مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

 

رواية عــروس الجبـــايــش الفصل السادس عشر والسابع عشر والثامن عشر والتاسع عشر والعشرين  بــقلم يـــاســـة الموسوي 

رواية عــروس الجبـــايــش الفصل السادس عشر والسابع عشر والثامن عشر والتاسع عشر والعشرين  بــقلم يـــاســـة الموسوي 

#عــروس_الچبـــايــش 🌼

بــقلم يـــاســـة الحلقة (16)

بيـن النـاس قتلـة لم يسفكـوا دماً قط

ولصوص لم يسرقـوا شيئاً البتـة

وكذبـة لم يقـولـوا الإ الصحيــح 

............................. 

يُمـن :- انا سمعته وانا إحس گلبي طلع من صدري اريد بس اوگف على رجليه اريد بس اسيطر على روحـي ماكو متت وين يريد يوصل بظلمه بعد وصلت بيه ياخذ خلفتي وينطيها المرته هيـج انـا بلاية قيمه عنده الهاي الدرجة مالي إحساس ومشاعر بنظره

مدري شلون خطيت ومشيت عليهم إديه ترجف والصينية تلعب والگلاصات بيها يردن ينگلبن وصلت يمهم و دنگت اريد انزل الصينية علي الميـز إديه تگول سعفه اثنينهم انتبهُ عليه اخذها رائـف من إيدي ويگول

-- شبيج

باوعتله والدمعه واگفه بطرف عينـي

و هزيت راسي مابيه ضل يباوعلي مرتبك وبُـرهـان نفس الحاله يباوع

افتريت ورجعت طبيت للبيت عمـي گاعد بالصالـه يباوع على الاخبار وعمتـي لازمه نقالها وتخابـر ما ادري بيمن تعديتهم وصعدت صاحت عليـه وگفت على بايات الدرج

بـديعـة :- باچر گعدي من وكت عدنا تعزيل وغسل فراش

ما رديت رجعت صعدت طبيت للغرفه

و گعدت على الجربايـة وعيوني على الباب وصافنه بقهر إحس گلبي يفور ربي تعبت

وين يريد بيه الوكت بعد ربي لا تخليه يكسر ظهري ويسوي هاي العمله بيه قبلت بكل شي بس هذا العمله ما اگدر اقبلها اموت والله 

دقايق و فتح الباب وطب وراي اضنه حس عليه سمعته واجى يتأكد مني ضل واگف

 يم الباب شويـة و انوب اجى گعد بصفي وسألني

--شبيج 

باوعتله بعتب وروحي ترجف ورديت وانا امثل واكابر 

-- ما بيه

-- شكو ليش هيج اجيتي ترجفين قبل شوية

-- تعبانه شوية من شغل البيت

-- لا تشتغلين عوفيه يولي

ما رديت عليه بقيت ساكته وهو سكت ويباوع عليه دگ نقاله باوع عليه و رفضه

ما جاوب ورجع يگول 

-- شنو رأيج نطلع للشمال أسبوع نغير جو

-- لا ما اريد

-- ليش

-- ما أحب اطلع المكان بعيد

جرني عليه وحظني حيل و يگول

-- شبيج حبيبتي ليش ضايجه

-- گتلك مابيه شي ولا ضايجه

-- سمعتي شي ضوجج ؟

-- لا  

-- لعد شبيج 

-- گتلك تعبانة من شغل البيت 

-- تعالي نامـي أرتاحـي 

اجيت تمددت وهو حط إيده جوه راسي ويمسح على شعري غمضت عيوني وضميت روحـي بحطنـه وين امشي إذا بحظنك اخرتي و بعدك اخرتي لا تخليني اروح ولا تحتويني وتخاف الله بيـه وين اروح وين اشرد منك لا انطيك ولا أخلي رحمة الله تنزل عليك 

ضليت مغمضه وهو حاضني و يمسح على شعري مده طويلـه لحـد ما دگ نقاله مره ثانيـة رفع روحه و جر إيده مني عباله نمت 

وراها شال النقال و گطعه 

دار وجهه للصفحة الثانية والنقال بـ إيده وضل يكتب و يراسل ما يحچي خاف اسمعه ساعه گامله يتراسـل ويامن ما ادري وراها سمعته حط النقال على الميز ورجع حظني دقايق و غفـه اول ما تأكدت منه نام گمت نزلت 

البيت صنطه كلهم نايـمين والضوه طافـي 

فتحت غـرفتي القديمة و طبيت بيها وقفلت الباب عليه اجيت على فراشي القديم وجريت المخده حطيتها على وجهي وضليت ابچي كل قهري طلعته كل وجع إحس بيه بچيته فوگ المخده لحد أذان الفجر انا ابچي وراها گمت طلعت توضيت وصعدت بعده نايم 

فرشت سجادتي وصليت ومن كملت حطيت راسي على التربة و بچيت تعبانه ومهمومة ومظلومة وخايفة وماكو غير

 ربي يخلصني من كل هذا 

جنت كل مره ابچي بلايـة صوت بس متأكدة ربي يسمعني ويحس بيه ويشوفنـي ومتأكدة راح يساعدني ويخلصني ، عندي ثقـه بيه ما يعوفني وراح تجي ساعة فرج وكل هذا يروح ويخلص 

من حسيت بروحي ارتاحيت شلت سجادتي ضميتها و اجيت تمددت بمكاني 

بسرعة نمت والصبـح ما گعدت اخذتني النومه و محد منهم صعـد وگعدني 

ومن فزيت لگيت الساعة صايرة بـ 12 ونص الظهر طفرت من مكاني مفزوعه يمه اليوم شيخلصني من عمتـي عود وصتني اگعد من وگت 

ركضت للحمام غسلت ورجعت رائـف ماكو 

گاعد و رايح للدوام وانا ما حاسـه بيه 

نزلـت اركض البنات بالدوام و البيت فارغ بس عمـتي بالمطبخ تسوي بالخضره وصلت يمها وحچيت 

-- والله ما ادري شلون اخذتني النومه وما فزيت 

بـديعـة :- تريگـي بسرعـة و طلعي اشوي السمج بالتنور 

تفاجأت شعجب ما حچت شي على الشغل وعلى گعدتي المتأخرة وشكلها طبيعية وهادئة وحتى مبين عليها مرتاحـه 

الك الحمد والشكر ربي كون يوميه هذا حالها وبعـد ماكو طلايب وعرك تريگت

و اخذت السمج لگيتها غاسلته ومالحته 

طلعت للترك شغلت التنور و شويتـة ورجعت للمطبخ سويت تمـن احمر وحضرت الطرشي والخضره والمواعين 

ساعه وكمل كل شي ويا ما كمل اجوا من دواماتهم وكل واحد راح يبدل حضرت الاكل و بديت اصب وانگل وهاله تساعد بيه طب رائـف رفعت راسـي اباوعله شفت وياه أديان 

رايح مار عليها من الدوام  وجايبها وجاي درت منهم وجهي بسرعه و رجعت اصب بالتمن طبوا اثنينهم للمطبخ هيَ سلمت على هالـه و هو اجـى عليه باسني بخدي وهاي اول مره يسويها گدام احـد 

هالـه ضحكت وأديـان بسرعـة طبت للصاله

وانا انصدمت صدمه عمري شني هاي يريد يموت اخذت هالـه الماعون و مشت للصاله وانا باوعتله وگـلت

-- زحمـه تبوسني گدامهن

-- شلـون صرتي 

-- زينه 

-- راح اغسل و انـزل اتغده وياكم 

راح صعد فوك بغرفتي بدل وغسل بالحمام الفوك ونزل وانا رحت للصاله لگيتهم كلهم گاعدين على السفرة وأديان گاعدة بصف رائـف بسرعة گـال عمـي 

-- تعاي بابا هنا يمـي

رحت يم عمـي الكل ياكل بله صوت وراها عمـي ضل يحچى وياهم على بيت يمهم بنفس الفرع يردون يبعونه گالهم ليش ما ناخذه 

رائـف :- خوش فكره قريب علينا أحسن من البعيد 

واثـق :- اشتروا وگعدوا يُمـن بيه 

رائـف باوعله و رجع باوع عليه وعمتـي ردت

-- وليش تگعد يُمـن بيه ما عدنا بيت 

واثـق :- لا عدكم بيت بس ما ينعاش بيه خلوها ترتاح من الخدمة والعبودية 

بديـعة :- يا خدمة يا عبودية اشو گعدت

بـ 12 الظهر 

-- يا الله خوش بشارة طمنتي گلبي من گعدت بــ12 وانتِ ساكته ومتقبله الموضوع 

-- وشنو يوميـه اتعارك وياها اشو مدلله

حاكـم :- كافـي مو وكت هذا الحچي نعمة الله گدامكم  يعني بعد ماكو حتى أحترام للنعمة 

سكتوا وانا ابد ما احچي مدنگه على الاكل لحد ما كملوا شلنا المواعيـن وگفنا بالمطبخ انا و هاله وفاتت أديان لازمه رائـف من ايده وتمشي بيه سريع

صارت عيني عليهم وهوَ باوع عليه ودار وجهه اجت هالـه حطت ايدها على جتفـي 

و تگول

-- كرامه صفر والله لو اني منج فلا اضوج البارحه ملخها كتل و طردها وخابر اهلها اجوا اخذوها ولعلمج ماما گالت البارحة مراستله ومتوسله بيه يجي يرجعها واليوم  لازمته و تركض بيه والله راح تخبلني شنو من عقل شايلة 

ما رديت عليها درت وجهي و فتحت البوري اريد اغسل المواعيـن رجـع طب علينا وحده اثنينه باوعنا عليه وهـو باوعلي

 و گال 

-- صبي جاي وجيبه للغرفـة

حچى هيج وطب جوه و هاله ضحكت 

و تگول

-- دشوفي الحب راح يموت بس كون تضحكين بوجهه 

-- عود صدگ يحبني 

-- يااا كل هذا وجايه تسألين والله يحبج وميت عليج بس ما يعرف يتصرف وهاي ما منطيته مجال والله اني مرات انقهر عليه احسه حاير بيج وخايف لا يخسرج 

-- قصدج يخسر الخرسة والطرشة والعميه والخدامة وبالمستقبل الحاظنه مال جهاله 

-- لااا والله مو هيج غلطانه ترى من زعلتي ورحتي يم امج تخبل علينا و داعتج وصل بيه الحال تجاوز على أمي وسب حتى اهلها واحد واحد 

-- والله يا هالـه انا خايفـه منه 

-- ليش 

-- اخوج ما ينحزر و يحب يتحكم و يسيطر وكل اوامر تتنفذ بلاية و اعتراض متعلم النسوان تخاف منه وتركض وراه وتنفذ طلباته و يعيش الدور براسهن بس انا ما ركضت وراه ولا عاش الدور براسي الهذا السبب خايفه منه لا يكسر روحي بيوم من الايام فوك كسره خاطري هاي 

سكتت ما حچت بقت بس تباوع عليه انوب گالت عوفي المواعين اني اغسلهن انتِ اخذي الجاي وصعدي ارتاحي 

اخذت الجاي وصعدت لگيته متمدد على الجربايـة انطيته الجاي وافتريت اريد اروح لزم ايدي و گال

-- وين 

-- اريد اسبح شويت السمج و طبخت صارت بيه ريحه زفره 

أبتسـم و يگول

-- تمام لا تتأخرين عندي لان موضوع وياج 

رحت للحمام سبحت وانا الف فكرة خطرت على بالي شيريد و شني الموضوع وشراح يحچي راح يگول اريدج تحبلين وتنطين الجاهل الاديان لو شيريد مني لحد ما طلعت ما ضلت سالفه سودة ما خطرت على بالي 

اجيت لگيته نايم على بطنه و النقال بـ ايده بس طبيت حطه على الميز و أشرلي اجي عليه اجيت والخاولي براسي وسألته

-- شني الموضوع التريدني بيه

رائـف :- موضوع مهم كلش كلش 

-- يا ستار 

حچيت هيج وگلبي يدك بكل سرعته أبتسم و جرني عليه شال الخاولي من راسي شمره و باسنـي ومثل هذيج المره صار بيناتنا اجيت اسأله بس ما اگدر استحي شلون بيه ، هو هذا الشي طبيعي لو غلط ما جان يسوي هيج ليش صار مرتين يصير ويانا هيج 

حظني ونـام و انا غير انام ماكو متت من التفكير اخر شي شلت نقالي و دگيت على امي سلمت عليها و هي تسأل شلوني وشلون حالي و ضعي وارد بخير و زينه انوب گلتلها اريد اسألج بس استحي

شهيناز :- شكو شبيج

-- ما ادري 

-- شنو ما تدرين شكو شـ صاير 

سولفت الها السالفه هيَ بسرعة ضحكت وردت

-- طبيعي هذا الشي الواحد من يريد اطفال هيج يسوي و أحتمال نسيبنا ناوي يسوي طفل حلو مثلج 

هي گالت هيج و انا شلون واحد وطگني بطابوك على راسي إحس دخت و عيوني گامت تحرگني 

يعني صدگ يريدني اخلف وياخذه وينطيه

الها ما اتذكر شلون سديته من أمي ولا شلون سلمت عليها ما اتذكر شي بس إحس رحت بغير عالم والدنيا ظلمت بوجهي 

للعصر وگعد والوضع عنده طبيعي ولا عبالك جاي يخطط ويفكر اليشوفه شلون يتعامل وياي يگول يحبني يموت عليه 

بيومها عيونـي ضلت تذب شرار وبلعومي واگفه بيه غصه  شكبرها موتتني موت

بالليل راح هناك يمها وانا للصبح ما نمت ولا غمضت طول الليل خلصتها ابچي وثاني يوم عمتي معاملتها زينه وياي ومتحسنه

 و صاير مثل الزبد وياي و عايفتني على راحتي ولا تشمر حچي ولا تحاسب على شغل 

بس انا كل شغل البيت شايلته وما اعوف شي مخلصتها اشرد من القهر بشغل البيت والتعزيل يوم يجر يوم و أسبوع يجر أسبوع لحد ما صار شهر كامل و طلعت مو حامل الحمدلله ومن دره بيه مو حامل ضاج 

خلص اليوم كله ضايج ويتحجج ويا اهله 

بيومها تعارك ويا امـه على التنور شلون اخبز وحدي ومحد توگف وياي و طگه ودفره وكسر الراس و للعصر تعارك ويا ابو على مود الفاتحة مال الجيران شلون گاله روح بمكاني للفاتحه والليل سمعت الهوسه بيته هذاك متعارك ويا مرته

و طاگها 

انا كل ما يتعارك ويا واحد اكو راح يوصل سراي و يستلمني بس لا ما حاچاني ولا وصل يمـي فرغ حركته بيهم 

اخذاله يوميـن ضايج ويتعارك ويا الرايح والراجع و راها فك شوية و رخت اعصابه 

بس شني ما يتحمل اي كلمه بسرعه تجيه الحاله ويطگ وياهـم كلهم ضالين يتحذرونه ويتكفون شره

وهيج مشت الايام و الوضع مثل ما هو امي يوميه تخابر تسأل عليه وعمي يحبني وهاله تساعدني و شـني اسوي وياي ما تعوفني وحدي واثـق بعده نفس ما هو يحبني ويحترمني وكل يوم بالليل لازم يجيبلي حصه من الحلويات حالي حال اخواته عمتـي ما توصل يمي ولا تتحارش بيه اما أديان ما تنزل يمنا ولا اسمع صوتها 

باقية بيتها وعمتـي وغادة يرحن يمهـا 

شكيت هوَ مانعها توصل للبيت يمنا لأن قبل جانت يوميه تنزل هسه ابد حتى صوتها ما اسمعه 

عده الشهر والشهرين والثلاثة وانا ما حبلت وهو صاير ما ينطاق اعصابه تتطافر منا ومنا و گالب البيت عليهم جحيم بس انا ما يحچي وياي مرات احصل غلطه زمخه سبه بس اهون من الباقين حتى گاموا بيوم اليجي يمنا يضوجون من گد ما شايل الدنيا على راسه لحد ما عدت اربع اشهر عدله طب عليه للغرفـه لگاني گاعده 

على البلازمه گـال

-- حضري نفسج ساعه ونروح للدكتورة

-- يا دكتورة

-- النسائية

-- ليش شكو

-- نشوف ليش ما صار طفل الهسه

إحس گلبي انزف من حچيه رديت

-- يا طفل بعد وكت هسه انا ما اريد

-- بس اني اريد صار اربع اشهر تارك المانع منج ليش الهسه ما صار

-- هذا امر الله 

-- ونعم بالله گومي بدلي تأخرنا

سكتت واباوع عليه ياربي دخيل إسمك 

شـأسوي هسه هذا يريدني اخلف واوزع خلفتي تسودن ، گتلـه

-- خليها على الله ليش اروح واخذ علاج واتمرض الله شوكت ما كاتبة يصير 

-- مالي خلك احچي يُـمـن روحي بدلي راح يوصل سراج يلاااا

-- بس ما اريد انا 

-- هو شنو بكيفج وما تردين يلاا فضيها

-- چا بكيف من ترى مو گوه هيَ

-- لا اله الا الله بدون لغوه گلت بدلي بدون عرضه ليش تخليني اگوملج 

گمت وگفت يم الكنتور واباوعله وهوَ يباوع عليه من شافني صافنه عليه گـال

-- شكو ليش صافنه 

-- رائـف خليها على الله

-- ونعم بالله يُـمن صار سنه من تزوجنا وأديان نفس الوضع راح يصير سنه والهسه لا انتِ ولا هي خلفتن يعني جايبجن اجومجن يمي گومي خلينا نروح نشوف السبب جوز بيه مشكلة عاد اروح اعلج نفسي لا تعرضين رحمه الروح ابوج بدلي وگولي يا الله 

-- خوش راح اروح وياك بس من هسه نتفق وتنطيني وعد 

باوع عليه مستغرب وراها گال

-- وعد شنو

-- إذا صار عندي جاهل ما انطيه لحد  

بسرعه رفع راسه باوع عليه مصدوم ضل ساكت ثواني وانا اباوع عليه وراها گال

-- شنو يعني ما فهمت

-- إذا رحت و صار جاهل ما انطيه لحد هذا ابني وحرام عليك تاخذه وتنطيه الوحده ثانية 

-- شنو هذا الحچي منين جبتيه 

-- مو مهم منين جبته المهم تخلي بالك لو سويتها واخذته مني والله احرك روحي وابليك 

گام من مكانه واجـى عليه انا بسرعه رجعت خايفـه منه لزمنـي من رگبتي

 و نزل راسي حيل ويگول

-- شلون شلون شنو هذا الحچي بله عيدي اسمعه مره ثانية

ما رديت ولا نطقت رجع صاح بصوت عالي

-- منين متعلمه هاي السالفه الطايح حظها منو معلمج على هاي السوالف 

ما احچي ولا ارد صاح 

-- اخرستيي اخرستتتتي مووو احچي وياج ردي منين متعلمع سوالف الانتحار هاي 

نفس الشي ما ارد هو شلون يتخبل من

 ما ارد عليه بسرعه طگني راشدي و رجع دفرني و يگـول

-- لا تردين ابقي ساكته بس اني اعلمج الظاهر انطيتج عين زيادة 

حچى هيج وطلع وانا نطيت من البچي ليش هيج وياي انا ما ضريته بشيء صدگ انجبر بيه بس عفته ورحت وهوَ رجعني غصباً عليه و هوَ مجلب بيه بعد ليش يريد ينتقم مني وياخذ بزرتي 

للمغرب وانا ابچي وهـوَ طلع وبعد ما سمعت صوته بس إذن گمت لزمت السبحه وگعدت استغفر و اصلي على محمد وآل محمد لحد ما خلص الإذان 

گمت نزلت البيت كأيب ما ينطاق من وراه و وراه مشاكله 

عمي يصلي و عمتـي لابسـه نظارتها وگاعدة تتراسل بالنقال بس شافتني نزلت گالت

-- طلعت اللحم على الكاونتر يموع سوي جلفراي للعشة 

مشيت للمطبخ و بديت اسوي بالعشة طب 

واثـق بس شافنـي واگفـه احضر بالعشة ضحك و گـال شيـف مشمشة بشرفـج اريد زلاطه ناعمة هيج گون ما تنشاف من النعومه

-- ههههه هاي شلون تصير

-- تصير تصير بس سويها تصير

-- صار تأمر أمـر

-- ما يأمر عليج رائـف الظالم آن شاءالله 

-- هههه

-- وينه اليوم هناك لو هنا

-- والله ما ادري اشو هو ما مخلي ايام محدده ضال بكيفه يروح ويرد 

-- ههههه قصدج ما يفارگج مو هيج اي اي احچي لا تستحين 

-- لا والله مو هيج بس هوَ تجي ساعه يضوج من هذاك البيت ينزل هنا يمكم

-- هههههه يمنا لو يمج اي طردي عيوني 

أبتسمت و درت وجهي للطباخ اكمل بالاكل والله لو تدري اخوك شجاي يخطط چا ما ضحكت هيج والله ياربي مصدگ اطرد عيوني غير أميرة زمانـي واخاف من الحسد

راح طب يمهم بالصالـه و هـاله اجت وياي تساعدنـي غادة ابد العود ما تشيله من الگاع حتى لو تعثر بگلاص المي ما تشيله من الدرب 

ضلينا انا و هاله نحضر لحد ما كملنا شلنا الاكل بالصاله بعدنا هسه گعدنا و طب اول ما رفعت راسي لگيته يباوعلـي بس من شافني اباوع عليه دار وجهه وگعد على القنفه

حاكـم :- ما تتعشة

رائـف :- ما اريد

بـديعـة :- أديـان وين متخابرها تجي تاكل  ويانا خطية تحب هاي الاكله 

-- عدها لحم و تطبخ النفسها وتاكل معليج بيها

-- هاي شبيك شنو هذا أسلوبك اشو فد مره صاير ما تحترم 

ما رد عليها وهـيَ هم سكتت بس خلصنا الاكل گمت بـ ايدي المواعين و هالـه بيدها الباقي فتت من عنده ذبلي رجل عثرت اجيت انجبح على وجهـي باوعت عليه هذا شبيه والله مو صاحي وهو دار وجهه جنه ما مسوي شي  

بس طبينا للمطبخ سمعته يگول الغادة 

-- حركي روحي و روحي غسلي المواعين الفلبينيه مالتكم تعبت و الها ساعـة وتنفجر وإذا انفجرت افجركم و راها ولا تگولين ما گال 

ما ردت عليه بسرعـة اجت للمطبخ وجرت السفنجه من إيدي و تگول بصعبية

-- عوفي عيني عوفي بالعافية عليج إذا حتى بشغل البيت گام يتدخل ويهدد اخوي الكبير 

ما جاوبتها عفتها ورحت للطباخ حضرت الجاي واخذته ومشيت بعدهم بالصاله وزعت عليهم الجاي وهو حاله من حالهم انطيته اخذه من ايدي و بقى لازمها حيل اريد افرغ ايدي منه ماكو استحيت منهم كلهم گاعدين هسه شيگولون علينا 

حچيت على كيف 

-- ايدي 

رجع يگول بنفس نبره صوتي 

-- على غرفتج بسرعـة وكافـي عايشة دور الفلبينية بهذا البيت ما تنزلين منا الباچر وإذا لگفتج لازمه شغله ابتلي بيج يلاااا

اليلاااا مالته جانت كلش عالية بحيث كلهم باوعوا علينا وراها عاف ايدي و عمي گاله 

-- شبيك و ياها

ما رد عليه وجنه ما يسمعه بس يباوعلي وانا بسرعـة رحت صعدت طبيت للغرفـه وسديت الباب سمعته يگول العمتـي

-- منا وجاي كل وحده تشيل شغلة من البيت وإذا شفتجن شامرات كل الشغل براسها اسوي جريمة بيجن 

ما سمعت عمتي شـ ردت بس سمعته رجع صاح بصوت عالـي 

-- حچيت العندي و بعد بكيفج وبكيف بناتج 

گعدت على الجرباية وشلت النقال ر باوعت عليه لگيت امي داگه عليه خابرتها

و التهيت اسولف وياها وابد ما حچيت ولا جبت طاري الحچي الصار بيني وبينه ادري بيها بس تسمع بيه تجي و تسويلي هوسه وهذا خبل يشد وياي عاد خليه هيج ساعه مخبل وساعه الله هادية اشو هسه لعب بيهم جوله الخاطري خليني ساكته ومن يسوي شي عود بهذا الوكت اگول الامي 

بيومها نمت وحدي ما اجـه راح نام هناك بهذاك بيته و الصبح سمعت سيارته اشتغلت بالحوش فزيت من نومي وگمت اباوع عليه من الشباك رافعه البرده واباوع 

شفته واگف وبـ ايده بطل مي وفاتح السيارة ويرش المي بيها و مبدل هدوم الدوام بعده يسوي بيها نزلت أديان من بيتها و فتحت السيارة وصعدت تفاجأت هاي وين رايحة من الصباحيات 

نزلت البردة ورجعت المكاني وين ما تريد تروح تروح انا ياهو مالتي بيه و بيها سمعتهم طلعوا وراها البنات و واثـق وعمـي كلهم راحوا الدواماتهـم ضليت ساعه كامله بس مجطوله ما اسوي شي 

انوب گمت سبحت و مشطت ونزلت البيت فارغ ماكو بشـر حتى عمتي ما ادري ويـن 

مالها صـوت اضن رجعت نامـت 

رحت للمطبخ سويت جاي و طلعت جبن  وگعدت اتريك وراهـا گمت نظفت المطبخ والبيت وطلعت للحوش غسلته و عمتي ماكو ما الها صـوت 

ضل بالي عليها هيَ ما تنام كل هذا الوكت ولا تضل بغرفتها كل هذا الوكت يوميه تطلع و عينها على البيت رحت للغرفه ودگيت الباب عليها ماكو ما ترد كلش خفت 

ومن ما ردت عليه ولا سمعت الها صوت فتحت باب الغرفـه ماكو ما لگيتها رحت للحمام ماكو شني طالعه وياهم لو وراهم وين راحت من الصباحيات اليوم شعدهن 

من الصبح محملات وماشيات 

مشيت للمجمدة طلعت لحم و سلگته گلت اسوي تشريب عمـي يحبه التهيت بالغده و التعزيل لحد الساعـه بـ 11 انفتح الباب و طبن اثنينهن أديـان وعمـتي بس شفتهن سوه تفاجأت شني راحت وياهم وما شفتها لو تلاگن بالشارع وطبن سوه

ضليت اباوع عليهن شفتهن اجن گبل علينا للبيت عمتـي بيدها علاگه فواكة حطتها على الكاونتر وطبت و أديان تعدتني

 و بوجهها للصاله گبل لا رحت وراهن ولا الي شغل بيهن ضليت بالمطبخ اشتغل شويـة و سمعت أديان تبچي و عمتي ترد عليها

-- كافـي ترى مو وضع هذا الليل ونهار تبچين وجايبة الهم والنگد و هامله نفسج و بيتج مو حقه من يطفر منج و يخلص وكته هنا خرب حظي ما تتعلمين من هاي تشتغل شغل الحيوانات و اشكال الحچي تسمع و من يگوم عليها يلعب بيها لعب بس هي إذن من طين وإذن من عجين لابسه الوضع وعايشة حياتها ومخلصتها بوجهه اليضحك ومخبلته مخليته حتى بشغل البيت يتدخل ويدافع الها

-- مو بـ ايدي خاله راح اموت 

-- سوي الشغلات الگالت عليهن الحجيه والله يسهل عليج

-- اخاف هم ما احصل نتيجة 

-- بس لا تنگين يبووو ترى مليت منج

-- مو هذيج المره سويتهن وكل شي ماكو لا حبلت ولا صار شي خاله اني حالتي مالها علاج بس انتِ وامي باقيات تضحكن عليه 

-- استغفر الله گومي البيتج گومي تعبتيني

ما سمعت صوت عمتي بعد وراها اجت أديان لگتني اغسل بالفواكة راحت للجدر فتحته و تگول

-- حسبي حسابنا اني و رائف على الغده 

ما جاوبتها من شافتني ساكته گالت 

-- ليش ما تحچين وياي ترى اني تقبلت وجودج بحياتي و صار الوضع طبيعي عندي 

خلينا نبدي صفحة جديدة ونبقى نحچي ونسولف و نتشارك بكل شي مثل ما متشاركين بالرجال حسبيني اختج واني احسبج اختي 

-- انا ما عندي شي لا وياج ولا ويا غيرج وكل الناس هنا أحبهم و أحترمهم وحاسبتهم اهلي وانتِ الله شاهد عليه ولا يوم من الايام كرهتج بالعكس أحبج وما عندي شي وياج

-- زين لعد إذا هيج خلينا نتصادق وناخذ عهد محد تزعل من الثانيـة

-- ان شاءالله

-- هذا هو التفقنا بس اريد اسألج سؤال

-- جواب 

-- عود ليش ما تهتمين ولا تنقهرين ولا الج شغل بشيء معقوله ما عندج إحساس 

درت وجهي منها بدون ما ارد رجعت گالت

-- اني اتمنى اصير مثلج بس مو بـ ايدي بسرعه افقد أعصابي بس عفية عليج والله بهذا الأسلوب كسبتي الكل عمي و واثق وهاله و حتى عمتي صار اكثر من مره تمدح بيج و الاهم منهم كلهم رائـف كلش حاطته بصفج و شحدني إذا جبت إسمج على اللساني يتخبل خبال 

-- وليش تجيبين إسمي على اللسانج مو قبل ثواني ما عندج شي وياي ومتقبلتني 

و تردينا نصير صديقات 

ضحكت فشلانة ومكشوفة جذبتها

و طلعت البيتها وانا نصيت العين و رحت للصاله گعدت على القنفه وافكر بحچيها

و اللوم على روحـي هسه انا عليمن ما اصاحبها شو هي ما محاجيتني و تخاف توصل يمي لا رائـف يگوم عليها بعد انا ليش احسبها عدو خو اصاحبها واقشمرها و احسبها صديق احسن من العدو 

ضليت گاعدة وحدي لحد ما اجوا من الدوام ومن حضرنا الغده گامت وياي

و تحضر وتقلت المواعين وعمـي و الكل متفاجين بالموضوع بس رائـف الوضع عادي عنده وعبالك ما يهمه إذا تصالحنا

لو تعاركنا ولا يمنا اصلاً 

گعدنا تغدينا و من كملنا نفس الشي گامت ساعدتني بغسل المواعيـن وراها راحت البيتها و انا صعدت فوك صعد وراي رائـف اجى تمدد بلاية صوت على الجرباية

و اخذني  بحظنه لا جنه معاركني وغالط عليه ولا چن صاير شي البارحه هو اصلاً من البارحه الوضع عنده عادي وچن كل شي ما مسوي والامور طبيعية والحياة وردية 

ضل حاظني ويمسح على راسي وانا اغفي 

ولا حچيت ولا عاتبت ولا گلت لحد ما هو گال 

-- مشمش نمتي 

-- لا 

-- خلينا نروح للدكتورة حبابة 

ردت اگوم ما خلاني ضل حاظني ما يخليني اتحرك و يگول

-- يعني ابقى بدون طفل والعمر يمشي بيه وين اكو هيج حرام عليج والله صرت شايب تقبلينها 

-- ما گتلك ضل بلاية جهال بس ما يصير تاخذهم وتحطهم بحظن مرتك حرام عليك 

-- منو گالج هذا الكلام ليش هيج تفكرين

-- انا سمعتك تحچي وياه بُـرهان 

-- هو صح اريد انطيها طفل بس مو اول واحد عود لا گلت انسوي اثنين ثلاثة وراها ننطيها واحد خطيه هيَ تبقى محرومه من الاطفال و بنفس الوقت هوَ ما رايح بعيد يعني بنفس البيت و عينج عليه و بـ إسمي مو بـ أسم احد غريب 

ما رديت ضليت ساكته بس شني گلبي يلعب لعب من سالفته هاي ما ادري ليش خايفه 

من باب اگول إذا على هذا الحچي ما بيها شي شكو بيها إذا ثالث طفل يسجله

 بـ إسمها وهو بنفس البيت ما رايح بعيد

و من باب اگول لا چذاب يريد يقشمرني

و احس ضاله مثل بلاع الموس رجع گـال

-- ها شگلتي 

-- ما ادري خايفه 

-- منين خايفـه 

-- خاف تاخذنه مني و تنطيه الها و بعد ما تخلوني اشوفه

-- شلون حچي هذا اول واخر انتِ وياها عايشات بنفس البيت وين راح تاخذة وتروح بيه قابل بعدين ما ننطيها اول طفل  ننطيها الثاني لو الثالث 

سكتت ما ادري شگول وهو سكت ما سأل بعد لان دره بروحه قشمرني وانتهى وضعي يدري بيه طينه وفاهيه وخوثه وثوله وبسرعة اتقشمر و ما عندي شخصية وجبانه وكاتلني الخوف الهذا السبب ضال يدمغ على راسي ويمشيني على مزاجة 

للعصر وبدلنا ورحنا للدكتورة سوتلي سونار وتحاليل وگالت يوم 14 بالشهرية تجين 

رجعنا للبيت و الوضع هدئ عند الكل رائـف بطل يعارك و عمتـي بطلت تصخرني وأديان تجي مثل الحبابة تساعدني بالشغل وبالبيت و السوالف والضحك 

عمـي و واثـق متفاجأين من التغيرها هذا 

و حتى انا متفاجأة وخفت جاي تسوي هيج لان تريد الجاهل وجن گلبها علم بيه شلون جاي افكر اجت من وحدها و گالت 

أديان :-  اني فرحانه لان رائـف گال جاي تراجعون على مود الحمل و گال الطفل الاول الكم والثاني الي و الله راح ادلله دلال وما اقصر وياه و لا عبالج أخذه منج لو ابعده عنج لا ابد و داعتج راح نربية اني وياج سوه بس كون ينام بحظني واشم ريحته وهذا هو الله عليج لا تحرميني من هذا الإحساس وعد اخليه بعيوني و ما ابعده عنج بس خليني اجرب شعور الأمومة الله يخليج

ما رديت عليها و بسرعة صدگتها و هي ما قصرت وياي ولا شفت منها الغلط بالعكس صارت يا زينها من اگول صارت ماكو مثلها من صدگ ماكو مثلها 

رجعت للدكتورة يوم 14 بالشهر ورجعت انطتني ابره اضربها و علاج استمر عليه النهاية الشهر وراها اجيها 

مشيت على التعليمات والعلاج منتضمه بيه و رائـف فوك راسـي شربي اكل نامي 

والكل صار عنده علم انا جاي اراجع على مود الحباله والكل متاني البشارة لحد ما صدگ وربي يسهل عليـه و اطلع حامل بنفس الشهر 

يتبع ......

#عــروس_الچبـــايــش 🌼

بــقلم يـــاســـة الحلقة (17)

وحگ من خلق هذا الكون بـ أيام

سبعة وللـمشوا ما گمت بـ أيام

يمن تسمع ونيني تگول بيه أم

فگدت كل ضناها وتون بيه 

.............................. 

يُـمن :- گالت الدكتورة حامل و باركتلي وانا عبالك ميته لا عندي إحساس ولا مشاعر ولا حتى أهتميت و مالي نفس بشيء ولا الي خاطر بشيء و الدنيا سودة بعيوني وما بيها كل لون 

طلعت من الدكتورة لگيته واگف برى العيادة يـدخـن بس شافنـي اجى عليه 

 متوتر ويسأل

رائـف :- ها حبـي بشري 

يُـمـن :- حامل 

ضحك فرحان من كل گلبه والفرحة  شفتها واضحه بوجهه و رجع يگول

-- الف مبروك الحمدلله الف الحمدلله 

لزمني من إيدي ومشى بيه صعدني بالسيارة و اول ما صعد باس إيدي ورجع باركلي من جديد 

شغل ومشى والدنيا كلها ما مكفيه فرحته 

وطول الدرب يحچي وياي وانا بغير عالم حتى ما منتبها شيگـول ولا اتذكر شـ سولف 

وصلنا للبيت اول ما طبينا لگينا عمـي

و عمتي بالصاله عمـي بس شافنا گـال

-- بشروا

رائـف :- حامل الحمدلله 

-- يا الله هاي الأخبار الحلوة الف مبروك 

بديعـة :- اي بيها الخير ان شاءالله 

حاكـم :- ديري بالج على نفسج وعلى الطفل هذا اول حفيد بالعائله نريده يجي بخير وسلامة 

رائـف :- أن شاءالله ، صعدني ارتاحي 

صعدت للغرفـه وسديت الباب وگلبي ابد ما فرحان وخايفه و إحس مقهورة وماكو شي يفرحني بعد و كل هذا العايشة بيه لعبه وعلى ساعه تخلص اللعبه واطلع منها خسرانـه 

ضليت بغرفتي گاعدة كل شيء ما اسوي بس گاعدة وساكته شوية وهاله فتحت الباب طبت فرحانه حظنتني و تبوس بيه وتتبارك وانا ارد عليها بس على گد الكلام التگوله انتبهت عليه مالي خلك سألتني

-- شبيج ليش إحسج ما فرحانه وضايجة

-- ما ادري شبيه شو گلبي مقبوض 

-- يا ساتر يا ربي شنو هذا الفال گولي

 يا الله وخلينا فرحانين هذا اول حفيد النا متعرفين شلون فرحانين بيه 

-- يا الله 

-- بعد ممنوع تنزلين وتصعدين هواية ابقى هنا وإذا احتاجيتي شيء بس انطيني خبر اني اجيبه يبوو حصير عمه والله ما مصدگـه هههه

-- أن شاءالله تصير احلى عمه 

-- خابرتي أمج 

-- لا والله 

-- خابريها خطيه بشريها اكيد هسه تفرح 

-- اي هسه ادگ عليها

-- تمام لعد انـي راح انزل 

نزلت وانا لزمت النقال و دگيت على امي ماكو ما ترد شويـة و رجعت هيَ دگت عليه جاوبتها من بعد السلام بشرتها بحبالتي ردت 

شهيناز :- الف مبرووك والله فرحت وگلبي يدگ بكل سرعته الف مبروك حبيبتي

آن شاءالله يتربة بعزكم ودلالكم وتشوفينه وتفرحين بيه ويصيرلج سند 

-- ان شاءالله

-- ديري بالج على نفسج و شغل بعد لا تشتغلين وصعده ونزله ماكو و عمتج وبنت أختها ابد لا تتقربين يمهـن خليج بعيدة عليهن ماشي 

-- الله كريم 

-- مشتهيه شيء تردين شي 

-- لا ما مشتهيه شيء بس راسي يوجعني وعندي دوخه صار جم يوم 

-- اي هذا الشي عادي من النساوة اهتمي بصحتج يوم حبيبتي واكلي زين وشربي حليب 

-- الله كريم 

-- شوفي زوجج بلكي يقبل تجين يمي كم يوم ترتاحين

-- ما اضن يرضا بس راح اگله 

-- ماشي شوفي و انطيني خبر إذا قبل

-- الله كريـم 

-- ومن باچر ترحين تعقدين محكمة 

-- انا هم جنت افكر بهذا الشي بس اخاف إذا ما رضا

-- ما يرضا شنو غصباً عليه يقبل لعد الطفل شلون يتسجل بالنفوس لا تغلطين غلطي يُـمن

-- لا هسه من يصعد اگله 

-- ماشي وخابريني وياج 

-- أن شاءالله  

سديته منها وفات رائـف باوعلي و سأل 

-- بشنو ما اقبل وتردين تگوليلي 

-- ها هاي امي جانت تحچي وياي

-- اي 

-- گالت باچر روحوا عقدوا بالمحكمة

سد الباب وفات تمدد على الچرباية و رد 

-- اي زين طلعت امج تفكر وعدها سوالف زينه شعجب

ما رديت عليه رجع گال

-- اصلاً اني ناوي اعقد قبل لا امج العزيزة تفتح الموضوع بس سبقتني وفتحته قبلي 

-- يعني باجر نروح نعقد

-- لا مو  باچر خليها الاسبوع الجاي نحلل دم وراها نروح نقدم طلب ولازم عمج يجي ويانا

-- ليش يجي عمي شعليه

-- ما دامج بـ إسمة يعتبر ولي أمرج ولازم موافقته لان بعدج قاصر

-- اي چا خابرة 

-- باچر اخابره

-- أمي گالت عود اروح يمها جم يوم ارتاح

-- يعني ما نخلص من امج وسوالفها

ما جاوبته درت وجهي من عنده گال

-- ابقي بغرفتج ارتاحي ما يحتاج ترحين يمها 

هزيت راسي بدون ما ارد وهو شال نقاله يخابر ما ادري ياهو اخذله بالساعه يسولف وياه ما افتهمت كل الحچي البينهم بس عرفت جاي يسأل بيه شلون يعقد بـ اسرع وكت وخو ما يعرفون انا حامل إذا سوينا التحليل وهذا يفهم بيه ضليت گاعدة بالگاع و اباوع على التفزيون بس إذني يمه  لحد ما خلص مخابره واجـه گعد بصفي حط ايده على بطني بسرعـة فزيت ضحك

 و گال

-- شبيج 

-- گمزتني 

-- ديري بالج عليه هذا أمانه يمج 

ابتسمت ورديت 

-- ان شاءالله يجي بخير وسلامة وتشوفه وتحطه بحظنك سالم 

-- ان شاءالله 

-- اريد اكلك شي 

باوعلي و ابتسم و رد

-- گولي 

-- انا خايفه 

-- من شنو خايفه 

-- ما ادري بس گلبي خايف واحس اكو حسره بصدري

سحبني عليه وباس راسي و يگول

-- ما اعرف إذا هذا الامر طبيعي لآن حامل او لا يعني ما اعرف إذا كل النسوان هيج يخافن لو بس أنتِ ، على العموم إذا الكل او بس انتِ فـ احب اگولج لا تخافين ولا تفكرين وإذا بعدج خايفة من هذاك الموضوع صدگيني ما اسويها بدون ما توافقين وتقتنعين 

-- الله عليك 

-- وداعتج 

-- الله يجبر خاطرك ويفتحها بوجهك 

أبتسم وباسني بخدي وراها گال

-- ما جعتي 

-- لا ما اشتهي 

-- هاي الما اشتهي بعد تنسينها منا وجاي لازم تاكلين الخاطر النونو هذا الحلو 

گام و جر ايدي گومني من الگاع حتى ننزل نتعشة نزلنا لگينا عمتي وهالـه يسون بالعشة وگفت اساعد بيهن لحد ما خلصنا والتمينا كلنه واكيد الگعده ما تخلى من واثـق وسوالفه وتبريكاته وفرحته بخبر الحمل

بس خلصنا العشة راح رائـف يجيب أديان من بيت اهلها جانت عدهم وانا صعدت الغرفتـي بسرعه نمت ما فزيت غير ويا صلاة الصبح ما لگيته اكيد نايم هناك يمها 

صليت و رجعت نمت من جديد ولا عبالك رجلي رايح يم غيري  ولا مهتمه للوضع ما احس بشيء و الموضوع عندي طبيعي من يروح يمها لو من يگعدون سوى لو يطلعون عكس گبل جنت اموت من البچي والقهر هسه صرت متقبله الوضع وحاسبته طبيعي و ما يأثر عليه 

ثاني يوم اجت أديان تباركتلي و فرحانه 

وتوصي بيه ادير بالي على روحي وعلى الجاهل ومنا و بعد گامت تجي تساعد بالبيت كلش هواي و مرات حتى تصعدني انام و ارتاح وهي تاخذ الشغل من ايدي 

بهاي سوالفها واهتمامها جانت مخوفتني بس ماكو بشر احچيله البيه والإحسه بيه واخاف اسولف الامي  لا تروح تتعارك وياهم وبالاصل هنا محد يحبها وضاله 

مثل بلاع الموس والخوف ياكل بيه اكل 

رحنا سوينا تحليل دم وانطونه موعد عشر أيام للعقـد ومن وصل العقد قبله بيوم اجى عمي غـازي وصل العصر وجنه كلشي ما مسوي وياي لا ماخذني ولا كاتلني وموتني موت طب وسلم عليه وباسني وعبالك يحبني ويخاف عليه من الهوا بات يمنا بالبيت وثاني يوم رحنا للمحكمة حولتنا المحكمة للمستشفى يردون تقرير يثبت انا حق الزواج 

الطريق كله من المحكمة للمستشفى انا ادعي ربي تطلع على عمي السالفه ويكضونه ويسجنونه شلون مزوجني بهذا العمر عبالي راح يسون تحقيق وياي ويعرفون بيه تزوجت غصباً عليه  تالي من طبيت وانطيتهم الكتاب كل السوته الدكتورة سألتني شگد عمرج رديت عليها وانوب گالت تنزل عليج الشهرية رديت اي وقعت وانطتني الورقه اخذتها وطلعت خايب ضني من الدنيا كلها 

شلت الورقه انطيتها الرائـف ورجعنا رجوع للمحكمة و عقدنا وعمي الوكيل وحتى الشهود مدرين منين جابهم رائـف ما اعرفهم ولا شايفتهم من گبل أجرهم من باب المحكمة مدري شني 

طلعنا من المحكمة وانا مسجلة بـ إسمة والي حقوق و واجبات گدام الناس بيومها فرحت لان حسيت بـروحي بشر واله قيمة مو مشمورة شمر صرت حالي حال البنات معترف بيه گدام العالم  

عمي طلع بوجهه للجبايش ما رضا يرجع ويانا و انا اخذنـي رائـف للمطعم گال عازمج بهاي المناسبة الحلوة

گعدنا بالمطعم تغدينا و شربنا جاي وهوَ فرحان و طاير بيه وبالحمل لحد ما رجعنا ما شايل عيونه مني وهذيج السوالف الحلوة يحچي وياي ، ومن وصلنا للبيت لگينا الوضع ما يبشر بخـير وشكلها أديان مسويتها فاتحة عليهم 

انا ما اهتميت بسرعة صعدت الغرفتي وهوَ اخذها وراح البيتهم وهيج مرت الايام والاشهر والوضع مثل ما هو و ماكو شي مو زين بالعكس كلهم  زينين وياي وفرحان بالحمل ويجيبون ويحطون گبالي وانا بالاصل ما عندي أذيه على بشر و أحبهم وأحترمهم كلهم 

امي ما اروح عليها ابد ما يقبل اروح بس اخابرها ومرات هيَ تجي تسويلهم مداهمه فجأة اطب عليهم وغصباً عليهم يسكتون منها وما يحچون وياها يعوفونها  لان ما تسكت منهم ومنو تشوفه تشمله كلمة وباقين كلهم يتجنبونها وما يحچون وياها خوب أديان وعمتي بس يشوفنها يشردن كل وحده بمكان اما رائـف نهائياً ما يتقبل وجودها و إذا اجت وهو بالبيت ما يسلم عليها و لا هيَ تسلم عليه بس يشوفها يعوفها ويصعد فوگ لو يروح البيته الثاني 

علاقتي بالكل طيبة و مالي صوت وشغلي صار بس اسوي زلاطه لو اعزل البيت لان كلش تعبانة جنت وحلگي لليل ونهار يصب لحد الأشهر الأخيرة و گمت ما اگدر بعد

 ورمت وبطني كلش كبرت و رجليه ما گمت ادوس عليهن صارن كل رجل شكبرها 

لا اكل لا اشرب لا انام و إذا ضگت الاكل اذبه ومصاريني تتگطع باقية عايشة على الماي والعصاير الطبيعية والسوائل مخلصتها اشرب شوربة دجاج لو شوربة لحم لو اكل كاستر و محلبي غير هذا الاكل ما اكل اتقبل شيء 

اكثر الوكت معلگيلي مغذي و كل ما اروح للدكتورة تگول بيج بيه أبنية و صحتها زينه بس وياها مشكل كيس وجاي يكبر كل ما تكبر والهذا السبب جاي تحسين بحملج صعب وثكيل وعادي ما عليج شي هذا الكيس طبيعي ما راح يأثر على الطفله واني ما اگدر اجازف واشيله هسه وانتِ حامل راح اعوفه انشيله بالولادة 

أن شاءالله 

خلصتها عليه هيج من اول شهر لحد شهر السابع انا اسمع هذا الحچي وكل اليوم والثاني اتعب اكثر من القبله لحد ما عديت عشر ايام بالسابع و تخربطت وبعد ما گدرت ارفع روحـي 

اخذوني رائـف و هاله للمستشفى سولي فحص وسونار وبس كملت الدكتورة الموجودة بالمستشفى الفحص گالت

-- ما شاءالله الاطفال صحتهم ممتازة واليوم الج  عشر ايام بالسابع  

باوعت عليها متفاجأة يا اطفال شتگول هاي هالـة ردت عليها بسرعـة 

-- شنو اطفال دكتورة هي بيها توأم

-- اي توأم ما شاءالله وصحتهم كلش زينه 

بس عدها المشيمة متقدمه يحتاج تنام على ظهرها هالشهرين 

هاله ضحكت و باوعت عليه وانا يا صدمتي وين يلا أستوعبت و سألتها 

-- بس انا بيه بس أبنية وحدة دكتورتي الاراجع اراجع يمها تگول هذا كيس ويا الجاهل ما گالت توأَ

-- لا ماما هذول اثنين اطفال واضحين وضوح الشمس وحتى جنسهم مبين يمي

هالـه :- اللهم صلِ على النبي شنو دكتورة ولد بنات بشرينا 

-- ولد وابنية 

-- صدقة فدوة الشكلهم 

حچت هيج واجت باستني فرحانه طايرة وانا يا شعوري ويا إحساسي هيج ضليت ارجف واول مره إحس بروحي فرحانه من حبلت لليوم دخيل كرمك يا ربي على هاي النعمه صدگ اول مره إحس وافرح بيهم

كتبت الي علاج و طلعنا انا وهاله الفرحة ما مكفيتنا مشينا للأستعلامات لگينا رائـف گاعد ويسولف وياه ولد مرته تطلگ خطية وجاي وياها بس شافنه گام علينا هاله ضحكت و گالتله

-- انطيني البشارة 

-- شكو 

-- بيها اثنين مو وأحد

حچت هيج وأشرتله بـ اصابعها رد

-- شنو هاي 

-- وداعتك 

-- وين اكو هيج يمعودة شلون اثنين مو الدكتورة تگول كيس مدري شنو 

-- لا طلع ولد خاتل مو كيس ودكتورتكم عاويه 

باوعلي يضحك ما مصدگ ويگول

--  عود صدگ لو ناصبات عليه

يُـمن :- اي الدكتورة تگول توأم ولد وابنية

-- الف الحمدلله حچى هيج واجى لزمني من ايدي طلعنا من المستشفى حتى الوجع والمرض الجان بيه نسيته وطلعت امشي بكل حيلي من الفرح مكيفه بالتوأم 

هاله بس صعدنا بالسيارة طلعت نقالها وخابرت على عمي و الرجال مناك شلون فرح فرحه طار طيره فتحت المايك

 و خلتني صوته و اسمع صوته واثـق شلون يهوس فرحان

لحد ما وصلنا للبيت لگيناهم كلهم گاعدين بالصاله متانينا بس طبينا گاموا والفرحه والضحكة والهوسه الصارت گلبوا الدنيا خو واثـق حتى هلالهل هلهل حتى عمتـي شفتها فرحانه بس أديان من سمعت بيه توأم ضاجت عكس گبل

 و شكله كلش مقهورة

وأنـا هم انقهرت عليه خطيه هم حقها تريد تحبل وتخلف و ما يصير عدها وفوگاها شريجتها بيها بتـوأم الله يساعدها ما اللومها إذا ضاجت وانقهرت

بيومها عمي دز عشة من برى و خابر على عمي أبو بُـرهان وعائلته اجوا تعشوا ويانا

و خالتي لميعة طايرة من الفرح و ريام وعمي وحتى بُـرهان فرحانين الفرحنه والتمينا لمه تخبل كلها ضحك وسوالف

و من راحو انا صعدت الغرفتي و خابرت امي بشرتها ونفس فرحتهم واكثر بعد وضلت بس توصي بيه ادير بالي على روحي هاي الايام و اجيبهم بسلامة واحافظ عليهم واليوم انا على أساس ليلتي و يبات يمي بس دزلي رساله كاتب بيها 

-- حبيبتي نامي و ارتاحي راح اروح الهذاك البيت أديان جايتها الحاله 

كاتب هيج وضاحك وياها ما رجعتله ولا حچيت شي گلت خطيه خلي يروح يمها هسه مقهورة وتلگاها تبچي  

خلص اليوم واليوم الثاني والثالث وهو ينام هناك يجي ساعه يشوفني ويروح وباقي ضايج وما يتحاچه وبس واحد يحچي وياه يخلصها صياح وهيَ ما گامت تنزل ولا توصل يمنا بس عمتـي تروح عليها شوية وترجع أسبوع كامل والوضوع ما مثل ما هو واصلاً جاي يزيد وصاير فـد مره متشنج وما يتفاهم 

انا ما جنت اسأله شبيك وليش ضايج وشكو عفته لان أدري بيه عليه ضغط من مرته وبس مشاكل وياها عفته علي راحته 

لحد ما خلص الاسبوع ورجع يوم يمي ويوم يمها بس بعده ماله خلك و ما يتحاچه وهي ما تجي ولا اطب علينه بس عمتي تروح يمها يوميـه وهوَ بيومها ياخذها يطلعها يونسها 

مشت الايام وانا يوم بعد يوم اتعب و الثكل موتني و معدتي تفور و كل جسمي مورم 

نوم ما اگدر انام بالليل ، وإذا امشي خطوة افحط الاكل ما يطب ببطني صدگ شيب راسي بيهم و اخذوا عافيتي كلها 

لحد ما خلصت السابع والثامن و اول يوم بالتاسع صار عندي وجع لزمني من الظهر لحد المغرب اخذوني للمستشفى ابچي واتوسل بيهم يخابرون أمي 

الوجع الشفته ما مار عليه من گبل ما ادري شلون اوصفه ما ادري شلون اشرحه اول مره اشوف هيج وجع وهيج أذيه مالها مثيل ابد

الدكتورة فحصتني گالت عندج ولادة فوراً عملية ما اجازف بيهم بالطبيعي بسرعة طببوني للعمليات وانا الدموع تصب من الوجع ومن الخوف  و وحدي محد وياي بس الدكتورات و رائـف و عمتـي و هاله بقوا برى ما طبوا وياي 

وبس حطوا البنج بخشمي رحت بغير عالم بعد لا دريت بشي ولا حسيت بشي لحد ما فزيت موجوعة و بـطني ذابحني ذبح

 و لعبان نفس موتني و معدتي تگلب

 و بلعومي احسه مجروح و يوجعني

فتحت عيوني هوسه و ما اركز بكل السوالف ولا اسمع شيء غير الهوسه

 و الدوخه و الوجع بكل جسمي ضليت ابچي 

انوب حسيت عليهم يدفعوني بيه بالسدية و راها شالوني شيل وحطوني على السدية الثاني ركزت صوت رائـف و عمتـي ما جنت افهم حچيهم بس اسمع صوتهم 

ساعه يلا بديت اركز افهم السوالف

اجوا تحمدولي بالسلامة وباسوني

 و يباركون وانا بس ابچي من بطني طبت الممرضه ضربتني ابره رجعت سألتهم على امي ردوا جاية بالطريق

بيومها جنت ما صاحية عدل و كل شوية افتح عيوني ابچي من بطني  وارجع انام

لحد الصبح هذا حالي و عمتـي و هاله وياي أمي ما اجت كل ما افز اسأل عليها يردولي برد شكل وانا جنت فاقدة وتعبانة وموجوعه ما اكز على ردهم 

الصبح يلا فتحت زين وانتبهت بس الوجع بعده يروح ويجي اجت الممرضه بدلتلي هدومي على حسب الاصول وراها طلعوني للبيت 

بچيت لان امي ما اجت ولا سألت عليه شلون اهون عليها وانا بهاي الساعه وهاي الشده محتاجتها 

نوموني بغرفتي القديمـة لگينا أديان و غادة منظفاتها هذيج التنظيفه و مسويات الاكل ومنتظراتنا انا بعدني ما يصير اكل بس اشرب سوائل

اول ما طبيت تلگني فرحانات ويتباركلي وتساعدن عليه و نومني على الجرباية بيومها طلعنا بس الابنية والولد ضل بالخدج صحته تعبانه گالوا باجر يله يطلع 

جابتها عمتي رضعتها حسيته كلش تشبهني بيضة ثلج وعيونها كبار وعدها رصعه بحنجها خفيفه رموشها طوال بيهن لون  مو أبنية تجنن تجنن  جانت ناعمة كلش كلش حتى اخاف اللزمها بستها بخدها فرحانه بيها و گلبي يدگ بكل سرعته و اول ما رضعتها حسيت بـ إحساس غريب هيج عبالك رفه صارت بگلبي وبكل حواسي 

عمـتي وياي ما عايفتني و البنات يتساعدني عليه و دللوني دلال عبالك عروس مو نفسه واثـق فات عليه يهلهل و يهوس فرحان طاير و عمي نفس الشي بس كل هاي الفرحه و انا إحس غصه بگلبي لأن امي ماكو و ما اجت وسألت عليه 

يومين و سمعت رائـف متخبل ويصيح وحتى كفران گام يكفر خفت شبيه هيج تخبل اريد اگوم واطلع اشوفه شبيه بس ماكو ما اگدر اگوم واخاف امشي وحدي اله واحد يساعدني وراها سمعت عمي يگول

-- استغفر ربك تخبلت وصلت بيك تكفر هذا أمر الله والطفل طير من طيور الجنه يشفعلكم هناك گول الحمدلله الأبنية صحتها زينه بيها الخير والبركة 

انا سمعته وانا صرخت صوت و احس صرتي انشلعت من مكانها وعمليتي طگت بيومها بچيت بچي الله وحده يعلم بيه الكل وياي و يسكت بيهرو ياخذ من خاطري و يهديني رائـف و عمي و واثـق راحوا للمسشفى استلم الطفل وغسلوا ودفنوا ورجعوا للبيت 

وانا سمعت صوتها اجوا وحدهم ودافنينه متت ملخت روحي تملخ صدگ ما شفته ولا شميت ريحته ولا لزمته بس مو بـ ايدي هذا من الله الشعور 

بيومها رائـف وگفلي وگفـه ما انساها طول عمري للصبح گاعد يم راسي و لازم ايدي يبوس بيها ويحچي وياي ويسكت بيه 

وانا انتهيت فوگ تعب العملية والولادة هذا الخبر ادمرت دمار والدمرني اكثر أمي 

ماكو لا اجت ولا شفتها ولا خابرتني وحتى نقالي نزله رائـف يمي ماكو لا مخابرة ولا مراسله 

 أسبوع كامل انا بـ اسوء حالاتي واصعب أيام عمري وحياتي صح ما مقصرين وياي وكلهم مساعديني و اگفيلي بالصلوات اكلي شربي لبسي و السهر وياي على طول الليل ما خلوني إحس بـ شيء بس بقت غصة بگلبي لان أمي ما اجت ولا سألت عليه 

ادگ عليها ما احصلها بسرعة ينفصل الخط وضاله فوك كل الأذية الانا بيها افكر شبيها وليش ما تسأل عليه وهـيَ تدري بيه انا بشهري وهاي أيامي الأخيرة 

البنات جانن متعاونات عليه بالنهار و بالليل عمتـي تلزم واجب وياي جانت تنام يمي

 و رائـف نفس الشي و يحير شيجيب ويشحط گبالي صدگ مقهور على الولد بس من يشوف الأبنية يبتسـم ويگول  

-- تشبهج نسخة مصغره منج فدوة الشكلها 

ومن گـد ما الكل يگول تشبهني مشو عليها مشمش وهـيَ إسمها الحقيقي ياسميـن 

سماها ابوها بهذا الإسم يگول تشبة ورد الياسميـن هيج حلوة مثله 

هاي الايام كلها وانا باقية بالغرفه الجوه 

و همَ صاروا اكثر من اهل الي و گفتهم مالها مثيل خو هاله ما اجازيهم للموت جانت حتى للحمام اطب وياي تساعدني

 لان ما اگدر  وحدي واخاف من العملية 

لحد ما عدى أسبوع كامل وبيومها گعدت الصبح غسلت وتريگت ورضعت بنتي وغفيت و الساعه بالعشرة تقريباً سمعت صوت امي تحچي فزيت و ركزت وبالصوت عبالي اتحلم رجع اجاني صوتها  مره ثانية تسأل عليه و عمتي ترد عليها

-- شعندج جاية ترى زوجها ما يقبل تجين واني ما احب اشوفج بـ بيتي رجاءً طلعي برى

-- ولا قبل ولا حبيتي شوفتي شلون على أساس اشيل همكم بنتي وين صار أسبوع ماكو خبر منها و اتصال عليها ماكو شسـويتوا بيها 

-- شـسوينا بيها اشو متعرفين تحچي 

-- شوفي عيوني اني ما جايه احچي وياج ولا جاية اسولف وياج سألتج سؤال ردي عليه يُـمـن وين 

-- ما اگدر ارد عليج زوجها ما يقبل من يرجع من الدوام هو يحچيلج 

من سمعت الحچي مالهن بسرعه لزمت بطني و سندت روحي وگمت إذا هيج الحچي معناها امي ما تدري بيه جايبة ولا مخابرينها ولا مودين عليها وجانوا يجذبون عليه گمت مشيت اريد اطلع سمعت امي تگول 

-- شنو ما يقبل بنتي وين شعدكم من لعبه جديدة احچي لا اگلب الدنيا على رؤسكم

فتحت الباب و طلعت دارت وجهها عليه بس شافتني انخطف لونها و تغيرت ملامحها  شكلها تفاجأت من درت بيه جبت بسرعة اجت عليه وتسأل 

-- شنو هاي شبيج جبتي لو شنو فهميني 

-- وين جنتي ليش يخابرون عليج وما تجين شلون تعوفيني وانا بهاي الحاله 

-- منو مخابرني والقران محد خابرني اني صار اسبوع ادگ عليج وتليفونج ما احصلج  وعمج ما يرد عليه و واثـق نفس الشي ما يجاوب و الشفية رجلج هم حاظرني وحتى من رقمج محظورة واني مريضة فلاونزة ومصخته گوه اليوم اجيت شوكت جبتي 

-- صار أسبوع 

دارت على عمتـي و گالت الها

-- الله لا ينطيكم ولكم غضب الله على رؤسكم تحرموني منها وهي بـ اصعب ايامها 

بديعـة :- والله ما قصرنا وياها وعاملنها مثل الأميرات ما تحتاج وگفتج وجيتج وهسه شفتيها و عرفتي بالوضع تفضلي طلعي برى 

-- شوفي لج كلمه ثانية اجي ادوس بطنج اسكتي وصوتج ما اسمعه وطلعه ما اطلع اريد اليوم اشوف ليش هيج سويتوا وما خابرتوني وعفتوني اتگلى هناك و فوگاها مچذبين عليها وتگلولها اني ما اقبل اجي 

يُـمـن :- كافي يما الله يخليج ما بيه حيل على الطلايب البيه كافيني

-- شبيج أسم الله شكو

-- أبني مات 

حچيتها وبچيت ضربت على خدها و گالت

-- صخام الصخمني شلون مات

-- طلع تعبان وعافوا بالخدج يومين ومات 

-- سودة عليه والأبنية شلونها

-- زينه 

جنت احچي وابچي لزمتني من إيدي وتبوس بيه و تسكت بيه طببتني للغرفه 

گعدتني على الجرباية وضلت حاظنتني لحد ما سكتت گامت للكاروك شالت ياسمين باستها و بچت فرحانة بيها ومقهورة بنفس الوكت شوية و گالت 

-- ذكرتني بيج نسخة منج بعد روحي 

-- حتى همَ يگولون تشبهني

-- شـ سميتوها 

-- ياسميـن

-- فدوة الياسمينة الجنها ورد فدوة الشكلها الحلو، حبيبتي يوم لا تضوجين

 ولا تنقهرين هذا امر الله ما مكتوب يصير عندج هذا الولد هسه والحمدلله عوضج بهاي الابنية الجنها كيمر گولي الحمدلله لا كبر وتعلقتي بيه ولا شب و راح من بين إديج الله يحبج اخذه قبل حتى لا ينام بحظنج لا تنقهرين حبيبتي ان شاءالله يعوضج اكثر و ترسين البيت ولد وبنات 

مسحت وجهي و اردد بيني وبين روحي الحمدلله على كل حال 

ضلت يمي لحد الظهر عمتي ابد ما اجت يمنا بعد وامـي شمرت جبتها و شدت ربطتها على راسها و بدلت الياسمين

و اخذتني للحمام غسلتلي وبدلتلي

 و رجعت راحت للمطبخ سوتلي عصير انوب رجعت جابتلي فواكة وعمتي بالصاله تشيل روحها وترگعها ما تگدر تحچي تخاف منها 

لحد ما اجوا من الدوام بس سمعت بعمي اجي طلعتله و استلمته و هذيج الهوسه وهذيج الرزاله رزلته وهو ما يدري شلون يخلص روحه منها و ما يدري شلون يبرر انوب اجى واثـق ونفس الشي استلمته

 وهـوَ نفس عمي حار شلوت يخلص روحه منها 

الفهمته رائـف من انا بالعمليات مخابرهم ومانعهم يخابرونها وينطونها خبر ما فهمت شلون اقتنعوا بحچيه بس واضح صايرة بينهم عركه جبيرة و عمي واثـق سكتوا حتى لا يعاند و يأذيني وانا هسه جايبة

و الخاطر صحتي ما خابروا امـي ويدرون بيها اول واخر راح تجي علينا وتشوفني 

امي خلصت منهم وفرخت حرگتها بيهم واجت طبت يمي  تكمل غلط عليهم حچيت وياها

-- يما عوفيهم بعد لا تحچين والله ما قصروا وياي شايليني بعيونهم كلهم ساعدوني وعمتي الليل بطوله تخلصه وياي وياه الأبنية و حتى أديان و گفتلي وما قصرت وياي  

-- يالفطيرة يربي إذا ما موتيني ناقصة عمر شوفي  

اجت گعدت يمي على الجرباية بس شني تفور من القهر نص ساعه و اجى رائـف وبس سمعت صوته بالصاله گامت من مكانها لزمتها توسلت بيها

يُـمن :- يما كافي الخاطري

-- وداعتج اليوم هذا اعيد تربيته من جديد  

عافتني و طلعت هيَ طلعت و شافته وراها الدنيا احتركت لمت عليهم الناس يردونها تسكت ماكو ما تسكت انهدت بيه فد هده وهوَ ما يحترم ولا يگول مره واكبر مني  اللسانه متبري منه و يتجاوز وما يفكر البعيد ابـد 

وهيَ ما سكتت منه و تترادد وياه لحد ما وصلت بينهم للتجاوز وراها طردها من البيت انا بالغرفه ودموعي تجري و كل جسمي يرجف 

فتحت الباب وطبت عليه اخذت جبتها لبستها گلت الها بترجي 

-- يما عوفيه الخاطري وين تردين ترحين وانا محتاحتج لا ترحين الخاطري خلي يحچي وحده 

باوعت عليه ورجعت تتحسب عليه گعدت يمي ما طلعت بعد غير يعوفها ويسكت منها ماكو لزم الها الباب اله تطلع وما تبقى 

عمـي جره من الباب ماكو واگف و ما يتحرك ويغلط ويگول

-- هسه تطلع منا هالبر.. هاي 

هيَ سمعته گال هيج و هيَ تخبلت ورجعوا من جديد تعاركوا والعركه هاي صارت اقوى من القبلها وهنا امي انجبرت تطلع لان داس بالحچي وياها واصر عليها تطلع راحت طلعت من البيت ودمعتها بعينها گمت انا و گتله 

-- إذا امي طلعت انا اطلع وياها وبعد ما تشوف وجهي طول عمرك

اجى طب عليه للغرفه سريع فزيت خايفه عبالي جاي يطگني و انا گوه واگفه كل جسمي يرجف ولازمه بطني بـ ايدي 

صار يمي قريب و گـال 

-- صوتج ما اسمعه ولاااا نفس و محمد ادفنج هنا بهاي الغرفه إذا سمعتلج صوت

طب وراه عمي جره من يمي وطگه راشدي و صاح بيه

-- طايح الحظ هيَ بيا حال وانتِ تتهدد عليها فوك عملتك السويتها ويا امها جاي تهدد بالأبنية اطلع مناا يلاااا ما اشوف وجهك بالبيت بعد حيوان

طلع من الغرفه وعمي بعد منعه يفوت للبيت و من هاي اللحظه وعمتي شالت ايدها مني و بعد ما وصلت يمي و أديان اكيد بعد ما ادخلت ولا اجت علينا و غادة تنگط سم واجتها من الله العركة حتى بعد ما تسوي شي بقت بس هاله وياي 

ايام سودة عشت لا انا ولا هاله نعرف للأبنية وجانت كلش ناعمة وحتى نخاف انشيلها ونفتحه و الخياطات بعدهن بيه

ما فاتحتهن وهاله عدها دوام تروح الصبح وترجع تعبانه بيها ما بيها تجي تساعدني

 و بالليل اكثر شي حدها تسهر وياي لحد الساعه بـ 2 بالليل و راها تنام على روحها من التعب 

ابقى انا گاعدة وياها و طفل نفاس وبالليل تخلصه كله تبچي انا ابچي وياها واجيبها منا واوديها منا شفت الظيم و حتى اكل گمت ما اكل من القهر 

اسبوع كامل عمي طارد رائـف من البيت وما يقبل يطب علينا و قافل عليه فد مره وانا ابد ما شكيت وگلت عمتي عافتني و من يجي عمي يسألني ويسأل على ياسمـين اگول زينه وهو الزلمه شمدري بالحرب الگايمة عليه رجال الصبح بالدوام والظهر ينام والعصر لو يروح فاتحه لو عرس لو  زيارة مريض لو يم جماعته وبالليل ينام من وكت 

واليوم من راح عمي للدوام الصبح اجى رائـف علينا اول ما طب درت وجهي منه هـوَ بسرعة اجى على ياسميـن شالهم

و باسها و بعدين گال 

-- شلونج

ما جاوبته بقيت دايره وجهي منه رجع گال

-- فوگاها زعلانه والله زين يعني ابوي ضربني وطردني من البيت وما نعني افوت بسببج وبسبب امج و انتِ هسه زعلانه

--  حقك المفروص ما ازعل ولا انقهر لان انا بنظرك وحده لا إحساس ولا مشاعر 

-- احچي عدل لا تبقين تشمرين عليه

ما جاوبته صاح بصوت عالي

-- تبطلين سوالف الخرسان لو شلون وياج 

-- يعني شتريد مني احچي ما تقبل اسكت ما تقبل شتريد مني رائـف انا تعبانه وما بيه حيل عوفني بحالي الله يخليك

-- شوف اللسانها شطوله صاير ولج اشو متقوية فد مره وطالعلج اللسان 

-- استغفر الله يا ربي 

-- شنو كافر كدامج وگاعدة تستغفرين بوجهي طايحة الحظ 

ما جاوبته گام من مكانه وگـال

-- بسيطه اني اعلمج الظاهر قوى عظمج  وشفتي نفسج عليه سهله من عيوني

-- شتـريد تسوي سويت ترى مليت منك وجزعت ولعبت حتى روحي 

باوع عليه متفاجئ اول مره هيج احچي وياه اجى عليه وصار كلش قريب مني و گال

-- هاا والله لعبت نفسج مني ومليتي

 حلو مو من عيوني

-- رائـف عوفني بحالي ما اريد اشوف وجهك اطلع منا يا اخي مليت منك كرهت روحي وكرهتك امشي مناا كافي مليتتت 

رفع حواجبه مصدوم ما متعلم عليه احچي وياه هيج متعلم يدمغ على راسي وانا ابقى ساكته ما ارد رجع عليه وصار قريب مني كلش وگـال

-- تدرين ليش إني حبيتج لان ما تردين ولا ترفعين عيونج بعيوني حبيتج لان حتى وياه روحج ما تحچين حبيتج لان تستحين من خيالج إني مستحيل أشوفج غيـر يُـمن الحبابة الما تفتح حلگها و ترد و تلاسن مستحيل أشوفج غيـر يُـمن ام كلمة الدافية ردج اليوم يثبت طلعلج اللسان

و راح تتغيرين وتصيرين مثل أديان ام اللسان طويل التلعب النفس واني مستحيل اقبل تصيرين مثلها وتتغيرين وتتطبعين بـ أطباعـة فـ لا تلوميني على العقاب الراح اعاقبج بيه حتى ارجعج مثل مثل قبل خرسة عمية طرشة 

حچى هيج و طلع وانا نطيت من البچي  وراه لحد ما اجت هاله لگتني منتهيه سألتني شبيج گلت الها المفروض من البارحه اروح افتح الخياط ما گلت الها اجى رائـف و بقى يحچي عليه طلعت الحجه بالخياطات وهو صدگ فات موعد الخياطات ومحد اخذني افتحن ، بسرعة طلعت العمي گالته وهنا عمي سواله عركه ويا عمتي و الغلط والصياح والدنيا انگلبت بيناتهم شلون ما تگله على الموعد وباقية اني الهسه ما رايحة للدكتورة وفاتحتهن 

وراها بربع ساعه اجت هاله لبستني واخذوني هي و عمـي و واثـق للدكتورة واثـق جان يسوق وعمي گاعد بصفه وانا وهاله وره گاعدين ومشمش عفناها يم عمتي عمي گالها غصباً عليج اديرين بالج عليها منا لمن نرجع 

الطريق بطوله ابچي خنگ و هاله تسكت بيه لحد نزلنا للدكتورة فتحت الخياطات ورجعنا للبيت و على طريقنا عمي نزل واثـق يجيب عشة من المطعم يعني طلعتنا تقريباً طولت ثلاث ساعات وشوية ومن رجعنا لگينا عمتي گاعدة بالحديقة شكلها متانيتنا 

تعديناها و طبينا محد بينا حچه وياها ولا هيَ حچت ويانا انا گبل فتت للغرفه اريد اشوف بنتي اجيت على كاروكها ماكو ما لگيتها باوعت على الجرباية ماكو 

طلعت بسرعه للصاله خاف حاطتها بالصاله

و ما شفتها من طبيت باوعت نفس الشي ماكو بالصاله احس صار شد بـ رجلي من الهبطه والخوفـه دخيلك ربي شسوت بيها وين ودتها 

رجليه صارت ثكيله و توجعني ما ادري شلون دست عليها ومشت الغرفتها فتحت الباب و طبيت الغرفه فارغه طلعت اركض 

واصيح بصوت عالي 

-- عممممه عممممه 

عمي گام من مكانه و واثـق طلع من الحمام سريع والبنات اثنينهن اجن على صوتي طبت هيَ و وگفت و شكلها خايفه فد مره

حاكم :- شبيج بابا شكو 

يُمـن :- بنتي

-- شبيها

-- بنتي ماكو 

-- شنو ماكو يعني وين راحت

-- ما ادري 

حچيتها و انا ابچي وعمي باوع على عمتي وسألها

-- وين الطفلة 

-- اني معليه ابوها اجه واخذها 

اثنينه مشينا بنفس الوكت انا وعمي نريد نروح عليه للمشتمل هيَ بس شافتنا جاي نطلع  گالت 

-- مو بـالمشتمل اخذها و طلع بيها من البيت كله 

يتبع ........

#عــروس_الچبـــايــش 🌼

بــقلم يـــاســـة الحلقة (18)

ذنبي بعشرتك ما خنت 

حبيتك وما حسبت بالتالي هيج اتجازه

ما أدري ما عندك گلب

تتركني أعمه بنص درب 

وتكسر العكازة 

.............................. 

يُــمن :- شني أخذاها وين أخذاها مشيت وأنا إحس بـروحي مشلوله امشي بلاية ما إحس بـرجليه گال عمي

حاكـم :- شنو اخذها وين راح يعني طفلة نفاس شلون يطلع بيها شنو هذا اللعب

ساكته ما ترد صاح بيها بصوت عالي

-- ليش ما تحچين فهمينا الموضوع وين مشى بالطفلة

بديعـة :- ما ادري دخل اخذها وطلع

بس سمعتها گالت هيج بعد ما گدرت اوگف على رجلية بسرعك طحت بالگاع 

و ما گدرت اگـوم رجليه إحسهن ماتن والدم وگف ما يمشي بيهن 

عمي طلع نقاله و گام يخابر عليه ماكو ما يرد مره واثنين وثلاثة وماكو رد اخر شي انغلق انا سمعت بنقاله انغلق وانا ياهو اليهون عليه مصيبتي و يعيني عليها 

الدنيا انطبگت على روحي گمت افرفح الدموع اتصب و الادين والرجلين يتراجفن

عمـي و واثـق طلعوا من البيت ما ادري وين راحوا وانا گاعدة بالگاع و رجليه ميته ما اگدر اوگف عليهن

اجت هاله گومتني ما گمت ضليت بمكاني و بس دموعي تصب لا ما يسويها ويكسر گلبي عليها هو وعدني ما يسويها لا ما يأذيني هاي الأذية انا ما سويتله شيء حتى هيج يأذيني 

ساعه گامله گاعدة بالگاع و دموعي تصب

و ما توگف ولا احچي و لا اگول واصلاً ما اگدر انطق حلگي صار ثكيل وريگي يبس

عمتي و غادة گاعدات گبالي و اثنينهن ساكات محد بيهن تحچي و بس هاله ضاله تروح وترجع عليه وتحچي وياي و تسكت بيه وانا بغير عالم بغير دنيا العالم ظلمة بعيني ما اشوف بشر إحس ضاعت وبعد

ما الگاها

حطيت إيدي على القنفه و لزمتها حيل وگمت ساندة روحي عليها گامت وياي 

هاله و لزمتني من أيدي

مشيت وهيَ وياي طلعت من الصاله للحوش وهـيَ بعدهي لازمتني و تسأل بيه وين رايحه ما ارد بس امشي لا فهم ولا علم ولا ادري بـ روحي شـ اريد اسوي

وصلت للدرج مال المشتمل و جلبت بالمحجر و ضليت اصعد بايه بايه و هاله وياي و حايرة بيه ليش اريد اصعـد وهمَ

مو هنا اصلاً 

لحد ما وصلت للباب دگيته ماكو رد رجعت دگيته قوي محد يرد عليه گالت هاله

-- مو هنا اكيد رايحه وياه تعاي نزلي راح تموتين

رجعت دگيت الباب قوي وصحت بصوت احسه طلع من نص روحي

-- أدياااااان فتحي فتحييي جيبيها حرام عليج تعبت بيها والله تعبت بيها هاي بنتي انا مو بنتج ولج طلعت من نص گلبي متت يلا جبتها طلعيها لا تاخذينها مني حرام عليج  

لزمتني هاله و نزلتني وانا الغريب لو شاف حالتي بچى عليها انتهيت عيوني إحسهن راح يطلعن من مكانها من گد ما بچيت انوب ما اطيح دمعه وحده من العين لا كل عين يطيح منها شلال مال دموع

رادت تطببني للبيت ما طبيت ضليت بالحوش و عيوني على باب الشارع ناطره الفرج بلكي ينكسر خاطرة عليه ويرجعها 

لحد الساعه بالتسعه بالليل وانا بالحوش وعلى فد بچيه وفد نوحه طبوا عمي

و واثـق و گفت و اباوع عليهم إديهم فارغه

حچيت

-- شو فارغين عمي وينها

ما رد عليه و واثـق نفس الشيء ساكت وعيونه حمـر رجعت سألتهم

-- فدوة رحتلكم حاچوني وين ابنيتي وين راح بيها

حاكم :- تعاي بابا اني اجيبها بس تعاي انتِ مريضة تعاي فوتي حبيبتي 

لزمني من ايدي وطب بيه للبيت اول ما طبينا جوه گامت عمتي من مكانها عمي بسرعه عاف ايدي وراح عليها جرها من شعرها و طگها على وجهها صرخت بسرعه شال ايده مره ثانية وطگها اقوى من المره الاولى ويگول

حاكم :- مالج گعده بالبيت بعد يلاا برى

بديعـة :- إني شعليه ابوها اخذها شعليه تشمرها بـراسي

-- شعليج شلووون ولج مسويه مصيبة انتَ وهذاك النذل و تگولين شعليج

يا ظالمة يا ما تخافين من ربج شلون هيج تسوين شلووون طلعي برى ما اريد اشوفج هنا يلاااا برى

راحت الغرفتها و غادة وراها هاله ضلت واگفه وعين على ابوها وعين عليه سألها عمي

-- وانتِ ولج جنتي تدرين بعملتهم مو

-- لا والله بابا والقران إني مو جنت وياكم 

اجى عليها و جرها من راسها حيل وصاح بصوت عالي

-- أنتِ رحتي وياهم للمستشفى تدرين بيهم مسجلين الأبنية بـ اسم أديان لو ما تدرين

هيَ بچت وتحلف ما تدري وانا بس سمعت هذا الكلام و ما ادري شـ صار بحالي إحس شلون الواحد شال بلوكه جبيرة و طگني بيها طحت بالگاع وبعد لا گمت و لا شفت

بس اسمع صوت البچي مال هاله

وراها اسمعهم اجوا عليه يحاچوني ما اگدر اركز ولا اگدر افتح واشوفهم لحد ما فقدت وبعد ما حسيت على شي

ومن فتحت عيوني لگيت روحي بالمستشفى و امي گاعدة يم راسي تبچي انا شفتها و انا صرخت صريخ وبچيت بچي ولطمت على وجهي و جريت شعري ملخته تملخ لحد ما انهاريت و فقدت كل اعصابي

امي لازمتني بـ اثنين إديها و انا اصرخ واصيح واشكي الربي على مصيبتي هاي

لحد ما طب الدكتور و يا الممرضات ضربوني ابره بالوريد يلا هديت و حسيت عيوني گامت تغوش وراها نعست وما گدرت افتح انوب رحت بسابع نومة

مر وكت يلا فزيت امي بعدهي يم راسي بس شافتني فتحت لزمت إديه خايفه لا ارجع اسوي بروحي مثل مساع بس ما سويت شي بس دموعي گامت تصب

شهيناز :- كافي يروحي يمه حبيبتي عمت عيني كافي والله يجي ويجيبها والله راح اطلعه من جوه الگاع وغصباً ما عليه يرجعها بس كافي

يُـمن :- ولج يما من الاول خفت ولعب گلبي منه والله ما ارتاحيت ولا نمت وهودت مثل الناس والله حسيت بيه راح ياخذهم ويحطهم بـ إسمها يماا انا تعبت بيهم والله تعبت بيهم نوم ما نمت اكل ما اكلت مشي ما مشيت للصبح گاعدة من وجعهم وثكلهم رجليه ما ادوس عليها من الورم يما بطني من الطول للطول شگيتها الخاطرهم تحملت وجع العملية وطلوك الطبيعي والسهر كله الخاطرهم جهالي هذول مات الولد وما اعترضت على حكمة ربي بس حكمة بني آدم لا ما اگدر عليها وما اتحملها يما أبنيتي هاي حرام عليهم والله انا امها مو هيَ يماا صدري يدر عليها ما راضعه من العصر الهسه

شهيناز :- الله لا يوفقهم عسا ربي يحركهم بجهنم الدنيا گبل الاخرة ، بس كافي فدوة رحتلج والله عمج جاي يدور عليهم وراح يطلعهم من جوه الگاع

-- يا عم هذاا يا عم ما لعب بحالي و دمرني غير عمي شمرني بـ إيد واحد مريض مسودن لو ضاله تحت رحمة سعدية ولا هذا الحال ولج يما لو ضاله تحت رحمة غازي ولا هالظيم هذا راح اموت گلبي يوجعني يما گلبي يوجعني

-- عمت عينج عليج حبيبتي سودة عليه

عمج هاشم جاي يدورهم مو حاكم

حطيت إديه على بطني ومتت من البچي الهسه توجعني الهسه جرحها ما طايب شلون هيج يكسرني و يهد حيلي عليها ليش يظلمني هذا الظلم ليش

بيومها بتنا بالمستشفى ما قبل الدكتور اطلع وثاني يـوم من الصبح اجى عمي هاشم للمستشفى وگال

-- ماكو فص ملح وذاب بغداد خميتها منطقة منطقة و ماكو

شهيناز :- والحل شلون راح تموت بنتي

-- خليها تروح وياي نشتكي ونقدم دعوة عليه بايگها منها

-- شلون تشتكي وهو مسجلها بـ إسم مرته هذيج

-- بنتج عاقدة محكمة لو لاااا

باوعت عليه و رجعت تگول

-- اي عاقدة بس ما ادري من بعد هاي العملة إذا عاقد عليها صدگ لو تزوير كل شي يطلع منه هذا الناقص 

-- ما تدرين شلووون يعني ما سألتي إذا عقدولها محكمه صدگ لو چذب 

-- راحوا عقدوا و راح وياهم غـازي بعد شمدريني إذا صدگ لو چذب

رجع باوع عليه وسكت وراها تقدم عليه وسألني بهدوء

-- عمو حبيبتي رحتي عقدتي محكمه لو لا

-- اي رحنا 

-- دخلتي على القاضي لو بس فوتج للمحكمة

-- لا طبيت على القاضي و سألني موافقة لو لا وكتله موافقه 

-- ما دام عاقدة الشغلة صارت أسهل 

علينا أن شاء الله 

-- فدوة عمي جيبلياها الله يخليك رجعها الحظني والله اموت إذا يطلع صدگ ماخذها ومسجلها بـ اسم أديان 

جنت احچي وابچي والرجال باوع الامي

و گالها ساعديها راح اشوف الدكتور حتى نطلع

اجت امي ساعدتني وانا الدموع ما تبطل

والاخ جانا تطلع من نص روحي لحد ما رجع علينا و طلعنا و طول الدرب انا اون وابچي لحد ما وصلنا للبيت منتهيه لا احرك ايد ولا رجل من گد ما بچيت

اخذتني امي گبل للحمام سبحتني و طلعتني

مشطت شعري و حطت راسي بحظنها 

و تفرك بگصتي وانا الدموع تصب وهيَ تبچي وياي

شوية واجى عمي علينا عدلت روحي وگعدت مناطره الحلوگ بالگي جايب خبر

گال

-- ماكو اثبات الطفلة بنتج طلع صدگ مسجلها بـ إسم مرته والطفل اللي توفة مسجلة بـ إسمج لازم احد يشهد الاطفال اثنينهم اطفالج وما خذين الأبنية بدون علمج وناسبينها الوحده ثانية 

-- عمي و واثق يشهدون وياي 

-- لااا هذول مستحيل يشهدون للدولة بهيج موضوع هاي تعتبر جريمة لانِ انتِ بعدج طفلة قاصر ومتزوجة بدون موافقتج والجريمة الثانية خطف طفالة اريد واحد يشهد غيرهم عمج غازي أو بيبتج إذا رحت عليهم يشهدون لو لا 

شهيناز :- الله يكسر گبهم ويبهذلهم

و أن شاءالله نوگف ونشهد عليهم هناك يم الله لا تروح ولا تعب نفسك محد يشهد وياك هم باعوها اصلاً أني اريد اشتكي عليهم هذولاك الاثنين 

-- متسكتين وتكرمينا بسكوتج هوَ انتِ اضرب منهم اولادج مسجلتهم بأسماء الناس تردين العالم الباقية تعترف بيهم

و تسويلهم قدر وقيمة محد لعب بحال هاي الطفلة غيرج 

هيَ سكت ما حچت بعد وعيونها صارت حمر انقهرت و حصرتها البچية و هوَ بقى گاعد و كل شوية يخابر على واحد من معارفه يريد يوصل الحل 

عفتهم وگمت للحمام غسلت وجهي

و توضيت صدگ بعدني الهسه ما اصلي

مو نظيفه نفسة بس ربي يستقبلني بكل وكت وبكل حال واليوم انا ما عندي غيره اشكيله وياخذ حقي منهم و يرجع أبنيتي الحظني

خلصت وضوء و طلعت للحوش و ذبيت شالي بنص الحوش و صحت بصوت عالي

-- ربي ماكو غير سند ماكو غيرك عون غيرك ربي ولوني وسكتت وما اعترضت زوجوني وسكتت وما اعترضت كسروا بختي وخاطري وما شكيت الغيرك انذليت انطگيت جعت و انجويت وكل هذا وانا اگول الحمدلله بس هسه ما اگدر بعد ما اگدر هاي المره اختبارك صعب وانا يتيمة ومالي غيرك ربي لا تختبرني بزرتي فدوة رحت الإسمك

رجعت درت صوب النجف و گلت يا ابو الايتام يا علي يا ابو الحسن بـ شاربك انا

اريد حقي اريد أبنيتي منك اريدك توگف وياي وتكفلني مو يسمونك أبو الأيتام وانا يتيمة وحقي عليك يا ابو اليتامة انا يتيمة  ومظلومة ومكسورة الجنح اوگفلي ولاتعوفتي 

گعدت بالگاع و ضليت اصرخ بكل صوتي

طلعت امي گومتني طببتني جوه بعدني هسه طبيت و دگ نقال امي باوعت عليه ورجعت تباوع عليه سألتها و أنا إحس حتى نفس مابيه 

-- ياهو هذا

-- بُــرهان

-- انطينياااه 

اخذت منها النقال و رديت عليه نفسي مگطوع وگوه تطلع الكلمة مني گال الو جاوبته

-- داخله على الله وعليك تخليه يرجع بنتي 

سكت ما جاوبني ضليت ابچي بصوت عالي و اتوسل بيه بس يحچي وياه يرجعها وهوَ ساكت انوب گال

-- بس اسكتي شويه احچي وياج 

-- ما اگدر والله ما اگدر مو بـ أيدي روحي جاي تطلع مني طگتين على الراس توجع ما اتحمل بعد اول مره أبني انوب بنتي اموت والله اموت

-- حقج والله يساعدج بس ما تنحل بالبچي والأذية النفسية اسكتي و فكري بعقل إذا بقيتي هيج ما تحصلين غير بس التعب والمرض 

-- هوَ صاحبك ويسولفلك كل شي ما گالك وين اخذها ومشى بيها

-- لا والله ما حچى ولا گال ولا عندي علم

بتسجيل الأبنية بـ اسم أديان كل اللي  گاله الطفل الجديد يسجله بـ إسمها وانتِ موافقة على أساس

-- يعني راحت بعد ما اشوفها

ما جاوبني و أمي اخذت النقال من إيدي وحچت وياه

-- بُـرهان الله يخليك إذا عندك علم بمكانه دلينا عليه بنتي راح تموت 

-- والله ما عندي كل علم ولا اعرف شلون هيج تصرف 

-- ابو تميم يريد يقدم شكوى عليه بس ماكو شاهد يساعدنا بالقضية

-- شكوى شنو 

-- ما ادري بس يريد واحد يشهد وياه الاطفال أطفال يُـمن تگدر تساعدنا وتشهد ويانا و احسبها في سبيل الله دفعه بله عنك وعن اختـك 

-- شلون اشهد عليه هذا اخوي اذا شهدت يروح بيها

-- وبنتي اليتيمة المظلومة عادي تروح بيها عادي تموت محد يخاف الله بيها محد يرحمها حسبي الله ونعم الوكيل بيكم كلكم ظلام كلكم شاركتوا بظلمها الله لا ينطيكم 

قفلت الخط بوجهه و گعدت ايدها على خدها وعمي بالاستقبال كل شوية مخابر على واحد نص ساعه تقريباً و دگ نقال امي طفرت من مكاني عبالي هوَ يخابر بس طلع بُـرهان يدگ من جديد ردت امي عليه 

شهيناز :- خير أن شاءالله شتريد

-- انطي خبر الأبو تميم راح اجيكم

-- وليش جاينه إذا تخاف على أبن خالتك وصديقك واخوك شعندك جاي علينه 

-- انطيه خبر و من اوصل نتفاهم 

سدته منه و راحت العمي تنطيه خبر و أنا عيوني ما توگف إحس راح اعمى من گد ما تطيح منها دموع 

اندگ الباب گمت ركضت بالكي هذا رائـف اجى بلكي خاف الله بيه بس مع الأسف طلعوا ولد عمي هاشم تميم ومراد اثنينهم 

شافوني واگفه بباب المطبخ و حال الظيم يا حالي وگفوا اثنينهم مستغربين وضعي

و شكلي ويباوعون على امي و يرجعون يباوعون عليه لحد ما گـال تميم الأمي

-- يا ستار شكو شبيها 

-- زوجها النذل اخذ بنتها وشرد بيهم ما ادري وين

-- هاي شنو وين اكو هيج 

مـراد :- شلون انهزم مجاي افهم وين اكو هيج والطفلة شگد عمرها

-- عمرها أيام الله لا ينطيه كون 

تميم :- من شوكت اخذها 

-- من البارحه العصر

مـراد :- من البارحة وبعدكم گاعدين ما ترحون تشتكون عليه شـ منتظرين 

-- مو طلع مسجل الأبنية بـ إسم مرته الثانية 

-- اكيد تخبل شنو هاي وين عايشين مستحيل وينج عنها كل هذا صاير بيها وانتِ ما تدرين  

-- بحظ غازي وبخته بحظ سعدية وبعافيتها شمدريني بيه راح يسوي هيج الكلب ما انطاني خبر بـ ولادتها 

صاح عمي عليهم طبوا اثنينهم يم ابوهم وانا ضليت على وگفتي باقيتلي شعراية واموت 

سمعت عمي يتفق وياه تميم يرحون للمستشفى و مناك يجيبون اثبات الاطفال اثنينهم اطفالي من سمعتهم يحچون بموضوعي بسرعـة اجيت و طبيت يمها گعدت بالگاع وهمَ على القنفات گاعدين وانا الامه روحي و صايرة مثل الطير المكسور جناحة خلصت من البچي والقهر والظيم 

تميم :- اترك المستشفى هسه اول شي ناخذها تقدم دعوة على عمها غازي بالمركز مالتي واني استلم القضية وراها نشتغل على الباقين 

هاشم :- دعوة ايـش تقدم عليه وهيَ مسجلة بـ أسماء من الاصل

-- إذا اشتكت على عمها مزوجها بالغصب وهيَ بهذا العمر يروح بيها لو مو بـ إسمه

مـراد :- تميم إذا ما متأكد من الموضوع لا تورط الابنية و تاخذها تفرفر بيها بالمراكز 

-- متأكد بس خليها تقدم شكوى والباقي عليه الا اشكه بالنص واعلمه بـ بالاسلام شلون يصير 

شهيناز :- لعد يلا شـ منتظر 

-- لا مو هسه باجر الصبح إني موجود هناك واستلم القضية وارتب الموضوع بس اول خل اشوف القاضي و احچيله كل السالفه واضبط وياه الموضوع حتى نرفع الاوراق يمه گبل 

هاشم :-  يا قاضي منهم 

-- احمد 

-- اعرفه احمد اني اروح عليه باجر الصبح

-- هذا هو بالتسعة جيبها وتعال

اندگ الباب امي گالت يمكن هذا بُـرهان 

رد عمي لحد يفتح موضوع القاضي يمه ولا موضوع غازي خلونا نشوفه شيريد و خلص 

گام مراد فتحله ثواني و دخل سلم وعمي وتميم گاموا رحبوا بيه گعد بالقنقه المقابيلي وانا گاعدة بالگاع و لامه رجلية على صدري و ابچي باوع عليه و استغفر وراها عمي گال

-- الله بالخير 

بُـرهان :- الله بالخير والعافية

-- شلون الوضع ان شاءالله زين 

-- الحمدلله ، طبعاً اعتذر اجيت عليكم وزعجتكم بس ام يوسف گالت تردون شاهد يشهد وياكم على الاطفال اثنينهم أطفالها و اني مستعد اشهد  

كل احنه باوعنه عليه رجع گال

-- رائـف مو بس أبن خالتي لا بالله هو اخوي الما جابته امي وصعبه عليه اشهد ضده و انهي علاقتي بيه بهاي الطريقة بس مع الأسف هوَ وصلنا الهذا الحال و هوَ يعرفني كلش زين اني ما اقبل بلغلط ولا اقبل بالظلم و لو ابوي الجابني يغلط بحق إنسانه لا حوله ولا قوة يتيمة مالها احد مثل حاله يُـمن راح اوگف ضده و احاسبه 

هاشم :- الله يوفقك ان شاءالله بارك الله بيك

-- ابو تميم اني اجيتكم واعرف كلش زين راح اخسر اخوي و خالتي و اقرب الناس عليه بهاي جيتي و وگفتي وياكم وكلش عادي عندي اخسرهم إذا الموضوع متعلق بالحرام والحلال واللي صار ويا يُـمن حرام والله بعظمته ما يقبل بيه رائـف أذا تعاقب مو مشكلة خليه يتعاقب حتى يراجع اغلاطه بس ما اريد احد ثاني يتأذى غير رائـف الناس الباقية مالها ذنب تدفع اغلاطه 

-- إذا قصدك زوجته فـ هاي تعتبر شريكة بكل الاعمال واكيد تتحاسب

-- لا مو زوجته اني اقصد عمي حاكم

و واثـق والبنات اخواته مالهن ذنب 

بـ اغلاط اخوهن 

-- ما اعتقد احد ثاني يتحاسب غيرهم 

-- اني ما اريد امشي وره الاعتقاد والتخمين اريد اتأكد من الموضوع كون ما يتأذون أهله حتى من هاي اللحظة ايدي بـ ايدك ونروح نرجع الطفلة الحظن أمها

عمي باوع التميم رجع تميم گال

-- محد يتحاسب غيره بس اول شي اريد اثبت زواجها بالأجبار وهيَ قاصر و راها نثبت الاطفال اثنينهم اطفالها بـ تقارير المستشفى 

-- ماشي أذا هيج أني وياكم سوو اللي تشوفنه بيه فائدة الها والبنتها 

هاشم :- الله يوفقك 

گام من مكانه و گال

-- اترخص 

گاموا يسلمون عليه خلص سلام وياهم وباوع عليه و گال إذا بيها مجال احچي وياج شوية 

لزمتني امي و ساعدتني اگوم طلع هوَ طلع للحديقة و أنا اجيت وراه بس وصلت يمه باوع عليه بقهر و گال

-- قبل سنه تقريباً گال يريد يسوي طفل وينطيه الأديان بوقتها تحاچيت وياه و گتله غلط هذا الشي و حرام عليك گال راح يحچي وياج ويشوفج إذا تقبلين تنطين واحد من أطفالج بالمستقبل الأديان لو لا إني بوقتها ما ادخلت گلت شكو بيها أذا قبلت اشو نفس البيت و نفس الاب و همَ وهيَ انحرمت من الامومة يعني إذا اقتنعتي وانطيتيها طفل إني مالي حق احچي شي انتوا أحرار، المهم راحت أيام واجت أيام وبعد الموضوع انسد وما انفتح نهائياً 

وحتى من عرفت جايكم طفل بالطريق سألته اذا راح ينطية الأديان لو يبقى

بـ إسمج گال لا هذا الطفل الاول الج انتِ 

و راح يمشي بمعاملة العقد حتى يسجله

بـ إسمج وإني رجال هم مشغول بدراستي و بشغلي و اهلي ما سألت بعد ولا ادخلت بيكم لحد ما ولدتي و الموضوع كله رايح من بالي و ما متوقعه راح يسويها ابداً  

و البارحه المغرب من اجى عمي حاكم يدور عليه يلا عرفت ومن البارحه لليوم اتصل عليه وماكو و كل الاماكن اللي يروح عليها دورتها و ما لگيته بيهن بصراحـه إني مصدوم ابد ما متوقع يسوي هيج وياج لان جان يگول هوَ يحبج وانتِ حبابة 

و فقيرة وماكو مثلج وحتى يشكي حالج شلون جاي تتعبين بشغل البيت ما اعرف شنو اللي صار وشلون هيج طلع هاي الطلعه وخطط هاي الخطه مصدوم والله 

يُـمـن :- هَو تعارك ويا أمي و عمي طردة من البيت و انا كل هاي الهوسه مالي ذنب بيها ليش هيج يعاقبني

-- ما أعتقد هذا السبب لان هو قبل مشكلة أمج مسجل الأبنية بـ إسم أديان على العموم إني وياج وما اعوفج و واثـق نفس الشي وياج ودزلج سلام بـ أيدي ويگول ما يگدر يجي يعرف أمج ما راح تسكت إذا شافته و إني وياه اثنينه  مستعدين نشهد الصالج و نرجع الطفلة الحظنج بس بالمقابل ما يتأذى احد ثاني غيره لان عمي حاكم تعبان و البارحه الليل كله هو بالمستشفى گلبه فد مره يأذية  

انقهرت على عمي بس مصيبتي اعظم من مصيبته و إحس كل مصايب الناس اهون من مصيبتي رجع گال

-- هسه انتِ سكتي و بعد لا تبچين

و أن شاءالله تنحل و تخلص بس گولي

يا الله 

رفعت راسي للسماء واگول بگلبي يا الله 

يارب العالمين عيني على هذا البلاء 

-- راح اروح و إذا احتاجيتي شيء اتصلي عليه 

-- رحم الله والديك ما تقصر 

طلع بُـرهان و أنا طبيت گبل الغرفتي بعد ما بيه اسمع و لا بيه اقاوم هذا حدي انتهيت 

واستلسمت و سلمت امري لله هو كفيلي

حطيت راسي على المخده و إيدي على بطني و اردد بسم الله الرحمن الرحيم 

بسم الله الرحمن الرحيم ذكر البسملة

بيه معجزات عجيبة و بلكي بذكر اسم الله احصل على معجزتي و ترجع بنتي الحظني

ضليت اردد بالبسملة لحد ما غفيت وهالغفية غفيه ما گعدت غير ويا صلاة الصبح الجامع يإذن فزيت وضليت بمكاني ما اسوي شي بس اقرأ بالإذان بگلبي ويا المؤمن لحد ما خلص سندت روحي وگمت توضيت و طلعت للحديقة گعدت وعيوني على السماء إحس إيماني بالله قوي و متأكدة ما يعوفني متأكدة ما حطني بهذا الاختبار عبث اكيد وراه حكمة و أنا قابلة بكل اختباراته والف الحمدلله والشكر على كل شيء

ضليت گاعدة و اخذ نفس و ازفره وريحة الزرع إحسها نظفت كل جسمي و سحبت مني كل الطاقة السلبيه فوك الساعـة گاعدة هيج كل شيء ما اسوي بس اخذ نفس وازفره  لحد ما جسمي برد گمت طبيت أمي بعدهي نايمة و سيارة عمي بالكراج يعني اليوم بايت هنا يمها 

مشيت الغرفتي و تمددت و نمت من جديد 

ما گعدت بعد غير على صوت امي تگعد بيه گمت من مكاني و أنا متأمله اكو خبر جديد بس شفت الوضع نفس ما هوَ و أمي جاي تگعد بيه تريدني اروح اشتكي على عمي غـازي

و ما قبلت اتحرك وامشي المكان اله اكل واشرب علاجي وغصباَ عليه اكلت احس الگمه ما تنبلع توگف بنص بلعومي 

طلعنا إني و عمي هاشـم للمركز اللي يداوم بيه تميم أمي ما راحت ويانا عمي ما قبل ومن وصلنا لگينا تميم متانينا ومحظر كل شي يعني انا بس وقعت هو مسوي التقرير والدعوى كلها 

حتى محد سألني ولا واحد اجى و گال شكو وليش جايين هوَ جاي قبلني و مرتب كل الاوراق وانا جيتي بس ديكور لا اكثر ولا اقل 

گعدت بالكرسي اليم المكتب وعمي گاعد گبالي و تميم بـكرسي المكتب اندگ الباب وطب ضابط طگ الهم تحية و گال

-- سيدي وصل الولد المنتظرينه

تميم :- دخله 

طلع الضابط ماكو ثواني وطب بُـرهان سلم اثنينهم گاموله رحبوا بيه رجع سلم عليه رديت السلام وراها راح گعد على القنقـه

و عمي  و تميم اجوا يمه سأله عمي

-- گدرت تجيب الاوراق 

-- اي جبتهم هذول بس أبـو تميم ارجع واسألك نفس السؤال عمي ابو رائف 

و واثـق خو ما يتأذون بالموضوع 

-- لا ما يمهم الموضوع احنه نريد بس انرجع الطفلة وبصراحـه إذا تعاون ويانا رائـف ورجعها الامها حتى هوَ مالنه شغل بيه نتركة بحاله 

-- عمي ابو رائـف كلش تعبان و دزلك سلام بـ ايدي يگول هو وياكم و مستعد يجي يشهد الاطفال اثنينهم اطفالها و واثـق نفس الشي يجي ويشهد الصالحها 

هاشم :- الله يجزيهم الخير 

تميم :- إذا ما بيها زحمه عليك بس توقع هنا 

گـام شال الورقة قرأها ولزم القلم وقع عليها وعمـي گال بعد ما عدنا شغل احنه خالينا نطلع و تميم يكمل باقي الاجراءات 

طلعنا أنا وعمي وبُـرهـان بعدنا نمشي بالممر و اجى واحد بگصه بُـرهـان وشكله هذيج الهيبة التاخذ الروح مثل هذول الضباط الما يرحمون مبين هذاك هو صار وجه بوجه ويانا  و وراه جنود لابسين بلدلات مال جيش عمي ضحك و الضابط نفس الشي أبتسم و تقدم علينا اكثر

و تحاضن هو وعمي 

المركز متروس ضباط و بس انا مره بنصهم وضعت بينهم جني دجاجة و كل جسمي يرجف من الخوف شـ جابني شوداني بنص هاي الزلم بحظك وبختك

يا غـازي ويا رائــف 

بُـرهـان جان قريب عليه ويا ما وگف عمي يسولف وانا وگفت وره عمي باوع عليه وسوى حركة بحلگه متأسف على وگفتي بنصهم و ضل واگف ويانا ما طلع 

منـاف :- اليـوم هنا 

هاشـم :- اي والله عندي شغله و اجيت عليها

منـاف :- خير أن شاءالله شلونك اخبارك

-- الحمدلله انتَ شلونك العائله شلونها

-- بخير والحمدلله 

-- ربي يدوم الخير عليكم 

-- تميم هنا يدامو مو 

-- اي والله هذيج غرفتـه

-- خيـر أن شاءالله و إذا محتاج شـيء 

إني بالخدمة 

يتبع..... 

#عــروس_الچبايــش🌼

بقــلــم يــاســة الحلقه (19)

المفروض أشكرك علمتني درس 

صرت المحب والعدو ما فرفة 

كل هذا وتفكر بعد نلتقي

ما نلتقي يم ربك الملتقى 

............................ 

منـاف :- خير أن شاء الله إذا محتاج شـيء إني بالخدمة

عمـي أبتسـم ابتسـامة تگول نزل عليه الفرج بهذا السؤال وباوع عليه مثل للي يطمئنني ويگول خلص انتهى الموضوع وبعد لا تشيلين هيج فهمت من نظرته الضابط بس شافه باوعلي انتبه عليه و رفع حاجبه مستغرب وجودي بهذا المكان

و الظاهر هسه يلا شافنـي وانتبه الوجودي بيناتهم وانا شفته باوعلي وانا إحس بروحي صخنت يما شني هذا شو شكلة ياخذ الروح حتى بطني گامت تلويني وصارت عندي رهبه من نظرته دخيلك ربي عديها على خير گمت اشوف شكول شكول

 بـُـرهان جان واگف يمنا من شافهم يباوع عليه بسرعة گال 

-- ابو تميم احنه راح ننتظرك بالباب 

و رجع دار عليه و اشرلي بـ راسه امشي چا غير ارجليه ضلت وحده اطگ بـ وحده شلون امشي و اتعدى هاي الزلم الواگفه كـلها صرت بالصفحة الثانيـة مال بُـرهـان

و مشيت ويا و ما ادري شلون ما طحت وانجبحت گدامهم 

طلعنا من المركـز ومشينا مسافـة وگف بـُـرهـان و باوعلي بـ أسف وگـال

-- لحد الآن ما مستوعب رائـف شلون حط نفسه و حطج بهذا الموقف متأكـد اكو غلط بالموضوع  

يُـمن :- الغلط الوحيد بكل هاي السالفه رضيت ارجعله وره عرسـه ما اگول اگـول غير حسبي الله ونعم الوكيل بعمي غازي 

سكت ورجع دار على المركـز يباوع دگ نقاله طلعه من جيبه و رد 

-- اهلاً ابو تميم 

-- صار ماشي بعيوني 

قفله و باوعلي و حچى

-- تعالي أني راح اوصلج 

-- چا و عمي ليش ما يجي

-- الظاهر حصل فرصـه راح ثمينة يرجعلج حقج بيها 

حچى هيج ومشى و انا وراه لا حوله ولا قوة كلش فقيرة و هوية تاخذني و هوية تجيبني لحد ما وصلنا للگراج صعدنا بالسيارة انا گعدت وره استحي اگعد يمه وهو بلاية صوت شغل ومشى 

محد بينا يحچي بس انا احس تعبت وبعد ما اگدر اقاوم طاحت دموعي غصب عني ضليت كل شوية امسحهن ويرجعن يطيحن اختنگت ما اتحمل بعد هوَ عدل المرايـة و باوع عليه منها و گال 

-- الدنيا دار شقاء والإنسان ما انخلق حتى يعيش بيها برفاهية ونعيم لا الإنسان انخلق حتى يسعى و يجاهد ويقاوم و ماكو احد عايش حياة مثالية كل إنسان بهاي الدنيا عنده فـد بلاء معيـن باقي يجاهد ويحارب حتى بس يتخلص من عنده و كل الي انعيشة هو مقدر ومكتوب علينا فالبچي

و الحزن ما راح يغيرن القدر ولا يغيرن القسمة إني ما اگُلج لا تبچين ولا اگُلج لا تزعلين بالعكس هاي الدمعه التوگع من العين هيَ رحمة للبشر و الحزن والقهر  رحمة عظيمة للبشر احنه جاهلين عنها هسه انتِ ابچي و زعلي بس مو بهاي الطريقـة المؤذية للنفس حرام هيج تأذين نفسج الله ميقبل بـ يأذى النفس، نفسج هاي آمانه عندج و لازم تحافظين عليها  

-- ما اگدر والله مو بـ إيدي 

-- حقج و الله يساعدج بس اكو مثل يگول الضربه الما تموتك تقويك والمفروص انتِ هسه تصيرين قـوية و تبنين نفسج من جديد و توگفين على رجليه بـ أرادة وعزيمة

مسحت دموعي وبعد ما رديت عليه و هوَ نفس الشي سكت مني ما حچى بعد بقينا ساكتين لحـد ما وصلني للبيت نزلني يم الباب تشكرت منه و راح

طبيت للبيت أمي متانيتني و تلگتني تسأل شـصار و شـسوينا وانا ارد على اسألتها

انوب طبيت الغرفتي بدلت هدومي

و گعدت وإيدي على خدي و حچي بُــرهـان ضال بالي شلون ابدي من جديد شلون اگدر اعيش واكمل وأنا خسرت روحـي وبعد ما لگيتها

ضليت گـاعدة وأمـي كل شوية تجي تمد راسها عليه للغرفه وتروح ، تجي تشوفني خاف ابچي لو بيه شي

للمغرب وعمـي ماكو ما جاي ولا مخابر

دكت أمي عليه رفضه گالت ما دام رفضه

معناها عنده شغل عوفي هو من يكمل يخابرنا لو يجي و نشوف الوضع

وصدگ الليل اجى اتلگته امي مسويتله الماي الحار والملح الرجلية و الاكل اليفتح النفس و هذاك الدلال مدللته 

ولا فتحت موضوع وياه ولا سألته وهو نفس الشي ساكت ما سولف شيء

وانا ضليت اگب واطفى اريد بس كلمة تبرد گلبي وماكو اجيت وراها للمطبخ اريدها تحاچيه تسأله گـالت بس يرتاح و ياكل يلا نحچي وياه

رجعت للغرفـه و اكلت اظافري كلها شوكت يكمل اكل شوكت يسولف بعد ما ضل عندي صبر ربي دخيلك

ضليت متانيته ساعه كامله بين ما ارتاح وتعشة و شرب جاي يلا سألته أمي 

شهيناز :- شنو الوضع شـصار وياكم

هاشـم :- القوا القيض على غـازي و حالياً بالسجن 

-- ياالله، الله يبشرك بالخير شنو جابو يم تميم

-- لا اخذوا مناك من الناصرين اليوم راح يبات يمهم أيداع وباچر يحولنا البغداد

يُـمـن :- و رائـف ماكو خبر عنه

-- عمننا إسمه على كل الاستخبارات وحالياً مطلوب وجاي يدورون عليه

-- شوكت يلگونه 

-- يوم يومين بالهواي لا يضل بالج ما دام الشغلة صارت يم منـاف حسبيها منتهيه

شهيناز :- ومنو هذا منـاف 

-- أبن واحد من اصدقائي وهوَ ضابط چبير اله وزنه و اليـوم لگيته بالمركز وحچيتله الموضوع و گال سهله راح يحله هاليومين

-- يارب الله يسمع منك 

رجع باوع عليه وگـال

-- حبيبتي بابا منا وجاي تبطلين بچي

و تصيرين قويـة وكل الماضي تشمرينا وره ظهرج وتبدين من جديد اريدج تشدين حيلج الخاطر بنتـج ما اريدج تبقين هيج ضعيفه و دمعتج رخيصـة 

يُـمـن :- رحم الله والديك عمي الله ينطيك العافية ما قصرت وياي

-- انتِ بنتـي وهذا واجبي احميج واحافظ عليج و ارجعلج حقج 

-- ريتك سالم 

أبتسم و رد الله يسلمج 

عفتهم و گمت الغرفتـي و انا ادعي ربي ينطيني القوة والصبر حتى اتحمل هاي الشده و اخلص منها بخير وسلامة ويسخر عليه ولد الحلال اليرجعون حقي 

ثانـي يوم الظهر خابر تميم على عمي 

و انطاه خبر عمي غازي وصل البغداد ما درينا شني التفاصيل ولا شلون حچوا وياه وحققوا وياه لان عمي راح البيته الثانـي وتميم امي دگت عليه ما رد عليها

خلص هذا اليوم بطلاع الروح عليه وعمـي ماكو راح البيته وما خابر علينا و الولد اثنينهم نفس الشي محد منهم مر علينه وطمئنا وانا اكلت راس امي  بس اريدها تخابرهم واشوفهم شـ سووا لحد ما خابرت  على تميم جاوبها 

-- بشرنا بغازي سولف وياه لو بعدك

ضحك ورد 

-- يابـة خليته طب للأسلام من جديد مو بس سولفت وياه 

-- حيل بعد ايدي فدوة رحت الايدك 

-- شأسوي بعد هذا عزيز عليه لان خالتي العزيزة موصيتني عليه احطه بعيوني الاثنين 

-- هههههه بعد خالتك و أهلها 

-- ضل يصيح هيَ مو بنتي بنت اخوي والله اني معليه بيها اني مو كيلها 

-- اي مو نذل كلشي يطلع منه

-- على العموم موضوعه انتهى و القضية كلها الصالحنا 

-- ان شاءالله زين و هذاك طايح الحظ ماكو أخبار منه

-- بصراحة و صلتني أخبار بس مو اكيد باچر اتأكد منها 

-- شنو شكو يا ستار

-- احتمال 70٪ مسافر برى العراق هو ومرته و الطفلـه باچر اتأكد من الموضوع 

امي باوعت عليه و انا لزمت ايدها حيل إحس جسمي يبس بعد ما بيه امد اي عضوء بيه ولا احركه

شهينازة :- عزا بعينه وبعين الخلفته شلون هيج يسوي الهاي الدرجة حقير مستحيل شوكت لحگ طلع جواز وسافر بيها وهي بنت انفاس 

تميم :- هذا الخبر مو اكيد أحتمال بس 

يُـمن :- فدوة لا تگولها يعني بعد ما يرجعها والله اموت فدوة رحتلك گول غيرها انا احسب ساعة ساعة حتى ترجع وعلي أموت إذا طلع مسافر بيها 

--  هذا مجرد احتمال لا تفكرين بيه ولا تحطينه بالج وانتِ مريضـة وهيج تفكير مو زين عليج و آن شاءالله ماكو هيج موضوع اطمني

حطيت ايدي على خدي و ضليت ابچي ميته من القهر و روحي تفور فور وارجف وين امشي وين اروح خلص صبري وفقدت كل طاقتي ساعدني يا الله 

امي گاعدة يمي و تسكت بيه وتميم نفس الشي من النقال باقي يهدي بيه ويطئمن بيه بس انا ما اگدر مو بـ ايدي خلص وكت المقاومة و هذا حدي بعد 

مشى اليوم واليومين والثلاثة واي خبر ماكو هنا حسيت صدگ خسرت بنتي و بعد للموت ما اشوفها ولا اشمها و لا راح تعرفني بيوم من الايام وتأكدت اخذها وسافر بيها 

ومن ساعاتها و گمت افقد و تصير الدنيا سودة بوجهي واطيح و اتخربط اخذتني امي للدكتور طلع نقص D3 بس ما جنه نقص موت أحمر

اخذت علاج و ماكو فايدة اخذت ابره ونفس الوضع اضل ارجف و راها تظلم الدنيا بعيني وافقد بعد لحد ما عمـي گـال اكو دكتور موصفينه اله زينه للعصر و بدلنا ورحنا للدكتور انا و أمي و عمـي هاشـم بالطريق بعدنا ما واصلين و دگ تميم على عمـي بسرعة رد عليه 

هاشـم :- الو 

-- لا مو بالبيت طالع للدكتور ماخذ يُـمن

و خالتك ليش شكو 

-- هاا اي اي هوَ يمك اي انطينياه 

اباوع على عمي ارتبك و توتر وراها رد وهو مبتسم و يرحب من كل گلبه بالمتصل ويگول

-- وعليكم السلام هلاً سيـدي 

-- لا لا لا بالعكس تفضل 

-- اي تفضل عيوني الك 

-- سهله بسيطـة تدلل 

-- ماشي ماشي تأمر 

-- ان شاءالله اي اي لا لا سووي اللي تشوفة مناسب انتَ اعرف 

-- تمام ماشي براحتك الله وياك بالسلامة

قفله من عنده و باوعلي بالمراية وضحك وگـال ما راح يعوف الموضوع إذا ما جيب النا راسه وراس الخلفه 

احس گلبي طفر گبلي وانا اسمع حچيه بسرعة رديت 

-- ياهو هذا فدوة بس برد گلبي

-- تذكرين الضابط منـاف الحچيتله على الموضوع

-- اي

-- حالياً هوَ يم تميم بالمركز ويگول راح يطلع دوريـة على بيت حاكـم يسون مداهمة و يفتشون البيت وگال إذا ما حصل اي معلوم راح ياخذ الاب هيج بس مجرد تخوف للأبن حتى من يعرف بـ ابو بالحبس يرجع و هسه حچى وياي حتى ينطينا خبر بالموضوع گال خاف ما تقبلون گتله لا براحتك

-- لا عمـي ما يصير 

شهيناز :- شنو الما يصير بله

-- يما عمي حاكم معليه بسوالف رائف الرجال تعبان ومريض ومو حمل اتروح عليه الشرطة وتاخـذه من وره ابنه

-- لعد ما عرف يربية لو بس باقي يورط البنات بيه 

-- يما عمي معليه وانا ما ارضا يصير عليه شي 

-- تنجبين وما تفتحين حلگج عوفي عمج يتصرف وياهم

-- يما عمي حاكم معليه وفقير ويحبني ما ارضا يطب للسجن بسببي

هاشـم :- عمو حبيبتي هذا مجرد جرت إذن الرائف حتى يرجع من يسمع بـ ابو بالحبس

-- لا عمي ما يصير

شهيناز :- اشو عوفها تلغي وحدها انعل حتى ابو رائف عشيرة ما بيهم واحد شريف من غاز وانتَ طالع

-- يما 

-- وغمه انجبي يلاا

شكتت بس إحس بروحي متت عمي المسكين شعليه ياخذونا يشمرونه بالسجن انوب بُـرهـان گال مريض هسه يروح بيها من وره سوالف أبنه المسودن 

وصلنا للدكتور وعمي ويانا وانا مثل السمجه المهورشة اريد اموت من القهر على عمي حاكم 

طبينا للدكتور سوالي تحاليل و سونار وفحصني من اصبع رجلي لحد راسي شلون دكتور من اول ما يشوف البشر يعرف علته 

طلع نقص بكل الفيتامينات والمعادن فقر دم حاد و نقص بـ D3 والحديد مصفرات والكالسيوم مصفر من شاف التحاليل ضحك ويگـول

-- شعجب واگفه على طولج و تمشين وجسمج مصفر كل هاي الفيتامينات والمعادن

كتبلي كومه علاج وابر و الاكل گال الامي 

بنظام و الفواكة والمكسرات كون على طول اليوم اكل حتى يرجع جسمي يتوازن وتصعد النسب عندي وبعد ما اطيح 

اول ما طلعنا من الدكتور وصعدنا بالسيارة دگ نقال أمي باوعت على الإسم وضحكت 

و تگول

-- الظاهر سحلوهم 

هاشـم :- منو هذا 

-- بُـرهان 

-- شوفي شرايد ردي عليه

-- لا خلي يولي ولا ارد ولا اجاوب 

يُمـن :- يما ترى ما يصير هيج الزلمه جبير بالعمر ومريض وماله ذنب بسوالف ابنه ويحبني وما يوم سمعني حچاية شعليه ياخذونه ويشمرونه بالسجن 

رجع دگ مره ثانيـة 

هاشم :- ردي نفهم ليش جاي يتصل عليج

جاوبته امي و فتحت المايك 

شهيناز :- الـو

بُـرهان :- شلونج ام يوسف

-- بخير والحمدلله

-- جاي اتصل علي ابو تميم بس يطلع مغلق 

-- خير محتاج شي

-- اني حچيت وياه هو وتميم بخصوص عمي ابو رائـف و اجيت و قدمت شهادتي من بعد ما اخذت منهم كلمة ما يوصلون يمه ولا يم واثـق ليش اليوم تجي دورية تاخذهم اثنينهم من البيت شعليهم هـمَ بسوالف رائـف 

-- يا ماخذينهم الشرطة خطيه والله ما يستاهلون قهرتني 

-- اول شي بدون سوالف الاستهزاءة هاي لان عيب وزحمة مهما يصير يبقى الرجال ما طالع منه الغلط بحق بنتج ولا واثـق غلطان او مأذيها يشي اصلاً اثنينهم يحبونها و وياها من اول يوم اجت بيه البيتهم

 و ثاني شيء انطي خبر الزوجج اريد احچي وياه 

حچى هيج وسد الخط بوجهها هيَ بسرعة باوعت على عمي و گالتله

-- متخابر هذا الضابط إبن صديقك يسحل هذا الادب سزز وياهم 

هاشم :- لا حول الله هذا شلون نسيته 

-- شـ نسيت 

-- غير من اجى جاب التقارير مال المستشفى و شهد ويانا انطيته كلمة لا واثـق ولا حاكم يلوحهم شي من هاي السالفه

-- يمعود خل يولي مدري على شنو شايف نفسه وهو نفس الخـ... وياهم

شال عمي تليفونه لگاه طافي شكله بشاحنة السيارة و من اشتغل دگ عليه بسرعة الصوت مشكل بالسماعة مال السيارة ويحچي وياه 

هاشم :- الو السلام عليكم

بُـرهان :- وعليكم السلام اهلاً ابو تميم

-- متصل على ام يوسف اعذرني والله الجهاز جان طافي شحن

-- اي والله بس ردت افهم الموضوع من عندك 

-- يا موضوع

-- اني قبل لا اجي و اشهد وياكم اتفقت وياك ويا تميم ابو رائـف ما يتأذى بالموضوع وحچيت الكم على وضعه الصحي شلون تعبان 

-- اي صح بس ليش هذا الكلام ما فهمت

-- يعني ما تعرف بـ الشرطة اخذته واخذت واثـق

-- لا شلون هيج 

يُـمن :- بس سمعت عمي هيج يگول تفاجأت شني هاي شلون سوى روحه ما يدري رجع بُـرهـان ردله 

-- يعني ما تعرف ؟؟ 

-- لا هسه سمعت شلون هيج اخذوا

-- فايتين مداهمه على البيت يدورون رائـف ومن ما لاگينه ماخذين أبو واثـق بمكانه  

-- دقايق بس اشوف الموضوع و اتصل عليك انتظرني

-- ماشي منتظرك بس الله يخليك الرجال تعبان و الولد واثـق هذا ماله ذنب 

-- سهله ان شاءالله بس اشوف شنو الموضوع واردلك

قفله من بُـرهان وبقى ساكت حچت امي

-- ليش تگوله ما تعرف خل يولي هذا شايف روحه شوفه خليهم كلهم يعرفون الدنيا مو سايبة

-- منطيه كلمة ونسيته خجلت منه

-- وهسه شـراح تسوي 

رجع شال نقاله و خابر على تميم بسرعة ردله تميم

-- ها يابة

-- حاكم و ابنه يمك بالمركز

-- اي 

-- شافوك

-- لا منـاف ما قبل ادخل يمهم گال هوَ يتصرف حتى لا يصير ضغط علينا

و انطلعهم

-- يمعود هذا بُـرهـان خابرني يگول انطيتوني كلمة شلون تاخذونهم 

-- دگ عليه و ما رديت 

-- يلا خليهم اليوم يمكم و باجر اشوف شلون ارتب الوضع وياهم

-- ماشي 

قفله من تميم و نزلنا للبيت وما ادري وين راح وانا متت وراه شعليهم هذول المساكين و يدفعون ثمن غلط مو غلطهم 

امي ولا هامها و فرحانة تريدهم يتأدبون كلهم وعمي ما ادري ويـن راح وبيومها ما رجع علينا نام بهذاك بيته 

وانا للصبح لا غمضت ولا نمت منا قهري وظيم فراك بنتي وحظني الخالي منها وصدري المورم عليها و منا عمي و واثـق الراحوا بيها 

لحد الصبح بالسبعة وانا گاعدة والنوم ما مار على عيـوني باقية افتر بالبيت كل شوية بمكان لحد ما تعبت من الفره و غفيت على القنفة 

شوية وسمعت امي گعدت فزيت على صوتها باوعت للساعة بالتسعة بس شافتني گعدت گالت

-- ليش هنا نايمة و مكسره روحج گومي بغرفتج

-- خابري على عمي شوفي الوضع

عافتني و مشت للمطبخ تحضر بالريوك 

وانا مشيت وراها اتوسل بيها بس تخابر اريد اسمع الاخبار وهيَ ولا جنها تسمعني 

عايفتني وحدي احچي من شفتها ما ترد ولا تحاچيني أيست منها و مشيت للغرفـة تمددت بمكاني و ظيم الدنيا إحسـه كله بگلبي 

ضليت وحدي لحد ما غفيت من جديد ما نايمة غير ساعتين وغصباً ما عليه نمت من جديد 

ساعه و شوية وسمعت صوت امي عالي 

فزيت خايفة طفرت من مكاني فتحت الباب وطلعت اشوفها ليش تصيح لگيتها واگفه بالحوش و عمتـي بديعـة واگفه يمها 

وامـي تعد وتصف ضليت بمكاني و اباوع عليها شتريد جاي بس شافتني طلعت بسرعه گالت

بديعـة :- كلنا غلطانه وياج وأذيناج وحقج علينا بس عمج و واثـق اكثر اثنين يحبونج ويدافعولج بالبيت عمج ما ياكل إذا ما يگعدج يمه على السفرة و واثـق يتخبل إذا شافج ضايجة هيج تجازينهم شعليهم

بـ رائف حتى تشتكين عليهم وتنومينهم بالسجن شلون ينطيج گلبج عمج الرجال الكبير ينام ويا المجرمين والقتله 

شهيناز :- ذنبه عافج على حل شعرج وما عرف يلمج و لا عرف يرب ابنه السگط

بديعـة :- يُـمن إني ادري بيج طيبة و ما تأذين احد الله يخليج عمج مريض والله العظيم من يوم المشكلة لليوم يومية ننقله للمستشفى إذا بقى هناك يموت

شهيناز :- موت الكرفج وكرف ابنج شگد ما تستحين وبلا إحساس لج ماخذين بنتها من حظنها و كاسرين ظهرها وبختها وجاية بكل صلافة تتبكبكين و تحچين بطيبة الگلب يُـمن مالها دخل إني السجنتهم وطيبة گلبها التحچين عليها غلفيها وحطيها (....) ويلا مناااا 

عمتي دارت وجهها على أمي مصدومة من الكلمة و انا ابد ما حچيت ضلت تباوع على أمي صافنه عليها وراها باوعتلي وحچت

 بـ رجاء

-- رائـف ما ناوي ياخذها طول العمر منج بس جان مقهور منج ومن أسلوب امج وزعل هيج كم يوم والله العظيم ما ناوي ياخذها ويحرمج منها و داعت نظر عيني 

واصلاً من يوم الراح وهو مريض و نايم بالفراش وداعت اولادي و داعت واثـق الاعز من روحي رائف من يوم الراح لليوم مريض ونايم بالفراش 

شهيناز :- حلو يعني عندج تواصل وياه

و تحچون وتسولفون خوش حچي لعد راح انطلع رجلج وناخذج بمكانه حتى تدلينا وين گاعد هو وبنت اختج الشريفـة

سكتت ما ردت على أمي وراها بشوية طلعت نقالها من الجنطه واجت تمشي عليه انطتنياه و تگول

-- يريد يحچي وياج 

يُـمن :- هسه تذكر يحاچيني صار أسبوع  اني والميته سوى ما فكر بيه ما خاف الله بيه ليش سويتوا بيه هيج انا ما أذيتكم انا اتأذيت اكثر منكم انظلمت و انكسر خاطري وبختي خدمتكم بعيوني وما شكيت 

شگد ظلمتوني بس ما حچيت هسه جايتني وترديني احچي و ارد واتنازل هسه تذكر يحچي وياي من انسجن ابو وين جان صار أسبوع 

حرف واحد ما ردت عليه اخذت النقال فتحته و خابرته و فتحت المايك بس دگت عليه بسرعـة رد و اجاني صوته يگول

رائـف :- ها يوم رحتي 

بديعـة :- اي إني يمها جاي تسمعك احچي

شهيناز :- يا چلب يا حقير يا نذل والله 

و الإسمه الله إذا ما خيستج بالسجون فلا اطلع شهيناز 

رائـف :- انتِ بس عوفينا نحچي و لا تتدخلين كله منج محد وصلنا الهذا الحال و لعب بينا غيرج 

-- يا أدب سزز لو بيك خير ما شارد صير زلمه وتعال شوفنا وجهك النكس

-- خرب...........  

-- طاح حظك يا عار الزلم 

-- محد عار غيرج و محمد لو يمي اله ادفنج وانتِ عدله على هذا غلطج 

-- يلا تعال و ادفني شوفني مراجلك لا تضل لابد مثل النسوان

عمتي بسرعة سدت الخط و باوعت الامي

و گالت

-- خلينا نتفاهم الله يخليج الغلط ما يجيب نتيجة و الرجال هذاك صار ضحية 

-- امشي برى لا اخابرهم يجون يسحلونج 

يُـمن :- عمه ابنج وين گاعد دليني عليه اروح اجيب بنتي منه 

بديعـة :- ما تخلينا امج نتفاهم 

-- يمااا بس اسكتي فدوة رحتلج بس اسكتي

-- ولج بعدج مصدگتهم عصابة هذول 

-- ما مصدگه واحد بس اسكتي خليني اشوف دربي عمـه خابري 

-- انجبي وامشي جوووو ولج تردين تحچين وياه من بعد كل الصار 

-- يماا بس عوفيني اندل وين گاعد

ما خلتني احچي وياه دفعتني تريدني اطب جوه و رجعت على عمتـي لزمتها من ربطتها وجرتها حيل طاحت ربطتها منها رفعت عمتي ايدها تريد تحمي اطگ امي 

وامي هنا قضت بيها التوبة إذا اگول ملختها هاي الكلمة قليلة 

لا خلت شعر لا وجه لا هدوم وعمتي طلعت فد جبانه و اللسانها بس عليه امي موتتها موت وهي باقيه بس تصرخ وتهامش بـ إيدها تريد تحمي روحها 

اريد بس افرغها منها ماكو وانا چني طير مهلس حتى ما بيه اوگف و امي الله ينطيها الصحة والعافية بيها كل القوة وعمتي انتهت بـ اديها اخر شي عظتها بـزندها حيل 

طلعت عمتي تركض من البيت الربطة طايحة والشعر مهلوس والوجه مخرمش 

رجعت امي طلعت وراها و تصيح عليها

-- والخلقج إذا لمحتج مره ثانية جاية علينه بهاي الصلافة اعلگج باب الشارع واخلي الما يشتري يتفرج 

طبت وسدت الباب واجت عليه واستلمتني بهذاك الغلط والصياح 

-- الثوله العوبة كل خير ما بيج كل السوته بيج وجاية تحچين وياها وتردين تجاوبين ابنها الله يطيح حظج فوك هذا طيحان الحظ 

   

ما رديت عليها عفتها و طبيت گعدت بالصالة وافور ودموعي عشرة عشرة راحت بنتي بعد لو اموت ما اشوفها لو مو شرطة لو الدنيا تنگلب ما يرجعونها 

ضليت گاعدة وابچي وامي مگابلتتي وتحچي عليه وعليهم وتسب بيهم واحد واحد اخر شي گامت للمطبخ ما ادري شتجيب بسرعة شلت نقالها  

و طلعت رقـم عمـي هاشـم دگيت عليه ما يرد رجعت دگيت على تميـم بسرعـة جاوبني ويگول

-- هلاا بمرت ابوي الصاكه امر خدمة 

-- انا يُـمن 

-- هلا بنت مرت أبوي الاصگ من امها أمر خدمة 

-- اريد اتنازل على القضية

-- اي صار وتردينها هسه لو العصر

-- ما متشاقية وياك 

--ولا اني ضاحك وياج و الموضوع مو لعب جهال  صار أسبوع نركض و ابوي رايح توسط يم ضابط ما يسولف ويا اثنين من گد ما ثكيل و طاح عليه و توسله  حتى يوگف  ويانا بالقضية ويرجعلج حقج تجين هسه تگولين بطلت غير إذا نروح انگله بطلنا يشيل الراتب من جتافاتنا و يگعدنا يم امج نكنس ونمسح 

من سمعته هيج يگول خفت اكثر و گمت ابچي بصوت عالي رجع گال

-- أذا على عمج حاكـم فـلا تخافين عليه زين ومابيه شي و اصلاً الموضوع مو يمه ولا يم واثـق هذول هيج بس تهديد بسيط جبناهم يمنا يوم يومين و نطلعهم

-- عمي مريض وماله ذنب ويحبني ويحترمني و واثـق ماكو مثل طيبته ويموت عليه وما عنده غلط وياي ما اگدر اورطهم وياي وينشمرون بالسجن بسببي والله خطية 

-- جاي اكلج ما عليهم شي و مدللين دلال من البارحة لليوم اكل ونوم فندق عشر نجوم مو سجن 

طبت امي و صاحت عليه مناك 

-- أجت الشيخة ام الشيخ  و گالت العا تنازلي واجيب بنتج وانوب خابرته يريد يحچي وياها 

تميم :- هلاوووو يابة راجعين طيور الحب من ورانا 

شهيناز :- مو يدري بيها قشمر بسرعة تصدگ متشوف الله مطيح حظها 

-- يابة و داعتج يا خالتي إذا ما خليته يبطل يسولف حتى وياه روحه ما اطلع أبن ابوي بس خل الوحه 

-- ايدك الك كسره تكسر

-- وين الرقم الخابر منه دزيليا

-- خابر من امه وهاا امه الـبـ.... تخابر بيه وتنطيه اخبار ومعلومات وحتى تندل مكانه اكول روحوا اخذوها وطلعوا حاكم الخيخه 

-- سهله مو من عيوني

يُـمن :- شنو السهله جاي اكلك ما اريد اشتكي اريد اتنازل 

-- هسه معزلين تعاي باچر 

امي ضحكت و هذاك مناك بسرعـة ضحك 

و يگول الامي 

-- يلا خالتي الجميلة اروح اجيب امه

و اخلي الضباط يعرسون عليها اليوم واتوبها عمر بعد ما تسوي هيج سواية

سد الخط وامي تضحك وانا گمت اشيل روحي وارگعها رجعت دگيت عليه ما يجاوب وعمي هاشم نفس الشي ما يرد حرت ويامن احچي وافهمه انا اخاف من هاي السوالف وهاي التهديدات حتى لو الدوله والقانون وياي انا اخاف وهذا راح  إذا سمع مسوين شي بـ امه للموت بعد ما يخليني اشوف بنتي 

بقيت گاعدة وناطه من البچي انوب مدري شلون تذكرت مراد هذا افهم واحد بيهم شلت نقال امـي ورحت الغرفتي وقفلت الباب عليه و دگيت عليه خلصت المكالمة وما جاوب رجعت دگيت مره ثانية رد 

مـراد :- الـو

يُـمن :- الـو

-- منو يُـمـن ؟ 

-- اي انا يُـمن 

حچيتها ونطيت من البچي خطيه خاف

و بقى بس يسأل شكو شبيكم خالتي بيها شي صاير وياكم شي وانا ما ارد بس ابچي انشلع گلبه يلا جاوبته

-- لا ماكو شي بس اريدك تساعدني

-- عيوني الج سلامات 

-- تميم ما يقبل يطلع عمي حاكم من السجن و ما يرضا اروح اتنازل عليهم

و يريد يروح يسجن عمتي بديعـة وإذا سجنها بعد ما اشوف بنتي للموت وفوگاها امي مطابگته 

-- شنو

-- البارحـه اخذو عمي حاكم و واثـق للسجن واليوم تميم يريد ياخذ عمتي بديعة وياهم ورائـف إذا سمع ماخذين امه للموت ما يرجع بنتي انا اريد اتنازل عليهم حتى يرجع بنتي 

-- كل هذا المسوينه وياج وتردين تتنازلين 

-- إذا ما تنازلت ما يرجع بنتي

-- مو بكيفة ما دام رفعتي عليه دعوة واكو شهود من عائلته اول وأخر يجيبونه

و يرجعون الطفلة لو ينهزم جوى الگاع يطلعونه 

-- انا اخاف من هاي السوالف اخاف من المراكز و الشرطة و اخاف من الناس حتى من روحي اخاف ما اريد العرك ولا المشاكل تعبت و بعد ما عندي طاقة اتحمل تفكير وقهر هو راح يرجعها و بعد ما ياخذها عمتـي گالت يريد يحچي وياي حتى يرجعها بس أمي ما خلتها كتلتها وطردتها 

-- كل هذا الي صار وبعدج طيبة ومصدگتهم ترى الحقير والنذل ما يسوي سوايته شلو بعدج مصدگة بيهم 

بقيت ابچي ما ادري شأسوي ما عندي رأي ولا اعرف افكر ومبنية على الغلط و بعمري ما ماخذه قرار الروحي وفقيرة كلش واخاف حتى من خيالي الهذا السبب ما اعرف اتصرف واتقشمر بسرعة واصدگ بالناس بسرعة عبالي كلها مثل گلبي ومثل تفكيري رجع گـال

-- كافي لا تبچين راح اشوف ابوي و نحل الموضوع بس لازم يرجع الطفله بالاول يله ترحين تتنازلين وبنفس الوقت لازم يكتب تعهد ما يرجع ياخذها منج ولا يتقرب عليج

والله ما اعرف شلون راح يحلونها وهوَ مسجلها بـ إسم زوجته الثانية بس راح اشوف أبوي وسهله 

-- همَ يعرفون يرتبون السالفه بس احچي وياهم الله يخليك الحگ على تميم گبل لا ياخذ عمتـي 

-- تمام سهله راح اشوف الوضع واردلج بس بطلي بچي و رحمي نفسج 

سديته من عنده وامي برى گالبه الدنيا عليه تريدني اطلع من الغرفه واجيب النقال طلعت وانطيته الها عبالها ما ادري بيمن اخابر كل ضنها خابرت بُـرهان وحچيتله بس من شافت المكالمة ويا مـراد سكت وحتى ما سألتني ليش خابرته يمكن جانت تسمع من وره الباب بس ما تدري بيه مراد توقعتني خابرت على بُـرهــان وسولفتله راحت گعدت على القنفه وتگول

شهيناز :- الاكل بالمطبخ روحي اكلي عندج علاج 

-- ما اريد 

-- گومي يا امي يا حبيبتي لازم تاكلين الخاطر العلاج هيج تتأذين اكثر 

مشيت للمطبخ وگعدت اكل غصباً عليه عندي علاج وإذا ما اكل ابقى ارجف ومعدتي تكوم توجعني والمرض يزيد عليه اكثر 

كملت اكلي و شربت علاجي وضليت گاعدة بالمطبخ ساعتين وانفتح الباب وطب عمـي وياه مـراد بس شفتهم بسرعة گمت من مكاني سلموا و طبوا للصاله وانا امشي وراهم عمي ضايج و روحه طافرة ومراد شكلة طبيعي بسرعة عمي فات للغرفة مالته و امي فاتت وراه وانا سألت مـراد 

-- شني الاخبار

-- لحگت على تميم جاي يطلع يلقي القبض على الاماية وحچيت ويا ابوي راح يطلعون واثـق وابو بس يريد يحچي وياج بالاول 

-- شـ يحچي

ابتسم و رفع اجتافاته و أشر بـ شفايفة بمعنى ما ادري شوية و طلع عمي من الغرفـه وامي وراه گعد گبال و گـال

-- اليوم انحطيت بموقف كلش صعب واني بعمري كله محد گايلي على عينك حاجب بس كل هذا فدوة الج والاب يتحمل ويضحي الخاطر بناتة وانتِ وحده من بناتي الله شاهد عليه وإني مستعد اتحمل اي شي الخاطرج 

شهيناز :- الله يحفظك ويطول بعمرك و ما عاش اللي يذكرك بسوء كرامتك محفوظه ان شاءالله 

هاشـم :- الولد وامج يگولون تردين تتنازلين على الدعوة واني راح امشي وياي و اخذج بـ ايدي و اخليج تتنازلين مثل ما اخذتج بـ ايدي اشتكيتي بس من هسه خلينا نتفق اتفاق 

-- گول عمي تأمر أمر وان شاءالله ربي ما يجيب الزعل بينا 

-- من هسه ايدج بـ ايدي وما تخطين خطوة من وراي وراه تميم وشنو يصير تنطينا علم 

-- صار ما اسوي اي شي غلط والله

-- اعرف بيج ما يطلع منج الغلط بس لازم انبهج واتفق وياج من الاول

-- اي موافقة وياكم انا كلشي تسون قابله بس رجعوا بنتي و طلعوا عمي و واثق خطية

-- جنت احچي ويا منـاف وگتله راح نتازل عن الدعوة والسبب تردين عمج و واثق يطلعون وبنفس الوقت رائـف دزلج امه يريد يحچي وياج گال بسيطة انطلع حاكم

 و واثـق بس بالاول نحصل على رائـف 

-- شلون تحصلونه وامي ما خلتني احچي وياه وكتلت عمتي و طردتها

-- لگينا خطه راج نجيبه برجليه يمنا بس بالاول نريد مساعدتج ولازم تصيرين قويـة حتـى ما يكشفنا 

-- ان شاءالله 

-- هسه گومي وياي للمركز وهنـا نرتب المرضوع 

گمت بسرعة ركضت لبست وطلعت لگيتهم واگفين برى متانيني صعدت وياهم ورحت مـراد راح ويانا بس وصلنا للمركز 

لزمتني رجفه بـ رجليه اريد بس اسيطر عليهن ماكو 

مشينا بالممر مال الغرف وكل الضباط تطگ تحية العمي لحد ما وصلنا يم باب غرفـة تميم  وگف عمي وگـال

-- راح نفوت وهنا يم تميم ضباط استخبارات منتظرينا راح يساعدونه 

-- ان شاءالله

-- إذا سألوج جاوبي و ردي عليهم بكل شي تعرفينه و شنو يطلبون منج تنفذين 

-- اي ان شاءالله 

-- يلا خلينا نفوت گولي يا الله 

گلت يا الله و هوَ فتح الباب و طب واحنه وراه اول ما فتت صارت عينـي عليه گـاعد على المكتب و تميم گاعـد بالكرسي الگباله وبعـد وياهم واحد ثالث گاعد مقابيل تميم  عمي طگله تحيه و هو أبتسم و گـال

منـاف :- اهلاً وسهلاً

يتبع ........

عــروس الچبايــش🌼

بقــلــم يــاســة الحلقة (20)

اليفارگني شبر ابقى التفته سنين 

واتاني بكل جرح يا لجمه الترجعة 

انا من الحچي يبللني طاري الماي 

ويمر إسمك وينشف خاطري بسرعة

.......................... 

و اكو حضه ملاگة وحضنه وداع 

ياهي تريد منهن من الاگيك

(( للشهيد علي رشم )) 

.................................. 

منـاف :- اهلاً وسهلاً

هاشـم :- اهلاً بيك شلونك سيدي

منـاف :- بخير إذا انتوا بخير تفضلوا استريحوا

طبينا بطن الغرفـة وتميم والضابط الثاني گاعدين گباله على الكراسي هـوَ أشر للضابط والضابط گام من مكانه ويگول 

-- خمس دقايق وكلشي يكمل

رجع ضرب الهم تحيه وطلع اول ما طلع عمي راح گعد بالكرسي الجان گاعد عليه الضابط  وانا گعدت بالقنفه البعيدة وحاصرة روحي بالزاوية لان مـراد گعد

يمي بنفس القنفة

منـاف :- شلونك مـراد شو ما بستني

مراد ضحك و گام من مكانه ويگول

-- شو شفتك جايتك ترقية وشكلك جدي  فـ عبالي بعد ميصير ابوسك 

-- لا بله من شوكت بيناتنا هيج سوالف اشو انتوا فد مره صايرين ابوك يسميني سيدي وانتَ تگعد بدون سلام 

راح مراد سلم يسلم و هوَ گام وگف مدله ايده و تباوسوا عمي ضحك ورد

-- صح أنتَ واحد من ولدي بس الأحترام وأداء التحية واجب و خصوصاً إذا جنت بالبدله العسكرية 

-- اي صح

تميم :- سيدي هاي السوالف مال اني أبنك وانتَ ابوي ترى ما تفيد لان انتَ گاعد بلكرسي مالي و مگعدني هنا مثل الخطار لو صدگ ما بيناتنا رتب ومناصب جان عفتني گاعد بكرسيي ما اجيت وگعدت عليه 

منـاف :- هههههه انجب لك مو ضحكت بوجهك واخذت وجه زايد

تميم :- شوفوا طلع يقشمر علينا بلكي نغلط حتى يرفع بينه تقرير

كلهم ضحكوا وانا احس بروحي افور وكل جسمي يرجف رجع عمي گال

-- سيدي هاي يُـمن جبتها وياي هسـه

شـ راح نسوي

-- نشمرها بالحبس حتى ما تتنازل عن الدعوة

حچى هيج وباوع عليه يمـا النظره اخذت گلبي من الخوف حسيت روحي انخمشت

عيونه كبار وحادات و مدري شلون يباوع

هاشـم :- هههه هيَ تخاف عبالها إذا ما تتنازل ما ترجع بنتها

هز راسـه و گـام من مكانـه اكو كرسي بصف الميز جره و جابـه حطه قريب عليه

و گعد عليـه و گـال

-- اي ام ياسميـن احچيلي كل التفاصيل شگالتلج الاماية وين گاعد ابنها بيا منطقه  

اللساني انعگد و جسمي يرجف وإدية صارت ثلج من الخوف شبيه ارجف ما ادري 

إحس گلبي راح يوگـف انتبه عليـه شلون خايفة و ارجف و منتهيه گـام من الكرسي

و رجع گعد على المكتب وباوع العمي وگـال

-- الظاهـر بنتك جبانـة وما راح ناخذ منها لا حق ولا باطل 

هاشـم :- لا هيَ بطله وما تخاف وراح تاخذ حقها منهم كلهم مو هيج حبيبتي بابا

ساكتـه ما ارد إحس بروحي راح اتخربط مدري شبيه تميم گام من مكانـه و اجى عليه ويگول

-- روحي گعدي بمكاني و إني و مـراد راح نطلع من الغرفـة اخذي راحتج واحچي كل الموضوع وشنو دار بينج وبين امه ذكري بالتفصيل 

مـراد بسرعـة گام طلع وتميـم طلع وراه 

رجع عمـي هاشـم صاحني اجي يمهم گمت من مكاني ومشيت عليهم تقريياً اربع خطوات بيني وبينهم ما دبرت هاي الخطوات وعثرت بالجبه بس الحمدلله لحگت روحي و ما طحت بس عثرت عثره خفيفه اجاني صوته يگول 

منـاف :- الله الله 

مشيت للكرسي وگعدت عليه عمي صبلي مي و انطانيه لزمت الكلاص و إيدي ترجف 

والكلاص يلعب بيها رجع گـال

منـاف :- ما جاي اعرف تخافين مني لو من عمج لو من زوجج لو شنو الوضع ليش ترجفين هيج 

حچى هيج واشرلي بـ إيده مستفهم وانا ساكته ما ارد رجع جاوب عمي بمكانـي 

-- متوترة شويـة هسه تحچي 

منـاف :- يلا ننتظر ما عدنا شيء فارغين باقين لا شغل ولا عمل 

حچى بصوت حاد مثل الواحد ضاج وجتف إدية الصدرة عمي فهم عليه ضاج بسرعـة گـال

-- احچي بابا لا تخافين محد يگدر يأذيج كل احنه وياج 

بقيت ابچي عمي رجع يباوع عليه وصارت بينهم حركة بالحواجب ما عرفت معناها 

بس همَ واحد فهم على الثانـي ورها هوَ باوع عليه و گال

-- الظاهـر اليوم نبات هنـا ابو تميم  دقيقتين بس 

عمي گام من مكانـه و باوع عليه ويگول

-- (الـ ...) منـاف أبن اعز اصدقائي و واحد من ولدي و إني اثق بيـه ثقـه عمياء لا تخافين ولا يضل بالج أنتَ أمانـه يمه وهوَ إخوج الكبير أن شاء الله وثقـي بيه وأمني حقج راح يرجع  

حچى هيج وطلع وأنا إحس روحي طلعت وياه هبط الضغط و السكر عندي من الخوف لـيش كل هذا الخوف ما أدري اول ما طلع عمي گام من مكانه واجى گعـد گبالي طلع جكليته من جيبة و انطانيها 

ما اخذتها بقى ماد إيده يريدني اخذها بس ما اخذتها من شافني ما اخذتها حطها على الطبله الگبالنا و يگـول

--  راح اسأل سؤال واحد وإذا بقيتي ساكته وما جاوبتي ارفعج فلقة و داعت أمـي 

رفعت راسه عيوني صارت بعينه باوع عليه معصب وشكله يسحن الروح وضايج ومن هذول الما الهم خلگ وروحهم بخشمهم

رجع گال

-- شـ إسمج 

-- يُـمن 

أبتسم و رد

-- صلاوات طلع صوتج حلـو

رجع مد إيده على الجكليته وانطانياها همَ ما اخذتها گـال

--  إذا ما تاخذينها أشمرج بالتوقيف

بسرعة مديت إيدي واخذتها من عنده ضحك و نزل راسه وراها رجع باوع عليه وگـال

-- حاكـم و واثـق راح يطلعون بس الدعوة ما تتنازلين عليها وتنفذيـن اللي اگوله حتى اليوم بنتج تنام بحظنج متفقين

هزيت راسـي بدون ما ارد رجع گـال

-- راح تتصلين على امـه و تگولين الها موافقة اتنازل عن الدعوة بس خل يرجع بنتي وگوليلها جاي اخابر عليج بدون علم امي و طلبي منها رقمـه الگاعد يخابرها من عنده

هزيت راسي بدون ما ارد گـام للباب فتحه وصاح عمي دخل عمـي و الولد اثنينهم وياه

منـاف :- جهاز والدتها جبته مو

هاشـم :- اي هذا

-- تمام تعالوا للغرفـة الثانية 

طلع للغرفـة الثانيـة وعمـي وراه وتميـم اجى عليه ويگول

-- لا تخافين احنه يمج و اليوم بـ أذن الله بنتج تتام بحظنج بس صيري قوية

و ساعدينا

هزيت راسي ومشيت وياهم همَ طبوا للغرفة و مـراد وگف بالباب ما خلاني اطب وگـال

-- ليش هيج خايفه وترجفين إذا تشوفين نفسج تعبانة وما تگدرين تحچين خلينا نرجع للبيت و باچر او غير يوم نجي

و نكمل الاجراءات لا تضغطين على نفسج 

-- لا لا ما بيه شي

-- تمام لعد لا تخافين إني وابوي و تميم وياج ما نعوفج وحدج هدي نفسج

هزيت راسي بس شني ارجف مثل السعفه وجسمي إحس صار ثلج ما ادري شبيه رجع گـال

-- ليش هيج ترجفين و وجهج صاير أصفر من شنو خايفـه تخافين ما ترجع بنتج لو تخافين من المكان 

-- اي اخاف ما ترجع و يدري بيه انا هنا بالمركز وبعد للموت ما اشوفها واخـاف من 

حچيت هيج وسكتت رجع يگول

-- ما راح يعرف بس قوي گلبج بعد من شنو خايفـه كملي 

-- من الشرطة ومن هذا صاحبكم شكلة ما يتحاجه و روحه بخشمـه خاف يحبسني 

أبستم و رد 

-- لا تخافين من اي مخلوق ما دام احنه يمج ما يحبسج ولا يتقرب منج بس هدي نفسج  

-- الله يحفظكم ويستر عليكم 

-- يلا فوتـي

طبينا للغرفة وسدينا الباب ورانا الغرفة كلش جبيرة و بيها اكثر من ميز و عليهن مثل الكمبيوتر و بيه كيبوردات اكثر من ضابط بيها و كل واحد گاعد على ميز هو جان مدنك نص من جسمه و يباوع على الكمبيوتر 

تميم جر واحد من الكراسي و گال گعدي عليه گعدت و منـاف رفع روحه و گال العمي

-- اتصل بـ الاماية وافتح المايك وانطيه الها

طلع عمي نقال امي من جيبة و خابر على عمتي بديعـة وفتح المايك وانطانية طولت يلا جاوبت

بديـعة :- الو منو

أشرلي احچي بسرعـة گلت الها

يُـمن :- انا يُـمن

بديعـة :- شعندج داگـه 

-- اريد اتنازل على الدعوة 

-- امشي لج إذا ما خليتج حتى بالحلم ما  تشوفينها بسيطة

-- عمه الله يخليج انا ياهو مالتي بـ امـي والله انا معليه بيها فدوة بس خليني احچي وياه

-- ما عنده اي كلام وياج يلا ولي 

حچت هيج وسدت النقال بوجهي دنگت راسي ابچي و منـاف اخذ النقال منـي ومدري شكتب من رساله ورسلها الها بس وصلت الها رجعت هي دگت 

منـاف :- ضغطي عليها حتى تنطيج رقمه

فتحت خط و رجعت احچي وياها گالت

-- امج تدري بيج جاي تتنازلين لو من كيفج

-- لا ما تدري 

-- وشلون ترحين تتنازلين بدون علمها

-- انا احچي وياها والله اتنازل بس خليه يرجع بنتي

-- روحي تنازلي اول مره وبعدها يرجعها 

-- خوش موافقه بس خليني احچي وياه 

-- ميريد يسمع صوتج

-- فدوة عمه الله يخليج بس احچي وياه 

سكتت شوية وراها گـالت 

-- دقيقة وارجع اتصل عليج انتظريني

قفلت الخط وانا بلعومي إحسه يبس

و جسمي سعفه يلعب بيها الهوى من گد ما ارجف حتى اسناني واحد يطگ بواحد وصوتهن ينسمع 

رجعت دگت جاوبتها

بديعـة :- امج شلون تحلين الموضوع وياها وهيَ متقبل تتنازلين

-- انا احله عليه عوفيها

-- وإذا لعبت علينا

-- لا لا ما تلعب والله انا احچي وياها هي معليها 

-- ترى محد يخسر غيرج 

-- اي اي ادري

-- زين لعد ما دام تعرفين خلي التليفون

بـ ايدج وابتعدي من امج لا تخلينا تعرف

و دقايق ويتصل رائـف بيج وديري بالج تنطين رقمه الاحد فهمتيني

-- اي 

قفلت الخط بوجهي و انا رفعت اديه امسح على گصتي رجع تميم يگول

-- يابة هاي امه إذا ما طلعت ماشية بالرون اني اطلع كلشي ما افتهم

مـناف :- جاهزين يا شباب 

ردوا نعم سيـدي رجع باوع عليه گال

-- تحچين وياه مثل ما انتَ مثل ما يعرفج لا تخلينا يحس بشي حاولي تطولين وياه بالمكالمة و اكدي عليه شلون ماخذ الابنية ومسجلها بـ إسم مرته الثانية ذكري هذا الموضوع اكثر من مره ولا تتوترين خليج طبيعية ماشي 

ما اجاوب بس اهز بـ راسي خمس دقايق

و دگ عليه رقم غريب عمي هاشم گـال 

-- لا تخافين اخذي نفسي وردي بهدوء 

گلت بگلبي بسم الله و رديت اجاني صوته

رائـف :- الـو

-- الـو

-- شلونج يُـمـن

-- شلوني وانتَ ماخذ بنتـي ليش هيج تسوي بيه 

-- ادري بروحي غلطان و تصرفت تصرف ما ينغفر بس والله تندمت على هذا التصرف يُـمن تدرين بيه كلش زيـن تجيني ساعـة افقد بيها اعصابي و اتصرف بـ أستعجال وبس اهدى اتندم 

-- اي ادري بيك بس مو هيج مو الهاي الدرجة تاخذ بنت النفاس و تمشي بيها حرام عليك 

-- حقج عليه بعد ما تنعاد

-- شوكت تجيبها راح اموت 

-- شلون اجي واجيبها وانتَ رافعة عليه دعوة وساجنه أبوي وأخوي

-- راح اتنازل بس رجعليها 

-- گتلج ارجعها والله بس شلون ارجع

و اسمي مطلوب يمهم 

-- هسه اروح اتنازل بس انتَ وينك صدگ مسافر 

-- لا ما مسافر شلون اسافر بيها حتى جواز ما عدها

-- چا وين اخذتها ورحت 

-- ما رايح بعيد 

-- رجعليها عليك الله و اليوم اروح اتنازل 

-- اول ما تتنازلين تلگينها يمج

-- بس انتَ مسجلها بـ إسم أديان ليش هيج تاخذها وتسجلها بـ إسمها وانا ما ادري حرام عليك تسوي بيه هيج هيَ بنتي انا الخلفتها 

حچيتها وبچيت رجع گال

-- سجلت الولد بـ إسمج والابنية بـ إسمها 

لان ادري بيج گلبج طيب و ما تحچين ادري بيج ما تكسرين بخاطرها انتِ الله رزقج وعندج بعد فرص هواي تجيبين غيرها وتعوضينها بس هيَ ما تگدر تحبل طول العمر و ما توقعت الولد يموت ابد والله لو ادري بيه يموت ما سجلت الأبنية بـ إسمها

-- وشلون هسه تضل بـ إسمها لو ترجعليها 

-- لا ما تبقى راح ارجع اسجلها بـ إسمج 

-- وإذا ما رضت أديان

-- مو بكيفها حتى ما ترضا هاي بنتج مو

بـ نتها حتى تعترض

مـناف أبتسم و أشرلي بـ اصبعه الابهام بمعنى عفيه و عمـي يأشرلي ارجع اكمل حچي وياه

-- هيَ زينه ترضع تنام لو تبچي

-- زينه و صايرة نسخة منج حتى نفس الهدوء مابيها أذية ابد

متت من البچي وانا اسمعه يحچي بيها رجع يگول

-- لا تبچين إني أسـف والله ما ادري شلون هيج تصرفت والله ما ادري شجاني وغلطت هذا الغلط

-- ديروا بالكم عليها الله عليك

-- إذا جبتها اليوم و اجيت ترجعين وياي

بسرعـة رفعت راسي اباوع عليهم كلهم آشرولي بنفس الوقت بـ اي رديت عليه

-- اخاف همَ ترجع تعذبني مثل گبل وتضل كل يوم والثاني تاخذ الابنية مني 

-- لا والله ابد بعد ما اخذها 

سكتت ما رديت رجع گـال

-- مشتاقلج 

إحس روحي صخنت من المستحه متت بدمي راح يسولف سوالف مالها معنى گدام هاي الزلم كلها وين اشرد واضم روحي ياربي ضليت ساكته ما اجاوب رجع گـال

-- لا تسكين احچي ولو اني حتى سكوتج مشتاقله 

الولد الگاعد على المكتب أشر المناف

و مناف بسرعة أشرلي انهي الاتصال رجعت گتله

-- راح اروح 

-- وين ترحين 

-- احچي ويا امي حتى اتنازل اليوم 

-- وإذا ما قبلت ومنعتج 

-- لا انا اقنعها ما تحچي شي

-- ماشي وياج رجعي انطيني خبر و لا تفتحين موضوع هذا الاتصال يمها ابد ومسحي الرقم من التليفون

-- اي 

-- يلا حبيبتي الله وياج

قفلت الخط و انا اگول بگلبي لا لله الا الله 

تميـم :- من وصلت السوالف الغزل حددتوا المكان جان انتظرتوا فد دقيقة نسمعه شلون يـ (.....) 

منـاف :- وين گاعد 

-- بغداد سبع ابكار المحله...  الزقاق..... 

-- جيد جداً تميم جهزوا نفسكم و طلعوا عليه قبل الساعة اريده هنا يمي هو ومرته 

تميم طلع سريع و مـناف وعمي گاموا طلعوا  وراه مـراد بقى وياي لحد ما گمت وطلعنا سوى رجعنا الغرفة بس طبينا مـراد حچى وياهم

-- إذا ما تحتاجونها بعد راح اخذها للبيت 

منـاف :- لا ما نحتاجها بس التليفون بقوا هنـا احتمال احتاجة 

هـاشـم :- تمام ، يلا بابا رجعي ويا مـراد إني راح ابقى انتظرهم لحد ما يرجعون

وان شاءالله خلصت 

طلعنا انا و مـراد من المركـز ومشينا على الشارع مراد استغفر و گـال

-- نسيت السويج مال أبوي ما جبته تعالي انتظريني هناك ثواني اجيب السويج و ارجع 

اخذني و گفني على جهه بين ما يجيب السويج و يجي ويا ما راح بس طب للمركز وراه بثوانـي طلع منـاف من الباب و اجى يمشي بـ اتجاة الكراج  مال السيارات وقبل لا يوصل للكراج لازم يفوت منـي لان انـا صايـرة بالنص بس وصل يمـي و گف  باوعلي و سأل

-- ليش واگفـه هنا مـراد وين 

-- راح يجيب السويج من عمي 

-- زين ديري بالج من الشارع 

حچى هيج و مشى صحت وراه ومدري شلون اجتني هاي القوة وعساها لا صارت عندي هيج قوة 

-- اگلك 

دار عليه يباوع وأبتسم ورد

-- گليلي 

يُـمن :- الف رحمه على والديك ربي يستر عليك وعلى أخواتك و يوگفلك بكل يوم وكل ساعة ولا يخليك بشده ان شاءالله 

رجع أبتسـم مره ثانية أبتسامة حسيتها صدگيه وطالعه من گلبه و رد

-- خادم إني 

-- العفو منك خادم ربك كثر الله خيرك 

من سمعني هيج گتله شكله تفاجئ

و ملامحه تغيرت ما ادري عليمن تفاجئ يمكن من لهجتي هيج حسيته 

ضل واگف بمكانـه وراها حگ راسه من فوك إذنه ورجع دار وجهه على المركـز بس ما حچى شي بقى واگف ما راح صدك ما يباوع عليه وعيونه على الشارع بس انا متت إحسه جاي يشوفني بدون ما يباوع عليه شلون ما ادري هيج حسيت لحد ما طلع مـراد واجى علينا 

مشوا اثنينهم للگراج هو فتح سيارته ومـراد فتح سيارة عمي وصعدنا بيها 

ومثل كل مره صعدت انا وره استحي اگعد يمهم بالصدر ويا ما سديت الباب شفته يباوع علينا مستغرب گعدتي وره مو يم مـراد 

مشينا بالسيارة ومن فتنا من يمه قريب دگله مراد هورن وگـاله 

-- مشكور سيدي تعبانك

-- بالخدمة باشا 

-- في أمان الله 

-- الله وياك

رجعنا محد بينا يحچي اثنينه ساكتين بس انا گلبي يسولف وحده وافكر شلون إذا ما لگوا شلون إذا ما رجعت بنتي وبعد ما شفتها حطيت راسي على الجام وضليت اتخايل شلون يرحون و يلزمونه وياخذونها من يمه و يجون يجيبونها الي و شلون احظنها و اشمها و انومها بحظني رحت بغير عالم وانا اتخايل وسارحه بخيالي لحد ما فززني من الحلم و طلعني من الخيال مـراد و هـوَ يگول

-- اگول يُـمـن انتِ شـ مخلصه دراسة

عدلت گعدتي و ورديت عليه

-- سادس أبتدائي

-- شگد مواليدج

-- 92

-- ليش مترجعين للدراسة وتبدين حياة جديدة وكل الفات تنسية وتعتبرينه أمتحان مريتي بيـه واستفاديتي من عنده 

صفنت ويا شلون ارجع وانا وانا صار بالاربع سنين مبطله ياهو يرضا يرجعني يا مدرسة ترضا بيه رديت عليه

-- يا مدرسة ترضا بيه وانا مبطله صار اكثر من اربع سنين

-- تقدمين خارجي مو بالمدرسة

-- شني هذا الخارجي

-- أمتحانات وزارية يقدمون عليها المثل وضعج التاركين الدراسة من فترات طويله اول شي يصير اختبار حاله حال الوزاري  يسمونه تمهيدي و إذا تنجحين ترجعين تمتحنين حالج من حال طلاب المدارس

بـ اخر السنه بكلوريا 

-- يعني يخلوني أمتحن

ضحك ورد

-- اي يخلونج وهمَ الممنونين 

-- ما ادري والله 

-- راح اسألج واشوف الوضع وإذا تستحقين هذه السنه التقديم اجيبلج الكتب وگعدي اقري وانشغلي  بـ مستقبلج

و أستغلي الوضع المريتي بيه واعتبرية حافز تتحدين بيه نفسج اولاً وبعدها المجتمع 

سكتت بس السالفه إحسها تربعت بعقلي 

لحد ما وصلني للبيت وراح وأمي تلگتني تسأل بيه وانا اسوالف الها شـ صار وشلون خابرته وشـ حچى وياي وهيَ تدعي عليه وعلى مرتـه

ضليت گاعدة بالصاله واللوب بالي يمهم لگوا شرد جابوها من عنده اخذها وراح بيها من جديد 

الوكت ما يمشي عليه صارت الساعة بسنه 

بطني تلويني من الخوف وگلبي تگول دمام 

وجسمي يرجف اكلت اظافري كلها ولا قطرت مي حطيت بحلگي ولا هديت ضليت گاعدة وحاطه الطوشة على بطني حيل اريد الرجع يخف منها

لا خليت آية لا دعاء لا أمام لا نبي ورجعت شديت ربطتي وقريت الفاتحة الام البنين تسهل أمري لحد ما مشت الساعة ونص

و دگ نقال أمي طفرت من الصاله للمطبخ بكل سرعتي لان نقالها حاطته على الكاونتر

شلته واباوع عليه واصيح بكل صوتي 

يمااا هذا تميـم تميـم تعااااي اجت أمي تركصض اخذته من إيدي وردت 

-- الـو

تميـم :- اريد طابگ من هذا مال اهل الجنوب اليشگ شگ وياه سمجه شوي من إديج الطيبة 

أمي ضحكت وردت 

-- عساك على طابگ بس بشرني

-- ربع ساعة واني يمكم 

-- لگيتوا 

-- مو بس لگينا وحطينه البسطال بحلگه هم

-- فدوة يروح البسطالكم نفر نفر يا بعد گلبي يا الزلم 

-- الله يسلمج 

-- الأبنية وينها جبتها وياك زين 

-- اي زينه و هاي بحظني شوية و اوصل 

يُـمن :- انا سمعته گال هيج وأني گعدت گعده ما گدرت اگـوم بعد رجليه ماتت 

والدموع گامت تصب وحدها اريد بس اسيطر على روحي ماكو انتهيت 

امي لزمت ايدي و گومتني رادتني اطب للصاله ما رضيت طلعت للحوش و حتى گعده ما گعدت ضليت اخذ الحوش واجيبه يمه شـ يمشي الوكت يمه شـ جيبها گلبي راح يوگف ربي دخيلك 

لحد ما سمعت صوت سيارة طبگت بالباب ركضت سريع على الباب وأمي وياي بعده ما داگـه فتحته شفته نـزل من السيارة شايلها بـ إيده 

ركضت عليه بالشارع ما اهتميت البشر ولا اهتميت الروحي كل همي اللزمها واخذها بحظني بس شافني اجيته ضحك و انطانياها ويگول

-- على كيفج لا توكع 

اخذتها من إيدها وحظنتها على گلبي

و بچيت بچي و صرخت صريخ شلون الواحد مخرن ومحمل هموم الدنيا كلها بگلبه وهسه اجته فرصه يبچي ويرتاح 

تميـم جان جاي بدورية مال شرطة وياه كومه ضباط وشرطـة طببني للبيت والباقين ضلوا بالشارع متانينة 

گعدت بالحوش و بعدني حاطتها على گلبي و اشم بيها و ابوس بيها و دموعي فوگاها تطيح گوه اخذتها امي من حظني و گومتني طبينا جوه 

شلون اوصف حالتي ما ادري شلون اوصف شعوري ما ادري الدنيا كلها ما مكفيه فرحتي العالم كله ما واسعني 

رجعت اخذتها من أمي ومشيت الغرفتي 

اريد ارضعها ما رضت ترضع مره مرتين ثلاثة ماكو ما تقبل انوب ضلت بچي 

عفتها گلت شبعانه ضليت شايلتها

و حاظنتها حيل طبت عليه امـي وره ما راح تميـم اخذتها مني فرحانه بيها و فتحتها وحطتها بالگاع وانا لا خليت اديها لا رجليها لا بطنها من كل مكان بستها 

شهيـناز :- رضعيها بين ما اجيب حفاظات وارجع وباچر الصبح اروح للسوك اشتريلها ملابس 

گامت لبست و راحت للأسواق تجيب حفاظات وانا شلتها واحاول وياها اريدها ترضع ماكو نفس الشي لحد ما رجعت امي

شهيناز :- ها رضعتيها

يُـمن :- لا ما ترضا 

-- شنو ما ترضا خاف شبعانه 

-- ما ادري 

عوفيها عشر دقايق و رجعي حاولي وياها بس لا فطمته الصدرج وتعلمت على الممه 

صخام بعيونهم كون 

ضلينا يمها والأبنية ماكو ما ترضا ترضع انوب گامت بچي حرنا بيها ما ندري يا حليب جانوا ينطونها ونخاف نجيب غير حليب و مو زين عليها كل شوية حلب شكل بعدهي صغيرة ومعدتها مو حمل كل ساعة نوع 

شالت امي نقالها ودگت على تميم رد عليها

-- خالتـي الصاكه أمر خدمة

-- متشوف النا هذا النگس يا حليب جان ينطي للطفلة جاي تبچي جوعانة وما نعرف نوع الحليب و اخاف اجيب الها غير شي

و تروح تتأذى

-- هسه اشوفه هيَ هاي اني بعدني ما عندي شغل وعمل تالي عمري اسأل على انواع الحليب و الحفاظات

-- هههه ما عدنا غيرك لعد شأنسوي 

-- هسه وصلت للمركز بس افوتله واخابرج 

قفله من عنده وامي گامت سوت كنداغ 

واجت شربتها شربتها بخاشوكه جاي شو هاي شربته ميته من الجوع امي باوع عليه وگالت

-- الله لا ينطيهم هاي تعلمت علي الممه وبعد ما تريد صدرج 

حطيت إيدي على خدي و اباوع عليها ميته من القهر بحظكم وبختكم كون ان شاءالله 

عشر دقايق ورجع تميم خابر امي انطاها إسم الحليب گامت بسرعة اشترته واجت 

وصدك بس انسويلها ممه تشربها حسبي الله ونعم الوكيل بيهم 

لليل كلش واجى عمي اول ما طب گمت عليه بسته ضحك و گـال 

-- الحمدلله على سلامتها قرت عينج حبيبتي بابا 

-- الله يسلمك ويخليك ويعلي شأنك

ان شاءالله رحم الله والديك ماقصرت 

-- واجبي هذا انتِ بنتي 

شهينـاز :- شنو الأخبار تميم ما حچى شي جان مستعجل 

-- جابوا وشمروه بالسجن 

-- ومرته 

-- وياه 

-- حققوا وياهم لو بعدهم

-- بعدهم القضية يم منـاف و منـاف قبل لا يوصلون للمركز طلع فـ بقوا على باچر بس تميـم ضاربة هناك بالبيت اول ما واصلين

-- بعد إيدي انتَ شفته 

-- اي شفته

-- هم حچى شي وياك 

-- لا إني من بعيد شفته واصلاً دخلوا مكلبجينه وسادين عيونه يعني ما شافني

-- عسى لا شاف ولا وگف على حيله 

-- و واثـق و حاكـم طلعوهم 

-- لا كلهم بقوا على باچر وابشرج تميم عزم منـاف باجر على طابگ وسمج 

-- ههههه يااا وين الحگ باچر 

-- بعد شـعرفني اول القوا القبض على رائف اتصل تميم على منـاف و عزمة گاله لزمنا  وبهاي المناسبة باچر نتغده طابگ وسمج على حساب ابوي

-- هههه ديله بله 

بقوا گاعدين بالصاله و انا گمت للغرفه وللصبح ما غمضت ونمت ضليت مگابلتها وگاعدة وكل شوية احمد ربي واشكره انوب للفجر كلش مدري شلون و غفيت 

والساعه بثمانية گعدتني أمي تريد تروح للسوك تجهز الغده و تخاف لا ياسميـن تگعد وما اسمعها

بدلت هدومها وشربتها ممه و رجعت نومتها بين ما تريگنا وكملنا طلعت هيَ وعمي للسوك يتسوگون ضليت بس انا بالبيت 

نظفته كله وغسلت المواعين وطبيت سبحت و كل شوية اجي اباوع عليها ما مصدگه عيوني بين ما اجوا من السوك 

جايبين المسواك و هدوم كومه الياسمين 

وكل احتياجاتها مسويلها جهاز من جديد

سبحتها أمي و بدلت الها و انا سويت الها ممه وگعدت ارضع بيها من كملت ممتها نامت شلتها على جربايتي و غطيتها وطلعت ويا أمي

شهيناز :- شلون ورطة ورطني هسه شلون اسوي الطابگ واني ما عندي طابگ اصلاً

-- سوي بس السياح بالطاوة و اشوي السمج 

-- بدون طابگ

-- اي على الطباخ سوي 

-- خاف عيب وهو عازم الولد عليه وانوب عمج عزم أبو وياه

--لا مو عيب هو نفس الشي ما يختلف

-- يلا لعد رتبي الطرشي والخضره 

گعدت انا ارتب بالنواعم الطرشي والرگي والخضره و البصل وأمي بالغده تميـم ومـراد اجوا وگاعدين ويا عمـي بالديوانية

وانا وامـي بالمطبخ نشتغل لحد الساعه

بـ 12 الا ربع اندگ الباب 

طلع مـراد يفتح الباب و عمـي وتميـم وراه 

وانا وامي نباوع عليهم من شباك المطبخ 

شفت رجال اكبر من عمـي بشويـة طب وعمي والولد يرحبون بيه وراها طب منـاف وهاي اول مره اشوفه بهدوم غير هدوم العسكرية لابس بنطرون كابوي و قميص  أسود وشكلة هيبة ومرتب هذاك الترتيب

يتبع.... 

تكملة الرواية من هناااااااا 

لمتابعة  الرواية الجديدة زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كاملةمن هناااااااااا

مجمع الروايات الكامله 1اضغط هناااااااا

 مجمع الروايات الكاملة 2 اضغط هناااااا