رواية عــروس الجبـــايــش الفصل الخامس والاربعون 45بــقلم يـــاســـة الموسوي
رواية عــروس الجبـــايــش الفصل الخامس والاربعون 45بــقلم يـــاســـة الموسوي
#عــروس_الچبـــايــش 🌼
#الــبـارت__45
#بـقلم_يــاســـة_الموسوي🌱
في كل لوم سمعته وفي كل باب أغلق في وجهي كنتُ أزداد يقيناً بأنكِ نهاية الطريق وأعظم انتصارات القلب أنتِ الفوز الذي يغني عن كل شيء "
.........................
يُـمـن :- وره ما قريت كلامه رفعت راسي الربي ودعيت على عمي غازي بحرگه گلب
وراها قفلت النقال وبعد ما رديت عليه رجع دزلي ما فتت على الرساله ولا قريتها مره واثنين دز وراها خابر ابد ما رفعت راسي للنقال ولا شلته ولا قريت شي كلش اختنگت وانقهرت على امي
طلعت للصاله حطيت اذني على غرفتها ماكو صوت معناها نايمة استحيت اطب اشوفها لان عمي يمها
بقيت بالصاله گاعدة وايدي على خدي وحايرة بزماني افكر شلون لو صار شي
بـ امي منو يرحمني وانا شفت بعيني شلون اكلوني بس سمعوا بيها سوت حادث ولو ما بُـرهـان چا انا هسه الله اعلم المن مزوجيني جوز نفس رجل فطيم يگومني بكتله ويگعدني بكتله جوز زلمه شايب
جوز على شرج كلشي يطلع منهم
حطيت ايدي على خدي وصافنه ما ادري وين يريد بيه زماني بعدين گلت ليش ما اجرب انطي فرصة البُـرهـان شو الولد حباب وما يعيبة شي ويحبني ويحترمني واسلوبة يخبل خليني اجرب و اشوفه من غير باب
بعدين سكتت واگول هسه هذا هم يعتبر زواج عليه والناس ما ترحم صدگ ما عدنا احد ولا عدنا علاقات بالجيران بس الناس الها الظاهر واكيد راح تطلع عليه السالفه شگلك يوميه مخطوبة ومتزوجة ومخربة
بعدني گاعدة و سمعت باب غرفه امي انفتح رفعت راسي شفت امي طلعت وياها عمي يساعدها بسرعة گمت من مكاني وسألتها
-- بيج شي
شهيناز :- لا بس اريد اروح للحمام
اخذها عمي يساعدها للحمام وانا بقيت بالصاله گاعدة رجع عمي گعد يمي شكلة ما نايم ابد باوع عليه وگال
-- ليش ما نايمة
-- ما انعس
-- يُـمـن حبيبتي تعرفين شگد أحبچ واعزج ومكانتج عندي شلونها مو صح
-- اي والله ادري الله يحفظك ويطول بعمرك انا هم احبك واعزك الله شاهد
-- سمعيني يا بابا وخلي هذا الكلام بـبالج المثل بُـرهـان ما يتعوض وما يطلع بالعمر غير مره وحده لا تضيعينه من ايدج لو مهما جانت ضروفج ضروفه هوَ اصعب منج ومع ذلك اتحداها و اعترفلج و خطبج
-- عمي انا اخاف اخطي خطوة جديدة اخاف هم يطلع مثل مناف اول مره ماكو مثله و شلونه وراها يطلع وجها الثاني عليه وخلاني حتى روحي كرهتها
-- مو كل اصابعج سوى ولا كل الزلم تشابة مناف شي و بُـرهـان شي واني شي وتميم شي ومراد شي حبيبتي بابا انتِ لازم تساعدين نفسج و تأسسين حياتج
و تتركين الخوف والسكوت و تصيرين سباعية و تسويلج عائله وبيت والله يا عمو اني ما متعاجز منج واحبج وافكر بيك حتى اكثر من بناتي لان بناتي راحن وتزوجن وارجالهن زينين وياهن بس انتَ بعدج
والمشكلة وراج عمام لا يحللون ولا يحرمون فـ شاغله بالي اكثر منهن واريدلج الزين و كل ما جاي اصفن الها جاي اشوف ماكو احسن من بُـرهـان الج
-- ورائف وبيت عمي حاكم
-- رائف ماضي وانتهى وبيت عمج حاكم ما عدهم كل علاقة بيت بُـرهـان العلاقة انتهت بينهم من زمان حسب كلام بُـرهـان وابو وبعدين حتى لو اكو صلة قرابة وعلاقة بينهم شنو يعني المهم بُـرهـان وتفكيرة وعقليته وانتهى الموضوع، و بُـرهـان عين الله عليه شايل عقل وثقافة و زرانه ما موجودة عند الكل فـ هذا الموضوع خليه اخر همج وفكري بنفسج وعوفي الناس
سكتت ما حچيت شي طلعت امي من الحمام وباوعت علينا بس ما حچت شي كملت للغرفة و عمي رجع گال
-- اخذي وقتج وفكري كلش هواي والولد مستعد ينتظرج سنه وسنتين ما عنده مشكلة يگول المهم تقتنع و تتقبلني وحدها بدون جبر
-- شوكت گالك
-- من اجوا حچى وياي هوَ وابو
بقيت بس اباوع وما ادري شأسوي وعمي گام الغرفته ينام رجعت انا الغرفتي طبيت وسديت الباب فتحت النقال لگيته هواي داگ عليه و كاتبلي اكثر من رساله وكلهن يبرر بيها موقفه القديم اتجاة امي و كاتب مستعد ينتظرني و يوگف بوجه الكل بس كون اگله انا راضيه
ما جاوبته بس طفيت النقال ونمت ثاني يوم الظهر اندگ الباب علينا محد جان موجود بس انا وامي رحت من وره الباب صحت منو ما رد رجعت گلت منو اجاني صوته گال
-- إني
تفاجأت لان اجى گلت جوز جاب الشيخ واجى يطلگ بسرعة رجعت ركض گلت الامي و لبست حجابي و اجيت فتحتله بس مدري شبيه احس گلبي يدگ سريع ومتوتره فتحت الباب شفته جاي وحده محد وياه بس شافني ابتسم بتعب و گال
-- شلونج
-- الحمدلله
-- امج هنا
-- اي
-- خابرت عمج استأذنت منه قبل لا اجي بس اريد احچي ويا امج إذا ما بيها ازعاج
-- اي تفضل
حچيت هيج وصرت على جهه طب وانا سديت الباب وراه وگف ما مشى و دار يباوع عليه نزلت راسي استحي اباوع عليه گال
-- وين امج
-- جوه بالصاله
-- انطيها خبر
-- اي فوت للديوانية هسه اصيحها
مشى للديوانية طب وانا رحت الامي گلت الها مخابر على عمي ويريد يحچي وياج لبست وراحت يمه وانا ضليت اكل بروحي اكل اريد اسمع شيريد شلون بيه
مشيت من باب الديوانية على الصاله حطيت إذني ماكو ما اسمع شي رجعت للمطبخ سويت جاي سريع وطلعت للحوش وگفت يم الباب و بقيت اسمع
جان يحچي بس صوته ناصي يعني مو كل الحچي اسمعه اول شي يسألها على صحتها و وضعها وراها گالها
-- ادري بيج ما تحبيني ولا ترديني وحقج إذا جنتي ماخذه موقف من عندي واعتذر إذا بيوم من الايام حچيت شي قلل منج وضوجج
وراها سوالف الها شلون عمي غازي گايل الهم علي امي شردت وهاشم مو رجلها
يعني سولف سبب سوء الفهم والنظره الجان ماخذها عليها وامي ما ترد بس ساكته وتسمع
رحت انا سريع للجاي طفيته وصبيت واخذته و وگفت يم الباب وصحت
-- يماا هذا الجاي، گالت تعاي
طبيت والاستكان هيج يلعب بـ ايدي كلي ارجف شبيه ما ادري، حطيته على الطبله المقابيلة وافتريت اريد اطلع گالت امي
-- اوكفي و اسمعي
وگفت متفاجأة شتريد وهوَ نفس الشي يباوع عليها ويرجع يباوع عليه رجعت گالت
-- قبل لا يبدي يحچي شلون حبج وشلون رادج وشلون وشلون من الاخير احچولي شنو البيناتكم
يُـمـن :- والله ما بيناتنا شي
بُـرهـان :- قبل فترة صارحتها و رفضت غير هيج ما بينا شي ولا صاير شي لحد ما صارت سالفة عمامها وخابرني تميم وعقدت عليها
رجعت باوعت عليه وگالت
-- تردينه
ما حچيت شي ولا گدرت ارد رجعت گالت
-- إذا تردينه لبسي و روحي ويا بما انو هوَ صار زوجج وعاقد عليج بس من هسه لا اني امج ولا انتِ بنتي من اللحظة اللي تحطين ايدج بـ ايده تحسبيني متت
حچت هيج وگامت رجع هوَ گال الها
-- بس دقيقة يعني برأيج هذا أسلوب للحوار شلون هيج ينحل الموضوع
ما جاوبته عافته ومشت طلعت گام هوَ وگف واجى عليه نصى و يگول
-- بعدني حتى ما حچيت وياها امج فد مره كارهتني ، يُـمن ما جنت اتمنى احطج بهذا الموقف واخلي نفسي بميزان واحد ويا امج اعتذر منج
ولا رديت ولا حچيت بس اختنگت واريد بس ابچي بعد ما اتحمل رجع گال
-- اعرف اختيارج شنو واعرف من البداية اني خسرانج بس مو بـ ايدي و حاولت اتحدى الضروف واكسر القوانين وافوز بيج بس القدر ناوي يوجع گلبي و يطول
بـ اختباري، يُـمـن إني مستعد انتظرج طول العمر وعلى گلبي احلى من العسل بس انطيني كلمة وگولي انتظر وراها كلشي سهل يصير
ما جاوبت شي بس بچيت مسح دموعي
بـ ايده بعدت وجهي منه سريع رجع شال ايده و گال
-- لا تبچين ولا تقهرين نفسج مترديني خلص براحتج مو جبر الموضوع سعادتج وراحتج عندي اهم من كل شي لا تضغطين على نفسج ولا تجبرينها على شي ما مقتنعه بيه هسه راح اروح اجيب الشيخ واجي واطلگج بس اسكتي لا تبچين
حچى هيج و طلع من البيت وانا گعدت بالديوانية وانتهيت من البچي ما ادري شأسوي ولا اگدر اخذ قرار كلش ضايعه
وحايرة
بقيت بالدوانية ما طلعت منها وامي هم ما اجت ولا شافتني نص ساعة وطلعت للصالة ما لگيتها بالصالة طابة الغرفتها وانا هم طبيت الغرفتي وين اروح ويامن احچي اخر شي طلعت نقالي و خابرت على تميم بس دگ عليه رد
-- هلا يابة
-- شلونك ابو علي
-- الحمدلله ، بيكم شي شو صوتج مدري شبيه
-- اريد احچي وياك
-- احچي شكو
-- بُـرهـان اجانه قبل شوية وحچى ويا امي بس ما قبلت تسمع من عنده و كالت إذا تردينه لبسي وروحي وياه بس انسيني من هاي اللحظه حسبيني متت
-- لااا وبعدين
-- عافتنا وراحت الغرفتها وهوَ گال مستعد ينتظرني ويتحمل بس كون انطيه كلمة واذا ما اگدر هسه راح يجيب الشيخ ويجي يطلگ
-- وشگتيله
-- ما گتله شي سكتت
-- زين انتِ شنو رأيج
-- ما ادري خايفة وحايرة وضايعة
-- من شنو خايفة
-- اخاف اخطي خطوة جديدة ويطلع نفس مناف ورائف وتالي هم ينحسب عليه عرس وبس الفضايح گدام الناس
-- شوفي كلنا عدنا اخطأ وكلنا عدنا اطباع متعبه بس اخطأ عن اخطأ تختلف واطباع عن اطباع تختلف ما اگلج بُـرهـان مثالي ونبي مرسل لان ما معاشرة ولا شايفه وبصورة عامة ما نگدر نحكم عليه الا نعاشرة لان المثل يگول عاشر وشوف بس اكيد اخطائه او اطباعة اهون من اللي عرفتيهم والسبب هوَ يعرف كل اللي عشتيه يعني الماضي مالتج مكشوف گدامه و هوَ قابل بيه وفوگاها جازف مجازفه كبيرة مو كل احد يگدر يجازفها و حبج واعترف بحبه ، هوَ حقج تخافين وحق تحيرين بس ما لازم توگفين بنفس المكان والحياة تجارب جربي حظج مره واثنين وثلاثة شنو المشكلة لحد ما تلگين اللي يناسبج ويناسب طبعج وافكارج محد اله يمج شي وإذا على الناس فـ الله بعظمته ما سالم منهم
-- وامي
-- امج شغلتها سهلة
-- لا هيَ كلش ما تحبه ولا تريده
-- إذا شافته زين وياج ويحبج ويحترمج ويقدرج راح تحبه على حبج
-- گالت حسبيني ميته إذا اخذتيه
-- هذا حچي لا اكثر ولا اقل وبعدين امج عوفيها عليه موضوعها يمي المهم هسه انتِ والباقي سهل
-- حرت اكثر
-- الله لا يحير عبده لج بابا هوَ المثل بُـرهـان هم واحد يحير بيه ويفكر بيه غلط ترى الولد اخلاقة عالية فوگ ما تتصورين
ومرتب الدرجة و مثقف و عقله يوزن بلد
والله ماكو افضل منه وهيج احسه مفصل عليج و اثنيكم حلوين
ضحكت عليه لان بدأ يصنف رجع گال
-- لج انوب عنده اخت تخبل هيج صاكه
-- هااااا بديناااا
-- وجع فوگ ما انصح تردين بيج ما احصل شي من وراج
-- والله الا اگول العبير
-- عليج وعلي عبير ولي يلا
قفل الخط بوجهي ضحكت عليه شگد ما ملطلط يا ربي وياريت صدگ عنده علاقات ونسوان لا والله فد واحد فارغ وبس صيت
وللسان كلشي ماكو
بقيت لازمه النقال وصافنه وعقلي هيج عبالك عركة بيه كل خليه تفكر شكل اخر شي كتبتله رساله
-- انتَ اكثر واحد شافني شلون تعبت وتعذبت جنت شاهد على أذيتي وعلى كسرت خاطري انا كلش تعبانة و بعد ما عندي طاقة اتحمل تعب جديد خلصت عمري ضحية للناس خلصت عمري دموعي بخدي و ما گمت اثق بـ احد ولا اصدگ بـ احد ولا اصدگ بالحب واحس منو يتقرب عليه يتقرب المصلحته لان يشوفني على گد ايده وفقيرة محد حبني الشخصي الكل حبوني الخاطر مصالحهم بُـرهـان انا كلش أحترمك واقدرك وانتَ صاحب فضل عليه و گفاتك وياي هواي
و ما انساهن طول العمر، بس الزواج مو سهل وخصوصاً وضعنا انا وياك ، انتَ أبن خاله رائف و اكثر واحد قريب منه و امك
و امه دم واحد وتربطكم علاقة اهل
و مستحيل تنتهي علاقتكم للنهاية حتى
لو زعلتوا وتخاربتوا راح يجي يوم و راح ترجعون سوى زين بهاي الحاله انا شنو موقفي يا ترى راح تگدر تحميني من حچيهم راح تگدر تخليني ما اذكرهم واذكر ماضيهم تگدر تنسيهم وتنسيني بيوم من الايام جنت جنه بيتهم
دست ارسال وسديت النقال و طلعت الامي فتحت باب غرفتها وطبيت بس شافتني دارت وجهها گعدت مقابيلها
وحچيت
-- وداعتج الما عندي غيرج بالدنيا وبدونج انا لا شيء يا بُـرهـان ما عندي شي وياه اعترفلي قبل اي صح بس والله رفضته
و ما گتلج عليه لان انا ما مفكره بيه ولا جاي ابالي ولا بيوم من الايام جنت اشوف روحي اصير اله وما گتلج لان ما ردت الموضوع يكبر
-- يُـمـن انتِ بنتي الما عندي بهاي الدنيا غيرها بنتي المستعده اهد الدنيا الخاطرها
بنتي التعبت وتأذت الما شافت شي من عمرها بنتي الخلصت حياتها مظلومة ومحرومة و بُـرهـان هذا ما يصيرلج لان امه وام رائف خوات و عائلته وعائله رائف وحده يعني تردين ترجعين للظيم برجليح تردين ترجعين للأهانة برجليج شلون هيج واني مادصدگت خلصتج منهم
-- انا صدگ ما احبه بس الولد مشتريني ومستعد يتحمل كلشي الخاطري واهله وبيت عمي حاكم من زمان خربوا وحتى لو رجعوا اكيد ما يرجعون مثل گبل وخصوصاً إذا عرفوا انا وياه متزوجين يمه انا ما عندي بهاي الدنيا غيرج وبس وگعتي انهدو عليه الچلاب من كل كتر ومجبورة اتزوج واحمي روحي منهم انا من بعد منـاف جريت إذني من الزلم كلهم وكرهتم وبعد ما ثقيت بيهم ولا اصدگهم وكل فكري جنت اتمنى اكمل دراستي واتخرج واتعين واعيش الروحي بس وره ما تمرضتي وشفت عمامي شلون اجوا عليه رجعت بتفكيري يما ويموتوني إذا ضليت بلا سند عبالج انا عاجبني الحال ومرتاحة لا والله انا كل هذا ما رايدته بس غصباً عليه راح ارضا
-- اي مو بُـرهـان يُـمـن مو بُـرهـان صعبه
يا امي صعبه راح تتعبين فوك هذا التعب
-- همَ اخرب الخطبة وانخطب الغيره وينحسب عليه مثل ما انحسبوا هذولاك عاد بُـرهان اعرفه وهوَ يعرف البيه والما بيه احسن من ما اخذ واحد ما يدرني عني وبعد يومين يدور حجج عليه ويفتح دفاتر عتيگه ويحاسبني عليها
بقت ساكته بس ابد ما عاجبها ولا مقتنعه
وانا هم سكتت منها وراها طلعت الغرفتي
اول شي اجيت للنقال اريد اشوفه رد لا
لگيته دازلي
-- اول ما خطيت هالخطوه واعترفتلج
و إني حاميج منهم ومتجاوزهم و مخليهم وره ظهري صح جنتي بيوم من الايام جنه الهم بس همَ، مو ولي امري حتى احير بيهم وبـ افكارهم اصلاً اخر همي وهمج اما اهلي فـ يختلفون على باقي الاهل
و بعمرهم ما ادخلوا بحياتي ولا عارضوا قرارتي وبعدين اني ما اخذت هيج قرار إذا ما جنت متأكدة منه ومن نفسي ومنهم ومن ردت فعلهم ، و امي كلش فقيرة وطيبة وعكس باقي اخواتها وابوي إنسان تعبان على نفسه وعلينا وصدگيني هوَ اول المؤيدين القرار وريـام انتِ تعرفينها ما حاجه احچي عنها اما بخصوص بيت خالتي فـ العلاقة القوية اللي تعرفينها انتهت من سنين صح اخر كم سنه رجعوا يحجون امي واخواتها بس مو مثل قبل يعني بس بالمناسبات يصير سلام بينهم اما إني
فـ لليوم ما رجعت علاقتي بيهم ولا شفتهم ولا شافوني يُـمن وداعتج إني أحبچ و ميت بيج ومستعد اتحمل كلشي في سبيل راحتج وسعادتج واخر همي الناس والمجتمع والعادات والتقاليد كلي البي يهمني هسه سعادتج و ما اريدج تفكر بشي ثاني ولا تشيل هم شي و تشغلين بالج
اريدج ترتاحين و تنسعدين غير هيج ما اريد والله
قريت الرساله وبقيت صافنه بيها مده طويلة والظاهر شافني من قريتها بين عنده
رجع دزلي
-- لازم تعرفين انتِ حبيبتي الاموت بيها وإني كلش احبچ وبغير هيج لا تفكرين
قريتها بس ما رديت وره شوية رجع كتبلي
-- هسه شنو متردين تتزوجيني اگطع الامل وياها صمايل قلب مكسورة
رديتله
-- ما ادري اخاف
-- اعرف كلمة زواج عندج صارت كلمة مرادفة للفشل واعرف انتِ حالياً مثل الارض القاحلة لا تنزرع ولا يثبت بيها بناء وإني يا عمري مستعد ارمم هذه الارض وازرعها وابني بيها السعادة والأمان يُـمني حبيبتي تعرفيني إني حالياً عندي ثلاث مهمات وكلش صعبات واتمنى انجزهن
بـ اسرع وقت الاولى ارممج من الداخل
و اجبر كسر روحج و ازرع بيج الأمل والحب والثقة ، والثانيـة اثبتلج إني غير عن اللي مروا بحياتج غير عن اللي شفتيهم اريد اثبتلج إني ثقتج و سندج
و أمانج والثالثة اريد ابنيلج اسرة سعيدة دافية آمنه
حبيبتي وعمري إذا جان الزواج بنظرج قفزة للمجهول فـ إني مستعد اقفز بيج للمعلوم واشوفج الزواج من منظور ثاني و اريد اقدملج مهر بعيد عن المال والمجهورات والديكورات مهر عبارة عن سلامتج النفسية وسعادتج الابدية وإذا غلطت بحقج بيوم من الايام الج حقج تجين تطالبين بمهرج وتاخذينه من عيوني
-- ما جاوبت لان ما اعرف ارد ولا اعرف اجاوب وهوَ بعد ما كتب شي لحد ما خلص هذا اليوم و ثاني يوم اجانا تميم واشرلي اعوفهم وحدهم هوَ وامي
عفتهم وحدهم وطبيت الغرفتي بقى يمنا
كلش هواي بس ما سمعت صوتهم ابد جانوا يحچون بصوت ناصي لحد ما كملوا حچي صاح عليه بصوت عالي
-- لج الططوووووه
گمت طلعت اول ما شافني ضحك وگال
-- يلا يابة شهيناز صارت بالجيب مبروك على الأستاذ المثقف
ضحكت علي سوالفه وباوعت الامي
ساكته رجع گال
-- هذا اخر جنص إذا ما ضبط وياج إني اخذج لان بعد ماكو حل و بعد محد يگلبج ابقى إني الفرصة الاخيرة و الثمينة
شهيناز :- هاي گدامك وانتَ اخوها ومو غريب عليها هاي المره اريدها تصير معدله وتكسبه وتحافظ عليه وعلى بيتها صح هذولاك مو اوادم والله خلصها منهم بس هذا سويتوا نبي عليه فـ لازم تتحمله ورجليها فوك راسها
-- عمي تتحمل وإذا ما تحملته إني اتحمله هوَ غير وردة وين اكو منه شو خل اخابره
حچى هيج وضحك وطلع نقاله دگ عليه
و فتح مايك جاوب
تمـيم :- الله يساعدك استاذ
-- اهلاً ابو علي شخبارك
-- الحمدلله شلونك انتَ اخبارك
-- الحمدلله
-- بعدك بالعراق سافرت
-- بعدني نهاية الشهر اسافر ان شاء الله
-- ها زين ما دامك بعدك هنا ياريت تجيب الشيخ وتجي تطلگ لان الابنية وامها وسطوني اخابرك ميردون الزواج
سكت ما رد يمكن حتى نفس ما گام يتنفس موته تميم ، وجع وخر النقال من حلگه ومات من الضحك وحتى امي ضحكت انوب گاله
-- الو تسمعني
بُـرهـان :- اي اسمعك
-- شوكت تجي
-- شوكت ما تردون ما عندي مانع
-- هسه إذا تگدر يكون افضل والله ما عدنا وقت
-- تمام براحتكم بس خليني اشوف الشيخ من رخصتك
حچى هيج وقفل الخط بوجه تميم وهذا باوع للنقال وگال
-- لا يا گ... سده بوجهي هههههههه
شهيناز :- روحي تلگينه جاي يخابر عليج
وصدگ بعدهي امي ما كملت كلامها وسمعنا صوت نقالي دگ تميم گال
-- ركض جيبه وتعاي
-- لا تميم عيب
-- امشي لجججج
-- والله عيب
-- امشي گتلج جيبه ولا تردين تري اخلي امج تبطل
رحت للنقال لگيته هوَ يدگ جبته وانطيته التميم فتح عليه خط وفتح مايك گال بُـرهـان
-- الو
تميم :- الو
-- منو تميم
-- اي تميم يُـمـن انطتني التليفون ما تقبل تحچي وياك شنو يا اخي لزكت خو ما لزكت ما ترديك
ما رد وخطية شصار بحاله رجع تميم ضحك بصوت عالي و گاله
-- تعيش وتاكل غيرها أستاذ حبيبي
-- شنو قصدك
-- يابة عمتك صارت بالجيب وقابلة وفرحانه بيك هم وها هسه شلوني
-- يا اخي هبط سكري وعلگ ضغطي صدگ تحچي
-- لعد شعبالك لازم نختبر سرعة الفشورة عندك قبل لا ننطيك مره
-- ههههه لا يابة بعمري كله ما مفشر ما اسويها بس گول نختبر قوة صحتك اگلك حقك
-- ههههه صحة وعافية تعيش وتاكل غيرها تسيبنا المعدل ههههههه
-- ههههه عمي بالقران جاي ارجف من الهبطه
-- هههههه الف مبروك شايف كل الخير
-- الله يبارك بيه ابو علي الطيب ممنون منك وهاي وگفتك ما انساها طول العمر
-- الله يسلمك بس اللي اريده منك ادير بالك على يُـمـن و تحافظ عليها وهذا هو
-- لا توصيني على عيوني الاشوف بيهن
--يا يابة
-- هههههه ، زين بما انو وافقوا وصارت خطوبة رسمية اگدر اجي واجيب الاهل وياي يعني اريد نلبس حلقات و شوفهم إذا يردون خطبة كامله يعني بدله وصالون يكون افضل
-- ما اعرف والله اشوفهم وارجعلك خبر
-- تمام على راحتك
-- اترخص منك
-- غالي ابو علي الورد
قفله تميم ورجع سألنا إذا نريد خطبة كاملة وبدلة وصالون امي گالت بكيفها
إذا يعجبها نسويلها احلى خطوبة بس انا
ما ردت ما يحتاج الهوسه والرسميات كلشي ما اريد غير بس ارتاح وانسعد وهذا هوَ
رجع تميم گاله يابة كلشي ما يردون لا بدله ولا صالون جيب الحلقات وتعال بالوقت اللي يناسبك اتفق ويا تميم بالليل يجي
ومن سادة من تميم مخابر على عمي ومنطيه خبر بجيتهم
وبالليل واجوا هوَ وامه وابو واخته وعمامه اثنين و نسوانهم بوكتها انا لبست فستان عندي بسيط و مرتب لونه نيلي وبيه فضي
وحجاب و خليت بس كحل لعيوني
خالتي ام تميم وعبير خابرتهن امي اجن يمنا وخطية عبير هيَ الحارت بالضيافة وجهزت كلشي وحدها
وتميم صنفها تصنيف كل شوية وگال عبير مستعده توگف بالمطبخ لمده أسبوع بدون انقطاع بس كون يُـمـن تعرس وتخلص منها
وخطية هي تبرر يا والله بالعكس اختي وشعندي وياها وهوَ يرد الها
-- يا اختج غير يومية بصلاة المغرب تدعيلها تتزوج محافظات وتختفي من بغداد لج حتى نذوره ناذرة بس كون تخلصين منها
شهيناز :- راح تشاقة وتضحك وتالي ينگلب جد و تضوجنا وتضوج ويانا داسكت عاد
-- ههههههه خاله بنتج الصاكة جنت باني عليها امال
ام تميم :- ههههههه ديلا هسه اللي يسمعه ما يصدگ كافي ولك
لحد ما اجوا موتنا وموت عبير
الزلم گعدوا بالديوانية والنسوان بالصالة العرفته بعدين وره ما راحوا راجع متفق
ويا عمي على حاضر وغايب جديد وهذاك الاخذته جدتي ما حاسبة بس عمي ما قبل ومجاوبة
-- احنه مشترين رجال واخر همنا المهر والفلوس المهم دير بالك عليها وهذا هو
ساعة گاعدين وحدهم يحچون و احنه بالصاله و امي وخالتي يحچن وياهن
واليوم امه شوية فاكه صح ما مقتنعه بعدهي بس احسن من قبل يعني تباوعلي هواي ومثل الفرحانه بس ما تگدر تتخطى هيج حسيتها
وراها ودت عليه يجي يلبستي الحلقة اجى يمنا بالصالة جان لابس دشداشة بيضة وشماغ احمر ولافه هيج لفه حلوة على راسه و طالع من صدگ حلو وهيبة بهذا الزي العربي
اول مره اشوفه هيج لابس واول مره انتبه على تفاصيل لبسه و شكله و ترتيبة
سلم و بقى واگف يستحي يجي يگعد گالته خالتي ام تميم
-- تعال يوم تعال اگعد لبسها الحلقة
اجى گعد بصفي وانا بس گعد مدري شصار بحالي ولا اردياً ادنيت لطرف القنفة
ريـام جابت العلبة مال الذهـب انطتها اله اخذها منها وطلع منها عقـد ويا تراجي بس انا لابسة حجاب وما محسبة حساب يلبسني ذهب كامل عبالي هيج راح يجون بس يگعدون وينطوني الحلقـة ويرحون
باوع عليه ورجع العقد للعلبة وطلع بس الحلقـة وساكت ما يحچي منتظرني انطيه ايدي گالت مرت عمه
-- هههه ياا راح تبقون واحد صافن بوجه الثاني انطيه ايدج خلي يلبسج الحلقة
تقرب عليه وانا مديت ايدي لبسني الحلقه والمحبس واسوار مال العقد شوية ناعم
ومن كمل رفع ايدي باسها وانا شصار بحالي إحس صخنت
والعلبة الثانية صغيرة طلعت ريام منها حلقة فضه وانطتنياها لبستها اله واديه هيج ترجف وگلبي احسه راح ينفجر من
گد ما يدگ قوي
من لبستها وكملت لزم اديه وحط اديه وحده فوك وحده جوه وبقى حاظنهن
قوي و يگول
-- ليش ترجفين
ما رديت بس انتهيت من الخجل رجع يمسح عليهن بهدوء وراها ريام اجت تريد تاخذ النا صور بنقالها وبقت تسويلنا حركات بـ ادينه ولا انا ولا هوَ مقتنعين بس ما خلتنا اله اخذت صور كامله يلا
امه گامت تبچي وهوَ انتبه عليها گام من مكانه وراح عليها باس راسها و يحچي وياها
-- ليش تبچين
-- فرحانه بيك ما مصدگه من بعد هذا العمر كله اشوفك عريس صار سنين طويلة منتظره هاي الساعة حبيبي امي
-- يا حبيبتي الله لا يحرمني منج
-- الف مبروك يوم حبيبي ان شاءالله اشوف اطفالك وافرح بيهم
-- ان شاءالله يطول عمرج ويباركلي بيج
رجع باس راسها وطلع يمهم وهي اول ما طلع اجت باستني و گالت
-- امانه عليج ادارينه وتخلينه بعيونج والله ابني ماكو منه و يحبج ومشتريج بروحة
وهاي گدام امج و خالتج ام تميم انتِ عندي حالج من حال ريـام و البيت كله
الج وشتردين بس امري و لا اني ولا عمج
ولا ريـام راح نقصر بحقج انتِ بنتها
ان شاءالله ومعزتج من معزه بُـرهـان
رجعت باستني و ميته من البچي خالتي ام تميم بقت تحچي عليها لان تبچي ردت
-- اني بعد ما عندي احد غيره هوَ وريـام وحتى اهلي خسرتهم الاخر العمر الخاطرة والخاطر سعادة واختيارة و اتمنى من ربي ينسعد ويرتاح
شهيناز :- ان شاءالله، الله يسعدهم ويوفقهم وتشوفين اطفالهم و يُـمـن بنتج
و انتِ تعرفينها من زمان شلون فقيرة وما بيها أذية واني منطيتها الكم امانه
وان شاءالله انتم گد الأمانه وهيَ
ان شاءالله ما راح تقصر وياكم وتحسبج مثلي واكثر
-- ان شاء الله
ريـام :- يابة راح ابچي يووم الله عليج كافي شوفي الدمعه وين وصلت
حچت هيج ومسحت عيونها وراها ضحكت وگالت
-- والله اثنينهم حبابين ويخبلون وان شاءالله يوم الي واحصل واحد يشبة الاستاذ بالخلقة والاخلاق ادعيلي يووووم
امها ضحكت وردت ان شاءالله ، وراها بربع ساعة ودعونا وراحوا وخالتي ام تميم وعبير وراهم بشوية هم راحن بقينا بس احنه بالبيت امي گالت
-- جهزي نفسج باجر اداومين
-- لا خليها هسه من تصيرين زينه يلا
-- زينه ما بيه شي رجعي للدوام صار فوگ الاسبوع گاعدة ما يصير هذا كله ينحسب عليج وهاي اخر سنه لا تضيع منج حرامات
طبيت الغرفتي بدلت فستاني وحضرت غراضي حتى ادوم باچر و من كملت تحضير اتمدد والنقال بـ ابدي اگلب بالفيس لگيته ناشر منذ خمس دقايق منشور صورة ادينه بيها الحلقات وكاتب فوگاها
-- لفترة طويلة كنتُ أقفُ في هذا الحب وحيداً. كان قلبي يُناديكِ، وكانت عيناكِ تقولان "لا". كانت مشاعري من طرفٍ واحد وكنتُ أعيشُ على أملٍ يراه الجميع وهماً
لم يقتصر الأمر على الرفض، بل وصلني اللومُ من كل اتجاه. كانوا يرون في إصراري سذاجة، ولم يروا في حبي إيماناً مطلقاً. لكنني كنتُ أعرف شيئاً لم يعرفوه أنكِ كنتِ المعركة الوحيدة التي تستحق القتال كان يقيني بالله ثم بكِ أكبر من كل الصعاب. صبرتُ، دعوتُ، حاربتُ وتحديتُ
والآن... بعد أن طويتُ صفحات الرفض والعناء وبعد أن أثمر إصراري وصدقي، وبعد أن سكتت كل الأصوات أقولها بملء القلب والفم: لقد أجابت بنعم!
الحمد لله الذي جبر خاطري وأكرمني بصبري. اليوم أعلن خطبتي على من كنتُ أُلامُ في حبها، على من كانت حلماً بعيداً فأصبحت قدراً قريباً. أهلاً بكِ في حياتي
يا أجمل وأغلى انتصاراتي. دعوت الله كثيراً أن يلين قلبكِ لي، وأن يصرف عني كلام الناس ولومهم. واليوم أجاب الله المضطر إذا دعاه.. كونو شهوداً على أن الإيمان بالحب لا يضيع و باركوا لي، فقد نلتُ مُرادي." الحمدلله الذي بنعمته تتم الصالحات
ابتسمت وانا اقرأ شلون حلو يكتب والاحلى متباهي وفخور بيه من بعد كل اللي مريت بيه
انطيت لايك للمنشور بس ما علقت واول ما وصله الايك دزلي
-- هوَ عادي هيج افرح لو جاي ابالغ اشو فد مره فرحانه و اول مره هيج يصير بيه اول مره هيج احس يُـمـن هواي احبچ
ادري ما راح تردين بس انتُ تستاهلين افرح بيج هيج فرح
مدري شـكتب لان ما اعرف احچي مثله
بقيت اقرأ بالمنشور وبالرساله اخر شي رديتله
-- يارب دوم الفرح والسعادة انتَ طيب وتستاهل كل خير
-- وانتِ كل الخير واني استاهلج
وراها بربع ساعة دگ عليه يسأل اذا ادوام او لا گتله اي ادوام گال اني اجي اخذج خفت خاف امي ما تقبل طلعت گتلها ومثل ما توقعت ما قبلت يجي گالت خابرت على عباس ماكو داعي يجي رديتله
-- لا تعب نفسك ابو الخط راح يجيني
-- تمام على راحتج
وراها نمت و من گعدت تجهزت وتحضرت وطلعت للدوام اول ما وصلت سلمت على طلاب شعبتي وكلها تسأل عليه وليش هيج مداومه متأخر واكو بيهم تحمدوا الامي بالسلامة لان ورود حچاية الهم
صعدت للعمادة على مود الاجازة وردت اشرح الهم ضرفي لگيت بُـرهـان ماخذلي اجازة بس ما گايلي
رجعت للشعبة لحد ما خلصت محاضراتي وقبل لا اطلع دگلي گال اني بالجامعة من تكمليني مريلي
كملت ورحت عليه دگيت الباب جان گاعد هوَ و مجموعة من دكاترة والدكتورات اول ما شافني ابتسم و گام سلمت على الجميع وراها گالهم
-- اي يابة ما باركتوا الطالبتكم المجتهد صارت خطيبتي
حچى هيج وضحك و الكل تفاجئ ما متوقعين اني خطيبتة صح نشر البارحة بحسابة خطب بس ما عبالهم اني
گلهم يتباوكوا وحتى دكتور بهاء وياهـم وراها استاذن منهم و طلعنا ويا ما نزلنا الدرج صارت يُـمـن سلطان بوجهنا
سلمت عليه واكلت اكل بالسلام عوزها شوية وتبوسه وكله استاذ الك وحشه
و مشتاقيلك و هوَ يرد السلام عليها طبيعي ويجاوبها على اسئلتها طبيعي
و گال الها
-- من رخصتج
مشينا كم خطوة صاحت ورانا
-- صدگ أستاذ البارحة شفتك ناشر خاطب الف مبروك
دار عليها ورد
-- الله يبارك بيج
-- تستاهل كل الخير بس كون العروسة تطلع تستاهلك
ابتسم وباوعلي ورد
-- لا عاد طولي بس كون اني اطلع استاهلها
-- ياا عوزها والله هيَ وين تلگه مثلك
-- إني وين الگى مثلها اقدملج العروسة
حچى هيج وضحك واشر عليه فتحت عيونها مصدومة وراها گالت
-- صدك استاذ
-- اي
-- ها خير ان شاءالله الف مبروك يُـمـن
رديت
-- الله يبارك بيج
-- بس إني مو اتذكر انتِ مخطوبة الضابط
-- جنت مخطوبة وفركشت
-- هاا اي زين الله يكتبلج البي الخير
-- اشكرج
رجعنا طلعنا وهيَ بقت واگفه بمكانها ما متوقعه الصدمة هوَ باوع عليه وگال
-- ما عندج جوز مو
-- اي ما عندي
-- باچر اجيج الصبح ونروح نقدم طلب حتى انطلعلج جواز قبل لا اسافر
-- ليش
-- غير نسافر بيه
-- اسافر برى
-- اي
-- لا شلون وامي
-- ناخذها ويانا هههههه
-- ههههه لا والله صدگ وامي
-- شبيها امج غير زوجها يمها
-- خاف ما تقبل
-- بعد معلينا بيها تقبل ما تقبل هاي مشكلتها ما دام انتِ قبلتي الباقي يسيسون
-- لا
-- يابة هسه خلينا نطلع الجواز وراها الله كريم عود نقشمرها هههه
-- عاد انتَ استاذ بالتقشمر
-- هههههههه لا بالله الكريم اصلاَ انتِ كلش صعبة وما فاد وياج تقشمر
بقينا گاعدين شوية بالكافتريا وراها خابرني عباس طلعنا اثنينا سوى صعدني ويا عباس ورجع السيارته راح بيها
اول ما وصلت للبيت بوجهي للغرفه بدلت ونمت ساعة وگعدت على صوت امي تصيح عليه تريدني اگعد افتح الباب ما تگدر تگوم وتگعد بعدهي تعبانه
گمت للباب گلت منو اجاني صوت مره گالت اني الصوت مو غريب عليه بس ما عرفته المنو فتحت الباب وانصدمت خالتي بديعـة اول ما شافتني گالت
-- انتِ متستحين ما عندج عيب ما عندج خجل الهاي الدرجة مسقطة لج شنو من بشر شنو من مله الله بلانا بيج بلوه ماكو زلم بالدنيا بس ابن خاله ابني بس ابن اختي شگلتي النفسج امج وينها وين اللسانها ما تطلع تشوفني طولهااا
جانت تحچي بصوت عالي وبالشارع والناس كلها تسمع امي طلعت على صوتها واجت
عليها متفاجأة بيها اول ما شافت امي گالت
بديعة :- ماكو زلم خلصت الناس واجيتي انتِ وبنتج على بُـرهـان لعد شگد عايقات ودايحات
شهيناز :- والله محد دايح وعايق غيرج شوفي لج اني مريضه ومالي خلك اخذي وانطي وياج امشي ولي منا لا تخليني اتصرف تصرف ما يعجب احد وحمدي ربج وشكري اخذنا بُـرهـان لا تخليني اتطلگ واخذ حاكم و اگعد على خشمج وخشم الجابج ويلااااا منااا
خالتي صفنت وراها باوعت عليه وگالت
-- شوفي ولج تعوفينه وتشوفين واحد غيره تشمرين روحج عليه ابني اذا سمع يموت واذا صار بيه شي اموتج بـ ايدي
شهيناز :- موتت الچلاب السود عار ومات يطبه مرض
-- ماتت بروحج وروح بنتج هاي الادب سزز
ام الرجوله
رجعت باوعت عليه وگالت
-- ما نخلص منج وين ما نروح تطلعين بوجهنا شوكت نرتاح منج ما كافي هجمتي بيتنااا عوفينا بحالنا الفگر بنت الفگـر
شهيناز :- محد فكر غيرج يا طايحة الحظ لج مره رجليج بالكبر راسج تارسة الشيب ما تستحين ما تخجلين امشي منااا لا تخليني اطلع اسحلج
-- انتِ كلشي اتوقع منج لذلك ما اتفاجئ بيج وانتِ بزرتها النكسه والله العظيـم إذا ما جزتي من عنده اكتلج بـ إيده حلال....
لمتابعة الرواية الجديدة زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق