مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

 رواية عــروس الجبـــايــش الفصل الحادى وعشرون والثانى وعشرون والثالث وعشرون والرابع وعشرون والخامس وعشرون بــقلم يـــاســـة الموسوي 

رواية عــروس الجبـــايــش الفصل الحادى وعشرون والثانى وعشرون والثالث وعشرون والرابع وعشرون والخامس وعشرون بــقلم يـــاســـة الموسوي 

#عــروس_الچبـــايــش 🌼

بقــلــم يــاســة الحلقة (21)

بعد كلشي انتهى وحمل غرابة وراح 

وخلص ذاك الوكت وانتهت عصريته

............................. 

عرفت الها وبعد ما كبر الروس

ولا ازعل على الما جان گمره

..................... 

عند الله الخصوم هناك يجتمعون 

وعد ذاك الوكت ما نجتمع بيهم 

..................... 

يُــمن :- انا وأمي نباوع عليهم من وره الشباك و همَ طبوا الزلمه ابو شوية اكبر من عمـي هاشـم بس مرتب هذاك الترتيب و هو نفس الشي الترتيب والهيبة والطول والجسم يصيح الأمه وابو ضابط 

طبوا للديوانية و اجانه مـراد اخذ الماي 

و مشى شويـة ورجع اخذ الجاي گـال ما ياكلون هسه يردون جاي

ضلوا يمهم بالديوانيـة وانا وأمي بالمطبخ نشتغل ونحضر كل شويـة اروح البنتي اشوفها وارجع ويا أمي اساعدها لحد ما صبينا الغده

اجوا مـراد وتميـم اخذو السفرة و الاكل

وامـي ما خلت شيء ما سوته صارت سفرة ترد الروح شالوا كل المواعين و گعدوا يتغدون و انا رجعت الغرفتي رضعت ياسمين و بدلت الها و ضليت يمها بعد

 ما طلعت

ومن خلصوا حطيت ياسمين بالفراش 

 و گمت للمطبخ امـي عزلت وياي المواعيـن و راحت للصاله ترتاح تعبت خطيه من الصبح واگفه وانا ضليت اغسل بالمواعـين واگفه وصاير بوجهي الشباك والبردة مرفوعه على النص يعني اليطلع واليطب اشوفـه ويشوفني

مدنگه اغسل و وبالي مو وياي حسبه تاخذني وحسبه تجيبني شفت منـاف طلع من الديوانيـة وراح على الباب بس ما طلع لا ظل واگف يم باب الشارع ويخابر 

ما اهتميت ضليت ملتهيه اغسل شلت الوجبه الاولى وديتها على الكاونتر

 و رجعت اغسل بالوجبه الثانية بس رفعت راسي لگيته بعده يخابر وبنفس المكان بس داير وجهه على المطبخ وعيونه عليه بس شافني باوعت عليه بسرعـه دار وجهه للجهه الثانية وكمل مخابرة 

اجيت انا ونزلت البردة حتى بعد لا اشوفه ولا يشوفني ورجعت اشتغل وره شويـة اجى تمـيم لگاني مكمله المواعين و اگفه امسح بالكاونتر گـال

-- أبو مناف يريد يشوفج

حچاها وضحك انا بسرعة رديت عليه

-- شني 

-- ههههه صديق ابو مناف قاضي وكلش ثكيل راح نرفع القضية يمه وهو يحكم بينكم وان شاءالله يگدر يحول ياسمين

بـ إسمج فـ تعالي الابو يريد يشوفج 

-- استحي 

-- افه تستحين واني موجود

حچى هيج وضحك أبتسمت بدون ما ارد رجع گـال

-- يلا تعاي

-- خل اللبس جبتي 

طبيت اللبس الجبه و تميم اجى يم امي بالصاله متانيني ويحچيلها على القاضي 

لبست جبتي و عدلت حجابي و رحنا انا وتميـم للديوانيـة تميـم طب وانا گفت بالباب استحي اطب باوع عليه و يگول

-- تعاي 

ضليت بمكاني متبسمره شلون اطب استحي يربي رجع اجاني صوت عمي هاشم يگول

-- تعاي بابا لا تستحين 

طبيت وانا گوه امشي هو ماكو شي بس انا استحيت منهم عود حچيت بيني وبين روحي و گلت عيب خليني اسلم عليهم ما يصير اطب بلا سلام رفعت راسي عليهم جاي اگول السلام عليكم ويا ما رفعت راسي صارت عيني بعيـن منـاف گاعد گبالي و يباوع عليه وبدل ما اگول السلام عليكم گلت 

-- شلونك 

سلمت بس عليه والباقين ضلوا چا غير تمنيت الگاع تنفتح و اضم روحي بيها من الفشله هـو ضحك ورد 

--إني زين انتَ شلونج 

اجيت ابچي متت بدمي من الفشلة والباقين كلهم ضحكوا درت وجهي على عمي شفته يضحك رديت 

-- عود جاي اگول السلام عليكم والله غلطت بالغلط 

هـاشـم :- ههههه ما صار شي هذا عمج أبو الـ (...) منـاف 

حسـن :- اهلاً بابا حبيبتي شلونج 

يُـمن :- الحمدلله ، الله يسلمك 

هاشـم :- گعدي بابا 

گعدت بصف عمـي هاشـم و همَ گبالي صايرين الرجال يباوع عليه و مبتسـم 

و مـناف شال نقـاله من الطبلة وضل يگلب  و الرجال گـال

-- شلون صحتج ان شاءالله زينه

-- الحمدلله ، الله يسلمك 

-- بنتج شلونها شلون وضعها صحتها

-- تبوس إيدك 

 منـاف بسرعـة رفع راسـه باوع عليه وراها أبتسم أبتسامة خفيفة و رجع يباوع بالنقال 

ابوه ضحك و رد 

-- الله يحفظج ويخليج 

هـاشـم :- عمج حسـن من اعز واقرب اصدقائي اني وياه عشرة عمـر صح تجينا فترات واحد يغيب عن الثاني مده طويله بس اول واخر نرجع و نگعد و نلتقي و مثل ما هـو صديقـي و امون عليه اكيد عنده اصدقاء ثانين يمـون عليهم و احد من هذول اصدقائه قاضـي من القضاء المحترمين اللي الهم اسمهم و مكانتهم راح يحچي وياه ونحول قضيتج يمـه حتـى نگدر نرجع ياسـمين بـ إسمج 

-- رحم الله والديكم الله يخليكم ويحفظكم 

حسـن :- والديج الرحمة حبيبتي ، من بعد ما ترجعين الطفلة بـ إسمج ناوية تتطلگين من عنده لو ترجعين وياه فهميني حتى اعرف اتصرف 

سكتت ما ادري شـ اريد يعني من بعد كل السواه بيه عود ارجع واكمل وياه اله تسودنت رجعت اباوع عليهم لگيتهم كلهم يباوعن عليه يردون يسمعون ردي گـال تميم 

-- شو سكتتي لا تجلطيني ولج ناوية ترجعين 

-- لا لا ما ارجع بس 

هاشـم :- بس شنوو يُـمن لا تخبلينا عندج نية ترجعين ؟ 

مـراد :- شبيكم وياها انطوها مجال تحچي مو هيج على كيفكم وياها 

سكتوا محد منهم رد بس يباوعون عليه رحع مـراد گال

-- تخافين يرجع ياخذ بنتج منج مو

-- لا 

-- لعد شنو 

-- اخاف يگول الاعمامي عليه و يرجعون ياخذوني هناك للچبايش 

تميـم :- يا عمام هذول غـاز ويحلم يطلع من السجن بعد 

حسـن :- لا تخافين بابا ميگدر يسوي شي ومستحيل يگدر يأذيج بعد واصلاً إذا ثبتت عليه التهم ميطلع من السجن هوَ والخمس سنين حالياً يعتبر عليه قضيتين  خطف و تزوير فلا تشيلين همه 

سكتت ما رديت بس انقهرت عليه هواي خمس سنين هوَ هم مرات تطلع منه سالفه زينه وياي وجان يدافعلي ويتعارك وياه امه من يشوفني اتعب بشغل البيت ويطگ أديان إذا تحچي عليه وتعاركني 

وحتى غادة جان شاد وياها الخاطري لان 

ما تساعدني وفوك هذا كله گعدنا واكلنا وشربنا و نمنا و سولفنا سوى وابو بنتي ما ينطيني گلبي اسجنه واضيع عمره خطيه 

رجعت گتله

-- انا ما اريده ينسجن هيج هواي خطيه 

مهما صار يبقى ابو ياسميـن و بيوم من الأيام جان ستر وغطا عليه 

حسـن :- بارك الله بيج فعلاً بنت اصل 

بعد كل اللي سواه بيج وهيج تحچين لعد  شگد بنت اوادم ومرباية

-- رحم الله والديك 

-- هسه احنه بالاول نرجع الطفلة بـ إسمج

و نخلص جزء من المشاكل ونصفي الوضع وياه وراها عود سهله نحلها إذا ما تردينه ينسجن ما ينسجن لا تشيلين هم 

هاشـم :- اول شي خلينا نحول الطفلة

بـ إسمج ورها نطلگج والباقي عود نحله

سد مناف نقاله و حطه على الطبله و باوع التميـم و گال 

منـاف :- إني باچر ما اگدر اجيكم عندي شغل فـ انتَ الصبح اخلي سبيل حاكـم واثـق و عگب باچر نشوف وضعه رائـف

تميـم :- يعني حتى باچر ما نحقق وياه 

-- اليوم بالتسعة بالليل دخل عليه شاهيـن وصلاح يحققون وياه ويدونون اعترافاته بالكتاب وعلى عگب باچر اجي اشوف الكتاب ونرفعه للقاضي من بعد ما يحچي وياه ابوي  

رجعوا يسولفون سوالف عادية مو يم سالفتي و انا احس بروحي سبحت من المستحى شعندي بنصهم باوعت العمي هاشـم وحچيت على كيف 

-- اروح بعد 

-- شنو ما اسمعج

-- اگوم اروح بعد 

-- اخذي راحتج 

گمت من يمهم طلعت واول ما طلعت أخذت نفس طويل يمه اختنكت شيخلصها يا ربي اضل هيج كل شوية طابة وگاعدة بنص الزلم 

رحت الامي لگيتها جايبة ياسميـن يمها وحاطتها گبالها بالگاع وفاتحه گماطها اول ما طبيت استلمتني تسأل شـ حچينا

و شگلنا وانا اجيت گعدت يمها وارد عليها  ومن كملت اسألتها گالت

-- اشو ما عاجبتني احسها خامله فد مره

-- يعني شني 

-- ما ادري احسها مو نشيطـة

-- بعدهي طفل نفاس وينها وين النشاط

-- وإذا نفاس لازم يصير عدها شوية نشاط عاد تحرك اديها رجليها اشو فد مره خامله 

-- لا تخوفيني فدوة هـوَ رائـف گال هادئه مثلج ما بيها صوت يعني هذا مرض

-- لا تخافين ماكو شي هيج احچي ما بيها شي ان شاءالله 

شالتها گمطتها و انا ضليت بس اباوع وگلبي يرجف من الخوف شبيها ليش امي هيج تحچي 

شوية وسمعناهم راحوا وعمـي والولد يرحبون ويودعونهم بيهم وهمَ يتشكرون منهم على العزيمة 

عمـي رجع طب علينا فات الغرفته يرتاح وتميـم ومـراد راح امي فاتت وره عمي 

وانا شلت بنتي و رحت للغرفه مالتي بس حچي امي موتني من الخـوف 

خلص هذا اليوم و الوضع هادئه وانا ملتهيه بـبنتـي وثاني يوم عمي گال طلعوا واثـق وحاكـم و محققين وياه رائـف 

ومعترف الابنية بنتي و هو ماخذها ومسجلها بـ إسم مرته بدون علمـي ومتعرف ماخذها مره ثانيـة و ضامها عليه أسبوع كامـل 

والليل عمـي هاشـم وأبو مناف راحوا للقاضي و گعدوا وتفاهموا وياه وحچوله 

كل السالفه حتـى على عمـي غـازي وسوالفه وياي والقاضي كلش خوش إنسان و بنفس الوكت صاحب ابو مناف يعني الشغله كلها صارت الصالحنه وميه بالمية القضية بصالحي

واليوم ينرفع الكتاب للمحكمة حتى يحدد موعد المرافعة على مود يحولونها بـ إسمي 

گعدت من الصبح و كل شوية اباوع للساعة اريدها تمشي حتـى ترجع

بـ إسمي الي وحدي 

اجيت عليها شلتها بدلت هدومها وحفاظتها ورضعتها و سويت الها عوافي

ونومتها وگمت طلعت يم امي بالمطبخ تسوي غده 

هي تشتغل وانا گاعدة يمها ونسولف على المدرسة طلع مـراد هم گايل الها وهيَ مكيفه و تشجع بيه تريدني ارجع اقرأ 

رجعنا گعدنا بالصاله و كل شوية اروح اشوف ياسمين و ارجع يم أمي نكمل سوالف على المدرسـة والامتحانات 

وقبل لا نتغده امي گالت شوفي بنتج بيـن ما اصب الغده رحت عليها بعدهي نايمة رجعت لگيت امي صابه الاكل گعدنا على السفره اول لگمه حطيتها بحلگي غصيت بيها شلون غصيت ما ادري بس نفسي انگطع و عيوني نطت احس متت والگمه وگفت لا اگدر اطلعها ولا اگدر ابلعها احسها وگفت بنص بلعومـي

امي بقت ادك على ظهري و انطتني ماي وانا متت حتى زرگه صرت عفت الاكل وگمت نفسي مگطوع طبيت الغرفتـي وتمددت بجربايتي مختنگه و ياسمـين يـمي 

افتريت اباوع عليها و مبتسمه وانا اشوف وجهه شلون حلو وناعم حطيت ايدي جواها وجريتها الحظني وبقيت اشم بيها 

وامسح بالايد الثانية على وجهها بـ أصبعي 

طولت وانا اسويلها هيج انتبهت عليها شو  ما تحوس ولا تتحرك ولا تحس رجعت احرك ايدي عليها بس شوية اسرع نفس الشي ماكو اي ردت فعل 

گعدت گعده و شلتها واهز بيها وماكو لا حس ولا نفس ضربتها على وجهها خفيف ما تتحرك صرخت بصوت عالـي

-- لااا يا الله ولج يماااااااااااا لحگيلي يمااااا

اجت امي تركض على صوت صريخي اخذتها من إيدي تضرب بيها تحرك بيها وماكو لا حس ولا نفس 

طلعت امي تركض بيها وانا اركض وراها 

الشارع فارغ ماكو سيارة و اثنينه نركض لحد ما واحد بسيارة خصوصي طبگ علينا وصعدنا ما اتذكر شلون وصلنا وشلون مشينا لحد ما شفت روحي بالمستشفى

والدكاترة تلگونه اخذوها من ايد إمي 

بس فحصها الدكتور ما طول بيها دقيقة وحده ورفع راسـه علينا و گـال 

-- العمر الكم الطفلة متوفيه من قبل ساعه 

انا سمعته گـال هيـج وانا افترت الدنيـه بيه وطحت بالگاع بعد ما شفت شيء ولا حسيت بشيء

ومن صحيت لگيـت روحي بعدني بالمستشفى بس نايمة بردهت النساء ومعلگين مغذي بـ ايدي و أمي گاعده يمي وتبچي 

صحيت و تذكرت كل شي بچيت و لطمت 

و ملخت روحي لحد ما تعبت ردت بس اشوفها مره ثانية ردت اگوم امي والنسوان الباقيات ما يخلني اريد بس اشوفها ماكو ما گدرت وما شفتها وراحت مني للأبد

طلعوني من المستشفى للبيت وانا والميت سوى إذا اگول تخبلت وتسودنت وعقل ما ضل بيـه تعتبر قليلة وما توفي وصف الحاله الأنا بيها

ماكو اصعب من هذا الإحساس وهاي الخسارة تعبت بيها وتعبت بفراگاها ومن رجعت الحظني رجعت خسرتها من جديد وهاي المره للأبد

اعتكفت بغرفتي لا اطلعت ولا اگعدت بغير مكان والليل ونهار بالغرفـة گاعدة ولازمه هدومها وابچي امي شگد تحچي وياي وتتوسل بيه و عمـي هـاشـم و حتى الولد مـراد و تميـم اجوا وحچوا وياي بس ما فادت ولا گدرت اخطي خطوة وحده برى غرفتي بس بوكت الحمام اگوم وارجع بسرعة

بُـرهـان اجى و گعد ويا عمـي هاشـم بالأستقبال و حاول يشوفني بس ما طلعت ولا حچيت وياه ولا شفته تالي دز بـ إيد عمي سلامه وسلام عمي حاكـم واثـق وتعزيتهم 

شهريـن كامله انـا معزوله وبغير عالـم ما اشوف احد ولا اريد احد مخلصتها عبادة وبچي على فراگـها وكل يوم اتعب اكثر 

من القبلة  والليل بطوله ما انامـة باقية اتگلب مثل السمجة المهورشة 

لحد ما عدت شهـرين ونص وبيـومها صليت الصبح و من كملت سجدت

و بچيت قوي بچيت بچي وجع بچي ظلم وقهر ما شفت من حياتي غير بس الأذية والظيم والظلايم تيتمت وانا صغيرة

 و تزوجت وانا صغيرة انحرمت من شبابي وطفولتي ودراستي وصحتي و جهالي وما عندي طاقة بعد گلبي جمر ما يبـرد يوم وره يوم تزيد النار بيه

بيـومها طلبت من ربي بس يبرد گلبي ويكتبلي السكينة والأمان تعبت وبس هو القادر ضاگت بيه وهو وحده صاحب الفرج 

ما عندي غيره هو ملجأي بكل مكان وكل زمان 

طلبت يصير دكتوري و علاجي و أمني وأماني وصديقي و ونيسي ذبيت حملي وكل طاقتي بين إديـة ردت من اگـوم من هذا مكان كون انا غير وحده وگلبي خفت حرورته ردت القوة منه وانا بعز ضعفي 

ضليت ساجدة وابچي واشكي وراها گعدت ورفعت راسي للسماء واحچي وياه واشكيله كل شي مريت بيه وعشته سولفتله كل المريت بيه و ادري بيه يدري بالصار بيه وجان هو الشاهد الوحيد بحالي بس رجعت احچيله واشكيله لحد ما تعبت وبعد ما گدرت اقاوم نعست وعيوني تعبت من البچي تمددت بمحرم الصلاة و نمت على المصلاية وانا اطلب من ربي الفرج 

ثاني يوم من گعدت جبرت روحي اطلع واگعد بالصاله وياه امي و باليوم البعده جبرت روحي اوگـف واساعدها بشغل البيت وهيج يوميه كمت اجبر روحي على حاجه لحد ما عده أسبوع انا احاول اطلع من الإنا بيه و اوگف على رجليه

 واليوم عمـي جان يمنا اجيت عليه وحچيت وياه 

-- من رخصتك عمي اريد احچي وياك

-- اي حبيبتي تعاي احچي

-- اريد اسألك على رائـف و مرته

-- شبيهم

-- وين راحوا شـ سويتولهم وين وديتوهم من هذاك اليوم وانا ما عرفت اخبارهم 

-- صعدتوا للقاضي و انحكمت مرته سنتين وهوَ خمس سنوات 

سكتت لان من زمان ادري بيهم راح ينحكمون ضليت ساكته وگاعدة يمهم بس احس مقهورة وما متنمية توصل بيناتنا الهذا الحال شويـة ورجع گـال

-- وبعد شغله ثانية لازم تعرفينها 

-- شني 

-- كملت اجراءات الطلاق وطلگج وبعد ماكو اي شي يربطكم سوى

رفعت راسي متفاجأة شو امي ما گالتلي ولا واحد منهم فتح الموضوع وياي رديتله

-- شوكت 

-- وره وفاة بنتج بـعشر أيام خلصنا كل الاجراءات و طلگج رسمي وثبتت الطلاق بالمحكمة وبعد ماكو اي شي يربطج بيه 

بس ما گدرنا نحچي وياج بالموضوع لان چنتي تعبانه تركناج ترتاحين و تسألين من وحدج يله نحچيلج 

-- ينطينك العافيـة ما قصرت وگفتك ما انساها للموت

-- بنتي حبيبتي انتِ يُـمن الحلوة الحبابة تستاهلين بس الخير والعافية 

-- الله يسلمك ويخليك

ترخصت من يمهم و رحت الغرفتي ما سويت شي بس حطيت راسي على المخده وغمضت عيوني وارد ((سبحانك لا اله لا أنتَ اني كنت من الظالمين)) لحد ما غفيت 

يوميـن جديدات مرن وانا اجبر روحي على الحياة واحاول اتقبل وضعي بس تفكيري صايره كله بيهم وبالي جاي يتعب من گـد ما افكر بيهم احس ذنبهم بـ رگبتي وهمهم على گلبي كلش چبير 

گعدت بالحوش بالحديقة وصفنت ويا روحي و احچي وياها و اگول التحاربنا عليها راحت وخسرناها اثنينه من الاول

 ما مقسومة الي اخذها وراح بيها وخلاني ابچي عليه ومن رجعتها بالغصب عنه رجع اخذها الاقوى مني ومنه هذا كله بيه حكمة وصالح ما ادري شنو الحكمة بهذا الفراك وهذا البلاء بس اكيد بيها صالح الي وربي مستحيل يحرمني منها إذا مو الصالحي كلشي بالدنيه هو بصالحنه بس احنه ما نعرف

رجعت رفعت راسي للسماء واگول 

اللهي ابد ما اعترضت على امرك وحشى 

اقنط واتذمر واعترض قبلت ورضيت 

و سلمت امري بين إديك و انتَ وحدك العالم واكيد ما تظلمني ولا تظلم اي عبد من عبادك انتَ السميت نفسك الرحمن الرحيم حشى تظلمني وتاخذ بنتي من حظني إذا مابيها صالح وخير الي انا مؤمنه بيك وبقضائك وقدرك و مسلمي امري الك وحدك ومتأكدة كل هذا خير دفين الي

طلبت منك العون و كنت نعمة العون والسند والصديق والأنيس لو لا رحمتك ما بقيت عايشة وانا بهذا العقل وهاي القوه 

لو لا رحمتك يمكن انا هسه متخبلة من العشته والشفته الف الحمدلله على كل بلاء بيه رحمه الي و مغفرة واجر كريم 

اللهي انا نويت ابدي صفحة جديدة واطوي كل الفات و ان شاءالله طلعت من هاي المحنه والشده والبلاء وانتَ راضي عني 

و مسجلها في ميزان اعمالي 

وما دامني راح ابدي حياة جديدة راح انسى كل الفات وما اذكره بعده وراح اتنازل عن كل واحد أذاني في سبيلك العفو عند المقدرة وانتَ رازقني بگلب طيب عنده مقدرة يحب الناس كلها ويحتوي الناس كلها ويعفي عن الناس كلها وانا عفيت عنهم قربة الك والنبيك وآل بيت نبيك 

گمت غسلت وجهي بالمغسلة وطبيت اخذت نقال امي و كتبت العمي رساله 

-- شلونك عمـو أنا يُـمن إذا تگدر تجي علينا اليوم اريد احچي وياك بموضوع

شوية ورجعلي 

-- تأمرين أمر بالليل اني يمكم 

وابد ما فتحت الموضوع وياه امي ولا خليتها تدري لحد ما اجى عمي بالليل 

گعدت يمه و هوَ أبتسم وگـال

-- احچي بابا شعندج من موضوع اني حاضر

-- الله يسلمك ويخليك 

شهيناز :- شكو يا موضوع

هـاشـم :- يُـمن دزتلي رساله تريد تحجي وياي بموضوع 

-- موضوع أيش 

يُـمن :- عمي انا ادري بروحي تعبتك وحملتك مسؤوليتي وانتَ ما قصرت وجزاك الله خير الجزاء وادري بيك كل هذا السويته وياي لان حاسبني وحده من  بناتك 

-- يشهد الله معزتج عندي بمعزت البنات واتمنالج الخير مثل ما اتمنالهن الخير  

-- ربي يسلمك ويخليك خيمة علينا

-- ويسلمج  و يحفظج ان شاءالله

-- اريد منك طلب اخير واتمنى ما تردني 

-- گولي ما يردج غير اللسان 

-- اريد اتنازل على الدعوة مال رائـف ومرته واريدهم يطلعون وما يكملون كل حكمهم 

شهيناز :- بدأ اللعب 

-- يما الله يخليج انا اريد ابدي حياة جديدة ما بيها لا ظالم ولا مظلوم اريد ابدي عمر جديد كون ما بيه أذية لا الي ولا الغيري الله يخليج يما لا توگفين ضد هذا القرار ادري بيج تردين مصلحتي وتريدين حقي الضاع يرجع بس بعد ما يرجع بنتي راحت يم الرحمن الرحيم و كل الايام السودة راحت ومشت و كل أذية عشتها ومريت بيها انتهت ومشت وياها اهلها اريد انام وانا ما اهم ولا اخاف ظلمتهم بهيج حكم اريد انام وما مسجل عليه ظالمة عبد من عباد الله 

هـاشـم :- ادعي من ربي يوفقج على هاي طيبة گلبج واخلاقج العالية اني فخور لان دافعتلج بيوم من الايام وفخور لان صرت وسيط وسعيت بس حتى تاخذين حقج

و راح اكون فخور من امشي واسعى حتى اساعدج تتنازلين صح ما مقتنع بالتنازل واريدهم يتعاقبون ويحسون باللي سووا وياج بس متأكد منج ما راح ترتاحين ما دام همَ بالسجن لذلك راح اساعدج تتنازلين وارجع اوگف بالقضية واسدها واريح ضمير 

-- الله يحفظك ويبعد عنك كل سوء

شهيناز :- بس ما يصير تتنازل عليه من بعد كل الضيم الشافته منه 

هاشم :- تركيها تتنازل ورائـف اخذ درس وبعمره بعد ما يحاول يأذيها ويوصل يمها

رجع باوع عليه و كمل كلامه ويگول

-- باچر اشوف منـاف لأن هوَ ضابط الدعوة واحچيله الموضوع وان شاءالله ما يصير خاطرج اله طيب

-- ربي يطيب خاطرك ان شاءالله مثل ما جاي تطيب خاطري بكل موقف

-- تددلين وتأمرين  

گمت الغرفتي و نمت وهاي نعمة من نعم ربي الرزقني بيها النوم گمت انام بكل سكينة وأمان وما افز غير ويا صلاة الصبح اصليها وارجع انام بنفس اللحظة من يوم الدعيت ربي لليوم 

ثاني يوم عمي راح المنـاف و حچى وياه ما ادري شـ حچوا ولا شلون اتفقوا بس عمي خابرني گـال على الأسبوع الجاي اخذج تقدمين تنازلي و وراها يمشون بـباقي الاجراءات ويقدمون طلب للقاضي وراها يقرر أذا يطلعهم او لا 

بهذا الاسبوع اجى مـراد وحچيت وياه حتى يجيبلي كتب ثالث متوسط و اقرأ ثالث خارجي و ثاني يوم اجى مـراد وجايب كل الكتب وياه 

بديت من نفس السوم اقرأ بكل حيلي وكل وقتي وامي فرحانه لان تحسنت وگمت اقرأ كامت تجيب اكلي وشربي يمي للغرفة وانا شاده قوتي بالقراية لحد ما بدأ الأسبوع الجديد و الصبح الساعة بالعشرة بدلت ورحت ويا عمي للمركز طبعاً امي لحد لان معترضه وما راضية بس انا جنت مقتنعه اقتناع كامل وگدرت اقنع عمي حتى يساعدني 

طبينا للمركـز وگبل بوجهنا الغرفـة تميـم سلمنا على تميـم وهـوَ استلمنا ساعة يحشش ساعة يلوم بيه وساعة يمدحني وساعة مدري يحچي وياه عمي على الشغل لحد ما انفتح الباب و طب مـناف 

عمي و تميم اثنينهم گاموا سلموا عليـه 

ورجع تميـم گعد بالكرسي الثاني وهوَ على كرسي المكتب وگـال 

منـاف :- الله بالخير 

ردوله اثنينهم رجع باوع عليه و گال

-- البقية بحياتج خاتمة الاحزان

ان شاء الله 

-- رحم الله والديك الله لا يضرك 

-- عمج گـال تردين تتنازلين 

-- اي

-- ممكن اعرف السبب لان الموضوع مو لعب قضية صعدت للقاضي و حكم بيها ليش هسه غيرتي رأيج وتردين تتنازلين 

سكتت ونزلت راسي واردد بيني وبين روحي 

يارب انطيني القوه حتى ارد وما اتلعثم واخاف اخذت نفس طويل و راها رديت 

-- قبل لا ينرفع الكتاب القاضي الدنيا حتى يرجع بنتي الحظني قاضي السماء حكم وأمر ياخذها مني من جديد وهاي المره مدى الحياة و من گعدت بيني وبين روحي عرفت كل الصار بيه هو حكمة صح ما عرفت شنو هاي الحكمة بس متأكدة ومتيقنه يقين كامل كل هاي الهوسة والأذية المريت بيها هيَ الصالحي و ربي ابد ما ظلمني بس هذا جان اختبار اليَ يريد يشوف إيماني وقوه صبري وانا قابلة بكل الأختبارات والبلاءات وبنفس الوكت اريد ابدي عمر جديد وحياة جديدة ما بيه  لا ظالم ولا مظلوم وخمس سنين من عمر شاب تروح بالسجن هذا ظلم حتى لو هو ظلمني وأذاني انا ما اگدر اظلمه و أذية بهاي الطريقة ومرته نفس الشي مهما صار تبقى أبنية و بعدهم بـ اول عمرها وحرام عليه اكسر شبابها وسمعتها بالسجن 

جنت احچي و هوَ يباوع عليه متفاجئ بردي  وتمـيم نفس الشي ساكت وصافن عليه وعمي مبتسم 

 ومن كملت منـاف أبتسم أبتسامة كلش حلوة ما اعرفت افسرها بس حسيت بوكتها سولفت سالفه بيها حظ وبخت وهوَ عجبته هيج فسرت الأبتسامة 

ضل يباوع عليه مده طويلة دار وجهه للجهه الثانية ورجع فتح المجرات مال المكتب وسدهن مثل اليريد يشتت انتباها مني حچى تمـيم وهو مبتسم ويگول

-- اريد الله يستر عليج و يعوضج الخيـر لعد شگـد متربـة، وجيرة بكصت هذاك الارعن لأن خسر وحده مثلج ومثل أخلاقج

هاشـم :- انتَ گلتها خسرها ومستحيل يگدر يعوض الخسارة هاي بيوم من الأيام 

رجع عمـي باوع على منـاف الجان يحاول بكل الطرق يشتت انتباها من عندي

و يسيطر على نظرته هاي انا الما افتهم بهاي السوالف فهمت عليه وشفته توتر 

و ما يعرف يرد عليه ويرد بس شي يلتهي بيه حتى ما يباوعلي 

هـاشـم :- سيدي تميـم مكمل كل الاجراءات مالت التنازل تگدر يُـمن توقع إذا ما عندك اضافات 

مـناف :- لا لا ما عندي اضافات 

رحع باوع التميم و يگول

-- وين ورقة التنازل انطيها توقع 

فتح تميـم الكتاب وطلع من عنده الورقه وانطانياها هيَ والقلم اخذتها من عنده 

و دنكت عليها و وقعت على التنازل 

يتبع.........

 #عــروس_الچبـــايــش🌼

بــقلم يـــاســـة الحلقة (22)

إني رأيت من العيون عجائباً

و أراكِ اعجب من رأيت عيونا

ما كنت أحسب أن طرفاً ناعساً

قـد يورث العقل السليم جنونا

......................... 

يُـمـن :- خلصت توقيع وانطيت الورقة التميم رجع انطاني البصمه بصمت بصف التوقيع ورجع ضمها بالكتاب 

هـاشـم :- شوكت ترفعها للقاضـي

منـاف :- هذا الأسبوع 

-- خيـر أن شاءالله 

يُـمن :- يصير اطلب طلب ثاني 

منـاف باوع عليه وضحك و تميم رد

-- مو ضحكنه بوجهج وزادت الطلبات كافي بعد لا تلحين 

فشت متت بدمي ادري بيه يتشاقة بس فشلت حسيت بروحي صدگ ثكلت عليهم وانوب هذا الولد غريب گاعد رجع منـاف ضحك و گـال

-- على خشم تمـيم انتِ تأمرين أمر مو تطلبين

تميـم :- الله ربج سيادة (الـ...) ينفذ طلباتج على حساب خشمي بعد شتردين 

هـاشم :- تستاهل يُـمن الحبابة الطيبة تأمر أمر وتدلل شعدنا غيرها 

يُـمن :- رحم الله والديكم الله ينطيكم الصحة والعافية 

منـاف :- اي يابـة شـنو الطلب 

حچى هيج وأبتسم رديت

-- عمي غـازي 

اول ما سمع طلبي تغيرت ملامحه شكله ما قبل وباوع على عمي هاشـم بدون ما يرد رجع عمـي جاوب بمكانه

-- اول شي نكمل من رائـف وراها نشوف غازي

يُـمن :- صح هو السبب بكل الصار بيه بس انا عفيت عن رائـف ومرتـه وما يصير اعوف عمـي وهوَ من لحمي ودمـي 

تميـم :- اصلاً هذا عمج حتى مو مهم بالحياة عليمن مطلعينه خلي جوه 

-- لا يبقى عمـي وانا بـ إسمة وحتى زحمه من الناس اسجنه 

منـاف :- رتب موضوعه وطلعه ما دام ما صاعدة اوراقة لحد الآن للقاضي 

يُـمـن :- مشكور رحم الله والديك 

هـاشـم :- الف شكر سيـادة (...) 

-- خادم إني 

-- العفو منك 

تميـم :- يُـمن بعد إخوج توسطيلي يُـمن عمج و الـ.... بلكي ينقلوني من هذا المكان كل الشغل بـراسي شو حظي يمهم جبير 

أبتسـمت بدون ما ارد وعمـي رد بمكاني

-- صير آدمي مثلك واحنه ننقلك بدون واسطه 

ضحك وباوع المنـاف رجع منـاف ردله

-- عيونك بالكتاب ماكو نقل يلا إبني اشتغل عدل 

-- الخاطر أبوي

-- ماكو 

-- الخاطر العشرة

-- ابد 

-- الخاطر يُـمن 

ضحك ورجع على الكرسي بدون ما يرد رجع عمي گال

-- هسه ما دام خلصنا من كل القضاية وبعد ماكو شي تفكرين بيه منا وجاي 

-- اي الحمدلله 

-- زيـن لعد نگدر نروح سيدي

-- اي تفضلوا بس إني اريد عزيمة بهاي المناسبة 

حچى هيج وضحك و عمـي جاوبه 

-- ادلل بالخدمة باجر غداك يمنا 

-- ههههه لا تسلم اشاقة وياك 

-- لا والله تعال وخلينا نشوفك ونشوف الوالد مره ثانية 

-- ابوي عنده شغل برى بغداد راح اجيب امي ههههه

-- هلا وكل الهلا بالعلوية ياريت والله نشوفها 

-- هههه هلا بيك و مشكور ما تقصر بس اشاقه وياكم والله اصلاً عندي شغل وماكو مجال ابد

دگ نقاله جاوب وبقى يحچي ويا المتصل ومن كمل ترخص وگام طلع بقينا بس احنه  

هاشـم :- يلا رايحين احنه وانتَ خلص شغلك وروح جيب مرتك وسوالف الزعل كل يومية بطلوها عيب مو جهال انتوا

تميـم :- ما اروح لحد نهاية الشهر 

-- ليش يابة عايف المره والولد شهر كامل ما تستحي من اهلها 

-- اريد اجددها مللتتي يُـمن تتزوجيني 

باوعت عليه واگول بيني وبين روحي شگد تافه ياربي رجع بسوالفه التعبانه من شافني اباوع عليه ضحك بصوت و عمي ردله

-- لا تضل تـ... خلص شغلك وروح جيبها 

يلا يُـمن گومي 

گمنا طلعنا و عمي ما راضي على سوالف تميـم الظاهر مخلصها هوَ و مرته بس مشاكل وزعل طلعنا من المركز رحنا للگراج شفت منـاف صاعد بسيارته ويخابر 

هوَ نفس الشي شافنا من طبينا للكراج ومن صعدنا بسيارتنا 

عمي شغل و دگله هورن يودعه ورها طلعنا من المكان كله رجعنا للبيت واكيد نفس كل مره امي تتلگاني تسأل على الأخبار وانا ارد عليها شـ صار ما صار

مشت الأيام والوضع هادئ ماكو شي يذكر 

انا ملتهيه اقرأ و امي بين شغلها بالصالون وبين البيت رجعت تروح الشغلها بس ما تطول غير ساعتين ثلاثة وترجع مو مثل قبل تخلص النهار كله هناك هسه تخاف عليه ما تعوفني وحدي بالبيت 

بعد ما سألت على رائـف ومرته ولا على عمي غـازي المهم انا تنازلت و بريت ذمتي وبعد ماكو ذنب بركتبي بعد الدوله شـ تقرر وياهم بكيفها المهم انا بعد مالهم ذنبي برگبتي 

عفت كلشي وره ظهري والتهيت بقرايتي بس جنت شويـة ضعيفة بالرياضيات لان تاركة صار فتره وهسه رجعت و منهج جديد عليه طمت احس بصعوبة گامت أمي تساعدني وتشرحلي العلميات 

وانا عليه الدرخيات اقراهن واختبر روحي بيهن 

مر الشهر والشهرين والثلاثة و وضعنا مثل ما هو عمـي مرات ياخذنا يطلعنا انا وامي 

لو نتعشة برى لو حديقة لو اللعاب ومرات امي تاخذني للسوك وياها وهيج مشت الأيام ماكو اهدأ و احلى منها  و وره الثلاث اشهر سمعت عمـي يحچي وياه أمي على القضية جان يگول 

-- غـازي من زمان طلع اول أسبوع من روحتنا للمركز و أديان هذاك الشهر طلعت و رائـف البارحه العصر يلا طلع 

شهيناز :- شعجب هسه يلا طلع شو تأخر

-- اجراءات دوله وحق عام كمله يلا طلع 

-- خاف يسويلنا سالفه انرب

-- لا اخذنا من عنده تعهد ما يتقرب عليها بيوم من الأيام 

سديت الكتاب و اخذت نفس طويل واگول

ربي ابعده واسعد ابعده عني وعن حياتي

كون حتى بالحلم ما اشوفه ولا يشوفني 

سكتوا ما سمعت صوتهم بعد وانا رجعت اقرأ و رجعت الأيام تروح وتجي وانا عايشة براحة وماكو اي شي يذكر الولد يجون يسألون علينا بيوم العمي عنده شغل ويشوفونا شـ محتاجين ما محتاجين 

وعمي شال كل احتياجاتنا ومسووليتنا وانا وامي عايشين بنص الخير والدلال والراحه بجاله هذا الإنسان الله سخره النا وعوضنا بيه عن كل التعب والأذية العشناها 

خلصت الايام هيج لحد ما صار وكت تقديـم الأمتحانات الخارجية ورحنا انا وامي المدرستي القديمة حتى نقدم بس گالوا التقديم بالتربية مو يمنا هاي بس الوثيقة مال السادس ابتدائي عدنا اخذوها لأن يحتاحونها هناك اخذنا الوثيقـة منهم

 و رجعنا للبيت

وثاني يوم انا وامي من الصبح رحنا للتربيـة

ونسأل وين التقديم وين نروح وين نجي واحد يودينا واحد يرجعنا لحد ما  طلبوا من عدنا استنساخ للجنسية وباقي المستمسكات والحمدلله جانت عدنا كل المستمسكات تميـم من يوم المشكلة  اخذهن من عمي و رائـف وجابهن انطاهن الأمي  

راحت امي تستنسخ من هذول البرى وانا گعدت على صفحة متانيتها بعدني گاعدة ودايره وجهي و اباوع على الناس التمر من يمي ما حسيت غير على بُـرهـان واگف گبالي تفاجأت شلون طلع بوجهي شوكت اجى وشيسوي هنا وهوَ باوع عليه وأبتسم

و گال 

بُـرهـان :- صباح 

يُـمن :- صباح النور 

-- شلونج اخبارج

-- الحمدلله على الله انتِ شلونك

-- الحمدلله، شعجب هناك اليوم

-- اجيت اقدم على الخارجي

أبتسم ورفع حاجبه ورد

-- هاا حلو عاشت إيدج بطلة 

رجع دار وجهه يباوع يمين ويسار وراها سأل

-- وحدج جاية ؟ 

-- لا انا وامي بس راحت تستنسخ

-- ها زين شلونج شلونه وضعج ان شاءالله زينه

-- الحمدلله زينه

-- اجيت عليكم بعد ما سمعت بـالخبر بس عمج گال تعبانه البقية بحياتج خاتمة الأحزان 

-- رحم الله والديك الله لا يضرك بعزيز

-- اشكرج الله يحفظج

-- ريـام شلونها

-- زينه وقبل كم يوم بذكرج گالت مشتاقتلج 

حچى هيج وضحك رجعت انا ابتسمت ورديت

-- تشتاق الها الجنه ان شاءالله سلملي عليها هواي هواي 

-- يوصل اترخص إني وإذا تحتاجين شي

لا تترددين بس دگيلي صح علاقتج انتهت

ويا أبن خالتي و اكيد صفحة وانطوت من حياتج بس تبقين عزيزة علينا و طول الفترة التعرفنا عليج بيها ما شفنه منج غير بس الخير 

-- رحم الله والديك وانا اشكرك على شهادتك و وگفتك وياي ما انساها طول العمر 

-- هذا واجبي 

-- اكيد خربتوا بسببي اعتذر منك 

أبتسـم وسكت بدون ما يرد عرفته خربان هوَ ورائـف ولحد الأن ما متصالحين بعده ساكت ما مجاوبني و اجت امي شفتها من بعيد تمشي وتباوع علينا وهوَ هم شافها ومن وصلت يمنا وگفت مستغربه وراها سلمت عليه رد السلام عليها رجعت گالت

-- يلا گومي نسلم الطلب 

هـوَ دار وجهه يباوع للجهة الثانية شكله انحرج من اسلوبها وياه وعرف بيها ما هاويته وانا گمت من مكاني ترخصت من عنده ورحنا طبينا جوه سلمنا الاستمارة وبصمت و طلعنا ويا ما طلعنا شفته واگف ويا اثنين زلم شوية كبار بالعمر هوَ شافنا بس بقى واگف وياهم واحنه كملنا طريقنا وطلعنا اخذنا تكسي ورجعنا للبيت وامـي بالطريق تحچي عليهم كلهم وانا بس ساكته ما ارد 

ثاني يوم اجى عمي وصاح على أمي بالغرفة راحت وراه وانا گمت الغرفتي 

شويـة واجت عليه ضايجة ومتوترة و تگول

- راح اروح ويا عمج شوية وارجع لا تفتحين الباب إذا اندك

-- وين رايحة 

-- الهذاك بيتا

تفاجأت و گمت وگفه واسأل بيها

-- شـسوين بيتا شلون ترحين هناك چا ومرته

-- هيَ مرته تريد تشوفني

-- شني هاي درت بيه متزوج 

-- اي 

-- وعادي عدها و تريد تشوفج والوضع طبيعي 

-- شمدريني اشو يگول تريد تشوفج

-- خاف تروح تكتلج هيَ وبناتها 

-- لا يمعودة هي گوه تمشي يا دوب تعين روحها انوب تكتلني 

-- شبيها گوه تمشي مكرمة 

-- لا بس تعبانة و سمينه حيل كوه تمشي

-- ديري بالج على روحج خاف كلشي يصير

-- لا ان شاءالله ما يصير شي

حچت هيج وراحت تبدل وانا ضليت متعجبه شلون قبلت و رادت تشوفها فوگاها، هيج السالفه عادية شو انا من الاول ادري بيه مو الي واول واخر يتزوج بس بيوم الدريت بيه تزوج عليه متت شلون و هيَ مأمنه بيه و عشرت عمر وياه 

و ولدها وبناتها بطولها الله يساعدها والله

نص ساعة وطلعوا عمي وامي وانا رحت گعدت بالحديقة اقرأ مثل كل وكت مخلصه أيامي بالقراية بحيث المادة صارت عندي زلاطه من گد ما شاده حيلي عليها 

خلصت قراية وگمت للمطبخ سويت طماطة و حميت الخبز و گعدت اكل رجعت عزلت البيت وغسلت الطاوة وسبحت و طلعت وامي بعدهي ما راجعه

فتحت التفزيون اباوع عليه خلصتها اگلب بالقنوات انوب شفت فلم مصري كملته للأخير وهـيَ بعدهي ما راجعة ضل بالي عليها 

گمت للنقال الثاني مالها ودورت رقمها الاول دگيت عليها ماكو ما ردت رجعت كتبت الها رساله 

_ يما شو تأخرتي بيج شي ضل بالي عليج

نفس الشي ما جاوبتني هنا صدگ خفت عليها گلت تعاركن وياها و الله اعلم

شـ صار وياها هسـه 

ضليت اخذ البيت واجيبه بالي يمها وخفت عليها لحد وره صلاة المغرب وهيَ ما جاية هنا بعد ما گدرت دگيت على عمـي ما

جاوبني هنا بعد ما گدرت بسرعـة طلعت رقم مـراد و دگيت عليه رد

مـراد :- الـو

يُـمن :- شلونك مـراد

-- هلا يُـمن شلونج 

-- الحمدلله انتَ شلونك

-- زين على الله 

-- امـي اجت البيتكم هيَ وعمـي من الظهر ولحد هسه ما رجعوا و اخابر عليهم ما يردون عليه وضل بالي عليهـم

مـراد :- لا يضل بالج ما بيهم شي قبل ساعة طلعت من البيت وجانوا گاعدين وماكو شي 

-- ها الله يريح بالك طمنتني جنت خايفه عـبالي صار وياهم شي

-- لا ماكو شي لا يضل بالج

-- يلا إذا هيج خليهم شوكت ما يشوفون المكالمة يردون عليه

-- خو ما محتاجة شي منهم بيج شي

-- لا والله بس لان تأخروا خابرتك

-- شلونج بالدراسة ماشي وضعج لو اكو صعوبة 

-- لا والله زينه وامي وياي ما عايفتني 

-- خير ان شاءالله موفقه 

-- رحم الله والديك

سديته من عنده و گمت صليت المغرب والعشة و گعدت اقرأ شوية و دگت عليه امي بسرعه رديت

-- ها يُـمن التليفون صامت ما ادري بيه 

-- ضل بالي يمج تأخرتي وما تردين حتى على عمي دگيت وماكو 

-- اجينا بالطريق و راح انجيب عشة ويانا خو ما تعشيتي 

-- لا ما تعشيت بس العصر اكلت جوعه شوية 

-- ماشي اجينا 

سديته من إمي ورجعت اقرأ بين ما اجوا عمي گعد بالصاله وانا وياها بالمطبخ سألتها بسرعه عضت شفتها ما تريد عمي يسمع سكتت وما فتحت الموضوع بعد 

لحد ما تعشينا وكملنا عمي رجع طلع وانا وياها بقينا وحدنا رجعت سألتها

-- شني الأخبار

-- طلعت تدرين بيه متزوج من اول اسبوع

-- يااا شلون تدري وساكته 

-- اي مغلسه بمزاجها 

-- شلون درت

-- ما ادري 

-- بس فهميني يعني قابلة يتزوج عادي عدها

-- اي قابلة 

-- يعني استقبلتج وگعدتن وحچيتن 

-- اي  وكلش طبيعي وعبالك مو يمها الموضوع 

-- وبناتها شفيتهن

-- اي

-- سلمن عليج 

-- اي سلمن بس البنات ضايجات مو مثل الولد وامهن 

-- اي حقهن بضوجن ، زين شعجب هسه ودت عليج شتريد منج 

-- ما ادري ما فتحت اي موضوع بس سلمنا وگعدنا گالت تدري بيه متزوج من اول أسبوع وما دام هوَ رايد الزواج وحاطه باله اول واخر راح يتزوج وما بيدها شي والگلب الهوى غيرها ما يرجع يهواها بعد

وانوب ضلت تسولف على ولدها وبناتها واني سولفت الها عليج 

-- شو عجيبة هاي المره

-- لا بس تعبانه من عمج وطلباته و كبرت بعد و تريد ترتاح فـ عافته يروح وهـيَ التهت بـبناتها ولدها  

-- والله ما ادري شو تعجبت بيها

-- بعد كل بشر وقابليته وجوز ما تحبه هذاك الحب لذلك عادي عدها الموضوع

-- اندري بيها حتى لو ما تحبه بس صعبة 

زين حلو جبيره صغيرة

-- اصغر من عمج بـ ثلاث سنين وعادية لا حلو ولا مو حلوة بس شوية متعوبه و گوه تگوم وتگعد سمينه 

-- يعني هسه تصافيتن

-- هههه هيَ متصافيه وياي من قبل لا تشوفني

-- الله يهدي النفوس ان شاءالله

شوية وگمت رجعت الغرفتي و امي راحت الغرفتها وهيج ومشت ايامنا كلش طبيعية وماكو لا زايده ولا ناقصة عايشين ومرتاحين وانا ملتهيه بالقراية وامي ملتهية بين البيت وشغل الصالون 

لحد لليلة راس السنه الجديدة عمي متواعد ويانا يطلعنا احنه وعائلته الثانيـة

بيومها بدلنا وطلعنا تعشة برى ونستقبل السنه الجديدة كلنا سوى 

طلعنا انا وامي بسيارة عمي وام تميم

 و اثنين من البنات بسيارة مراد وتميم ومرته وحده من البنات بسيارة تميم 

طلعنا من بيتنا و گفنا على الشارع القريب على بيت عمي لحد ما طلعولنا بسيارتهم وتوحدنا ومشينا وهناك من وصلنا تسالمنا واحد على الثاني 

السلام جان بينانتا عادي مو هذاك السلام القوي ولا هذاك السلام البارد لا الوضع بين الطرفين طبيعي والسلام وطبيعي بيومها گعدنا بمطعم عمي جان حاجز بيه طاوله جبيرة عائلية كلنا التمينا بيها وهنا بدأت السوالف والضحك وكلنا اليشوفنا يگول عائله وحدة وصدگ احنه عائله وحده

بس مـراد جان ما مرتاح وكل شوية ودار وجهه للباب ورجع وانوب يرجع يباوع بنقاله مو بس انا انتبهت عليه حتى اهله انتبهُ وتميم  استلمة وگام يحشش عليه 

و يگول

-- أخوي منتظر 2010 من كل گلبه قلقني وهو يباوع بساعة التليفون شكو يمعوود 

ضحك بدون ما يرد واستمر على هذا الرضع لحـد ما رفع راسه اخر مره وباوع للباب وراها أبتسم أبستامة طالعة من كل گلبه ورجع نزل راسه انا بس شفت تصرفه هذا لا ارادين باوعت على الباب بس تفاجأت وانا اشوف منـاف طب يمشي وياه ابوه ومره جبيرة يمكن امه وابنية شابـة تطلع اكبر منـي وياهم جاهل صغير عمره ما يتعدى الخمس سنوات 

ويا ما طبوا وشافوانا گبل اجو علينا 

عمي هاشـم جان ما منتبه عليهم من وصلوا يمه يلا شافهم بسرعة گام الهم 

و تميـم ومراد نفس الشي گاموا يرحبون بيهم وامه طلعت تعرف ام تميم همَ تسالمن و رجعت سلمت على امي وراها ابو گال

حسـن :- اليوم هنا

هاشـم :- اي والله اليوم الجماعة جايين يحتفلون بـ مناسبة السنة الجديدة 

حسـن :- ها سنه خير وبركة عليكم 

هاشـم :- للجميع ان شاءالله 

رجع الرجال باوع عليه وضحك ويكول

-- هاي يُـمن الحلوة هم جاية شلونج عمو شلون صحتج

-- الحمدلله ، الله يسلمك

-- البقية بحياتج ما شفتج بعد حتى اخذ من خاطرج الله يعوضج الخير ان شاء الله 

يُـمـن :- حياتك الباقية رحم الله والديك 

تميـم :- تفضلوا گعدوا ويانا

منـاف :- لا اخذو راحتكم والف عافيـة عليكم مقدماً من رخصتكم 

ترخصوا وراحوا گعدوا بنهاية المكان

 و تمـيم اول ما راحوا باوع المراد وغمزله وضحك ويگول

-- شلون صدفة حلوة 

مـراد :- هههه كلش حلوة 

رجعوا ضحكوا اثنينهم و احنه نباوع عليهم ما ندري شني السالفه سألت أمـي عمي

-- هذا مو نفسه العزمنا للغده ضابط القضية لو شبهت عليه 

-- اي هوَ نفسه 

-- شنو هاي الأبنية مـرته 

-- لا هاي اختـه زهراء 

-- والطفل أبنها

-- لا أبنه 

-- متزوج ؟ 

-- اي متزوج و عنده هذا الولد 

-- شو مرته ما جاية وياهم 

-- ما ادري بيهم بعد 

تميـم :- لا يابة يمكن طلگ

هاشـم :- منو گالك 

-- قبل سنتين سمعت بالموضوع بس بعد ما اعرف

-- ما اعتقد لان بنت عمه وعلاقتهم كلش طيبة جانت

-- ما اعرف والله بس سمعت من فتره طويلة مطلگ 

-- جوز الله اعلم 

نزلوا العشـة و بدينا ناكل وبعد ما انتبهت عليهم لان همَ گعدوا بـالنهايـة لحد ما كملنا اكلنا گمنا انا وامـي للحمـام نغسل 

فتنا قريب من يمهم عبرت امي من يمهم وانا وراها بسرعة مدلي رجله شي قليل وانا ما منتبها ما سيطرت على مشيتي عثرت بيها رجع سحب رجله سريع و گـال

-- الله الله 

باوعت عليه ضحك و رد 

-- العفو بدون ما انتبه

ما جاوبته كملت طريقـي للحمام غسلنا وطلعنا ونفس الوضع بالرجعة وره ما مشت امي مد رجله من جديد وعثرني بيها

من يمد رجله ما يخلي المقابل ينتبه ما ادري شلون مدها ما شفتها لان المكان جان ضيك بين طاولتهم والطاوله الثانية 

فـ ابد ما انتبهت عليه ولا شفته 

بهاي المره كلش ضجت و عرفته يتقصد يسوي هيج  يريد يوگعني رديت عليه بدون ما احس على روحي بصوت عالي

-- شبيييييك 

اهله باوعوا علينا وامي دارت وجهه عليه 

هـوَ أبتسم فشلان ورد 

-- شبيه 

عفته ومشيت ما رديت عليه وامي اجت وراي تسأل شكو 

-- بالروحة والرجعه يمدلي رجل ويعثرني برجليه كل رجل شطولها 

-- شنو يمدلج رجل مو عيب هذا الحچي والصياح بوجة الولد امشي عدل شعليه عدل وما توگعين الثوله مخزيتنا گدام الناس 

ما جاوبتها ورحت گعدت بمكاني بس كلش ضجت هم من تصرفه وهم من روحي لان صحت بيه واهله گاعدين وسمعوني هسه شيگولون عليه 

شوية وعمي والولد راحوا گعدوا يمهم وامه واخته اجن يمنا الكل يسولف ويحچي بس انا ساكته لا اعرف اجامل ولا اعرف احچي 

امه ورده وهذيج السوالف الحلوة ويا أمي وخالتي أم تميم  واخته دمها يخبل واندمجت وياه البنات بالسوالف و اخذت ارقامهن وانطتهن رقمها وكلش فرحانه بيهن انوب رجعت باوعت عليه وگـالت 

زهراء :- من گعدنا الهسه ساكته احچي شي سمعينا صوتج

يُـمن :- شـ احچي 

-- ههههه اي شي المهم شاركينا لا تبقين ساكته  هيج احس بروحي ثكيله عليكم

-- لا لا بالعكس والله ورده انتِ

-- حبيبتي فدوة الگلبج، ما انطيتني رقمج

-- ما عندي نقال والله بس إذا تردين انطيج رقم امي

-- إذا تحبين طبعاً

اخذت نقال امي طلعت رقمها و رديته الها 

ورجعت تسولف ويا البنات و انا وياهن صح ما اسولف بس تونست وحبيت گعدت البنات وسولفهن 

بعدنا گاعدين وشفته گام ولازم ابنه بـ ايده مشى يم ابو المطعم ويحچي وياه شوية ورجعوا هوَ راح المكانه و الولد اجه يركض ويصيح 

-- امي امي بابا جاب تيته 

ضحكت بيبيته وردت 

-- اي يستاهل فهـد الكيكة الحلوة 

ام تميم :- شگد عمره الله يخليه

آمل :- اربع سنوات

-- الله يحفظه ويخليه لعد امه ماكو شعجب 

باوعت للولد وگالتله 

-- روح يم بابا حبيبي 

راح يركض الابو و هيَ رجعت تجاوب

-- صار ثلاث سنوات من تطلگت ومن عمر سنه هو عندي اني مربيته 

-- الله يحفظج ويطول بعمرج بيج الخير والبركة

-- رحم الله والديج صح اني ما مقصرة وياه ومدللته دلال والبيت كله اله وابوه وعمته وجده كلهم ما مقصرين وياه بس يبقى الطفل يحتاج امه خصوصاً بهذا العمر

شهيـناز :- إذا بينهم طفل و الوضع مو كلش صعب والنفوس هدأت بيناتهم من بعد السنين الطويلة رجعوها الخاطر الطفل ولموا شملهم

آمل :- والله يا اختـي الموضوع انتهى عنده ومستحيل يرجعها بيوم من الأيام لو مو طفل بينهم بعد قفل عليها واصلاً لو الشغلة سهله ما طلگها جان عافها بس بعد قفل وانتهى الموضوع عنده

حچت هيج وضحكت رجعت اخته تضحك و تگول 

-- هندي وگال ناهي يعني ناهي 

ام تميـم :- الله يهدي النفوس بيناتهم 

آمال :- هسـه اگُله إذا متريد ترجعها تزوج غيرها وخلي الطفل يتعود عليها ما دام بعده صغير هسه اني عايشة وعيني عليه بعد يومين الله ياخذ أمانته منو الهذا المسكين وانتَ اغلب وقتك بالدوام بس لعبت نفسه من النسوان كلها مو بيده 

شهيناز :- عمرج طويل ان شاءالله 

اجـى مـراد مبتسم باوع علينا وگـال 

-- تعالوا هناك نحتفل بمكان واحد 

الكل گـام وانا نفس الشي رحت وياهم سوو طاوله جبيرة بالاخير اخذوها و كلنا التمينا بيها تميـم جاب كيكتنا و كيكتهم و شوية وبدأ العد التنازلي للسنه الجديدة 

ام تميـم :- قبل لا ندخل للسنة الجديدة كل واحد يتمنى امنية وان شاءالله يحقق كل امانيكم وسنه خير وبركة عليكم جميعاً

تميـم :- إني اتمنى ابوي يتزوج الثالثة 

ويكبر الطاولة هاي شو جنها صغيرة 

كلهم ضحكوا وامي ردت عليه

-- برد شرك عوفنا الله ساتر علينا تركض ورانا بعربانة مكسرة 

-- امي عادي عدها لو يتزوج عشرة صيري مثلها ولا تهتمين 

ضحكت بس ما ردت واكيد ما ردت حتى لا تجرح خالتي ام تميم ، بوكتها جانت اغنية مشتغله بالمطعم وراها طفت و شغلوا قناة الشرقية بالشاشة الجبيرة وبدأ العداد التنازلي  10 9 8 7 6 5 4 3 2 1 

دخلنا 2010 و گامت الطلاقات النارية تشتغل بالشاشة والناس اللي بالمطعم  فرحانانين و احد يبارك للثاني 

انا غمضت عيوني وحطيت ايدي على گلبي  واتمنيت ربي يكتبلي النجاح بهاي السنه والتوفيق والستر والعافية ويعوضني الخير 

ومن فتحت عيوني لگيته يباوع عليه اول ما شافني باوعتله بسرعـة دار وجهه على ابنه يوكل بيه كيك 

بقينا گاعدين سوى بس انا ابد ما ارتاحيت طول الوكت يباوع عليه و كل ما ادور وجهي عليه بسرعة يدور مني و يتوتر وموترني وياه وبنفس الوكت مـراد عيونه طايرة من مكانها و شكله كلش قلق

و متوتر وفرحان اثنينهن بنفس الوكت

ضليت اباوع عليه اريد افهم شبيه اول مره اشوفه بهذا الحال لحد ما شفته اكثر وكته مركز وياه زهـراء و هي نفس الشي كل شوية تباوع عليه و ادور هنـا شكيت جيت منـاف واهله بنفس المكان الاحنه بيه مو صدفـة واحتمال قوي بين زهـراء و مـراد علاقة وهمَ متفين على نفس المكان بس شلون صارت وشوكت ما ادري 

ضلوا سالفه تجر سالفه ونسوا روحهم لحد الساعه بالوحده ونص انا بعد طفيت اخر فترة گمت انام من وكت واگعد من وكت وهسه انتهيت اريد بس انام گمت كل شوية احط ايدي على حلگي واتثاوب 

انوب شاورت امي گلتلها انعس ردت

-- هسه نروح روحي غسلي وجهج بين ما يگومون 

-- تعاي وياي

-- وين اجي وياج هذا الحمام امشي غسلي ورجعي 

گمت للحمام غسلت وجهي وعدلت حجابي و رجعت گعدت يمهم بس عين مفتحه وعين مغمضه لحد ما كملوا حچي وگاموا طلعنا سوى و بباب المطعم واحد ودع الثاني وراها كل واحد صعد سيارته وراح 

وره يومين دگت عليه زهراء تسأل عليه وعلى وضعي و بقينا نسوالف انا وياها 

وحچيت الها اريد امتحن خارجي وجاي اقرأ وهيَ شجعتني و إذا احتاج شي اخابرها ومن هذا الحچي 

انوب گامت كل يوم والثاني ادك عليه نبقى نسولف انا وياها هيَ تبقى تسولفلي على دراستها طالبة جامعية مرحلة ثانية كلية قانون وانوب ترجع تسولف على ابوها وامها واخوها واكثر شي على ابن اخوها تموت عليه 

الابنية كلش حبابة ومرحه بس بيها طبع مو حلو تسأل هواي يعني كل كلمة والثانية لازم تسالني شي على حياتي تريد تعرف كلشي عليه شـ حب شـ اكرها بيش ساعة انام بيش ساعة اگعد وانا ارد على اسئلتها بس مرات اضوج من التدقيق الزايد، لحد قبل الامتحان بيوم خابرتني بالليل 

زهراء :- شلونها معنوياتج 

يُـمن :- والله خايفة 

-- لا تخافين انتِ بطلة واني متأكدة راح تنجحين وتتخطين هاي المرحلة بكل سهوله

-- ان شاءالله يارب 

-- وين طلع إسمج بيا مدرسة  

-- بالطالبية

-- وين صايرة هاي

-- ما ادري بس أمي راح تاخذني 

-- اي زين تسوي شـ إسمها المدرسة 

انطيتها إسم المدرسة ردت عليه 

-- الله يسهل عليج ان شاءالله 

-- رحم الله والديج 

-- يلا اخذي راحتج وراج گعده الصبح 

قفلته من عندها ورجعت للكتاب اراجع وراها نمت مثل الشهيدة من گد ما تعبانه 

وفاقده طاقه من القراية 

فزيت ويا الصلاة صليت صلاة الصبح وركعتين ثانيات تسهيل أمر وقريت الفاتحة الام البنين تسهيل عليه امري ورجعت اراجع مراجعة بسيطة وراها بدلت

 و تريكتنا انا وامي وطلعنا اخذنا تكسي لان بيومها عمي جان بهذاك بيتا ومن وصلنا للمدرسة لگينا الناس كلها واگفه بالباب انا طبيت وأمي ضلت ويا الاهالي متانيتني 

الحمدلله جاوبت وراجعت الاجوبه اكثر من مره وطلعت اول وحده فرحانه، والأمتحان الثاني عمي جابني نزلني وراح گال ساعتين وارجع عليه شگد دعيتله الله يحفظه ويطول عمره 

جاي يعاملني مثل بناته واكثر عمي اخو ابوي و انا من لحمه ودمه ما سوى سوايته 

وهذا الزلمه الغريب صارلي اهل وسند

بوكت ما اهلي تنازلوا عليـه وشمروني بنص الظيم 

خلصت ايام الامتحانات يوم امي تجيبني وتضل متانيتني بالباب لحد ما كمل نرجع سوى ويوم عمي يجيبني و يروح ساعتين ويرجع عليه والحمدلله كل الامتحانات اجاوب بيهن جواب كامل لحد ما وصلت الأمتحان الكيمياء 

بيـومها من طلعت وراجعت الأسئلة شفت روحي غلطانه بترقيم المسائل وحاله مسائله السؤال الاول بالسؤال الرابع والسؤال الرابع بالسؤال الاول وعندي السؤال الثالث مجاوبة نص ونص انا شفت اجوبتي وانا متت من البچي

امي تريد بس تسكتني ماكو گلت خلص ما انجح بهذا الدرس بقت تحچي وياي وتهدي بيه وانا ناطه من البچي

 وگفنا على الشارع نريد نأجر تكسي طبگ علينا واحد بسيارة سودة عالية ودگ النا هورن انا وامي اثنينه رفعنا راسنا انريد نشوف منو هذا نزل الجام وأبتسـم وگـال

مـناف :- الله يساعدكم 

شهيناز :- هلا بيك الله يساعدك

منـاف :- شـ جابكم هنا خو ماكو شي 

-- لا ماكو سلامتك بس يُـمن جاي تمتحن ومدرستها بهذا الفرع

-- ها خير ان شاءالله صعدوا اوصلكم

-- لا رحم الله والديك هسه ناخذ تكسي

-- صعدوا يابة قابل تبقون بالشارع 

-- ما نريد نزاحمك ما تقصر والله

-- ماكو زحمه صعدوا 

بعد امي انحرجت من عنده و گالتلي يلا 

صعدت وره وانا صعدت يمها و عيوني ناطه من البچي هو عدل مرايته و شغل ومشى

شهيناز :- صارت زحمه عليك راح نتعبك

-- خادم إني

-- العفو منك خادم ربك الله يسلمك

-- شنو يوميـه تجون هنا

-- اي والله هذا الأسبوع كله يوميه نجي

-- شعجب وحدكم الولد و ابو تميم وينهم

-- ابو تميم بيوم العنده مجال خطية هو يجيبها وبيوم المشغول اني اجي وياها والولد تعرف عدهم دوامات ومشغولين 

-- خير ان شاءالله ، الله يسهل 

رفعت ايدي مسحت عيوني ودرت وجهي علي الجام ميته من القهر والبچي گـالت امي 

-- حتى إذا ما نجحتي بهاي المادة باقي المواد مجاوبة بيهن عادي دخلين بكلوريا كافي بچي المادة الوحده ما تأثر 

ما رديت بس امسح بعيـوني رجعت امي سكتت وهـوَ ساكت من الأصل مشينا مسافة اكو واحد يبيع ماي بالتقاطع طبگ وصاح عليه اشترى من عنده ماي و مد ايده وانطاه الأمي بدون ما يباوع علينا 

شهيناز :- ياا ليش تكلف نفسك ما نريد مشكور

منـاف :- انطيها تشرب و تغسـل صارت طماطة من وره الكيمياء  

يتبـع...... 

#عــروس_الچبـــايــش🌼

بــقلم يـــاســـة الحلقة (23)

ما عاد يلفتني أحدُ كل انتباهي معك 

...................... 

انا الما اندار الصوت جرت السيف 

وعالطاري التفت لمن يجيبونك 

..................... 

يُـمن :- اخذت أمي من عنده الماي وتباوع عليه وترجع تباوع عليه مستغرب شعرفه اليوم عدنا أمتحان كيمياء رجعت سألته

-- شنو تعرف احد ثاني يمتحن خارجي

-- لا ليش 

-- لان تعرف اليوم امتحان كيمياء عبالي اكو احد من معارفك يمتحن خارجي مثلها

سكت ما رد وره شوية رجع گـال

-- عندي معارف بالتربية و البارحه جنا گاعدين وذكروا الأمتحانات گدامي وعرفت

 

أمي سكت َشكلها اقتنعت ورجعت فتحت بطل المي انطتنيا اخذته منها شربت

 و بقيت لازمته بـ إيدي رجع هوَ گـال الأمي

 

-- بعد كم أمتحان عندهم 

-- بس واحد 

-- خير أن شاءالله ، هذا ولد صديقي بيتهم بنفس الفرع البيه المدرسة وهالايام عندي شغل وياه إذا تحبون امر عليكم اوصلكم وياي 

-- مشكور رحم الله والديك ما تقصر 

-- العفو انتوا اهلنا ان شاءالله 

-- الله يحفظك ويسلمك 

دگ نقاله بسرعـة رد عليه 

-- هلا يـوم

-- شبيه 

-- انطينياه 

-- ها بابا حبيبي ليش تبچي

-- يلا راح اجي كافي لا تبچي و تعب بيبي ازعل منك إذا تعبتها 

-- صار تأمر أمر راح اجيبلك وياي بعد شتـريد غيره

-- صار من عيوني 

-- حبيبي الحلو

-- عفية بالبطل انطيني بيبي

-- ها يوم نص ساعة واجي 

-- ماشي هسه اجيب وياي عينج عليه

-- الله وياج 

قفله من امـه و سأل أمـي هوَ جذاب يعرف وامه هم تعرف بس يريد يسولف ويفتح مواضيع گـال الها

-- فهـودي البارحه اخذ لقاح برجله ومن البارحة لليوم بس يبچي و يگول توجعه هذا الشي عادي لو لا

-- هو التلقيح بصورة عامة بيه اثار جانبية صخونه و مرات مكان الجكه يورم ويبقى يوجع عادي ما عليه شي بس انطيه مسكن الالم وخافض حرارة باجر يصير زين 

-- خير ان شاءالله 

-- العلويـة شلونها اخبارها

-- الحمدلله 

-- حيل طيبة وحبابة والله إني كلش حبيتها

-- وهـي نفس الشي تذكركم بالخير دائماً

-- سلملي عليها 

-- الله يسلمج 

رجع عدل المرايـة و ضحك ويـگول

-- خلصت بچي لو بعدهي تبچي 

-- ههههه ما تخلص دموعها مستعده تبچي منا الباجر 

-- ومستعده تبقى ساكته منا الباچر 

أمي ضحكت وانا رفعت راسي باوعت عليه شفته يباوع عليه من المراية بسرعة درت وجهي و أمي ردت 

-- الباچر شنو لا مستعده تبقى ساكته لبعد أسبوع 

-- الله يحفظها 

-- ويحفظك ان شاءالله تسلم 

رجعوا سكتوا لحد ما وصلنا للبيت وگف يم الباب و امي تشكرت من عنده و نزلنا

احنه طبينا وهو راح انا بوجهي للحمام غسلت وبدلت ونمت ساعتين وگعدتني امي 

بلشت اقرأ الأخر أمتحان لزمتها لحد الليل على فـد جره جنت ارتاح دقايق اغمض بيهن عيوني امـد جسمي وارجع اكمل 

اخر شي بالليل الساعـة بـ12 استسلمت ونمت والكتاب بـ ايدي ومثل العادة فزيت الصلاة الصبح صليت وسبحت و بقيت اراجع بين ما گعدت أمي بدلنا وطلعنا

وگفنا على الشارع هواي وماكو سيارات عمـي ما جاي صار يومين عنده شغل وامي باقية تاخذني وترجعني واليوم ماكو ولا سيارة تأخرنا والوكت يمشي علينا وماكو گـالت امي

-- لو مخلين عمج مخابر على منـاف جاينه 

-- شنو يجينا مو عيب گالوا يعرف عمي وصلنا بطرية بس مو نروح نخابرة مره ثانية

-- هم صدگ 

-- ليش ما تتعلمين تسوقين وتخلين عمي ياخذلج سيارة 

حچيتها وضحكت جنت اشاقة وياها بس هيَ اخذتها بالصدگ وحطت السالفة

بـ بالها وردت 

-- والله خوش فكره راح احچي وياه 

ضحكت بدون ما ارد عليه وهيَ بقت تسولف خوش فكره وخوش فكره ونخلص من التكسي ومن الشارع 

لحد ما حصلنا سيارات تكسي أجرنا للمدرسة والحمدلله اول ما طبيت سدوا الباب لو متأخر دقيقة جان فات عليه الأمتحان 

وزعوا الاسئلة و بلشت احل واكتب والف الحمدلله جاوبت جواب كامل و راجعت اجوبتي واني ما ناقصني ولا فرع ولا سؤال وراها طلعت ادور على امي ماكو باوعت يمنى ويسرى ماكو ما شفتها

ضليت بمكاني واباوع على الشارع شنو رجعت للبيت مستحيل ترجع  وتعوفني بس وين راحت معقولة راحت للسواق هذيج تشتري 

مشيت كم خطوة اريد اروح للأسواق 

شفته اجى يمشي بتجاهي ولابس بدلته العسكرية وگفت بمكانـي جمدت ما گدرت اخطي هذا شعنده جاي وصل يمي أبتسم وگـال 

منـاف :- صباح الخير 

يُـمن :- صباح النور 

-- تعالي أمج هناك بالسيارة منتظرتج

حچى هيج وباوع بتجاة سيارته بسرعـة باوعت على السيارة طابگة بنهاية الفـرع قريب كلش على الشارع و أمي گاعدة بيها ليورة ما گدرت احچي بقيت ساكته رجع گـال 

-- امشـي 

مشيت بدون صوت وهوَ يمشي وياي بنفس خطواتي بس اضخم مني واطول مني فرق بيني وبينا من السماء للگاع وهـوَ يمشي گـال

-- جاوبتي 

-- اي الحمدلله 

-- عفية بالشاطرة 

ما رديت مكمله بالمشي  و من شافني ساكته وما ارد سكت وكمل طريقة لحد ما وصلنا للسيارة هوَ صعد وانا اول ما صعدت يم امي حچيت وياها على كيف 

يُـمن :- ليش صاعدة هنا

-- فات من باب المدرسة وشافني واگفه وما قبل اله اصعد وياه ، جاوبتي

-- اي الحمدلله 

مشينا انا ساكته واباوع على الشارع من الجامة و هوَ وأمي يسولفون بوكتها صاروا دهن ودبس و هذيج السوالف بيناتهم بما انو هوَ ضابط ويقشمر اكبر واحد فـ باگ اللسان امي وخلاها تكت الاول والأخير بدون ما تحس على روحها 

سولفتله على دراستها وعلى ابوي وعلى عمي غازي وشكد عمرها وعمري و شكد عندي اعمام وعلى عمي هاشـم وعلى الولد تميم ومـراد وعلى العشيرة كلها

 ضليت لازم گلبي بـ ايدي لا تروح تسولفه شلون شردت من اهلها و شلون تزوجت عمي غٓازي بالسر بس الحمدلله هذني الموضوعين ما ذكرتهن يمه بس الباقي

 لا كتته كت انوب رجعت  سألته شـ مكمل دراسة رد 

-- قانون

شهيناز :- ما شاء الله  و زهراء هم تدرس قانون 

-- اي تردين تصير محامية

-- ان شاءالله موفقين 

-- شكراً الموفقية للجميع ، زين السايلنت شـ مفكرة تمكل 

أمي باوعت عليه وضحكت ورجعت تجاوب

-- والله بعدهي ما مقررة بس خل تخلص من الثالث انوب تشد حيلها على السادس وراها سهله

-- الله كـريم 

سكتوا شوية وبعدين رجعوا يسولفون من جديد هو صح يسولف ويرد و يحچي بس 

سولفه محدودة بس بنفس الوكت تخلي الواحد يعترف على روحه بدون ما يحس يعني ما ادري شلون اوصفها بس عنده أسلوب يخليك تكت الاول والأخير بدون

 ما تنتبه على روحك وبنفس الوكت جدي و حسيته ما يحچي اي كلام  بس اللي يفيده يعني بس اللي يريد يوصله للمقابل 

بقوا يحچون لحد ما وصلنا للبيت امي ما خلت سالفه تعتب عليها خـو أنا حتى عيد ميلادي و يا يوم بالشهر صرت گالتله 

بقت تتشك من عنده و انا نزلت و هيَ وراي وقبل لا تسد باب السيارة گالتله 

-- جيب العلوية وزهراء وتعالوا علينا اسويلكم غده عشة 

-- ان شاءالله 

-- راح انتظركم من يصير عندك مجال تجيبهم وتجي 

-- الله كريم 

-- ومشكور مره ثانية تعبناك ويانا

-- بالخدمة 

-- رحم الله والديك 

فتحت الباب وطبيت وهـيَ ضلت تحچي وياه وراها بشوية طبت للبيت گلت الها

يِـُمـن:- شدعوة هيج حچيتيله قصة حياتنا 

-- شـ حچيت هيَ سوالف عادية ما بيها شي

-- هوَ غير ما خليتي سالفه ما سولفتي بيها بقيت لازم گلبي بـ ايدي خاف ترحين تحچيله شلون تزوجتي عمـي بالغصب 

-- مو الهاي الدرجة لا تسوينها كلش 

عفتها و مشيت للغرفه بدلت ونمت وهل نومه نومه لحـد المغرب انا نايمة ولو ما امي توگف على راسي و تگعدني فلا اگعد 

شهيناز :- گومي اكلي شربيما يصير هيج لا اكل ولا شرب بس نوم مو زين عليج 

-- انعس عوفيني

-- كووومي گلت يلااا 

غصباً عليه گمت لگيت عمي بالصالة جاي سلمت عليه رد السلام ورجع يسألني على الأمتحان وانا اجاوبه 

مشيت للحمام غسلت وراها طبيت للمطبخ لگيت الطباخ مشتغل على العشة و امي مرتبه الزلاطة و طرشي والصمون الحار ريحته تخبل جايبينه جديد اخذت الگعم و اكلته اجت امي وراي للمطبخ وتگول

-- خطيه زهراء دگت عليج مرتين وگلت الها نايمة 

-- شتريد

-- تسأل عليج وعلى الأمتحانات

رجعت توضيت و اخذت نقال امي و رجعت للغرفـة اول شي صليت المغرب والعشة ومن كملت دگيت عليها ما جاوبت شوية ورجعت هيَ خابرتني 

زهراء :- شنو ميته هذا كله نوم

-- الأيام الفاتت ما انام وهسه طلع عليه التعب 

-- هههه نوم العوافي  

-- الله يعافيج

-- بشري شلونه الوضع جاوبتي زين مو 

-- الحمدلله كلش زينه بس شوية الكيمياء خربط بالترقيم واحتمال راح اوگع بيها

-- سهله إذا بس الكيمياء المهم هسه تعبرين للوزاري وهناك شدي حيلج

-- ان شاءالله

-- خابرتج عازمتج 

ضحكت ورديت 

-- وين عازمتني

-- بيتنا وابد ما تگولين لااا البنات كلهن راح يجن حتى عبير زوجة تميم تجي 

-- الله كريم 

-- لا ماكو الله كريم تجين وياهن والله إذا ما جيتي ازعل 

-- ان شاءالله 

-- باجر على العشة 

-- ان شاءالله

-- راح اگول المراد يمر عليج يجيبج وياه البنات 

حچت بدون ما تنتبه على روحها وراها سكتت مثل النصدمت بروحها و أنا ضحكت رجعت گالت 

-- يعني مو البنات گلن اخوهن مراد راح يجيبهن گلت اكلهن يگولنله جيبج وياهن 

-- هههههه اي صح

-- يُـمن الله عليج لا تحچين والقران منـاف يذبحني إذا عرف بيه 

-- لا شلون احچي بعدين انا ادري بيكم من راس السنه 

-- شعرفج شلون عرفتي 

-- عيونكم فاضحتكم 

-- عزه بعيني بس لا احد ثاني غيرج انتبه

-- لا ما اضن لان جانوا ملتهين 

-- الله عليج لا تحچين شي والقران منـاف يموتني تدرين بيه عصبي وما يتفاهم وإذا عرف يرفعني فلقه و العباس 

-- هههههه لا والله ما احچي شلون احچي بعدين مراد اخوي مستحيل اقبل عليه ينظر

-- فدوة الگلبج والله مراد يحچيلي عليج شگد طيبة وحبابة وكلش يحبج ويحترمج

-- وانا هم أحبهم وأحترمهم أخوتي هذول الله شاهد ، بس ما حچيتيلي شلون تعرفوات شلون صارت هههه

-- ما ادري بساع بساع هاي بفترة القضية مالتج من بابا و منـاف مشوا بيها تذكرين 

-- اي 

-- اجى هوَ وابو علينا مرتين ومره ثالثة اجى وحده علي مود منـاف و وراها شفته بالجامعة مالتي وتعرفنا وصارت العلاقة

-- انا ادري بيه تخرج شيسوي جاي بجامعتح

-- اي صح بس بوقتها جان عنده شغل بالجامعة واجى عليه وتشاوفنا هناك وصار بيناتنا سلام وكلام وراها بلشت العلاقة 

-- الله يوفقكم ان شاءالله 

-- ناوي يدز اهله علينا بس اني اخاف 

-- ليش تخافين 

-- ما ادري اگول خاف يطلع نفس اخوية

 و اكل تبن وانوب بدل الواحد اوگع

بـ اثنين 

-- ليش شبيه اخوج  

-- ما بيه شي بس طبعة كلش صعب 

-- شلون من يا ناحية لان مراد ورده والله العظيم

-- اعرف بيه بس بعد الزواج اخاف الوضع يختلف ويطلع نفس منـاف 

-- لا ما يختلف الإنسان يبين طبعة من البداية صح اكو بيهم ما تعرفينهم اله تعاشرينهم بس يبقى بيهم شي مفضوح ومبين عليهم قبل العشرة

-- شي مثل شنو 

-- يعني فد تصرف او عادة اكيد ماكو واحد يگدر يمثل طول الوكت هوَ مثالي لازم يصير فد موقف ويبين وجهه الحقيقي

--  اي صح 

-- مـراد كلش حباب ومرتب ومحترم فـ لا تخافين توكلي على الله 

-- ونعم بالله بس خلينا هسه كم شهر بعد نتعرف وإني هسه هم مشغوله بدراستي وراها الله يسهل

-- الله كريم 

-- نرجع الموضوعنا مو ما تجين باچر

-- لا اجي 

-- ماشي لعـد راح انطي المراد خبر يمر عليج 

-- خوش 

ضحكت وراها سمعت الباب انفتح واجاني صوت اخوها يگول منو هذا بسرعة ردت يُـمن اختفى صوتهم اثنينهم عبالي انگطع الخط صحت الوو ردت

-- وياج حبي 

-- راح اروح اتعشة امي جاي تصيح عليه

-- تمام على راحتج سلميلي عليها

-- الله يسلمج 

قفلته منها و گمت طلعت لگيت امي جايبة الصينية بالصالة يم عمي گعدت تعشيت وياهم شويـة و عمـي گـال

-- يُـمن انتِ هم معزومة ويا البنات باچر 

شهيناز :- وين 

-- زهراء بنت حسـن مسوية عزيمة وعازمة البنات وعبير مرت تميـم للعشة بيتهم 

يُـمن :- اي قبل شوية خابرتني عزمتني

-- روحي تونسي وطلعي من جو الأمتحانات شوية 

شهيناز :- وحدها تروح 

-- البنات وياها والولد ياخذونهن وجيبونهن و همَ ما عندهم احد منـاف لو بالدوام لو طالع لو نايم ما يگعد يمهم كل وقته مشغول و حسـن حاله من حالي ما گاعد 

-- لا ما تروح شـ سوي رايحة وانوب للعشة يعني نص الليل والدنيا تخوف 

-- گتلج البنات وياها والولد ياخذونهن ويجيبونهن

-- تدري بيها فقيرة والدنيا تخوف ما اگدر اخليها تروح 

-- اي ادري بس ما رايحة المكان مو زين الناس خوش ناس والابنية بنتهم حبابة 

وبناتي وياها ما رايحة وحدها خليها تروح تغير جو محبوسة النهار كله 

امي سكتت ما حچت بعد وانا من الاصل ساكته بين ما كملنا عشانا شلت المواعين غسلتهن وسويت جاي طبت امي للمطبخ وراي و گالتلي 

-- تردين ترحين وياهن 

-- بكيفج

-- لا بكيفج انتِ إذا تردين ترحين روحي بس ديري بالج على نفسج

ضحكت فرحانه رجعت هيَ ضحكت 

و تگول

-- روحي تونسي ما دام ضحكتي معناها هاويتها للروحة 

-- اي لان ضايجة

--  لعد هذا هو روحي تونسي 

خلص اليوم وباليوم الثاني خلصنا شغلنا انا وامي من وكت و العصر بدلنا و اخذنا عمي البيتهم لگيت البنات مبدلات وامهن گاعدة متانيتنا الظاهر عمي منطيها خبر سلمنا وگعدنا 

وللمغرب يلا اجى مـراد اخذنا انا ومرت تميم والبنات اخواته اثنينهن الثالثة المتزوجة ما راحت ويانا گالن تجي ومن بيتها رجلها يجيبها 

أمي بقت بيتهم ويا أم تميم واحنه طلعنا وياه مراد ومن صلنا البيتهم تفاجأت صلاوات على محمد يخبل يخبل يرد الروح بنيان حديث و شكبره وحتى المنطقة مالتهم تخبل من هاي الراقية 

 طبگ مراد بالباب و احنه نزلنا دگينا الباب شوية وفتحته زهـراء مراد ما راح اله شافها وشافته ابتسمت على منظرهم 

و راها طبينا للبيت

الحديقة شكبرها والحوش شكبره شفت سيارة مناف بالحوش يعني هنا بالبيت ما طالع اول مره ضجت گلت خاف عيب من عنده انوب گلت عليمن اضوج قابل بس انا جاية شو كلها جاية وياي واخته العازمتنا ما جايين وحدنا  

طببتنا للأستقبال وعين النبي عليها شكبرها و شلون اثاث بيها وشلون نظافة وترتيب اجت امها سلمت علينا و گعدت شوية وراحت 

وراها اجن اثنين بنات صاحباتها بالجامعة 

همَ سلمن وگعدن بعدهن هسه گعدن

و اندگ الباب مره ثانية راحت زهـراء فتحته ورجعت هـي و بنت عمو هاشـم الچبيرة رجلها جابها ورانا 

صار اللمه تخبل كلنا موجودين و الگعده كلش حلوة اجت امها مره ثانية بس جانت لابسة تريد تطلع ما طبت يمنا من الباب

و گـالت 

-- من رخصتكم بنات اخذوا راحتكم وتونسوا البيت بيتكم إني و عمكم راح نطلع وانتن تونسن 

ودعتنا و طلعت البيت فرغ وبقينا بس احنه وحده من صاحبات زهراء إسمها 

دعاء گامت و گفت وگفـه و گالت

-- اللعب ضل البيت لمطيرة طارت بيه فرد طيرة هسه بس احنه بالبيت يعني اليوم يومنا 

كلهن ضحك وصوت الضحك صار عالي زهراء ضحكت وياهن وردت 

-- مدري شلون افتح الموضوع وياجن بس الـ.... منـاف نايم فوگ يعني مطيرة ما تگدر تسوي شي لان يطبخها و يصبها للعشة يتعشة بيها

رجعت دعاء گعدت و تگول

-- يابة هذا الحچي الحلوو خلوني اگعد عاقلة بلكي يرمقنا  بنظرة جميلة سيـادة الـ...... 

زهـراء :-  شوف هاي ولج امي الماكو مثلها ما يرمقها بنظره جميلة يباوع الها من طرف خشمة تردين انتِ يرمقج بنظرة جميلة 

-- اي ادري بيه عقدة من النسوان ابو خشم اليابس بس يمييي لااااا ان شاءالله نفتحها للعقـدة ونفتح أبوها 

رجعن البنات يضحكن مدري شنو اليضحك بس شكلهن انعجبن بحچيها الما بيه معنى

وراها گمنا للمطبخ نحضر كلنا سوى بالاكل والكل يسولف و يضحك لا انا باقيـة بس استمع الهن بس بنفس الوگت فرحانة ومتونسه وياهن 

صبينا العشة بالصالة والتمينا كلنا سوى وما اكلنا بگد ما سولفنا وضحكنا لحد ما خلصنا العشة غسلن زهراء وصاحباتها الوياها بالجامعة المواعين ورجعنا گعدنا بالديوانية گالت دعاء

دعاء :- مشتهيه اركص وافرغ كل الطاقة السلبية 

مروة :- اني هم 

دعاء :- زهـراء بشرفج شغلينا غنوة 

-- هنا ماكو قناة غنوة بس بالصالة موجودة تعالن للصالة بين ما اصعد اشوف منـاف بعده نايم لو گعد خاف يسمعنا وما يقبل 

-- يلا لعد 

گمنـا للصالة البنات يبحثن على القناة وزهراء صعدت تركض تشوف اخوها شوية ونزلت گالت نايـم بس نصن الصوت  

وصدگ طلعن القناة و گامن يرگصن دعاء ومروة صاحباتها وانا وبنات عمي هاشـم ومرت تميم گاعدين نباوع عليهن و زهراء تصفگ الهن وميته من الضحك 

وهذني اثنينهن ذبن لحم من الرگص انا فاتحة عيوني وحلگي عليهن شلون يرگصن چا شمالني مو مثلهن هم محسوبة على النسوان خرب حظي 

شدن الشالات و هذاك الرگص اليخبل حتى إحسن من هذني الطالعات بالقناة وشوية شوية اخذهن الواهس و علن الصوت وره ما على الصوت بثواني اجانا صوته من فـوگ يصيح 

-- زهرررررررراء 

زهراء خطية جانت گاعدة وتصفگ وبس سمعت صوته گامت و گعدت مرتين على السريع ما تدري شـ تسوي انوب ركضت على التفزيون طفتـه و البنات گعدن كل وحده بمكانها مدري خافن مدري استحن 

بقت زهـراء بمكانها بس صارت خضرة على صفرة من الخوف انـوب مشت فوك الدرج سوته خطوتين من گد ما صعدت سريع

دعـاء :- بس لا شافنا

مـروة :- شگد عيب هسه شيـگول علينا

عبيـر :- إني افضل نروح الاهلنا لان كلش عيب الموقف اللي صار 

نزلت زهراء وجهها صاير قوز قزح من الخوف واكيد مترزله هذيج هيَ تصيح الامها وابوها

دعـاء :- ها بس لا شافنا

زهراء :- لا ما شايف شي بس گعد على صوت الاغاني من صار عالي 

عبيـر :- خو ما حچى عليج 

-- ههههه لا ما حچى بس طيح حظي 

مـروة :- اني راح اروح كلش تفشلت والله عيب

-- لا يمعـودة والله عادي بس لان الصوت عالي ما قبل يگول عيب من الجيران 

رجعنا بالديوانية نص ساعة وراها مـروة اجاها اخوها وراحت واحنـه اجى علينا مـراد طلعنا للباب مـراد بس شافنا گـال

-- هلاوو زايدات نفـر وين احطجن عيوني

سحـر :- ضجت لان اجيت وياهن وسيارتك بعد ما تكفي من وصلت يمي 

باوع عليها و ضحك ورجع باوع الباقي اخواتها و گـال

-- يابة شلـون مشكلة راح تزعل و تبقى تبچي وتروح تشتكي الابوها وأمها وتعيش دور المظلومة، تتعاي يا عين اخوج اشيلج على ظهري إذا ما كفت السيارة 

حچى هيج وفتح الها باب الصدر صعدها هي ضحكت وصعدت و زهـراء ودعاء جانن واگفات يمنـا حچت زهراء  

-- سويهن قسمين لا تضايقون نفسكم بنفس 

ما جاوب شي بس باوع عليها ودار وجهه 

دعـاء :- خلِ وحدة من تبقى وياي ويوصلنا منـاف ههههه

كلنا باوعنا عليها وزهـراء صفنت صفنه اخت الچذب رد مـراد

-- لا ماكو داعي تكفي يا يلا بنات صعدن

زهـراء :- ما تكفيكم وطريقكم طويل ليش هذا الوزة بقوا يُـمن يمنـا و نوصلها إني

و منـاف مثل ما گالت دعاء 

مـراد :- لا ماكو داعي نكلفكم كافية عليهن السيارة

اجينا ردنا نصعد كلنا وصدگ ما تكفي هيَ صح سيارة حديثة وعالية بس احنه اربعة وما تشيلنا كلنا تشيل بس ثلاثة ليورة

 و لان عبيـر و رحمة شويـة اجسامهن تارسة صارت خنگه 

 بله انا جني عصفور مهلس وين ما يحطوني اصير بس هنَ الله يخليهن شوية تارسات واخذت المكان كلـه وما كفت 

زهـراء :- هسه ليش العناد قابل احنه غريبين عليكم البنات طريقهن واحد اخذهن سوى واني اجيب يُـمن وراكم 

مـراد باوع عليه و سألني 

-- تردين تبقين تجين وياهم لو انزل وحده من البنات بمكانج 

-- امي بعدهي عدكم 

-- لا رجعت قبل شوية 

-- بكيفكم بعد

زهـراء :- البنات كلهن طريقن واحد ويُـمن غير طريق عوفها ويانا يمي بـ آمانتي هههه

-- ولج خاف عيب وتحرجين اخوج 

حچى هيج وضحك رجعت ضحكت وردت 

-- لا والله ابد ماكو لا عيب ولا احراج 

رجع باوع عليه يريد يشوف ردت فعلي وانا عادي عندي وين ما يردون يصعدوني اصعد المهم ارجع للبيت وهذا هـو من شافني طبيعية اخذ اخواته و بقى يوصي بـ زهراء 

عليه و اول ما مشوا زهراء گـالت 

-- تعالن جوه بين مينزل منـاف ونروح

رجعنا انا ودعاء طبينا جوى بالحديقة وهـيَ مشت الأخوها تركض دقيقـة ومدت راسها  من البلكونه من الغرف الفوگ و تگول

-- هسه اجي بس اللبس صايتي ما اتأخر

ضلينا انا و دعاء بالحديقة وهيَ عيونها معلگه على باب باب الصاله وعلى الفوك 

شكيت بيها معجبة منـاف مدري تحبة بس اكيد داخل بعقلها وتحاول توصله 

نزلت زهراء يمنا و تگول خمس دقايق ويجي بس يبدل 

يُـمن :- والله راح نكلفكم رحتي گعدتي الزلمة من نومه زحمه هسه شيگول علينا

-- لا والله اصلاً هوَ گعد من وقت الرگص والاغاني مو هسه 

دعـاء :- يمعـودة خلِ سيـادة.... يتحرك شوية ياخذنا يجيبنا يسولف ويانا ما يصير هيج ثكيل وانا اخررب على الثكال 

زهراء غمتها وانا سكتت منها و درت وجهي شگد ملطلطة هاي الابنية فشلتنا بسالفة الرگص وهسه فشلتنا واقترحت يوصلنا 

عشر دقايق وطلع لابس تراك شتـائي بس كلش حلو و السويج بـ ايدة اول ما طلع من باب الصالة صارت عينه عليه ورجع بسرعة نزل راسـه واجى يمشي ومن وصل يمـنا گال السلام عليكم بدون ما يرفع راسة دعـاء ردت السلام بصوت واضح بس تتموع و عبالك صارت غير وحده 

انا صفنت بيها صفنه متعجبة شلون فشلة يا الله هاي الابنية شبيها فتح السيارة جانت بالحوش و صعد زهـراء اجيت يم دعاء و گرصتها 

دعاء :- اييي ثول شبيج

زهـراء :- وسم احچي عدل ترى بعده ما يخليني امشي وياج طول العمر گوه خلصت نفسي من سالفه الرگص قبل شوية صيري آدميـه 

-- دروحي انتِ واخـوج شگد نفسيات اييعع

-- امشي امشي الله يعقلج ويهديـج

مشينا صعدنا وياه زهـراء بصفـه وانا

و دعاء وره وبس طلعنا البيت مالهم عدل الامرايـة و باوع عليه منها درت وجهي سريع الجهه الشباك گـال

-- هـا شنو يُـمن من ضمن المعازيـم 

زهـراء :- اي لعد شلـون ما تحلى العزيمة بدونها

-- شلونج يابـة ان شاءالله بخير 

-- الحمدلله ، الله يسلمك

زهـراء :- يُـمن خجلانه من عندك شلون راح توصلها تگول زحمه 

ضحك ورد 

-- لا تدلل ست سايلنت 

زهـراء دارت وجهها عليه وضحكت ودعاء طخنتني بـ ايده باوعت الها اشرتلي وتغمز شكو ما رديت رجعت درت وجهـي والكل سكت شويـة ودعـاء گـالت

-- اشو فهودي ما شفنا 

زهـراء :- غير راح ويا ماما

-- ياا ولا انتبهت حبيبي فدوة الطوله ابو اللسان اله وحشة

-- اخذته إمي وياها تدري بيه ما يگعد راحه ويشيلجن كلجن أذا بقى 

-- هوَ اكو احلى منه فدوة السوالفه والوكاحته

هنَ يحچن وهوَ ساكت ما يشارك بالحديث رجعت گـالت 

-- أبو فهـد إني انزل على بيت عمـي مو على بيتنا

زهراء :- ليش 

-- اهلي عدهم والبيت مقفول وما عندي المفتاح 

رجع هوَ باوع على زهراء وسألها 

-- وين بيت عمها 

ردت هيَ بسرعة

-- بداية الشارع مالنا على ايدك اليمنى

كمل طريقة بدون ما يحچي لحد ما وصلها البيت عمها الظاهر هوَ يندل بيتهم وزهراء تعرفها من زمـان نزلت و باوعت عليه

 و تشكرت منـه وضربتله تحية 

زهراء ضحكت وهو مشى اول ما مشى باوع الاختها و حچى وياها بنبره انا مو يم السالفه و متت من الخوف 

منـاف :- زهـرررراء شنـو هاااااي 

زهـراء :- شنو 

حچتها وهي تبلعم جاوبها 

-- اشو هاي مسقطه فد مره 

ما جاوبته رجع صاح بيها

-- اخرررر مره تحچين ويااااهاااا طايحة الحظ مصاحبتلج وحـده سزز شنووو هاااييي

ما ردت رجع صاح 

-- مووو احچي وياااج 

-- اي والله 

-- اي والله شنوووو

-- ما احچي وياها بعد 

-- وسالفه الدگ والرگص نرجع ونتحاسب عليها 

ما جاوبت بقت ساكته وانا من الاصل  ساكته انوب من بقى يصيح على اخته حسيت بروحي متفشلة وحتى على عزيمتنا ما راضي متت بدمي 

و الطريق صار شطوله اريد بس اوصل ماكو متت من الفشلة و اختنگت فتحت الجام شوية اريد بس هوى هوَ اول ما عرف بيه فتحت الجام نزلها من يمه كلها وگام يشرب جكاير شوية و دگ نقاله جاوب ويگول

-- اهلاً ابو تميم الله يخليك الله يسلمك

-- هههه لا مو وياي 

-- لا ما شفتهاا

-- ما ادري شوكت شو ما شفتها 

رجع باوع عليه من المراية وضحك ورد

-- هااا هاية اعذرني ما شفتها ولا سمعت صوتها عبالي بقت بالبيت هههه

-- هههه اي بالطريق دقايق ونوصل

 ان شاءالله

-- لا بالعكس خادم إني 

-- الله يسلمك 

رجع انطاني النقال بدون ما يدور عليه مثل حركة الماي من انطاه الأمي و يگول

-- عمج يريد يحچي وياج 

اخذته من عنده بس ميته بدمي رديت على عمـي گـال

هاشـم :- ها بابا حبيبتي شلونج 

يُـمن :- زينه 

-- هذا مـراد طايح الحظ عايفج و راجع وما خابرني و اجي إني اخذج 

-- لا عادي ما صار شي

-- امج مووتني تسأل عليج تگول تستحي ما تستحي شوفها 

-- لا زينه مابيه شي

-- تمام لعد ما دام مابيج شي و راح توصلون مع السلامة

-- الله وياك

قفلته و بقيت لازمه النقال بـ ايدي استحي احچي وياه وارجعه اله تقربت يم زهـراء وحطيت ايدي عليها من ظهرها بسرعـة دارت وجهه عليه انطيتها النقال اخـذته من عندي و انطته الأخوها گـالها

-- سلمته الها بـ ايدي ترجع تسلمه الي 

 بـ ايدها 

زهراء ضحكت و باوعت عليه وانا متت بدمي انوب اخذه من زهـراء و يگول

-- يلا جيبي خاف تبچي وتنگلب حمره طماطة وما بينا حيل نص الليل 

زهـراء :- ههههه وردة يُـمن ماكو مثلها 

منـاف :- لا تحاولين ما راح ترد عليج 

-- ههههه اصلاً طول الگعده وهيَ ساكته 

سكت ما جاوب شي بقى ثواني ساكت انوب گال بصوت ناصي كلش وجنا نسى احنه گاعدين يمه و همس ويا نفسه و يگول 

-- تلك الجميلة صامتة في طبعها و أن نطقت سلبت العقلِ والفؤادي 

زهراء ضحك وهوَ رجع باوع عليها متفاجئ وراها ضحك بصوت عالي وهز راسة

 و يگول

-- رحنا بدايها على الگولت المصريين لج زهراء اشو طالعه عينج شنو هذا الحچي 

-- هههههه بعد ما اعيدها 

-- هههههه شحدج تعدينها طايحة الحظ

-- حبيبي اخوي الحلوو هسه انتَ مو ضحكت و فرحان

-- ايي

-- لا تسويها علينا هوسة من نرجع للبيت والله بعد ما احچي وياه دعاء وداعتك 

سكتت وباوع الها مثل الذكرته بـ دعاء رجعت تتوسل بيه وتگـول

-- وداعت فهودي بعد ما احچي وياها والله اصلاً اني گلت الها من قبل لا نصعد بالسيارة بعد اخوي ميقبل احچي وياج حتى اسأل يُـمن 

باوعلي من المرايـة و گـال

-- صدگ هذا الحچي 

ما جاوبت بقيت ساكته دار على اخته

 و يگول

-- شاهـدج صامت ما راح ينقذج شوفيلج غير شاهد

-- لا لا يُـمن احچي بشرفج الله عليج مو رزلتها قبل لا نصعد 

-- اي 

منـاف :- الايي هاي نگعنها وشربن مايها  

زهراء :- لججج يُـمن احچي برگبتج إني 

يُـمن :- شـ احچي 

-- مو حچيت وياها و رزلتها الله عليج

-- اي 

رجعوا اثنينهم ضحكوا وانا اطرش بالزفـة

لحـد ما وصلوني للباب قبل لا انزل گتله 

-- شكراً رحم الله والديك

ما رد بقى ساكت ودعت زهراء ونزلت بقوا طابگين لحد ما طلع عمي هاشـم أنا طبيت وهـوَ ضل يسولف وياهم بالباب 

اول ما طبيت استلمتني امي من الباب تحقيق شصار وشسوينا وشأكلنا وانا ارد لحد ما سولف الها كلشي حتى على دعاء وراخا مشيت الغرفتي نمت 

و الساعـة بالوحده بالليل اجت رسـاله على نقال أمي من رقم زهراء مكتوب بيها 

-- اريد احچي وياج إذا گاعدة

أنا جنت نايمـة  والنقال يم امي وهيَ قارية الرساله اجت گعدتني بسرعة فزيت 

شهيناز :- هاي زهراء جاي تراسل شوفيها شتريد نص الليل

-- بيش الساعه 

-- وحده ونص 

-- شبيها شكو 

-- ما ادري شوفيها خاف بيها شي 

-- هيَ اخوها رزلها و متحلف بيها خاف سوالها شي خطية 

-- دشوفيها خاف بيها شي 

-- يعني هسه هوَ كتلها 

-- شمدريني گعدي خابريها وشوفيها خطية 

راحت امي وانا دگيت على زهـراء بسرعة نرفضت المكالمة خفت گلت صاير وياها شي بعدني افكر بيها ورجعت هيَ دگت 

جاوبت 

يُـمن :- الـو

ماكو محد يرد رجعت اگول

-- الـو زهراء تسمعيني 

نفس الشي ماكو رد سديته عبالي الشبكه مو زينه رجعت دگت من جديد جاوبتها بسرعة واگـول

-- الـو زهراء تسمعيني شبيج 

نفس الشي ماكو صوت 

-- يااا زهراء شبيها هاي الووو 

اجاني صوته يگول 

-- الـو 

وخرت التليفون من إذنه بسرعة واباوع  على الإسم مصدومة عبالي الرقم غلط لو شي رجع گـال 

-- تسمعيني 

بسرعة قفلته بوجهه رجع دگ ما رديت وراها كتبلي رسالـه

-- بس احچي وياج على مود زهـراء 

بقيت لازمه النقال وحايرة خاف سوالها شي لو لگفها تحچي وياه مـراد لان جاي يخابر ويراسل من خطها ارد لو ما ارد رجع دز 

-- شغلة ضرورية لازم تردين 

وراها دگ من جديد گلت خل اجاوب شكو بيها هسه هوَ مو اخذني وجابني بسيارته اكثر من مره وحاچي وياي وحاچيه وياه قابل اول مره لو مسويه شي غلط بس خل اشوف الأبنية شبيها رديت وحطيت النقال على إذني گـال

-- الـو 

ما جاوبت رجع گـال

-- تسمعيني

-- اي اسمعك شبيها زهراء

-- ما بيها

-- چا شكو ليش تگول على مود زهـراء 

سكت ما رد عليه رجعت اگـول 

-- الـو

رد 

-- تتزوجيني

يتبع .......

#عــروس_الچبـــايــش🌼

بــقلم يـــاســـة الحلقة (24)

من غير كوكب اجت

 بالأرض ماكو بشر يشبة ملامحها 

أتمنى يمج أضل 

والليل اخلصه سهر وياج ما أنامة

گلبي الصعب ينعجب صرتي أكبر أحلامة

......................... 

يُـمن :- هـوَ گال تزوجيني وانا گلبي طاح بحظني اريد بس اندل الدگمه التسد الخط ماكو نسيت منين ينقفل مدرين شلون قفلته و اباوع على إدية ترجف انهبطت تسودن هذا نص الليل 

رجع دگ مره ثانية رفضته سريع وقفلت النقال بكبره وگلبي دمام صار اجت امي طبت لگتني لازمه النقال حيل وگاعدة وصافنه 

شهيناز :- ها خابرتيها 

خفت اگلها هذا اخوها وهيج گالي خاف احچي و تصير هوسه وامي ما تسكت تروح تخابره وتتعارك وياه وتوصل السالفه العمي والولد وزحمه بحقي رديت 

-- اي 

-- شبيها خو ما مسويلها شي اخوها 

-- لا لا ما مسوي 

-- لعد شكو تخابر نص الليل 

-- ما ادري ما حچت شي 

-- جوز استحت تحچي 

-- اي يمكن 

رجعت طلعت و انا بعدني لازمة النقال 

بـ ايدي و اريد اهدى و اسيطر على روحي 

ماكو 

ضليت گاعدة و صافنه مصدومة انوب تمددت و اباوع على البنكه واتذكر من اول يوم شفته لحد اليوم گمت اربط المشاهد بعقلي واگول معقوله جان يذبلي حچي ويتحرش بيه وانا ما حاسه بيـه 

بس هوَ ما حچى شي غلط وياي من شفته لليوم ليش هسه هيج يسوي انوب ارجع اگول الروحي شـ مسوي هو ما مسوي شي خطبني على سنه ورسوله انوب ارجع ارد شني خطبني شو ما يستحي داك نص الليل وتعاي تتزوجين ما عندي اهل ما عندي بيت إذا يريد يخطب يدگ الباب ويجيب اهله خو مو بالختلات بنصاص الليالي 

هسه يقبل واحد هيج يحچي وياه اخته بالليل بحجه الخطبـه والعرس 

استغفر الله يربي اريد ارجع انام ماكو طارت النومه من عيوني ضليت گاعدة لحد ما إذن الصبح گمت توضيت وصليت ورجعت المكاني وافكر  

هسه امي من تگعد الصبح وتاخذ النقال تشوف الرسائل الكتب بيهن انا اخوها وتصير هوسه شلون امسحهن وانا قفلته اخاف افتحه ويرجع يدگ مره ثانية 

خل افتحه وإذا دگ ما اجاوب بس امسح الرسائل گبل لا انام وانساهن اكيد هسه نام قابل گاعد الهذا الوكت متانيني 

فتحت النقال و تانيته لحد ما اشتغل كله 

اول ما نفتح گامت الرسائل تجي داگ عليه وما محصلني طبيت بسرعة مسحت كل الرسائل بعدني امسح بيهن و دگ من جديد

فزيت و گمت وگفت وگفه شو هذا صدگ ما يستحي وسواها بليه ملح رفضته رجع دگ من جديد هم رفضته وكتبتله رساله

-- الما تقبله على اختك لا تقبله على بنات الناس استحي و أحترم روحك اشفت عليه وتخابر بنصاص الليالي 

انطيتها ارسال و رجعت مسحتها من السجل ومنها و بعد لا دگ ولا خابر وانا لو اعرف احظر چا حظرت رقم زهراء وبعد حتى هيَ ما خابرها واحچي  وياها 

ضليت متمدده بفراشي و عيوني گامت تنفتح وتنسد لحد ما رجعت نمت من جديد و الصبح من گعدت لگيت امي ما خذه النقال گلبي ضل يدگ خاف راجع  داگ لو راسل وانا نايمة وشافته امي بمكاني

گمت طلعت غسلت و رحت للمطبخ لگيتها گاعدة قبلي ومتريكة هيَ وعمي واگفه على الطباخ تسوي غده صبحت عليه ردت بهدوء معناها الامور طبيبة وما مخابر ولا مراسل 

گعدت تريگت و انوب التهيت انظف بالبيت واعزل هوَ ما بيه شي نظيف و يخبل بس انا وين اروح ما عندي شي وگاعدة وساكته اگوم اشتغل اخلص وكت 

لحد ما صار الغده تغدينا انا وامي وعمـي 

و شلنا الصينية امي سوت جاي واخذته العمي وانا وگفت على السنك اغسل مواعين شوية وسمعت عمي يحچي بالنقال ويگول

-- اهلاً وسهلاً هلا بيكم 

-- زارتنا البركة

-- خير ان شاءالله هلا بيهم 

رجع قفله و يگول الامي

-- هذا حسـن يگول العصر العلوية وزهراء يجن عليكم 

شهيناز :- هلا بيهن ، يجن الهذاك البيت لو علينا

-- عليكم گال الام يُـمن

-- هاا اهلاً وسهلاً هلا بيهن 

كملت انا المواعين ورحت الغرفتي طبيت وسديت الباب و متأكدة فشل من رسالتي ودز امه اليـوم و امه راح تخطب شلون

 يا ربي انا ما اريد اعرس بس لا امي تقبل بيه وتزوجني 

ضليت گاعدة وحدي وميته شوية واجت امي گالت گومي سبحي و حضري الضيافة خاف تجي المره عيب منها 

گمت للحمام سبحت و رجعت حضرت فواكة و الكيك ومن تجي عود اصب العصير 

للعصر و اندگ الباب راحت امي فتحت الباب و استقبلتهن ترحب بيهن والمره

 ترد على امي انا بس شفتهن جايات بسرعة شردت طبيت بغرفتي 

گعدن بالصاله و صوت سولفهن يمي بالغرفه وصوت امي شلون ترحب بيهن 

وراها بشوية امي صاحت يُـمن 

گمت وگفت واگول دخيلك ياربي جسمي كله يرجف لبست ربطتي و طلعت المره بس شافتني أبتسمت و زهـراء ضحكت 

سلمت عليهن و زهـراء گامت باستني وامها گالت

-- عذريني يوم ما اگدر اگوم

شهيناز :- لا يمعودة صدگ جذب ولا تگومين 

دنگت عليها و بستها ورحت للمطبخ جبت الضيافة و اجيت اروح للغرفه گالت المره

-- تعاي گعدي يـمي خلينا نشوفج 

باوعت على امي وامي رجعت باوعت عليه

اجيت يمها گعدت وزهـراء مگابلتني وتضحك وامها وامي يسولفن سوالف عادية على شغل رجولتهن وعلى المسؤولية انوب رجعت امها تسولف على ابنها وشلون يروح و يرجع للشغل وتعبان وعليه ضغط بالشغل هنا انا عرفت الشغلة 

راح تتطور گلت خليني اگوم اشرد بس شلون اگوم والمره تريدني گاعدة يمها رجعت امي سألتها

-- هـو منـاف شگد عمره الله يخليه 

--مواليد 80 

-- ينطية طوله العمر يارب

-- رحم الله والديج 

رجعت باوعت عليه وأبتسمت و تگول

-- يُـمن شگد عمرها الله يخليها 

شهيناز :- يُـمن مواليد 92

-- الله يحفظها ويخليها

-- رحم الله والديج 

اندگ الباب گمت بسرعة اجتني فرصة اشرد بيها رحت سريع افتح الباب وگفت وره الباب گلت منو اجاني صوت مـراد يگول إني ضحكت وفتحت بس شافني أبتسم خجلان وگال

-- جنت فايت قريب عليكم گلت امر اشوفكم

-- هههه اهلاً وسهلاً 

-- اختي حبيبتي الطيبة الحلوة الماكو منها اثتين تدرين بيه كلش احبچ

-- هههه والله انا هم أحبك و أحترمك بس شتريد من الأخير 

-- بس اشوفها 

-- ههههههه 

رجع ضحك و طب وگف بالحديقة ويباوع على باب الأستقبال گتله تفضل بالصالة لان گاعدين بالأستقبال گال

-- لا اريد اروح بس اريد اشوفها من بعيد واروح  

عفته وطبيت گعدت يمهن سألتني أمي منو رديت مـراد زهـراء أبتسمت و نزلت راسها

رجعت امي گالت

-- وينه هسه 

--بالحوش بقى

-- ياا ليش بالحوش خلي يفوت جوا

-- ما ادري شجاي يسوي بالسيارة مالته هسه يطب 

أمي سكتت ورجعت هيَ و العلوية يسولفن وزهـراء عيونها گامت تطلع گلوبات احسها طارت طير 

درت وجهي اباوع على الباب وعلى الشباك شفته واگف وره الشباك وما مبين غير منه شي قليل من ضليت گاعدة ولازمه گلبي

 بـ ايدي لا امها تشوفه رجعت هيَ گالت 

-- يُـمن وين الحمام مالتكم 

گمت مشيت وهيَ وراي بس شني گلبي يدك دمام عبالك انا الراح اشوف حبيبي مو هيَ ارجف طلعنا للصاله وبس طبينا اجى 

ورانا 

عفتهم ومشيت وگفت بالمطبخ و عين للباب وعين للصاله واطگطگ بـ اصابعي

 و ارجف خمس دقايق و اجت وراي لگتني واگفه بالمطبخ ضحكت تقدمت عليه سريع حظنتني وباستني و تگول 

-- فدوة الگلبج حبيبتي 

-- كافي تعاي رجعي لا امج تحس بيج

-- آمانة فدوة مو تحچين حتى الامج 

-- لا والله ما احچي شلون احچي بس انتِ ديري بالج لا واحد يحس بيج لو يلزمج ولا تضلون هيج خلي يجي يخطبج وعيشوا حبكم بالحلال 

-- ان شاءالله بس اخلص هاي السنه 

-- الله يجمعكم بالحلال 

-- أمين يا رب 

رجعنا للأستقبال اول ما فتنا امي

و العلوية سكتن ويباوعن عليه اثنينهن وامي شكلها قلقه و متوترة بعدنا هسه گعدنا و باب الشارع انفتح ورجع انطبگ 

عرفته مـراد راح 

ضلن شوية و دگ عليهن منـاف امه سلمت  عليه و ردت اي تعال منتظرينك ربع ساعة

و رجع خابرهن گامن يردن يروحن امي جلبت بيهن يبقن للعشة ما قبلن ودعنا ومشن

اول ما طلعن أمي طبت الغرفتها وما فتحت موضوع وانا من شفتها ساكته وما فتحت موضوع هم سكتت وكيفت معناها ما موديهن هوَ هيج اجن من وحدهن يشوفنا 

للمغرب وماكو شي والوضع طبيعي صليت المغرب والعشة و امي گامت تحضر بالعشة عمي خابرها يريد عشة وجاي بالطريق وگفت اساعد بيها بين ما اجه عمي حظرنا الامل وگعدنا سوى ناكل سأل عمي 

-- شعجب اليوم اجن العلوية و زهـراء

أمي سكتت ما ردت وره شوية ضحكت وگالت 

شهيناز :- وره العشة نحچي ،  بس عندي سؤال محيرني 

-- شكو سألي 

-- العلوية گالت مواليد ابنها 80 بس هوَ ما شاءالله رتبته عالية يعني اعلى من رتبتك شلون هيج وهو بهذا العمر إني ما سألتها استحيت منها خاف تگول حاطه عينها على ابني 

-- منـاف اول ما شب فات للسلك العسكري وما شاءالله عليه مرتب ومعدل وذكي عرف شلون يصير قريب من لأمر مالته فـ جان بكل المداهمات المهمات يسحبونه وياهم وبنفس الوقت شجاع ما يخاف يشمر نفسه گدام الموت شمر خصوصاً بفترة المفخخات والتفجيرات اكثر من مهمه طلع واكثر من ارهابي لرزم وجان بعد كل مهمه ناجحة تجي ترقيـة وهي وصل الهذا المستوى وعبرني وعبر تميم  

-- هاا زين والله الله يوفقه 

-- و الولد يستاهل تعبان على نفسه ودارس ومثقف و شجاع وكل الترقيات يستحقن و بجدارة 

-- الله يحفظه ان شاءالله 

رجعوا سكتوا بين ما خلصنا العشة غسلت المواعين وسويت جاي و جبته الهم لگيتهم يحچون بس طبيت يمهم سكتوا وانا رجعت الغرفتي وبعد ما طلعت منها 

الليل كلش اجت امي فتحت الباب وطبت 

لگتني اغفي اريد انام گالت

-- نمتي

-- لا بعدني 

-- گعدي اريد احچي وياج

گعدت عدل واباوع عليها ابتسمت و تگول

-- تعرفين ليش اجت اليوم ام مناف 

سكتت ما رديت انوب رجعت جاوبتها

-- لا ليش 

-- اجت تخطبج الأبنها 

بس كملت امي كلامها احس غصيت بريكي 

ضليت بس صافنه رجعت أبتسمت و تگول

-- إني ما رديت خبر ولا انطيتها اي امل واي كلمة گلت الها بعد وقت الهذا الموضوع وهيَ هسه طالعة من تجربة فاشلة وبعدهي صغيرة والعمر بعده بدايته وتريد تدرس يعني سديتها عليها فد مره بس رجعت المره و ردت ما عنده مانع تكمل دراستها وعادي ينخطبون فتره يتعرفون على بعض ومن يشوفون نفسهم مستعدين يتزوجون المهم الابنية هاي نريدها وننتظرها ما عدنا مشكلة

بقيت ساكته ما جاوبت رجعت امي تگول

-- يُـمن يمه حبيبتي اريدج تعرفين مو كل الزلم مثل رائـف ولا كلها مثل غـازي والماله قسمة بالاول اله العوض بالثاني

ان شاءالله حبيبتي ماما انتِ حلوة والعيون عليج والكل تتمنى اظفر من اظافرج فـ لا تفكرين لان اطلگتي بعد محد ياخذج ولا تضغطين على روحي وتوافقين بـ اول شخص يتقدملج العمر گدامج والطريق بعده بدايته والناس كلها تهواج وتحبج وتشتريج لان ماكو مثلج ومثل اخلاقج وجمالج وترتيبج اني جاي احچي وياج هذا الحچي اريدج تعرفين قيمة نفسج وتعرفين المطلقة ما توگف الدنيا يمها ولا تضيع وتنتهي من بعد تجربة فاشلة لا بالعكس المطلقة بطلة لان انتفضت النفسها وما قبلت بالذل والأهانه و تركت كلشي وراها واختارت نفسها وكرامتها وسعادتها وثاني شيء لازم تفكرين زين قبل كل خطوة تخطينها وتختارين الصح وبنفس الوقت بعد وقت الهيج خطوة لان أنتِ هسه يلا بديتي تشوفين الدنيا بعده الطريق گدامج طويل ، وانتِ بعد بكيفج تردين تتعرفين على الولد وتتأكدين مو كلها مثل رائـف لو  تردين تنهين الموضوع من الاول بدون ما يبدي انتِ حره اني وياج بكل قرار

-- انا بعدني صغيرة على المريت بيه بعدني ما شفت شي من حياتي ولا عشت عمري تعبت گبل ومريت بـ ايام الله وحده يعلم بيها وما مستعده ارجع اعيش تجربة العرس والرجال والعيال من جديد اريد اعيش تجربة الدراسة والنجاح اريد ابني مستقبلي و ادرس و اجتهد ما اريد العرس 

-- هذا هو ما تردينه منا وينتهي الموضوع بس ارجع واكول مو كل اصابعج سوى لا تبقين تشوفين كل الزلم نفس الشوفه 

-- لا ادري كلش زين مو كلهم سوى ابوي الله يرحمه يختلف على عمي غازي و عمي حاكـم يختلف على رائـف  و واثـق يختلف عليهم كلهم و هسه عمي هاشم يختلف على الباقين و ولده نفس الشي

-- عفيه عاشت ايدج وهسه انسي الموضوع و بعد ولا تفكرين بيه 

-- ان شاءالله

-- يلا نامي تصبحين على خير

-- وانتِ بخير 

راحت امي تنام وانا ضليت بفراشي اتكلب 

واتذكر الايام العشتها بـبيت عمي حاكم

 و معاملة رائـف اليه ومعاملة عمتي بديعـة والشغل الجنت اشتغله التعب التعبته

جنت من انام عبالك ميته مو نايمة من گد ما اتعب 

تذكرتها من شمرت عليه الخبز و التنظيف وكل شغل البيت وگعت دمعتي بسرعه رفعت ايدي مسحتها واگول لا حول ولا قوة الا بالله العلي العظيم 

غمضت عيوني وشريط ايامي وياهم كله مر عليه صح صغيرة بس عشت الما عاشة بشر وتحملت الما يتحمله بشر الدنيا شگد حقيرة وتدوس على الفقير وما ترحمة ضليت مغمضه واتذكرهم واتذكر مواقفهم وياي لحـد ما غفيت 

عدت يومين ورجعت العلوية خابرت امي وامي تعذرت منها وگالت الها 

--ما تريد الزواج تريد تكمل عذرونا 

ردت 

-- قابلين تكمل وشوكت ما تحدد الزواج تحدده المهم هسه يعقدون وراها كلشي سهل وراها يتعرفون ويحددون الوقت المناسب للزواج هسه بس خطله 

-- والله يا داده ما ادري شگولج بس الابنية ما تريد وقافلة واني ما اگدر اضغط عليها عذريني وربي يكتب الكم الأحسن منها 

-- بعد انتوا بكيفكم واكيد ما نضغط عليكم بس خليها تفكر و تشاور عقلها و رجعيلنا خبر شوكت ما تاخذ قرارها احنه منتظرينها

امي قفلته منها واجت سولفتلي على المخابرة وانا نفس الشي ما مقتنعه بالموضوع وافكر البعيد اخر شي من گامت امي وبقيت وحدي تذكرت امه من تكول اتوسل بيه اريده يتزوج وما يقبل ابتسمت واگول ما صدگت ابنها اقتنع واجت تلح تريد بس تخلص منه 

من يومها وبعد انسد الموضوع بيتنا وعمي هاشم ابد ما جاب طاري ولا تدخل نهائياً وامي سكتت وبعد ما اتذكر اي شي وره  عشر ايام رجعت امه اجت وبيومها انا لا طلعت ولا شوفتها روحي

شگد صاحتني امي رادت ما طلعت طبيت الغرفتي وبعد ما شفت واحد منهم استحي اروح اگعد يمهن واخاف اروح وامه تحرجني وتبقى تحچي وياي بالموضوع احسن شي ابقى بالغرفة وما اطلع منا لمن تروح 

اخر شي راحت ومن راحت امي اجت تحچي عليه عيب وليش ما طلعت وليش ما شفتها انوب سولفت جايه تسأل وتشوف الوضع وامي رادتلها نفس الرد القديم الابنية ما تقبل 

ومنا وبعد الموضوع ما انفتح وبعد ما اجوا ولا خابروا والايام مشت والوضع طبيعي وماكو شي يذكر حياتنا هادئه وحلوة وعايشين برحمة الله لحد ما وصل موعد النتائج التمهيدي والحمدلله طلعت مؤهله للأمتحانات النهائية 

ومنا وبلشت من جديد اقرأ وشاده كل قوتي ويا القراية والمواد صارت عندي زلاطه وامي وياي تشرح وتفهم لحد ما بلشت امتحن اخر السنه والحمدلله الامتحانات كلها صارت سهله عليه واطلع من الأمتحان مجاوبه ومتأكدة من اجوبتي كلها صح 

وره الامتحانات اخذتلي أسبوع بس نايمة اگعد اكل واسبح وارجع انام طلع عليه التعب مال الدراسة والسهر بوكت الامتحانات 

وراها امي بقت تسأل على مود الدوام بلكي انقبل بالمدارس المسائية بس طلع عمري جبير وما اگدر اداوم مسائي فـ مراد اقرح انتظر سنوات الانتظار وراها اقدم سادس خارجي 

ومنا وبلش مشوار السادس اول شي حرت بين العلمي والادبي جنت متردده بقراري وامي تركتلي الخيار بس مـراد سوالي واهس على العلمي وبقى يشجعني ادرس علمي ضليت متردده وحايرة اخر شي گلت لا الوكت طويل عندي ثلاث سنوات يله يحقلي امتحن خليني اشد حيلي هاي السنوات واقرأ علمي واطلع معدل حلو اروح بيه قسم بيه خير 

ومنا وبلش عندي مشوار السادس علمي 

وامي سودة عليه افترت بالمكاتب تدور ملازم وكتب لحد ما جهزتني تجهيز كامل ومنا وبلشت اقرأ سادس علمـي  

ما جنت اواجهه صعوبة لان بعد وقت على تقديمي لازم انتظر كم سنه وراها امتحن

فـ قريت براحتي وبهدوء وبتركيز وامي وياي خطوة بخطوة 

الايام تمشي والوضع هادئ وطبيعي وماكو شي مهم يتذكر و كل واحد بينا عايش حياته بـ احسن صورة 

عمي هاشم ماكو مثله والليل ونهار ادعيله 

هوَ ولده علاقتنا بيهم اكثر من اهل صاروا اخواني والبنات وامهن نفس الشي علاقتنا بيهم طيبة وامي كسبت امهم وصارن دهن ودبس هيَ وياها والطبات والطلعات كلها سوى 

رائـف واهله صفحة وانطوت من حياتي 

ومنـاف ما اعرف عنه شي ولا شفته بعد ولا راسل من يوم اللي رزلته وزهـراء بعد ما خابرتني ولا راسلتني انگطعت المواصله بيناتنا بس هيَ ومراد بعدهي علاقتهم 

جان مراد يحچيلي شلون يحبها ويريد بس يخطبها وهيَ ترفض وتتحجج وباقين هيج بلاية خطبه بس علاقتهم متطورة وصايرة بينهم طلعات وطبات وعزايم بالمطاعم شگد جنت انصحه لان اخاف عليهم لا احد يشوفهم بس يگول ماخذ حذري وما انطلع هواي 

لحد ما بيـوم من الأيام جانوا طالعين يتريكون بمطعم جانت من الدوام تطلع وياه للمطاعم وما تگعد ولا تخاف جريئة وما تحسب حساب احد يشوفها

لحد ما طاحت بيها بيومها جانت گاعدة هـيَ وياه بالمطعم يتريگون ويسولفون بكل اريحية وحب على گولته وراها طالعين من المطعم و جايبها بالسيارة يريد يوصلها للجامعة ويا ما ماشين بالسيارة شويـة  طابگ عليهم منـاف و ناز على مراد

جاره من السيارة ومنزله وشابعة كتل بالشارع انوب ماخذ اخته و ماشي بيها 

شـ سوالها ما ندري بس بوكتها مـراد رجع مسگط تسگط وما راده ولا حاچي وياه باقي ساكت وما مدافع على روحه لان يدري بروحة غلطان 

بيوم المشكلة جنه انا وامي بيتهم جاين نتغده يمهم، وطب علينا صاير بيه فلم وميت ويرجف عليها خايف لا يروح اخوها يسويلها شي 

اهله انخبصوا وصارتلهم هوسة كلش جبيرة عمي ضربة وغلط عليه وامه وامي واگفات بالنص يحمنه و انوب عمي خابر على تميم وخطية تميم لا بيها ولا عليها حصله غلطة وسبه 

گعدوا كلهم مخبوصين و عمي طرد مراد ما خلا يگعد يمهم راح الغرفته وبعد ما طلع منها بين ما اجى تميم استلمة عمي لعب بيه جوله وتميم يرد

-- ادري إني شعلية والله حلوة هاي 

-- طايحين الحظ ولكم لا منا ولا منا بنت صاحبي واخوها صاحبكم وصاحب فضل علينا كلنا الله يطيح حظكم  

ام تميم :- إذا يريدها ما حچى ما گال ليش هيج يفشلنا ويفشل نفسه طايح الحظ يقبلها على اخواته

شهيناز :- على كيفكم انطونا مجال نفتهم من عنده مو هيج تنحل 

تميـم :- هسه هوَ وينه 

هاشـم :- صيحوليااااه طايح الحظ 

راحن البنات صاحنه اجى بس يكسر الخاطر كلها ضده ومضروب الموقف الهوَ بيه ما ينحسد عليه 

هاشـم :- تعال عديم الغيرة والشرف تعال اگعد وفهمني 

اجى گعد ومنزل راسه للگاع خجلان منهم 

هاشم :- صار شگد انتَ وياها  

مـراد :- من زمان 

-- الله لا ينطيك إذا من زمان ليش ما حچيت ولك ناس يحبونا ويحترمنه تحطنا وياهم بهذا الموقف ليشششش 

ساكت ما يرد رجع تميـم يگول

-- فهمنا وين لگاكم منـاف 

-- بالمطعم مدري برى المطعم ما ادري بس بالشارع طبگ علينا و نزلنا اول شي ضربني انوب جر اخته واخذها تلگاها موتها هسه 

ام تميم :- يطبها مرض مودينها تدرس لو تلعب ويا الزلم 

مـراد :- عيب هذا الحچي الابنية اني احبها واريدها بالحلال ما لاعبة لا تحچين هيج عليها 

-- وإذا تريدها بالحلال ما حچيت ما گلت نروح نخطبها 

هاشـم :- الله يصخم وجهك مثل ما صخمت وجهي گدام الناس 

شهيناز :- إذا رايدها خلونا نخطبها ونستر السالفة بعد الحچي والملامة ما تفيد 

عمي سكت وميت مستحي من صاحبه وخالتي ام تميم رجعت تأيد موضوع الخطبة لحد ما اتفقوا يرحون العصر عمي وخالتي وامي وتميم ومرته يخطبونها 

بيومها حتى محد تغده انسدت نفسنا وللعصر بدلوا وراحوا مـراد ما راح وياهم بقى بالبيت اجيت گعدت يـمه لگيته حاط ايده على راسه و حاير 

يُـمن :- شگد حچيت وياك تاخذ حذرك شلون ما تنتبه هيج

مـراد :- مو إني هيَ ما ترد وتلح وإذا اكلها ما نطلع تزعل بحچه ما تريد تشوفني ولا تقبل اجي اخطب ولا تقبل نقلل اللقاءات وتالي انحطينا بهذا الموقف من وره غبائها

-- ان شاءالله راح يحلون الموضوع وياهم ويخطبونها وتصير حلالك ومحد اله يمكم شي لا تضوج 

-- خايف عليها خاف ضربها 

-- ان شاءالله ما مسويلها شي 

بقينا انا والبنات ومـراد بالبيت متانينهم 

وره ساعة رجعوا بس شنو عمي وتميم عيونهم تطلع شرار وامي وخالتي وجهن صفر عمي اول ما طب اجى على مـراد

جره من ياخته و گومه اول ما گام ضربه راشدي ويگول

-- بعد مالك گعده هنا اطلع ديح بالشوارع وخلي يلوحك ويحط طلقة بگلبك ويكتلك مثل جلاب الشوارع السايبة 

تميـم :- ترى هذاك هم واحد ما يستحي وما يقدر ولا يحترم شدعوة هيج رحنا واعتذرنا وخطبنا إذا هوَ هيج حريص ما لزم اخته من البداية ما عافها علي حل شعرها

هاشم :- انجب طايح الحظ ولا صوت 

مـراد :- هسه شكو شـ صار غير تفهموني

-- شتريد تفهم ولك متحلف بيك وين ما يلوحك يحط طلقة بگلبك وما انطه اخته وطردنا 

مراد سكت و عيونه صارت حمر وانا والبنات متنه من سمعنا بهذا الحچي رجعت امه تگول

-- يمه شجابك شورطك وياهم اخوها هذا مشكلجي وعبالك متحمل علينا وعنده عداوة قديمة ويانا 

هاشـم :- لا متحمل ولا مشكلجي ابنج دايح ساقط و الولد مأمن بينه وحسبها غدر وخيانة 

تميـم :- والله واحد سزز وما يتناسب عمي شجابنه عليه باچر إذا صارت وتزوجوا حرام إذا تزعل لو تصير مشكلة بيناتهم يشرنا على الحبل 

عمـي گعد وكل جسمة يرجف ومراد راح الغرفته وبعد ما طلع من عدها امي مشت للمطبخ تجيب مي العمي رحت وراها واسأل بيها والبنات اثنينهن اجن ورانا يسألن گالت 

-- يبو شنو هذا شمسوي بـ اخته شمسوي بـ اهله لاعب جوله بيهم 

يُـمن :- شني كاتلها

-- اموتها موت ما باقي عظم صاحي بيها شايفها من جانت بالمطعم بس جماعته وياه وما جاي عليهم انوب طالع وراهم وهناك بالشارع لازمهم وناهي نهي امها تسولف وتبچي  

-- خطية

-- انوب تعارك ويا عمج وتميم يگول هذا جزاءة الثقة والاحترام هيج تخونون العشرة 

سكتت واگول بگلبي عليه حلال وعلى العالم حرام مو خابرني نص الليل مسوي روحه زهـراء ولو منطيته مجال چا سوى اكثر من مراد واخته 

شهيناز :- يمـه يُـمن عمت عيني إذا بيوم من الايام انطيج اله ربج يحبج وخلاج ترفضينه وما تورطنا وياه 

مهـا :- شنو خاطب يُـمن 

شهيناز :- اي قبل فترة امه اجت تخطب

-- والله اني اشوفه خوش ولد بس اخته واخوي غلطانين وهاي ردت فعله طبيعية اخته گاعدة ويا ولد بمطعم وانوب تصعد بسيارته شتردونه يسوي 

شهيناز :- اي حقه وزايد الحق حقين لان مراد صديقهم ويثقون بيه ويأمنون بيه بس مو الهاي الدرجة اعصابة ما تنحمل ما يتفاهم وما يحسب للمقابل حساب يعني كل البشر تجي ساعة يصير عصبي بيها بس يبقى يقدر ويحترم مو الهاي الدرجة ابو ما اله كلمة وياه وامه خارطه العافية والابنية مزوركة ومكسرة مو هيج كلشي بالتفاهم ينحل واحنه اجينا نخطبها ونعتذر ماكو داعي يتجاوز ويهدد ولا اكو داعي يطردنا 

-- شگالكم 

-- گال وين ما اشوفه احط طلقة بگلبة ومالكم مـره يمنا وبعد هذا الموضوع ما ينفتح واهلاً وسهلاً بيكم 

يُـمن :- خطية هسه شلون حالها

اخذت امي والماي ورجعت گعدت يمهم وانا والبنات رجعنا وراها هم گعدنا وياهم 

لليل كلش يلا  وصلنا تميم البيتنا 

وراها عدن يومين وعمي ما جاي علينا

 و امي باقية تخابر كل شوية تسأل على الوضع انوب عمي وخالتي راحوا مره ثانية عليهم واعتذروا و هاي المره ما لاگينه بس ابو جان موجود

الرجال معاتبهم وعمي باقي يعتذر وخاطبها منهم من جديد راجع ابوها يگول  ما يقبل ينطيها وقافل عليها وعلى مراد فد مره 

ومراد باقي خطية كاتله القهر عليها يريد بس يعرف شلونها وشلون وضعها خابر على امي و حچى وياي يريدني اخابر على خطها واجرب اشوفها بلكي احصلها 

بقيت حايرة بين مراد وبينها خطية وبنفس الوكت اخاف اخابر خاف اسويلها مشكلة

من بعد تفكير طويل وملحه من مـراد 

طلعت رقمها و دگيت عليها اشو بسرعة دگ ما مقفول الخط بس محد يجاوب 

رجعت دگيت مره ثانيـة انفتح الخط بس بدون صوت گلت 

-- الو

ماكو صوت رجعت گلت الو اجاني صوته يگول 

-- الوو

بسرعة قفلت الخط بوجهه بس قفلته اجتني رساله مكتوب بيها الظاهر يا مراد 

ناوي تموت قبل يومك وما تجوز ولا تتأدب 

اصبرلي جايك 

انا قريتها وانا گلبي طاح بين اديه يمه هذا عباله مراد گاعد يمي ويريد يحچي وياها 

حرت شلون بيه يربي راح يروح الولد بيها 

رجعت كتبتله 

-- لا والله هاي انا يُـمن من وحدي اخابر والله محد يمي مراد معليه 

ردلي 

-- وشعندج مخابرة شنو المناسبة

-- اسأل على زهراء والله بعد ما اخابر بس لا تحاجيها ولا تحاجي مراد والله معليه انا من وحدي دگيت 

رجع دگ عليه گمت وگفت وگفه وميته من الخوف رديت عليه وگلت هي خربانه خربانه خل اجاوبة وابري الولد لا يروح بيها گال

-- الوو

-- الو 

-- وينه مراد انطيناه 

-- لا والله ماكو مو يمي و محد يمي والله

-- انطينياااااه اگلج 

-- والعباس مو يمي والزهرة محد يمي 

سكت ما سمعته بعد رجعت اگول 

-- الوو

-- شعندج مخابرة 

-- اريد اشوف زهراء حرام عليك هيَ مو اختك ليش هيج تسوي وياها ما تخاف من ربك تكتلها هيج كتله وتاخذ نقالها وتبقى تراقب بالنقال بلكي تحصل لزمه جديدة عليها انوب من يجون يخطبونها ما تنطيها يعني وين تريد توصل شني هذا الظلم هسه هيَ غلطت وحقك بس اجوا الناس يخطبونها و يعتذرون خليها تتزوج وتنستر لو مكيف بالفضايح انتِ لو تحبها وتفكر بيها صدك چا صاحبتها و خليتها تحچيلك كلشي وما تضم عليك ومن تشوف منها غلط تصلحه الها بلاية هوسة وفضيحة البشر مو معصوم وكلنا نغلط ونتحاسب حتى بعد ما نعيد الغلط بس مو باقي الطريقة ما تستحي تطبق اساليب السجون والمراكز ويا اختك 

ما جاوبني رجعت اگول الوو الوو ما يرد عبالي انگطع الخط و جنت احچي وحدي كل هذا الحچي باوعت للنقال بعده مفتوح والمكالمة ما مگطوعه رجعت گلت الووو

نفس الشي ماكو صوت انا مو ما اعرف بسوالف النقالات كل ضني الشبكة راحت 

وما يسمعني رجعت اگول 

-- انطرش بعد ما يسمع المجرم 

حچيت هيج وسديت الخط رجع دگ مره ثانية رديت 

-- الوو

منـاف :- اي وبعدين 

-- شني البعدين 

-- هسه اني اطرش و مجرم واطبق سوالف السجون بـ اختي مو 

سكتت ما جاوبت رجع گال

-- زين والله ست سايلنت طالع اللسانج وگايمة تحچين  يلا اني احب اسمع صوتج علميني هسه شـأسوي اصفك الها وعادي اعبر الموضوع واغلس هيج اني گرن 

-- لا حشاك بس مو بهاي الطريقة تعاقبها هسه مو كتلتها و كتلت مراد كافي بعد زوجهم وخليهم ينسترون حرام عليك توكف بقسمتهم 

-- اي صح

-- يعني راح تتنطيها المراد

-- لاا 

-- چا إذا لا شعندك باقي تاخذ وتنطي وياي بالسوالف لا تنطيها خليها يمك واتحمل ذنبها وذنب الولد برگبتك وخليها بعد يومين يجيها غير واحد يخطبها لا تحبه ولا يحبها ويشبعها ظيم وقهر وتعض وتالي اصابع ندم عليها وتضل شايل ذنبها طول عمرك 

حچيت بعصبيه وسديت الخط بوجهه شلون قهرني هذا صدگ مدري شبيه وانا عبالي ادامي وصار ساعة احچي وياه واقنع بيه 

شوية وخابرت على مراد گتله النقال عند اخوها دير بالك تخابرها 

مـراد :- جاوبج 

-- اي عباله انتَ گاعد يمي 

-- زين شگال بعده قافل ما حچيتي وياه 

-- حچيت بس مدري شبيه ما يسمع الحچي و شايف روحه شوفه 

-- والحل شأسوي يُـمن راح اموت 

-- ماكو مشكلة مالها حل گول يا الله 

وان شاءالله تنحل إذا الكم قسمة لو مو اخوها تنجمعون وإذا ما الكم لو الدنيا كلها وياكم ما تصير بس انتَ لا تگطع الأمل وخلي عمي يروح الهم مره ثانية 

وان شاءالله يقتنع بس لا تأيس من رحمة الله 

-- ونعم بالله 

قفلته من عنده ورحت سوالفت الامي وامي لعبت بيه طوبة شلون احچي وياه واخذي وانطي ما قبلت عليه لان خابرت وتدخل 

وره يومين عمي وامي وخالتي راحوا عليهم من جديد وانا ضليت بيت عمي ويا البنات بيومها تأخروا ما رجعوا واحنه گلبنا مثل النار وكلنه ندعي الخاطر مراد الميت عليها

وروحه مفرفحة 

ومن رجعوا وجوهم مرتاحه تلگيناهم نسأل عمي صاح على مراد اجي گعد يمنا

هاشم :- قبلوا ينطونها بس بالاول تروح وتتصافه ويا منـاف وتطيح على حسن وعليه وتعتذر من غلطك 

مـراد :- ادري بنفسي غلطان وعادي اروح اعتذر لان غلطت بحقهم ما عندي مشكلة المهم وافقوا وهذا هو

-- اي وافقوا وباچر نروح عليهم وهناك نحدد موعد الخطبة ونتفق على باقي الاجراءات

عبير مرت تميم هلهلت و البنات گامن باسن اخوهن فرحانات وهوَ الفرحه من

ما شالته الگاع وثاني يوم راحوا واخذوه وياهم تميم گوه عليه ما قبل يروح وضايج من أسلوب مناف وياهم بس عمي اخذه غصباً عليه 

ومن رجعوا اجوا متفقين على كلشي ومتصالحين ومحددين موعد الخطبة الجمعة الجاية 

ومنا و بلشنا انا وامي نجهز للخطبة امي ما خلت حاجه ما اشترها الها والي واخذتني للصالون مالتها و هناك استلمني حفافة تنظيف رتيب تعديل عادني للحياة من جديد طلعلي شكل جديد 

وامي گصت شعرها و صبغته وملابسها تخبل عبالك مال شيخات صارت تجنن لحد يوم الخطبة ما خلينا شي ما جهزنا والبنات اخواته ومرت تميم نفس الشي يجهزن ويحظرن

وبيوم الخطبة من الصبح رحنه البيت عمي وياهم بالشغل والترتيب وره الغده بدلنا 

و طلعنا تميم ما خله واحد ما عزمة وكلهم ضباط سواها عناد وياه مناف عود مو بس انتَ ضابط وثكيل احنه هم مثلك وصارت هذيج المشية التخبل 

طبينا البيتهم لگيناها رايحة للصالون ومشترية فستان يخبل وطالعه كلش حلوة 

اول ما شافتني ضحكت وراها بچت اجيت سلمت عليها وبستها لزمتني من ايدي وتگول

-- فضلج ما انساه طول عمري اريد ربي يسعدج ويفتحها بوجهج 

ضحكت ورديت 

-- ليش انا شـ مسوية 

-- منـاف وافق واقتنع من وره ما خابرتيه اريد ربي يستر عليج ويكتبلج كل خير 

ابتسمت بدون ما ارد واگول بيني وبين روحي الله يهديك ويصلح حالك لو ادري هيج تصير حباب وتسمع الحچي چا خابرتك من اول يوم الطلابة 

بقينا منتظرين ربع ساعة تقريباً وراها خطبوا امي وخالتي ام مناف طشن جكليت ويهلهلن وراها لبسوها واخذوها للغرفه تعقد وانوب مـراد و عمي وابوها و منـاف طبوا يمشون سوى للعقد 

باوعت عليه لابس دشداشة سودة وشكلة هيبة والله مو مجاملة بس صدك حلو وهيبة فات مدنك راسه و طب وياهم الغرفة العقد 

بين ما عقدوا عمي والباقين طلعوا ومـراد اجى گعد يمها لبسها الحلقة و اخذوا صور واكلو كيك وشربت وطلع والبنات اخواته يركصن فرحانات لحد ما خلصت الخطبة

 و طلعنا 

انا جنت لابسه فستان وحجاب وحاطه مكياج خفيف كلش، صدك  هدومي حلوات ومرتبات بس عاديات مو شي بارز

 و مبين يعني ضايعة بين باقي البنات وتبديلهن ومكياجهن 

طلعنا من بيتهم الناس صعدت بالسيارت وانا ويا البنات صعدت و صوت المسجل عالي بالسيارة والبنات يصفگن ويهوسن وانا اباوع الهن مبتسمة انوب ما ادري شلون درت وجهي للشارع شفته واگف يم الباب وعيونه طابة بنص السيارة ويباوع عليه

من شافني شفته ما دار وجهه ولا اهتم بقى يباوع انا بسرعة درت وجهي من عنده لحد ما مشت السيارة ورجعنا للبيت وهناك سوينا حفلة من جديد

خلص هذا اليوم بخير وسلامه و بالليل دگت زهـراء على امي جاوبتها أمي

 و سلمت عليها گالت الها اريد احچي ويا يُِـمن جابت امي النقال وانطتنياه گالت زهراء تريدج 

رديت عليها وتسالمت وراها گالت يُـمن هذا منـاف گاعد يمي و يريد يحچي وياج بموضوع مهم الله عليج بس اسمعيه و لا تسدين الخط 

يتبع..... 

#عــروس_الچبـــايــش 🌼

بقــلــم يــاســة الحلقة (25)

أدفني بخاطرك وحييني من تشتاگ

واقنع لو تصدلي بنظره أستصغار 

غير العاشگك يحلم بيته تعيش 

أخذ وياك واحد يحلم بتذكار 

يلمغير أطباعي من الرزن للريش 

الگبل مثل الجبل هسه على جيتك طار

لأنتَ المو حلو وما خابص النظرات

ولا انا الغشيم الما عرفت أختار 

............................... 

يُـمن :- من گالت زهراء منـاف يريد يحچي وياج احس گلبي انخمش مدري من الخوف مدري من المستحى مدري مصدومة شيريد مني سكتت ما رديت رجعت گـالت

-- موضوع مهم والله وهذا گاعد يمي إذا توافقين حتى يحچي وياج الله عليج بس سمعيه

يُـمن :- موضوع ايش زهراء الدنيا نص الليل والوادم نايمة واخوج لا أبن عمي ولا ابن خالي ولا واحد من أهلي حتى ارد عليه بهذا الوكت وبعدين شني الموضوع هذا المخليكم تخابروني بهذا الوكت من شوكت انا ويا بيناتنا مواضيع وسوالف حتى يدگ عليه بنص الليل 

سكتت ما ردت وراها اجاني صوته يگول

-- بس دقيقة احچي وياج وهاي اخر مره

 و بعد ما تنعاد والله

سكتت ما رديت عليه وبنفس الوكت صابني فضول شيريد شني الموضوع المخليه. نخابر بنص الليل  گلت خليني اسمعه وإذا على العرس ويريد يخطب من جديد اسدها ويا من الأخير حتى يكف مني وبعد ما يفكر يفتح الموضوع وياي مره ثانية خليني اخصمها ويا اليوم  رجع گـال

-- احچي

رديت 

-- احچي

سكت شوية وراها گال 

-- والله ما اعرف شلون ابدي 

رجع سكت مره ثانية  وانا من الأصل ساكته وجسمي مثل السعفه ينفض سمعته اخذ نفس طويل ورد وراها

 اووف الله ،، انوب گـال

-- يُـمن دمرتيني 

هوَ گال هيج وانا طاح النقال من إيدي من الصدمة رجعت شلته بسرعة وحطيته على إذني سمعته بعده مكمل كلامه و يگول

-- بعمري كله ما فكرت بمره ولا هويت مره ولا عجبتني مره بس انتِ يا يُـمن دمرتيني الليل ما انامه النهار ما يخلص عندي ما ادري شبيه ولا ليش هيج افكر بيج طول اليوم ما اعرف شجاني إني هذا التجز نفسه من جنس حواء نفسي صارت بيج و روحي تريدج شلون هيج تغير حالي ما ادري كل الادري بيه انغرمت بيج

 و ضعت بيج بهدوئج و اخلاقج وجمالج 

تدرين بگلبي صخر لا يحس ولا يهم بس الج لان بيج خضر وصار بستان لا تسألين شلون كل هذا صار ولا شوكت هيج صار لان إني هاويج وروحي بيج واريدج صار سنه كامله مو اليوم والبارحه لا عبالج عجاب يوم يومين ويروح لا بالله صار سنه ادمرت دمار 

سكت وانا احس بروحي صخنت واديه صارت ثلج شلون ما ادري رجع يكمل

 و گـال 

-- مستعد انتظرج لحد ما تاخذين الوقت اليكفيج بالتفكير ما عندي مشكلة بس المهم لا تسدينها بوجهي والله رايدج بالحلال رايدج أميرة بيتي وشريكة الباقي أيامـي انطيني فرصة 

نفس الشي ساكته ما مستوعبه انا ويني

 وين هاي السوالف رجع يگول 

-- ليش ساكته ردي وريحي بالي اكو امل انتظرج بس گولي اي و إني مستعد انتظر العمر كله 

رفعت راسي للسماء واگول بيني وبين روحي دخيلك يا ربي هسه انا شـ ارد اخذت نفس ورديت 

-- انا جربت العرس والعيال و ما شفت منهم غير بس التعب والظيم عشت ايام الله وحده يعلم بيها و ما مستعده اروح اعرس من جديد واحب وانحب فكره العرس كلها ما اريدها ولا افكر بيها ولا تخطر على بالي عشتها  مره وبعد ما تنعاد  الله يخليك بعد لا تفتح هذا الموضوع وخلينا نسايب واهل واحباب 

-- إذا تعبتي إني راحتج وإذا انظلمتي إني  انتصارج كرهتي العيال احطلج بيت وحدج تخافين من الزواج إني امنج وامانج 

يُـمن والقران الكريم إني مشتريج ورايدج بعقل مو مجرد اعجاب 

بقيت ساكته ما ادري شـ اگول حايرة رجع يحچي ويگول 

-- لا تسكتين ردي 

-- شـ ارد وانا گتلك العرس كله ما افكر بيه ولا اريده اريد انا جاي افكر اكمل دراستي واتخرج وهذا هو وبعد كلشي غير الدارسة ما افكر بيه 

-- إني قابل تكملين دراسة 

-- دراستي  لا سنه ولا سنتين بعدني بداية الطريق وبعد عندي سادس وكلية 

-- عادي ما عندي مشكلة انتظرج طول العمر

-- لا تنتظر ولا تتعب عوفنـي الله يخليك

-- ما اگـدر 

حچى هيج واختنگ رديت 

-- تگدر صدگني تگدر لان انا وانتَ ما بينا شي وكل هذا الجاي تفكر بيه تگدر تنسى لا ادور اخباري ولا تفكر بيه وانتَ تگدر 

بقى ساكت ما جاوبني رجعت اگول

-- شوفي و الله انا مو صغراً بيك لو انتَ مو مناسب لا والله بالعكس انتَ زلمه معدل اخو اخيته صاحب نخوة وغيرة وصاحب فضل عليه ما انسى طول عمري بس انا الفكرة كلها ما اريدها و ماسحتها من عمري و گلبي ما يگدر يهوى و بالي وفكري وگلبي كلهن رافضات هاي فكر العرس والارتباط و مستحيل ارجع اعيش التجربة هاي مره ثانية عشتها مره وبعد ما اعيدها وبنفس الوكت انا بعدني جاهل وما عشت ايامي عدل اريد اعيش ويا امي واضل يمها اريد ادرس واتخرج ما اگدر الله يخليك لا تزعل مني وتضوج وتحسب انا ما هاويتك الشخصك لا والله حچيتها قبل وارجع اعيدها انتَ زينة الشباب والف من تتمناك اعذرني 

بقى ساكت ما يرد وانا ساكته مده واحنه ساكتين وراها سوه اح مثل الواحد مختنگ ويريد يوخر الخنگه انوب رد

-- لا تعتذرين وهذا هو الموضوع هذا بعد ما افتحه وياج ولا اضغط عليج بس خلي بالج اني منتظرج و احبج و اريدج هسه وبعد سنه و سنتين وعشرة 

رجع سكت انوب گال

-- تصبحين على خير 

قفل الخط وانا متت عليه من القهر هسه عود ليش البشر يحب ليش يتعذب ليش ما انخلقنا بلاية حب ولا علاقات سبحان الله 

ربي ما يخلق شي بلاية سبب وحكمة 

بيومها ما گدرت انام وگوه جبرت روحي وضليت مغمضه بس كون اغفى لحد ما غفيت وحتى نومتي ما ارتاحيت بيها خلصتها اتفزز وتگلب 

ثاني يوم گعدت ضايجة ومالي خلك إحس بروحي كسرت خاطره الولد خوش ولد وحباب بس انا ما اگدر ما اريد العرس والارتباط مو بـ ايدي 

مشت الأيام عليه والوضع مثل ما هوَ گاعدة بالبيت اقرأ ومرات نطلع انا وأمي للسوك لو البيت عمي هاشـم لو عمي ياخذنا يطلعنا يونسنا 

بهاي الفترة انگطعت اخباره وبعد ما خابر ولا حاول وانا گلت خلص بعد تقبل الموضوع ونسى السالفه وبوكتها مـراد جان يحظر العرسة وتميم يعدل بيته يريد يحول بيه لان ابنه صار جبير ومرته هسه حامل مره ثانيـة يريد يطلع وحده ويستقر 

احنه هنا صرنا عائلتي وحده و همهم همنا وفرحهم فرحنا البنات حبابات وما سمعت منهن كلمة  ابد وخالتي ام تميم وردة وتحبني و هيَ وامي علاقتهن طيبة وعبالك اخوات 

بهاي الفترة اجوا ناس على مهـا يعودون الخالتي ام تميم بس من بعديد وبساع

 بساع صارت القسمة و انخطبت بوكتها زهـراء وامها اجن للخطبة معزومات

و منـاف وابو هم معزومين الاب اجى بس منـاف ما اجى تعذر منهم لان عنده شغل

ام زهراء خلصتها بس تباوع عليه وكل ما ادور وجهي اشوفها صافنه عليه ومن تشوفني اباوع عليها تبتسم و زهـراء اجت گعدت يمي وخلصتها تحچي  بـ اخوها شلون طيب وشلون نفسه حلوة و يساعد

 و يحترم و ايده مو اله مشتري گاع بالجديد 300 متر بـ إسمة و عنده سيارة وعنده وعنـده الحد ما ملت 

هيَ تحچي وانا ساكته ادري بيها عود تريد تغريني بالفلوس وجاي تسولف هاي السوالف يمي ما تدري انا هاي السوالف

 ما تهمني فكري غير تفكيري وبالي غير بال 

ضلت يمي لحد ما اجوا الناس يلا گامت من عندي ومن خطبوا وكملوا و راحوا اخذت صور هيَ والبنات و خالتي ام تميم وياهن صاحتني اخذ وياها اول شي ما اجيت بس انوب حرجتني وضلت كل شوية وگالت يلا يُـمن تعاي يُـمن لحد ما اجيت وگفت يمها واخذنا صورة جماعية 

بهاي الفتره مهـا ما طولت خطبتها واستعجلوا بالزواج و شهرين و تحدد موعد عرسهم و امي حارت شـ تشتريلي 

وشـ تـجيبلي ما خلت شي ما جابته 

من غير التعديلات والترتيبات السوتلياها بالصالون مالها لحد ما صارت الحنه احنه

 ما خلينا شي بنفسنه ما سوينا 

بوكتها جانت حنة خاصة بالبنات و كل  البنات المعزومات طالعات حلوات ومرتبات وانا حالي من حالهن جنت لابسـه فستان جوه الركبه لونه رمانـي ربع ردن وكعب اسود اول مره ما رضيت اشترية بس امي جلبت بيه واشترته انا استحي اللبس هيج لبس بس هيَ گالت حفلة بنات والناس كلها جاية وما بيه شي حلو  مرتب  

بيومها گعدنا من وكت ورحنا عليهم نساعدهم بالتحظيرات والترتيبات و الظهر امي سرحت شعري  بالشسوار و برمت كم خصله من عنده وگصتلي كذله و مكيجنتي صدگ بوكتها طلعت حلوة ومرتبـة

الحفله صارت تخبل والبنات كلهن يرگصن وهذيج الونسة الحلوة وهذيج الفرحة كلها جاية واكيد زهراء وامها جايات و زهراء ما شاءالله عليها ما قاصره طالعه تخبل

 گامت ترگص وتهوس ويا البنات ونقالها

 بـ ايدها تصور بيه ما خلت لقطة ما صورتها حتى ويا امي اخذت صورة ومثل الخطبه اله تاخذ وياي صورة ما قبلت لان ادية طالعه

 و فستاني قصير گلت الها من انزع هدومي ناخذ بس جلبت و تگول ذكرى بملابسج الحلوة حتى ارسلها الج احتفظي بيها 

اخذت وياها صورة ومن هاي الصورة والوضع تغير من هاي الصورة ونكتبلي وضع جديد وضع انفرض عليه فرض  

خلصت الحنه و ثاني يوم العرسة رحنا وياها زفيناها و زهراء نفس الشي اجت ويانا ورجعت اخذت النا صورة جماعية

 و الحمدلله بهاي الصورة جنت لابسة حجاب وبطرون وقميص شوية طويل ومستورات 

 و وره العرس بيومين امي جانت بالصالون و الدنيا الظهر والنقال يبقى يمي ما تاخذه خاف اريد شي لو يصير شي اخبارها على خط الصالون الثاني بوكتها جنت متمدده بالصالة وحدي و البيت فارغ بس انا بيه دگ عليها رقم غريب اول مره ما جاوبت لان غريب انوب رجع دگ مره ثانية وثالثة 

گلت جوز هاي امي لو عمي و يردون شي وجاي يخابرون خل اجاوبهم فتحت خط وگلت الو اجاني صوت ولد اول شي ما عرفته كل ضني تميـم گتله 

-- منو تميـم 

منـاف :- لا 

-- چا منو 

-- إني منـاف 

سكتت متفاجأة شعنده مخابر ورقم غريب طلع عندي اضن رقمه  رديت 

-- هلا بيك تفضل محتاج شي

-- اي محتاج 

-- تفضل 

-- محتاجج اريدج

سكتت مستغربة وضعة شني هذا بين فتره وفتره يحلم بيه لو شني فلمة رديت 

-- شني هذا الحچي عيب عليك مره مرتين كتلك ما اريد اعرس كوه خو مو كوه

-- لج ما اگدر ما اتحمل بعد ليش ما تحسين 

سديت النقال بوجهه رجع دگ مره ثانية ما جاوبت كتبلي رساله 

-- العصر أمي تمر عليكم حضري نفسج

قريتها واگول شني هاي كوه غصب هسه غير اگله ما اريد قابل ماكو نسوان و جلب هالجلبه  رجع دز 

-- بس خطبه تعرفي عليه وشوفيني ما اريد زواج هسه بس خل اخطب وهذا هو 

كتبتله

-- يا ابن الناس انا ما اريد العرس السالفه  السالفه مو بالتعارف انا الفكرة كلها ما اريدها ليش ما تفهمني شني يوميه نعيد السالفه ما صارت هاي 

-- صار سنه انتظر واگول باچر تقنع باچر تفكر باچر تغير رأيها الهنا وبس بعد ما اگدر تعبتت تعرفين شنو تعبت لج إني الأكره سيرة النسوان باقي اتوسل بيج إني الما اطيق احد وكلمتي ما تصير اثنين باقي ادور على رضاج  يُـمن لا تعبيني فوگ تعبي كافي الله عليج انطيني فرصة تعرفي عليه وإذا ما اقتنعتي وبقيتي تفكرين بنفس التفكير بهذاك الوقت كل واحد يروح الحاله 

ما جاوبته رجع كتبلي 

-- بس شهر واحد انطيني ما تردين خطبه عادي عوفي الخطبه بس انطيني شهر واحد احچي وياج وتحچين وياي تعرفيني واعرفج وراها إذا ما قنعتي وبقيتي مصره على قرارج اطلع من حياتج وما تسمعين صوتي طول عمرج 

نفس الشي اقرأ وما ارد ياربي شلون ورطه هاي هذا منين طلعلي رجع دزلي

--  ابقي لا تردين بس خلي بالج عندج خيارين يا إما تجي امي اليوم وتوافقين بالخطبة والمهر يا إما انطيج شهر  تتعرفين عليه غير هذول الخيارين ماكو وإذا ما قبلتي بواحد مهم الي تصرف ثاني وياج تردين تگولين لزكه يلح ما يستحي يهدد گولي اللي يخطر على بالج حچيت العندي وانتِ بكيفج 

اخر رسالة من قريتها ضوجتني و حسيته يهدد بيه ويريد يجبرني عليه بالغصب كتبتله 

-- مـراد من حب اختك ما قبلت وحسبتها خيانـة بس انتَ من تراسلني وتكتبلي هذا الحچي عادي ما يوگف عمي بعينك ولا يوگفون الولد بعينك حلال عليك وحرام على غيرك 

-- اي عفية مثل ما گلتي حلال عليه وحرام على غيري وانتِ حلال عليه وحرام على غيري رضيتي ما رضيتي هذا العندي 

ما جاوبته بعد ومن گد ما ثوله وما افتهم طحت ومسحت الرسائل خفت من المشاكل ومن امي خاف تسمع وتصير هوسة ادري بيها توگف وياي وما تنطي بيه بس نفس الوكت ادري بيها ما تلزم اللسانها وتروح تتعارك ويا و عمي يسمع وتكبر السالفه 

بيومها لا اكلت ولا نمت بقيت مثل السمجه المتهوشة الوب و صفنه تاخذني وصفنه تجيبني لليل ودگيت على زهراء گلت افهمها بلكي تحچي وياه وتنقنعه 

ردت عليه

زهـراء :- هلاو يُـمن شلونج 

-- الحمدلله زينه أنتِ شلونج اخبارج

-- الحمدلله زينه خالتي شلونها اخبارها

-- على الله ، اريد احچي وياج وحسبيني اختج

-- گولي حبيبتي عيوني الج 

-- سالمة عيونج ، انا من تزوجت گبل جنت مجبورة ردت اخلص من الظيم تالي طحت بظيم اكبر شفت اشكال والوان وما ادري شلون الله فرجها عليه وخلصت ومن خلصت اخذت عهد على روحي لا اتزوج بعد ولا احب اريد اكمل دراسة واتوفق بدراستي وهذا هو بس أخوج ما يخليني بحالي والله انا من رفضت مو صغراً بيه بس ما اريد العرس من الاساس ليش ما يفهم 

-- ليش شكو شـ صاير

-- اليوم خابرني ويگول لو تقبلين بالخطبة لو تنطيني شهر تتعرفين عليه وإذا ما تقبلين اتصرف وياج تصرف ثاني 

-- ياا شجاه

-- عفية زهراد انا ما اريد المشاكل ولا اريد السالفه توصل الامي وعمي واحنه اهل وحبايب احچي وياه لو تخلين امج تحچي وياه وتسدها من يمها 

-- هسه اشوف امي واخليها تحچي وياه مدري شبيه تخبل والله عاد هوَ ما يطيق النسوان شجاه هيج يسوي 

-- اي فدوة رحتلج حاچيها 

-- يُـمن اني ما اريد ادخل لان حچيت وياج اكثر من مره وسمعت ردج بس لازم تعرفين مو كل الزلم نفس زوجج السابق ليش تحكمين على نفسج بهذا الحكم انطي النفسج فرصة تعرفي عليه جوز تحبينه وتغيرين رأيج 

-- المشكلة مو بالحب حتى لو حبيته انا عندي أحلام اريد احققهن ما اريد اورط روحي بزواج ومسؤوليات وبيت ورجال وعيال 

-- اتفقي وياه على أحلامج وحطي شروطج عجبه خير على خير ما عجبه لا تجبرين نفسج ولا تهمين الكلامة اول واخر يتقبل الموضوع ويعوفج بس انطي النفس فرصة  و فتحي گلبج وحبي والله ماكو احلى من الحب و اخوي يحبج يموت عليج والقران ما جان هيج امي كل يوم تتوسل بيه بس تخطبله وكلهن الرادت تخطبهن حلوات ونظيفات و دارسات ومثقفات بس هوَ قافل ما يريد ما اعرف شلون هسه رادج

و حبج إحنه متفاجأين شلون غير رأية وراد الزواج منج 

سكتت منها ما رديت وهيَ بقت تحچي وتقنع بيه لحد ما ملت و سديت الخط  گعدت و حطيت ايدي على خدي وحايرة 

شوية وگمت طلعت من الغرفة لگيت امي وعمي گاعدين وسوالفهم تخبل وگفت وصفنت عليهم علاقتهم كلش حلوة ومـراد وزهراء نفس الشي تخبل علاقتهم وحتى تميم وعبير صح تميم مرات يضوجها بس علاقتهم حلوة واحد يحب الثاني واحد يحترم الثاني 

انا صدگ فشلت اول مره بس هذا مو معنى الكل نفس الشي و اول اخر راح يجي يوم واقتنع بالزواج واعرس إذا مو اليوم باچر اول واخر امي راح تخليني اقبل واعرس و هذا الحچي مالي مال كله ما اريد وما اريد يروح وارضا غصباً عليه 

زين انا ليش ما انطيه فرصـة ما دامه هيج يحبني ويريدني ومستعد يقبل بكل شروطي خليني ابدي وياه واجرب حظي من جديد 

ويا واحد هوَ رايدني محد جابرة عليه اقبل بيه بالشروط الاريدها 

بيومها تعبت من گد ما فكرت كل شوية رأي وقرار لحد ما غفيت ونمت وثاني يوم مر هدوء توقعت امه راح تجي مثل ما گال بس ما اجت مرن يومين والوضع طبيعي لا احد اجى ولا احد خابر وباليوم الثالث سمعت منـاف مخابر على مـراد گايلة 

تعال اخذ الحلقة وطلگ مالك مره يمنا

بوكتها انخبصنا خبصه من هاي التمام 

عمي يصيح على مـراد شمسوي ما شمسوي وهوَ خطيه يحلف ما مسوي شي وما بينهم شي و تميم يگلهم من الاول گلت الكم ما يتناسب لحد ما لبسوا وراحوا مراد وعمي وامي وخالتي يردون يعرفون ليش خابر شنو السبب 

تأخروا يلا رجعوا و من رجعوا مراد راح الغرفته ميت من القهر وعيونه بگصته 

و احنه گعدنا يمهم نريد نفتهم السالفه 

سألهم تميـم 

-- شكو شنو الموضوع ليش خابر وحچى هذا الحچي 

هاشـم :- ما لگيناه بالبيت ولا اجانه ولا شوفنا وجهه يگولون جاي ماخذ التليفون من اخته وحاضر مـراد و مخابر عليه يجي يفصخ الخطوبة سألينه ليش راد طلعنا مو گد المقام 

تميـم :- شنو هذا الحچي منو گايل عليهم مو گد المقام 

-- ما ادري شـ سأمع ما ادري 

-- شـ سامع يعني هوَ منو حاچي وجايب طاريهم 

-- الله اعلم شـ واصله وهيج حچى 

ام تميم :- والله اني من الاول ما هويت هذا الزواج من شفت أسلوبه ومن شفتها تطلع وتطب بدون عيب ومستحى ويا مراد بس شأسوي مو بـ ايدي 

هاشـم :- عيب هذا الحچي لا تحچين هيج الأبنية بذمة ابنج وكلامج هذا راجع عليج 

سكتت بس ضايجة و البيت كله ضايج اسبوع كامل يرحون ويرجعون عليهم وهوَ قافل على سالفة احنه مو گد المقام حچوا ويا شـ اسمع ليش هيج تگول ماكو ما يرد غير ماكو قسمة لان انتوا ناس مقامكم عالي وما تناسبون امثالنا 

عمي خطية شگد يحچي ويگول انتوا اهلنا والحچي السامعينه هذا افترا و محد منا مقلل من قيمتكم بس ماكو نتيجة 

مراد المسكين غده تراب متندم لان ما عاقد محكمة بس سيد و كل شوية وگال هسه لو عاقد محكمة اروح اجيبها غصباً عليه وهذيج الابنية مناك منتهية بس تبچي

انوب همزين انا اجيت اتورط واحبه همزين الله سترني وما حچيت ويا

 ضلينا هيج لحد ما عدت عشر ايام عمي مل و گال المراد روح طلگها شنو نتوسل بيهم يردون حجه علينا شو لا احد حاچي عليهم و لا احد مأذيهم ولا يقبل يگول شاسمع نام وگعد طلع بهاي السالفه من الأخير يريد حجه علينا  

مراد سمع عمي والمسكين مات من القهر خطية هوَ يحبها وهيَ هم تحبه شني ذنبهم باقين يكسرون الخاطر لحد ما  اليوم الساعـة ب12 الظهر اندگ الباب علينا امي جانت بالصالون وبس انا بالبيت صحت من وره الباب منو اجاني صوت مراد يگول إني 

بسرعة فتحتله طب بس شني بس واحد يطخه يبچي رايح منتهي من القهر سلم

و طب للصاله طبيت وراه شفته گاعد وصافن رجعت جبتله مي واجيت گعدت يمه واسأل بيه

-- شني الوضع 

-- بعده قافل ما ادري شنو السبب ولا يقبل يگول شـ سامع 

-- زين شني الحل

-- قبل شوية راسلتني من جهاز ابوها هاج شوفي شـ كاتبة

حچي هيج وانطاني نقاله اخذته منه وقريت الرساله كاتبة بيها 

-- هلاو حبيبي شلونك مشتاقتلك لا تتوقع اعوفك لو اعرف يموتني 

مرجع الها مـراد

-- راح اخابر 

-- لا ما اگد لان حالياً الوضع بيتنا اسوء من وضع بيتكم وبابا ومنـاف فد مره صايره بيناتهم و ماما مريضة بسبب المشاكل والوضع متشنج بكل البيت ما اريدها تزيد بينهم راسلتك بس حتى اطمنك عني وبنفس الوكت اگولك إني شاكة منـاف جاي يسوي هيج بسبب يُـمن 

من قريت إسمي بسرعة رفعت راسي باوعت على مـراد ميته من الفشلة انا شعليه رجعت دنگت للنقال واقرأ شفته رادلها

-- يُـمن شعليها 

-- قبل فتره خطبها ورفضت وراها رجع هم خطبها وهم رفضت واخر مره اتصل عليها وحچى وياها بس ما انطته مجال ومتعاركة وياه ما اعرف شنو وعلى الاغلب دايسة ويا بالكلام والهذا السبب شد ويانا وسالفه المقامات حجه لا اكثر ولا اقل لان محد بيكم حاچي علينا 

-- شنو هذا الحچي احنه شعلينا بـيمُـن بعدين احنه مو اطفال ونخطب ونفركش على حساب حياته الشخصية الابنية ما تريده هيَ مو جبر 

--  مراد هذا الموضوع لا تحچي بيه الاحد إذا عرف بيه حاچيه هيج يموتني بس شوف يُـمن بلكي تگدر تأثر عليه 

قفلت النقال وضليت لازمته ما ادري شگول هذا تسودن چا انا حظي بس المسودنيين يفترون عليه خرب حظي بقيت ساكته واباوع المراد وميته من القهر هسه انا شأسوي شلون احل هاي السالفه 

حتى هذيج الايام من فكرت وبديت اقتنع هسه من وره عملته هاي بطلت گتله 

 

يُـمن :- انا اسفه

مـراد :- شمسوية حتى تتأسفين ما بيج صوج الصوج صوجي من الاول ما استعجلت وفضيتها 

-- إذا تريد اخابره واحچي ويا 

سكت ما جاوبني انوب رد

-- لا عوفيه إني راح اشوف شلون ارتب الوضع ويا بس ادعيلي 

-- الله يريح بالكم ويجمعكم بـ اقرب وقت 

-- اللهم آمين 

گام طلع وانا طلعت وراه سديت الباب ورجعت اريد اگعد بمكاني ما گدرت عود هذا صدگ يحچي يعني يروح يكسر بخت اخته و يخرب حياتها تسودن لو هوَ مسودن من زمان 

زين انا إذا رضيت بيه منو يگول ارتاح ويا وما اتعذب إذا عقله وتفكيره هيج وبعدين هوَ مطلگ خاف بعد يومين تصير عزيزة

 و يروح يرجعها الخاطر ابنه ومن هاي الحجج وانا الهسه ما ناسية ظيم أديان وخبالها 

يا ربي ساعدني تعبت وانتَ اعلم بحالي اعلم بالزين والشين اكتبلي الخير وسهل على مـراد و زهراء وضعهم وخليهم يتزوجون بخير وسلامة 

گعدت بالصاله وصافنه ما ادري شأسوي 

وكل ما افكر اروح احچي ويا اتردد واخاف 

لحد ما خلص اليوم عليه بطلعان الروح 

وامي رجعت من الصالون بس ما فتحت وياها الموضوع ولا گلت الها اجى مراد

ثاني يوم دگ رقم غريب على امي ما جابت خفت لا هذا هوَ انوب اجتني رساله مكتوب بيها يُـمن اني زهـراء ردي عليه بسرعة

گمت وگفت وگفه و ميته من التفكير شتريد شكو رجعت دگت من جديد بسرعة جاوبتها 

زهـراء :- شلونج يُـمن

-- هلا بيج شلونج اخبارج طمنيني عليج بالي يمج

-- ما اگدر احچي هواي هذا رقم بابا جاي اتصل من عنده يُـمن فدوة منـاف عاند ويانا و يريد يخرب علينا لان انتِ رفضتيه 

اني داخله على الله وعليج بس احچي ويا مثل ما حچيتي هذيج المره إذا الي خاطر  لو المراد خاطر يمج ساعدينا

-- انا ياهو مالتي والله زحمة هذا الحچي لا تسمعج الناس شتگول عليه 

-- اعرف ما تردين الزواج كله بس هوَ عباله رافضته الشخصة هيج يفكر

-- انا گتله انتَ زينة الشباب و الف من تتمناك بس العرس انا ما اريده 

-- لا تتزوجينة ولا توافقين عليه بس احچي ويا بلكي تگدرين تأثرين على قرارة والله اموت إذا بقى هيج مصر و رافض زواجنا

سكتت ما ادري شأكول انا ياهو مالتي وحاطتني بالنص گامت تبچي وتتوسل بيه 

وانا گلبي الفطير بسرعة انقهر على البشر گتلها دزي رقمه لان هذيج المره من خابر مسحته لا امي تشوفه سدته من عندي ورجعت دزت الرقم  

كتبت الرقم وضليت حايرة اخابرة لو ما ادخل خاف اخابره ويفشلني وإذا ما اخابره خاف اندم واشبع قهر عليهم اخر شي دگيت واگول يلا لو بالهدف لو بالنجف خليني ابري ذمتي حتى بعد يومين ما يكتلني تأنيب الضمير واحمل روحي سبب 

دگيت عليه بسرعة رفضه من شفته رفضه ما خابرت بعد گلت عرفني وما يريد يحچي وياي ضليت گاعدة والنقال بـ ايدي عشر دقايق تقريباً ورجع هوَ دگ 

گمت من الخوف وانوب رجعت گعدت ما ادري شصار بحالي گمت ارجف، خلصت المكالمة الاولى وانا ما راده وارجف واهذ الصالة واجيبها رجع دگ مره ثانية گلت

 يا رب و رديت اجاني صوته يگول

-- الوو

-- الو

-- منو 

-- انا يُـمن

-- اهلاً محتاجة شي ؟ 

صفنت شني هذا شو طلع ما يعرف الرقم 

ويحچي وياي من وره خشمة ضليت ساكته رجع گال

-- الوو

-- الو 

-- شكو محتاجة شي ليش متصله 

-- على مود مـراد و زهراء 

-- شبيهم 

-- خطيه تسوي بيهم هيج حرام عليك

-- شمسوي 

-- الولد والابنية عاقدين و الله ساتر عليهم تجي وتطب بخطيتهم ليش شني السبب الخلاك تغير رأيك و تبطل تنطيها قابل السالفه لعب خو ما لعب  

ما جاوبني بس سمعته يگول

-- بهذاك الدرج فايل لونه سمائي بيه كل المعلومات اسحبهن وعلى إساسهن تحركوا 

رجع اليمه يردله 

-- حاضر سيدي 

وراها صار هدوء و رد عليه 

-- شنو شگلتي ما سمعتج 

-- مراد وزهراء خطية خربت عليهم حرام عليك

-- اي 

-- شنو الاي 

-- مو وياج 

حچى هيج ورجع يگول 

-- اي هذا السجل 

استغفرت ربي و سكتت سمعت الولد اليمه يگله إسم المدعي علي سالم فاروق والمدعي عليه واثـق حاكـم نعمة 

انا سمعت اسم واثق وانا شصار بحالي 

شبيه واثق ليش مشتكين عليه جاي يگول المدعي عليه واثق واسم عمي حاكم وجدهم رجع منـاف يرد على الولد اليمه

-- اخذ القضية يمك انتَ اللزمها بس خليني بالصورة و كل خطوة تصير انطيني خبر بيها

-- حاضر سيدي 

رجع گالي 

-- شنو شبيهم زهراء ومراد

-- شبيه واثق منو مشتكي عليه

-- يا واثق 

-- هسه سمعت الولد يگلك واثق حاكم نعمة 

-- اي شنو تعرفينه 

-- اي اعرفه هذا إبن عمي 

-- هاا 

-- اي شبيه 

-- ما بيه بس مشتكين عليه

-- ليش شمسوي ومشتكين عليه 

-- داعم واحد واحتمال الرجال يودع 

-- لا عليك الله

-- اي 

-- وينه هسه 

-- بالسجن 

-- وراح يضل بالسجن 

-- اكيد 

-- واثق حباب واكيد ما يدري بيه و مو قصده خطية

-- ايي 

سكتت ما رديت شكله ضايج وروحه طافرة رحع گال 

-- المهم شتردين شبيهم مراد و زهراء

-- ليش تريد تخرب خطبتهم خطيه حرام عليك

-- اختي وبكيفي 

-- لا مو بكيفك اختك على عيني وراسي بس مو بكيفك الابنية عاقده والولد ماكو منه همَ واحد يحب واحد على يا اساس تخرب حياتهم 

سكت ما جاوبني رجعت اگول 

-- الولد يحبها وهيَ تحبه وماكو شي مو زين صاير بينهم ليش تتدخل بينهم

 و دمرهم شيسمونها هاي مو عيب عليك مو حرام توگف بقسمتهم ابغض الحلال عند الله الطلاق وانتَ جاي بلاية سبب تريده يطلگها 

-- يُـمن 

سكتت ما جاوبته رجع گال يُـمن نفس الشي ما اجاوب تخربط وضعي كله من ذكر إسمي وهوَ من ما جاوبت وشافني ساكته  گال 

-- أحبچ ومستعد اخرب الدنيا كلها بس كون احظي بيج 

ضليت ساكته وهوَ نفس الشي رجع سكت 

شويـة و رديتله 

-- يعني هسه انتَ مسوي هاي الهوسه كلها ومخرب عليهم حياتهم من وراي 

-- لا مو من وراج بس على مودج 

-- وشتفرق بالحالتي بسببي

-- لا تفرق  

-- اگلك ترى ما صارت هاي شني لزكت خو ما لزكت يا اخي ما اريد اتزوج شني جاهل انتَ وتروح تتصرف هيج تصرفات ترى مصختها استحي على دمك 

بوكتها من حچيت هيج جنت كلش مقهورة من عنده و سوالفه طلعتني من طوري وهوَ من سمعني هيج حچيت ضحك بصوت عالي و گال

-- و ام البنين أحبچ وهذا صوتج مستعد اشترية بعمري العباس عليج قبلي بالخطوبة وإذا قبلتي بالخطبة مراد وزهراء يرجعون غير هاي ما عندي

ضليت ساكته واگول بيني وبين روحي بعد ما بيها مجال لازم احچي لامي وهيَ تتصرف ويا هذا شافني ساكته عليه مره مرتين وهيج گام يتمادى رجع گـال

-- لج شلون هيج حلوة وما بيج عيب صوتج هدوئج شعرج شكلج عود صدگ ما بيج غلط واحد لو لان احبچ ما اشوف بيج غلط 

-- شني شعري شني شكلي شو ما تستحي

-- فستاتج الرماني شعرج الحلو طولج مكياجج وگفتج حفظتهن على الغيب من گد ما ركزت بيهن وباوعت عليهن 

صابتني صدمة و جمدت بمكاني هذا شجاي يحچي وين شايفني بهذا الشكل انوب تذكرت زهراء اخذتلي صورة بحنه مها بسرعة رديت عليه  

-- لا يا ما تستحي انتَ وهذيج اختك مصورتني وجايبتني الك چا شگد انتَ وياها بلاية غيره وناموس وانا الفطيرة مقهورة عليها راح تخرب خطبتها و تخرب عساها ما رجعت ولا تعرس يطبها طوب انا شكو وجاي اخذ وانطي وياك 

حچيت هيج وسديت النقال بوجهه بس شني ارجف و احس گلبي طلع من مكانه من القهر هاي الادب سزز ماخذه الصورة ومشوفتها اله وانا بلاية حجاب و ادية ورجليه طالعات الله لا ينطيها 

بيومها متت من القهر من الـ 2 الظهر 

لحد الساعة بالسبعة المغرب انا ما مهوده افور لحد ما اندگ الباب امي جانت هسه جاية راحت فتحته شوية وسمعتها تگول 

-- اهلاَ وسهلاً يا هلا تفضلوا تفضلوا 

گمت واجيت للمطبخ وگفت وره الشباك واباوع منو اجانه تفاجأت وانا شفت منـاف

 و امه وابو 

يتبع .... 

تكملة الرواية من هناااااااا 

لمتابعة  الرواية الجديدة زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كاملةمن هناااااااااا

مجمع الروايات الكامله 1اضغط هناااااااا

 مجمع الروايات الكاملة 2 اضغط هناااااا