز من گعدت صعدو هسه هو كمل الحمدلله بعد عوزه بس هدومنا خل يجي واروح اجيبهن 

طبيت للمطبخ فتحت الثلاجة فارغه وبعدهي ما مشتغله ضليت افتح بخانات الكاونتر فارغات ما بيهن غراض رجع اجه بـ ايده صينيه صغيرة بيها طاوه و اثنين طماطيات وخيار وخبز و بطل زيت وعلية الملح ضحكت واگول

-- شني هاي

-- سويلياهن جوعان

-- انا طابخة جوه خير من الله ليش تاكل طماطه

-- اريدج اطبخين بالمطبخ

-- هههه توازيت عليه اول وتالي اطبخ بيه خل ننزل نتغده جوه ومن نگعد هنا اطبخلك اشكال والوان

حطهن على الكاونتر و طب للصاله و يگول 

-- جوعان استعجلي 

من شفته عاجبه ياكل هيج شغلت النار

و سويت الطماطه و غسلت الخيار اجيت اسويه زلاطه ما جايب مواعين عفته بكبره 

بين ما استوت حطيتها بالصينية واجيت 

لگيته بالغرفه صحته اجه گعد بالصاله 

اكل بلايه صوت حرف واحد ما حجه وانا هم ساكته واكلت وياه على الواهس فرحانه اول اكل اكله بـ بيتي 

بس كملنا شلت الصينيه للمطبخ صاح عليه مشمشة مديت راسي عليه من باب المطبخ والضحكة تارسه وجهي وطايرة من الفرح وگلبي يركص لان صاحني هيج 

أبتسم وهو يشوف فرحتي و گـال 

-- عوفي من ايدج وتعاي 

بسرعه اجيت لزمني من ايدي وگعدني بحظنه وعيونه بعيونـي ويگول

-- انتِ طيبة حيل و حبابة زيادة عن اللزوم 

گلبج نظيف و شكلج يفتح النفس بس حظج زفت 

-- هههه لا والله انا محظوظه بيك وحظي هاكبرة

-- تحبيني 

ابتسمت مستحيه رجع گـال

-- تحبيني 

-- شعندي غيرك حتى ما احبك انتَ صرت كل شي بحياتي 

-- كلش ضجت من ابوي خطبج و دك صدره الاعمامج و جابج هنا غصب عليه 

وجودج جان كلش زاعجني بس ابد ما كرهتج صح ضجت وانزعجت بس ما كرهتج جنت اشكي من وجودج بحياتي

و حاير شلون ارجعج الاهلج واخلص منج لحد ما غركت بيج وحبيتج واني ما حاس على نفسي 

سكت وانا اباوعله واديه احسها صار حاره من گد مستحيه منه اول مره هيج يحجي وياي باسني بخدي و رجع يگول

-- إذا اگلج اني احبج تصدگيني لو لا

-- اي اصدگك وادري بيك تحبني لو ما تحبني ما سويتلي هذا البيت بس حتى ارتاح ما رجعتني من امي من زعلت ما عاركت عمتي على مودي وما خربت خطبتك الخاطري 

-- يا ترى راح تضلين هيج حبابة وفقيرة لو راح تغيرج الايام  

-- ابو طبع ما يغير طبعه وانا هذا طبعي من اول ما جابتني امـي لو تريد الايام تغيرني چا غيرتني من اول ما اجينا البيت جدي وعشنه وياهم

-- اتمنى

-- شوكت نجيب هدومنا 

سكت ما جاوبني بس گام للغرفه واخذني من ايدي اتمدد و حظني لا هو يحجي ولا انا لحد ما غفينا اثنينه وهل النومه نومه لحد المغرب فزينا على صوت الباب يندگ 

ردت اكول افتحه ما خلاني راح هو ثواني ورجع عليه گال

-- هذا بُـرهـان جاي علينه واجت هاله انطتني خبـر لا تنزلين ابقي هنا شوية وارجع

-- هدومي جوه واريد اسبح 

-- من اجي اجيبلج وياي 

راح يشوف بُـرهان وانا ضليت بالبيت ما اسوي شي بس فرحانه طايره من الفرح 

كل شـوية اگوم اباوع عليه وافتر بيه ما مصدگه روحـي 

ساعه ورجع بس ضايج كلش وماله خلك حتى روحـه حط هدومي بالگاع و راح تمدد بالغرفه رحت انا سبحت واجيت فتح اديه وصاحني نمت على ايده 

الصبح گال گومي ننزل نتريك وراها اخذج الامج تفاجأت شعجب راح يوديني الامي من رجعت منها لليوم هو ما يطق يسمع إسمها  كيفت وخفت بنفس الوكت بس ما سألته بقيت ساكته عافني ونزل نزلت وراه محد گاعد بسرعه حطيت الجاي على النار و حظرت الريوك گعدت عمتي جرت الكرسي بدون ما تحجي شي وانا هم ما حجيت وياها شوية وگالت

بـديعـة :- متخجلين من نفسج ماكو عيب عندج 

درت عليها متفاجأة ورديت

-- ليش شمسوية

-- ممسويه شي فقيرة فطيرة مو شوفي وين وصلتينا عائلتنا صارت ناس ضايجة من ناس ناس متتحمل ناس أديان فقدت صحتها و وصلت بيها للأنتحار وين تردين توصلين بعد شوكت تحسين على نفسج وتطلعين من حياتنا ، سوينا زين وياج

و حميناج من القتل هذا جزات احسانا

مو لگيتي امج مترحين يمها متخلصينا من شرج 

درت وجهي منها ورحت للكاونتر طلعت الكلاصات حطيتهن بالصينية رجعت گالت

-- عبالج اكرهج وهيج احجي وياج لا غلطانه اني ما اكرهج بس ما اگدر اتقبلج زوجة الأبني الكبير ابني تعبان على نفسه ودارس وفاهم ومثقف ومرتب وانتِ ابنية ريفيه لا فهم لا علم لا شهادة لا ترتيب لج حتى حچي ما تعرفين تحچين شجابج اله وفوگاها خاطب بنت اختي يعني ابداً ما اگدر اتقبلج بـ اي شكل من الاشكال 

نفس الشي ساكته ما ارد بس احس اختنكت والغصه وگفت بلعومي 

بديعـة :- ابقي ساكته لا تردين ولا تنطين اي ردت فعل بس خلي اگلج شغله كلش مهمه ومنها وعرفي قيمتج واخذي نصيحي لان صدگيني ما راح ترتاحين رائـف ما يحبج ولا يريدج و تمسكة بيج مجرد شفقه وبنفس الوقت مستفاد منج الخدمته لان نحس وكلشي يريده كون على مزاجه واجيتي انتِ على مزاجه تسوين كل شي بدون اعتراض بس اول واخر راح يخلص دورج وينتهي موضوعج 

رحت فتحت الثلاجة طلعت الجبن وانا حرف واحد ما راده من شافتني هيج ساكته وما احجي گامت و گفت وگفه واجت عليه صارت كلش قريبة وحچت بصوت ناصي ما تريد واحد يسمع 

بديعـة :- ابقي بدون إحساس بدون مشاعر وبدون كرامه وخلي اگولج من الاخير باجر حنه رائـف و عگب باجر الزواج والبيت الفرحانه هذا راح يزف بيه حبيبة عمره أديان وانتِ هناا مكانج يمي خدامه لا اكثر ولا اقل 

عافتني وطلعت وانا بقيت لازمه الجبن واگفه صافنه لا چذب ماكو هيج حچي ما اصدگ ابد ابد 

مشيت للصينية شلتها واخذتها للصاله لگيت عمي و رائـف گاعدين صبحت على عمي وحطيت الصينيه بالگاع ومشيت اريد اصعد صاح عليه

رائـف :- وين تعالي تريگي 

يُـمـن :- بالعافية ما اريد راح اكل يم امي

حاكـم :- شنو رايحه الامج اليوم

-- اي 

سكت و باوع الرائـف و رائـف ما انطه اي رده فعل صعدت فوك و عيوني ما صدگت تلگه مكان فارغ حتى تصب براحتها متت شكو قهر بگلبي بچيته و طلعت حرگته بالبچي ومن ارتاحيت رحت للحمام غسلت و بدلت و نزلت لگيته گاعد يدخن وعمي وعمتي والبنات گاعدين يمه من شافوني نزلت سكتوا بسرعه وهوَ گام من مكانه

و گال

-- بس ابدل واجي 

هزيت راسي و رحت للحوش طلعت عيوني صارت على المشتمل صفنت عليه ميته من القهر بگلبي شگد حچي شگد سوالف شگد قهر بس ما اگدر احجي والسكوت موتني 

محد اجاني ولا واحد حچه وياي ربع ساعه وطلع مبدل والسويج بـ ايده مشى گدامي وانا امشي وراه صعدنا بالسيارة محد بينا يحچي شويه و گـال

-- المغرب جاي اطلع للشمال اني و بُـرهان عندي شغل نهاية الاسبوع ارجع ابقي هاي الايام بيت امج ومن ارجع من السفر امر عليج ماشي

هنا حسيت طلقه ونبتت بنص گلبي متت يعني صدگ حچي عمتي و جابني الأمي يريد يعرس إذا راح يعرس شكو عايفني ليش جاي يقشمرني ويسوي روحه يحبني ليش خلاني انام بالمشتمل إذا مو الي والغراض مو غراضي

رائـف :- تعرفين اني وامج مو على وفاق ما راح انزل وياي للبيت 

ما اجاوب رجع گال

-- ليش ساكته بيج شي

--لا ما بيه 

-- ممنوع اطلعين من البيت بدون علمي 

و إذا اجه زوج امج حاولي تقللين احتكاكج بيه خليج بعيدة عليهم بس هالكم يوم فهمتيني 

ما اجاوب من شافني ما ارد ولا اباوع عليه استغفر وسكت لحد ما وصلنا للباب شال فلوس وانطاني 

يُـمـن :- ما اريد شكراً

رائـف :- خليهن مصرف اسبوع كامل راح تبقين هنا خاف تحتاجين شي 

-- رحم الله والديك بس ما احتاج وإذا احتاجيت امي عدها وتنطيني

-- هههه اي بهاي حقج امج عدها فلوس من رجلها الشريف الأمين 

باوعتله وهو نفس الشي باوعلي وهز ايده ورجع يگول

-- ممنوع اطلعين وياها فهمتي مو 

-- اي فهمت 

عفته ونزلت وهوَ بقى بالسيارة دگيت الباب وهو گاعد ويباوع عليه لحد ما فتحت امي الباب وطبيت يلا راح

شهينـاز :- شلونج حبيبتي شخبارج طرت من الفرح من دزلي رائـف رساله گال راح تجين 

-- الحمدلله زينه انتِ شلونج 

-- بخير إذا انتِ بخير تعاي فوتي 

طبينا للديوانية وهي طايرة بيه گامت تحضر بالاكل وجابت الماي والجاي وكل شوية و جايبه حاجه 

ما ادري شلون مر عليه اليوم وشلون خلص كل الوقت جنت گاعده وصافنه وروحي احسها شايطه ثاني يوم امر من القبله نفسي مگطوع وعـيوني تحركني 

ما خابر ولا سأل ولا شافني وانا ميته 

امي شگد فرحانه بجيتي وگاعدة يمي تسولف وتضحك وتجيب وتحط وانا بغير عالم شگد سألت شبيج وليش ضايجة وياهو وياج ما ارد غير بس  مابيه شي

ثالث يوم اللي على اساس يوم عرسه الساعه بـ 3 الظهر خابر على امي وطلب يحچي وياي جاوبته گال

-- شلونج

-- الحمدلله 

-- مشتاقلج

-- بعدك بالشمال

-- اي 

-- شوكت ترجع

-- گتلج نهاية الاسبوع

-- خير ان شاءالله

-- شكو ماكو شسويتي ما سويتي

-- ماكو شي ما سويت گاعدة وساكته

-- زوج امج هنا 

-- لا ما جاي من اجيت الهسه

-- ها زين 

-- اي

-- يُـمــن تدرين بيه احبچ

-- اي ادري واثقه بيك كلش 

سكت ما رد بقى ساكت شوية وانا ساكته وراها گـال

-- شنو تردين اجيبلج وياي من ارجع

-- سلامتك ما اريد غير تبقى سالم الي وهذا هو 

-- راح اروح هسه عندي شغل وبعدين اخابرج ديري بالج على نفسج 

-- الله وياك 

سد الخط وراح وانا حطيت راسي بين رجليه وبچيت بچي روحي احسها طلعت اجت امي تركض على صوتي تسأل شبيج ما ارد گاعدة گبال و تسأل تريد بس تفهم 

ماكو ما اجاوب بس ابچي بصوت عالي وبحرگه گلب لحد ما تعبت عفتها وگمت غسلت وجهي ورجعت عليها لگيتها گاعدة بمكانها وصافنه بموضوعي گالت الها 

يُمـن :- گومي وديني للبيت 

يتبع.....

#عــروس_الچبـــايــش 🌼

بــقلم يـــاســـة الحلقة (12)

فكرة انه أختار ان يسكن في مدينتي مع حب جديد يخصه اوجعتني، والطريقة التي 

أستطاع بها المضي قدماً جعلتني أدرك الفرق بين المدينة والوطن فأنا أحببته 

كـ وطن لا وطن لي غيره بينما هـوَ احبني كـ مدينة يرحل عنها ويعود اليها متى شاء

ليست كل المدن اوطان لنا و سيضل ذلك الحب القديـم يسكن مدينتي حتى يقبر بها دون ان يجـد مدينـة أخرى تحملـه..... 

.......................... 

يُـمـن :- اخذيني للبيت

شهيناز :- ياا شسوين بالبيت إذا رائف مسافر وجابج هنا

-- يماا اخذيني فدوة رحتلج

-- ليش تردين ترحين سويت شي ضوجج وما ادري

-- لا ما سويتي بس انا اريد اروح الله عليج يما اخذيني فدوة رحتلج

-- شبيج شكوو غير افهم السالفه اول مره

-- راح اموت گلبي جمر جاي احترك ولج يما جاي احترك لهيب بروحي گومي وديني

-- يا ستار يا ربي شبيج

-- بس خل اروح واشوفه بعيني بس خل يطلع اللي بالي چذب مو صدگ

-- شنو اللي بالج غير افتهم

-- بس اخذيني وانا احچيلج

سكتت وتباوع عليه حايرة بحالتي شوية وگالت گومي نروح ركضت لبست بسرعة هدومي و حجابي و طلعنا وانا الف دعاء دعيت كون اتخايل و كون حچي عمتي چذب كون ماكو هيج سالفه و الطريق صار شطوله عليه

إديه على گلبي و عيوني على الشارع و افور و الخوف ياكل بروحي لحـد ما وصلنا الشارعهم انا وصلت وانا تمنيت السيارة طولت والبيت صار بتلفات الدنيا تمنيت متت بالدرب وما وصلت وشفت هاي الشوفه 

الشارع متروس ناس و الفرح مبين بوجه كل العالم عمـي واگف واثـق ولـد خالتهم واخوالهم وناس غرب هواي وانا عيوني ادور عليه من بين العالم گالت امي

-- شكو ليش هاي الهوسه

رديت وانا فاقدة اخر أمل بهاي الدنيا

-- عرس

-- منو العرس

-- رجلي عرس يما

-- شنوو ؟ شجاي تحچي شبيج

فتحت باب السيارة و نزلت ومشيت گبلها و هي نزلت واجت تمشي وراي مصدومة

صرت بنص الناس والكل شافني بس هوَ ماكو ما شفته اجه عمي و واثـق عليه عمي لزمني جريت ايدي منه و مشيت اسرع

و طبيت للبيت سبقني واثـق وصار گبالي بالحوش ما يخليني اطب

يُـمـن :- بس خليني اشوفـه حتى عيوني تصدگ وما تبچي عليه بعد

سكت و شكله كله تغير وهوَ يسمع حچيي

تعديته وطبيت للديوانيـة ( الاستقبال) 

غادة واگفه تركص و عمتي تهلهل والباقين يصفگون و أديان لابسه البدله البيضه

و فرحانه والضحكة تارسه وجهها ترس

وهو لابس قاط العرس و شكله مرتب على الأخير و گاعد و مبتسم أبتسامة طالعه من نص گلبه 

وگفت بـباب الديوانيـة و اباوع عليه وعيوني تحرك بيه حرك و گلبي گمت اسمع صوت دگاته امي وگفت بصفي ما تحچي شي بس ساكته مصدومة 

رفع راسـه الجهه الباب وشافني اول ما شافني طاحت دمعه من عيني دمعه اعتاب عيوني چن عاتبته وحچت صدمتها بدمعه 

عيوني جن گالتله ليش صعدتني للسماء وشمرتني للگاع 

رفعت ايدي مسحتها بسرعه گام من مكانه وانا بس شفته گام افتريت وطلعت اركض 

ركضت بكل سرعتي وبكل قوتي ركضت مثل الجاهل لا حسبت احساب احد ولا فكر بعيب ولا شفت احد گبالي عيوني صارت ما تشوف غير منظره وهو بقاط عرسه ومرته بصفه 

طلعت من البيت اركض ما ادري وين اريد اروح كل الادري بيه اريد اشرد ما اريد اشوفه بعد اريد اروح بعيد ما اريد اشوف واحد من المعازيم ولا واحد من اهله وكرايبة كلهم يذكروني بخذلاني وكسرتي 

طلعت من الفرع و أمي تركض وراي وتصيح عليه تريدني اوگف و صوت واثـق يتوسل بيه اوگف عثرت وطحت على اركبي 

ضليت بطيحتي ما گمت ولا حاولت اگوم 

وصلوا امي واثـق لزموني وگوموني من الگاع

شهيناز :- عمت عيني عليج كون إن شاءالله

واثـق :- يُـمـن صل على النبي وداعتج ما يستاهل دمعه من عيونج هو الخسران 

رفعت راسي وباوعتله بعتب ورديت

-- مو گلت انا اخوج وبظهرج ليش هيج هانت عليك أختك 

سكت ما رد وأمي جاوبتني بمكانه

-- كافي يمه كافي طابخينها بيناتهم يا اخت يا بطيخ 

واثـق :- لا خاله والله مو هيج السالفه

شهيناز :- اسكت رجاءً خليني لازمه اللساني منا الشارع ما أريد افضحكم 

حچت هيج ولزمتني من ايدي و عبرت بيه الشارع ويا ما عبرنا اجه رائـف عبر ورانا

 و وگف يمنا بكل عين صلفه وانا جسمي غده سعفه ارجف واعصابي كلها ترجف وياي 

رائـف :- اوگفي يُمـن بس افهمج

شهيناز :- والله والإسمه الله إذا ما خليتك تحلم تشوف اظفرها ما اطلع بنت امي وأبوي بسيطه اله أندمك 

جرني قوي من ايدي و صاح بـ امي

-- امشييي لجج تهدديني شنو 

--  لا ما اهددك اني انفذ وعيونك تشوف وإذنك تسمع 

دفعني يريد ياخذني جريت روحي منه حيل 

وصرت وره أمي ، و أمي ما سكتت بقت تصيح عليه وتغلط وهو تخبل غلط ونعل

بـ أمي وما أحترمها و واثـق واگف بنصنا يسكت بيهم وهذيج الفضيحه بنص الشارع والما يشتري بقى يتفرج علينا شهرتهم أمي شهرية لمت عليهم المنطقة 

عمي وبُـرهان و باقي الولد كلهم اجوا ورانا 

وصوت امي عالي فضحتهم فضيحه سبتهم ونعلتهم وغلطت عليهم لحد ما ارتاح گلبها 

وعمي حاير بيها يريدها بس تسكت و الولد

اخذو رائـف الصار واحد ثاني و نزع ثوب المستحه و فشر على أمي اشكال الفشار 

وعمـي و واثـق وبُـرهان بقوا يمنا يتوسلون بيها تسكت 

حاكـم :- ام يوسف الله يخليج انفضحنا گدام الناس كافي الله يخليج

شهينـاز :- يا ناس هاي المستحين منها والله والإسمه الله إذا مت خزيتكم ما اتسمه ولكم ما بيكم شريييف تضحكون علينااا تجون ترجعونها وفصخ وما فصخ تالي تسولها كمين وتجيبون المره بدلتها بنص بيتكم مو هاي يتيمة ومكسورة جنح شتكولون الربكم يا ظالمين فوك ظلم عمامها وجورهم عليها انتـوا

بُـرهان :- واثـق بس جيب سيارتي بسرعه 

اخذ واثـق السويج وراح يركض وعمي رجع يگول

-- حقج شتگولين شتحچين حقج بس انطينا مجال نتفاهم مو بالشارع والله عيب خزيتينا انتِ وهذاك طايح الحظ الما مربه

شهيناز :- سهلة أني أربيه منا وجاي بسيطه 

أمي ترجف من الإعصاب وانا ارجف من القهر انوب على حظنا ولا سيارة تكسي اجت وفاتت بس سيارات خصوصية تفوت ماكو تكسي ، وانا كل هاي الهوسه حرف ما نطقت كلمه ما حچيت بس واگفه

 و جسمي يختض مثل السعفه وگلبي اخ يا گلبي جمرة مشتعلة بيه جمرة طاحت فوگاه وحركته حرك 

اجه واثـق بسيارة بُـرهـان ياخذنا يرجعنا للبيت وامي ما قبلت تصعد توسلوا رادو ماكو قفلت عليهم وخزتهم وفضحتهم فضيحه اخر شي گالت ما يروح ويانا هذاا

على واثـق 

هوَ من سمعها شال السويج وانطاه البُـرهان واخذنا بُـرهان رجعنا البيتنا 

الطريق بطوله امي تغلط وتسب بيهم 

والولد ساكت ما يرد وانا ساكته ولا انطق ولا احچي اخر شي امي جرتني الحظنها

و گالت

-- عساهم احتركوا بنار گلبج عسا الفقر والظيم والجوع والعوز اكلهم عسا حسرة گلبج هاي كسرت شكو عافية عدهم وضلوا بسكتهموما حچوا مثل ما ضليتي بسكتج يروحلج فـدوة الچلب النكس 

حطيت راسي بحظنها و بعد هذا حدي بچيت بس مو بچي تگول ماتت امي مات ابوي القهر كله طلعته الظيم كله شكيته بصوت بچيتي الاخ جانت تطلع من نص گلبي 

جنت ابچي واصيح اخخخخ جانت الاخ تطلع مني مال وحده موجوعة روحها

و گلبه يوجعها و الدنيا كلها توجعها 

امي حاظنتني و تسكت بيه وانا ياهو اليطفي نار گلبي جنت ادري بيه ما يحبني وادري بيه يحبها ويرديها ادري انجبر بيه 

و ادري ما يهواني وراح يجي يوم وياخذها

هذا كله ادري بيه وما هماني الموتني شلون قشمرني وچذب عليه شلون خلاني اصدگه شلون خلاني احبه واتعلق بيه وأامن بيه هذا الموتني أمنت بيه و ثقيت بيه گام يحبني و يريدني راح اموت ربي ليش علقني بيه وكسر گلبي هاي الكسرة 

الولد طبگ و دار علينا وگال

-- گولي يا الله گلبج راح يوگف 

شهيناز :- وگف گلبه وگلب امه ان شاءالله

-- ام يوسف لا تزيدين النار حطب الله يخليج سكتي الابنية مو وكت هذا الحچي 

ما تسمعينها شلون تبچي 

-- كافي يمه حبيبتي يروحلج فدوة والله اله ازوجج تاج راسه وراس الخلفه والله اله اخليه يعض اصابعه ندم والله كافي 

-- استغفر الله العظيم 

حچى هيج وشغل ومشى شكله ما قبل على حچي امي و امي سكتت وانا ضليت ابچي بس صوت أقل لحد ما وصلنا للبيت الولد راح واحنه طبينا بوجهي للديوانية جريت الغطاه وغطيت روحي وغمضت عيوني ودموعي جوه الغطا تصب لحد ما تعبت ونمت بساع بعد لا حسيت ولا فكرت 

عبالك ربي نزل السكينة بگلبي عبالك مسح على عيوني ورحت بسابع نومه لا حسيت بشي ولا فكرت بشي ولا سمعت شي مثل الرحت بغيبوبـة من الساعة خمسة العصر لحـد ما صار وگت إذان الفجر 

فزيت على صوت الاذان يصيح حي على الصلاة حي على الصلاة رفعت روحـي من الفراش امي نايمة على القنفه يمـي 

گمت للحمام غسلت وتوضيت و فرشت السجادة بالحوش و صليت صلاة الصبح 

و رگعت و بچيت بهدوء بلاية صوت ما جنت احچي شي بس ابچي ما اشكي ولا اسولف بس اكيد ربي يسمعني ويسمع صوت روحي و گلبي و يدري شبيه وشيوجعني وشـ اريد 

بقيت مده طويله هذا حالي لحد ما حسيت بگلبي برد شويـة وروحـي ارتاحت والخنگه البصدري راحت شلت السجادة و رجعت الفراشي و سبحان الله بس حطيت راسي على المخده رجعت نمت بلايه تفكير 

ما گعدت غيـر الساعـة بالعشرة الصبح شلون مشى عليه اليوم هذا ما اتذكر شلون تعدى وما متت بيه من قهري وحسرتي ما ادري بيومها خلصتها بس ابچي وامي يمي وتسكت بيه و تبوس بيه ترديني بس اسكت خلص اليوم وصار الليل و من قدرة الله بس اجاني الليل الله نزل عليه السكينة

و الأمان ونمت بلاية أحساس وما فزيت  غير مثل البارحه ويا صلاة الفجر صليت

 و شكيت الربي  ورجعت نمت 

وثاني يوم فزيت على صوت امـي جانت تحچي ويا عمـي هـاشـم شلون رحنا وشفنا گاعد يم مرته ابدله العرس وشلون ضحكوا علينا وهو يـرد 

-- لا تحچين يمها بعد بالموضوع سدي كافي خطيه 

-- لا ما احچي شي هذا هو بعد كل شي انتهى

-- تركي الابنيه هي تاخذ قرارها لا تتدخلين بحياتها 

-- مستحيل اقبل ترجعله بعد

-- شوفيها بالاول لا تاخذين قرار عنها 

-- هيَ ما تريده 

-- سأليها و تأكدي منها وراها تصرفي

-- الله كـريم

بقيت بمكانـي وصافنه على البنكه بلايه حركه طبت أمـي عليه لگتني گاعدة گالت

شهيناز :- گعدتي حبيبتي صباح الخير

يُـمـن :- صباح النور 

-- گومي غسلي حتى نتريك 

-- عمي جاي 

-- اي 

بقيت گاعدة واباوع عليها بسرعة گالت

-- گومي حبيبتي لا تستحين والله عمج يحبج و خوش رجال هسه تتعلمين عليه بس گعدي يمه و سمعي سوالفه راح تحبينه وداعتج

ما جاوبت شي رحت للحمام غسلت

و اجيت وگفت يمها بالمطبخ جانت تحضر بالريوك وانا واگفه وساكته اي رده فعل اي حركه ما اسوي طلع عمي من الغرفة بس شافني ضحك وگـال

هاشـم :- اليوم منو منورنا يُـمن الحلوة  شلونج بابا 

يُـمـن :- الحمدلله 

-- حبيبتي عمو سمعيني زين و خلي هذا الكلام ترچيه بـ إذنج هذا البيت بيتج و انتِ تگعدين بيه واحنه نطلع واني عمج وابوج وانتِ بنتي أن شاءالله ، لا تخجلين مني وحسبيني ابوج و صديقح و شنو تحتاجين بس أشري بـ ايدج وكل شي يجرالج وكل احنه بخدمتج 

-- ريتك سالم عمي ربي يحفظك ويوفقك رحم الله والديك

ضحك وباوع الامي أمي بسرعه ردت 

-- يُـمـن ماخذه لهجه اجدادها وابوها شگد عشنا بغداد ودرست لحد المتوسطه بغداد بس بقت على نفس لهجتها مثل ابوها الله يرحمه 

هـاشم :- والله عاشت ايدها بقت متمسكه بـ اصلها وهي عمر كامل گاعدة هنا بغداد

شهيناز :- احنه صح عشنا بغداد بس  بمنطقه شعبية يعني اهل منطقتنا القديمة كلهم يحچون قريب على العمارة الناصرية و بغداد مثل الخلط صايرة الهذا السبب ما تغيرت بقت مثل اهلها

-- الله يحفظكم 

حچى هيج وراح للديوانية گعد وانا ضليت يم أمي بالمطبخ لحد ما كملت الاكل واخذته و رحنا يمه الزلمه أمانه الله ولا حسسني انا غريبة عنه حچى وياي وسولف وضحك بس انا مستحيه منه و ما ماخذه راحتي 

كملنا الاكل وگفت غسلت المواعين اريد اتسله الرجال گال اليوم عازمكم على سفرة من هاي السفرات المعدله ردت امي

-- حي الله أبو تميم والله 

ضحك و جاوبها

-- كم يُـمن و أم يُـمن عندي 

ابتسمت على حچيه وامي بقت تحچي وياي تريدني ابدل ما قبلت اطلع راحت صاحته عليه و اخذوني وطلعوني غصباً عليه 

بيومها رحنا للزواء وهاي اول مره اطب الها صدگ غيرت جو وتونست و عمي عاملني مثل الجاهل ما خله لعبة ما صعدني بيها ما خله حيوان ما شوفنياه واشترالي وجابلي و يجيبني منا ويحطني منا الزلمه مالت الله ما خله شيء بنفسي وكل هذا سوى بس حتى انسى الظيم شوية و ما رجعنا للبيت غير المغرب 

اول ما وصلت بدلت هدومي ونمت متكسرة تكسر حتى ما لحگت افكر وانقهر بساع نمت وثاني يوم بس تريگنا امي گامت بدلت و گالت 

-- راح نروح انا وعمج بشغل ونرجع لا تفتحين الباب الاي بشر 

ما سألتها وين رايحه سديت الباب وراهم ورجعت گعدت وبس فرغ البيت وضليت وحدي راح بالي هناك يمه هسه شـ گاعد يسوي بالبيت طالع نايم گاعد يضحك يسولف هم يذكرني هم ينقهر عليه 

انوب ارجع اگول ليش هيج كسرتني مو انا حبيتك و ثقيت بيك وصدگتك وبنيت عليك أمال ليش تكسرني هالكسرة أنتَ من الاول گتلي ما اريدج و ما اهواج وضليت بعيدة عليك وما وصلت يمك ليش رديت عليه و عشمتني بيك و خليتني أحبك

و اصدگ بيك رايدني وهاوييني 

انوب الجاي يموتني اخذتني للمشتمل

و نومتني بيه و وكلتني بيه و فررتني بيه

و كل الحچي الحلوة الجنت اتمنى اسمعه منك حچيتليا هناك ليش هيج سويت ليش بيه 

ضليت گاعدة و دموعي على خدي وراها 

گمت غسلت وجهي و بديت انظف بالبيت 

ما خليت شي يعتب عليه بديت بيه من باب الشارع لحد الغرفـة الاخيرة غسل بالماي والقاصر 

اريد اشرد من قهري اريد التهي عن كسرتي هاي اريد شيء افرغ بيه همـي وماكو غير الشغل اخلص الوكت بيه وانسى بيه الظيم 

ساعه ساعتين ثلاث ساعات وانا بعدني اشتغل ومنگعه بالماي سمعت صوت نقال يـدگ رحت ادور على الصوت لگيته فوك الثلاجة شلته طلع نقال امي ومكتوب 

حبي يتصل 

رديت گلت هذا عمي و اضن يدورون على النقال عبالهم ماخذينه وياهم وضايع منهم خل ارد واگلهم بالبيت 

-- الو 

شهيناز :- ها يُـمـن

-- هاا يما هذا نقالج بالبيت ناسيته

-- لا ما ناسيته اني عفته خاف تحتاجينه ونسيت انطيج خبر 

-- شني اجيتوا بعدكم

-- لا بعدنا نتأخر باعي بدلي ملابسج راح يجي عليج مــراد يجيبج النا

-- يا مراد وين يجيبني چا انتم وين  

-- احنه بيتنا الجديد طلعنا نريد نحول بيه وعمج گال ما دام فارغ بعد خلينا انظفه فد مره حتى باجر نحول بيه بسلامة

-- خوش بالعافية بس يا مـراد هذا 

-- أبن عمج هاشـم 

-- استحي يما

-- منين تستحين قابل جاي تعشين يمه هي بس مسافـة الطريق يجيبج النا 

و فضت وراحت عود حسبي تكسي و يلا استعجلي راح يوصل وجيبي التليفون وياج 

-- يلا خوش 

رحت ذبيت هدومي المنگعه ولبست هدومي مال الطلعه الجيت بيهن وحطيت دشداشه ثانية بعلاگه گلت خاف هناك ابدل هذني من اشتغل 

بين ما كملت تبديل گعدت متانيته شوية واندگ الباب گمت وگفت وره الباب وصحت 

-- منو 

رد

-- اني مـراد إذا كملتي يلا اوصلج

فتحت الباب صار بوجهي ولد بكصه واثـق وعين النبي تحرسه الطول والجسم والزيان يخبل كلش مرتب الله يخليه بس شافني أبتسم و گـال

مـراد :- السلام عليكم 

-- وعليكم السلام 

-- كملتي ؟ 

-- اي 

-- زين لعد قفلي الباب وتعالي 

قفلت الباب و طلعت هو يمشي وانا امشي وره لحد نهاية الفرع طابگة سيارة سودة عليه صعد بيها وانا فتحت الباب الوره وصعدت ما گال شي بس باوع من الجام ودار وجهه 

شغل ومشى هو ساكت و انا ساكته محد بينا يحچي بس صوت المسجل مشتغلة بيه أغنية مشينا مسافة ودگ نقاله نصى المسجل ورد 

-- ها يابة

--اي اجينا

-- اي 

-- تمام 

-- لا ما جبت 

-- ماشي سهلة 

-- صار 

قفله ورجع عله المسجل و مركز بالطريق رجع دگ نقاله مره ثانية رد بس هاي المره امه تخابر گال الها 

-- هلا يوم حبيبتي 

-- عندي شغل

-- لا اتأخر أحتمال 

-- لا تنتظريني تغدي بالعافية

-- هاا شبيها ؟ 

-- ضاربهاا ؟ 

-- يعني ما ضاربها 

-- زين ابوي يعرف 

-- ماشي تمام سهلة

-- الله وياج

قفله من امه وفتح الجام وشغل جكارة كام يدخن انا جنت مركزه وياه شلون يحجي وياه امه  انقهرت عليها المسكينة نايمة ورجليها بالشمس رجلها متزوج عليها و ولدها يدرون و ما يحچون الله يساعدها إذا درت شلون حالها عفية زلم

ما بيهم واحد يخاف الله بمرته 

مشينا مسافة وهوَ طبگ ونزل للأسواق وانا غمضت عيوني واگول بيني وبين روحـي عفيه دنيا لا بيها زلمه ولا بيها مره بيهم حظ كلها الوادم عايشة بالغش والخديعة شلون الواحد يگدر يتلون و يلعب على الحبلين شلون يسيطر اعوذ بالله 

ضليت گاعده بالسيارة و صافنه على الشارع وهذا طب للأسواق وما طلع ما ادري شعنده نام هالنومه نومه نقاله دگ وانگطع ورجع دگ مره ثانية وانگطع انوب دگ نقال امي بـ ايدي باوعت طلع عمي يخابر جاوبته

هاشم :- ها بابا 

يُـمـن :- هلا عمي 

-- وين مـراد اتصل عليه ما يرد

-- نزل للأسواق ما ادري شـ يشتري 

-- هاا تمام من يرجع گوليله يمر على ابو عبدالله يجيب السمج من يمه ويجيب وياه خبز فد مره

-- ان شاءالله  

سديته من عمي و اجه الولد بـ ايده غراض فتح الباب اليمي و حطهن بصفي بلاية صوت وصعد شغل ومشى گتله

-- عمي خابر 

باوع عليه من المراية و رد متفاجئ ورد 

-- يا عمج 

-- عمي ابوك 

أبتسم وگال

-- ها اي و شراد 

-- تجيب خبز و السمج من ابو عبدالله 

-- وشيوديني الابو عبدالله دخيل الانبياء صدگ يحجي 

طلع نقاله وخابر ابو 

-- ها يابة 

-- شيوديني الابو عبدالله اني وين وطريق

 و ابو عبدالله وين 

-- ازدحام وحلت دوام يابة صدك تحچي 

-- يلا يلا 

سده و گال بنتر استغفرالله يا الله 

وافتر من الاسدارة و رجع انا لا اندل ولا احچي ولا ادري شني السالفه اطرش بالزفه 

الشارع ازدحام و الهورنات والدنيا مگلوبه 

واحنه واگفين بالازدحام حلت دوام والشارع ما يتباوع من الازدحام رفعت راسـي اباوع من الجام شفت بُـرهان لابسه نظاره و سيارته بصف سيارتنا والزلمـه صافن عليـه ومصـدوم 

نزع نظارته و يباوع بصدمـة شعندي صاعدة بهاي السيارة وبهاي الظهاري ويا هذا الولد وانا متت بدمي هسه شيگول عليه وين اضم روحي شگول عليج يمـا كل منج

مـراد انتبه عليه وشافه شلون يباوع عليه نزل الجامه وگاله بصوت عـالي 

-- شكووو على شنو تباوع محتاج شي 

بُـرهان بسرعة صعد جامته ودار وجهه من يمنا ما رد و مراد رجع يگول

-- الناقص أبن الناقص 

چا هسه انا غير احچي وارد ضليت بس اطگطگ بـ اصابعي ومتيته بدمي گوه حچيت وطلعت الكلمه مني ورديت عليه

-- هذا أبن خالة رجلي خوس ولد خطيه بس تفاجئ لان ما يعرفك وشافني صاعدة بسيارتك بهذا الوكت 

باوعلي من المراية ورفع حواجبه اثنينهن 

و گال

-- هاي شنو أنتِ متزوجة 

-- اي 

مشى السير وطلعنا قبل بُـرهـان رجع الولد يگول 

مراد :- حسب ما اعرف انتِ جنتي بيت جدج و ما يقبلون تجين يم امج بعدين بعدج صغيرة شوكت لحگتي تتزوجين 

-- هاي بعد القسمة  

-- على الخير ان شاءالله

-- رحم الله والديك 

وصلنا الابو السمج طبگ ونزل ويا ما نزل 

طبگت سيارة بُـرهان بصف سيارتنا ونزل منها واجه علينا مراد وگف ما راحو يباوعله

و بُـرهان مصدوم و عين عليه وعين على مراد وصل يم السيارة فتح الباب عليه

و گـال

-- نـزلييي 

بصوت عالي احس رجليه بادت عبالك هذا صاحبي وكضوني وياه اجه مـراد عليه ويگول

-- بس دقيقه اخي

باوعله و گال

-- وو منووو انتَ

--اني مراد ابن ابو زوج ام يوسف 

سكت بُـرهان و باوعلي وراها گال

-- اي اهلاً وسهلاً و شـتسوي يُـمـن بسيارتك بهاي الظهرية وين رايحين 

مراد :- جاي اوصلها البيت امها 

-- وين جانت هـيَ حتى تريد توصلها البيت امها 

-- جانت بالبيت القديم وماخذها للبيت الجديد 

باوعلي و گال بعصبية

-- زوجج يدري بيج لو لاااا

ما جاوبت بقيت ساكته صاح بصوت عالي

-- تخلصين حياتج خرسه لو شنو موضوعج

نفس الشي ما اجاوب 

مـراد :- اخي لا تصيح وتسويها دراما الابنية جانت بيت امها القديم وامها حالياً بالبيت الجديد وماخذها الها واني مو غريب عليها تعتبر وحده من عائلتي فـ لا تسويها مشكلة و هذا يعرف وذاك ميعرف وتعظم الموضوع رجاءً احنه بالشارع و يانا أبنية نصي صوتك إذا ما بيها زحمه 

-- اي صح حقك عليه 

حچى هيج ورجع السيارته و مراد سد الباب وراح يجيب السمج وانا إذا السيارة فتحت حلگها وحچت فتحت حلگي وحچيت لو رديت بس ساكته و عيوني عليه شلون شغل ومشى سريع 

دقيقة ورجع واجه مراد جايب السمج صعد وشغل ومشى اول ما مشى باوعلي من المرايه و گال

-- خو ميسويلج مشكلة هذا 

-- لا 

-- اكيد زوجج متفهم يعني ممعقوله يكبرون الموضوع ويسون مشكلة اني مو غريب 

ما جاوبت بقيت ساكته وهوَ هم سكت لحد ما وصلنا البيتنا الجديد المنطقه حلوة والشارع مرتب مثل منطقه بيت عمي حاكم تقريباً طبگنا بالباب ونزلنا البيت من بره مبين حلو دگ الباب ثواني وفتح عمـي  

هـاشم :- تأخرتوا 

مـراد :- الطريق ازدحام و دزيتنا النص بغداد نجيب السمج ما تفهمني شنو موضوعك قابل بس ابو عبدالله يشوي سمج بـبغداد ماكو غيره 

-- دفوت فوت على أساس ما تعرف ما اكل السمج من غيره

همَ طبوا وانا ورهم طلعت امي من باب المطبخ تضحك فرحانه بالبيت مدري بيه 

شهيناز :- هلا نور البيت 

درت وجهي اباوع للتصميم حوش لا جبير ولا صغير وعلى الجهه اليسرى حديقه صغيرة و باب للديوانية و باب من جهه اليمنى للمطبخ 

ومن باب المطبخ اكو هول يعني صاله صغيرة بس مرتبة بيها غرفتين وحده بصف وحده و درج دائري وبالنهاية حمام وبصفه ترك بنيانه كلش حلو و كله حديث و يخبل بس فارغ ما بيه غراض 

شهيناز :- ها شلونه البيت 

يُـمن :- عتبة خير عليكم ان شاءالله حلو بالعافية

شهينار :- الله يعافيج 

هاشم :- حضري الغده يمعودة متت من الجوع 

-- صار ثواني 

مـراد :- اعتقد نسيت الخبز 

هاشم :- صدگ تحجي وين عقلك 

-- هسه اجيب ما اتأخر بس اعصابك مو زين عليك العصبية لا تموت إسم الله عليك ونسوانك تبقى بالظيم 

امي ضحكت وعمي نفس الشي ابتسم والولدطلع يجيب رجعت امي تصيح وراه وياك سفره جاهزة ولبن 

يُـمـن :- هذا بيتج لو بيت عمي

-- بـ اسم عمج بس بيتي

-- بالعافية

-- الله يعافيج وهاا ترى هذا بيتج مو بس بيتي و هاي الغرفه شوفيها الج 

ما جاوبتها بقيت ساكته و عمي اجى فات للحمام يغسل دقايق و رجع مـراد جايب الخبز و باقي الغراض فرشت امي و گعدوا على الاكل انا بقيت بالغرفه ما اجيت استحي اگعد وياهم صح اكلت ويا عمي وطلعت وياه بس بعدني استحي منه وانوب اليوم ابنه وياه شلون اگعد يمهم عيب

صاحت امي رادت ما رحت انوب عمي صاحني بعد استحيت منه وغصباً عليه 

اجيت گعدت بصف امي و المستحى كاتلتني كتل 

هاشم :- مو حچيت وياج و گتلج ما اريدج تخجلين من عندي قابل كل شوية نعيد الموضوع يا حبيبتي بعدين إذا على مـراد

 فـ مراد اخوج  وأن شاءالله ماكو احراج وخجل بين الاخوه مو صح باشا 

ضحك ورد 

مـراد :- والله يابة اني بالنسبة عليه ماكو عندي اي خجل والموضوع كلش عادي وطبيعي جداً اوصلها اخذها اجيبها اگعد وياها بنفس السفرة بس اعتقد الموضوع يمها ويم أهل زوجها بيه انه واخواتها 

حچى هيج وباوعلي و أبتسم 

هاشـم :- لا ما بيه احنه اهلها ان شاءالله

-- قبل شوية واحد من اقرباء زوجها شفنا بالازدحام و اجه ورانا لحد ابو عبدالله

و يصيح وسواها هوسه شلون صاعدة وياي 

شهيناز :- منو هذا

يُـمـن :- بُـرهان 

-- وشنو بُـرهان وكيل كفيل بيج حتى يصيح عليج ويحاسبج

--  لا ما صيح بس تفاجئ وحقه من شافني بسيارة عالية ويا ولد ما يعرفه وانا مرت أبن خالته وصاحب عمره واخو اجه وسأل مابيها شي

امي سكتت وعمي وأبنه نفس الشي ما ردوا كملنا الغده والولد و عمي طلعوا ما ادري وين وانا وامي استلمنا البيت غسل 

احس بروحي متت من التعب و جسمي بعد ما بيه قوة لان جنت مسوية حمله على هذاك البيت واجيت هسه الهذا انتهيت

ساعه ورجعوا طبوا للغرف يعدلون بالكهرباء وانا وأمي لحد الليل انظف

و همَ يعدلون بدكم البيت دگمه دگمه

وين يلا كملنا كملوا الجوه و طلعوا للحوش يسون بالكابينه الرئيسية اندك الباب واجانا صوت ابنه الچبير تميم  

امي طلعت يمهم وانا ضليت گاعدة على الدرج شويه وطب يشوف البيت و امي وراه تمشي بس شافني گاعدة ضحك و گال

-- يا مرحبا شلونج اخبارج

-- الحمدلله الله يسلمك

-- اگـول البيت حلو طلعتي انتِ بيه ومحليته 

طب عمي و مـراد وراهم وسمعوا سوالفه التعبانه مـراد بسرعه ضحك و ردله 

-- عبيـر تدري بيك تنتمي الصنف الزواحف لو عبالها من الطيور الجميلة 

-- ههههه انجب لك اختـنا هاي 

هـاشـم :- على طاري اختكم تدرون بـ سمر من صباحيات الله اجت زعلانه لو ما تدرون

مـراد :- اي امي گالتلي الظهر

تميم :- لا أني ما ادري ليش شكـو 

هاشـم :- جاي تشك بيه يخونها و متعاركة ويا الولد و هاجمة بيتها على ابو شكت بيه يعني لا شافت ولا لزمت هاي نسوان بطرانه لو مثل هاي المسكينة الشافته بعيونها ابدله عرسه جان شـسوت 

اثنينهم باوعوا عليه وانا الدمعه وگفت بطرف عيني على الموقف النحطيت بيه وعلى نظره الشفقه الشفتها بعيونهم 

فركت عيوني سريع حتى ما اطيح دموعي ما اريد ابچي گدامهم 

مـراد سكتت و تميم رد 

-- طيح الله حظ الثولان

شهيناز :- متعافي ودافر النعمة بـ رجلية

-- لا اثول وما يفتهم 

امي سكتت و انا من الاصل ساكته وعمي طب للحمام يغسل و الولد بعد اثنينهم طلعوا للحوش بين ما غسل عمي وطلع لبسنا احنه وطلعنا نريد نرجع للبيت القديم اكيد  ما راح انام هنا اليوم لان بعدهم ما جايبين الغراض ولا الفراش

هاشـم :- مـراد وصل خالتك ويُمـن للبيت واني رايح للبيت زوج سمـر يريد يجي علينا

تميم :- اني اوصلهم على طريقي يصيرون

-- لا انتَ اريدك عندي شغل وياك

-- والله ما مسوي شي

شهيناز :- ههههه بعد ميفيد صدر عليك اللقاء قبض 

ضحكوا وطلعوا عمي بسيارته وتميم  بسيارته راحوا واحنه بسيارة مـراد امي يمه گاعدة وانا وره والولد دره فد حباب

و مرتب ومحترم روحه احسن من اخو بالف مره هذاك هم حباب بس خفيف وغثيث شوية و ما ينهضم ومن اول يوم شفته ما ارتاحيتله بس هذا خوش ولد محترم روحه  وثكيل ما عدنه سوالف مال لطلطه مثل اخو 

خلص الدرب كله هو وامي يحچون على اثاث البيت وعلى المنطقه هاي والناس العايشين بيها ابد ما رفع عينه وباوع ولا حچه وياي اصلاً جني ما گاعدة وياهم لحد ما وصلنا للبيت وراح 

انا بسرعه طبيت للحمام سبحت و حطيت راسي على المخده بعدني ما ملحگه افكر وانقهر واتذكر غفيت من گد ما تعبت اليوم بالشغل حتى عشه ما تعشيت 

ما گعدت غير ثاني يوم بـ 11 الصبح حتى صلاة الفجر فايتتني وما گاعدة فزيت امي هم نايمة بعدهي ما گاعدة 

غسلت وحطيت الجاي على النار سمعت الباب يندگ حطيت شالي على راسي ورحت اشوفه وصلت للباب وگبل لا اگول منو گلبي بزني جن علم ضليت واگفه ما فتحت رجع اندگ مره ثانية گلت 

-- منو 

اجاني صوته يگول اني 

يتبع ....

#عــروس_الچبـــايــش 🌼

بــقلم يـــاســـة الحلقة (13)

بسيطـة هــي أحلامنا ولكــن يبـدو

أنهــا جــاءت فـي زمــن بخيـل 

أحببنــا الحيـاة وتمنينــا أن نعيــش 

كمــا نــريـد خانتنــا وأرغمتنــا على أن نعيــش كمــا تـريد فـ سلامــاً علينـا

وعلـى أحـلامـنا وقلوبنـا وخطواتنـا 

وجميـع محاولاتنــا 

...................................... 

يُـمن :- بس سمعت صوته رجعت ليوره

و إحس رجليه ماتت ما اگدر اوگف عليهن كلش كسرني وكسر خاطري ما اريد اشوفه ولا اريد اسمع صوته

رجع يدگ بالباب و انا واگفه و ما اگدر افتح واشوفه گـال

-- فتحـي

ما جاوبت عفته وطبيت اركض الامي گعدتها فزت من النوم مرعوبه وتگول

-- اسم الله شبيج

-- واثـق يدگ بالباب

گعدت گعده و هزت رأسها و راها گامت للحمام غسلت وانا امشي وراها وهيَ تمشي وتتحرك على راحتها ولا عبالك اكو واحد يدگ بالباب

يُـمن :- يما رائـف بالباب

-- خلي واگف ساعه وساعتين ويوم وشهر لحد ما يتأدب

-- ما راح تفتحين

-- لا

اجت للمطبخ فتحت الثلاجة و گامت تحضر بالريوك دگ نقالها راحت تشوفه ورجعت تگول

-- هذا هو جاي يخابر

-- انا اگول طلعي واحچي وياه حتى يطلگني

-- لا اطلع ولا احچي وياه عوفيه عليه الا اطيحلج حظه واندمه ، طفي الجاي راح احترك

طفيت الجاي واخذت إمي الصينية ورحنا للديوانية الباب بعد ما اندگ والنقال هم ما دگ بعد اضن راح

شهيناز :- اكلي لا تصفنين وتعيشين الدور

-- ما اشتهي

-- تشتهين وغصباً عليج يلا اكلي

شلت الجاي شربت شوية وهي سوت لفه وحطتها بـ ايدي اكلت و گلبي هناك يم الباب راح بعده واگف

دگ نقالها مره ثانية بس هاي المره عمي هاشـم ردت عليه وانا گمت للمطبخ غسلت المواعين وعزلت المطبخ اجت وراي وتگـول

-- لبسي راح نروح للبيت الجديد

-- مالي خلك عوفيني هنا إذا ما عندج شغل اليوم 

-- لا عندي يلا فضيها

راحت تبدل وانا كملت المواعين ورحت بدلت وطلعنا انا وياها للشارع اجرنا تكسي وبوجهنا للبيت من طبينا لگينا ابو الكاونتر

جاي يشد بيه وابو الاخشاب يشد بالغرفه

أمي ضحكت فرحانه عمي مسويلها مفاجأة ومشتري غراض جديدة ما تدري بيه

 تذكرت أنـا شلون فرحت بـيوم الجابوا الغراض و شدوهن عبالي الي والبيت بيتي ثاري طلع يجهز المرته الجديدة منكم لله ماگول غير شي

گعدنا انا وامي بالديوانية وهمَ يشتغلون كل واحد بمكان ساعه وكملوا وراحوا

اجينا انا وامي نباوع للغراض تخبل تخبل

هاشم :- ها شلونهن 

شهيناز :- حبيبي اروحلك فدوة الله لا يحرمني منك يجنن

-- بعد عندي مفاجأة ليُـمن

حچى هيج وضحك وطلع من الغرفه وأشر النا نجي وراه طب للغرفه الثانية جايب بيها

غرفه اخشاب تركية صغيرة جانت مديل التركي هسه نازل ومسوي ضجة بوكتها باوعت عليها كاملة جرباية وكنتور وميز مراية و رف طويل بصف الميز 

امي ضحكت فرحانه من كل گلبها وانا ابتسمت وباوعتله واگـول

يُـمـن :- رحم الله والديك عمي ما تقصر ليش كلفت روحك

-- ماكو اي تكلفه هاي غرفتج الخاصة وشي بسيط الج حتى تاخذين راحتج بيها الف عافية

-- الله يعافيك ويطول بعمرك

طلع من الغرفـة وامي باستني فرحانه

بـ بيتها وبغراضها و بغرفتي و راحت طلعت وراه

گعدت على الجربايـة بعدهي مابيها دوش

وضليت اباوع للغرفـة واحچي ويا روحي شصار لو من الاول اجيت هنا و ما رحت عليهم ولا تزوجته وانكسر ظهري شصار

 لو من الاول انا وامي مرتاحين وعايشين حالنا حال الناس

شوكت اصير مثل امي وانسى واتخطأ هيج بسرعة شو حتى أخوي تخطئته و ما تذكره ولا تفكر بيه معقوله ما تحن عليه ولا يجي على بالها شني نسته لو تكابر حتى تعيش بعدني گاعدة وصاحت عليه طلعت الها

شهيناز :- مسحي الاخشاب مال الغرف اثنينهن واني وعمج رايحين ساعه ونرجع

-- وين رايحين

-- نجيب الاجهزة الكهربائية وباقي النواقص

-- صار

-- لا تفتحين الباب لحد

-- اي

طلعت هيَ وعمي وانا مسحت الاخشاب والكاونتر من بطنه ورجعت مسحت البيت من جديد بديتول لحد ما كملت كل شي

رجعت طبيت للغرفه مالتي حطيت ايدي جوه راسي و انمطلت

ما گدرت انام شبعانـة نوم و شغل ما عندي  اخلص بيه الوكت ضليت حسبه تاخذني وحسبه تجيبني و الدموع على خدودي ينزلن

خلص الظهر والعصر وانا بالبيت وحدي وامي ما رجعت واكل ماكو هو انا من الاصل ما اشتهي بس ضل بالي عليهم لان ما تعوفني بلاية اكل طلعت للحوش شغلت الماطور و غسلته الحوش ورشيت الحديقة وگعدت متانيتهم للمغرب وانفتح الباب وطبوا اثنينهم

شهيناز :- سودة عليه تأخرت عليج وانتِ لا اكل ولا شرب تعاي جبتلج اكل وياي

يُـمـن :- لا عادي ما اشتهي

-- يلا تعاي بسرعـة لا تشلعين گلبي

طبينا انا وياها گعدنا بالهول انا اكل وهيَ رجعت ويا العمي اطبب بالغراض جايبة جدورة ومواعين و اشكال واللوان غراض مطبخ بعدهي تعزل بيهن واندگ الباب وجابوا باقي الغراض وراهم ثلاجة وطباخ 

و اوفن و خلاط والفراش والمخاد كله جديد 

گمت وياها عزلنا الغراض كلها كل واحد بمكانه الخاص وهي طايرة من الفرح بيهن 

وانا اعزل و اسولف ويا روحي عمي شني شغله منين جاب هاي الغراض كلها والبيت هذا اليخبل الله يرزقه بس شني شغله هي گالت واصل بس ما گالت

شـ يـشتغل واستحيت بعد اسألها هسه تگول شافت الغراض والبيت و حطت عينها 

لحد لليل يل كملنا كل شي و رجعنا البيتنا و بس وصلنا امي وعمي طبوا ناموا وانا ضليت گاعدة وايدي على خدي الوكت يمشي عليه يركض ركض وانا مثل الحايط

 لا الي حياة ولا الي عيشة اضل هيج يتغير حاليالله أعلم 

ثاني يوم اخذنا بس هدومنا و رحنا للبيت الجديد ومنا وبعد استقرينا بيه و البيت القديم سمعت على أساس راح يأجرونه

 هو وغراضـة الغير ناس 

مر اليوم والاثنين والاسبوع والعشر ايام والشهر وانا بيت امي و عمي صار يجي هنا اكثر من قبل و أمي عين الحارة باردة عليها عروس شوكت ما تجيها المكياج والتبديل والريحة التخبل والاكل اشكال والالوان مدللته ومدللها وهذيج السوالف التخبل وهذيج الگعدة الحلوة مسويتله واهس ما يفاركها تضيعونه تلگونه يمنا گاعد ويباوع عليها الليل ونهار 

وانا بس اكل وانام لا اشتغل ولا اسوي شي اكثر شي اسوي اغسل المواعين مال الغده لو اطلع اغسل الحوش وباقي الوكت كله گاعدة على البلازمه واتابع مسلسلات تركيا

و القهر باقي بروحي لا احچي ولا اشاركة الواحد ولا اشكي جنت اشرد منه واروح اباوع على مسلسلات وبعد ماكو اخبار عليه ولا أنا سألت أمي ولا أمي فتحت موضوعهم بعد انسد بيتنا 

لحد ما بيوم من الايام جنت اباوع مسلسل تركـي بوكتها جان المسلسل التركي هسه طاش والناس كلها متابعته والدنيا كلها مگلوبه عليه  

جنه انا وامي گاعدين نباوع بالهول وعمي وأبنه تميم الجبير بالديوانية يشتغلون

جان تميم يجي كلش هواي علينا بس ما يحچي وياي شي غير بس السلام وهذا هو يگعد يم ابوه لحد ما يخلص شغله و يروح

صدگ مرات عود يحشش ويشاقة بس ما متجاوز حدودة وياي ابد و من عاشرتهم عرفت طبعه هوَ هيج يحب يسولف ويتشاقة وماله قصد بشي عكس گبل عبالي عوينج وابو نسوان  

صاح عمـي على امي گامت تشوفه شوية واجت وجهها مگلوب وضايجة باوعتلي وگالت

-- عمج حاكم و رائـف جايين علينا

فزيت من مكاني رجعت گالت

-- لا تفزين ولا تعيشين اللحظه ماكو رجعه لو يشعل العشرة شمع 

ما حچيت عفتها وگمت الغرفتي كلي ارجف و الغصه وگفت بنص روحي باوعت الروحي بالمراية واگول

-- شبيه ارجف خايفه منه لو مشتاقتله لو مقهورة على روحي وشيـريد جاي مو عرس وشاف حياته شيـريد بعد جاي ولا ارجع ولا اريدة لو يموت ويموتني 

ضليت اخذ الغرفه واجيبها و دمي نشف واظافري اكلتها كلها لحد ما عدت ساعـة وشوية و سمعت باب الشارع اندگ وراها صوت عمي ابو رائـف يسلم وعمي هاشم يرحب بيهم 

گعدت بالگاع ارجف طبت امي عليه لگتني گاعدة باوعتلي ما عاجبها حالي وحچت

-- ديري بالج تجين حتى لو صاحوا عليج لو اني صحت عليج وكتلج تعاي ما تجين سمعتي 

-- انا ما اريد ارجع ما اريدة

--  اي هوَ ما ترجعين بس ديري بالج تجين مفهوم 

عافتني وراحت يمهم بالديوانية و أنا اجيت وحطيت إذني على الباب مال الديوانية من جهه الهول اريد اسمع الوعود الجايين بيها هاي المره شني 

سمعت عمي حاكـم يحچي شلون من راح على وجهه للچبايش ولگاني يردون يكتلوني وشلون جبر أبنه عليه وأبنه يحب بنت خالته ويريدها من الصغر يعني كله الحچي الجاي يحچي بس حتى يبرر عرس أبنـه ويطلعه مظلوم ومجبور و ماكو منه 

الكل ساكت وبس عمي يحچي شلون ابنه تعب وخربت حياته بس بقى محافظ عليه وما عافنـي  حتى سالفه الانتحار مال أديان سولفها انا من سمعت الحچي هذا افتريت ورحت الغرفتي گاطعه الامل حتى من عمي 

ساعه تقريباً وهمَ عدنا ويحچون بهدوء وراها سمعت صوته ضل يحچي بعصبيه وراها اجاني صوت أمـي انوب علگت بينهم 

لحد ما عمـي هاشـم صاح على امي وسكتها عافتهم وطلعت وهـيَ تگول

-- والله لو تتعلك نخله براسه ما يلوح شعره من راسها بعد 

اجت امي للهول و همَ بعد مناك طلعوا بس طلعوا اجـه عمـي هـاشم على امي بيومها تجاوز عليها لان صيحت وهو گاعد وما أحترمته بقى يصيح ويغلط و هيَ ما سكتت منه ضلت ترد عليه وابنـه موجود وكل الهوسة صارت گـدامه وهـوَ غلط عليها وگالها طايحة الحظ هنا هيَ طاحت وگالتله 

-- اي أني طايحة الحظ و أنتَ لا تتدخل بـبنتي ولا تگعد بگعدتها هاي بنتي مو بنتك ومالك اي حق تحچي عوفني اني أربيهم هذول الادب سززية 

-- هو منو متدخل بنتج أني احچي على صوتج العالي وتجاوزج واني واگف

-- من حقي اتجاوز واصيح والدنيا اگلبها ما تدري بيهم شمسوين بيها لعبوا بيها فلم وساكته ما تحچي وترد عليهم

-- كل عائله بيت تصير بيها مشاكل وإذا على زواجه ترى بنتج اجت وخربت حياته هو من الاصل جان يريد غيرها ماكو داعي الهاي الهوسه بعدين شكو گلبتي الدنيه تزوج عليها وتزوج عليها مو انتِ تزوجتي واحد متزوج لو على الناس حرام وعليج حلال 

-- ماكو داعي الهذا الحچي وعيب عليك تحچي بيه وبنتي مالك شغل بيها وما مسموحلك تتدخل بحياتها لا من قريب ولا من بعيد هاي گدام أبنك ممنوع يحطونك وسيط وتبقى تضغط عليه اطلع منها وعوفني أني وياهم 

-- خره بيج وبـنتج وخره باليدخل بيها بس سمعي زين وحطي هذا الحچي براسج إذا سمعت بيج متصايحه وياهم لو معليه صوت ادفنج هنا بهذا البيت وانعل اليطلع وراج 

هسه غير شافته عصبي ويصيح تسكت منه وتتكفى الشر ماكو ضلت تاخذ وتنطي وياه گـدام أبنه وهيَ من الاصل معليه صوتها 

و متعاركه ويا الناس گدامه غير تكف ماكو قفلت و بس گالها ادفنج ردت عليه 

--  اي يدفني غير دفان أبن دفان 

هيَ گالتله هيج وهو تخبل ركض عليها موتها موت اجى وگف تميم بينهم وجر ابو منها ويحچي وياه يريده بس يهدى و امـي طبت الغرفتها وصوت البچي وصل للشارع

و عمـي باقي يغلط عليها وأبنه كل شويه وگاله صلِ على محمد گول يا الله مو هيج 

وانا تمنيت الگاع تنشگ وتبلعني وبعد ما يطلعلي ذكرت ولا اشوف احد على الموقف الانا بيه الدنيا انگلبت من وراي ومن وره مشاكلي 

عمي هاشـم وابنه راحوا و البيت فرغ محد بقى بس احنه رحت انا وره امـي الغرفتها لگيتها تبچي من شافتني طبيت بسـرعه گالت

-- كله مني اني الوديتج للتهلكه بـ اديه 

-- تعاركتي ويا عمي وطگج من وراي گدام أبنه 

-- لو اعرف يموتني ما اسكت على هذاك الناقص فوگاها جاي يشمر عليه بالحچي وهو ابو الراهي ابن الكلب فوك ما كسر بختج جاي وحاسب الخالقه ما خلق غيره بسيطـة اني اله 

-- عوفيه لا تحچين وياه بعد هوَ ما يسكت وانتِ ما تسكتين وعمـي ما يرضا وتخرب حياتج من وراي

-- معليج بعمج واصلاً ماله حق يدخل بيج انتِ بنتي مو بنته وماله حق حتى يحچي بموضوعج 

سكتت وعفتها ومر هذا اليوم علينا والوراه والوراه كلها قهر بقهر روحـي گمت ما اتحملها الدنيا احسها ضايگه عليه عمي هاشم بعد ما رجع و أمـي ضايجة ومقهورة شوكت ما تجيلها 

باقيـة تروح للصالون مالها و ترجع بس بخلك ضيك وانا كل الوكت بالبيت إحس البيت صاير سجن صدگ انا ما اطلع ولا متعلمه على الطلعه بس هسه گايمة اختنك وحدي الليل ونهار بالبيت والقهر بگلبي لا احچي ولا اسولف ولا اشتكي كله گام يأثر عليه 

شوكت ما تجيني گاعدة و بگلبي گومه سوالف عـدت أسبوعين تقريباً على جيتهم والمشكلة الصار وعمـي الهسه ما جاي ولا متصالح وياه أمـي واأمي صايرة روحها بخشمها بهاي الايام اجه تميم مره جاب مسواك و طب گعد شوية يم امي بالهول 

انا ما طلعت يمهم ولا شوفته روحي أستحي و مره ثانية اجه مـراد بس ما فات من الباب جاب مسواك و سأل إذا محتاجين شي لو لا وراح 

رائـف بعد ما اجه ولا سمعت شي عليه 

لحـد ما عـده شهـر تقـريباً جانت الدنيا عصـر وأمـي بالصالون يوميـه تروح بال11 لو بالعشرة الصبح و ترجع ويا المغرب لو وره المغرب وكل هذا الوكت انا وحدي بالبيت 

اندگ الباب رحت اشوف منو بالاول عبالي 

واحـد من ولـد عمـي هاشـم لان بس هم يجون علينا يجيبون غراض البيت بس تفاجأت من سمعت صوت عمـي حاكم يگول هذا انا 

بقيت واگفه وره الباب و حايرة افتح لو لا 

رجع گال فتحي عمو وياي خطار استحيت منه و انجبرت افتح الباب اول ما فتحت شفته هوَ و بُــرهان و ابـو بُـرهـان

يُـمن :- هلا و كل الهلا تفضلوا

حاكـم :- هلا بيج حبيبتي عمو شلونج

-- الحمدلله 

محمد :- شلونج عمو

-- الحمدلله على الله تفضلوا 

طبوا جوا وانا امشي وراهم و ارحب بيهم بُـرهـان ما سلم عليه فات بلاية سلام وانا هم ما سلمت عليه إذا هذا الخير مالهم هيج لا عتب على الباقيـن 

طبوا بالديوانية ويسألون على حالي واحوالي وانا ارد على گد السؤال سألوا على امـي رديت بالصالون ويا ردي صارت عيني على بُــرهان لوره شفته وهز راسـه مثل المستهزء بالموضوع ما ادري شبيهم على أمـي قابل اول وحده تتزوج عليهم حلال وعلى الوادم حرام 

غلست ما حچيت شي وعفتهم ورحت للمطبخ حضرت الماي والجاي و خابرت امي گالت الها عليهم ردت 

-- ديري بالج ترجعين وياهم مسافـة الطريق واوصل

-- لا شلون ارجع بس لا تتأخرين

-- ما اتأخر 

سديته منها واخذت الماي ورحت عليهم 

گـال عمـي حـاكم 

-- خابرنا زوج امج أبو تميم گال مسافر ما ردنا نجي البيته بدون علمه

-- البيت بيتكم مو غربة انتم 

-- شنو وضعج عمو حبيبتي لشوكت تبقين عايفه بيتج و زوجج 

-- ما ضل لا بيت ولا رجل عمي كلهن راحن وهوَ عافني انا ما عفت احد 

-- لا هذا الكلام ما مقبول منج تدرين كلش زين محد عايفج رائـف رايدج و مشتريج 

-- اي ادري من گد ما رايدني ومشتريني جاب شريجة على راسي

محمد :- بصراحة اني ما احب ادخل بين الازواج لا بخير ولا بشر لان اول شي البيوت اسرار وثاني شي اليدخل بنصهم دائماً يطلع بالوجه الاسود اول واخر يتصالحون 

و الناس تطلع بالوجه الاسود وتتفشل الهذا السبب ما ادخل بينهم ابداً لا من قريب ولا من بعيد بس انتِ طيبة و حبابة ومؤدبـة

و ما يهون عليه يصير كل هذا الزعل بينج وبين زوجج الهذا السبب اجيت اليوم عليج و بنفس الوقت رائـف بمثابة بُـرهـان يعني انتوا الاثنين الكم معزه خاصه عندي

-- الله يحفظك ويستر عليك

-- رحم الله والديج ، شوفي بابا ما اريد ارجع احچي بنفس الموضوع واگول جان يريد بنت خالته وجان ناوي يخطبها وابو جابج وحطه گدام الامر الوقع لان هذا الحچي بعد ميفيد اللي صار صار و كل شيء انتهى وصرتي زوجته بس بنفس الوقت هو يگول اني منطيها خبر من قبل احب أديان واريدها يعني من الاول متفق وياج ومن الاول تعرفين بيه يريد غيرج يعني ما خلاج وراه صح تزوج بدون علمج بس هذا الزواج جان معروف من البداية وحسب كلامة من ضم عليج موضوع الزواج ما رادج تنقهرين هيج جاي يگول 

-- عمي انتَ على عيني وراسي وگبل شوية خوش حچيت حچي گلت البيوت اسرار وانا اگلك لا عاب حلگك صدگ البيوت اسرار واكو سوالف انتَ ما تدري بيهن انا صدگ اجيت غصب عليه واخذني مجبور وكثر الله خير كسب بيه اجر وخلصني من الموت بس من كتلني عمتي والبنات

و جبتوني بـ بيتكم  وراها اجيت الامي طلبت منه يطلگني و يروح يشوف حياته بس ما رضا و امي گالت الهم ما تتحمل الشرج وما تگدر عليه گالوا لا بعد ما يعرس خرب الخطبه و كل شي تريدة يصير مو صدگ عمي لو انا غلطانه

حاكم :- لا ما غلطانه بالله العلي العظيم فركش خطبته و بُـرهان شاهد و عمج محمد شاهد على كل حرف احچي الناس كلها درت بيه من خربها بس من انتحرت 

تغير الموضوع ورجعها

-- وانا يا عمي لعبه فركش رجع عرس يريدج انتحرت صحت 

-- لا مو هيج بس اكو شغلات صارت ما تعرفين بيها الهذا السبب رجعها و تزوجها

-- وشني الشغلات عمي هذا مو مبرر حتى يرجعها ويكسر خاطري 

-- لا هذا مبرر و مبرر كلش كبير عمو حبيبتي تدري بيه شگد احبج وشگد اتمنالج السعادة والاستقرار بس الوضع مو مثل ما مفكرته صدگيني رائـف انجبر يتزوج أديان و ما اگدر احچي الاسباب صعبه بس ثقي هو يحبج لو ما يحبج ما يضم عليج زوجه 

-- شـضم وهو جايبها بيتي المتانيته يوم يوم يعني بـ رأيك ضم عليه بيوم العرس ما فكر ثاني يوم من ارجع ما راح اشوفه واشوف مرتـه

محمد :- يگول ما ردتها تنقهر وتشوف الزفه وتسمع الناس على أساس مفكر يفتح الموضوع وياج شوية شوية 

-- ههه چا ما فتحه گبل الزفه ما فتحه من خلاني بـ ايدي اغسل البيت واعدله وارتبه 

يريد يفتحه وراه البدله والهلهوله حتى يحطني گدام الامر الواقع لو شني سالفته 

سكتوا محد رد و عمي حاكـم بـاوع البُـرهان ورجع گالـي 

-- عمر بلا امر عليج جيبيلنا نفاضه

گمت جبت نفاضه ومن رجعت قبل لا اطب عليهم سمعت بُـرهان يگول

-- گتلكم ما اجي وياكم من الاول جلبتوا اله تجي هسه شراح يغير وجودي وياكم عذركم اقبح من ذنب ما اشوف اي مبرر الهذا التمسك راح تگولون يحبها فـ اني اكثر واحد يعرفه بالعالم لا يحبها ولا هم يحزنون بس ليش هذا التمسك بيها ما اعرف گتله يا أخي انتَ تزوجت و مشيت عوف الابنيه تشوف حالها ماكو ما يرد وبشنو يفكر ما اعرف 

محمد :- مو وقت هذا الحچي هسه جايين نهدي النفوس مو نزيد النار حطب يا أبني

-- يابة مو كل الحچي ينحچي جان يشكي ويبچي بس يريد يخلص منها وياخذ حبيبته اشو من عافته و راح تزوج حبيبته رادها وصارت عزيزة والله هاي الابنية مسكينة صارت ضحيه أم انانيـة و زوج نـرجسي 

حاكـم :- كله من عندي صوجي اني وصلتها الهذا الحال

طبيت عليهم بسرعـة سكتوا گعدت يمهم 

محد يحچي ساكتين وراها بشوية رجعوا فتحوا الموضوع من جديد و بقوا يقنعون بيه ورجعوا يحاولون يثبتون هو يريدني

و يحبني لحد ما اجت امـي

گعدت يمهم و رجع الموضوع انفتح من جديد أمـي اللسان ما يگدرون عليها منين 

ما يفوتون عليها تطلع الهم بسالفه تفرهم بيه ما انطتهم مجال و أخر شي خصمتها وياهم وگالت الهم 

-- رجعه ما ترجع لو يركع راسه بالحايط 

و وصلوله هذا الحچي اني وياه والزمن طويل

توسلوا رادو عدلي بدلي حطي شروط ماكو ما ردت عليهم موقفها ثابت اله اخليه يعض اصابعه ندم اخر شي سلموا وطلعوا 

عمي حاكـم وعمـي محمد طلعوا و بُـرهـان بقى واگف بالحوش من تأكد منهم راحوا گال الامـي

-- طول الگعده واني ساكت ما حچيت ولا ادخلت بس فهمت نيتج شنو عايفتها يمج حتى تجرين إذنه مو صح لو غلطان قبل لا تردين اني اجاوبج اي صح وزين تسوين وعاشت ايدج بـس يا ترى تعرفين بـ رائف 

تمشي وياه سوالف جرت الاذن والعقاب لو ما تمشي

-- شنو قصدك تهددني لو شنو 

-- ابداً بس اريدج تفهمين عنادج هذا راح يضر بنتج و راح تكسرين ظهرها للمره الثانية شـوفي يا أم يـوسف إذا خايفه على بنتج مثل ما تتدعين فـ طلبي طلاقها وخصمي الموضوع وإذا الشغله شغله عناد بـ رائف حتى تردين عليه التجاوز اللي تجاوزة عليج فـ خلي بالج رائـف دكتوراة بالعناد ومستعد يحرك الاخضر واليابس ولا واحد يكسر كلمته وابد لا تحسبين هذا تهديد مو اني اللي يهدد مره لا بالله بس جاي ابعدج وابعد بنتج المسكينة من النار 

و اتمنى تاخذين كلامي بعين الاعتبار

و تفكرين بمصلحة بنتج وتتركين غرورج شويـة 

افتر و طلع وصل يم الباب و ورجع تقدم علينا كم خطوة و گـال بهدوء

-- و لا تنسين بنتج بـذمه رجال وما يصير تطلع واطب ويا ولد زوجج بدون علمه بحجه يجيبونها ويرجعونها ولا تنسين شلون بنتج عجينه ومن أهل الله والناس شياطين والوضع تعبان فكري عدل قبل لا تخلين فلان ياخذها وفلان يجيبها ترى الشيطان بعده ما مات 

عافنا وطلع وامـي اول ما طلع گالت بعصبيه

-- طايح الحـظ 

عفتها و طبيت جوا و هي طبت وراي تحچي عليهم وتغلط عليهم واحد واحد 

وره يومين اجه عمي حاكم ونفس الشي امي ما قبلت حتى يفتح الموضوع 

بقيت بيت امي تقريباً ثلاث اشهر وره زواجه روحي بهتت ومشاعري بردت ما گمت احس بشي قوي مثل قبل صدگ تجيني ساعه انقهر وابچي بس باقي الوكت عادي عندي عكس گبل جنت الليل ونهار افكر بيه ومقهورة 

جنت كل شويه اصفن واگول هسه

شـ گاعد يسوي يسولف وياها يضحك ياكل شرب نام گعـد وبالليل اشبع بچي يلا اغفه 

هسه لا بعد ما افكر وگمت اتعود على فراگه وإذا اتذكرته وبديت افكر بيه بسرعـة ارد على روحي هذا مو الي مو مالي من الاول مو مالي و لا گلبه الي من الاول هو ملك غيري وانا الاجيت وهدمت حياتها مالي حق انقهر ولا الي حق احاسبه 

ليش اسأل وينه وليش افكر شيسوي شعليه اسأل عليه مو ما اريد ارجعله بعد ليش افكر واشيل همه شـيسوي هسه اكيد لو گاعد يمه مرته لو ياكل وياها لو يسولفون ويضحكون لو طالعين لو نايمين بعد عليمن حايرة شيسوي وشيسوي

 گمت اجبر روحي على هذا الوضع حتى اتقبل فكره عرسه وانسى وما اهتم 

بهاي الثلاث اشهر عمي حاكم كل اسبوع يمنا يحاول بكل الطرق يصلح الوضع بينا ويرجعني بس امي جانت معاندة ويا رائـف وما تقبل ترجعني اله وانا من الاصل ما عندي كلمه ولا اعرف اخذ قرار و روحي باهته وكل لون ما بيها عايفتها وره أمي

هنا عمـي هـاشم رجع تصالح ويا امي ورجع يروح ويرجع علينا بس الرجال مالت الله ما سمعني كلمه باطلة لو ثكل عليه 

بالعكس ، بس قبل لا يتصالحون امي ما قبلت تصالحه الا تحط عليه شرط ما يدخل بيه و يعوفها هي تأدبهم  

ومنا والرجال اشال ايده من سالفتي واصلاً من يوم عركتهم شال ايده مني وحتى من اجه عمي محمد وعمي حاكم وخابروا گالهم مسافر ما راد يتدخل واخر مره مخابرة عمي حاكم وطالب منه يتدخل واسطه خير بيناتنا رادله هذا الموضوع ما ادخل بيه بينكم وبينها حتى ما ذاكر اسم امي شامرها براسي گايله بينكم وبين يُـمن

مشت الايام وحالي مثل ما هو و عمي حاكم مل وبعد ما خابر ولا اجه و هنا رائـف قرر يجي وحده و عسى ما اجه ولا قرر بيومها تعارك عركه ويا امـي بحيث وصلت بيه فشر على امـي و تلفظ بكلمات 

عيب تنگال بحق المره 

وامـي سمعته لو تخبلت و صارت بينهم 

فد نوب يعني الوضع كلش خرب ولو جان أكو أمل واحد بالميه امي ترجعني هسه راح الواحد و انتهى الموضوع 

بيومها الف الحمدلله عمي هاشم ما جان موجود لو جان موجود وسمع بالعركة والحچي لا چا امي اطلگت و رائـف فصلوا بالعشاير و سجنوا بالحكومة على غلطه وحچيه 

انا بوكتها ما طلعت ضليت بغرفتي وهم بالحوش واسمع حچيهم وغلطهم بوضوح 

لحد ما طلع من البيت و هو يگول سهلة بسيطـة 

السهلة والبسيطة هاي ما همت أمي

 و مرمت عليها حالها من حال اي كلام عادي بس هو جان يقصدها ويقصد معناها 

طبت تغلط و تسب وتنعل بيه وبـ اهله وبعشيرتـة وحتى أبوي سبته وشعلته شعل وهو بالكبر على هذول الاهل وهذول الگرايب هنا من شفتها هيج انفعلت 

گلت هـيَ ما جاي تهتم الحياتي بگد ما جاي يهمها عنادها ويا رائـف وكسرت خشمه هيَ لو تفكر بيه چا حلت الموضوع بالتفاهم و فكرت بحچي بُـرهان وتحذيراته من هذا العناد وطلبت منه يطلگني وفضت كل هاي الهوسه 

ضلت معاندة وعاجبتها روحتهم ورجعتهم علينا تريد تذلهم عود لحد ما تعاركت وياه وصلت بينهم الطريق مسدود هوَ طلع من البيت يتوعد وهـيَ طبت للبيت تسب وتغلط عليه وبالأخير و عودة تنفذت وفاز عليها وانا صرت الضحية للمره المليون 

وثانـي يوم هيَ راحت للصالون مثل كل يوم و وراها بنص ساعه تقريباً اندگ الباب رحت افتحه وگفت وره الباب وصحت منو بسرعـة گال انا عمج غازي 

ضليت واگفه وحايره شعنده جاي وشيريد رجع دگ مره ثاني ويگول 

-- فتحي عمـي اريد احچي وياج خابرنا أمي هسه راح تجي فتحي الباب بين ما تجي 

وانا من گد ما ثوله وما افتهم طحت وفتحت الباب عبالي صدگ مخابر أمي وحاچي وياها 

اول ما فتحت جفتوا علينا النص البيت هو

و عمامي الباقين اول شي سواه طگني جلاق خلاني اطفر من الوجع وراها جرني من شعري واخذني للبيت الجوه والباقين وراه شمرني بنص الهول ويصيح 

غـازي :- وين عباتج ولج دايحـه لبسي عباتج بسرعـة

لبدت بالزاويـة و انا اتشاهد واگول رحت بيها بعد محد يخلصني منه رجع سحلني سحل و جبرني اللبس حجابي وجبتي

 و اطلع وياهم وين ما ادري شراح يصير بيه ما ادري كل الادري بيه رجعت تحت اديهم وانتهى امري 

يتبع..... 

#عــروس_الچبـــايــش 🌼

بــقلم يـــاســـة الحلقة (14)

 الا يكفي أن أقـول أننـي متعب

 ليحتظني هذا العالم 

ومرهـق لدرجـة حتى عظامي تشعر بالخيبة 

وحساس لدرجة حتى المواساة تشعرني بالإهانه 

بغيـر ديرة البال حايـر 

والقهـر گعـدت عشايـر 

والوجـع ياكـل بـروحـك

والحـزن دايـر مـدايـر 

والتناقـض دوخـة صايــر 

وفـوگ خـدك كلشـي طـاح 

وتصفـن الها تحاچـي روحـك 

هـذا عمــرك ويـن راح ؟ 

................................. 

يُـمـن :- طلعوا بيه بسيارة صفرة جانت متانيتهم بالباب صعدونـي و مشوا بيها طول الطريق ابچي واتوسل بيهم بس يرجعوني محد بيهم يرد عليه عمي غـازي بالصدر گاعد و عمـامي نـاهي و بـاهي گلعدين يمي وره و من عله صوتـي بالبچي گرصني عمـي ناهي بـ زندي حيل يريدني اسكت

ضليت ابچي لحد ما انتهيت محد بيهم رد عليه الطريق طويل و روحي احسها بادت من گد ما بچيت وخفت منهم 

ساعه ساعتين واحنه بالطريق هنا عـرفت رجعوا بيه البيتهم للچبايش و انتهى امري رفعت راسـي ابـاوع منا منا بلكي واحد منهم يعطف عليه و يخاف ربه بيه ويگول هالجاهل اليتيمة هاي خلينا نخاف الله بيها بس ماكو 

لحـد ما وصلنا للبيت و نزلوني مثل ما صعدوني يسحلون بيه إذا اگول موتوني كلمة موت قليله وهينه عاد الموت بـ ايد الرحمن الرحيم يعطف ويحن على عبادة 

إذا اگول انتهيت بـ ايدهم قليله عذبوني عذاب لا مار ولا صاير لحـد ما نفسي انگطع وحلگي ارزگ و جسمي يبس عمـي غـازي جان يطگ بيه ويگول

-- ما تردين رجلج وشاردة منه مثل ما شردت امج لگيتلج واحد غيره مثل ما امج لگت واحد وشردت وياه بنت الدايحـة

ولج عبالج أسكت عنج مثل ما سكتت على أمج 

وجدتـي مناك تصيح

-- نفس الساس ونفس الرس مال (...) يشردن ويا الزلم عدكم اياها هاي الدايحه بنت الدايحه 

طحت من گد الكتل و بعد لا حركت ايد ولا رجل ونفس مابيه و جسمي صار خشبة يابسة يلا هدوني وراحوا عافوني طايحه بغرفتنا القديمة و طلعوا جدتي ضلت فوك راسي و بعوجيتها اطگ على راسي و تگول

-- ما كافي فضيحه امج وعارها تردين تجيبن العار النا شفتينا سكتنا على امج من شردت عدالج نسكت عليج لاع وحات ابوي اخليهم يكصون (...) بنت الـ (...) 

امج سكتنا عنها عبن مالنه حك عليها وعمج ماخذها يتمتع بيها بلاية ما تدري

الناس لو يدرون بيه ماخذها وحاسبها حرمه چا طريناها نصينا 

عافتني وطلعت و يا ما طلعت رفعت روحي اريد بس اشوف بعيوني ماكو ما اشوف اريد اسيطر على روحي ماكو رجعت غمضت 

و حتى بچي ما اگدر ابچي بس مغمضه وكل جسمي يوجعني و يرجف مابيه كل قوة نهوني نهي الظالمين 

ما ادري شلون غفيت شوية وفزيت على صوت عمي غـازي فوك راسـي و يدفر بيه حيل يريدني اگعد بس شافني فتحت عيوني گال

-- عليش هاده زلمتج وگاعدة بيت امج

الـ (..) لاگيه وحيد غيره 

ما اگدر احچي بس الدموع گامت تنزل بكل سرعتها رجع گال

-- ما عرفنا نحويج وخليناج على حل شعفتج طلعتي على ميمتج بنت الدايحه 

بس منا وجاي انا اعلمج شلون تحوين بيتج وتگعدين وتنسترين 

طبت جدتي وراه و تگله

-- خلها هنا اليوم وباجر طرش خبر الزلمتها يجي ياخذها و ينعل سلفه سلفاها

-- لا موش يوم واحد اريد اخليها هنا شهـر

اريد اطلع حليب اميمتها النكس من خشمها حتى بعد ما تفكر حتى بينها وبين روحها تعـوف زلمتها وتطلع 

رجع طلع وجدتي باوعت عليه وعضت ايدها اليمنى عليه  و تأشرلي بـ اصبعها الايسر الوسطاني وتگول 

-- يزمو يا بنت الشوارع يو ما خليتهم يربونج من جديد ما اطلع سعـدية زلمه فاهم وعالم وشحلاته ما تردينه عليش ولج ما مريحج يو شني بس عليمن تطلعين بنت امج بعد وعدهم الحساب تضلي هاي ضلتج مثل الچلب بهاي الحجرة وكل ساعه تنطگين حالج حال الحوواوين 

رجعت طلعت وانا بقيت على نومتي غمضت عيون واگول شمدريهم بيه زعلانه وما اريد ارجع و وين اندلوا بيت امي الله 

لا ينطيك يا رائـف هذا انتَ الگلت الهم 

و الوديتهم عليه بحظك وبختك كون

ان شاءالله

مر اليوم عليه من امر ايام عمري لا اكل

و لا شرب وكل شوية عمي يروح ويرد عليه يطگني ويغلط عليه وعلى امي و يطلع

طلع قهر امي وشردتها كلها بيه لحد ما صار الليل ونامو تمنيتهم ما يگعدون ويطيح عليهم صاروخ ويفنيهم فني ويخلصني من ظلمهم بس گعدوا من الفجر ويا ما صاح الديج كل شيء مابيهم جنهم حصونه كل الحيل بيهم 

اسمعهم يصلون والدين والإيمان يطلع من خشومهم و راها شربوا جاي و راحوا بالزرع والحلال ومثل گبل نسوانهم كل وحده تلزم الها شغله تشتغل بيها وجدتـي ملتمه عليها النسوان والسحورة گايمة 

انا ضليت بالغرفـة ما طلعت بس اسمعهن واسمع سوالفهن وشغلهن وساعه شوية وطبت عليه جدتي سويت روحي نايمـة ما حسيت غير على عوجيتها طبت بنص بطني فزيت مشعوبـة ولازمـة بطني  گالت

-- يلا گومـي هاي موش بغداد حتى تنامين للظهاري گومي خلني اعلمج شلون تتأدبين 

 

گمت گوه عليه مكسرة ماكو عظم صاحي بيه و دايخه تفتر بيه الدنيا فر ولعبان نفس موتني و فوگاها معدتي ذبحتني ذبح ما ماكله و لا شاربه من البارحه الصبح مشيت وراها لحد ما وصلنا يم زريبة الحلال (بيت الحلال) گالت

-- يلا تحكينها حك اريدها اتصير انظف منج ومن امج گون ريحتها توصل غاد يمي 

عافتني وراحت وانا ما بيه حتى اوگف والريحه تكتل و الجوع موتني بيه ما بيه طبيت وبديت انظف بيها و كل شويه اگعد واحط أيدي على بطنـي توجعنـي وبنفس الوكت ما اسيطر على روحي جسمي يـرجف من الجوع والكتل 

ساعتين يلا كملتها ويا ما طلعت وشميت هواء الله وطگتني الشمس لعبت روحي بس ما اگدر اتقيأ ما ماكله شي و بطني فارغة تصوصي 

لزمت بطني حيل و رجعت للبيت ويا ما طبيت صارت عمتي كلثوم مرت عمي غـازي بـ وجهي بس شافتني گـالت

-- ديري بالج توصلين صوب ابنياتي وتجرينهن على دربج ودرب امج اخلي عمج ينحر زدومج نحر و روح العزاز 

ما رديت عليها طبيت للحمام غسلت اديه وجهي وانا الدموع عشرة عشرة طلعت من الحمام ريحه هدومي تذبح وما جايبه وياي غيرهـن شلون اسبح هسه 

ضليت بالغرفه وابچي بلاية صوت خاف يسمعوني ويجون يطگوني وبعد مابيه طگه

بعدني هسه گعدت وسمعت صوت جدتـي تصيح عليه بيه ما بيه گمت گوه امشي من غرفتنا الغرفتها الف عثره عثرت لحد ما وصلت يمها گالت

-- تعاي گعدي حداي يمجيره 

رحت گعدت يمها باوعت عليه و گالت

-- شني اخبار امج يگلون ماخذه واحد عده فلوس وعايشة بنص الخير

ما جاوبتها بقيت ساكته شمرت عليه طاست الماي اليمها و صاحت بصوت عالي

-- موش احاچيج شنهي تستنكفين تردين 

-- لا لا والله 

-- چا عليش ما تحچين ولج 

-- شـحچي جده 

-- امج ماخذتمن 

-- ما اعرفه واحد غريب

-- وين لگته وشلون اخذها

-- ما ادري جده والله ما ادري ما گالتلي 

-- عده فلوس 

-- اي 

-- شگد عده

-- شمدريني جده قابل يروح يسولفلي شگد عنده 

-- ياهو العده اكثر هو يو زلمتج 

صفنت عليها بله هاي صدگ تحچي رجعت گالت موش احاچيج 

-- ما ادري جده والله ما ادري ما اعرف بهاي السوالف انا

-- جيرة بفرگج وبفرگ الجابتج چا شتعرفين يا مگيره لا حويتي زلمه ولا حويتي بيت و لا عرفتي تاخذين جم فلس منه ولا من رجل امج موت الكرفج 

-- ترديني ابوك

-- شوف شوف منعوله الوالدين شلون تفرها عليه 

سكتت منها مابيه اخذ وانطي وياها هاي وحده لا تخاف الله ولا تستحي وصلت بيها تعلمني على البوك رجعت گالت 

سعـدية :- ياهو عده فلوس اكثر زلمتج يو رجل امج 

يُمـن :- ما ادري يمكن رجل امي 

-- وهذا رجل امج ماخذ گبلها يو بس هيَ 

-- ماخذ

-- شعده خلفه من مرته الاولية 

-- اثنين ولد وثلاث بنات

-- والاولاد ماخذين نسوان يو لا

-- واحد ماخذ والثاني لا

-- يجون لمميتج يو ما يجون

-- ما يجون 

خفت اگلها يجون و تروح تسويلي سالفه وانكتل من وراها رجعت گالت

-- تردين تتطلجين من زلمتج حتى تاخذين وحيد منهم موش هيج

-- لا والله لا 

-- چا عليش ما تردين الزلمه و رايحه مختاضه بيت امج

-- غير تزوج عليه 

-- وشني ويو اخذ مره انگصت منج وذره 

گمت ابچي رجعت گالت

-- يو خليتج تتطلجين من زلمتج وتاخذين عشيگج هذا تنطيني حصه من الخير العدهم يو لا

فتحت عيوني مصدومه يماا هاي شني وين تريد توصل تحچي صدك لو تريد تبوك اللساني لو شني سالفتها رجعت گالت

-- هسه بـس احرگله وريقه وحيده اخليه يطلجچ وتاخذين العاشگته ومحد من عمامج يحچي و يفج حلجه وياج بچلمه

بس اريد حصه جبيره من خير أبن رجل امج ويو ما جبتيلي الاريده اسويلج عمل واخليج تتسودنيين وما تگعدين عد زلمه طول عمرج

-- جده والله ما عندي شي ويا ولا وي اي بشر ورجلي عفته لان اتزوج عليه والله وروح ابوي 

غمتني بـ اثنين اديها و گالت

-- صجيجه كون بماي حار يالمجيره مابيج كل خبر چا هلبت طلعتي على اميمتج لا حويتي رجل ولا حويتي بيت ولا حويتي خير  گومي من وجهي لا بارك الله بيج 

عفتها و گمت للغرفه ياربي دخيلك شني من بشر هاي ام السحور عود ما تسويها والله تسويها وتسوي الاكبر منها مو هاي النسوان يجن يمها يسون كل شي وكلاشي

مو هذول عمامي مخليتهم حتى نفس ما يتنفسون من سحورتها عود ما تسويها تسويها و تسوي أبوها 

صار الظهر وانا لا اكل ولا شرب و بعد مابيه اقاوم روحي انسحنت مني صاحت عليه مرت عمي ناهـي طلعت گوه امشي لگيتها

بـ ايدها ماعون ستيل الچلب ما يرضا ياكل بيه گالت

هاج تزقنبي اخذتها منها بيه تمن وفوكاها مركة يابسة فاصوليه طبيت للغرفه واكلته كله بثواني 

خلصته بس ضليت جوعانه ما شبعت

و اخاف اكوم اصب بعد ما يرضون هو هذا وگوه الله هداهم وخلوني اكله انوب اروح اطلب غيره 

حطيت الماعون على صفحه و تمددت بلاية غسل ومنك ريحتي تكتل مال الحلال النظفته غمضت عيوني ما بيه اتحرك ما بيه اكوم تعبت من هاي الدنيا تعبت واريد أموت واروح يم ربي عاد هو احن عليه من هاي الناس  ضليت مغمضه لحد ما غفيت من التعب والقهر 

ساعه و گعدتني عمتي كلثـوم دفرات برجليها فزيت وطفرت من مكاني خايفه گالت

-- يلا گومي للبيت تحكينه حك كله تغسلينه و تغسلين المواعين وتطلعين 

البطاطين غاد بالمشروع تغسلينهن وتردين 

طلعت غسلت المواعين والحاجه كل شويه اطيح من ايدي ما اسيطر عليها من گد ما مكتلوله وجسمي مكسر انوب غسلت البيت و الغرف غرفة غرفة مسحتها وراها اخذت البطاطين كلهن غسلتهن بالمشروع ورجعت منگعه مي و گوه امشي مريضه ومرضي القهر والظيم والذل مو مرض ثاني 

طبيت الغرفتنا وذبيت هدومي ولبست الجبه بمكانها واخذت الهدوم للحمام غسلتهن وسبحت وسبحه السودة عليه جدتي وگفت بالباب كل شوية وشالت البردة عليه و گالت 

-- سبحوج بـعلي كون خلصي الامية 

طلعت واني حتى ما غاسله روحي زين لبست الجبه واخذت هدومي شريهن منا لمن ييبسن عود اللبسهن 

طبيت الغرفتنا القديمة و لميت شعري بلاية تمشيط و تمدد ميته من التعب والوجع اريد غمضت راسي احس بيه نبض مثل الساعة ما ادري شلون غفيت وما دريت بـروحي بعد ولا حسيت على شي من المغرب لحد ثاني يوم الصبح الساعه اضن بـالسبعه 

طول هذا الوكت لا واحد اجاني ولا واحد شافني ميته عدله حتى جدتي ما اجت گعدتني الله اعلم بيمن التهت و نستني  

فزيت وطفرت من مكاني مرعوبـة هذا هو 

لو جاي اتحلم سمعت صوته گمت وگفت يم الباب اريد اتأكد سمعته يگول 

رائـف :- لا والله مستعجل اريد ارجع من وقت عندي شغل وراي طريق طويل 

اول شي عبالي اتحلم بيه انوب رحت للبردة رفعتها على كيف شفته واگف ويسولف ويا جدتي هذا هو جاي صدگ مو حلم 

بعدني اباوع عليهم من وره البردة شفت جدتي اجت على الغرفه بسرعـة ركضت گعدت بمكاني طبت عليه وگالت

-- يلا ولج ويا زلمتج وچلمه وحده ما تحچين وشيگول تگولين صار وتأمر ويو گلتي لاع بيوم من الايام ويو رحتي الامج 

و گعدتي يمها اخليهم يجيبونج هنا و انا

بـ ايدي احش اديج ورجليج انوبينا 

ما رديت عليها بس شني متت عيوني گمت ما اسيطر عليها شگد بعد انذل واتحمل ذله واهانـه لبست حجابي و طلعت ولا واحد من عمامي موجود وحتى ما يدرون بيه راح اروح وحتى لو درو محد يحچي جدتي الامر الناهي وهيَ گالت رجعي يعني ارجع غصباً عليه وعليهم كلهم 

طلعت امشي بذله وقهر مكسورة الخاطر والروح ما لگيته بالحوش طالع برى جدتي تمشي وانا وراها گلت الها بس اريد اغسل 

رحت للحمام غسلت وطلعت لگيتها واگف بالباب متانيتني عبالها اشرد بس شافتني طلعت طلعت من جيبها هيله وعلج مر خطتهن بـ ايدي وتگول 

-- هاج اكليهن موش ترحين للزلمه خايسة الزلمه يريد المره النظيفـة تنظفي و كسبي زلمتج مو تضلين بهاي السليته هدومج تخط وراج 

ما رديت عليها رجعت گالت

-- صيري مره ما تنغلب ولميلج منه چم فلس وضميهن بلاية ادرية حتى يو زعلتي وجيتي هنا الفيج و ما اخليهم يطگونج فهمتي ام سليته يو ما فهمتي 

هزيت راسي و عيوني تصب ومختنكه خنكه بس الله يدري بيها رجعت گالت هاج اكليهن على الهيلة وعلج المي 

اخذتهن منها بدون صوت وضليت لازمتهن بـ ايدي كرصتني تريدني اكلهن حطيتهن بحلگي وطلعت لگيته صاعد بالسيارة فتحت الباب الوره وصعدت وانا اتمنى اموت واخلص من هاي الذله اتمنى متت ولا شفته و رجعتله ولا صعدت وياه 

بلايه ما يحچي شي شغل ومشى وجدتي واگفه تباوع علينه ومن تعدينا البيت طبگ و عدل المرايه و گال 

رائـف :- گومي هنا ما سايق بيت امج يلاا

كلمه وحده ما حچيت بسرعـة نزلت واجيت گعدت بصفه ضحك بحقارة 

ضحكة انتصار وراها شغل ومشى و يگول

-- اي يعمري شلونج شنو الاخبار

ان شاءالله عرفتي قيمتي واشتاقيي الحظني 

باوعتله وسألته بقهر 

-- ليش هيج تسوي بيه شـسويتلك بيش أذيتك انا والله ما سويتلك شي ما استاهل هذا العقاب انا انظلمت اكثر منك 

باوع عليه وطول بنضرته عليه وراها

اخذ نفس طويل و گـال 

-- انتِ وصلتي نفسج الهذا الحال ومشيتي وره امج الـ (...) 

--لا تفشر على أمـي عيب عليك استحي على روحك

-- هههههه والله ضحكتيني جيد جداً طالع اللسانج وگايمة تردين تطورات تطورات

-- وين ماخذني 

-- للقفص الزوجي السعيد 

حچى هيج ولبس نظارته وهو يضحك مستهزء سكتت من عنده ودرت وجهي اباوع للشارع يارب تنگلب السيارة واموت 

واخلص من هاي الحياة شلون راح اكمل باقي عمري وهوَ تزوج عليه وجاب مرته 

بنفس البيت زين هسه مرته وامه يعوفني بحالي لو راح تصير نهايتي على اديهن 

محد بينا يحچي هو ساكت وانا راسي على الجامه ودموعي تصب بلاية صوت شويه وگال

-- راح ترجعين بغرفتي القديمة المشتمل گاعدة بيه أديان و سوالف الشرايج مالي خلكها و الزعل و لعب جهال ما احبه امج تنسينها وحق هاي النيه الماشين بيها لو لگفتج ذاكرتها بينج وبين روحج مره وحده اسوي بيج جريمة ما مسويها بشر قبلي سمعتي لو لااا 

ما جاوبت رجع صاح بصوت عالي 

-- سمعتي لو ارجعح العمامج وجدتج  يخلونج تسمعين

باوعتله بقهر ورديت 

-- سمعت 

-- عفيه وهسه يلا نزلي حتى تاكلين يگولون گاطعين منج الاكل من البارحه لليوم واني بصراحه ما تهونين عليه تبقيت جوعانـه مهما صار انتِ مرتـي الحلـوة الحبابـة  

حچه هيج وطبگ على مطعم موجود بالطريق بقيت گاعدة ما نزلت افتر عليه واجه فتح الباب و يگول يلا انجبرت انزل  

طبينا للمطعم گتله اريد اروح الحمام وصلني يم الحمام وراح 

طبيت اكو مغاسل و مرايات فتحت البوري وغسلت وجهي ودموعي تنزل وارجع اغسلهن باوعت الروحي جايه بس بالجبه بدون هدوم نسيتهن من البارحه على الحبل و الجبه مالتي تلنبس لبس مثل الثوب الحمدلله من سترتني لو ضاله على سعدية توديني بلاية هدوم 

عدلت حجابي و غسلت وجهي من جديد وطلعت شفته گاعد على واحد من الميوزه 

اجيت وگعدت يمه باوعلي بنضره ما فهمتها مقهور عليه ضايج مني والله مو صاحي شكيت بيه مخبل وما عنده عقل گـال 

-- شتاكلين 

-- ما اريد 

-- يُـمن مالي خلك والله تعبت ومليت يعني فوكاها محملتني الغلط من الاول تدرين اني احب وحده واريدها واول واخر راح اتزوجها من الاول تدرين اجبرت عليج من الاول حچيت وياج وحطيت كل الحچي گدامج وصارحتج بكل شي بعد شكو مسويتها دراما و عايشة اللحظه ومحملتني ذنب 

طاحت دموعي بسرعـة رفعت اديه ومسحتهن ورديت وانا الحسرة موتتني موت  

-- ادري ما ترديني وانجبرت عليه وتحب غيري بس ليش أملتني بيك ليش خليتني اتعلق بيك وأحبك ليش ضحكت عليه

و مثلت عليه ، انا من تزوجتك جنت مجبورة حالي من حالك ومظلومة اكثر منك ما طلبت منك تحبني ولا طلبت تعتبرني مره  عفتك براحتك وعذرتك وانطيتك كل الحق بس انتَ اجيت

 و جريتني الك وعلقتني بيك وحتى وره ما اعتبرتني مرتك عفتك ورحت بس اجيت وراي و گلت أحبج و اريدج وبعد بس انتِ بحياتي تالي تطلع تضحك عليه وتخليني افرح بـ بيت مو بيتي و غراض مو غراض تاخذني وتنومني بالبيت و تخليني اطير وياك للسماء والصبح من اگعد الكاك معرس بنفس البيت ليش  

سكت ما رد طلع جكارة  وبقى يشرب بيها

بدون ما يحچي اجه الولد ابو المطعم يشوفنا شنريد گاله كباب الولد راح وهو ساكت شوية و گال

رائـف :- تگدرين تعتبرين الوضع ما متغير يعني مثل ما جبتج اول مره البغداد واني احب وحده واريد اتزوجها هسه جبتج البغداد واني متزوجها ماكو فرق شوفي الموضوع من هاي الناحيه وانهي كل هاي المشاكل 

-- هيج هيَ بهاي السهوله 

-- اي بهاي السهوله مثل ما جيتي قبل كم شهر رجعتي اجيتي هسه نفس الجيه وانتهى الموضوع 

-- إذا تحبها و ميت عليها ليش ما تعوفني عوفني طلگني و ارتاح مني عليمن بعد جاي عليه ومرجعني وياك 

سكت ما رد عليه وانا بعد سكتت لحد ما جابوا الاكل رش على الطماطه ملح و حط الخبزة والماعون گدامي  ورجع شغل جكارة و گال

رائـف :- اكلي يلا 

-- ما اريد

-- لا حول ولا قوة الا بالله يا بنت الناس ترى إذا صمتي ما راح يقدم ولا يأخر شي اللي صار صار تقبلي الموضوع وكافي بعد لان لعبت نفسي 

ما جاوبته شال هو شيش الكباب وسوالي لفه من الخبزه وفتح قوطيه السفن وانطانياهن ما اخذتهن من عنده بسرعة گال

-- گومي ارجعج البيت جدج الظاهر مو مال عيني واغاتي واني مالي خلك 

بسرعة رديتله 

-- لاا لا راح اكل 

-- يلا لعد فضيها حبابة ورنا طريـق

اخذت اللفه من ايده وبديت اكل بكل ذله 

مذلوله منه ومن عمامي الصار يهددني بيهم ومن امي الكل شوية معيرني بيها 

ومن الجوع الطاگني البعد ما بيه اقاومه 

جانت كل لگمه تنزل بلعومي احسها تجرحه من گد ما يابس 

اكلت اللفه السوالياها رجع سوالي وحدة ثانية اكلتها راد يسويلي غيرها ما قبلت 

من شافني ما اقبل اكل بعد گال يلا روحي غسلي بين ما احاسب گمت للحمام غسلت وهوَ ابد ما اكل شي راح تحاسب ومن طلعنا جاب اثنين جاي واحد اله والثاني انطانياه 

شغل ومشى وانا شربت الجاي و حطيت راسي على الجام احس بيه طبل من گد ما يوجعني غمضت عيوني و بعد ما فتحت واتمنيت ما افتح بعد ولا اوصل واشوف مرته وامه 

سويت روحي نايمه وما فتحت عيوني دگ نقاله ورد على ابو ما اسمع ابو بس اسمعه يگله

اي اجت 

لا ماكو شي 

لا ما مسوين شي

اي قابلة قابل جايبها سحل 

يلا يابة جاي اسوق 

سده من ابو و رجع سكت مده طويله 

وراها دگ النقال مره ثانيـة رد

-- ها

-- نص ساعه وادخل بغداد شكو شتردين

-- اي اجت 

-- أديان روحي طافرة من عندي تكفي شري وخلقتج لا تشوفيناهاا سمعتي لو لا واللي حچيته البارحه ما اعيد بعد فهمتي 

-- يلاا ولي

قفل الخط و هزنـي بـ ايده ما فتحت ولا رديت رجع هزني قوي و يگول

-- ميته 

فتحت وباوعتله گال

-- امج شنو 

-- شنو 

-- ماتت تنسينهاااا

ما رديت رجع گال

-- وإذا اجت عليج تگولين الها ما اريدج عوفيني بحالي 

-- قبلت ارجع وياك وقبلت بكل شي بس امي ما اگدر ماكو واحد يعوف امه حرام عليك

-- اي حرام عليه مو عليج يُمـن امج ماتت فهمتي لو اوديج الغازي يفهمج 

درت وجهي من عنده و هو سكت بعد ما حچى لحد ما وصلنا للبيت مالهم قبل لا ننزل گال

-- اول ما تفوتين تسلمين على امي وتبوسين راسها و أديان تجي تسلم عليج تردين السلام بكل أدب و تحسبيها اختج 

-- بعد اكو اوامر ثانيـة 

-- حالياً لا وجري عدل حتى ما تجيج أوامر

حچى هيج ودگ الباب شوية وفتحت الباب هالـه بس شافتني فرحت برجعتي و حظنتني 

وانا ما صدگت الگه بشر ويحظني بسرعة بچيت بحظنها هو عافنا وفات وانا وياها ضلينا بالحوش حاظنتها وابچي بقهر گالت بصوت ناصي 

-- لا تبچين الله عليج محد يستاهل تبچين على مودة سكتي لا تخلين أحد يشوف دموعج وصيري قويـة ورجعي اخذي البيت من الطول للطول والله اخوي يحبج لو ما يحبج ما تعب هذا التعب كله حتى يرجعج والله يريدج وميت عليج بس ما ادري شنو اللي رجعه على أديان انتِ بطلـة ومتأكدة منج راح ترجعينه الج وحدج محد تشاركج بيه 

-- مكسور خاطري هاله اتمنى اموت واخلص اخوج ذلني فوك ذله أهلي وعمامي اخوج هاني وكسر خاطري اريد اموت واخلص منه 

-- اسم الله عليج حبيبتي كافي سكتي لا تحچين هيج ما عاش اللي يذلج كافي سكتي وخلينا ندخل يلا حبابة 

مسحت وجهي وطبينا جوه لگيناهم گاعدين بالصاله كلهم حتى أديان وياهم ما عدا واثـق ما جان موجود گلت السلام عليكم بس عمي رد السلام 

رحت سلمت عليه باسني براسي ويرحب بيه وراها باوعت الـرائف اشرلي براسه يريدني اسلم على امه گلت الها 

-- شلونج عمه

بـديعـة :- بخير 

عفتها ومشيت اريد اصعد ما بستها اجاني صوتها تگول 

بديعـة :- سلمي على البنات مو جاية وناويتها حرب وعداوات 

باوعت الها ورديت

-- سلمت على الجميع من اول ما طبيت بس محد ردت الناوي الحرب والعداوات هنَ مو انا 

غـادة :- ترى ردينا السلام بعد شتردين نستقبلج بالاحضان ودموع الفرح

رائـف :- انتِ وياها وياها إذا تجرن عدل 

و تعيشن على حب الله خيراً على خير وإذا لا والله تبدن بسوالفجن التعبانه ومشاكلجن الما الها معنى اطبگ راس براس وانعل ابو اليطلع وراجن من هاي اللحظه الما تصير أدميه اعلگها باب الشارع 

وتدرن بيه مره وحده احذر ويلااا وحده تبوس الثانيـة گدامي 

غادة وأديان اثنينهن گامن من مكانهن بس ما عاجبهن الموضوع هنَ واگفات وانا واگفه ومحد تتقدم وتسلم على الثانية گال رائـف

-- يلا يُمـن تعاي سلمي 

احس متت و بعد ما اگد اتحمل كلش تعبت من الاهانه هاي ما عندي قابلية تتحمل كل هذا الذل حصرتني البچيه بس ما بچيت يمهم كل السويته اجيت عليهن بستهن اثنينهن ورجعت باوعتله واگول

-- تريدني ابوس رجليهن لو هيج كافي 

-- صعدي الغرفتج 

صعدت للغرفـة و انا الدموع گالتلي وين ترحين اليوم بچيت بچي عبالك امي ماتت 

ساعة كامله ابچي و المخده حاطتها على وجهي ما اريد صوتي يطلع لحد ما انفتح الباب و طب سكتت ومسحت وجهي 

ما حچه شي طلع هدوم من الكنتور وراح للحمام بسرعه گمت وره ما طلع فتحت خانته بعدهي بيها هدومة ما ماخذهن للمشتمل صح مو كلهن باقيات بس اكو منهن عايفهن هنا 

رجعت فتحت خانتي هدومي على حطتهن 

والغرفـة مثل ما عفتها و گفت گبال المراية واباوع الروحـي اكو اثر بخدي من ضربت عمي و عيني جواها اثر خفيف 

صفنت على روحـي واگول

-- هاي حياتج تقبليها و كافي بچي اول واخر إذا اعترضتي ترجعين تحت رحمـة غـازي و سعديـة امي لو شما سوت ما تگدر تطالب بيه ما الها اي حق بالدوله انا بـ اسم غازي وكلثـوم و وشفت بعيني شلون من نص بيتها اجوا جروني واخذوني كافي بعد مشي حياتج وياه وتقبلي الوضع ناره ولا جنت هلج ناره ولا جنه غازي وسعديـة يا يُــمن 

ذبيت الحجاب و طلعت هدوم و گعدت متانيته يطلع من الحمام وبس شفته اجه 

گمت سبحت باوعت بمرايـة الحمام على  جسمي شفته كله اثار ضرب اديه زنودي خاصرتي وظهري و رجليه سديت البوري وانا اتحسب عليهم واحد واحد 

طلعت لگيته متمدد والنقال بـ ايده نشفت شعري و مشطت واجيت جريت الغطا

وغمضت عيونـي تعبانـه و إحس خلص هذا حدي استسلمت من گد الأذيـة اريد انام حتى تعدي عليه هاي الساعات وانسى القهر شويـة بس غمضت عيوني جرني عليه وحط راسي على ايده باس خدي و گـال

-- مشتاقلج 

احس معدتي گلبت و روحي لعبت منه ما اگدر اتقبله بس ما عافني لزك هالزكه لزكه دفعته جريته من شعري ماكو ما عافني لحد انجبرت عليه و رجع الوضع بيني وبينه حالنا حال كل المتزوجين بس الاختلاف بينا وبينهم ماكو إحساس ولا مشاعر ما ادري إذا هو عنده إحساس ومشاعر لو مجرد وقت ويخلص

لا فكرت بيه ولا حاولت إحس بيه و روحي لعبانه منه ومن وجوده وقربة و لا حتى اهتميتله دفنت كل شي بيه ومستحيل 

اتقبله بعد وگلبي يهوى بيوم من الايام بس سايرت الوضع وسكتت مجبورة من ظلم عمامي 

نمت وانا مقهورة على روحـي وهو نام ويا نومتي ما گعدت بعد لحد الليل شفته بعده نايم الظاهر ما نايم البارحه كله وباقي متانيهم يكتلوني حتى يجي يرجعني غصباً عليه 

گمت من مكاني سبحت ونزلت لگيت عمتي تسوي عشة و البنات يساعدنها 

عفتهن ورجعت اريد اصعد صار بوجهي واثـق بس شافني ضحك ويگول

-- لك هلااا يابة نور البيت والله

-- هلا بيك رحم الله والديك

-- شلونج اخبارج

-- الحمدلله 

حچيت هيج و مشيت صعدت ما اريد احچي وياهم ولا اريد احبهم ولا اريدهم 

كلهم مشاركين بعذابي انوب اليموت عبالك ما صاير شي والوضع طبيعي عدهم 

يسولفون ويضحكـون كلهم مو صاحي والله واولهم رجلي العبالك ما مسوي شي ولا غلطان بشي اليشوفه قبل شوية شلون يتوسل بيه ويعاملني عبالك ماكو غيري بالدنيا و يحبني يموت عليه 

طبيت للغـرفه بعده نايـم شغلت الضوه

و التفزيون ادور على القناة مال نو ومهند 

بسرعـة فز من الصوت جر النقال يباوع للساعـة وراها گام من مكانه و يگول

-- غير تگعديني بعد شينومني 

ما جاوبته رجع گـال

-- گومي سويلي شي اكله بين ما اغسل 

-- امك جاي تسوي عشة انزل تعشه وياهم

اجه عليه ضحك ويگول

-- بس اني اريد اكل من ايد مرتي ما اريد من امي مشتاق النفسها الطيب 

-- هذيج مرتك وروح اكل من ايدها واشبع من نفسها 

-- هههه والله حلو صايرة تحچين وتردين 

الظاهر شهيناز دخلتج دوره بالوكاحه

رجعت اگلب بالقنوات بدون ما ارد گال

-- بس على كيفج ويانا ترى ندري حلوة وانا ما اقاومج واقاوم هاي الحلا وحقج تنغرين بس مرات الغرور يكتل صاحبة ديري بالج

-- طلعلي القناة مال نور ومهند صار يومين ما شايفتها

-- هههههه هاي شنو مو اگول متطورة طلعتي تابعين تركي اي عيني بس لا ما من وره مهنـد ما تقبلين ترجعين ولج تردين واحد مثل مهند

-- لا والله بس ردت واحد يخاف الله بيه

لا اكثر ولا اقل 

من حچيت هيج عافني وطلع ما عجبه الحچي والله ما ادري شني سالفته مسودن مو صاحي والله بيه خيط خبال 

بس نزل وراه بشويـة سمعت صوت أمي جوه تصيح اليوم الدنيا احركها عليكم بنتي وين وديتوهاا هسه تطلعونهااا هسه 

يتبع.... 

#عــروس_الچبايــش 🌼

بــقلم يـــاســـة الحلقة (15)

أنتِ جميلة بقلبك الأبيض 

الذي لا يؤذي وإن تأذى 

.................... 

و لا ظالمي وأحد لا ماشي بليس 

لا بايگ عنب لا كاسر السلة 

چا ليش الوكت ناصب عداوة وياي

شو حتى اليسبني ترحمت الاهله 

................................... 

يُـمن :- نزلت اركض على صوت امـي لگيتها بنص الحوش و اگفه و تصيح والكل واگف يمها بس شافتني سكتت وفتحت عيونها مصدومه من شكلي 

ركضت عليها وشمرت روحي بحظنها وابچي بكل صوتي و هيَ حاظنتني وتسأل 

شبيج ومنو وياج وليش اجيتي هنا وشلون رجعتي وياه ، وانا ما ارد بس ابچي رجعت تصيح بكل صوتها 

-- والله اليوم أذا ما نومتهم كلهم بالسجن ما اطلع شهينـاز تعاي 

جرتني من ايدي تريد تطلع حاچيتها

-- معليهم همَ

وگفت وردت 

-- چا منوو العليه أبوي 

-- معليهم يمـا هذول عمامي اجو اخذنوني 

و رائـف رجعنـي هنا

-- شنو عمامج شلون اجوا وين اندلوا هاي همَ هيج مسوين بيج

سكتت ما جاوبت بس دموعي تجري وهـيَ تخبلت حچى رائـف 

-- يلاا هسه ما دام خلصت المسرحية طگطگي نعالاتج و هرولي مناا

-- والله والاسمه الله إذا ما تطلع انتَ المخابرهم وجايبهم ومدليهم اطلع إني كل شي ما افتهم

-- وهو كذلك 

-- طايح الحظ 

-- طالع على مرت أبن عم أبوي 

جرتني من ايدي تريد تاخذني صار اسرع من عدنا و گف بطريقنا و يگول

-- وين ان شاءالله

-- وخرر من وجهي 

-- شوفي إني لحد هسه مسيطر على نفسي ومحترمج فـ خليني مسيطر على نفسي و مسيطر على احترامي وتكفي شري وامشي منا 

-- لك انتَ فد مره ما تستحي تتجاوز وتصيح وتجيب عمامهم و تخليهم ياخذونها و انوب توگف بكل صلافه گبالي شنو من بشر انتَ ما نريدك حس على روحك عوفها بحالها ما تريدك گوه 

-- اطلعي برى اخر مره احچي بـ أدب وياج 

-- ما اطلع إذا ما اخذ بنتي وياي

-- مالج أي أبنية يمي انسيها 

-- اي مو بكيفك يلااا يُمــن

بقيت واگف ما تحركت رجعت صاحت بصوت عالي يلاااا مشيت اريد اللبس وارجع وياها صرت قريبة من عنده بسرعة گالي بصوت ناصي

-- وداعت الكعبة الشريفة عل المره اخليهم يدفنونج وانتِ عدله 

بسرعة وگفت وباوعتله وگعت دموعي رفعت ايدي مسحت وجهي سريع وهو حرك حاجبه بمعنى يلا ماكو روحه درت على امي وگلت الها 

-- روحي يما ما اروح 

-- شنو ما ترحين تخبلتي 

ما جاوبت رجع هو رد بمكاني

-- يلاااا براااااا 

وراها تقدم عليها ولزمها من طرف صليتها ومشى بيها طلعها برى وسد الباب هيَ مشت وياه بس شنو عيونها عليه متفاجأة شلون گلت الها ما اروح ومن سد الباب عليها لعبت جوله بالشارع 

سبتهم نعلتهم غلطت عليهم و دفرت الباب محد فتح الها بوقتها عمـي ما ادرين وين رايح و واثـق نفس الشي طالع ما ادرين وين راحوا اني قبل شوية شفتهم اثنينهم هسه وين مشوا ما ادري بيهم ، يعني البيت محد بيه بس احنه النسوان و رائـف 

من خلصت غلط و صياح وراحت باوع للبنات و گالهن

-- يلااا خلص الفلم كل وحده ترجع المكانها 

البنات دخلن وعمتي طول الوقت ساكته وبس تباوع ما ردت على امي ولا حچت حرف واحد وياها بس من راحت ورائف گال يلا خلص الفلم اجى دورها 

رجعت عليه تغلط و تسب وتنعل و تدعي الله لا ينطيني هجمتي بيتي وفضحتيني 

گدام الناس عفتها و طبيت وهيَ طبت وراي تشيل روحها وترگعها وتصيح

-- شعاجبك بهاي المهزله فهمني لك من

يا حاويه جبتها وجبت امها و ورطت نفسك بيها شگول عليك حاكـم احنه وين وهاي النماذج القذرة وين 

محد رد عليها لا انا ولا هو وأديان اجت گعدت و البنات نفس الشي گعدن انا بسرعة صعدت فوك بعدني هسه طبيت للغرفه و اسمعه يگول بصوت عالي

-- حرف وأحد إذا نطقتي سنونج اكسرهن بحلگج انجبي وامشي البيتج يلااا گدامي

عرفته يقصد على أديان الله اعلم شحچت

رجع صعد وراي فتح الباب وطب بقى واگف بـ باب الغرفه و يباوع عليه درت وجهي منه گال

-- شگد شفت دايحات بس مثل امج ما شفت 

بسرعه گمت اريد اطلع من الغرفه من وصلت يمه جرني وخنگني وثبتني على الحايط ويصيح بكل صوته 

-- امج إذا اجت هنا مره ثانية ما اطلعين وتشوفينها وجهجج 

اختنكت ما اگدر ارد احس الاوكسجين انگطع من شافني فد مره اختنكت وخر ايده من رگبتي و گال

-- نزلي سوي سممم انعل حتى العرفني بيج

طلعت من يمه فتت للحمام غسلت وجهي 

روحي رايحه مني من الخنگه لو باقي شوية چا موتني بللت شعري و رگبتي و رجعت لميت شعري و نزلت أديان رايحه بس عمتي والبنات گاعدات وعمتي شادة راسها وحاط ايدها على خدها بس شافتني نـزلت گالت

-- منين اجيتي منين طلعتي شوكت اخلص منج عزا العزاج لا احساس لا كرامه لا تقدير روحي ويا امج ولي وياها شكو باقي مقابيلي شكوو 

اجيت عليها قريب ورديت

-- رحت وما رجعت ولا نويت ارجع بيوم من الايام بس ابنج ما عافني بحالي ابنج دمرني و راح جاب عمامي عليه و رجعني غصب عني سوي فضل وروحي احچي وياه بلكي يسمع حچييج ويطلگني ويعوفني اولي لو بس گادره عليه وذابه الصوج بيه هذاك هو روحيله خل يحس ويطلگني مو گدرتج عليه

گامت و گفت وگفه و بقت اطگ بروحها وتصرخ بكل قوتها وصوت يوصل الاخر الشارع بناتها وگفن يلزمن بيها هوَ نزل من فوك يركض عباله ما ادري شكو بس شافته نزل ملخت شعرها سألها شكو شبيح ردت

-- تتجاوز عليه واللسانها شطوله لك تگول أبنج مجلب بيه اني ما اريده هو مجلب وما عنده إحساس هيج وصلت بيك وحده مثل هاي قذرة تهينك وتتعزز عليك وحده مثل امها ارتست تفضحنا بالشارع وحده مثل هاي تتجاوز على امك واتهينها وانتَ تتفرج طاح حظك يا جبان 

هيَ گالتله جبان وهو صار مثل الثور الهايج ما يگدر يحاچيها رجع عليه ملخني تملخ 

انوب ما يضرب ضرب عادي كله جلاليق 

عبالك زلمه گدامه ما يگول مره و تروح بيها من الجلاليق موتني موت 

البنات اجن اثنينهن علينا جرني منه و هيَ من شافته كتلني گعدت بعد ما حچت طحت بالگاع نفسي مگطوع هو باوع عليها وگاله

-- يلا هسه ارتاحيتي راح تنامين سعيدة خلصت مشاكلج طال عمرج 

ما جاوبته دارت وجهها وهوَ عفنا وطلع گومتني هالـه صعدتني فـوك وگعدت يمي انا ابچي وهي تبچي وياي شوية وگالت

-- كافي لا تبچين والله اليوم بس يرجع بابا احچيله عليهم والله احنه مندري بيه متصل بـ عمامج وجايبهم ياخذونج البارحه بالليل اجه على بابا گاله غازي جاي ماخذ يُـمـن يمهم وراح اطلع اجيبهم منهم وارجعها بابا سألها شعرفه ردله ما اعرف اروح وافهم ومن رجعتوا وصعدتي فوك بابا رجع سألها شعرفهم زعلانه گال ما قبلوا يگولون منو گايل الهم وشمرها براس زوج امج يگول شاك بيه أساس 

هيَ تحچي وانا ساكته و بس الدموع تصب بقت شوية يمي وراها گامت نزلت وانا جريت الغطا وغطيت روحي و نمت 

بيومها ما اجه ولا شفته و ثاني يوم كله ما نزلت ولا حچيت ويا واحد ولا شفت واحد سمعت صوته جـوه گاعـد بس ما صعد 

يومين انا ما شايفته وما انزل هاله تجي تجيب الاكل يمي بالغرفه وتگعد تاكل وياي وتنزل عمـي ما صعـد بس عرفت هاله گالتله و متعارك وياه عركه قوية وراجع متعارك ويا عمتي بس شيـسوي الرجال 

كل ما يحاول يسوي زين تخرب عليه السالفه ويحير بيها و بالاصل هو شخصيتة ضعيفه ما يگدر عليهم بس أمانه الله يحبني ويحاول بكل الطرق يساعدني بس الحظ عاكس وياي وياه

بهاي اليومين خلصتها اكل ونوم لا اگوم ولا اگعد طلع عليه الكتل الاكلته من عمي والكتله الاكلتها منه

وراها گمت انـزل بس ما احچي ويا عمتي ولا اشتغل مثل قبل گمت بس انزل اسويلي شغله شغلتين واصعد ومعليه بيهم 

أديان ماكو لا شايفتها ولا سامعه صوتها

و غـادة نفس الشي ما تقرب منـي وحتى عمتـي أبد ما گالت اشتغلي تعاي روحي باقيه ساكته ومتجنبتني 

أسبوع كامل انا هذا وضعي لحد ما صعد

فتح الباب و طب جنت اباوع بالتفزيون 

اول شي سواه طفـه التفزيون 

ما حچيت ولا گتله ليش من شافني ما اهتميت طفـه الضوه نفس الشي ما اهتميت بسرعة جريت الغطا ودرت وجهي 

للصفحة الثانيـة اريد انـام اجه هو يمي وجراني عليه دفعته منه حظني حيل و حط رجليه فوك رجليه ما اگدر اتحرك حبسني 

يُمـن :- وخررر اريد انـزل

ما يرد 

-- وخررر گتتتتلك

باسني دفته ما وخر واصلاً ما اگدر عليه اقوي مني جريته من شعره رفع راسه مني وطگني گله و راها ضحك و يگول

-- مشتاقلج والله 

-- وخر مني وخرر

-- كافي زعل ما شبعتي بالاسبوع تزعلين عشر مرات ترى ما يصير هيج وإذا كتلتج لو تزوحت عليج لو طردت امج لو خابرت عمج عليج تبقين زوجتي حبيبتي ما عندج غيري تفترين تفترين وترجعين هنا بحطني 

مو صح 

شگد انقهرت على روحي الهاي الدرجة انا بلايه كرامه ومتصغرني هيج رجع يگول

-- تقبلي الموضوع كافي الى متى تستمر المشاكل والزعل ترى لا انتِ تتطلگين ولا هي تتطلگ بعد ليش تسوين حياتنا جحيم

إذا زعلتي و انقهرتي و بچيتي و تعاركتي وياي راح يتغير الوضع لا ما راح يتغير شي ولا راح تلگين احسن من هاي العيشة عبالج امج تگدر تاخذج وتعيشج بنعيم ترى غلطانه انتِ بـ اسم عمج وابوج حتى ما عاقد على امج وبعدج قاصر امج لو تركع راسها بالحايط ما تگدر تاخذج من بيت جدج و بنفس الوقت إذا بقيتي يم غازي وسعديـة يموتونج فـ يا حلوة يا حبابة ليش هاي الهوسه وهذا التعب اختصري هاي الدراما وقبلي بـ واقعج ورجعي مثل قبل 

حبابة هادئة مطيعة وحلوة وانـي مشتاقلج والله ومشتاق الهدوئج وللبراءة مالتج كافي زعل تعبتيني 

ولا رديت ولا حچيت بس گلبي احسه يفور 

من القهر امي دمرتني وضيعتني جابتني للدنيا حتى بس انذل وانهان وانطگ من وراها

رجع يحچي وياي و يتغزل على اساس يحبني و مشتاقلي وانا بالي مو يمه ولا عبالك اكو بشر يمي لا إحساس لا مشاعر 

بس چثه ونايمـة 

رجعت علاقتنا غصباً عليه و على اساس تصالحنا بس انا گلبي مات و روحي بعد مالها نفس بشي لا اهتمله ولا اهتم الروحي ولا الاي بشر صرت وحده ثانيـة عايشـة بهاي الدنيا تكملت عدد لا اكثر ولا اقل

نزلني العمتي صالحني وياها و جاب أديان 

و گعدنا بنفس المكان و منا و بدأت حياة جديدة عندي لا بيها إحساس ولا مشاعر 

ولا روح 

رجعت اشتغل بالبيت بس مو مثل قبل لا هسه اقل البنات يساعدني و أديان نفس الشي تنزل تساعد اول مره ستغربت شعجب يساعدن وعمتـي سكتت مني ما تشمر حچي ولا تبسمرنـي وراها عرفت هوَ حاچي وياهن ما صدگت اخذن الكلام

و سكتن عني واكيد اكو شي وره هذا السكوت بس سكتت وگلت خليها للدنيا

اتاني واشوف قابل شراح يصير اكثر من اللي صار 

حياتي مشت طبيعية ما بيها مشاكل امي بعد ما شفتها بس عمي بين فتره وفتره ينطيني نقاله يگول هاي امج تريد تحچي وياج احچي وياها شوية واسده ولا تاخذ مني حق ولا باطل كل شي ما احچيلها 

رائـف تغيرت معاملته وياي ويحاول يصير زين و ما مقصر وياي يجيبلي و يحطلي يريد بس يرجعني مثل قبل بس انا متت ومستحيل ارجع مثل قبل

 قسم اليالي بيناتنا اليلة يم أديان وليلة يمي ما جان يهمني و بعد ما هويته و گلبي برد منه ما گمت اهتم إذا اجه لو بقى يمها  حياتي وياه عبارة  عن اسويله اكل اغسل هدومه اكويهن غرفته نظيفه حقوقة الزوجية ياخذهن بدون اي اعتراض وهذا هو 

مشت الايام و الوضع طبيعي بيني وبين الكل وعلاقتي وياه الكل على گد السلام والسؤال والجواب حتى عمي و واثق نفس الشي ابتعدت منهم وخليت علاقتي بيهم محدوده بس هـاله تدري بيه وادري بيها 

اشكيلها وابچي يمها لو ضاج خلگي 

صح مرات أديان تجيها الحاله وتتعارك وياي وتبقى تغلط وتنعل وحتى تفشر عليه وعلى امي ولا احچي ولا ارد اعوفها واصعد 

وعمتـي مرات تطبگ وياها ومرات اطردها تگلها دوختينا روحي البيتج راح اخابره عليج 

بس چذب لا تخابره عليها ولا تشتكي منها 

اصلاً النهار كله تعدل بيها و تعلم بيها وحتى ما تاكل إذا ما تاخذ حصة أديان توديها الها وتاخذها صالون و سوك وتفرفر بيها النهار كله بس كون تبقى حلوة بعينه وبعد ما يباوع الحالي  

هنا أديان من عاشرتها و گمت اشوفها على طول اليوم اكتشفت بيها حاله نفسية و مو صاحية وتلح و تنگ و إذا لزمت سالفة

 يا بوية تلعب روح البشر بيها و ما تسكت منها بحيث عرفته ليش جلب بيه و ما يقبل يطلگني يجي يعوض الهوسة والدوخة مالتها بـ راسي 

ومره تعاركوا ما ادري عليمن و نزلت من بيتها تركض وتصيح يبووو يبووو ولكم لحگوا عليه راح يموتني التموا عليها يردون يفهم السالفه نزل وراها ما انطاهم مجال جرها من شعرها صعدها وسد الباب عليها ونزل سأله عمي شكو ردله

-- مخبله الله بلاني بيهااا شلووون اخلص منها شلووون خرب حتى حظي خرب حتى ساعة السودة يوم الاسود الرحت هناك

 و لعبت بذيلي والله عاقبني هالعقاب 

عمـتي بسرعة باوعت عليه و عمي عافه وطب للديوانية والبنات اثنينهن غلسن 

وانا دخت شكو شني قصده بهذا الحچي 

محد يحچيلي ولا سألت بس بقت السالفة براسي لحد ما تعاكوا مره ثانية وهاي المره 

عمـتي و گفت ويا رائـف لان بيومها لمت الدنيا عليهم بالصريخ وهوَ موتها موت يريدها بس تسكت ماكو واثـق گوه خلصها من بين ادية  

انا عفتهم و رحت للمطبخ ولا الي شغل بيهم عساهم بـ ابو زايد وگفت على الطباخ احظر بالعشة و اسمعه يگول العمتي

-- كله منج لطشتيها براسي بحظج وبختج ورطتيتي بيها 

بديعـة :- يا والله شعلية اني تريد تشمرها عليه مو انتِ مسويلك عشك وغرام وگاعد يمهم الليل ونهار 

-- اني لو أختج طايحة الحظ الجرتني

و لبستها براسي انوب فوگاها تنتحر المسودنة 

درت وجهه اباوع على الصاله و هزيت راسي 

والله زين يعيرني بـ امي الشريف اللي لاعب لعب ويا الشريفة الطاهرة  

جانوا كل أسبوع يتعاركون لو مرتين لو ثلاثة مرات نسمع صوتهم بس ما ينزلون علينا ومرات لا هيَ تنازل وتگلبها عليهم گلاب 

الوضع بيناتهم مال تجيب شامية وتگعد تاكل وتبارع عليهم  واثـق جان يضحك و يرد على امه بشماته وره كل عركة وهيَ تسكت  ما تجاوبة لان أني گاعدة 

اكثر وقته يجي شارد منها و يخلصه بغرفتي وانا اعوفه وانزل ما اگعد يمه من يشوفني اعوفه وما اهتم الوجودة يوگف على المحجر ويبقى يصيح عوفي من ايدج وتعاي لا انزل اكسر البيت على روؤسهم 

عمتي تخنس ما ترد تخاف منه و انا نفس الوضع اخاف لا يروح يطگني شو صاير مسودن مثل مرته اصعد يمه بالغرفه من يشوفني بالغرفه يجيب راسه يحطه بحظني و يبقى يحچي 

-- ليش هيج حنينه وحظنج دافي 

-- هذا رزق من الله 

-- بس يمج ارتاح وإحس بالراحه هدوئج مسكن مال إعصاب 

-- والله ما يفيد الإعصابك مسكن يرادلك مستشفى مال مسودننين 

-- هههههه 

-- اريد اسألك بس اخاف 

-- شكو سألي ليش تخافين شكو 

-- هيَ مرتك شبيها 

-- شبيها مو هاي راسي بحظنها وجنها لعابة تخبل وصوته عبالك مسكن الالم 

-- اقصد هذيج

ذب حسره ورد 

-- شبيها هذيج

-- شو عبالك مسودنه وبيها حاله نفسية

-- هههههه 

-- ليش تضحك والله صدگ جنها مسودنه وانتَ هم جنك مسودن شني سالفتكم 

-- هههههههه 

ضحك بصوت عالي و گعد گعده باوع عليه و گال 

-- كل شي ما بيها بس هذا الدلال الزايد يخبل البشر و سوالف البچي الملحه والتنعوص هذا اللي جاي تشوفينة هذا درب قديم عدها من تغلط بشغلة وتريد تخلص منها تفتر على هذا الدرب 

-- وانتَ هم من الدلال الزايد تسودنت

-- هههه اشو مصره اني مسودن وفد مره بعد ما تحترمين

-- مو ما أحترم بس والله يعني ما ادري شبيك ساعة تحبني وساعه ما تحبني وساعه تحب هذيج وساعه تكتلها تموتها وساعه تصيح على اهلك وساعه لا حباب ما تدري شتريد حاير ومحير عباد الله وياك

 

ضحك من گلبه و گام بدون ما يجاوبني  

وانا بعد ما سألته شي وهيج مشت أيامنا 

مو بيت تگول مسرحية كل شويـة گابه العيطه بيناتهم من وراه وره مرته 

اما علاقتهم بـ گرايبهم مثل ما هيَ يجون ويلتمون والسوالف والضحك و الشقه

وانا انزل بس حتى اخلص شغلي يعني لا اگعد وياهم ولا اشاركهم بسوالفهم خليت علاقتي بالكل على گد السلام والسؤال والجواب 

كل هاي الايام الراحت ولا انا صرت حامل ولا أديان انا جنت ما مهتمه واصلاً ادعي ربي كون ما يصير و لا اجيب كسران ظهر اليه بس أديان لا كل شهر تگلبها مناحه شلون ما طلعت حامل وتضل تبچي وحتى اهلها يجون عليها والدنيا تنگلب تصير عدنا فاتحة بالبيت 

جنت اتفاجئ ليش هيج يصير بيها وهيج تنقهر هوَ كل شي قسمة ونصيب و اكيد اله ساعه ويجي ما ادري ليش هيج ةل شهر تموت روحها حتى مرات انقهر عليها من گد ما تبچي 

لحد ما عدت ست اشهر على عرسهم هو وياها وبيوم من الايام بوكت العصر جنت گاعدة فوك اباوع بالتفزيون اجه هو طب 

و گعد بصفي باسني بخـدي و حط بحظني علاگه صغيرة وگـال

-- كل عام وانتِ بخير 

باوعتله وباوعت للعلاگه مال هداية لونها أحمر رديت عليه متفاجأة   

-- بس اليوم مو عيد ميلادي

-- اعرف 

-- چا شني المناسبة تگول كل عام وانتِ بخير

أبتسم ورد

-- اليوم عيد زواجنا

ضحكت واگول

-- يابة عود صدگ صار سنه من تزوجنا  شبسرعه 

-- سنه وفوكاهن كم ساعه زيادة بس بشرفج شلون سنه مو ما تنسي طول العمر 

حچى هيج وضحك بصوت عالي وانا ضحكت بله ما ارد اردي بيه يصنف رجع يگول 

رائـف :- فتحي هديتج 

فتحت العلاقة بيها كارتونه صغيرة فتحت الكارتون شفته جايب نقال ضحكت فرحانه واگول

-- هذا اليه

-- اي عجبج

-- يخبل عاشت ايدك 

-- بالعافية ، جيبي اسويلج الخط 

طلع من العلاگه الخط و حطه بالنقال وشغله و علمني عليه وانا يا فرحتي 

وراها گـال 

-- عرفتيله هسه

-- اي 

-- شوفي ترى اني اعرف بيج تخابرين أمج من تليفون ابوي وحتى كم دقيقة تحچين وياها هم اعرف بس عفتج براحتج لان اعرف بيج ما تمشين وره كلامها و ما تسمعين الغيري وادري بيج محافظة على بيتج وگاعدة والله ساكته وهسه وره ما صار عندج تليفون خاص بيج اكيد راح تكثر مواصلتج وياها وعادي ما غندي مانع بس هااا ممنوع و ممنوع و ممنوع والف ممنوع تحچيلها عن حياتنا وعن وضعنا وتسمعين كلامها وتسويلنا مشاكل وتخربين بيتنا يُـمن اعرفج حبابة و رايده الستر و اني ما اكرها الأ مج بالعكس بس امـج عدها اغلاط هواي و ما اريد اغلاطها تأثر عليج الهذا السبب مانعج منها 

ما جاوبته بس بگلبي اگول لا اغلاط ولا هم يحزنون تخاف لا تفر راسي عليك وتاخذني منك تدري بروحك غلطان من السماد للگاع وياي وعلى ساعه اشر منك ومن ظيمك  رجع گال بله اتصلي عليه 

فتحت النقال وطلعت اسمه مثل ما علمني ودگيت عليه فتح خط و رد وهو گاعد يمي

-- الو 

ضحكت رجع يگول النقال على إذنه

-- معجبه مو ؟ 

ضحكت بصوت عالي سد الخط و سحبني عليه باسني بخدي و گـال

 بدلي نطلع

تفاجأت ولا مره طالعين انا ويا كل طلعاته ويا أديان كلش هواي يطلعون هو وياها جان ياخذها يفررها بالسيارة لو ياخذها للمطعم لو للسوك  لو للحديقه بس انا ابد ما مره طلعني وانا ما اگله اريد اطلع وما يهمني عايفته و ما مهتمه للموضوع كله 

وإذا ردت حاجه من السوك نروح انا و هاله 

صدگ يوصلنا بس ما يمشي ولا ينزل ويانا بس ياخذنا يوصلنا بسيارته وغير طلعه ما اطلع يمكن مرتين رحت وياهم البيت خالتهم ام بُـرهان لميعـة وهذا هو 

يُمـن :- وين نروح

رائـف :- بكيفج اختاري المكان اللي يعجبج

-- ما ادري ما اعرف وما اندل 

-- ماشي لعد بدلي و اني عليه المكان 

گام اخذ هدوم من الكنتور وراح يسبح وانا گمت ركض ركض بدلت مكيفه اول مره راح اطلع واتونس كلش ضايج خلگي ومحبوسه الليل ونهار خليني اطلع شويـة اغير جو مليت من الحبسة 

طلع من الحمام لگاني مخلصه تبديل 

و واگفه اللبس بالحجاب بين ما كمل هو وبدل نزلنا عمتـي بس شافتنا نازلين

و مبدليـن گالت 

-- وين رايحين 

رائـف :- نغير جو عندج اعتراض

ما علقت سكتت ودارت وجهها واحنه طلعنا بعدنا بالحوش ما طالعين للشارع ونزلت أديان تركض وتصيح 

-- حبي حبي اوگف 

وگف ودار عليها وصلت يمه لزمته من أيده وتگول

-- وين رايح 

-- طلع تردين شي

-- اروح وياكم

-- لا 

-- ليش يعني بس هيَ تطلعها واني لا

ما رد عليها بس أشر الها بـ أيده على المشتمل بمعنى صعدي فوك افترت وصعدت ضايجة واحنه طلعنا بالسيارة 

اول شي مشينا على الكرونيش وراها رحنا مطعم تعشينا واشترالي ملابس وحلويات و موطه وعصير وما خله شي ما جابلياه بيومها تونست كلش وفرحت من كل گلبـي خلصت عمري مظلومة يمكن اول يوم بحياتي اعيش هيج اجواء

لليل يلا رجعنا و من رجعنا گبل بغرفتنا 

صعدنا هو المفروض اليوم يروح يـم أديان بس ما راح بقى يمـي هيَ بقت ادك عليه وترجع ليورة  وهوَ ما يجاوب اخر شي قفله وتمدد على الجرباية سألته 

-- راح تنام هنا 

-- إذا ماكو ازعاج

-- شعجب مو اليوم لازم هناك 

-- ما عاجبني اروح هناك عاجبني ابقى هنا

و اريد احتفل بعيد زواجي وياج يصير لو لا 

-- براحتك 

نام بغرفتـي و هاي المره صار بيناتنا  شي غريب اول مره يصير و انا كلش مطفيه وماكو واحد اسأله واصلاً شلون اسأل على  هيج سوالف كل ضني علاقتنا الزوجية قبل عادية حالنا حال كل الناس بس اليوم لا 

اكو شي غريب صار وتفاجأت بيه بس سكتت و ما حچيت ولا سألته استحيت منه 

راح ثاني يوم راح الدوامه وبس طلع أديان اجت وسوت زفه شكبرها فوك راسي ما رديت مثل كل مره عفتها و صعدت اجت وراي جرتني من شعري دفعتها و طبيت للغرفه وقفلت الباب وهيَ تخبلت بچت بچي وصرخت صريخ و نزلت العمتي تشكي عود انا الطاگتها والدافعتها وعمتي طبگت وياها وصارت حرب جوه 

لا طلعت ولا رديت عليهن بقيت بغرفتي لحد ما اجه من الدوام راح گبل الهذاك البيت شوية ورجع عليه لگاني قافله الباب دگاه گمت فتحته

رائـف :- ليش قافلته

يُمـن :- احسن مالي خلك مشاكل 

-- ليش ضاربه أديان 

-- ما طاگتها اول ما طلعت الدوامك اجت هداده عليه وبقت تغلط وتنعل عفتها وصعدت ، صعدت وراي جرتني من شعري  دفعتها مني وهيَ تخبلت بقت تصرخ ونزلت العمتي تشكي عود انا الطاگتها اجتها الحاله مال السوادين الله يكفينا الشر 

باوع عليه و أبتسم ودار وجهه عود يحاول يسيطر على نفسه و ما يخليني اشوفه ورجع يگول 

-- استغفرالله يا ربي 

حچى هيج وراح نزل شوية وسمعته يصيح عليه من جوه مديت راسي من المحجر اباوع عليه گال نزلي صبيلي سممم 

نزلت صبيت الاكل وگعدت وياه اتغده بعدنا هسه بدينا ناكل وطبت أديان بس شافتنا ناكل شالت سراحية الماي من الكاونتر ورگعتها بالگاع وتصيح 

--سمم وسرطان بگلبكم گاعدين هنا تتسممون واني هناك ميته من البچي 

ذب الخاشوكة من ايده و گام عليها وگال هاي عليمن ردت مو عليك والله ورجعت ليوره

لزمها من رگبتها وفرها وطگها جلاق انا من يمي گمت گلت اجاني السره ما بيها مجال صار هواي ما مكتوله اليوم انكتل 

هيَ صرخت وهو استلمها بعد گطعها تگطع 

اجوا يركضون عليهم عمي جره منها وعمتي اخذتها طببتها جوا بغرفتها وقفلت الباب و هو تخبل ومصر اليوم ما تضل بعد و إذا بقت يموتها للمغرب وهو گاعد الها بالصاله وعمتي ملبدتها منه 

انا بسرعه بس صارت العركة صعدت شردت فوك وقفلت الباب عليه بس اسمعه شلون يصيح اخر شي سمعت نـؤفل اخوها اجه اخذها يمكن خابره لان تخبل عليها ما يريدها تبقى اليرم وحالف إذا بقت يموتها خلاص

وره ما طلعت صعد فتح الباب قوي لگاه مقفول صاح بصوت عالي فتحيييي الـخ.. 

طفرت من مكاني بكل سرعتي فتحته 

طب ويگول

-- ليششش قافله الباب 

-- مو عبالي راح تصعد اطگني 

-- يُمـن طلعي من وجهي ما اريد اشوفج 

بسرعه طلعت وصلت يم الدرج صاح 

-- هيووووو 

وگفت حايره يربي هسه يصيح عليه لو على غيري شني هاي الحياة مليت رجع صاح 

-- يُمــننن

رجعت سريع طبيت وانا دمي نشف من الخوف والله ما بيه انكتل والله تعبت 

گـال

-- وين الهويـة

-- يا هويـة

-- الهويـة مالتي هنا حطيتها وينهاا

-- ما ادري ما شفتها

-- يعني وين راحت

-- ما ادري 

-- الحاجه بغرفتج حطيتها شلون ما تدرين بيها

-- والله ما ادري بيها ما شفتها 

-- دوريها خلقيها طلعيها من جوه الگاع راح اسبح واطلع الگاها گبالي

اخذ الخاولي و راح للحمام وانا ما خليت 

مكان بالغرفه ما دورته حتى دوشك الجرباية دورت جوه ماكو اختفت استغفرالله ياربي 

يعني ماكو غير يوم تضيع بيه اله هسه بهاي الساعه بعدني ادور اجه براسه الخاولي

باوع عليه ودار وجهه علك الخاولي على الباب و اتمدد على الجرباية وانا مستمر ادور اخر شي باوعتله وحچيت بخوف

-- ماكو 

-- عوفيها 

وگفت وصفنت عليه شعجب شني الله هدى اجيت گعدت واباوعله بس شافني اباوع ضحك وگال

-- تذكرت حاطها بهذاك البيت على هذاك الميز مو هنا 

-- اي زين من تذكرت قبل لا تجيك الحاله

و تشتغل الجلاليق 

-- طفي الضوه و ما اريد اسمع صوت بس انام ساعه 

طفيت الضوه وطلعت اريد انزل صاح وينننن 

استغفرت ربي وطلبت الصبر على هاي الحياة شلون بيه يا الله مسودن وراح يسودني وياه رجعت واگول

-- مو تريد تنام گلت اعوفك ترتاح 

-- تعاي يمي من انام نزلي 

اجيت تمددت بصفه وهوَ حاظني بـ اثنين اديه و راسي بصدره و رجليه وحده جواي وحده فوگاي حابسني حبس اختنكت حتى نفس ما اگدر اتنفس دخيلك ياربي عديها على خير 

لحد ما نام يلا خلصت روحي ونزلت لگيت عمي ضايج وعمتي ضايجه والبنات نفس الشي حقهم بس الهوسه والمشاكل والعرك من وراه ومن وره نسوانه گال عمي

-- وين راح

-- نام 

بديعـة :- خلي ينام نوم الظالم عبادة شنو هالظلم هيج يضربها تخبل فد مره اكو مره هيج تنضرب وين عايشين 

بگلبي گلت الها هسه صار ظالم وماكو مره هيج تنطگ بس من يطگني و يلعب بيه جوله لا تكيفين و تحسبينه زلمه والله يا ربي گعدت يمهم دقايق وفات بُـرهان سلم وگعد وراها سأل على رائف ردله عمي 

-- نايم 

-- شكو شنو الموضوع شو وجهكم ما تبشر بخير صاير شي 

-- ملينه من عنده صاير ما ينطاق لعبها النفسنا 

-- شبيه 

-- شمدرينا بيه واحد طايح حظ وهاجم البيت الليل ونهار اذا ما يعارك هاي يعارك هذيج وإذا ما يعارك نسوانه يعارك امه  وهيج ملعبها النفسنا ومكرهنا بعيشتنا 

-- هههه هاي اثار التعدد لعد عبالكم الشغله سهله 

رجع باوعلي وگال

-- متگعدينه بله زحمه عليج 

گمت من مكاني وصعدت گعدته نزل البُـرهان و انا نزلت گلت خل اسوي عشة 

بعد صار الليل وحتى غده مثل البشر ما تغدينه وجعت 

لگيتهم گاعدين بالصاله و الوضع طبيعي يسولفون على الدراسة الفهمته بُـرهان  مقدم على الماجستير ومقبول وهمَ يشجعون بيه 

اجت هاله وياي تساعدني بالعشة و غادة عمتي ودتها تسوي الزلاطه تريدنا نخلص بسرعة لان الكل جوعان 

بسرعة خلصنا العشة واخذنا للصاله التمينا سوه بس واثـق ماكو خابره عمي گال تعشوا انا اتأخر بُـرهان ما اكل بس شرب عصير وباقي گاعد يمهم يسولف 

بين كملنا اكل شلت المواعين اغسل بيهن وبُـرهان و رائـف طلعوا بالحديقة فاتوا من يمي رائـف گال 

-- وياج چاي حبيبتي 

درت وجهي اباوع عليه هاي شنو التطورات والله زين الله يهديك 

خلصت غسل المواعين وصبيت الجاي وديت العمي والعمتي و رجعت صبيت الهم واخذته ومشيت للحديقة قبل لا اوصل يمهم ويشوفوني سمعت بُـرهان يگله

-- وتالي يعني تبقى هيج على اقل تصرف تفقد اعصابك وتضرب بزوجاتك يا اخي حرام عليك هذني أمانه يمك 

-- أعصابي تعبانه يا اخي وهاي أديان طلعتني من ديني وفوگاها تتجاوز بنت الكلب مسودنه وسودتني وياها 

-- يعني أنتَ هسه من  تتجاوز عليه وتكول بنت الكلب عادي بس هي من تتجاوز عليك لا ميصير وعيب وحرام خلي احترام بيناتكم ليش توصلون الهذا المستوى

-- اگلك موتتني ساعة السودة يا أخي الليل ونهار تنگ و تتمشكل وإذا لزمتلها سالفه تحرك عشيرتي بيها ماكو هيج قابلية سگطتني دمرتني 

-- هههههههه ترى هيَ من زمان هيج بس الظاهر أثار هدوء يُـمن بـدأ يأثر بيك وگمت ما تتقبل غير أسلوبها وتصرفاتها 

-- اوف يا يُـمن والله يا بُـرهـان ما اعرف شلون احل الموضوع  و شلون افتحه وياها

-- شنو هو الموضوع ما فهمت 

-- انتَ تعرف بـ وضع أديان الصحي وتدري ما تگدر تخلف طول العمر

-- اي 

-- بس هذيج المخبلة كل شهر تبقى تنوح وادك وتلطم تريد طفل مووتني كرهتني بعيشتي ما تقنع بيها السبب الصوج و لازم كل شهر تسوي فاتحة ولازم كل شهر تروح للدكتورة و ترجع ونفس الخرط واني اصلاَ فكرة الاطفال بالوقت الحالي ما رايدها لا منها ولا من يُـمـن بس تعبتنتي وحاير 

-- اي بس ما فهمت من هذا الحچي كله يُـمن شعليه بالموضوع ليش تگول شلون احل الموضوع وياها 

-- غير بصراحه نويت اسوي طفل هالشهر من يُمـن واخلـص من كل هاي الدوخه

-- إذا أديان رايده الطفل و تبچي عليه الليل ونهار وهي من الاصل متخلف وعدها مشكلة تجي انتَ تسوي طفل من زوجتك الثانـية ترى هيج راح تسوي كارثه مو بيبي صغيرون هههه شنو هذا التفكير دخيل عقلك ضربت فيوزاتك من التعدد لو شنو 

-- لا مو هذا قصدي

-- شنو قصدك لعد دوختني حياة المزوج اثنين صعبة على العزابي يفهمها هههه

-- گلت اسوي طفل من يُمــن وانطيه الاديان واخلص من دوختها ودوخة الدكاترة

يتبع....

تكملة الرواية من هناااااااا 

لمتابعة  الرواية الجديدة زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كاملةمن هناااااااااا

مجمع الروايات الكامله 1اضغط هناااااااا

 مجمع الروايات الكاملة 2 اضغط هناااااا